မးသဲ

၂၇ တုၤမုၢ်ဝါထီၣ်ဒီး ပှၤလုၢ်တၢ်ဒိၣ်အခိၣ်တဖၣ်ခဲလၢာ် ဒီးပှၤဂီၢ်မုၢ် အပှၤသူၣ်က့သးပှၢ်တဖၣ်​ ကူၣ်ထီၣ်ဖးလီၤသကိးဝဲလၢ ကမၤသံ ယ့ၣ်ၡူးလီၤ.+ ၂ အဝဲသ့ၣ်​ စၢဃာ်ယ့ၣ်ၡူးဝံၤဒီး ဆှၢထီၣ်အီၤ ဒီးဟ့ၣ်လီၤအီၤလၢ ပဒိၣ်ဖးဒိၣ်​ စီၤပံၤလးအစုပူၤလီၤ.+

၃ စီၤယူဒၤလၢ အဟ့ၣ်လီၤကွံာ် ယ့ၣ်ၡူးန့ၣ်​ ဖဲအသ့ၣ်ညါဝဲလၢ ပှၤစံၣ်ညီၣ်​ ယ့ၣ်ၡူးအခါ အသူၣ်အုးသးအုး ဒီးဟဲစိာ်က့ၤ စ့ညၣ်အဘ့ၣ်​ ၃၀ လၢပှၤလုၢ်တၢ်ဒိၣ်အခိၣ်တဖၣ်​ ဒီးပှၤသူၣ်က့သးပှၢ်တဖၣ်+ အအိၣ်​ ၄ ဒီးတဲဝဲလၢ “မ့ၢ်လၢ ယဟ့ၣ်လီၤကွံာ် ပှၤလၢအတၢ်ဒဲးဘး တအိၣ်ဘၣ်တဂၤအံၤအဃိ ယမၤဘၣ်တၢ်ဒဲးဘးလံ.” ဘၣ်ဆၣ်​ အဝဲသ့ၣ်​ တဲဝဲလၢ “အဘၣ်ဃးဒီးပှၤဒ်လဲၣ်. နနီၢ်ကစၢ် တၢ်ဂ့ၢ်လီၤ.” ၅ အဃိ အဝဲကွံာ်လီၤဝဲ စ့ညၣ်အဘ့ၣ်တဖၣ်န့ၣ်လၢ တၢ်လုၢ်ဟံၣ်အပူၤ ဒီးဟးထီၣ်ကွံာ်ဝဲ ဒီးလဲၤစၢၢ်သံလီၤအသးလီၤ.+ ၆ ဘၣ်ဆၣ်​ ပှၤလုၢ်တၢ်ဒိၣ်အခိၣ်တဖၣ်​ ဟံးန့ၢ်စ့ညၣ်အဘ့ၣ်တဖၣ်​ ဒီးတဲဝဲလၢ “စ့တဖၣ်အံၤ မ့ၢ်ဝဲတၢ်သွံၣ်အပှ့ၤအဃိ တၢ်တဟ့ၣ်အခွဲးလၢ ပှၤကထၢနုာ်အီၤလၢ တၢ်လုၢ်ဟံၣ်​ အတၢ်လုၢ်ဒိၣ်ပှ့ၤဒိၣ်အလီၢ်ဘၣ်.” ၇ အဝဲသ့ၣ်​ တဲသကိးတၢ်ဝံၤဒီး သူဝဲစ့အံၤလၢ ကပှ့ၤဝဲ ပှၤတ့သပၢၤတဂၤ အဟီၣ်ခိၣ်တကဝီၤ ဒ်သိး ကဒုးကဲထီၣ်ဝဲလၢ တၢ်သွၣ်ခိၣ်လၢ ပှၤတမှံၤတဖၣ်အဂီၢ်လီၤ. ၈ အဃိ ဟီၣ်ခိၣ်တကဝီၤအံၤ ပှၤကိးအီၤလၢ တၢ်သွံၣ်အဟီၣ်ကဝီၤ+ တုၤလီၤလၢ မုၢ်မဆါတနံၤအံၤလီၤ. ၉ အဃိ ဝံယံးရမံယၤ အတၢ်ကတိၤ ဟဲလၢထီၣ်ပှဲၤထီၣ်ဝဲလီၤ. အတဲပာ်စၢၤဝဲလၢ “အဝဲသ့ၣ်​ ဟံးန့ၢ်စ့ညၣ်အဘ့ၣ်​ ၃၀ လၢအမ့ၢ် တၢ်အပှ့ၤလၢ ပှၤအံၣ်စရ့လးဖိတနီၤ ပာ်ပနီၣ်ဝဲလၢ ပှၤတဂၤန့ၣ်အဂီၢ်လီၤ. ၁၀ ဒီးအဝဲသ့ၣ်​ ဟ့ၣ်လီၤဝဲလၢ ပှၤတ့သပၢၤတဂၤ အဟီၣ်ခိၣ်​ တကဝီၤအဂီၢ် ဒ်တၢ်လၢ ယဟိဝၤယွၤ* မၤလိာ်တ့ၢ်ယၤ အသိးလီၤ.”+

၁၁ ယ့ၣ်ၡူး ဆၢထၢၣ်ဝဲလၢ ပဒိၣ်ဖးဒိၣ်အမဲာ်ညါ ဒီးပဒိၣ်ဖးဒိၣ်​ သံကွၢ်အီၤလၢ “နကဲ ပှၤယူဒၤဖိ အစီၤပၤဧါ.” ဒီးယ့ၣ်ၡူး တဲဆၢအီၤလၢ “ဒ်နတဲအသိးလီၤ.”+ ၁၂ ဘၣ်ဆၣ်​ ဖဲပှၤလုၢ်တၢ်ဒိၣ်အခိၣ်တဖၣ်​ ဒီးပှၤသူၣ်က့သးပှၢ်တဖၣ်​ ပာ်ဒ့ၣ်ပာ်ကမၣ်အီၤအခါ အဝဲတတဲဆၢက့ၤဝဲ တၢ်နီတမံၤဘၣ်.+ ၁၃ ဒီးစီၤပံၤလး တဲအီၤလၢ “အဝဲသ့ၣ်​ ပာ်ဒ့ၣ်ပာ်ကမၣ်နၤ အါထဲထဲအံၤန့ၣ်​ နတနၢ်ဟူဧီၤ.” ၁၄ ဘၣ်ဆၣ်​ ယ့ၣ်ၡူး တတဲဆၢက့ၤအီၤ နီတမံၤဘၣ်. အဃိ ပဒိၣ်ဖးဒိၣ်အံၤ ကမၢကမၣ်ဝဲ ဒိၣ်မးလီၤ.

၁၅ ဖဲဘူၣ်လဲၤကပာ်ဘၣ်ဝဲ တဘျီဂ့ၤတဘျီဂ့ၤအခါ ပဒိၣ်ဖးဒိၣ်​ အလုၢ်လၢ်အိၣ်ဝဲလၢ ကပျၢ်ကွံာ်ဝဲ ပှၤဃိာ်ဖိတဂၤလၢ ပှၤဂီၢ်မုၢ် ဘၣ်သူၣ်ဘၣ်သးဝဲလီၤ.+ ၁၆ ဒီးဖဲန့ၣ်အခါ ဘၣ်ဖဲပှၤဖီၣ်ဃာ် စီၤဘၤရးဘါ လၢအမ့ၢ် ပှၤလၢအမံၤ ဟူထီၣ်သါလီၤလၢ အအၢတကပၤတဂၤန့ၣ်​ လၢဃိာ်ပူၤလီၤ. ၁၇ အဃိ ဖဲပှၤဂီၢ်မုၢ်တဖၣ်​ ပာ်ဖှိၣ်ထီၣ်အသးအခါ စီၤပံၤလး သံကွၢ်အဝဲသ့ၣ်လၢ “သုအဲၣ်ဒိးလၢ ယကပျၢ်ကွံာ်န့ၢ်သု ဖဲလဲၣ်တဂၤလဲၣ်, စီၤဘၤရးဘါဧါ မ့တမ့ၢ် ယ့ၣ်ၡူးလၢ ပှၤကိးအီၤလၢ ခရံာ်န့ၣ်ဧါ.” ၁၈ စီၤပံၤလး သ့ၣ်ညါဝဲလၢ ပှၤသ့ၣ်တဖၣ်အံၤ သးက့ၣ်ယ့ၣ်ၡူးအဃိ အဝဲသ့ၣ်​ ဟ့ၣ်လီၤကွံာ်အီၤလီၤ. ၁၉ တကးဒံးဘၣ်​ ဖဲစီၤပံၤလး ဆ့ၣ်နီၤဝဲလၢ ပှၤစံၣ်ညီၣ်တၢ် အလီၢ်ဆ့ၣ်နီၤ အလိၤအခါ အမါဆှၢလီၤတၢ်ကစီၣ်​ လၢအအိၣ်​ ဒီးတဲဝဲလၢ “တဘၣ်မၤဘၣ်ဃးနသးဒီး ပှၤတီပှၤလိၤတဂၤန့ၣ်​ နီတစဲးတဂ့ၤ. တနံၤအံၤ လၢယတၢ်မံမီၢ်အပူၤန့ၣ်​ ယတူၢ်ဘၣ်တၢ်နးမး လၢအဃိလီၤ.” ၂၀ ဘၣ်ဆၣ်​ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤသူၣ်က့သးပှၢ်တဖၣ်​ ဆီၣ်ထွဲဝဲ ပှၤဂီၢ်မုၢ်တဖၣ်​ ဒ်သိး အဝဲသ့ၣ်ကဃ့ဝဲလၢ ပှၤကပျၢ်ကွံာ် စီၤဘၤရးဘါ+ ဒီးမၤသံကွံာ် ယ့ၣ်ၡူးအဂီၢ်လီၤ.+ ၂၁ ဒီးပဒိၣ်ဖးဒိၣ်​ သံကွၢ် အဝဲသ့ၣ်လၢ “ပှၤခံဂၤအံၤ သုအဲၣ်ဒိးလၢ ယကပျၢ်ကွံာ်န့ၢ်သု ဖဲလဲၣ်တဂၤလဲၣ်.” ဒီးအဝဲသ့ၣ်​ တဲဆၢဝဲလၢ “စီၤဘၤရးဘါ.” ၂၂ အဃိ စီၤပံၤလး သံကွၢ် အဝဲသ့ၣ်လၢ “မ့မ့ၢ်ဒ်န့ၣ်န့ၣ်​ ယ့ၣ်ၡူး လၢပှၤကိးအီၤလၢ ခရံာ်တဂၤအံၤ ယကဘၣ်မၤအီၤဒ်လဲၣ်.” အဝဲသ့ၣ်ခဲလၢာ် တဲဝဲလၢ “ပျၤထီအီၤ လၢသ့ၣ်တၢၣ်အလိၤန့ၣ်.”*+ ၂၃ စီၤပံၤလး သံကွၢ်ကဒီးဝဲလၢ “ဘၣ်မနုၤအဃိလဲၣ်, အမၤဘၣ်တၢ်အၢ မနုၤလဲၣ်.” ဘၣ်ဆၣ်​ အဝဲသ့ၣ်​ ဆဲးကိးပသူထီၣ်ဝဲ ဆူၣ်န့ၢ်ဒံးအလီၢ်လၢ “ပျၤထီအီၤလၢ သ့ၣ်တၢၣ်အလိၤန့ၣ်.”+

၂၄ စီၤပံၤလး ထံၣ်ဝဲလၢ အမၤဝဲဒ်န့ၣ်ဘၣ်ဆၣ်​ တကဲဘျုးဘၣ်အလီၢ် တၢ်တၢထီၣ်တၢလီၤ ဟဲကဲထီၣ်ဝဲလီၤ. အဃိ စီၤပံၤလး ဟံးန့ၢ်ထံ ဒီးသ့ကွံာ်အစုလၢ ပှၤဂီၢ်မုၢ်တဖၣ်​ အမဲာ်ညါ ဒီးတဲဝဲလၢ “ယပူၤဖျဲးဒီး ပှၤတဂၤအံၤ အသွံၣ်လီၤ. သုနီၢ်ကစၢ် ဘၣ်ဟံးမူဒါလီၤ.” ၂၅ ဒီးအဝဲသ့ၣ်ခဲလၢာ် တဲဆၢက့ၤဝဲလၢ “အသွံၣ်​ ကလီၤတီလၢပဝဲ ဒီးလၢပဖိတဖၣ်​ အခိၣ်လိၤဒၣ်ဝဲ.”+ ၂၆ ဒီးစီၤပံၤလး ပျၢ်ကွံာ်န့ၢ်အဝဲသ့ၣ်လၢ စီၤဘၤရးဘါလီၤ. ဒီးအဝဲမၢ ပှၤဖျ့ယ့ၣ်ၡူး+ ဒီးဟ့ၣ်လီၤကွံာ်အီၤ ဒ်သိး ပှၤကမၤသံအီၤလၢ သ့ၣ်တၢၣ်အလိၤလီၤ.+

၂၇ ဒီးပဒိၣ်ဖးဒိၣ်​ အသုးဖိတဖၣ်​ လဲၤကိးယ့ၣ်ၡူးလၢ ပဒိၣ်ဖးဒိၣ်​ အိၣ်တၢ်အလီၢ် ဒီးကိးဖှိၣ်ပှၤသုးဖိဒီတဖု ဒီးအဝဲသ့ၣ်ကဝီၤဃာ်ဝဲ ယ့ၣ်ၡူးလီၤ.+ ၂၈ အဝဲသ့ၣ်​ ဘ့ၣ်လီၤကွံာ် ယ့ၣ်ၡူးအကူအကၤ ဒီးဒုးကၤထီၣ်အီၤ ဆ့ကၤဖးထီလၢ အဂီၤဆှုၣ်တဘ့ၣ်လီၤ.+ ၂၉ ဒီးအဝဲသ့ၣ်​ သံၣ်ထီၣ်ဝဲ တၤဆှုၣ်တဖၣ်​ ဒ်ခိၣ်သလုးအသိး ဒီးဖျီၣ်ထီၣ်ဝဲလၢ ယ့ၣ်ၡူးအခိၣ်လိၤ ဒီးဒုးစိာ်အီၤ တပိၢ်တဘိ လၢအစုထွဲတခီလီၤ. ဒီးအဝဲသ့ၣ်​ ချံးလီၤအခီၣ်လၢ ယ့ၣ်ၡူးအမဲာ်ညါ, ဒုၣ်ဒွဲၣ်အီၤ ဒီးတဲဝဲလၢ “ပှၤယူဒၤဖိ အစီၤပၤဧၢ, ပဆၢဂ့ၤဆၢဝါနၤလီၤ.” ၃၀ ဒီးအဝဲသ့ၣ်​ ထူးပှဲာ်ဒီးအီၤ+ ဒီးဟံးန့ၢ်ဝဲ တပိၢ်ဘိန့ၣ်​ ဒီးတီၢ်ဝဲ အခိၣ်သၣ်ဃံလီၤ. ၃၁ အဝဲသ့ၣ်​ ဒုၣ်ဒွဲၣ်စံးအၢအီၤဝံၤဒီး ဘ့ၣ်လီၤကွံာ် ဆ့ကၤဖးထီလၢအလိၤ ဒီးဒုးကၤထီၣ်က့ၤအီၤလၢ အနီၢ်ကစၢ် အတၢ်ကူတၢ်ကၤ ဒီးလဲၤဆှၢထီၣ်အီၤ ဒ်သိး ပှၤကပျၤထီအီၤလၢ သ့ၣ်တၢၣ်အလိၤလီၤ.+

၃၂ ဖဲအဝဲသ့ၣ်​ ဟးထီၣ်လၢ ဝ့ၢ်ချၢအခါ အဝဲသ့ၣ်ထံၣ်ဝဲ ပှၤကူၤရ့ၤန့ဖိတဂၤ လၢအမံၤမ့ၢ် စီၤၡံမိၣ်လီၤ. အဝဲသ့ၣ်​ မၢဆူၣ်အီၤလၢ ကယိးဝဲယ့ၣ်ၡူး အတၢ်မၤအၢမၤနး အသ့ၣ်တၢၣ်လီၤ.*+ ၃၃ ဒီးဖဲအဝဲသ့ၣ်​ လဲၤတုၤလၢ တၢ်လီၢ်လၢ ပှၤကိးအီၤလၢ ကီၤလၤကီၤသါ လၢအခီပညီမ့ၢ်ဝဲ ခိၣ်သၣ်ဃံကု အလီၢ်အခါ+ ၃၄ အဝဲသ့ၣ်ဟ့ၣ်အီအီၤ စပံးထံလၢ အဃါဃုာ်အသးဒီး တၢ်ခၣ်ထံ+ ဘၣ်ဆၣ်​ အဝဲလ့ၣ်ကွၢ်ဝဲဝံၤဒီး တအီဝဲဘၣ်. ၃၅ ဖဲအဝဲသ့ၣ်​ ပျၤထီအီၤလၢ သ့ၣ်တၢၣ်အလိၤဝံၤအခါ အဝဲသ့ၣ်ဖးတၢ် ဒ်သိး ကနီၤဖးလိာ်အသးလၢ ယ့ၣ်ၡူးအကူအကၤ အဂီၢ်လီၤ.+ ၃၆ ဒီးအဝဲသ့ၣ်​ ဆ့ၣ်နီၤခိးကွၢ်ဝဲ ယ့ၣ်ၡူးလီၤ. ၃၇ ဒီးဒ်သိးကပာ်ဖျါထီၣ်ဝဲလၢ ပှၤပာ်ဒ့ၣ်ပာ်ကမၣ်​ ယ့ၣ်ၡူးလၢ တၢ်ဂ့ၢ်မနုၤလဲၣ်အဂီၢ် လၢယ့ၣ်ၡူးအခိၣ်ဒီန့ၣ်​ အဝဲသ့ၣ်​ ကွဲးလီၤဝဲလၢ “ပှၤတဂၤအံၤမ့ၢ် ပှၤယူဒၤဖိ အစီၤပၤ ယ့ၣ်ၡူးလီၤ.”+

၃၈ ဒီးတၢ်ဘျၣ်ခံဂၤန့ၣ်​ ပှၤပျၤထီအီၤလၢ သ့ၣ်တၢၣ်အလိၤ လၢယ့ၣ်ၡူးအစုထွဲ တကပၤတဂၤ ဒီးလၢအစုစ့ၣ်​ တကပၤတဂၤလီၤ.+ ၃၉ ပှၤလၢအလ့ၢ်ထီၣ်လ့ၢ်လိၤ ဖဲန့ၣ်တဖၣ်​ ဒုၣ်ဒွဲၣ်စံးအၢယ့ၣ်ၡူး+ ဒီးဂံၤဂုၤအခိၣ်+ ၄၀ ဒီးတဲဝဲလၢ “ပှၤလၢအတဲဝဲလၢ အကမၤလီၤပှီၢ်ကွံာ် တၢ်လုၢ်ဟံၣ်​ ဒီးကသူၣ်ထီၣ်က့ၤအီၤလၢ သၢသီအတီၢ်ပူၤတဂၤဧၢ,+ မၤပူၤဖျဲးလီၤနသးသၢၤ. နမ့မ့ၢ် ကစၢ်ယွၤအဖိခွါန့ၣ်​ ဟဲက့ၤလီၤလၢ တၢ်မၤအၢမၤနး အသ့ၣ်တၢၣ်​ အလိၤသၢၤ.”+ ၄၁ ဒ်န့ၣ်အသိး ပှၤလုၢ်တၢ်ဒိၣ်အခိၣ်တဖၣ်​ ဒီးပှၤကွဲးလံာ်ဖိတဖၣ်​ ဒီးပှၤသူၣ်က့သးပှၢ်တဖၣ်စ့ၢ်ကီး ဒုၣ်ဒွဲၣ်စံးအၢအီၤလၢ+ ၄၂ “ပှၤဂၤန့ၣ်​ အမၤပူၤဖျဲးဝဲ မ့မ့ၢ်အနီၢ်ကစၢ်န့ၣ်​ အမၤပူၤဖျဲးလီၤအသး တသ့ဘၣ်. အဝဲမ့မ့ၢ် အံၣ်စရ့လးအစီၤပၤန့ၣ်+ မ်အဟဲက့ၤလီၤလၢ တၢ်မၤအၢမၤနး အသ့ၣ်တၢၣ်​ အလိၤခဲအံၤ ဒီးပကစူၢ်က့ၤနာ်က့ၤအီၤသၢၤ. ၄၃ အဝဲနာ်န့ၢ် ကစၢ်ယွၤ ဒီးအတဲဝဲလၢ အမ့ၢ် ကစၢ်ယွၤအဖိခွါလီၤ.+ အဃိ ကစၢ်ယွၤ မ့ၢ်လီကီအီၤန့ၣ်​ မ်အမၤပူၤဖျဲးအီၤသၢၤ.”+ ၄၄ ဒ်န့ၣ်အသိး တၢ်ဘျၣ်တဖၣ်လၢ ပှၤပျၤထီအီၤလၢ သ့ၣ်တၢၣ်အလိၤ လၢယ့ၣ်ၡူးအကပၤဒၣ်လဲာ် ဒုၣ်ဒွဲၣ်စံးအၢအီၤ စ့ၢ်ကီးလီၤ.+

၄၅ စးထီၣ်လၢ မုၢ်ဆါခီ ၁၂ နၣ်ရံၣ်* တုၤလီၤလၢ ဟါလီၤခီ ၃ နၣ်ရံၣ်န့ၣ်* တၢ်ခံးလီၤဝဲလၢ ကီၢ်ဒီဘ့ၣ်ညါလီၤ.+ ၄၆ ကဘၣ်ဖဲ ဟါလီၤခီ ၃ နၣ်ရံၣ်ဃၣ်ဃၣ်န့ၣ်* ယ့ၣ်ၡူးကိးပသူထီၣ်လၢ အကလုၢ်ဖးဒိၣ်လၢ “အ့ၤလံၤ, အ့ၤလံၤ, လၤမါစၤဘၤဃသၤနံ” ဒီးအခီပညီမ့ၢ်ဝဲ “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.”+ ၄၇ ဖဲပှၤလၢအဆၢထၢၣ်​ ဖဲန့ၣ်တနီၤ နၢ်ဟူဝဲအခါ အဝဲသ့ၣ်တဲဝဲလၢ “ပှၤတဂၤအံၤ ကိးထီၣ်​ စီၤအ့ၤလံယၤလံ.”+ ၄၈ ဒီးတဘျီဃီ ပှၤလၢအဝဲသ့ၣ်အကျါတဂၤ လဲၤဃ့ၢ်ဒီးဟံးန့ၢ်ဝဲ တၢ်ကပုာ်လုးတလိၣ်​ ဒီးစုၣ်လီၤဝဲလၢ စပံးထံလၢအဆံၣ်အပူၤ ဒီးမၤဘုးတာ်ထီၣ်ဝဲလၢ တပိၢ်ဘိအလိၤ ဒီးဒုးအီဝဲ ယ့ၣ်ၡူးလီၤ.+ ၄၉ မ့မ့ၢ် ပှၤအဂၤတဖၣ်န့ၣ်​ တဲဝဲလၢ “ခိးသၢၤ, ပကကွၢ်တထံၣ်. မ့ၢ်စီၤအ့ၤလံယၤ ကဟဲမၤပူၤဖျဲးအီၤဧါ.” ၅၀ ယ့ၣ်ၡူး ကိးထီၣ်ကဒီးလၢ အကလုၢ်ဖးဒိၣ်​ လၢအသီတဘျီ ဒီးသံဝဲလီၤ.*+

၅၁ ဒီးယၣ်ဘျးသဒၢ လၢတၢ်လုၢ်ဟံၣ်အပူၤန့ၣ်+ ညာ်ကွံာ်ဝဲခံက့+ စးထီၣ်လၢအခိၣ်​ တုၤလီၤလၢ အခီၣ်ထံးလီၤ.+ ဒီးဟီၣ်ခိၣ်ဟူးဝဲ ဒီးလၢၢ်တဖၣ်​ သ့ၣ်ဖးဝဲလီၤ. ၅၂ ဒီးတၢ်သွၣ်ခိၣ်တဖၣ်​ အိးထီၣ်အသး ဒီးပှၤစီဆှံလၢ အသံတ့ၢ်အါဂၤအစိၣ်​ ဟဲဖျိးထီၣ်ဝဲလီၤ. ၅၃ (ဖဲယ့ၣ်ၡူး ဂဲၤဆၢထၢၣ်​ သမူထီၣ်က့ၤ ဝံၤအလီၢ်ခံ ပှၤတနီၤလၢ အလဲၤလၢ တၢ်သွၣ်ခိၣ်န့ၣ်​ လဲၤနုာ်လီၤဝဲလၢ ဝ့ၢ်စီဆှံအပူၤ)* ဒီးပှၤအါဂၤ ထံၣ်ဘၣ်​ အဝဲသ့ၣ်လီၤ.* ၅၄ ဖဲသုးခိၣ်ဒီးပှၤလၢ အအိၣ်ဒီးအီၤလၢ အခိးကွၢ် ယ့ၣ်ၡူးန့ၣ်​ ထံၣ်ဝဲဟီၣ်ခိၣ်ဟူးဒီး တၢ်လၢအဟဲကဲထီၣ်အသးတဖၣ်အခါ အဝဲသ့ၣ်ပျံၤတၢ်ဒိၣ်မး ဒီးတဲဝဲလၢ “ပှၤတဂၤအံၤမ့ၢ် ကစၢ်ယွၤအဖိခွါ နီၢ်ကီၢ်လီၤ.”+

၅၅ ဒီးပိာ်မုၣ်အါဂၤလၢ အမၤန့ၢ်တၢ်လၢ ယ့ၣ်ၡူးအဂီၢ် လၢအပိာ်ထီၣ်အခံ စးထီၣ်လၢ ကၤလံၤလါန့ၣ်​ အိၣ်ဝဲဖဲန့ၣ်​ ဒီးကွၢ်စိ တၢ်မၤအသးတဖၣ်​ လၢအယံၤလီၤ.+ ၅၆ လၢအဝဲသ့ၣ်အကျါန့ၣ်​ ပၣ်ဃုာ်ဒီး နီၢ်မၤရံ မၤကဒၤလ့ၣ်​ ဒီးစီၤယၤကိာ် ဒီးစီၤယိၤစ့ၣ်​ အမိၢ်နီၢ်မၤရံ ဒီးစီၤစ့းဘ့းဒဲ အဖိခွါတဖၣ်အမိၢ်လီၤ.+

၅၇ ဖဲဟါလီၤခီန့ၣ်​ ပှၤထူးပှၤတီၤတဂၤ လၢအမ့ၢ် ပှၤအရံၤမၤသဲဖိ စီၤယိၤသး လၢအကဲ ယ့ၣ်ၡူးအပျဲၢ်အဘီၣ်တဂၤ ဟဲဝဲလီၤ.+ ၅၈ အဝဲလဲၤဝဲလၢ စီၤပံၤလးအအိၣ်​ ဒီးဃ့န့ၢ်ဝဲ ယ့ၣ်ၡူးအစိၣ်လီၤ.+ စီၤပံၤလး ဟ့ၣ်လီၤတၢ်ကလုၢ်လၢ ပှၤကဟ့ၣ်လီၤအီၤလီၤ.+ ၅၉ စီၤယိၤသး ဟံးန့ၢ်ဝဲအစိၣ်​ ဒီးဘိၣ်ဘံထီၣ်ဝဲဒီး တၢ်ကံးညာ်လၢအကဆှီ ဒီးအညၣ်ဂ့ၤတဘ့ၣ်လီၤ.+ ၆၀ ဒီးအဝဲ လဲၤပာ်လီၤအီၤလၢ တၢ်သွၣ်ခိၣ်သီသီတဖျၢၣ်+ လၢအခူၣ်ဝဲလၢ လၢၢ်အပူၤလီၤ. ဝံၤဒီး အဝဲတလ့ၣ်တံၢ် လၢၢ်ဖးဒိၣ်တဖျၢၣ်လၢ တၢ်သွၣ်ခိၣ်​ အခိၣ်ထိး ဒီးက့ၤဝဲလီၤ. ၆၁ မ့မ့ၢ် နီၢ်မၤရံ မၤကဒၤလ့ၣ်​ ဒီးနီၢ်မၤရံ လၢအဝဲတဂၤန့ၣ်​ အိၣ်တ့ၢ်ဝဲဖဲန့ၣ်​ ဒီးဆ့ၣ်နီၤဝဲဖဲ တၢ်သွၣ်ခိၣ်​ အမဲာ်ညါလီၤ.+

၆၂ ဖဲတၢ်ကတဲာ်ကတီၤတၢ် အမုၢ်နံၤဝံၤ+ လၢခံတနံၤန့ၣ်​ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤဖၤရံၤၡဲတဖၣ်​ လဲၤပာ်ဖှိၣ်ထီၣ်အသးလၢ စီၤပံၤလးအအိၣ်လီၤ. ၆၃ ဒီးအဝဲသ့ၣ်တဲအီၤလၢ “ကစၢ်ဧၢ, ပှၤလံၣ်တၢ်လီတၢ်တဂၤန့ၣ်​ အတၢ်ကတိၤန့ၣ်​ ပနီၣ်ဘၣ်ဒံး, ဖဲအအိၣ်မူဒံးအခါ အတဲဝဲလၢ သၢသီဝံၤအလီၢ်ခံန့ၣ်​ အကဘၣ်​ တၢ်မၤသမူထီၣ်က့ၤအီၤလီၤ.+ ၆၄ အဃိ ဟ့ၣ်လီၤနကလုၢ်လၢ ပှၤကအိၣ်ခိး တၢ်သွၣ်ခိၣ်ဂ့ၤဂ့ၤ တုၤလၢသၢသီတသီ ဒ်သိး အပျဲၢ်အဘီၣ်တဖၣ်​ သုတဟဲ ဟုၣ်န့ၢ်အစိၣ်ဒီး+ တဲဘၣ်ပှၤဂၤလၢ ‘အဝဲ ဂဲၤဆၢထၢၣ်သမူထီၣ်က့ၤ လၢတၢ်သံလံ’ တဂ့ၤ အဂီၢ်မီၤ. မ့တမ့ၢ်ဘၣ်န့ၣ်​ တၢ်လံၣ်တၢ်လီ လၢအလီၢ်ခံကတၢၢ်တဘျီန့ၣ်​ ကနးန့ၢ်ဒံး အဆိကတၢၢ်တဘျီလီၤ.” ၆၅ စီၤပံၤလး တဲဘၣ်အဝဲသ့ၣ်လၢ “လဲၤကိးပှၤခိးတၢ်ဖိတဒူၣ်​ ဒီးပၢၤဃာ် တၢ်သွၣ်ခိၣ်ဂ့ၤဂ့ၤ ဒ်သုမၤသ့အသိးန့ၣ်.” ၆၆ အဃိ လၢၢ်လၢ အပံးဃာ်အသးလၢ တၢ်သွၣ်ခိၣ်​ အပူၤခိၣ်ထိးန့ၣ်​ အဝဲသ့ၣ်​ လဲၤပံးတံာ်ဃာ်ဝဲ မူာ်မူာ်နီၢ်နီၢ် ဒီးပာ်လီၤဝဲ ပှၤခိးတၢ်ဖိတဒူၣ်လီၤ.