မၤတၢ်
၁၃ ဝံတဖၣ် ဒီးပှၤသိၣ်လိတၢ်တဖၣ် အိၣ်ဝဲလၢ ဝ့ၢ်အၣ်တံၤအီာ် အတၢ်အိၣ်ဖှိၣ်ပူၤ+ ဒီးအဝဲသ့ၣ်မ့ၢ်ဝဲ စီၤဘၢ်နါဘၤ, စီၤစူၤမ့းအိးလၢ ပှၤကိးအီၤလၢ စီၤနံက့ၢ်, စီၤလူကံၤလၢ အဟဲလၢ ဝ့ၢ်ကူၤရ့ၤန့, စီၤစီလူး ဒီးစီၤမနၤအ့ၣ် လၢအထီၣ် တၢ်မၤလိဃုာ်ဒီး ပဒိၣ်စီၤဟ့ၤရိာ်လီၤ. ၂ ဖဲအဝဲသ့ၣ်မၤ ယဟိဝၤယွၤ* အတၢ်မၤ ဒီးဒုၣ်တၢ်အီၣ်အခါ သးစီဆှံတဲဝဲလၢ “ယဃုထၢထီၣ် စီၤဘၢ်နါဘၤ ဒီးစီၤစီလူး+ ဒ်သိးကမၤတၢ်မၤတခါ အဂီၢ်လီၤ. အဃိ ပာ်လီၤဆီ အဝဲသ့ၣ် လၢယဂီၢ်တက့ၢ်.”+ ၃ ဒီးအဝဲသ့ၣ် ဒုၣ်တၢ်အီၣ်ဒီး ဃ့ထုကဖၣ်တၢ် ဝံၤအလီၢ်ခံ ပာ်ထီၣ်အစုလၢ စီၤဘၢ်နါဘၤဒီး စီၤစီလူးအလိၤ ဒီးဆှၢလီၤအဝဲသ့ၣ်လီၤ.
၄ အဃိ သးစီဆှံ ဆှၢလီၤ စီၤဘၢ်နါဘၤဒီး စီၤစီလူး ဒီးအဝဲသ့ၣ်လဲၤလီၤလၢ စ့းလူကံၤ ဝံၤဒီးအဝဲသ့ၣ် ဒိးထီၣ်ကဘီဒီး လဲၤဝဲလၢ ကီးကူပြူးလီၤ. ၅ ဖဲအဝဲသ့ၣ် လဲၤတုၤလၢ ဝ့ၢ်စလၤမံအခါ အဝဲသ့ၣ် စးထီၣ်စံၣ်တဲၤတဲလီၤဝဲ ကစၢ်ယွၤ အကလုၢ်ကထါ လၢပှၤယူဒၤဖိ အဘူၣ်ဘျီၣ်တဖၣ် အပူၤလီၤ. ဒီးစီၤယိၤဟၣ်အိၣ်ဒီး အဝဲသ့ၣ် ဒ်ပှၤမၤစၢၤတၢ်တဂၤ လၢအဝဲသ့ၣ် အဂီၢ်လီၤ.+
၆ အဝဲသ့ၣ် လဲၤသကုၤလၢ ကီးဒီဘ့ၣ်ညါ တုၤဃီၤလၢ ဝ့ၢ်ပါပူးလီၤ. ဖဲန့ၣ်န့ၣ် အဝဲသ့ၣ် ထံၣ်လိာ်သးဒီး ပှၤယူဒၤဖိတဂၤလၢ အမံၤမ့ၢ် စီၤဘၢ်ယ့ၣ်ၡူး လၢအမ့ၢ် ပှၤအူတၢ်လိၢ်တၢ် ဒီးလၢအမ့ၢ်စ့ၢ်ကီး ဝံအဘျၣ်တဂၤလီၤ. ၇ ဒီးအဝဲအိၣ်ဒီး ပဒိၣ်ဖးဒိၣ်တဂၤ လၢအမ့ၢ် စီၤစ့ၢ်ကံပီလူးလီၤ. စီၤစ့ၢ်ကံပီလူးန့ၣ် အသးဆူၣ်လၢ ကနၢ်ဟူဘၣ် ကစၢ်ယွၤ အကလုၢ်ကထါအဃိ အကိးဝဲစီၤဘၢ်နါဘၤ ဒီးစီၤစီလူးလၢအအိၣ်လီၤ. ၈ ပှၤအူတၢ်လိၢ်တၢ်တဂၤန့ၣ် ပှၤကိးစ့ၢ်ကီးအီၤလၢ စီၤအ့းလူမၤ (အခီပညီမ့ၢ်ဝဲ ပှၤအူတၢ်လိၢ်တၢ်) လီၤ. ပှၤတဂၤအံၤ ထီဒါအဝဲသ့ၣ် ဒ်သိးပဒိၣ်ဖးဒိၣ် သုတစူၢ်က့ၤနာ်က့ၤတၢ် တဂ့ၤအဂီၢ်လီၤ. ၉ စီၤစီလူးလၢ ပှၤကိးစ့ၢ်ကီးအီၤလၢ စီၤပီလူးန့ၣ် လၢထီၣ်ပှဲၤထီၣ်ဒီး သးစီဆှံ ဒီးကွၢ်အီၤထံထံ ၁၀ ဒီးတဲအီၤလၢ “ပှၤလၢအပှဲၤဒီး တၢ်လံၣ်တၢ်လီ ဒီးတၢ်အၢတၢ်သီ ကိးကလုာ်ဒဲး, မုၣ်ကီၤလံၢ်အဖိခွါ,+ တၢ်တီတၢ်လိၤကိးမံၤဒဲး အဒုၣ်အဒါတဂၤဧၢ, ဘၣ်မနုၤအဃိ နမၤက့ၣ်မၤကူ ယဟိဝၤယွၤ အကျဲတီကျဲလိၤတဖၣ်လဲၣ်. ၁၁ ယဟိဝၤယွၤ အစုကအိၣ်လၢနလိၤ ဒီးနမဲာ်ကဘျီၣ် အဃိနတထံၣ် မုၢ်တၢ်ကပီၤလၢၤဘၣ် ကအိၣ်တတီၤဖိလီၤ.” တဘျီဃီန့ၣ် ဘှ့ၣ်ဒီးတၢ်ခံးလီၤဘၣ်အီၤ, အမဲာ်ချံကဒုထီၣ် ဒီးခံးလီၤအဃိ အဝဲဟးဝ့ၤဝီၤဃု ပှၤလၢကဖီၣ်ထီၣ်အစုဒီး ဆှၢအီၤအဂီၢ်လီၤ. ၁၂ ပဒိၣ်ဖးဒိၣ်တဂၤ ထံၣ်တၢ်မၤအသးတဖၣ်န့ၣ် ဒီးအဝဲကမၢကမၣ်ဝဲ ဘၣ်ဃးဒီး ယဟိဝၤယွၤ အတၢ်သိၣ်လိတဖၣ်အဃိ အဝဲကဲထီၣ် ပှၤစူၢ်က့ၤနာ်က့ၤတၢ်လီၤ.
၁၃ စီၤပီလူးဒီး ပှၤလၢအအိၣ်ဒီးအီၤတဖၣ် ဒိးထီၣ် ကဘီလၢဝ့ၢ်ပါပူး ဒီးလဲၤဝဲတုၤလၢ ဝ့ၢ်ပ့ၢ်က့ၤလၢအအိၣ်လၢ ပၣ်ဖူၤလံအပူၤလီၤ. ဘၣ်ဆၣ် စီၤယိၤဟၣ်+ ပာ်တ့ၢ်အဝဲသ့ၣ် ဒီးက့ၤကဒါက့ၤဝဲလၢ ဝ့ၢ်ယရူၤၡလ့ၣ်လီၤ.+ ၁၄ မ့မ့ၢ် အဝဲသ့ၣ်န့ၣ် ဟးထီၣ်လၢ ဝ့ၢ်ပ့ၢ်က့ၤဒီးလဲၤဝဲလၢ ဝ့ၢ်အၣ်တံၤအီာ်လၢ ပံၤစံၤဒံအပူၤလီၤ. ဒီးလၢ မုၢ်အိၣ်ဘှံးနံၤန့ၣ် အဝဲသ့ၣ်လဲၤနုာ်လီၤဝဲလၢ ဘူၣ်ဘျီၣ်ပူၤ+ ဒီးဆ့ၣ်နီၤဝဲလီၤ. ၁၅ ဖဲပှၤဖး စီၤမိၤၡ့အတၢ်သိၣ်တၢ်သီ+ ဒီးဝံအတၢ်ကွဲးအသးတဖၣ်လၢ ကမျၢၢ်အမဲာ်ညါ ဝံၤအလီၢ်ခံ ဘူၣ်ဘျီၣ်အခိၣ်တဖၣ် ဆှၢန့ၢ် အဝဲသ့ၣ်တၢ်ကစီၣ်လၢ “ဒီပုၢ်ဝဲၢ်ခွါဧၢ, သုတၢ်ကတိၤလၢ အဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်မ့ၢ်အိၣ်န့ၣ် တဲသၢၤ.” ၁၆ အဃိ စီၤပီလူးဂဲၤဆၢထၢၣ် ဒီးနဲၣ်ထီၣ်အစု ဒီးတဲဝဲလၢ
“ပှၤအံၣ်စရ့လးဖိ ဒီးပှၤအဂၤတဖၣ်လၢ အပျံၤယွၤသ့ၣ်ဧၢ, ဒိကနၣ်တက့ၢ်. ၁၇ အံၣ်စရ့လး အကစၢ်ယွၤ ဃုထၢထီၣ် ပမိၢ်ပၢ်ဖံဖု လၢပျၢၤတဖၣ်လီၤ. ဖဲအဝဲသ့ၣ် ကဲပှၤထံဂၤကီၢ်ဂၤဖိလၢ ကီၢ်အဲၤကူပတူး အပူၤအခါ အဝဲဒုးကဲထီၣ်အဝဲသ့ၣ်လၢ ပှၤတကလုာ်လၢ အဂံၢ်ဆူၣ်ဘါဆူၣ် ဒီးထုးထီၣ်ကွံာ် အဝဲသ့ၣ်ဖဲန့ၣ် လၢအစိဒိၣ် ကမီၤထီလီၤ.*+ ၁၈ ကစၢ်ယွၤ ဝံသးစူၤ အဝဲသ့ၣ်လၢ ပှၢ်မုၢ်ကနၢအပူၤ အနံၣ် ၄၀ လီၤ.+ ၁၉ ဒီးအဝဲမၤဟးဂီၤ ပှၤနွံကလုာ်လၢ ကီၢ်ကနၤဧၣ်အပူၤ ဝံၤဒီးဟ့ၣ်လီၤ အဝဲသ့ၣ် ကီၢ်တဘ့ၣ်န့ၣ်လၢ တၢ်န့ၢ်သါအဂီၢ်လီၤ.+ ၂၀ တၢ်သ့ၣ်တဖၣ်အံၤ ခဲလၢာ်န့ၣ် မၤအသးဖဲ အနံၣ် ၄၅၀ အတီၢ်ပူၤလီၤ.
“ဖဲန့ၣ်ဝံၤ အလီၢ်ခံ အဝဲဟ့ၣ်လီၤ အဝဲသ့ၣ် လၢပှၤစံၣ်ညီၣ်ကွီၢ်တဖၣ် တုၤလီၤလၢ ဝံၡမူၤအ့လး အစိၤလီၤ.+ ၂၁ ဘၣ်ဆၣ် လၢခံအဝဲသ့ၣ် ဃ့ထီၣ်ဝဲ စီၤပၤတဂၤအဃိ+ ကစၢ်ယွၤဟ့ၣ်လီၤ အဝဲသ့ၣ်လၢ ပှၤတဂၤလၢ ဘံၣ်ယၤမံၣ် အဒူၣ်ကျါ လၢအမ့ၢ် စီၤကံၣ်အဖိခွါ စီၤစီလူး+ ဒီးစီၤစီလူး ပၢအဝဲသ့ၣ် အနံၣ် ၄၀ လီၤ. ၂၂ ကစၢ်ယွၤ ထုးထီၣ်ကွံာ်စီၤစီလူး ဝံၤအလီၢ်ခံ ပာ်ထီၣ်စီၤဒၤဝံးလၢ+ အဝဲသ့ၣ် အစီၤပၤလီၤ. ဘၣ်ဃးဒီး စီၤဒၤဝံးန့ၣ် ကစၢ်ယွၤ အုၣ်အသးလၢ ‘စီၤယံးၡဲအဖိခွါ စီၤဒၤဝံးန့ၣ်+ မ့ၢ်ပှၤတဂၤလၢ ယဘၣ်သူၣ်ဘၣ်သးအီၤ+ ဒီးအဝဲကမၤ တၢ်ခဲလၢာ် ဖဲယသးလီၤ.’ ၂၃ ဒီးဒ်ကစၢ်ယွၤ အၢၣ်လီၤပာ်စၢၤဝဲအသိး လၢစီၤဒၤဝံး အစၢၤအသွဲၣ်အကျါန့ၣ်* ကစၢ်ယွၤဒုးအိၣ်ထီၣ်ဝဲ တၢ်အုၣ်က့ၤခီၣ်က့ၤ ကစၢ်တဂၤ လၢအံၣ်စရ့လးအဂီၢ် လၢအမ့ၢ် ယ့ၣ်ၡူးလီၤ.+ ၂၄ တချုးလၢ ယ့ၣ်ၡူး ဟဲဒံးဘၣ်အခါ စီၤယိၤဟၣ် စံၣ်တဲၤတဲလီၤတၢ်လၢ ပှၤအံၣ်စရ့လးဖိ ခဲလၢာ်အအိၣ် ဘၣ်ဃးဒီး တၢ်ဒိးဘျၢထံအဂ့ၢ် လၢအမ့ၢ် တၢ်ပနီၣ်လၢ တၢ်ပီၢ်ယၢ်လီၤက့ၤသးအဂီၢ်လီၤ.+ ၂၅ ဘၣ်ဆၣ် ဖဲစီၤယိၤဟၣ် မၤအတၢ်မၤ ဘူးကဝံၤအခါ အဝဲတဲဝဲ တလီၢ်လီၢ်လၢ ‘သုဆိကမိၣ်လၢ ယမ့ၢ် မတဂၤလဲၣ်. ယတမ့ၢ် ပှၤတဂၤန့ၣ်ဘၣ်. ပှၤလၢ အကဟဲလၢ ယလီၢ်ခံတဂၤန့ၣ် ထဲလၢယကဃဲၣ်လီၤကွံာ် အခီၣ်ဖံးပျံၤဒၣ်လဲာ် ယတကြၢးဘၣ်.’+
၂၆ “သုဝဲ ဒီပုၢ်ဝဲၢ်လၢအမ့ၢ် စီၤအၤဘြၤဟၣ် အစၢၤအသွဲၣ် ဒီးပှၤအဂၤလၢ သုကျါလၢအပျံၤယွၤသ့ၣ်ဧၢ, ကစၢ်ယွၤဆှၢလီၤ တၢ်အုၣ်က့ၤခီၣ်က့ၤ အကစီၣ်အံၤလၢ ပအိၣ်လီၤ.+ ၂၇ ပှၤလၢ အအိၣ်ဝဲဆိးဝဲလၢ ဝ့ၢ်ယရူၤၡလ့ၣ်အပူၤ ဒီးအဝဲသ့ၣ်အပှၤခိၣ်ပှၤနၢ်တဖၣ်န့ၣ် တတူၢ်လိာ်ဝဲ တၢ်အုၣ်က့ၤခီၣ်က့ၤကစၢ်တဂၤန့ၣ်ဘၣ်. ဘၣ်ဆၣ် ဖဲအဝဲသ့ၣ် စံၣ်ညီၣ်အီၤအခါ မ့ၢ်ဒၣ်အဝဲသ့ၣ် မၤလၢထီၣ်ပှဲၤထီၣ် ဝံအတၢ်ကွဲးအသးတဖၣ်လၢ+ ပှၤဖးထီၣ်အီၤလၢ ကလုၢ်ဒိၣ်ဒိၣ် ဖဲမုၢ်အိၣ်ဘှံးနံၤ ကိးဘျီဒဲးလီၤ. ၂၈ အဝဲသ့ၣ်တထံၣ် တၢ်ကမၣ်လၢ အကြၢးဘၣ်တၢ်မၤသံအီၤအဂီၢ်ဘၣ်.+ ဘၣ်ဆၣ် အဝဲသ့ၣ်ဃ့ဝဲ ဆူၣ်ဆူၣ်ဒ်သိး စီၤပံၤလး ကစံၣ်ညီၣ်သံအီၤအဂီၢ်လီၤ.+ ၂၉ အဝဲသ့ၣ် မၤလၢထီၣ်ပှဲၤထီၣ်ဝဲ တၢ်ကွဲးအသး လၢအဘၣ်ဃးဒီး အီၤခဲလၢာ် ဝံၤဒီးအဝဲသ့ၣ် စိာ်လီၤကွံာ်အီၤလၢ သ့ၣ်တၢၣ်အလိၤ ဒီးပာ်လီၤအီၤလၢ တၢ်သွၣ်ခိၣ် အပူၤလီၤ.+ ၃၀ ဘၣ်ဆၣ် ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံ+ ၃၁ ဒီးပှၤလၢ အလဲၤတၢ်ဒီးအီၤ စးထီၣ်လၢ ကၤလံၤလါတုၤလီၤလၢ ယရူၤၡလ့ၣ်န့ၣ် အဝဲလီၣ်ဖျါထီၣ်အသးလၢ အဝဲသ့ၣ်အမဲာ်ညါ အါနံၤအါသီလီၤ. ဒီးအဝဲသ့ၣ်ကဲထီၣ် ပှၤအုၣ်အသးတဖၣ် လၢအဂီၢ် လၢပှၤဂၤ အမဲာ်ညါလီၤ.+
၃၂ “အဃိ ပစံၣ်တဲၤတဲလီၤသုလၢ တၢ်သးခုကစီၣ်ဘၣ်ဃးဒီး ကစၢ်ယွၤ အတၢ်အၢၣ်လီၤလၢ အအၢၣ်လီၤ ပမိၢ်ပၢ်ဖံဖု လၢပျၢၤတဖၣ်လီၤ. ၃၃ ပဝဲဒၣ်လၢအမ့ၢ် အဝဲသ့ၣ် အဖိအလံၤတဖၣ်န့ၣ် ကစၢ်ယွၤ မၤလၢပှဲၤန့ၢ်ပှၤ တၢ်အၢၣ်လီၤအံၤ ခီဖျိလၢ အမၤသမူထီၣ်က့ၤ ယ့ၣ်ၡူးအဃိလီၤ.+ ဒ်တၢ်ကွဲးအသး ဖဲထါစံးထီၣ်ပတြၢၤ ခံယုၢ်တယုၢ်* တဲဝဲအသိး ‘နမ့ၢ်ယဖိခွါ ဒီးတနံၤညါအံၤ ယကဲထီၣ်နပၢ်လံ.’+ ၃၄ ကစၢ်ယွၤ မၤသမူထီၣ်က့ၤအီၤလၢ တၢ်သံ ဒီးအဝဲတအိၣ်ဒီး နီၢ်ခိလၢ အအုၣ်သံကျၣ်သံသ့ နီတဘျီလၢၤဘၣ်. ကစၢ်ယွၤ ပာ်ဂၢၢ်ပာ်ကျၢၤ တၢ်ဂ့ၢ်အံၤ ခီဖျိအတဲဝဲလၢ ‘ယကပာ်ဖျါထီၣ် တၢ်အဲၣ်လၢအတီ လၢသုဖီခိၣ် ဒ်ယအၢၣ်လီၤတ့ၢ် စီၤဒၤဝံးအသိးလီၤ. တၢ်အၢၣ်လီၤ အဝဲန့ၣ် မ့ၢ်တၢ်လၢပှၤနာ်န့ၢ်အီၤသ့လီၤ.’+ ၃၅ ထါစံးထီၣ်ပတြၢၤ အဂၤတယုၢ် တဲစ့ၢ်ကီးဝဲလၢ ‘ပှၤလၢ အတီဒီးနၤတဂၤန့ၣ် နတပျဲလၢ အကအုၣ်သံကျၣ်သံဘၣ်.’+ ၃၆ စီၤဒၤဝံးလၢ အမၤယွၤ အတၢ်ဘၣ်သးလၢ အတၢ်အိၣ်မူဒီတစိၤန့ၣ် သံဝဲ ဒီးပှၤခူၣ်လီၤအီၤ ဃုာ်ဒီးအမိၢ်ပၢ်ဖံဖု လၢပျၢၤတဖၣ် ဒီးအစိၣ် အုၣ်သံကျၣ်သံဝဲလီၤ.+ ၃၇ မ့မ့ၢ် ပှၤလၢ ကစၢ်ယွၤ ဒုးဂဲၤဆၢထၢၣ်က့ၤအီၤတဂၤန့ၣ် တအုၣ်သံကျၣ်သံဘၣ်.+
၃၈ “ဒီပုၢ်ဝဲၢ်သ့ၣ်ဧၢ, ခဲအံၤ ယဒုးသ့ၣ်ညါသုလၢ သုတၢ်ဒဲးဘးကပျၢ် ခီဖျိလၢ ပှၤတဂၤအံၤအဃိလီၤ.+ ၃၉ စီၤမိၤၡ့ အတၢ်သိၣ်တၢ်သီန့ၣ် ဒုးကဲထီၣ်သုလၢ ပှၤတီပှၤလိၤတသ့ဘၣ်.+ ဘၣ်ဆၣ် ခီဖျိလၢပှၤတဂၤအံၤအဃိ ကစၢ်ယွၤကကိး ပှၤလၢအနာ်တၢ် ကိးဂၤဒဲးလၢ ပှၤတီပှၤလိၤလီၤ.+ ၄၀ အဃိ တၢ်လၢ ဝံတဖၣ်တဲဝဲန့ၣ် ဒ်သိး အသုတကဲထီၣ်အသးဒီးသု တဂ့ၤအဂီၢ် ပလီၢ်သုသးတက့ၢ်. ၄၁ ‘ပှၤလၢ အတပာ်ကဲတၢ်ဘၣ်သ့ၣ်ဧၢ, သုကထံၣ်ဘၣ် တၢ်လၢယမၤလၢ သုစိၤအံၤ ဒီးပှၤတဂၤဂၤ မ့ၢ်တဲဘၣ်သု ဘၣ်ဃးဒီး တၢ်မၤတခါအံၤအဂ့ၢ် လီၤတံၢ်လီၤဆဲးဒၣ်လဲာ် တမ့ၢ်လၢ ကလီၤနာ်ဘၣ်သု နီတဘျီဘၣ်.+ ဘၣ်ဆၣ် သုကကမၢကမၣ် ဒီးသုကသံလီၤ.’”
၄၂ ဖဲစီၤပီလူးဒီး စီၤဘၢ်နါဘၤ ဟးထီၣ်ဝဲအခါ ပှၤဂီၢ်မုၢ်တဖၣ် ဃ့ကညး အဝဲသ့ၣ်လၢ ကတဲဝဲ ဘၣ်ဃးဒီး တၢ်ဂ့ၢ်တဖၣ်အံၤလၢ မုၢ်အိၣ်ဘှံးနံၤ လၢခံတနွံလီၤ. ၄၃ ဖဲဘူၣ်ဘျီၣ်တၢ်အိၣ်ဖှိၣ် ပျၢ်ဝံၤအလီၢ်ခံ ပှၤယူဒၤဖိ ဒီးပှၤလၢအနုာ်လီၤလၢ ယူဒၤတၢ်ဘူၣ်တၢ်ဘါ အကျါအါဂၤ ပိာ်ထီၣ်စီၤပီလူး ဒီးစီၤဘၢ်နါဘၤ အခံလီၤ. စီၤပီလူးဒီး စီၤဘၢ်နါဘၤ တဲတၢ်ဒီး ပှၤတဖၣ်အံၤ ဒီးဟ့ၣ်သဆၣ်ထီၣ် အဝဲသ့ၣ်လၢ ကတီဒီးကစၢ်ယွၤ ဒ်သိး အဝဲသ့ၣ် ကဆဲးဒိးန့ၢ်ဘၣ် အတၢ်သးကညီၤ ဒိၣ်ဒိၣ်မုၢ်မုၢ်အဂီၢ်လီၤ.+
၄၄ လၢခံတနွံ ဖဲမုၢ်အိၣ်ဘှံးနံၤန့ၣ် ပှၤဝ့ၢ်ဖိခဲလၢာ်ဃၣ်ဃၣ် ဟဲပာ်ဖှိၣ်ထီၣ်အသး တပူၤဃီ ဒ်သိး ကနၢ်ဟူဘၣ် ယဟိဝၤယွၤ အကလုၢ်ကထါအဂီၢ်လီၤ. ၄၅ ဖဲပှၤယူဒၤဖိတဖၣ် ထံၣ်ပှၤဂီၢ်မုၢ်အခါ အဝဲသ့ၣ် သးက့ၣ်ထီၣ်တၢ် ဒီးကတိၤထီဒါဝဲ တၢ်လၢစီၤပီလူး တဲဝဲတဖၣ်လီၤ.+ ၄၆ စီၤပီလူးဒီး စီၤဘၢ်နါဘၤ တဲအဝဲသ့ၣ် ဒူဒူလၢ “အလီၢ်အိၣ်လၢ ကစၢ်ယွၤ အကလုၢ်ကထါန့ၣ် ကဘၣ်တၢ် စံၣ်တဲၤတဲလီၤဆိအီၤလၢ သုအိၣ်လီၤ.+ ဘၣ်ဆၣ် မ့ၢ်လၢသုတတူၢ်လိာ်ဘၣ် ဒီးသုပာ်ဖျါထီၣ်လၢ သုတကြၢးဒီး တၢ်မူအထူအယိာ်ဘၣ် အဃိ ပကလဲၤလၢ ပှၤကလုာ်အဂၤတဖၣ် အအိၣ်လီၤ.+ ၄၇ ယဟိဝၤယွၤ မၤလိာ်ပှၤလၢ တၢ်ကတိၤတဖၣ်အံၤလီၤ. ‘ယဃုထၢနၤ ဒ်တၢ်ကပီၤလၢ ပှၤကလုာ်တဖၣ်အဂီၢ် ဒ်သိးနကစံၣ်တဲၤတဲလီၤတၢ် ဘၣ်ဃးဒီး တၢ်အုၣ်က့ၤခီၣ်က့ၤအဂ့ၢ် တုၤလၢ ဟီၣ်ခိၣ်ဒီဘ့ၣ်လီၤ.’”+
၄၈ ဖဲပှၤကလုာ်တဖၣ် နၢ်ဟူဝဲ တၢ်ဂ့ၢ်အံၤအခါ အဝဲသ့ၣ်သးခုဝဲ ဒီးပတြၢၤဝဲ ယဟိဝၤယွၤ အကလုၢ်ကထါလီၤ. ဒီးပှၤသးဘျၢလၢ အဂုာ်ကျဲးစၢး ဒ်သိးကန့ၢ်ဘၣ် တၢ်မူအထူအယိာ်အဂီၢ် ကိးဂၤဒဲးန့ၣ် ကဲထီၣ် ပှၤစူၢ်က့ၤနာ်က့ၤတၢ်လီၤ. ၄၉ တကးဒံးဘၣ် ယဟိဝၤယွၤ အကလုၢ်ကထါ ရၤလီၤအသးသကုၤလၢ ဟီၣ်ကဝီၤအံၤ ဒီဘ့ၣ်လီၤ. ၅၀ ဘၣ်ဆၣ် ပှၤယူဒၤဖိတဖၣ် ထိၣ်ဟူးထိၣ်ဂဲၤထီၣ် ပှၤပိာ်မုၣ်လၢ အရ့ဒိၣ်တဖၣ်လၢ အပျံၤယွၤ ဒီးပိာ်ခွါတဖၣ်လၢအမ့ၢ် ပှၤအရ့ဒိၣ်လၢ ဝ့ၢ်ပူၤလီၤ. ဒီးအဝဲသ့ၣ် မၤနးမၤဖှီၣ်+ စီၤပီလူး ဒီးစီၤဘၢ်နါဘၤ ဒီးနီဟးထီၣ်ကွံာ် အဝဲသ့ၣ် လၢဝ့ၢ်ပူၤလီၤ. ၅၁ အဃိ စီၤပီလူး ဒီးစီၤဘၢ်နါဘၤ တရုၤလီၤကွံာ် ဟီၣ်ခိၣ်ကမူၣ်လၢ အဝဲသ့ၣ်အခီၣ်လိၤ လၢအမ့ၢ်တၢ်ပနီၣ် ဒ်သိးကဟ့ၣ်ပလီၢ် ပှၤတဖၣ်န့ၣ်အဂီၢ် ဝံၤဒီးအဝဲသ့ၣ်လဲၤဝဲလၢ ဝ့ၢ်အံၤကနံၤလီၤ.+ ၅၂ ဒီးယ့ၣ်ၡူး အပျဲၢ်အဘီၣ်တဖၣ် ဆဲးလၢထီၣ်ပှဲၤထီၣ်ဒီး သးစီဆှံ ဒီးပှဲၤဒီး တၢ်သးခုလီၤ.+