မၢ်ကူး
၄ ယ့ၣ်ၡူး လဲၤသိၣ်လိကဒီးတၢ်လၢ ပီၣ်လဲၣ်နံၤ ဒီးပှၤဂီၢ်မုၢ်ဖးဒိၣ် ဟဲဘူးဒီးအီၤလီၤ. အဃိ အဝဲလဲၤထီၣ်လၢ ကဘီပူၤဒီး ဆ့ၣ်နီၤဝဲ ဒီးကဘီန့ၣ် အိၣ်စီၤစုၤဝဲဒီး ပီၣ်လဲၣ်နံၤလီၤ. မ့မ့ၢ် ပှၤဂီၢ်မုၢ်ခဲလၢာ်န့ၣ် အိၣ်လၢပီၣ်လဲၣ်နံၤလီၤ.+ ၂ ဒီးယ့ၣ်ၡူးသိၣ်လိ အဝဲသ့ၣ် တၢ်ဂ့ၢ်အါမံၤ ခီဖျိလၢ တၢ်ကတိၤဒိတဖၣ်လီၤ.+ ဒီးယ့ၣ်ၡူးတဲအဝဲသ့ၣ်လၢ+ ၃ “ကနၣ်လၢအံၤ, ပှၤဖှံတၢ်ချံတဂၤ လဲၤဖှံတၢ်လီၤ.+ ၄ ဖဲအဝဲ ဖှံတၢ်အခါ တၢ်ချံတနီၤန့ၣ် လီၤဘၣ်လၢကျဲကပၤ ဒီးထိၣ်တဖၣ် ဟဲအီၣ်ကွံာ်ဝဲလီၤ. ၅ တၢ်ချံအဂၤတနီၤန့ၣ် လီၤဘၣ်လၢ လၢၢ်အဖီခိၣ်လၢဟီၣ်ခိၣ် တအိၣ်အါအါဘၣ်လီၤ. ဒီးမ့ၢ်လၢ ဟီၣ်ခိၣ်ညၣ် ဘူဝဲအဃိ တၢ်ချံတဖၣ် မဲထီၣ်ဝဲ တဘျီဃီလီၤ.+ ၆ ဘၣ်ဆၣ် ဖဲမုၢ်ဟဲထီၣ် ဒီးဆဲးလီၤဘၣ်ဝဲ တၢ်မုၢ်တၢ်ဘိတဖၣ်အံၤအခါ အဃ့ထီဝဲ မ့ၢ်လၢ အဂံၢ်တစဲၤလီၤဘၣ် အဃိလီၤ. ၇ တၢ်ချံအဂၤတနီၤန့ၣ် လီၤဘၣ်လၢ တၤဆှုၣ်တၤမဲအကျါ ဒီးတၤဆှုၣ်တၤမဲတဖၣ် မဲထီၣ်ဒီး ခဲဘၢအီၤအဃိ အဝဲသ့ၣ် တသၣ်ထီၣ်ဝဲဘၣ်.+ ၈ မ့မ့ၢ် တၢ်ချံအဂၤတနီၤန့ၣ် လီၤဘၣ်လၢ ဟီၣ်ခိၣ်ညၣ်လၢအဂ့ၤ အဖီခိၣ်အဃိ မဲထီၣ်ဒီးအါထီၣ်ဝဲ ဒီးသၣ်ထီၣ်ဝဲလီၤ. ဒီးသၣ်ထီၣ်ဝဲ အါန့ၢ်အလီၢ်အစး ၃၀, ၆၀ ဒီး ၁၀၀ လီၤ.”+ ၉ ဒီးအတဲဝဲလၢ “ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ်ထံထံတက့ၢ်.”+
၁၀ ဖဲယ့ၣ်ၡူး အိၣ်ထဲတဂၤအခါ အပျဲၢ်အဘီၣ်တနီၤ ဒီးတၢ်မၢဖိတဆံခံဂၤ သံကွၢ်အီၤ ဘၣ်ဃးဒီး တၢ်ကတိၤဒိတဖၣ်အံၤ အဂ့ၢ်လီၤ.+ ၁၁ ယ့ၣ်ၡူးတဲဘၣ် အဝဲသ့ၣ်လၢ “သုဝဲသ့ၣ်အံၤ သုန့ၢ်ဘၣ် တၢ်ခွဲးတၢ်ယာ်လၢ သုကနၢ်ပၢၢ် တၢ်ခူသူၣ်စီဆှံလၢ+ အဘၣ်ဃးဒီး ကစၢ်ယွၤ အဘီအမုၢ်လီၤ. ဘၣ်ဆၣ် ပှၤဂၤတဖၣ်န့ၣ် ယသိၣ်လိအဝဲသ့ၣ်ခီဖျိ တၢ်ကတိၤဒိတဖၣ်+ ၁၂ ဒ်သိးအဝဲသ့ၣ်န့ၣ် ကကွၢ်ဝဲ ဘၣ်ဆၣ် တထံၣ်ဝဲဘၣ် ဒီးကနၢ်ဟူတၢ် ဘၣ်ဆၣ် တနၢ်ပၢၢ်ဝဲ အခီပညီဘၣ်. ဒီးတမ့ၢ်လၢ အဝဲသ့ၣ် ကပီၢ်ယၢ်လီၤက့ၤသး ဒ်သိး အတၢ်ကမၣ် ကပျၢ်ကွံာ်အဂီၢ် နီတဘျီဘၣ်.”+ ၁၃ ဒီးယ့ၣ်ၡူးတဲအဝဲသ့ၣ်လၢ “သုတနၢ်ပၢၢ် တၢ်ကတိၤဒိအံၤဘၣ်အဃိ တၢ်ကတိၤဒိ လၢအဂၤတဖၣ်န့ၣ် သုနၢ်ပၢၢ်အီၤ ကသ့ဒ်လဲၣ်.
၁၄ “ပှၤဖှံတၢ်ချံတဂၤ ဖှံလီၤဝဲ ကစၢ်ယွၤ အကလုၢ်ကထါလီၤ.+ ၁၅ တၢ်ချံလၢ အလီၤဘၣ် လၢကျဲကပၤန့ၣ် လီၤဂာ်ဒ်သိးဒီး ပှၤလၢအနၢ်ဟူဘၣ် ကစၢ်ယွၤ အကလုၢ်ကထါ ဘၣ်ဆၣ် ဖဲအဝဲသ့ၣ် နၢ်ဟူဘၣ်ဝဲအခါ မုၣ်ကီၤလံၢ်* ဟဲထုးထီၣ်ကွံာ်ဝဲ+ ကစၢ်ယွၤ အကလုၢ်ကထါ လၢဘၣ်တၢ်ဖှံလီၤအီၤလၢ အဝဲသ့ၣ် အသးပူၤလီၤ.+ ၁၆ ဒ်န့ၣ်အသိး တၢ်ချံလၢ အလီၤဘၣ်လၢ လၢၢ်အဖီခိၣ်န့ၣ် လီၤဂာ်ဒ်သိးဒီး ပှၤလၢအနၢ်ဟူဘၣ် ယွၤအကလုၢ်ကထါ ဒီးတူၢ်လိာ်ဝဲလၢ တၢ်သးခုအပူၤတဘျီဃီလီၤ.+ ၁၇ ဘၣ်ဆၣ် အဂံၢ်တစဲၤလီၤလၢ အသးပူၤဘၣ်အဃိ အဝဲသ့ၣ်တူၢ်တၢ်န့ၢ် ထဲတစိၢ်ဖိလီၤ. ဖဲအဝဲသ့ၣ် တူၢ်ဘၣ်တၢ်နးတၢ်ဖှီၣ် မ့တမ့ၢ် တၢ်မၤအၢမၤနးလၢ ကစၢ်ယွၤ အကလုၢ်ကထါအဃိအခါ အဝဲသ့ၣ် လီၤဃံၢ်ဝဲလီၤ. ၁၈ အဂၤတနီၤန့ၣ် တၢ်ဖှံလီၤအီၤလၢ တၤဆှုၣ်တၤမဲအကျါလီၤ. တၢ်ချံတဖၣ်အံၤ လီၤဂာ်ဒ်သိးဒီး ပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ+ ၁၉ ဘၣ်ဆၣ် စိၤခဲအံၤ အတၢ်ကိၢ်တၢ်ဂီၤတဖၣ်,+ တၢ်ထူးတၢ်တီၤ အတၢ်လီတၢ်ဝ့ၤ+ ဒီးတၢ်သူၣ်လီသးကွံလၢ အဂၤတဖၣ်+ နုာ်လီၤဝဲလၢ အဝဲသ့ၣ်အသးပူၤ ဒီးခဲဘၢကွံာ် ကစၢ်ယွၤ အကလုၢ်ကထါအဃိ တသၣ်ထီၣ်ဝဲဘၣ်. ၂၀ ဒီးတၢ်ချံလၢ အလီၤဘၣ်လၢ ဟီၣ်ခိၣ်ညၣ်လၢအဂ့ၤ အဖီခိၣ်န့ၣ် လီၤဂာ်ဒ်သိးဒီး ပှၤလၢအဒိကနၣ် ကစၢ်ယွၤ အကလုၢ်ကထါ ဒီးတူၢ်လိာ်ဝဲလၢ တၢ်သူၣ်အိၣ်သးအိၣ်အပူၤ ဒီးသၣ်ထီၣ်ဝဲ အါန့ၢ်အလီၢ်အစး ၃၀, ၆၀ ဒီး ၁၀၀ လီၤ.”+
၂၁ ယ့ၣ်ၡူးတဲစ့ၢ်ကီး အဝဲသ့ၣ်လၢ “မ့ၢ်ပှၤဟဲစိာ် မ့ၣ်အူဒၢ ဒ်သိး ကပာ်အီၤလၢ နာ်တဖျၢၣ်* အဖီလာ် မ့တမ့ၢ် လၢစီၢ်နီၤခိၣ်* အဖီလာ်ဧါ. ပှၤဟဲစိာ်အီၤ ဒ်သိး ကပာ်ထီၣ်အီၤလၢ မ့ၣ်အူဒၢအလီၢ် တမ့ၢ်ဧီၤ.+ ၂၂ တၢ်ခူသူၣ်လၢ အတဘၣ် တၢ်မၤဖျါထီၣ်အီၤဘၣ်န့ၣ် တအိၣ်ဘၣ် နီတမံၤဘၣ်. ဒီးတၢ်တမံၤဂ့ၤ တမံၤဂ့ၤလၢ တၢ်ပာ်ခူသူၣ်အီၤဘၢဘၢန့ၣ် ကဖျါထီၣ်ဝဲလီၤ.+ ၂၃ ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ်ထံထံတက့ၢ်.”+
၂၄ ဒီးအဝဲတဲဝဲလၢ “တၢ်လၢ သုနၢ်ဟူတဖၣ်န့ၣ် ဒိကနၣ်အီၤ ထံထံဆးဆးတက့ၢ်.+ နမ့ၢ်ဟ့ၣ်တၢ် အါအါန့ၣ် နကဒိးန့ၢ်ဘၣ်က့ၤထဲန့ၣ် ဒီးအါန့ၢ်အလီၢ်ဒံးလီၤ. ၂၅ ပှၤလၢအအိၣ်ဒီး တၢ်သ့ၣ်ညါနၢ်ပၢၢ်န့ၣ် အကန့ၢ်ဘၣ်အါထီၣ်ဝဲ+ ဘၣ်ဆၣ် ပှၤလၢ အတအိၣ်ဒီး တၢ်သ့ၣ်ညါနၢ်ပၢၢ်ဘၣ်န့ၣ် တၢ်သ့ၣ်ညါနၢ်ပၢၢ်လၢ အိၣ်ဒီးအီၤဒၣ်လဲာ် ကလီၤမၢ်ကွံာ်ဝဲလီၤ.”+
၂၆ အဝဲဆဲးတဲဝဲလၢ “တၢ်လၢ ကစၢ်ယွၤ အဘီအမုၢ်န့ၣ် လီၤဂာ်ဒီး ပှၤတဂၤလၢ အဖှံလီၤတၢ်ချံလၢ ဟီၣ်ခိၣ်လိၤလီၤ. ၂၇ လၢမုၢ်နၤခီန့ၣ် အဝဲမံဝဲ ဒီးလၢဂီၤခီန့ၣ် ပၢၢ်ထီၣ်ဝဲလီၤ. တၢ်ချံတဖၣ်ဟဲမဲထီၣ် ဒီးဒိၣ်ထီၣ်ဝဲ ဒ်လဲၣ်ဒ်လဲၣ်န့ၣ် အတသ့ၣ်ညါဝဲဘၣ်. ၂၈ ဟီၣ်ခိၣ်ဒုးမဲထီၣ်ဝဲ တၢ်ချံတဖၣ် ကယီကယီလီၤ. အဆိကတၢၢ်န့ၣ် အထူၣ်ဟဲထီၣ် ဒီးအချုၣ်တဖၣ်* ဟဲလီၤစဲၤ ဒီးလၢခံ လၢအချုၣ်လိၤန့ၣ် ပှဲၤဝဲဒီး အသၣ်တဖၣ်လီၤ. ၂၉ ဖဲအသၣ်တဖၣ် ဘီထီၣ်ဝဲအခါ အဝဲကူးဝဲဒီးထါဂဲာ်, မ့ၢ်လၢ ကူးတၢ်အဆၢကတီၢ် ဘၣ်ဝဲအဃိလီၤ.”
၃၀ အဝဲဆဲးတဲဝဲလၢ “တၢ်လၢ ကစၢ်ယွၤအဘီအမုၢ်န့ၣ် ပကဘၣ်ထိၣ်သတြီၤအီၤဒီး မနုၤလဲၣ်. ဒီးဒ်သိး ပကတဲဖျါထီၣ်အီၤအဂီၢ် ပကဘၣ်တဲ တၢ်ကတိၤဒိဒ်လဲၣ်. ၃၁ အလီၤဂာ်ဒီး သဘၣ်အချံ* လၢဘၣ်တၢ်ဖှံလီၤအီၤလၢ ဟီၣ်ခိၣ်အလိၤလီၤ. လၢတၢ်ချံခဲလၢာ် အကျါန့ၣ် အမ့ၢ်တၢ်ချံလၢ အဆံးကတၢၢ်လီၤ.+ ၃၂ ဘၣ်ဆၣ် ဖဲတၢ်ဖှံလီၤအီၤဝံၤအခါ အဟဲမဲထီၣ်ဝဲ ဒီးဒိၣ်ထီၣ်ဝဲ တုၤလၢအဒိၣ်န့ၢ်ဒံး ကယဲၢ်တၢ်ဒိးတၢ်လၣ် အထူၣ်အဂၤတဖၣ် ခဲလၢာ်လီၤ. ဒီးအဒ့ထီၣ်ဝဲ ဖးဒိၣ်အဃိ ထိၣ်လၢ တၢ်ဖးဖီတဖၣ်န့ၣ် ဟဲအိၣ်ကဒုလၢ အဖီလာ် သ့ဝဲလီၤ.”
၃၃ ဖဲယ့ၣ်ၡူး တဲဘၣ်အဝဲသ့ၣ်လၢ ကစၢ်ယွၤ အကလုၢ်ကထါအခါ အဝဲသူဝဲ တၢ်ကတိၤဒိ ဒ်အံၤတဖၣ်အါမး,+ ဘၣ်ဆၣ် အတဲဝဲဒ်အဝဲသ့ၣ် နၢ်ပၢၢ်ဝဲသ့ထဲလဲၣ် အဖီခိၣ်လီၤ. ၃၄ မ့ၢ်လီၤ, တၢ်ကတိၤဒိ မ့ၢ်တပၣ်ဘၣ်န့ၣ် အဝဲတတဲတၢ်ဒီး အဝဲသ့ၣ်ဘၣ်. ဘၣ်ဆၣ် ဘၣ်ဃးဒီး တၢ်ဂ့ၢ်ခဲလၢာ်န့ၣ် အဝဲတဲနၢ်ပၢၢ် အပျဲၢ်အဘီၣ်တဖၣ် လၢတၢ်ခူသူၣ်အပူၤလီၤ.+
၃၅ တၢ်တနံၤန့ၣ် ဘၣ်ဖဲမုၢ်ဟါလီၤအခါ ယ့ၣ်ၡူးတဲဘၣ် အဝဲသ့ၣ်လၢ “ပကလဲၤခီဃီၤလၢ ဝၢ်ဘးခီနီၤ.”+ ၃၆ ဖဲအဝဲသ့ၣ်ပျဲက့ၤ ပှၤဂီၢ်မုၢ်တဖၣ် ဝံၤအလီၢ်ခံ အဝဲသ့ၣ် ဒုးဒိးထီၣ်ယ့ၣ်ၡူးကဘီ ဒီးဒိးထီၣ်ဝဲ ကဘီဒီးအီၤလီၤ. ဖဲန့ၣ်န့ၣ် ကဘီလၢအဂၤတဖၣ် အိၣ်ဝဲစ့ၢ်ကီးလီၤ.+ ၃၇ ဒီးကလံၤမုၢ်ဖးဒိၣ် ဟဲဝဲ ဒီးလပီတဖၣ် ဟဲဘၣ်ထံးဝဲ ကဘီနးမး ဒီးထံနုာ်လီၤဘူးကပှဲၤဝဲလၢ ကဘီအပူၤလီၤ.+ ၃၈ ဘၣ်ဆၣ် ယ့ၣ်ၡူးအိၣ်လၢ ကဘီအလီၢ်ခံတခီ ဒီးမံဝဲလၢ ခိၣ်သခၢၣ်အလိၤလီၤ. အဃိ အဝဲသ့ၣ် လဲၤကိးပၢၢ်ထီၣ်အီၤ ဒီးတဲအီၤလၢ “သရၣ်ဧၢ, ပကသံလီၤ. နတဘၣ်ယိၣ်တၢ် နီတမံၤဧီၤ.” ၃၉ ယ့ၣ်ၡူးဂဲၤဆၢထၢၣ် ဒီးတဲကလံၤ ဒီးပီၣ်လဲၣ်လၢ “အိၣ်ပတုာ် ဒီးအိၣ်ဘှ့ၣ်တက့ၢ်.”+ ဒီးကလံၤန့ၣ် အိၣ်ပတုာ်ဝဲ ဒီးတၢ်ခဲလၢာ် အိၣ်ဂၢၢ်က့ၤဝဲလီၤ. ၄၀ ဒီးယ့ၣ်ၡူး တဲအဝဲသ့ၣ်လၢ “ဘၣ်မနုၤအဃိ သုပျံၤတၢ် ထဲအံၤညါလဲၣ်. သုတၢ်နာ်တအိၣ် နီတစဲးဧီၤ.” ၄၁ ဘၣ်ဆၣ် အဝဲသ့ၣ် ပျံၤတၢ်ဒိၣ်မး ဒီးတဲလိာ်အသး တဂၤဒီးတဂၤလၢ “အဝဲ မ့ၢ်မတဂၤလဲၣ်. ကလံၤဒီး ပီၣ်လဲၣ်မး ဒိကနၣ် အကလုၢ်ဒံး.”+