စံးထီၣ်ပတြၢၤ
ဘၣ်ဃးဒီး စီၤၡလိၤမိၤ.
၇၂ အိ ကစၢ်ယွၤဧၢ, မၤစၢၤစီၤပၤ ဒ်သိးအကစံၣ်ညီၣ်တၢ် ဒ်နတၢ်စံၣ်ညီၣ် အိၣ်ဝဲအသိး
၂ မ်အစံၣ်ညီၣ်န့ၢ်တၢ်လၢ နပှၤဂီၢ်မုၢ်
ဒီးပှၤလၢ အပတီၢ်ဖုၣ်အဂီၢ် တီတီလိၤလိၤတက့ၢ်.+
၃ မ်ကစၢၢ်တဖၣ် ဟ့ၣ်ထီၣ်န့ၢ် ပှၤဂီၢ်မုၢ်လၢ တၢ်မုာ်တၢ်ခုၣ်
ဒီးမ်တၢ်လူၢ်တဖၣ် ဟ့ၣ်ထီၣ် တၢ်တီတၢ်လိၤတက့ၢ်.
၄ မ်အဝဲ အိၣ်ဃူဒီးဒီသဒၢ ပှၤလၢအပတီၢ်ဖုၣ်တဖၣ် လၢအအိၣ်လၢ ပှၤဂီၢ်မုၢ် အကျါတက့ၢ်.
၆ အဝဲကလီၤဂာ်ဒ် တၢ်စူၤထံလၢ အလီၤလၢ နီၣ်လၢပှၤတံာ်အီၤသီသီတဖၣ်အလိၤ
ဒီးဒ်မူခိၣ်စူၤလၢ အမၤဘၣ်စီၣ် ဟီၣ်ခိၣ်အသိးလီၤ.+
၇ ဖဲအဝဲပၢတၢ်အခါ ပှၤတီပှၤလိၤ ကဒိၣ်ထီၣ်ထီထီၣ်+
ဒီးတၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်+ ဒီးကအိၣ်ဝဲဖးယံာ် တုၤလၢ လါတအိၣ်လၢၤဘၣ်.
၈ အဝဲကပၢတၢ် စးထီၣ်လၢ ပီၣ်လဲၣ်လၢမုၢ်ထီၣ်တကပၤ တုၤလၢ ပီၣ်လဲၣ်လၢမုၢ်နုာ်တကပၤ
၉ ပှၤလၢအအိၣ်ဝဲဆိးဝဲလၢ မဲးမုၢ်ခိၣ်တဖၣ်န့ၣ် ကထိၣ်လီၤပှီၤအသးလၢ အမဲာ်ညါ
ဒီးအဝဲ ကမၤနၢၤ အဒုၣ်အဒါတဖၣ်လီၤ.+
၁၀ တၢ်ၡံၣ်အစီၤပၤတဖၣ်ဒီးကီးအစီၤပၤတဖၣ် ကဟ့ၣ်တၢ်ခိတၢ်သွဲလီၤ.+
ၡဘၤဘီမုၢ် အစီၤပၤတဖၣ် ဒီးစဘၤအစီၤပၤတဖၣ် ကဟဲစိာ်ဝဲ တၢ်ဟ့ၣ်တဖၣ်လီၤ.+
၁၁ စီၤပၤခဲလၢာ် ကထိၣ်လီၤပှီၤအသးလၢ အမဲာ်ညါ
ဒီးပှၤကလုာ်ခဲလၢာ် ကမၤအတၢ်လီၤ.
၁၂ ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ်,
ပှၤလၢအပတီၢ်ဖုၣ် ဒီးပှၤလၢ ပှၤမၤစၢၤအီၤ တအိၣ်နီတဂၤဘၣ်န့ၣ် အဝဲကမၤပူၤဖျဲးဝဲလီၤ.
၁၃ အဝဲကသးကညီၤ ပှၤလၢအပတီၢ်ဖုၣ် ဒီးပှၤဖှီၣ်ဖိယာ်ဖိ
ဒီးအဝဲ ကမၤပူၤဖျဲး ပှၤဖှီၣ်ဖိယာ်ဖိ အသးသမူလီၤ.
၁၄ အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး
ဒီးအဝဲသ့ၣ် အသွံၣ်န့ၣ် ကမ့ၢ် တၢ်လုၢ်ဒိၣ်ပှ့ၤဒိၣ် လၢအဂီၢ်လီၤ.
၁၅ မ်အဝဲ အိၣ်မူဘၣ်ဖးယံာ် ဒီးမ်ပှၤဟ့ၣ်လီၤအီၤလၢ ၡဘၤဘီမုၢ် အထူတက့ၢ်.+
မ်ပှၤဃ့ထုကဖၣ်န့ၢ်တၢ်လၢ အဂီၢ်ထီဘိ
ဒီးမ်အဘၣ်တၢ်ဆိၣ်ဂ့ၤ ကိးနံၤဒဲးတက့ၢ်.
၁၆ လၢဟီၣ်ခိၣ်ချၢန့ၣ် ဘုကအါဟုကအါဝဲ+
ဒီးလၢကစၢၢ်တဖၣ် အဒီခိၣ်န့ၣ် ဘုကအိၣ်ဝဲ အါအါဂီၢ်ဂီၢ် တုၤလၢ အလီၤလာ်လီၤ.
စီၤပၤအစံာ်ပျီတဖၣ် ကမဲထီၣ်သၣ်ထီၣ်ဝဲ ဒ်သ့ၣ်တဖၣ်လၢ လဘၤနိၣ်ကစၢၢ်ကလိကျါအသိး.+
ဒီးလၢဝ့ၢ်တဖၣ်အပူၤန့ၣ် ပှၤကအါထီၣ်ဂီၢ်ထီၣ် ဒ်နီၣ်တဖၣ်လၢ ဟီၣ်ခိၣ်ချၢအသိးလီၤ.+
၁၇ ဒ်မုၢ်အိၣ်ဝဲ လီၤစိၤလီၤထီအသိး+
မ်စီၤပၤအမံၤ အိၣ်ဝဲ လီၤထူလီၤယိာ် ဒီးမ်စီၤပၤအမံၤဟူသၣ်ဖျါ ထီဘိတက့ၢ်.
မ်ပှၤဘၣ် တၢ်ဆိၣ်ဂ့ၤ ခီဖျိလၢအီၤ+
ဒီးမ်ပှၤကလုာ်ခဲလၢာ် ပာ်ပနီၣ်အီၤလၢ ပှၤလၢအသးခုတက့ၢ်.
၁၈ ပှၤလၢအမၤ တၢ်လၢအလီၤလိၢ်လီၤလးတဖၣ်န့ၣ်+ အိၣ်ထဲ အံၣ်စရ့လးအကစၢ် ယဟိဝၤယွၤတဂၤလီၤ.+
အဃိ မ်ပှၤစံးထီၣ်ပတြၢၤအီၤတက့ၢ်.
၁၉ မ်အမံၤလၢ အလီၤကဟုကညီၢ်န့ၣ် ဘၣ်တၢ်စံးထီၣ်ပတြၢၤအီၤ လီၤစိၤလီၤထီတက့ၢ်.+
ဒီးမ်အလၤကပီၤ အိၣ်လၢ ဟီၣ်ခိၣ်ချၢဝးဝးတက့ၢ်.+
အၤမ့ၣ်, အၤမ့ၣ်.*
၂၀ စီၤယံးၡဲအဖိခွါ+ စီၤဒၤဝံး အတၢ်ထုကဖၣ်တဖၣ်န့ၣ် ကတၢၢ်ဝဲဖဲအံၤလီၤ.