၂ ကရံၣ်သူး
၁၀ ယၤ, စီၤပီလူးအံၤ ယကဃ့ကညးသုလၢ ယနီၢ်ကစၢ် လၢခရံာ် အတၢ်သူၣ်စူၤသးစူၤ ဒီးအတၢ်သူၣ်ဂ့ၤသးဝါ အပူၤလီၤ.+ ပှၤလၢသုကျါတနီၤ တဲဝဲလၢ ဖဲယအိၣ်လၢသုကျါအခါ ယဖျါလၢ ယပတီၢ်ဖုၣ်+ ဘၣ်ဆၣ် ဖဲယတအိၣ်ဒီးသုဘၣ်အခါ ယပာ်ဒူယသးလီၤ.+ ၂ ပှၤလၢသုကျါတနီၤန့ၣ် ဆိကမိၣ်လၢ ပအိၣ်မူမၤထွဲဒ် ဟီၣ်ခိၣ်အတၢ်ထံၣ်အသိးလီၤ. အဃိ ယဃ့ကညးဆိသု ဒ်သိး ဖဲယလဲၤတုၤလၢသုအိၣ်အခါ ယသုတလိၣ် ပာ်ဒူယသး ဒီးသိၣ်အဝဲသ့ၣ်ဆူၣ်ဆူၣ် ဒ်ယဆိကမိၣ်ပာ်စၢၤ အသိးတဂ့ၤလီၤ. ၃ ပအိၣ်မူ ဒ်ပှၤဟီၣ်ခိၣ်ဖိအဂၤတဖၣ် အိၣ်မူဝဲအသိး သနာ်က့ ပတဒုးတၢ်ဒ် ပှၤဟီၣ်ခိၣ်ဖိအဂၤတဖၣ် အသိးဘၣ်. ၄ တၢ်စုကဝဲၤတဖၣ် လၢပကဒုးတၢ်အဂီၢ်န့ၣ် တမ့ၢ်ဟီၣ်ခိၣ် အတၢ်စုကဝဲၤတဖၣ်ဘၣ်.+ တၢ်စုကဝဲၤတဖၣ်အံၤ ဟဲလၢကစၢ်ယွၤအအိၣ်အဃိ+ အိၣ်ဒီးအစိအကမီၤလၢ ကမၤလီၤပှီၢ်ကွံာ် တၢ်လၢအလီၤဂာ်ဒီး တၢးထီလၢ အကျၢၤတဖၣ်လီၤ. ၅ ပမၤလီၤပှီၢ်ကွံာ် တၢ်ကူၣ်တၢ်ဖးတဖၣ် ဒီးကယဲၢ် တၢ်တြီမၤတံာ်တာ်လၢ အထီဒါလိာ်သးဒီး တၢ်သ့ၣ်ညါ ဘၣ်ဃးဒီး ကစၢ်ယွၤလီၤ.+ ဒီးပမၤနၢၤ တၢ်ဆိကမိၣ် ကိးမံၤဒဲး လၢကဒိကနၣ်ခရံာ် အဂီၢ်လီၤ. ၆ ဒီးဖဲသုပာ်ဖျါထီၣ်လၢ သုဒိကနၣ်တၢ် လၢလၢပှဲၤပှဲၤ ဝံၤအလီၢ်ခံ ပအိၣ်ကတဲာ်ကတီၤ ပာ်စၢၤပသးလၢ ပကစံၣ်ညီၣ် ပှၤလၢ အဆဲးပာ်ဖျါထီၣ်လၢ အတဒိကနၣ်တၢ်ဘၣ် ကိးဂၤဒဲးလီၤ.+
၇ သုကွၢ်တၢ်ဒ် တၢ်လၢအအိၣ်ဖျါ လၢခိအသိးလီၤ. ပှၤတဂၤဂၤ မ့ၢ်နာ်န့ၢ်လီၤအနီၢ်ကစၢ်အသးလၢ အမ့ၢ်ခရံာ်အတၢ်န့ၣ် မ်အဆိကမိၣ်ထံကဒီး တၢ်ဂ့ၢ်တခါအံၤတက့ၢ်. ဒ်အဝဲမ့ၢ် ခရံာ်အတၢ်အသိး ပဝဲစ့ၢ်ကီး ပမ့ၢ်ခရံာ်အတၢ်လီၤ. ၈ ကစၢ်ဟ့ၣ်ပှၤ တၢ်စိတၢ်ကမီၤန့ၣ် တမ့ၢ်လၢ ပကမၤဟးဂီၤ သုသးအဂီၢ်ဘၣ်. မ့ၢ်ဒ်သိး ပကဟ့ၣ်ဂံၢ်ဟ့ၣ်ဘါသု အဂီၢ်လီၤ.+ ဘၣ်ဃးဒီး တၢ်စိတၢ်ကမီၤလၢ ယဒိးန့ၢ်ဘၣ်အံၤ ယမ့ၢ်ပာ်ကဖၢလၢယသး အါတလၢတစဲးဖိ သနာ်က့ တမ့ၢ်လၢ ယကဒိးန့ၢ်ဘၣ် တၢ်မဲာ်ဆှးဘၣ်. ၉ ယတအဲၣ်ဒိးလၢ ပှၤကဆိကမိၣ်လၢ ယကွဲးလံာ်ပရၢတဖၣ် ဒ်သိးကမၤပျံၤမၤဖုးသု အဂီၢ်ဘၣ်. ၁၀ အဝဲသ့ၣ်တဲဝဲလၢ “အလံာ်ပရၢတဖၣ်န့ၣ် လီၤထုးန့ၢ်သူၣ်ထုးန့ၢ်သး ဒီးအသဟီၣ်ဆူၣ်မး. ဘၣ်ဆၣ် ဖဲအအိၣ်ဒီးပှၤအခါ အတဖျါလီၤယူးယီၣ်ပာ်ကဲ နီတစဲးဘၣ် ဒီးအမ့ၢ်တဲတၢ်န့ၣ် အဘျုးတအိၣ်ဘၣ်.” ၁၁ ပှၤလၢအတဲတၢ်ဒ်န့ၣ်န့ၣ် မ်အဆိကမိၣ်ကွၢ် တၢ်ဂ့ၢ်တခါအံၤတက့ၢ်. ဖဲပတအိၣ်ဒီးသုဘၣ်အခါ တၢ်လၢပကွဲးလၢ လံာ်ပရၢတဖၣ်အပူၤန့ၣ် မ့ၢ်တၢ်လၢပကမၤ ဖဲပအိၣ်ဒီးသုအခါလီၤ.+ ၁၂ ပှၤလၢ အပတြၢၤလီၤအသးန့ၣ် ပပာ်ပသးထဲသိးဒီး အဝဲသ့ၣ်တဘူၣ်ဘၣ်. ဒီးပထိၣ်သတြီၤပသးဒီး အဝဲသ့ၣ် တဘူၣ်ဘၣ်.+ ဘၣ်ဆၣ် ဖဲအဝဲသ့ၣ် သမံသမိးလိာ်အသး တဂၤဒီးတဂၤ ဒီးထိၣ်သတြီၤလိာ်အသး တဂၤဒီးတဂၤအခါ အပာ်ဖျါထီၣ်လၢ အဝဲသ့ၣ် အတၢ်သ့ၣ်ညါနၢ်ပၢၢ် တအိၣ်ဘၣ်.+
၁၃ မ့မ့ၢ် ပဝဲဒၣ်အံၤ ပကပာ်ကဖၢလၢ ပသးထဲလၢ မူဒါလၢ ပဒိးန့ၢ်ဘၣ်အီၤ ဒီးပတပာ်ကဖၢလၢပသး လၢတၢ်လၢအဂုၤအဂၤ အဃိဘၣ်. ပကပာ်ကဖၢလၢပသး ဘၣ်ဃးဒီး တၢ်လၢ အအိၣ်လၢဟီၣ်ကဝီၤလၢ ကစၢ်ယွၤ ထိၣ်န့ၢ်ဝဲ လၢပဂီၢ်လီၤ. ဒီးသုအိၣ်တၢ်လီၢ်န့ၣ် ပၣ်ဃုာ်လၢ ဟီၣ်ကဝီၤအဝဲအံၤ အကျါလီၤ.+ ၁၄ ပမ့ၢ် ပှၤအဆိကတၢၢ်လၢ အစံၣ်တဲၤတဲလီၤ တၢ်သးခုကစီၣ်လၢ အဘၣ်ဃးဒီးခရံာ် လၢသုအိၣ်လီၤ. နီၢ်ကီၢ်န့ၣ် ပတလိၣ်မၤလဲၢ်ထီၣ် ပဟီၣ်ကဝီၤအဝဲအံၤ ဒ်သိး ပကလဲၤတုၤ လၢသုအိၣ်အဂီၢ်ဘၣ်.+ ၁၅ ပတပာ်ကဖၢလၢပသး ဘၣ်ဃးဒီး မူဒါလၢ ပတဒိးန့ၢ်ဘၣ်အီၤ ဒီးတၢ်လၢ ပှၤဂၤမၤဝဲတဖၣ် အဃိဘၣ်. ဘၣ်ဆၣ် ပမုၢ်လၢ်လၢ ဒ်သုတၢ်နာ်အါထီၣ် ကွ့ၢ်ကွ့ၢ်အသိး တၢ်မၤလၢ ပမၤတ့ၢ်လၢ ပဟီၣ်ကဝီၤအပူၤန့ၣ် ကဒိၣ်ထီၣ်ဝဲကွ့ၢ်ကွ့ၢ် စ့ၢ်ကီးလီၤ. ဒီးပဝဲစ့ၢ်ကီး ပကမၤတၢ်အါထီၣ် ၁၆ ဒ်သိး ပကစံၣ်တဲၤတဲလီၤ တၢ်သးခုကစီၣ် ဆူထံကီၢ်အဂၤတဖၣ် လၢအယံၤန့ၢ်ဒံး သုအိၣ်တၢ်လီၢ်လီၤ. ပမ့ၢ်မၤဒ်န့ၣ်န့ၣ် ပတပာ်ကဖၢလၢပသး ဘၣ်ဃးဒီး တၢ်မၤလၢ ပှၤဂၤမၤတ့ၢ်ဝဲလၢ အဝဲသ့ၣ် အဟီၣ်ကဝီၤပူၤဘၣ်. ၁၇ ဒ်တၢ်ကွဲးအသး အိၣ်ဝဲအသိး “ပှၤလၢ အပာ်ကဖၢလၢအသးန့ၣ် မ်အပာ် ကဖၢလၢအသးလၢ ယဟိဝၤယွၤ* အဃိတက့ၢ်.”+ ၁၈ ယဟိဝၤယွၤ ဘၣ်သူၣ်ဘၣ်သးပှၤလၢ အဝဲပတြၢၤဝဲ+ ဒီးတမ့ၢ်ပှၤလၢ အပတြၢၤလီၤ အနီၢ်ကစၢ်အသးဘၣ်.+