ယိၤၡူ

၁ ယဟိဝၤယွၤ အခ့အပှၤ စီၤမိၤၡ့ သံဝံၤအလီၢ်ခံ ယဟိဝၤယွၤ တဲဘၣ်​ စီၤနိၣ်အဖိခွါ စီၤယိၤၡူ*+ လၢအမ့ၢ် စီၤမိၤၡ့ အပှၤမၤစၢၤတၢ်တဂၤန့ၣ်လၢ+ ၂ “ယခ့ယပှၤ စီၤမိၤၡ့သံလံ.+ ခဲအံၤ နၤဒီးယပှၤဂီၢ်မုၢ်ခဲလၢာ် အိၣ်ကတဲာ်ကတီၤသုသး ဒီးလဲၤခီဂာ် ထံကျိယၢ်ဒ့ၣ်​ ဒီးလဲၤလၢ ထံကီၢ်လၢ ယကဟ့ၣ်လီၤ သုဝဲ ပှၤအံၣ်စရ့လးဖိန့ၣ်တက့ၢ်.+ ၃ တၢ်လီၢ်ကိးတီၤဒဲးလၢ သုယီၢ်လီၤန့ၣ်​ ယကဟ့ၣ်သု ဒ်ယအၢၣ်လီၤစီၤမိၤၡ့ အသိးလီၤ.+ ၄ သုတၢ်လီၢ်တၢ်ကျဲန့ၣ်​ ကစးထီၣ်အသးလၢ ပှၢ်မုၢ်ကနၢ တုၤလၢ လဘၤနိၣ်ကစၢၢ်ကလိကျါ ဒီးတုၤလၢ ထံကျိဖးဒိၣ်​ ဖရၤသး ဒီးပှၤဃ့ၤသးဖိ အတၢ်လီၢ်ခဲလၢာ်+ ဒီးတုၤလၢ ပီၣ်လဲၣ်ဖးဒိၣ်လၢ မုၢ်နုာ်တခီလီၤ.+ ၅ ဖဲနအိၣ်မူအဆၢကတီၢ် ပှၤမၤနၢၤနၤတန့ၢ်နီတဂၤဘၣ်.+ ယကအိၣ်ဒီးနၤ ဒ်ယအိၣ်ဒီး စီၤမိၤၡ့အသိးလီၤ.+ ယတပာ်တ့ၢ်နၤဘၣ်​ ဒီးယတလဲၤသဒၣ်နၤဘၣ်.+ ၆ နမ့ၢ်ပှၤတဂၤလၢ အကတီခိၣ်ရိၤမဲ ပှၤဂီၢ်မုၢ်တဖၣ်အံၤ ဒ်သိးအကန့ၢ်သါဘၣ်​ ကီၢ်လၢယအၢၣ်လီၤ သုမိၢ်ပၢ်ဖံဖု လၢပျၢၤတဖၣ်လၢ ယကဟ့ၣ်အဝဲသ့ၣ်န့ၣ်လီၤ.+ အဃိ ပာ်ဆူၣ်နသးဒီး အိၣ်ဒီးတၢ်သူၣ်ဒူသးဒူတက့ၢ်.+

၇ “ပာ်ဆူၣ်နသးဒီး အိၣ်ဒီးတၢ်သူၣ်ဒူသးဒူ ဒီးတၢ်သိၣ်တၢ်သီလၢ ယခ့ယပှၤ စီၤမိၤၡ့ မၤလိာ်နၤခဲလၢာ်န့ၣ်​ မၤထွဲအီၤ လီၤတံၢ်လီၤဆဲးတက့ၢ်. ဖဲနလဲၤ တပူၤဂ့ၤတပူၤဂ့ၤန့ၣ်​ ဒ်သိးနကမၤ တၢ်လၢတၢ်ကူၣ်သ့အပူၤအဂီၢ်+ တဘၣ်ဃၣ်ကွံာ်နသးလၢအီၤ လၢနစုစ့ၣ်မ့ၢ်ဂ့ၤ လၢနစုထွဲမ့ၢ်ဂ့ၤန့ၣ်တဂ့ၤ.+ ၈ လံာ်တၢ်သိၣ်တၢ်သီအံၤ ကဘၣ်အိၣ်လၢ နကိာ်ပူၤထီဘိ+ ဒီးနကဘၣ်ဖးအီၤ ဒီးဆိကမိၣ်ထံအီၤ* လၢမုၢ်ဆါခီဒီးလၢမုၢ်နၤခီ ဒ်သိးနကမၤထွဲ တၢ်ကွဲးအသးခဲလၢာ် လီၤတံၢ်လီၤဆဲးအဂီၢ်လီၤ.+ နမ့ၢ်မၤဒ်န့ၣ်န့ၣ်​ နမၤတၢ်ကကဲထီၣ်လိၣ်ထီၣ်​ ဒီးနကမၤတၢ်လၢ တၢ်ကူၣ်သ့အပူၤလီၤ.+ ၉ ယမၤလိာ်ပာ်စၢၤနၤလၢ ပာ်ဆူၣ်နသး ဒီးအိၣ်ဒီးတၢ်သူၣ်ဒူသးဒူ ဝံၤလံ. ဖဲနလဲၤတပူၤဂ့ၤတပူၤဂ့ၤ နကစၢ်ယဟိဝၤယွၤ ကအိၣ်ဒီးနၤအဃိ တဘၣ်ပျံၤတၢ်တဂ့ၤ ဒီးတဘၣ်ကနိးကစုာ်တဂ့ၤ.”+

၁၀ ဝံၤဒီး စီၤယိၤၡူ မၤလိာ် ပှၤဂီၢ်မုၢ်အခိၣ်အနၢ်တဖၣ်လၢ ၁၁ “လဲၤလၢ ဒဲကဝီၤအပူၤ ဒီးမၤလိာ် ပှၤဂီၢ်မုၢ်တဖၣ်လၢ ‘လၢခံသၢသီဒီးန့ၣ်​ ပကလဲၤခီဂာ် ထံကျိယၢ်ဒ့ၣ်ဒီး လဲၤမၤန့ၢ်ထံကီၢ်လၢ ယဟိဝၤယွၤ ကဟ့ၣ်လီၤပှၤန့ၣ်လီၤ. အဃိ ကတဲာ်ကတီၤထီၣ်ပာ်စၢၤ တၢ်အီၣ်တၢ်အီလၢ သုနီၢ်ကစၢ်အဂီၢ် တက့ၢ်.’”+

၁၂ စီၤယိၤၡူ တဲဘၣ်​ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိအဒူၣ်တဝာ် လၢ ၁၃ “သ့ၣ်နီၣ်ထီၣ်က့ၤတၢ်လၢ ယဟိဝၤယွၤ အခ့အပှၤ စီၤမိၤၡ့ မၤလိာ်သုန့ၣ်တက့ၢ်.+ အဝဲတဲဝဲလၢ ‘သုကစၢ်ယဟိဝၤယွၤ ဟ့ၣ်သုကီၢ်အံၤ ဒ်သိးသုကအိၣ်ဘၣ်လၢအပူၤ မုာ်မုာ်ခုၣ်ခုၣ်* အဂီၢ်န့ၣ်လီၤ. ၁၄ သုဖိသုမါတဖၣ်​ ဒီးသုဆၣ်ဖိကီၢ်ဖိတဖၣ်​ ကအိၣ်လၢ ထံကီၢ်လၢ စီၤမိၤၡ့ဟ့ၣ်လီၤသုလၢ ယၢ်ဒ့ၣ်တခီအံၤလီၤ.*+ ဘၣ်ဆၣ်​ သုဝဲပှၤသုးဖိခဲလၢာ် သုကဘၣ်လဲၤခီဂာ်ဆိလၢ သုဒီပုၢ်ဝဲၢ်တဖၣ်အမဲာ်ညါ+ ဒီးအိၣ်ကတဲာ်ကတီၤသးလၢ တၢ်ဒုးအဂီၢ်လီၤ.+ သုကဘၣ်မၤစၢၤအဝဲသ့ၣ်​ ၁၅ တုၤလီၤလၢ အဝဲသ့ၣ်မၤန့ၢ်ကီၢ်လၢ ယဟိဝၤယွၤဟ့ၣ်လီၤအဝဲသ့ၣ်​ ဒီးအိၣ်ဘၣ်ဝဲမုာ်မုာ်ခုၣ်ခုၣ်​ ဒ်ယဟိဝၤယွၤဒုးအိၣ်သု မုာ်မုာ်ခုၣ်ခုၣ်​ အသိးလီၤ. ဝံၤဒီးက့ၤကဒါက့ၤလၢ ကီၢ်လၢယဟိဝၤယွၤအခ့အပှၤ စီၤမိၤၡ့ဟ့ၣ်လီၤသုလၢ အအိၣ်လၢယၢ်ဒ့ၣ်​ မုၢ်ထီၣ်တခီ ဒီးအိၣ်ဖဲန့ၣ်တက့ၢ်.’”+

၁၆ အဝဲသ့ၣ်စံးဆၢက့ၤ စီၤယိၤၡူလၢ “ပကမၤဒ် နမၤလိာ်ပှၤအသိး ခဲလၢာ်လီၤ. ဖဲနမၢလီၤပှၤ တပူၤဂ့ၤတပူၤဂ့ၤ ပကလဲၤလီၤ.+ ၁၇ ပကဒိကနၣ်နၤ ဒ်ပဒိကနၣ်​ စီၤမိၤၡ့လၢ တၢ်ကိးမံၤဒဲးအပူၤအသိးလီၤ. မ်ယဟိဝၤယွၤအိၣ်ဒီးနၤ ဒ်အအိၣ်ဒီး စီၤမိၤၡ့အသိးန့ၣ်တက့ၢ်.+ ၁၈ ပှၤတဂၤဂ့ၤတဂၤဂ့ၤလၢ အပူထီၣ်ထီဒါ နတၢ်မၤလိာ် ဒီးတဒိကနၣ်​ တၢ်လၢနမၤလိာ် ကိးထံၣ်ဒဲးဘၣ်န့ၣ်​ ကဘၣ်တၢ်မၤသံအီၤလီၤ.+ ပာ်ဆူၣ်နသးဒီး အိၣ်ဒီးတၢ်သူၣ်ဒူသးဒူတက့ၢ်.”+