လူၤကၣ်
၂၀ ဘၣ်တနံၤ ဖဲယ့ၣ်ၡူးသိၣ်လိ ပှၤဂီၢ်မုၢ်လၢ တၢ်လုၢ်ဟံၣ်ပူၤ ဒီးစံၣ်တဲၤတဲလီၤ တၢ်သးခုကစီၣ်အခါ ပှၤလုၢ်တၢ်ဒိၣ်အခိၣ်တဖၣ်, ပှၤကွဲးလံာ်ဖိ ဒီးပှၤသူၣ်က့သးပှၢ်တဖၣ် ဟဲဝဲ ၂ ဒီးတဲအီၤလၢ “နမၤတၢ်သ့ၣ်တဖၣ်အံၤ လၢမတဂၤ အစိကမီၤလဲၣ်, မတဂၤဟ့ၣ်နၤ တၢ်စိတၢ်ကမီၤအံၤလဲၣ်.”+ ၃ အဝဲတဲဆၢ အဝဲသ့ၣ်လၢ “ယၤနာ်က့ ယကသံကွၢ်သု တၢ်တမံၤ ဒီးတဲဆၢယၤတက့ၢ်. ၄ စီၤယိၤဟၣ် အတၢ်ဒိးဘျၢန့ၣ် မ့ၢ်အဟဲလၢ ကစၢ်ယွၤလၢမူခိၣ် အအိၣ်ဧါ မ့တမ့ၢ် အဟဲလၢ ပှၤဟီၣ်ခိၣ်ဖိ အအိၣ်ဧါ.” ၅ အဝဲသ့ၣ် တဲလိာ်အသး ကဒဲကဒဲလၢ “ပမ့ၢ်တဲလၢ ‘ယွၤလၢမူခိၣ် အအိၣ်’ န့ၣ်အကတဲဝဲလၢ ‘ဘၣ်မနုၤအဃိ သုတနာ်အီၤဘၣ်လဲၣ်.’ ၆ ဘၣ်ဆၣ် ပမ့ၢ်တဲလၢ ‘ပှၤဟီၣ်ခိၣ်ဖိအအိၣ်’ န့ၣ်ပှၤခဲလၢာ် ကကွံာ်ပှၤလၢလၢၢ်, မ့ၢ်လၢ အဝဲသ့ၣ် နာ်ဝဲလၢ စီၤယိၤဟၣ်န့ၣ် မ့ၢ်ဝံတဂၤအဃိလီၤ.”+ ၇ အဃိ အဝဲသ့ၣ် တဲဆၢဝဲလၢ အဟဲဖဲလဲၣ်န့ၣ် ပတသ့ၣ်ညါဘၣ်. ၈ ယ့ၣ်ၡူးတဲဆၢ အဝဲသ့ၣ်လၢ “ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်န့ၣ် ယတတဲသုဘၣ်.”
၉ ဝံၤဒီး အဝဲတဲဘၣ် ပှၤဂီၢ်မုၢ်တဖၣ်လၢ တၢ်ကတိၤဒိတခါလီၤ. အဝဲတဲဝဲလၢ “ပှၤတဂၤ သူၣ်လီၤဝဲ စပံးတကျီး+ ဒီးငါလီၤဝဲလၢ ပှၤမၤတၢ်ဖိတဖၣ်အအိၣ် ဝံၤဒီး အဝဲလဲၤအိၣ်လၢ ထံဂၤကီၢ်ဂၤ တစိၢ်တလီၢ်လီၤ.+ ၁၀ ဖဲတၢ်ဆၢကတီၢ် ဘၣ်အခါ အဝဲမၢလီၤဝဲကုၢ်တဂၤ ဒ်သိး ပှၤမၤတၢ်ဖိတဖၣ် ကဟ့ၣ်လီၤအီၤ တၤသူတၤသၣ် တနီၤလၢ စပံးကျီးအပူၤလီၤ. ဘၣ်ဆၣ် ပှၤမၤတၢ်ဖိတဖၣ် တီၢ်အီၤဝံၤဒီး ပျဲက့ၤအီၤ ခီလီလီလီၤ.+ ၁၁ ဘၣ်ဆၣ် အဝဲဆှၢလီၤကဒီး ကုၢ်လၢအဂၤတဂၤလီၤ. ဒီးအဝဲသ့ၣ် တီၢ်အီၤ, မၤမဲာ်ဆှးအီၤ* ဒီးပျဲက့ၤအီၤ ခီလီလီလီၤ. ၁၂ အဝဲဆှၢလီၤကဒီးဝဲ သၢဂၤတဂၤ ဒီးအဝဲသ့ၣ် မၤဘၣ်ဒိဘၣ်ထံးအီၤ ဒီးနီဟးထီၣ်ကွံာ်အီၤလီၤ. ၁၃ အဃိ စပံးကျီးအကစၢ်န့ၣ် တဲဝဲလၢ ‘ယဘၣ်မၤဒ်လဲၣ်. ယကဆှၢလီၤ ယဖိခွါလၢယအဲၣ်+ ဒီးအဝဲသ့ၣ် ကပာ်ကဲအီၤဧါသၢၤ.’ ၁၄ ဖဲပှၤမၤတၢ်ဖိတဖၣ် ထံၣ်အဖိခွါအခါ အဝဲသ့ၣ်တဲလိာ်အသး ကဒဲကဒဲလၢ ‘အဝဲမ့ၢ် ပှၤလၢ အကန့ၢ်သါဘၣ်တၢ်တဂၤလီၤ. ပကလဲၤမၤသံအီၤ ဒီးတၢ်န့ၢ်သါန့ၣ် ကကဲထီၣ်ပတၢ်လီၤ.’ ၁၅ အဃိ အဝဲသ့ၣ် ထုးထီၣ်ကွံာ်အီၤလၢ စပံးကျီးအချၢ ဒီးမၤသံအီၤလီၤ.+ အဃိ စပံးကျီးအကစၢ် ကမၤ အဝဲသ့ၣ်ဒ်လဲၣ်. ၁၆ အဝဲကဟဲ မၤသံကွံာ် ပှၤမၤတၢ်ဖိတဖၣ်အံၤ ဒီးကဟ့ၣ်လီၤကွံာ် စပံးကျီးလၢ ပှၤအဂၤတဖၣ် အစုပူၤလီၤ.”
ဖဲအဝဲသ့ၣ် နၢ်ဟူဘၣ်ဝဲဒ်န့ၣ်အခါ အဝဲသ့ၣ်တဲဝဲလၢ “မ်အသုတမၤအသးဒ်န့ၣ် နီတဘျီတဂ့ၤ.” ၁၇ ယ့ၣ်ၡူးကွၢ်အဝဲသ့ၣ်လိၤလိၤ ဒီးတဲဝဲလၢ “တၢ်ကွဲးအသး လၢအမ့ၢ် ‘လၢၢ်တဖျၢၣ်လၢ ပှၤသူၣ်ဟံၣ်ဖိတၢၤကွံာ်ဝဲန့ၣ် ကဲထီၣ်ဝဲ လၢၢ်လၢအရ့ဒိၣ်ကတၢၢ်တဖျၢၣ်’+ န့ၣ်အခီပညီဒ်လဲၣ်. ၁၈ ပှၤကိးဂၤဒဲးလၢ အလီၤတဲာ်လၢ လၢၢ်အံၤအလိၤန့ၣ် ကဘၣ်ဒိဘၣ်ထံးဝဲနးမး+ ဒီးပှၤလၢ လၢၢ်အံၤလီၤတဲာ်လၢအလိၤန့ၣ် ကသဘှံးဝဲလီၤ.”
၁၉ ပှၤကွဲးလံာ်ဖိ ဒီးပှၤလုၢ်တၢ်ဒိၣ်အခိၣ်တဖၣ် သ့ၣ်ညါဝဲလၢ ယ့ၣ်ၡူး တဲတၢ်ကတိၤဒိအံၤ ဘၣ်ဃးဒီး အဝဲသ့ၣ်အဃိ+ အဝဲသ့ၣ် အဲၣ်ဒိးဖီၣ်အီၤဖဲ ဆၢကတီၢ်အဝဲန့ၣ်လီၤ. ဘၣ်ဆၣ် အဝဲသ့ၣ် ပျံၤပှၤဂီၢ်မုၢ်လီၤ. ၂၀ အဃိ အဝဲသ့ၣ်ခိးကွၢ်ဝဲ ယ့ၣ်ၡူးလီၤတံၢ်လီၤဆဲး ဝံၤဒီးအဝဲသ့ၣ် ဆှၢလီၤဝဲ ပှၤလၢ အငါခူသူၣ်န့ၢ်ဝဲတဖၣ်လၢ ကပာ်မၤအသးလၢ အမ့ၢ်ပှၤတီပှၤလိၤ ဒ်သိးယ့ၣ်ၡူး ကတဲကမၣ်တၢ် အဂီၢ်လီၤ.+ ဝံၤဒီးအဝဲသ့ၣ် ကဟ့ၣ်လီၤကွံာ်အီၤလၢ ပဒိၣ်ပပှၢ် ဒီးပဒိၣ်ဖးဒိၣ်လၢ အိၣ်ဒီးအစိကမီၤတဂၤ အစုပူၤလီၤ. ၂၁ ဒီးအဝဲသ့ၣ် သံကွၢ်အီၤလၢ “သရၣ်ဧၢ, ပသ့ၣ်ညါလၢ နတဲတၢ် ဒီးနသိၣ်လိတၢ် တီတီလိၤလိၤလီၤ. ဒီးနတကွၢ် ဒိၣ်ဆံးအါစှၤတၢ်ဘၣ် ဒီးနသိၣ်လိယွၤအကျဲ တီတီလိၤလိၤလီၤ. ၂၂ မ့ၢ်ပကြၢးဟ့ၣ် တၢ်ခိတၢ်သွဲလၢ ကဲစၢ်ဧါ ပတကြၢးဟ့ၣ်ဘၣ်ဧါ.” ၂၃ ဘၣ်ဆၣ် ယ့ၣ်ၡူးသ့ၣ်ညါ အဝဲသ့ၣ် အတၢ်ကူၣ်အဃိ အဝဲတဲအဝဲသ့ၣ်လၢ ၂၄ “ဒုးနဲၣ်ယၤ စ့ဒန့ၤရံၤ* တဘ့ၣ်တက့ၢ်. အအိၣ်ဒီး မတဂၤအဂီၤ ဒီးမတဂၤအမံၤလဲၣ်.” အဝဲသ့ၣ်တဲဝဲလၢ “ကဲစၢ်လီၤ.” ၂၅ ယ့ၣ်ၡူးတဲဘၣ် အဝဲသ့ၣ်လၢ “အဃိ တၢ်လၢအဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်.+ ဘၣ်ဆၣ် တၢ်လၢအဘၣ်ဃးဒီး ကစၢ်ယွၤန့ၣ် ဟ့ၣ်က့ၤလၢ ကစၢ်ယွၤတက့ၢ်.”+ ၂၆ ဒီးဒ်သိး ယ့ၣ်ၡူးကတဲကမၣ်တၢ်လၢ ပှၤမဲာ်ညါအဂီၢ် အဝဲသ့ၣ် မၤဝဲတန့ၢ်ဘၣ်. တကးဒံးဘၣ် ခီဖျိလၢ ယ့ၣ်ၡူးအတၢ်စံးဆၢအဃိ အဝဲသ့ၣ် ကမၢကမၣ်ဝဲ ဒီးအိၣ်ဘှ့ၣ်ဝဲလီၤ.
၂၇ မ့မ့ၢ် ပှၤစးဒူၤကဲလၢ အတဲဝဲလၢ တၢ်ဂဲၤဆၢထၢၣ်သမူထီၣ်က့ၤ တအိၣ်ဘၣ်န့ၣ်+ အဝဲသ့ၣ်တနီၤ ဟဲသံကွၢ်ယ့ၣ်ၡူးလၢ+ ၂၈ “သရၣ်ဧၢ, စီၤမိၤၡ့ကွဲးန့ၢ်ပှၤလၢ ‘ပှၤတဂၤ မ့ၢ်သံ ဒီးအမါမ့ၢ်အိၣ်တ့ၢ်ဝဲ ဘၣ်ဆၣ် အဖိမ့ၢ်တအိၣ် နီတဂၤဘၣ်န့ၣ် အဒီပုၢ်ဝဲၢ်ခွါ ဘၣ်ဟံးန့ၢ်အမါ ဒီးဒုးအိၣ်ထီၣ် အစၢၤအသွဲၣ်လၢ အဒီပုၢ်ဝဲၢ်ခွါ လၢအသံတဂၤ အဂီၢ်လီၤ.’+ ၂၉ ဒီးပှၤဒီပုၢ်ဝဲၢ်ခွါ အိၣ်ဝဲနွံဂၤလီၤ. အဒိၣ်ကတၢၢ်တဂၤန့ၣ် ဟံးန့ၢ်အမါ ဒီးသံဝဲ ဘၣ်ဆၣ် အဖိတအိၣ် နီတဂၤဘၣ်. ၃၀ အဃိ ခံဂၤတဂၤ ဟံးန့ၢ်အီၤ ဒီးသံဝဲစ့ၢ်ကီးလီၤ. ၃၁ ဒီးသၢဂၤတဂၤ ဟံးန့ၢ်အီၤလီၤ. ဒီးတၢ်ကဲထီၣ်အသး ဒ်န့ၣ် တုၤလီၤလၢ ပှၤနွံဂၤတဂၤဒၣ်လဲာ် သံဝဲဘၣ်ဆၣ် အဖိတအိၣ် နီတဂၤဘၣ်. ၃၂ လၢခံကတၢၢ် ပိာ်မုၣ်တဂၤန့ၣ် သံဝဲစ့ၢ်ကီးလီၤ. ၃၃ မ့ၢ်လၢ အဝဲကဲ ပှၤနွံဂၤလၢာ်အမါအဃိ ဖဲပှၤသံ ဂဲၤဆၢထၢၣ်သမူထီၣ်က့ၤ အခါ အဝဲကမ့ၢ် မတဂၤ အမါလဲၣ်.”
၃၄ ယ့ၣ်ၡူးတဲဆၢ အဝဲသ့ၣ်လၢ “ပှၤလၢ စိၤခဲအံၤန့ၣ် အဝဲသ့ၣ် ဆီဟံၣ်ဆီဃီလီၤ. ၃၅ ဘၣ်ဆၣ် ပှၤလၢအဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဖဲ စိၤလၢ ကဟဲအဆၢကတီၢ် ဒီးဂဲၤဆၢထၢၣ် သမူထီၣ်က့ၤလၢ တၢ်သံန့ၣ် တဆီဟံၣ်ဆီဃီလၢၤဘၣ်.+ ၃၆ အဝဲသ့ၣ်သံတသ့ နီတဘျီလၢၤဘၣ်, ကလီၤဂာ်ဒီး မူခိၣ်ကလူးတဖၣ် ဒီးအဝဲသ့ၣ်ကကဲထီၣ် ကစၢ်ယွၤ အဖိတဖၣ် ခီဖျိလၢ အဝဲသ့ၣ် ဂဲၤဆၢထၢၣ်သမူထီၣ်က့ၤ အဃိလီၤ. ၃၇ ဘၣ်ဆၣ် လၢတၢ်ကွဲးနီၣ် ဘၣ်ဃးဒီး သပှီာ်တၤဆှုၣ်တခိၣ် အပူၤန့ၣ် စီၤမိၤၡ့ ပာ်ဖျါထီၣ်ဝဲလၢ ပှၤသံကဂဲၤဆၢထၢၣ် သမူထီၣ်က့ၤအဂ့ၢ် ခီဖျိ အဝဲကိး ယဟိဝၤယွၤ* လၢ ‘စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤလီၤ.’+ ၃၈ အဃိ ကစၢ်ယွၤ တမ့ၢ် ပှၤသံတဖၣ် အယွၤဘၣ်, မ့ၢ်ဝဲ ပှၤမူတဖၣ်အယွၤလီၤ. လၢကစၢ်ယွၤ အမဲာ်ညါန့ၣ်* အဝဲသ့ၣ်ခဲလၢာ် မ့ၢ်ပှၤမူလီၤ.”+ ၃၉ ပှၤကွဲးလံာ်ဖိ တနီၤ တဲဆၢက့ၤအီၤလၢ “သရၣ်ဧၢ, နတဲတၢ်န့ၣ် ဘၣ်လီၤ.” ၄၀ ဒီးအဝဲသ့ၣ် သံကွၢ်အီၤ တၢ်သံကွၢ်တဖျၢၣ်မး တဘူၣ်လၢၤဘၣ်.
၄၁ ယ့ၣ်ၡူးသံကွၢ် အဝဲသ့ၣ်လၢ “ဘၣ်မနုၤအဃိ ပှၤတဲဝဲလၢ ခရံာ်မ့ၢ် စီၤဒၤဝံးအဖိခွါလဲၣ်.+ ၄၂ လၢလံာ် စံးထီၣ်ပတြၢၤအပူၤန့ၣ် စီၤဒၤဝံး အနီၢ်ကစၢ်တဲဝဲလၢ ‘ယဟိဝၤယွၤတဲဘၣ် ယကစၢ်လၢ “ဆ့ၣ်နီၤလၢ ယစုထွဲ ၄၃ တုၤလီၤလၢ ယပာ်နဒုၣ်နဒါဒ် တၢ်ယီၢ်လီၤခီၣ်အလီၢ်လၢ နခီၣ်အဂီၢ်တက့ၢ်.”’+ ၄၄ စီၤဒၤဝံး မ့ၢ်ကိးခရံာ်လၢ ကစၢ်န့ၣ် အဝဲကဲစီၤဒၤဝံး အဖိခွါ ကသ့ဒ်လဲၣ်.”
၄၅ ဒီးဖဲပှၤခဲလၢာ် ဒိကနၣ်တၢ်အခါ အဝဲ တဲဘၣ် အပျဲၢ်အဘီၣ်တဖၣ်လၢ ၄၆ “ပလီၢ်သုသးလၢ ပှၤကွဲးလံာ်ဖိတဖၣ်တက့ၢ်. အဝဲသ့ၣ်န့ၣ် ဟးသိးဝဲ ဆ့ဖးထီမုာ်မး ဒီးအဲၣ်ဒိးလၢ ပှၤကဆၢဂ့ၤဆၢဝါ အဝဲသ့ၣ်လၢ တၢ်ဆါတၢ်ပှ့ၤအလီၢ် ဒီးအဲၣ်ဒိးဆ့ၣ်နီၤလၢ တၢ်မဲာ်ညါကတၢၢ်လၢ ဘူၣ်ဘျီၣ်ပူၤ ဒီးအဲၣ်ဒိးဆ့ၣ်နီၤလၢ လီၢ်ဆ့ၣ်နီၤ အဂ့ၤကတၢၢ် ဖဲဟါတၢ်အီၣ်အခါလီၤ.+ ၄၇ ဒီးအဝဲသ့ၣ် ဟံးန့ၢ်ကွံာ်* မုၣ်ကမဲတဖၣ် အတၢ်စုလီၢ်ခီၣ်ခိၣ် ဒီးအဝဲသ့ၣ် ဃ့ထုကဖၣ်ဖးထီ ဒ်သိး ပှၤကပတြၢၤ အဝဲသ့ၣ်အဂီၢ်လီၤ. ပှၤတဖၣ်အံၤ ကဘၣ် တၢ်စံၣ်ညီၣ်အီၤ နးမးလီၤ.”