၂ ၡမူၤအ့လး
၇ ဖဲစီၤပၤ အိၣ်ဝဲဆိးဝဲလၢ အနီၢ်ကစၢ်အဟံၣ်ပူၤ+ ဒီးယဟိဝၤယွၤ ဟ့ၣ်ဒုးအိၣ်ဘှံးအီၤလၢ အဒုၣ်အဒါ လၢအအိၣ်ဝးတရံးအီၤ ခဲလၢာ်အခါ ၂ စီၤပၤတဲဘၣ် ဝံနၤသၣ်လၢ+ “ယၤန့ၣ် ယအိၣ်လၢ ဟံၣ်လၢအဘၣ်တၢ်တ့အီၤလၢ သ့ၣ်ဆှိအ့ရ့းအပူၤ+ ဘၣ်ဆၣ် မ့မ့ၢ် ယွၤလၢအမ့ၢ်အတီတဂၤ အတလါစီဆှံန့ၣ် ဘၣ်အိၣ်လၢ ဒဲပူၤလီၤ.”+ ၃ စီၤနၤသၣ် တဲဆၢက့ၤ စီၤပၤလၢ “ယဟိဝၤယွၤ အိၣ်ဒီးနၤ အဃိ တၢ်လၢအအိၣ်လၢ နသးပူၤ တမံၤဂ့ၤ တမံၤဂ့ၤန့ၣ် မၤဟီ.”+
၄ ဖဲတၢ်တနၤန့ၣ် ယဟိဝၤယွၤ တဲဘၣ် စီၤနၤသၣ်လၢ ၅ “လဲၤတဲဘၣ် ယခ့ယပှၤ စီၤဒၤဝံးလၢ ‘ယဟိဝၤယွၤ တဲဝဲဒ်အံၤ “မ့ၢ်နကြၢးတ့ထီၣ် န့ၢ်ယၤ ဟံၣ်လၢ ယကအိၣ်လၢအပူၤစ့ၢ်ကီးဧါ.+ ၆ စးထီၣ်လၢ မုၢ်တနံၤလၢ ယဒုးဟးထီၣ် ပှၤအံၣ်စရ့လးဖိလၢ ကီၢ်အဲၤကူပတူးအပူၤ တုၤလၢ မုၢ်မဆါတနံၤအံၤန့ၣ် ယတအိၣ်ဘၣ်လၢ ဟံၣ်ပူၤ နီတဘျီဘၣ်,+ ယလဲၤလၢတၢ်လီၢ် တတီၤဘၣ်တတီၤလၢ ဒဲတဖျၢၣ်အပူၤလီၤ.+ ၇ ယလဲၤတၢ်ဒီး ပှၤအံၣ်စရ့လးဖိ ဒီတကတီၢ် ဒီးယပာ်ထီၣ် ပှၤခိၣ်ပှၤနၢ်တဖၣ်လၢ အံၣ်စရ့လးအဒူၣ်တဖၣ် တဒူၣ်စုာ်စုာ်အဖီခိၣ် ဒ်သိးအဝဲသ့ၣ် ကအံးထွဲကွၢ်ထွဲ ယပှၤဂီၢ်မုၢ် ပှၤအံၣ်စရ့လးဖိတဖၣ် အဂီၢ်လီၤ. မ့ၢ်ယသံကွၢ် ပှၤခိၣ်ပှၤနၢ်တဖၣ်အံၤလၢ ‘ဘၣ်မနုၤအဃိ သုတတ့ထီၣ်န့ၢ်ယၤ ဟံၣ်တဖျၢၣ်လၢ သ့ၣ်ဆှိအ့ရ့းဘၣ်လဲၣ်’ န့ၣ်အိၣ်တဘျီဘျီဧါ.”’ ၈ ဒီးတဲဘၣ် ယခ့ယပှၤ စီၤဒၤဝံးလၢ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဖဲနအိၣ်ဒံးလၢ ပျီပူၤ ဒီးနကွၢ်ထွဲဒံး သိတဖၣ်အဆၢကတီၢ်+ ယကိးန့ၢ်နၤ ဒ်သိးနကကဲထီၣ် ယပှၤဂီၢ်မုၢ် အံၣ်စရ့လး အခိၣ်အဂီၢ်လီၤ.+ ၉ ဒီးဖဲနလဲၤတၢ် တပူၤဂ့ၤ တပူၤဂ့ၤန့ၣ် ယကအိၣ်ဒီးနၤ+ ဒီးယကမၤလီၤမၢ်ကွံာ် နဒုၣ်နဒါ ခဲလၢာ် လၢနမဲာ်ညါလီၤ.+ ဒီးယကမၤဒိၣ်ထီၣ် နမံၤ+ ဒ်ပှၤဖးဒိၣ်တဖၣ်လၢ ဟီၣ်ခိၣ်ချၢအမံၤ အသိးလီၤ. ၁၀ ယကဃုထၢ တၢ်လီၢ်တတီၤလၢ ယပှၤဂီၢ်မုၢ် အံၣ်စရ့လး အဂီၢ် ဒီးဒုးအိၣ်ဆိး အဝဲသ့ၣ်ဖဲန့ၣ်လီၤ. အဝဲသ့ၣ် ကအိၣ်ဝဲဖဲန့ၣ် ဒီးတၢ်လၢ အကမၤတံာ်တာ် အဝဲသ့ၣ်န့ၣ် တအိၣ်လၢၤဘၣ်. ဒီးပှၤအၢပှၤသီ တဆီၣ်တံၢ် မၤနၢၤကဒီး အဝဲသ့ၣ်ဒ်လၢညါ+ ၁၁ ဖဲယပာ်ထီၣ် စံၣ်ညီၣ်ကွီၢ်တဖၣ်လၢ+ အဝဲသ့ၣ်အဖီခိၣ် ဝံၤအလီၢ်ခံ အသိးလၢၤဘၣ်. ဒီးယကဒုးအိၣ်ဘှံးနၤလၢ နဒုၣ်နဒါ ခဲလၢာ်လီၤ.+
“‘“ဒီးယဟိဝၤယွၤ တဲဘၣ်နၤလၢ ယဟိဝၤယွၤ ကဒုးကဲထီၣ် နစၢၤနသွဲၣ်တဖၣ်လၢ စီၤပၤတဖၣ်လီၤ.*+ ၁၂ ဖဲနသံ+ ဒ်နမိၢ်ပၢ်ဖံဖု လၢပျၢၤတဖၣ် အသိးအခါ ယကပာ်ထီၣ် နချံနသၣ် လၢအမ့ၢ် နဖိခွါတဂၤ ဒီးယကဒုးအိၣ်ဂၢၢ်ဆိးကျၢၤ အဘီမုၢ်လီၤ.+ ၁၃ အဝဲကမ့ၢ် ပှၤတဂၤလၢ ကသူၣ်ထီၣ်ဟံၣ်လၢ ယမံၤအဂီၢ်+ ဒီးယကဒုးအိၣ်ဂၢၢ်ဆိးကျၢၤ အဘီအမုၢ် အလီၢ်ပစိာ် လီၤထူလီၤယိာ်လီၤ.+ ၁၄ ယကကဲထီၣ်အပၢ် ဒီးအဝဲကကဲထီၣ် ယဖိခွါလီၤ.+ ဖဲအဝဲမၤကမၣ်တၢ်အခါ ယကသိၣ်ဃီၣ်အီၤလၢ ပှၤကညီအနီၣ်တီၢ် ဒီးလၢပှၤကညီ* အတၢ်တီၢ်တဖၣ်လီၤ.+ ၁၅ ယတထုးကွံာ် ယတၢ်အဲၣ်လၢအတီ လၢအအိၣ် ဒ်ယထုးကွံာ်အီၤလၢ စီၤစီလူးအအိၣ်+ လၢနမဲာ်ညါ အသိးန့ၣ်ဘၣ်. ၁၆ နစၢၤနသွဲၣ်တဖၣ်* ဒီးနဘီနမုၢ်န့ၣ် ကအိၣ်ဂၢၢ်ဆိးကျၢၤ လၢနမဲာ်ညါ လီၤထူလီၤယိာ် ဒီးနလီၢ်ပစိာ် ကအိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.”’”+
၁၇ စီၤနၤသၣ် တဲဘၣ် စီၤဒၤဝံးလၢ တၢ်ကတိၤတဖၣ် ဒီးတၢ်ထံၣ်လၢညါခီန့ၣ် ခဲလၢာ်လီၤ.+
၁၈ ဒီးစီၤပၤဒၤဝံး လဲၤနုာ်ဒီးဆ့ၣ်နီၤလၢ ယဟိဝၤယွၤ အမဲာ်ညါ ဒီးတဲဝဲလၢ “တၢ်ပၢကစၢ် ယဟိဝၤယွၤဧၢ, ယတမ့ၢ် တၢ်နီတမံၤဘၣ်. ဒီးနမၤတ့ၢ်န့ၢ်တၢ်လၢ ယစၢၤယသွဲၣ်တဖၣ်* အဂီၢ် ထဲထဲအံၤညါ သနာ်က့ ပတမ့ၢ် တၢ်နီတမံၤဘၣ်.+ ၁၉ အိ တၢ်ပၢကစၢ် ယဟိဝၤယွၤဧၢ, ထဲန့ၣ်မးတကးဒံးဘၣ် နတဲစ့ၢ်ကီးလၢ ယစၢၤယသွဲၣ်တဖၣ်* ကဆဲးအိၣ်ဝဲတုၤလၢ ခါဆူညါ ဖးယံာ်ဒံးလီၤ. အိ တၢ်ပၢကစၢ် ယဟိဝၤယွၤဧၢ, အဝဲအံၤ မ့ၢ်ဝဲ တၢ်သိၣ်တၢ်သီလၢ ပှၤဟီၣ်ခိၣ်ဖိခဲလၢာ်အဂီၢ်လီၤ. ၂၀ အိ တၢ်ပၢကစၢ် ယဟိဝၤယွၤဧၢ, နသ့ၣ်ညါ ယၤဂ့ၤဂ့ၤအဃိ+ နခ့နပှၤစီၤဒၤဝံးအံၤ တဲနၤ တၢ်မနုၤကသ့ဒံးလဲၣ်. ၂၁ နမၤ တၢ်အဒိၣ်အမုၢ်တဖၣ်အံၤခဲလၢာ် ဒီးနပာ်ဖျါထီၣ် တၢ်သ့ၣ်တဖၣ်အံၤ လၢယအိၣ်ခီဖျိလၢ နအၢၣ်လီၤပာ်စၢၤ ဒ်န့ၣ် ဒီးခီဖျိလၢ အမ့ၢ်တၢ်လၢ အဘၣ်နသးအဃိလီၤ.+ ၂၂ အိ တၢ်ပၢကစၢ် ယဟိဝၤယွၤဧၢ, လၢတၢ်န့ၣ်အဃိ နမ့ၢ်ပှၤလၢ အဒိၣ်အထီ သပှၢ်တၢၢ်လီၤ.+ တၢ်လၢ ပနၢ်ဟူတ့ၢ် ကိးမံၤဒဲးန့ၣ် ပာ်ဂၢၢ်ပာ်ကျၢၤဝဲလၢ နမ့ၢ် ယွၤလၢ အမ့ၢ်အတီထဲတဂၤ+ ဒီးပှၤဒ်သိးဒီးနၤ တအိၣ်ဘၣ်.+ ၂၃ နလဲၤမၤပူၤဖျဲး ပှၤအံၣ်စရ့လးဖိ ဒ်သိးအဝဲသ့ၣ် ကကဲထီၣ် နပှၤဂီၢ်မုၢ်အဂီၢ်+ ဒီးနမၤဒိၣ်ထီၣ်နမံၤ+ ခီဖျိလၢ နမၤတၢ်လၢ အဒိၣ်အမုၢ် ဒီးတၢ်လၢ အလီၤကမၢကမၣ်လၢ အဝဲသ့ၣ်အဂီၢ်လီၤ.+ နနီဟးထီၣ်ကွံာ် ပှၤကလုာ်တဖၣ် ဒီးအဝဲသ့ၣ် အယွၤတဖၣ်လၢ နပှၤဂီၢ်မုၢ်လၢ နမၤပူၤဖျဲးထီၣ်အီၤလၢ ကီၢ်အဲၤကူပတူးအပူၤန့ၣ် အဂီၢ်လီၤ. အဃိ လၢဟီၣ်ခိၣ်ချၢန့ၣ် ပှၤအဂၤ တကလုာ် လၢအလီၤဂာ်ဒီး နပှၤဂီၢ်မုၢ် အံၣ်စရ့လးန့ၣ် ကအိၣ်ဧါ.+ ၂၄ အိ ယဟိဝၤယွၤဧၢ, နဒုးကဲထီၣ် အံၣ်စရ့လးလၢ နနီၢ်ကစၢ် အပှၤဂီၢ်မုၢ် လီၤထူလီၤယိာ်+ ဒီးနကဲထီၣ် အဝဲသ့ၣ် အကစၢ်ယွၤလီၤ.+
၂၅ “အိ ယဟိဝၤယွၤဧၢ, ခဲအံၤ မၤလၢပှဲၤနတၢ်အၢၣ်လီၤ လၢနအၢၣ်လီၤ ဘၣ်ဃးဒီး ယၤ ဒီးယစၢၤယသွဲၣ်တဖၣ်* လီၤထူလီၤယိာ်တက့ၢ်. မ်နမၤဒ် နအၢၣ်လီၤအသိးတက့ၢ်.+ ၂၆ မ်နမံၤ ဘၣ်တၢ်ပာ်ထီၣ်ထီအီၤ လီၤထူလီၤယိာ်+ ဒ်သိး ပှၤဂီၢ်မုၢ်တဖၣ် ကတဲဝဲလၢ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤန့ၣ် မ့ၢ်ဝဲ အံၣ်စရ့လးအယွၤ’ ဒီးမ်နခ့နပှၤ စီၤဒၤဝံး အစၢၤအသွဲၣ်* အိၣ်ဂၢၢ်ဆိးကျၢၤဝဲ လၢနမဲာ်ညါတက့ၢ်.+ ၂၇ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လးအယွၤန့ၣ် လီၣ်ဖျါထီၣ်တၢ်လၢ ယအိၣ် ခီဖျိအတဲဝဲလၢ ‘ယကဒုးကဲထီၣ် နစၢၤနသွဲၣ်တဖၣ်လၢ စီၤပၤတဖၣ်လီၤ.’+ လၢတၢ်န့ၣ်အဃိ တၢ်ထုကဖၣ်တခါအံၤ ယဃ့အီၤလၢနအိၣ် ဘူၣ်ဝဲလီၤ. ၂၈ အိ တၢ်ပၢကစၢ် ယဟိဝၤယွၤဧၢ, နမ့ၢ်ယွၤလၢ အမ့ၢ်အတီ ဒီးနတၢ်ကတိၤတဖၣ်န့ၣ် မ့ၢ်ဝဲတီဝဲ+ ဒီးနအၢၣ်လီၤယၤ တၢ်လၢအဂ့ၤတဖၣ်အံၤလီၤ. ၂၉ အိ တၢ်ပၢကစၢ် ယဟိဝၤယွၤဧၢ, မ့ၢ်လၢ နအၢၣ်လီၤပာ်စၢၤလံအဃိ မ်အဘၣ်နသးလၢ နကဆိၣ်ဂ့ၤ ယစၢၤယသွဲၣ်တဖၣ်* ဒီးမ်အဝဲသ့ၣ် အိၣ်လၢနမဲာ်ညါ လီၤထူလီၤယိာ်တက့ၢ်.+ ဒီးမ်ယစၢၤယသွဲၣ်တဖၣ် ဘၣ်တၢ်ဆိၣ်ဂ့ၤ လီၤထူလီၤယိာ်တက့ၢ်.”+