စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ.
၄၀ ယမုၢ်လၢ်တၢ်လၢ ယဟိဝၤယွၤအအိၣ် လၢတၢ်သူၣ်ဆူၣ်သးဆူၣ်အပူၤ
ဒီးအဝဲဒိးအနၢ်လၢယအိၣ်* ဒီးနၢ်ဟူယတၢ်ကိးပသူထီၣ်လၢ တၢ်မၤစၢၤအဂီၢ်လီၤ.+
၂ အဝဲထုးထီၣ်ကွံာ်ယၤလၢ တၢ်ပူၤလၢ ထံယွၤလီၤဆူၣ်ဆူၣ်
ဒီးတၢ်ပူၤလၢ အပှဲၤဒီး ကပံာ်န့ၣ်လီၤ.
အဝဲပာ်ယခီၣ်လၢ လ့အဖီခိၣ်
ဒီးမၤဂၢၢ်မၤကျၢၤယခီၣ်လီၤ.
၃ ဝံၤဒီး အဝဲသိၣ်လိယၤ တၢ်သးဝံၣ်အသီတယုၢ်,+
တၢ်သးဝံၣ်စံးထီၣ်ပတြၢၤ ပကစၢ်ယွၤလီၤ.
ပှၤအါဂၤ ကကွၢ်စိဃီၤဝဲ ဒီးကကမၢကမၣ်
ဒီးကနာ်န့ၢ် ယဟိဝၤယွၤလီၤ.
၄ ပှၤလၢ အနာ်န့ၢ် ယဟိဝၤယွၤ ဒီးတသန့ၤအသးလၢ ပှၤလၢအခိၣ်ကိၤ
ဒီးပှၤလံၣ်တၢ်လီတၢ်တဖၣ်ဘၣ်န့ၣ် ကသးခုဝဲလီၤ.
၅ အိ ယကစၢ် ယဟိဝၤယွၤဧၢ,
နမၤတ့ၢ်တၢ်အါမံၤလံ.
နတၢ်မၤန့ၣ် လီၤလိၢ်လီၤလး ဒီးနဆိကမိၣ်န့ၢ်တၢ်လၢ ပဂီၢ်ထီဘိလီၤ.+
ပှၤဒ်သိးဒီးနၤ တအိၣ်နီတဂၤဘၣ်.+
ယမ့ၢ်ဘၣ်တဲဖျါထီၣ် တၢ်သ့ၣ်တဖၣ်အံၤန့ၣ်
အအိၣ်ဝဲအါတလၢ တုၤလၢ ယနီၣ်ဘၣ်အီၤ တလၢာ်ဘၣ်.+
၆ နတလီကီ တၢ်လုၢ်တၢ်ပာ် ဒီးတၢ်လုၢ်ထီၣ်တဖၣ်ဘၣ်.+
ဒီးနတဃ့ တၢ်လုၢ်ဒွဲၣ်အူ ဒီးတၢ်လုၢ်လၢ တၢ်ဒဲးဘးအဂီၢ်ဘၣ်.+
ဘၣ်ဆၣ် နမၤစၢၤယၤဒ်သိး ယကဒိကနၣ်တၢ် ဒီးနၢ်ပၢၢ်တၢ်လၢ နတဲတဖၣ်လီၤ.+
၇ ဒီးယတဲလၢ “ကွၢ်လၢအံၤ, ယဟဲလံ.
လၢလံာ်ထူအပူၤန့ၣ် တၢ်ကွဲးအသးလၢ ယဂ့ၢ်လီၤ.+
၈ အိ ယကစၢ်ယွၤဧၢ, ယမၤနတၢ်ဘၣ်သးန့ၣ် မၤသးခုယသးဒိၣ်မး.+
ဒီးနတၢ်သိၣ်တၢ်သီန့ၣ် အိၣ်လၢယ သးကံၢ်ပူၤလီၤ.+
၉ ယစံၣ်တဲၤတဲလီၤ တၢ်တီတၢ်လိၤ အတၢ်သးခုကစီၣ်လၢ တၢ်အိၣ်ဖှိၣ်ဖးဒိၣ်အပူၤလီၤ.+
အိ ယဟိဝၤယွၤဧၢ, ယတတြီ ယ ကိာ်ပူၤဘၣ်န့ၣ်+
နသ့ၣ်ညါဂ့ၤဂ့ၤလီၤ.
၁၀ နတၢ်တီတၢ်လိၤန့ၣ် ယတပာ်အီၤထဲလၢ ယသးပူၤဘၣ်.
ယတဲဖျါထီၣ် နတၢ်သးတီ ဒီးနတၢ်အုၣ်က့ၤခီၣ်က့ၤ အဂ့ၢ်လီၤ.
ဒီးယပာ်ဖျါထီၣ် နတၢ်အဲၣ်လၢအတီ ဒီးနတၢ်မ့ၢ်တၢ်တီ လၢတၢ်အိၣ်ဖှိၣ်ဖးဒိၣ် အပူၤလီၤ.”+
၁၁ အိ ယဟိဝၤယွၤဧၢ, တဘၣ် တြီဃာ် နတၢ်သးကညီၤ လၢယအိၣ်တဂ့ၤ.
မ်နတၢ်အဲၣ်လၢအတီ ဒီးနတၢ်မ့ၢ်တၢ်တီန့ၣ် ဒီသဒၢယၤထီဘိတက့ၢ်.+
၁၂ တၢ်နးတၢ်ဖှီၣ်တဖၣ် အိၣ်ဝးတရံးယၤ အါတုၤဒၣ်လဲာ် ယဂံၢ်အီၤ တလၢာ်ဘၣ်.+
ယတၢ်ကမၣ်အါမး လုၢ်ဘၢကွံာ်ယၤအဃိ ယတထံၣ်ယကျဲလၢၤဘၣ်.+
ယတၢ်ကမၣ်တဖၣ် အိၣ်အါန့ၢ်ဒံး ယခိၣ်ဆူၣ်
အဃိ ယသးဂံၢ်ဘါလီၤစၢ်လၢာ်လံ.
၁၃ အိ ယဟိဝၤယွၤဧၢ, ဝံသးစူၤ သးအိၣ်မၤပူၤဖျဲးယၤတက့ၢ်.+
အိ ယဟိဝၤယွၤဧၢ, ဟဲမၤစၢၤယၤ မ့ၢ်ချ့.+
၁၄ ပှၤလၢအဃုမၤသံယၤန့ၣ်
မ်အထံၣ်ဘၣ် တၢ်မဲာ်ဆှးတက့ၢ်.
ဒီးပှၤလၢအသးခုလၢ ယဘၣ်နး ဘၣ်ဖှီၣ်အဃိန့ၣ်
မ်အဂုၤက့ၤလီၢ်ခံလၢ တၢ်မဲာ်ဆှး အပူၤတက့ၢ်.
၁၅ ပှၤလၢအနံၤဆဲးအဲးယၤ ဒီးတဲလၢ “ဘၣ်ပိးလဲၣ်” န့ၣ်
မ်အဝဲသ့ၣ် မဲာ်ဆှးတုၤလၢ အပျံၤတၢ်ဖုးတၢ်တက့ၢ်.
ပှၤလၢအခိးကွၢ်လၢ် နတၢ်အုၣ်က့ၤခီၣ်က့ၤန့ၣ် မ်အဝဲသ့ၣ်တဲဝဲ ထီဘိလၢ
“မ်ယဟိဝၤယွၤ ဘၣ်တၢ်မၤလၤကပီၤအီၤတက့ၢ်.”+
၁၇ ယမ့ၢ်ပှၤဂံၢ်စၢ်ဘါစၢ် ဒီးပှၤဖှီၣ်ဖိယာ်ဖိလီၤ.
မ်ယဟိဝၤယွၤ ပာ်သူၣ်ပာ်သးယၤတက့ၢ်.
ယကစၢ်ယွၤဧၢ, နမ့ၢ်ပှၤလၢအမၤစၢၤယၤ ဒီးပှၤလၢအမၤပူၤဖျဲး ယၤလီၤ.+
တဘၣ်ထုးယံာ် တၢ်ဆၢကတီၢ်တဂ့ၤ.+