၂ ကရံၣ်သူး
၁၃ ယအိၣ်ကတဲာ်ကတီၤ ယသးလၢ ယကလဲၤလၢ သုအိၣ်တဘျီအံၤန့ၣ် ပှဲၤထီၣ်သၢဘျီတဘျီလံ. ဒ်တၢ်ကွဲးအသး အိၣ်ဝဲအသိး “တၢ်ဂ့ၢ်ကိးမံၤဒဲးန့ၣ် တၢ်ကဘၣ် ပာ်ဂၢၢ်ပာ်ကျၢၤအီၤ လၢပှၤအုၣ်အသး ခံဂၤသၢဂၤ အတၢ်ကတိၤအဃိလီၤ.”+ ၂ ခဲအံၤ ယတအိၣ်ဒီးသုဘၣ်. ဘၣ်ဆၣ် တၢ်လၢ ယကတဲခဲအံၤန့ၣ် ပာ်အီၤဒ် ယတၢ်လဲၤဟး အိၣ်သကိးသု ခံဘျီတဘျီ ကဲထီၣ် အနီၢ်ကီၢ်အသိးတက့ၢ်. အဃိ ဒ်ယမၤလၢညါအသိး ခဲအံၤစ့ၢ်ကီး ယဟ့ၣ်ပလီၢ်ဆိပာ်စၢၤ ပှၤလၢ အမၤကမၣ်တ့ၢ်တၢ် လၢအပူၤကွံာ်တဖၣ် ဒီးပှၤအဂုၤအဂၤခဲလၢာ်လၢ ယမ့ၢ်ဟဲက့ၤကဒီးတဘျီန့ၣ် အဝဲသ့ၣ် တပူၤဒီး တၢ်သိၣ်က့ၤသီက့ၤ နီတဂၤဘၣ်. ၃ ယကမၤဒ်န့ၣ်န့ၣ် မ့ၢ်လၢ သုလီကီ တၢ်အုၣ်အသးလၢ ခရံာ်တဲတၢ် ခီဖျိလၢ ယၤအဃိလီၤ. ဒီးလၢသုဖီခိၣ်န့ၣ် ခရံာ်အဂံၢ်အဘါ တစၢ်ဘၣ်. မ့ၢ်အပာ်ဖျါထီၣ် တၢ်စိတၢ်ကမီၤ လၢသုကျါလီၤ. ၄ မ့ၢ်လီၤ, အဝဲဘၣ် တၢ်မၤသံအီၤလၢ သ့ၣ်တၢၣ်အလိၤ ခီဖျိလၢ အဂံၢ်အဘါစၢ်ဝဲ* အဃိလီၤ. ဘၣ်ဆၣ် အဝဲမူဝဲ ခီဖျိလၢ ကစၢ်ယွၤ အစိအကမီၤ အဃိလီၤ.+ ပဝဲစ့ၢ်ကီး ပဂံၢ်ပဘါစၢ် ဒ်အီၤအသိး ဘၣ်ဆၣ် ပကမူဃုာ်ဒီးအီၤ တပူၤဃီ+ ခီဖျိလၢ ကစၢ်ယွၤ အစိအကမီၤလၢ အမၤတၢ်လၢ သုကျါအဃိလီၤ.+
၅ မ့ၢ်သုအိၣ်လၢ တၢ်စူၢ်တၢ်နာ်အပူၤဧါ သုတအိၣ်ဘၣ်ဧါန့ၣ် သမံသမိးလီၤက့ၤ သုသးတက့ၢ်. သုနီၢ်ကစၢ်ဒၣ်ဝဲ မ့ၢ်ပှၤဒ်လဲၣ်န့ၣ် မၤကွၢ်လီၤသုသးတက့ၢ်.+ မ့ၢ်သုတသ့ၣ်ညါလီၤသုသးလၢ ယ့ၣ်ၡူးခရံာ် အိၣ်လၢသုပူၤဘၣ်ဧါ. ခရံာ်မ့ၢ်တအိၣ်လၢ သုပူၤဘၣ်န့ၣ် ကမ့ၢ်လၢ ကစၢ်ယွၤ တဘၣ်သူၣ်ဘၣ်သး သုဘၣ်အဃိလီၤ. ၆ ယမုၢ်လၢ်သပှၢ်တၢၢ်လၢ သုကသ့ၣ်ညါလီၤသုသးလၢ ကစၢ်ယွၤ ဘၣ်သူၣ်ဘၣ်သးပှၤလီၤ.
၇ ဒ်သိး သုတမၤကမၣ်တၢ် နီတမံၤတဂ့ၤအဂီၢ် ပဃ့ထုကဖၣ်တၢ်လၢ ကစၢ်ယွၤ အအိၣ်လီၤ. ဒီးပတၢ်တိာ်ပာ်န့ၣ် တမ့ၢ်ဒ်သိးပှၤဂၤကပာ်ဒိၣ်ပာ်ထီပှၤအဂီၢ်ဘၣ်. ပှၤဂၤမ့ၢ်တပာ်ဒိၣ်ပာ်ထီပှၤဘၣ် သနာ်က့ ပအဲၣ်ဒိးလၢ သုကမၤတၢ်လၢ အဘၣ်လီၤ. ၈ ပမၤတၢ်လၢ အထီဒါ တၢ်မ့ၢ်တၢ်တီ တသ့နီတမံၤဘၣ်. ပမၤသ့ထဲ တၢ်လၢအဆီၣ်ထွဲ တၢ်မ့ၢ်တၢ်တီလီၤ. ၉ ဖဲသုဂံၢ်ဆူၣ်ဘါဆူၣ် ဒီးပဂံၢ်စၢ်ဘါစၢ်အခါ ပသးခု သပှၢ်တၢၢ်လီၤ. ဒီးပဃ့ထုကဖၣ် ဒ်သိး သုကဘှီဘၣ်ထီၣ်က့ၤ သုသးအဂီၢ်လီၤ. ၁၀ ဖဲယအိၣ်ဒီးသုအခါ ဒ်သိး ယသုတလိၣ်သူ တၢ်စိတၢ်ကမီၤလၢ ကစၢ် ဟ့ၣ်တ့ၢ်ယၤန့ၣ် ဆူၣ်ဆူၣ်တဂ့ၤအဂီၢ် ဖဲယတအိၣ်ဒီးသုဒံးဘၣ်အခါ ယကွဲးတၢ်ဂ့ၢ်တဖၣ်အံၤလီၤ. ဒီးယကသူ တၢ်စိတၢ်ကမီၤအံၤလၢ ယကဟ့ၣ်ဂံၢ်ဟ့ၣ်ဘါသုအဂီၢ်+ ဒီးတမ့ၢ်လၢ ယကမၤဟးဂီၤသုသးအဂီၢ်ဘၣ်.
၁၁ ဒီပုၢ်ဝဲၢ်သ့ၣ်ဧၢ, လၢခံကတၢၢ်န့ၣ် ယကဟ့ၣ်ဂံၢ်ဟ့ၣ်ဘါသုလၢ ဆဲးအိၣ်ဒီး တၢ်သးခု, ဘှီဘၣ်ထီၣ်က့ၤသုသး, တူၢ်လိာ်တၢ်မၤမုာ်ထီၣ်လၢ ပှၤဂၤအအိၣ်,+ ဆိကမိၣ်တၢ်တမံၤဃီ+ ဒီးအိၣ်ဃူအိၣ်ဖိးတက့ၢ်.+ ဒီးတၢ်အဲၣ်တၢ်ကွံ ဒီးတၢ်ဃူတၢ်ဖိးကစၢ်န့ၣ်+ ကအိၣ်ဒီးသုလီၤ. ၁၂ ဆၢဂ့ၤဆၢဝါလိာ်သုသးလၢ တၢ်အဲၣ်တၢ်ကွံ* အပူၤတက့ၢ်. ၁၃ ပှၤစီဆှံခဲလၢာ် ဆၢဂ့ၤဆၢဝါသုလီၤ.
၁၄ ကစၢ်ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ်, ကစၢ်ယွၤ အတၢ်အဲၣ် ဒီးသးစီဆှံလၢ သုဝဲခဲလၢာ်ဒိးန့ၢ်ဘၣ်ဝဲ ဒ်သိးသိးန့ၣ် မ်အအိၣ်ဒီးသု ခဲလၢာ်တက့ၢ်.