၁ တံၤမသ့း
၆ ဒ်သိး ပှၤသုတဒုၣ်ဒွဲၣ်စံးအၢ ကစၢ်ယွၤအမံၤ ဒီးအတၢ်သိၣ်လိသီလိ နီတဂၤတဂ့ၤအဂီၢ်+ မ်ပှၤလၢ အကဲကုၢ်တဖၣ် ယူးယီၣ်ပာ်ကဲ အဝဲသ့ၣ်အကစၢ်တဖၣ် လၢအသးဒီဖျၢၣ်ညါတက့ၢ်.+ ၂ ဒီးကုၢ်လၢအအိၣ်ဒီး ကစၢ်တဖၣ်လၢ အစူၢ်က့ၤနာ်က့ၤတၢ်န့ၣ် မ်အသုတဆိကမိၣ်ဆံး အကစၢ်တဖၣ်အံၤ ခီဖျိလၢ အဝဲသ့ၣ် မ့ၢ်ဒီပုၢ်ဝဲၢ်တဖၣ် အဃိန့ၣ်တဂ့ၤ. ကစၢ်တဖၣ်အံၤလၢ အကန့ၢ်ဘၣ်အဘျုးလၢ ကုၢ်တဖၣ် မၤတၢ်ဂ့ၤဂ့ၤအဃိန့ၣ် မ့ၢ်ဝဲ ပှၤစူၢ်က့ၤနာ်က့ၤတၢ် ဒီးဒီပုၢ်ဝဲၢ်သးဘိတဖၣ်လီၤ. အဃိ ကုၢ်တဖၣ်ကြၢးမၤတၢ် ဆူၣ်န့ၢ်ဒံးအလီၢ်လီၤ.
ဆဲးသိၣ်လိတၢ်ဂ့ၢ်တဖၣ်အံၤ ဒီးဟ့ၣ်သဆၣ်ထီၣ် အဝဲသ့ၣ် ဒ်သိးအကမၤ တၢ်သ့ၣ်တဖၣ်အံၤတက့ၢ်. ၃ ပှၤတဂၤဂၤမ့ၢ်သိၣ်လိ တၢ်သိၣ်လိလၢအဂၤ ဒီးအသးမ့ၢ် တလီၤပလိာ်လိာ်သးဒီး တၢ်ဟံးစုနဲၣ်ကျဲလၢ အဂ့ၤအဘၣ်+ လၢအဟဲလၢ ပကစၢ်ယ့ၣ်ၡူးခရံာ်အအိၣ်ဘၣ်မ့ၢ်ဂ့ၤ အတၢ်သိၣ်လိတဖၣ် မ့ၢ်တဆီၣ်ထွဲပှၤဂၤလၢ ကတီဒီး ကစၢ်ယွၤအဂီၢ်ဘၣ်မ့ၢ်ဂ့ၤန့ၣ်+ ၄ အဝဲမ့ၢ်ပှၤလၢ အပာ်ထီၣ်ထီအသး ဒီးအတနၢ်ပၢၢ် တၢ်နီတမံၤဘၣ်.+ အသးအိၣ်ထဲလၢ ကအ့ၣ်လိာ်သး ဒီးကတဲအါလိာ်သး ဘၣ်ဃးဒီး တၢ်ကတိၤတဖၣ်လီၤ.+ ဒီးတၢ်သ့ၣ်တဖၣ်န့ၣ် ဒုးအိၣ်ထီၣ် တၢ်သူၣ်က့ၣ်သးကါ, တၢ်အ့ၣ်လိာ်ဆိးက့, တၢ်တဲဟးဂီၤပှၤဂၤ ဒီးတၢ်ထံၣ်ကမၣ်ပှၤဂၤ အၢအၢသီသီလီၤ. ၅ ဒီးလၢတၢ်ဂ့ၢ်အံၤအဃိ ပိာ်ခွါတဖၣ်လၢ အတၢ်ဆိကမိၣ် ဘၣ်အၢဘၣ်သီ+ ဒီးအတနၢ်ပၢၢ် တၢ်မ့ၢ်တၢ်တီလၢၤဘၣ်န့ၣ် အ့ၣ်လိာ်သးဘၣ်ဃးဒီး တၢ်ဂ့ၢ်ဆံးဆံးဖိတဖၣ် ထီဘိလီၤ. အဝဲသ့ၣ် ဆိကမိၣ်ဝဲလၢ တၢ်သးတီဒီး ကစၢ်ယွၤန့ၣ် မ့ၢ်ကျဲတဘိလၢ အဝဲသ့ၣ်ကန့ၢ်ဘၣ် တၢ်အဘျုးလၢ အနီၢ်ကစၢ်အဂီၢ်လီၤ.+ ၆ နီၢ်ကီၢ်န့ၣ် ပမ့ၢ်သးမံလၢ တၢ်လၢအအိၣ်ဒီးပှၤန့ၣ် တၢ်သးတီဒီး ကစၢ်ယွၤ အဘျုးကအိၣ် ဖးဒိၣ်ညါလီၤ.+ ၇ ဖဲပအိၣ်ဖျဲၣ်ထီၣ်လၢ ဟီၣ်ခိၣ်အံၤအခါ ပတဟဲစိာ် တၢ်နီတမံၤဘၣ် ဒီးဖဲပသံအခါ ပက့ၤစိာ်တၢ်တသ့ နီတမံၤစ့ၢ်ကီးဘၣ်.+ ၈ အဃိ ပတၢ်အီၣ်တၢ်အီ ဒီးပတၢ်ကူတၢ်သိး* မ့ၢ်အိၣ်န့ၣ် ပကသးမံလီၤ.+
၉ ဘၣ်ဆၣ် ပှၤလၢ အပာ်လီၤအသးလၢ ကကဲထီၣ် ပှၤထူးပှၤတီၤန့ၣ် ကလီၤဘၣ်လၢ တၢ်လ့ပစီအပူၤ ဒီးလၢပျံၤသကွီၤအပူၤလီၤ.+ ဒီးအဝဲသ့ၣ်ကလီၤဘၣ်လၢ တၢ်သူၣ်လီသးကွံတဖၣ်လၢ အဘျုးတအိၣ်ဘၣ်လၢ အကမၤဘၣ်ဒိဘၣ်ထံး အဝဲသ့ၣ်လီၤ. ဒီးတၢ်သူၣ်လီသးကွံတဖၣ်အံၤ ထုးလီၤကွံာ်အဝဲသ့ၣ်ဆူ တၢ်နးတၢ်ဖှီၣ် ဒီးတၢ်ဟးဂီၤအပူၤလီၤ.+ ၁၀ တၢ်အဲၣ်ကျိၣ်အဲၣ်စ့န့ၣ် မ့ၢ်တၢ်လၢ အမၤဘၣ်ဒိဘၣ်ထံးတၢ် အကလုာ်ကလုာ် အဂံၢ်တခါလီၤ. ခီဖျိလၢ ပှၤတနီၤနီၤ သူၣ်လီသးကွံအီၤအဃိ အဝဲသ့ၣ် ပာ်တ့ၢ်ကွံာ် တၢ်စူၢ်တၢ်နာ် ဒီးဆဲးဖျိလီၤအသးလၢ တၢ်လၢအမၤဘၣ်ဒိဆါ အဝဲသ့ၣ်အါမံၤလီၤ.*+
၁၁ ဘၣ်ဆၣ် နမ့ၢ်ကစၢ်ယွၤ အခ့အပှၤအဃိ ဟးဆှဲး တၢ်သ့ၣ်တဖၣ်န့ၣ်တက့ၢ်. ဂုာ်ကျဲးစၢးလၢ အဂ့ၤကတၢၢ် ဒ်သိးနကပာ်ဖျါထီၣ် တၢ်တီတၢ်လိၤ, တၢ်သးတီဒီးကစၢ်ယွၤ, တၢ်စူၢ်တၢ်နာ်, တၢ်အဲၣ်တၢ်ကွံ, တၢ်တူၢ်န့ၢ်ခီၣ်ကဲ ဒီးတၢ်သးစူၤ+ န့ၣ်တက့ၢ်. ၁၂ တၢ်ဒုးလၢအဂ့ၤ ဘၣ်ဃးဒီး ပတၢ်နာ်န့ၣ် ဒုးအီၤတက့ၢ်. ဖီၣ်ဃာ် တၢ်မူအထူအယိာ် ဃံးဃံးတက့ၢ်. ကစၢ်ယွၤကိးန့ၢ်နၤဆူ တၢ်မူအထူအယိာ် ဒီးနစံၣ်တဲၤတဲလီၤတၢ် ဘၣ်ဃးဒီး တၢ်မူအဝဲအံၤလၢ ပှၤအုၣ်အသးအါဂၤ အမဲာ်ညါလီၤ.
၁၃ လၢကစၢ်ယွၤလၢ အပာ်မူတၢ်ခဲလၢာ်တဂၤ အမဲာ်ညါ ဒီးလၢယ့ၣ်ၡူးခရံာ် လၢအမ့ၢ် ပှၤလၢ အအုၣ်အသးဂ့ၤဂ့ၤလၢ စီၤပီၣ်တံၤပံၤလး+ အမဲာ်ညါတဂၤန့ၣ် အမဲာ်ညါန့ၣ် ယမၤလိာ်နၤလၢ ၁၄ နကမၤထွဲ တၢ်မၤလိာ်တဖၣ်အံၤ ဒီးနကအိၣ်ကဆှီ ဒီးတၢ်ပာ်ဒ့ၣ်ပာ်ကမၣ်နၤ အလီၢ်သုတအိၣ်တဂ့ၤ တုၤလီၤလၢ ပကစၢ်ယ့ၣ်ၡူးခရံာ် ပာ်ဖျါထီၣ်အသးလီၤ.+ ၁၅ ဖဲတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ ဘၣ်ဝဲအခါ ကစၢ်လၢ အစိဒိၣ်ကမီၤထီလၢ အပှဲၤဒီးတၢ်သးခုတဂၤန့ၣ် ကပာ်ဖျါထီၣ် အနီၢ်ကစၢ်အသးလီၤ. အဝဲမ့ၢ် စီၤပၤတဖၣ်အစီၤပၤ ဒီးကစၢ်တဖၣ်အကစၢ်လီၤ.+ ၁၆ လၢပှၤတဖၣ်န့ၣ်အကျါန့ၣ် အဝဲမ့ၢ် ပှၤထဲတဂၤလၢ အသံတသ့ဘၣ်လၢ+ အအိၣ်ဝဲဆိးဝဲလၢ တၢ်ကပီၤလၢ ပှၤသုးဘူးသးဆူအအိၣ် တသ့ဘၣ်အလီၢ်+ ဒီးပှၤတထံၣ်ဘၣ်အီၤ နီတဂၤဘၣ် ဒီးပှၤထံၣ်အီၤတသ့ဘၣ်.+ မ်တၢ်လၤကပီၤ ဒီးတၢ်စိကမီၤအထူအယိာ် အိၣ်ဒီးအီၤတက့ၢ်. အၤမ့ၣ်.
၁၇ မၤလိာ် ပှၤလၢအကဲ ပှၤထူးပှၤတီၤလၢ စိၤခဲအံၤတဖၣ် ဒ်သိးအသု တပာ်ထီၣ်ထီအသး ဒီးအသု တသန့ၤအသးလၢ တၢ်ထူးတၢ်တီၤလၢ အဟးဂီၤသ့အံၤန့ၣ်တဂ့ၤ.+ မၤလိာ် အဝဲသ့ၣ်လၢ အကသန့ၤအသးလၢ ကစၢ်ယွၤလၢ အဟ့ၣ်လီၤပှၤတၢ်ခဲလၢာ် ထူးထူးတီၤတီၤလၢ အမၤသးခုပှၤန့ၣ်တက့ၢ်.+ ၁၈ ဒီးမၢအဝဲသ့ၣ် မၤဂ့ၤတၢ်တက့ၢ်. မ့ၢ်လီၤ, မၢအဝဲသ့ၣ် မၤဂ့ၤတၢ် အါအါဂီၢ်ဂီၢ်, ဟ့ၣ်တၢ်ညီ ဒီးသးအိၣ် ဟ့ၣ်နီၤလီၤတၢ်တက့ၢ်.+ ၁၉ အဝဲသ့ၣ် မ့ၢ်မၤဒ်န့ၣ်န့ၣ် ကလီၤဂာ်ဒ်သိးဒီး အဝဲသ့ၣ် ပာ်ဖှိၣ်ထီၣ် တၢ်ထူးတၢ်တီၤ တခါလၢ အနီၢ်ကစၢ်အဂီၢ် လၢအမ့ၢ် တၢ်အခီၣ်တဃာ်လၢ ခါဆူညါအဂီၢ်+ ဒ်သိး အဝဲသ့ၣ်ဟံးဃာ် တၢ်မူနီၢ်ကီၢ် ကန့ၢ်အဂီၢ်လီၤ.+
၂၀ စီၤတံၤမသ့းဧၢ, ဒီသဒၢတၢ်လၢ ကစၢ်ယွၤအးလီၤ လၢနစုပူၤန့ၣ်တက့ၢ်.+ တၢ်စံၣ်တဲၤတဲလီၤလၢ အဘျုးတအိၣ်ဘၣ်လၢ အထီဒါလိာ်သးဒီး တၢ်လၢအစီဆှံ ဒီးတၢ်ဆိကမိၣ်တဖၣ် လၢပှၤကိးကမၣ်အီၤလၢ “တၢ်သ့ၣ်ညါ”+ လၢအထီဒါလိာ်အသးဒီး တၢ်မ့ၢ်တၢ်တီန့ၣ် တဘၣ်ကနၣ်ဃုာ်အီၤတဂ့ၤ. ၂၁ ခီဖျိလၢ ပှၤတနီၤနီၤ မၤထွဲဝဲဒ် တၢ်သ့ၣ်ညါဒ်အံၤအသိးအဃိ အဝဲသ့ၣ် ပာ်တ့ၢ်ကွံာ် တၢ်စူၢ်တၢ်နာ်လံ.
မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်တက့ၢ်.