၁ ကွဲးနီၣ်တၢ်
၂၆ ပှၤခိးတြဲၤဖိ အကရူၢ်တဖၣ်+ ဘၣ်တၢ်ပာ်ဖျါထီၣ်အီၤ ဒ်လၢလာ်အံၤအသိးလီၤ. လၢပှၤကိၤရးဖိ အကျါန့ၣ် မ့ၢ်ဝဲ စီၤကိၤရ့အဖိခွါ စီၤမၡ့လ့ၤမယၤလီၤ.+ စီၤကိၤရ့ ပၣ်ဃုာ်လၢ စီၤအၤစာ် အဖိခွါတဖၣ်အကျါလီၤ. ၂ ဒီးစီၤမၡ့လ့ၤမယၤ အိၣ်ဒီးအဖိခွါတဖၣ်လီၤ. အဖိခွါ ဝဲၢ်ကိ မ့ၢ်ဝဲ စီၤစကၤရယၤ, ခံဂၤတဂၤမ့ၢ်ဝဲ စီၤယဒံၤဧ့လး, သၢဂၤတဂၤ မ့ၢ်ဝဲ စီၤစဘၤဒယၤ, လွံၢ်ဂၤတဂၤ မ့ၢ်ဝဲ စီၤယၤသနံၤအ့လး, ၃ ယဲၢ်ဂၤတဂၤ မ့ၢ်ဝဲ စီၤဧ့ၤလၣ်, ဃုဂၤတဂၤ မ့ၢ်ဝဲ စီၤယိဃၤနာ်, နွံဂၤတဂၤ မ့ၢ်ဝဲ စီၤအ့လံၤဧ့နံၤလီၤ. ၄ စီၤဧိၤဘ့းအ့ဒိၣ် အိၣ်ဒီး အဖိခွါတဖၣ်လီၤ. အဖိခွါဝဲၢ်ကိ မ့ၢ်ဝဲ စီၤၡမါယၤ, ခံဂၤတဂၤ မ့ၢ်ဝဲ စီၤယဟိစဘး, သၢဂၤတဂၤ မ့ၢ်ဝဲ စီၤယိၤအၤ, လွံၢ်ဂၤတဂၤ မ့ၢ်ဝဲ စီၤစၤကၢ်, ယဲၢ်ဂၤတဂၤ မ့ၢ်ဝဲ စီၤနၤသန့လး, ၅ ဃုဂၤတဂၤ မ့ၢ်ဝဲ စီၤဧးမံၤအ့လး, နွံဂၤတဂၤ မ့ၢ်ဝဲ စီၤယံးစၣ်ကၢ်, ဃိးဂၤတဂၤ မ့ၢ်ဝဲ စီၤပဧူလသဲၤလီၤ. ကစၢ်ယွၤ ဆိၣ်ဂ့ၤ စီၤဧိၤဘ့းအ့ဒိၣ် ခီဖျိလၢ အဖိတဖၣ်အံၤလီၤ.
၆ စီၤဧိၤဘ့းအ့ဒိၣ် အဖိခွါ စီၤၡမါယၤ အိၣ်ဒီး အဖိခွါတဖၣ် လၢအမ့ၢ် ပှၤလၢအဂံၢ်ဆူၣ် လၢအအိၣ်ဒီး တၢ်သ့တၢ်ဘၣ်တဖၣ် အဃိ အဝဲသ့ၣ် ကဲထီၣ် အဒူၣ်ဖိထၢဖိ* အခိၣ်တဖၣ်လီၤ. ၇ စီၤၡမါယၤ အဖိခွါတဖၣ် မ့ၢ်ဝဲ စီၤဧီၤသနံ, စီၤရဖၤအ့လး, စီၤဧိၤဘ့း ဒီးစီၤအ့လစၤဘးလီၤ. စီၤၡမါယၤ အဒီပုၢ်ဝဲၢ်ခွါတဖၣ် လၢအမ့ၢ် စီၤအလံဟူၤ ဒီးစီၤစမၤကယၤန့ၣ် မ့ၢ်စ့ၢ်ကီး ပှၤလၢအအိၣ်ဒီး တၢ်သ့တၢ်ဘၣ် တဖၣ်လီၤ. ၈ ပှၤတဖၣ်န့ၣ် ခဲလၢာ် မ့ၢ်ဝဲ စီၤဧိၤဘ့းအ့ဒိၣ် အစၢၤအသွဲၣ်တဖၣ်လီၤ. အဝဲသ့ၣ်ဒီး အဖိခွါတဖၣ် ဒီးအဘူးအတံၢ်တဖၣ် မ့ၢ်ဝဲ ပှၤလၢအအိၣ်ဒီး တၢ်သ့တၢ်ဘၣ် ဒီးတုၤထီၣ်ထီၣ်ဘးလၢ တၢ်မၤအဂီၢ်လီၤ. အဝဲသ့ၣ်အိၣ်ဝဲ ၆၂ ဂၤ ဒီးပၣ်ဃုာ်လၢ စီၤဧိၤဘ့းအ့ဒိၣ် အဒူၣ်ဖိထၢဖိ အကျါလီၤ. ၉ ဒီးစီၤမၡ့လ့ၤမယၤ+ အိၣ်ဒီး အဖိခွါတဖၣ် ဒီးအဘူးအတံၢ်တဖၣ် ခဲလၢာ်ခဲဆ့ ၁၈ ဂၤလီၤ. အဝဲသ့ၣ် မ့ၢ်ပှၤလၢ အအိၣ်ဒီး တၢ်သ့တၢ်ဘၣ်တဖၣ်လီၤ. ၁၀ စီၤမရၤရံၤ အစၢၤအသွဲၣ် လၢအမ့ၢ် စီၤဃိစၤန့ၣ် အိၣ်ဒီး အဖိခွါတဖၣ်လီၤ. စီၤၡံမရံ တမ့ၢ် ဖိဝဲၢ်ကိဘၣ် သနာ်က့ အဝဲမ့ၢ် ပှၤအခိၣ်, မ့ၢ်လၢ အပၢ် ပာ်ထီၣ်အီၤ ဒ်ပှၤအခိၣ်အသိး အဃိလီၤ. ၁၁ ဒီးခံဂၤတဂၤ မ့ၢ်ဝဲ စီၤဃံးလကံယၤ, သၢဂၤတဂၤ မ့ၢ်ဝဲ စီၤတဘၤလယၤ, လွံၢ်ဂၤတဂၤ မ့ၢ်ဝဲ စီၤစကၤရယၤလီၤ. စီၤဃိစၤ အဖိခွါတဖၣ် ဒီးအဘူးအတံၢ်တဖၣ် ခဲလၢာ်ခဲဆ့ အိၣ်ဝဲ ၁၃ ဂၤလီၤ.
၁၂ လၢပှၤခိးတြဲၤဖိ အကရူၢ်တဖၣ်အံၤ အကျါန့ၣ် ပှၤခိၣ်ပှၤနၢ်တဖၣ် အိၣ်ဒီး မူဒါတဖၣ် ဒ်အဝဲသ့ၣ် အဘူးအတံၢ်တဖၣ်အသိး လၢကမၤ တၢ်အခ့အပှၤ အတၢ်မၤလၢ ယဟိဝၤယွၤ အဟံၣ်အဂီၢ်လီၤ. ၁၃ အဃိ ဒ်အဒူၣ်ဖိထၢဖိ အိၣ်ဝဲအသိး ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤ အဝဲသ့ၣ် ဖးတၢ်+ လၢတြဲၤတဘ့ၣ် စုာ်စုာ် အဂီၢ်လီၤ. ၁၄ ဒီးစီၤၡလ့မယၤန့ၣ် အတၢ်ဖး လီၤဘၣ်လၢ မုၢ်ထီၣ်တခီလီၤ. မ့မ့ၢ် အဖိခွါ စီၤစကၤရယၤ လၢအမ့ၢ် ပှၤဟ့ၣ်ကူၣ်တၢ်လၢ အသူၣ်ဆးသးဆး တဂၤန့ၣ် အတၢ်ဖး လီၤဘၣ်လၢ ကလံၤစိးတခီလီၤ. ၁၅ စီၤဧိၤဘ့းအ့ဒိၣ်န့ၣ် အတၢ်ဖးလီၤဘၣ်လၢ ကလံၤထံးတခီလီၤ. ဒီးအဖိခွါတဖၣ်န့ၣ်+ ဒိးန့ၢ်ဘၣ် မူဒါလၢ တၢ်ပာ်ဖှိၣ်အလီၢ်တဖၣ်န့ၣ်လီၤ. ၁၆ လၢစီၤၡူဖံၣ် ဒီးစီၤဃိစၤ+ အဂီၢ်န့ၣ် တၢ်ဖးလီၤဘၣ်လၢ မုၢ်နုာ်တခီ ဘူးဒီး တြဲၤၡးလ့က့လၤ ဒီးလၢ ကျဲမုၢ်လၢအလဲၤထီၣ်ဝဲ အဃၢၤလီၤ. ဒီးပှၤခိးတၢ်ဖိတဖၣ် ခိးတၢ် တဒူၣ်ဘၣ် တဒူၣ်လီၤ. ၁၇ တနံၤဘၣ်တနံၤ လၢမုၢ်ထီၣ်တခီန့ၣ် ပှၤလ့ၤဝံဖိ လၢအခိးတၢ်တဖၣ် အိၣ်ဝဲဃုဂၤ, လၢကလံၤစိးတခီန့ၣ် လွံၢ်ဂၤ ဒီးလၢကလံၤထံးတခီန့ၣ် လွံၢ်ဂၤလီၤ. ဒီးဖဲတၢ်ပာ်ဖှိၣ်အလီၢ်တဖၣ်န့ၣ်+ ပှၤခိးတၢ်ဖိ အိၣ်ဝဲ ခံဂၤ ခံဂၤလီၤ. ၁၈ လၢတၢ်ထူၣ်လၢ အအိၣ်ဒီး အခိၣ်ဒုး လၢမုၢ်နုာ်တခီ အဂီၢ်န့ၣ် ပှၤခိးတၢ်ဖိ အိၣ်ဝဲလွံၢ်ဂၤ လၢကျဲမုၢ်ကပၤ+ ဒီးလၢတၢ်ထူၣ်လၢ အအိၣ်ဒီး အခိၣ်ဒုးန့ၣ် အိၣ်ဝဲ ခံဂၤလီၤ. ၁၉ ပှၤသ့ၣ်တဖၣ်န့ၣ် မ့ၢ်ဝဲ ပှၤခိးတြဲၤဖိ အကရူၢ်တဖၣ် လၢအပၣ်ဃုာ်လၢ ပှၤကိၤရးဖိ ဒီးပှၤမရၤရံၤဖိ အကျါလီၤ.
၂၀ လၢပှၤလ့ၤဝံဖိတဖၣ် အကျါန့ၣ် စီၤအဃံယၤ မ့ၢ်ပှၤအခိၣ်လၢ အကွၢ်ထွဲ တၢ်လုၢ်ဒိၣ်ပှ့ၤဒိၣ်အလီၢ်တဖၣ် လၢယွၤလၢအမ့ၢ် အတီတဂၤ အဟံၣ်ပူၤ ဒီးတၢ်လုၢ်ဒိၣ်ပှ့ၤဒိၣ်အလီၢ်တဖၣ် လၢအအိၣ်ဒီး တၢ်လၢအဘၣ် တၢ်ပာ်စီဆှံတ့ၢ်အီၤတဖၣ်လီၤ.+ ၂၁ စီၤက့ရၡိၣ် အစၢၤအသွဲၣ်တဂၤ လၢအမ့ၢ် စီၤလၤဒၣ်န့ၣ် အဖိခွါတဖၣ် ပၣ်ဃုာ်ဒီး စီၤယဃံအ့လး+ လၢအမ့ၢ် ပှၤက့ရၡိၣ်ဖိ စီၤလၤဒၣ် အဒူၣ်ဖိထၢဖိ အခိၣ်တဂၤ, ၂၂ စီၤယဃံၤအ့လး အဖိခွါတဖၣ်, စီၤစ့ၤသၣ်ဒီး အဒီပုၢ်ဝဲၢ်ခွါ စီၤယိၤအ့လးလီၤ. အဝဲသ့ၣ် မ့ၢ်ဝဲ ပှၤလၢအကွၢ်ထွဲ တၢ်လုၢ်ဒိၣ်ပှ့ၤဒိၣ်အလီၢ်တဖၣ် လၢယဟိဝၤယွၤ အဟံၣ်ပူၤလီၤ.+ ၂၃ လၢပှၤဧၤမရၣ်ဖိ, ပှၤယံးစဟၢ်ဖိ, ပှၤဃ့ဘြိၣ်ဖိ ဒီးပှၤဧူးစံၤအ့လးဖိ+ အကျါန့ၣ် ပၣ်ဃုာ်ဒီး ၂၄ စီၤက့းရၡိၣ် အဖိခွါ စီၤၡဘူၤအ့လးလီၤ. စီၤက့းရၡိၣ် မ့ၢ်ဝဲ စီၤမိၤၡ့အဖိခွါလီၤ. စီၤၡဘူၤအ့လး မ့ၢ်ဝဲ ပှၤအခိၣ် လၢအကွၢ်ထွဲ တၢ်ပာ်ဖှိၣ်အလီၢ်တဖၣ်လီၤ. ၂၅ ဒီးစီၤၡဘူၤအ့လး အဘူးအတံၢ်တဖၣ် လၢအမ့ၢ် စီၤအလံၤဧ့စ့ၢ်+ အစၢၤအသွဲၣ်န့ၣ် မ့ၢ်ဝဲ စီၤရဃါဘယၤ,+ စီၤယၡၤယါ, စီၤယိၤရၣ်, စီၤစံးကရံ ဒီးစီၤၡလိမိးလီၤ. ၂၆ စီၤၡလိမိး ဒီးအဘူးအတံၢ်တဖၣ် ကွၢ်ထွဲဝဲ တၢ်လုၢ်ဒိၣ်ပှ့ၤဒိၣ်တဖၣ် လၢအဘၣ်တၢ်ပာ်စီဆှံအီၤလီၤ.+ တၢ်သ့ၣ်တဖၣ်န့ၣ် မ့ၢ်ဝဲ စီၤပၤဒၤဝံး,+ ဒူၣ်ဖိထၢဖိ အခိၣ်အနၢ်တဖၣ်,+ ပှၤတကထိ အခိၣ်တဖၣ်, ပှၤတကယၤ အခိၣ်တဖၣ် ဒီးသုးမုၢ်အခိၣ်တဖၣ် ပာ်စီဆှံတ့ၢ်ဝဲန့ၣ်လီၤ. ၂၇ အဝဲသ့ၣ် ဟံးန့ၢ် တၢ်ဖိတၢ်လံၤတဖၣ်လၢ အဘၣ်တၢ်ဂုာ်န့ၢ်အီၤ+ လၢတၢ်ဒုးအပူၤ+ ဒီးပာ်စီဆှံဝဲ ဒ်သိး ပှၤကသူအီၤလၢ ယဟိဝၤယွၤ အဟံၣ်အဂီၢ်လီၤ. ၂၈ ဒီးအဝဲသ့ၣ် ကွၢ်ထွဲစ့ၢ်ကီး တၢ်ခဲလၢာ်လၢ စီၤၡမူၤအ့လး လၢအမ့ၢ် ပှၤထံၣ်တၢ်,+ စီၤကံၣ်အဖိခွါ စီၤစီလူး, စီၤန့ၢ်အဖိခွါ စီၤအဘံန့ၢ်,+ နီၢ်စရူယၤ+ အဖိခွါ စီၤယိၤအာ်+ ပာ်စီဆှံတ့ၢ်ဝဲ န့ၣ်လီၤ. တၢ်တမံၤဂ့ၤ တမံၤဂ့ၤလၢ ပှၤတဂၤဂ့ၤ တဂၤဂ့ၤ ပာ်စီဆှံတ့ၢ်ဝဲန့ၣ် စီၤၡလိမံး* ဒီးအဘူးအတံၢ်တဖၣ် ဘၣ်ကွၢ်ထွဲဝဲလီၤ.
၂၉ လၢပှၤယံးစဟၢ်ဖိ+ အကျါန့ၣ် စီၤကနၤနယၤ ဒီးအဖိခွါတဖၣ် ဒိးန့ၢ်ဘၣ် တၢ်ပၢဆှၢရဲၣ်ကျဲၤတၢ် အမူဒါတဖၣ် လၢတၢ်ချၢ ဒ်ပှၤအခိၣ် ဒီးစံၣ်ညီၣ်ကွီၢ်တဖၣ် အသိးလၢ+ ပှၤအံၣ်စရ့လးဖိ အဖီခိၣ်လီၤ.
၃၀ လၢပှၤဃ့ဘြိၣ်ဖိတဖၣ်+ အကျါန့ၣ် ပၣ်ဃုာ်ဒီး စီၤဃၡၤဘယၤ ဒီးအဘူးအတံၢ်လၢ အအိၣ်ဒီး တၢ်သ့တၢ်ဘၣ် ခဲလၢာ်ခဲဆ့ အဂၤ ၁,၇၀၀ လီၤ. အဝဲသ့ၣ် မ့ၢ်ဝဲ အံၣ်စရ့လး အပှၤပၢဆှၢရဲၣ်ကျဲၤတၢ်တဖၣ်လၢ အဘၣ်ဃးဒီး ယဟိဝၤယွၤ အတၢ်မၤ ဒီးစီၤပၤအတၢ်မၤ ခဲလၢာ် ဖဲတၢ်လီၢ်လၢ ထံကျိယၢ်ဒ့ၣ် အမုၢ်နုာ်တခီန့ၣ်လီၤ. ၃၁ လၢစီၤဃ့ဘြိၣ် အဒူၣ်ဖိထၢဖိ အစၢၤအသွဲၣ် အကျါန့ၣ် စီၤဃရံယၤ+ မ့ၢ်ဝဲ ပှၤအခိၣ်လီၤ. ဖဲစီၤဒၤဝံး ပၢတၢ် ၄၀ နံၣ်တနံၣ်န့ၣ်+ ပှၤဃု ပှၤပိာ်ခွါလၢ အဂံၢ်ဆူၣ်လၢ အအိၣ်ဒီး တၢ်သ့တၢ်ဘၣ်တဖၣ် လၢပှၤဃ့ဘြိၣ်ဖိတဖၣ် အကျါ ဒီးပှၤထံၣ်န့ၢ် ပှၤဃ့ဘြိၣ်ဖိ ဒ်န့ၣ်တဖၣ် ဖဲဝ့ၢ်ယၤစ့ၢ်+ လၢကံးလဧး အဟီၣ်ကဝီၤပူၤလီၤ. ၃၂ ဒီးစီၤယရံယၤ အဘူးအတံၢ်တဖၣ်* လၢအအိၣ်ဒီး တၢ်သ့တၢ်ဘၣ်န့ၣ် အိၣ်ဝဲ အဂၤ ၂,၇၀၀ ဒီးအဝဲသ့ၣ် မ့ၢ်ဝဲ ဒူၣ်ဖိထၢဖိ အခိၣ်တဖၣ်လီၤ. အဃိ စီၤပၤဒၤဝံး ဟ့ၣ်လီၤ အဝဲသ့ၣ် မူဒါလၢ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ် အဖီခိၣ် လၢကဖီၣ်တၢ်ဂ့ၢ် ကိးမံၤဒဲးလၢ အဘၣ်ဃးဒီး ယွၤလၢအမ့ၢ်အတီတဂၤ ဒီးလၢအဘၣ်ဃးဒီး စီၤပၤန့ၣ်လီၤ.