လူၤကၣ်
၂၄ ဖဲမုၢ်ခီၣ်ထံးအနံၤ ဂီၤဂီၤန့ၣ် အဝဲသ့ၣ်လဲၤလၢ တၢ်သွၣ်ခိၣ်ဒီး လဲၤစိာ်ဝဲ တၢ်နၢမူနၢဆှီလၢ အဝဲသ့ၣ် ကတဲာ်ကတီၤပာ်ဝဲလီၤ.+ ၂ ဘၣ်ဆၣ် အဝဲသ့ၣ်ထံၣ်ဝဲလၢ လၢၢ်တဖျၢၣ်န့ၣ် ဘၣ်တၢ်တလ့ၣ်ကွံာ်အီၤလၢ တၢ်သွၣ်ခိၣ်အခိၣ်ထိးလံ.+ ၃ ဒီးဖဲအဝဲသ့ၣ် လဲၤနုာ်လီၤအခါ အဝဲသ့ၣ်တထံၣ် ကစၢ်ယ့ၣ်ၡူး အစိၣ်လၢၤဘၣ်.+ ၄ ဖဲအဝဲသ့ၣ် သူၣ်ကိၢ်သးဂီၤတၢ် ဘၣ်ဃးဒီးတၢ်ဂ့ၢ်အံၤအခါ ပိာ်ခွါခံဂၤလၢ အသိးဝဲ ဆ့ကၤကပြုၢ်ကပြီၤန့ၣ် ဆၢထၢၣ်လၢ အဝဲသ့ၣ်အကပၤလီၤ. ၅ ဒီးပိာ်မုၣ်တဖၣ်န့ၣ် ပျံၤတၢ်ဒီး ဆုးလီၤအခိၣ်လီၤ. အဃိ ပှၤခံဂၤန့ၣ် တဲဘၣ်အဝဲသ့ၣ်လၢ “သုဟဲဃု ပှၤမူတဂၤအံၤလၢ ပှၤသံအကျါဘၣ်လဲၣ်.+ ၆ အဝဲတအိၣ်ဖဲအံၤဘၣ်, အဂဲၤဆၢထၢၣ်သမူထီၣ်က့ၤလံ. ဖဲအအိၣ်လၢ ကၤလံၤလါအခါ အတဲသုဒ်လဲၣ်န့ၣ် သုတသ့ၣ်နီၣ်ဘၣ်ဧီၤ. ၇ အတဲဝဲလၢ ပှၤကညီဖိခွါအံၤ ကဘၣ် တၢ်ဟ့ၣ်လီၤကွံာ်အီၤလၢ ပှၤတၢ်ဒဲးဘးဖိ အစုပူၤ ဒီးကဘၣ် တၢ်မၤသံအီၤလၢ သ့ၣ်တၢၣ်အလိၤ ဒီးလၢသၢသီတသီန့ၣ် အကဂဲၤဆၢထၢၣ်က့ၤလီၤ.”+ ၈ ဖဲန့ၣ် အဝဲသ့ၣ် သ့ၣ်နီၣ်ထီၣ်က့ၤ ယ့ၣ်ၡူး အတၢ်ကတိၤလီၤ.+ ၉ ဒီးအဝဲသ့ၣ် က့ၤတဲဘၣ် ပှၤတဆံတဂၤ ဒီးယ့ၣ်ၡူးအပျဲၢ်အဘီၣ် အဂၤတဖၣ်လၢ တၢ်ဂ့ၢ်တဖၣ်အံၤ ခဲလၢာ်လီၤ.+ ၁၀ အဝဲသ့ၣ်န့ၣ် မ့ၢ်ဝဲ နီၢ်မၤရံမၤကဒၤလ့ၣ်, နီၢ်ယိၤအၣ်နၣ် ဒီးစီၤယၤကိာ် အမိၢ်နီၢ်မၤရံလီၤ. ဒီးပိာ်မုၣ်အဂၤလၢ အအိၣ်ဒီးအဝဲသ့ၣ်န့ၣ် တဲဘၣ်စ့ၢ်ကီး တၢ်မၢဖိတဖၣ်လၢ တၢ်ဂ့ၢ်တဖၣ်အံၤလီၤ. ၁၁ ဘၣ်ဆၣ် အဝဲသ့ၣ် ဆိကမိၣ်လၢ ပိာ်မုၣ်တဖၣ်အံၤ ဟးတဲကြီတၢ် ဒီးအဝဲသ့ၣ် တနာ်ဝဲဘၣ်.
၁၂ ဘၣ်ဆၣ် စီၤပ့းတရူး ဂဲၤဆၢထၢၣ်ဒီးလဲၤဃ့ၢ်လၢ တၢ်သွၣ်ခိၣ် ဒီးသကူးလီၤအသး ဒီးကွၢ်လီၤဝဲလၢတၢ်သွၣ်ခိၣ်အကိပူၤ ဒီးထံၣ်ဝဲထဲ တၢ်ကံးညာ်တဖၣ်လီၤ. အဃိ အဝဲဟးထီၣ် ဒီးဆိကမိၣ်ထီၣ်ဝဲ တၢ်မၤအသးဒ်လဲၣ် အဂ့ၢ်လီၤ.
၁၃ ဖဲတၢ်တနံၤန့ၣ် ယ့ၣ်ၡူးအပျဲၢ်အဘီၣ်ခံဂၤ လဲၤဝဲလၢ သဝီအ့းမၤအူ လၢအယံၤဝဲဒီး ယရူၤၡလ့ၣ် နွံမံးလာ်ဘျဲၣ်လီၤ. ၁၄ ဒီးအဝဲသ့ၣ် တဲသကိးလိာ်အသး ဘၣ်ဃးဒီး တၢ်လၢ အကဲထီၣ်အသးတဖၣ် ခဲလၢာ်အဂ့ၢ်လီၤ.
၁၅ ဖဲအဝဲသ့ၣ်တဲသကိးတၢ် ဘၣ်ဃး တၢ်ဂ့ၢ်တဖၣ်အံၤအခါ ယ့ၣ်ၡူးဟဲဃီၤဝဲ ဒီးဟးဒီးအဝဲသ့ၣ် ၁၆ ဘၣ်ဆၣ် အဝဲသ့ၣ် တသ့ၣ်ညါလၢ အမ့ၢ်အီၤဘၣ်.+ ၁၇ ဒီးယ့ၣ်ၡူး တဲဘၣ်အဝဲသ့ၣ်လၢ “ဖဲသုဟးအခါ သုတဲအါလိာ်သး ဘၣ်ဃးဒီး တၢ်ဂ့ၢ်မနုၤလဲၣ်.” အဝဲသ့ၣ် အိၣ်ပတုာ်ဒီး ဖျါလၢ အသူၣ်အုးသးအုးလီၤ. ၁၈ စီၤကျ့အီးပၤ တဲဆၢအီၤလၢ “နအိၣ်လၢ ဝ့ၢ်ယရူၤၡလ့ၣ်အပူၤဒၢး, တယံာ်ဒံးဘၣ် တၢ်ကဲထီၣ်အသးဖဲန့ၣ်န့ၣ် နတသ့ၣ်ညါဘၣ်ဒ်လဲၣ်. နကဲပှၤထံဂၤကီၢ်ဂၤဖိဟီဧါ.” ၁၉ ယ့ၣ်ၡူး သံကွၢ် အဝဲသ့ၣ်လၢ “တၢ်မနုၤ ကဲထီၣ်အသးလဲၣ်.” အဝဲသ့ၣ် တဲအီၤလၢ “တၢ်ကဲထီၣ်အသးဒီး ပှၤနစၤရ့းဖိ ယ့ၣ်ၡူးမီၤ,+ လၢကစၢ်ယွၤ ဒီးပှၤခဲလၢာ်အမဲာ်ညါန့ၣ် အဝဲပာ်ဖျါထီၣ်ဝဲလၢ အမ့ၢ်ဝံတဂၤလၢ အိၣ်ဒီး အစိအကမီၤ လၢအတၢ်ဖံးတၢ်မၤ ဒီးအတၢ်ကတိၤလီၤ.+ ၂၀ ပှၤလုၢ်တၢ်ဒိၣ်အခိၣ်တဖၣ် ဒီးပှၤခိၣ်ပှၤနၢ်တဖၣ် ဟ့ၣ်လီၤကွံာ်အီၤဒ်သိး ပှၤကစံၣ်ညီၣ်သံအီၤ+ ဒီးအဝဲသ့ၣ် ပျၤထီအီၤလၢ သ့ၣ်တၢၣ်အလိၤလီၤ. ၂၁ ဘၣ်ဆၣ် ပမုၢ်လၢ်တ့ၢ်လၢ ပှၤတဂၤအံၤ ကမ့ၢ်ပှၤလၢ ကမၤထူၣ်ဖျဲးထီၣ် ပှၤအံၣ်စရ့လးဖိလီၤ.+ ဒီးတၢ်မၤအသးတဖၣ်အံၤဝံၤ ပှဲၤထီၣ် သၢသီတသီလံ. ၂၂ တကးဒံးဘၣ် ပကမၢကမၣ်, မ့ၢ်လၢ ပိာ်မုၣ်လၢပကျါတနီၤန့ၣ် လဲၤလၢ တၢ်သွၣ်ခိၣ်ဂီၤဂီၤ+ ၂၃ ဒီးအဝဲသ့ၣ် တထံၣ်ယ့ၣ်ၡူး အစိၣ်ဘၣ်. အဝဲသ့ၣ် ဟဲက့ၤတဲဝဲလၢ အဝဲသ့ၣ် ထံၣ်ဘၣ် မူခိၣ်ကလူးတဖၣ်လၢ အတဲဝဲလၢ ယ့ၣ်ၡူးန့ၣ်မူဝဲလီၤ. ၂၄ ဒီးပှၤလၢပကျါတနီၤ လဲၤလၢတၢ်သွၣ်ခိၣ်+ ဒီးအဝဲသ့ၣ်ထံၣ်ဝဲဒ် ပိာ်မုၣ်တဖၣ် တဲဝဲအသိး ဘၣ်ဆၣ် အဝဲသ့ၣ် တထံၣ်ယ့ၣ်ၡူးဘၣ်.”
၂၅ အဃိ အဝဲတဲ အဝဲသ့ၣ်လၢ “ပှၤလၢ အသးတဆးဘၣ် ဒီးအနာ်တၢ်ကီသ့ၣ်ဧၢ, ဘၣ်မနုၤအဃိ သုတနာ် တၢ်ခဲလၢာ်လၢ ဝံတဲဝဲတဖၣ်လဲၣ်. ၂၆ ခရံာ်ကဘၣ်တူၢ်ဝဲ တၢ်သ့ၣ်တဖၣ်အံၤ+ ဒီးအကဘၣ် တၢ်မၤလၤကပီၤအီၤ တမ့ၢ်ဧီၤ.”+ ၂၇ ဒီးယ့ၣ်ၡူးတဲနၢ်ပၢၢ် အဝဲသ့ၣ် တၢ်ခဲလၢာ်လၢ တၢ်ကွဲးအသးတဲဝဲ ဘၣ်ဃးဒီး အနီၢ်ကစၢ်အဂ့ၢ် စးထီၣ်လၢ စီၤမိၤၡ့ အတၢ်ကွဲးအသး တုၤလီၤလၢ ဝံအတၢ်ကွဲးအသး ခဲလၢာ်လီၤ.+
၂၈ ဖဲအဝဲသ့ၣ် လဲၤဘူးကတုၤလၢ သဝီလၢအဝဲသ့ၣ် ကလဲၤဝဲအခါ လီၤဂာ်လၢ ယ့ၣ်ၡူးကဆဲးလဲၤတၢ် ဆူညါလီၤ. ၂၉ ဘၣ်ဆၣ် အဝဲသ့ၣ် ဃ့ကညးယ့ၣ်ၡူးလၢ ကအိၣ်တ့ၢ် ဒီးတဲဝဲလၢ “မုၢ်ဘူးကဟါလံ ဒီးတယံာ်လၢၤဘၣ် တၢ်ကခံးလီၤ, အဃိ အိၣ်တ့ၢ်ဒီးပှၤမီၤ.” အဃိ ယ့ၣ်ၡူးလဲၤအိၣ်ဒီး အဝဲသ့ၣ် လၢဟံၣ်ပူၤလီၤ. ၃၀ ဖဲအဝဲအီၣ်တၢ်ဒီး အဝဲသ့ၣ်အခါ အဝဲဟံးန့ၢ်ကိၣ် ဒီးဆိၣ်ဂ့ၤဝဲ, ဘိးကၢ်ဝဲ ဝံၤဒီးဟ့ၣ်လီၤ အဝဲသ့ၣ်လီၤ.+ ၃၁ ဖဲန့ၣ်အခါ အဝဲသ့ၣ် အမဲာ်အိးထီၣ်အသး ဒီးသ့ၣ်ညါလၢ အမ့ၢ်ယ့ၣ်ၡူးလီၤ. ဘၣ်ဆၣ် ယ့ၣ်ၡူးလီၤမၢ်ကွံာ်လၢ အဝဲသ့ၣ်အကျါလီၤ.+ ၃၂ အဝဲသ့ၣ် တဲလိာ်အသး တဂၤဒီးတဂၤလၢ “ဖဲအတဲတၢ်ဒီးပှၤလၢကျဲ ဒီးတဲနၢ်ပၢၢ်ပှၤ တၢ်ကွဲးအသးအခါ ပသူၣ်ဟူးသးဂဲၤဒိၣ်မး တမ့ၢ်ဧီၤ.” ၃၃ ဖဲနၣ်ရံၣ်အဝဲန့ၣ် အဝဲသ့ၣ်ဂဲၤဆၢထၢၣ် ဒီးက့ၤဝဲလၢ ယရူၤၡလ့ၣ်လီၤ. ဖဲန့ၣ်အဝဲသ့ၣ်ထံၣ်ဝဲ ပှၤတဆံတဂၤ ဒီးပှၤလၢအအိၣ်ဖှိၣ်ဒီး အဝဲသ့ၣ်တဖၣ်လီၤ. ၃၄ ပှၤတဖၣ်န့ၣ် တဲဝဲလၢ “ကစၢ်န့ၣ် ဂဲၤဆၢထၢၣ် သမူထီၣ်က့ၤနီၢ်ကီၢ်လံ. ဒီးအဝဲ ပာ်ဖျါထီၣ်အသးလၢ စီၤၡံမိၣ်အမဲာ်ညါလီၤ.”+ ၃၅ ဒီးယ့ၣ်ၡူးအပျဲၢ်အဘီၣ်ခံဂၤန့ၣ် တဲဖျါထီၣ်ဝဲ ဘၣ်ဃးဒီး တၢ်ကဲထီၣ်အသးလၢကျဲ ဒီးအဝဲသ့ၣ် သ့ၣ်ညါလၢအမ့ၢ်ယ့ၣ်ၡူး ခီဖျိလၢ အဘိးကၢ်ကိၣ် ဒ်လဲၣ်အဂ့ၢ်လီၤ.+
၃၆ ဖဲအဝဲသ့ၣ်တဲတၢ်ဂ့ၢ်တဖၣ်အံၤအခါ ယ့ၣ်ၡူး ဟဲဆၢထၢၣ်လၢ အဝဲသ့ၣ်အခၢၣ်သး ဒီးတဲအဝဲသ့ၣ်လၢ “မ်တၢ်ဃူတၢ်ဖိး အိၣ်ဒီးသုတက့ၢ်.”+ ၃၇ ဘၣ်ဆၣ် အဝဲသ့ၣ် ဆိကမိၣ်ဝဲလၢ အထံၣ်ပှၤနီၢ်သးဖိတဂၤအဃိ အဝဲသ့ၣ်ဖုး ဒီးပျံၤတၢ်ဒိၣ်မးလီၤ. ၃၈ အဃိ ယ့ၣ်ၡူးတဲအဝဲသ့ၣ်လၢ “သုဘၣ်ကိၢ်ဘၣ်ဂီၤတၢ် ဘၣ်လဲၣ်. ဒီးသုသးဒ့ဒီ ဘၣ်လဲၣ်. ၃၉ ကွၢ်ယစုဒီးယခီၣ်မီၤ, မ့ၢ်ဒၣ်ယၤလီၤ. ဖီၣ်ကွၢ်ယၤမီၤ, မ့မ့ၢ် ပှၤနီၢ်သးဖိန့ၣ် အဃံဒီးအညၣ် တအိၣ်ဒ်သိးဒီးယၤဘၣ်.” ၄၀ ဖဲယ့ၣ်ၡူး တဲဝဲဒ်န့ၣ်အခါ အဝဲဒုးနဲၣ် အဝဲသ့ၣ်လၢ အစုဒီးအခီၣ်လီၤ. ၄၁ ဘၣ်ဆၣ် မ့ၢ်လၢအဝဲသ့ၣ်သးခု ဒီးကမၢကမၣ်ဝဲအဃိ အဝဲသ့ၣ် တနာ်ဝဲဒံးဘၣ်. ဖဲန့ၣ် ယ့ၣ်ၡူးတဲအဝဲသ့ၣ်လၢ “သုတၢ်အီၣ် အိၣ်ဖဲအံၤ တမံၤမံၤဧါ.” ၄၂ အဃိ အဝဲသ့ၣ်ဟ့ၣ်အီၤ ညၣ်ကၣ်တက့လီၤ. ၄၃ အဝဲဟံးန့ၢ်ဒီး အီၣ်ဝဲလၢ အဝဲသ့ၣ်အမဲာ်ညါလီၤ.
၄၄ အဝဲတဲဘၣ် အဝဲသ့ၣ်လၢ “တၢ်ခဲလၢာ်လၢ အကွဲးအသး ဘၣ်ဃးဒီးယၤ လၢစီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသး ဒီးလၢလံာ် စံးထီၣ်ပတြၢၤအပူၤန့ၣ် ကဘၣ် ဟဲလၢထီၣ်ပှဲၤထီၣ်လီၤ.+ လၢညါ ဖဲယအိၣ်ဒီးသုအခါ ယတဲဘၣ်သု ဒ်န့ၣ်လီၤ.”+ ၄၅ ဒီးဒ်သိး အဝဲသ့ၣ် ကနၢ်ပၢၢ်ထီၣ် တၢ်ကွဲးအသးအခီပညီအဂီၢ် ယ့ၣ်ၡူးအိးထီၣ်အဝဲသ့ၣ် အသူၣ်အသးလီၤ.+ ၄၆ ဒီးယ့ၣ်ၡူးတဲ အဝဲသ့ၣ်လၢ “တၢ်ကွဲးအသးအိၣ်ဝဲဒ်အံၤ, ခရံာ်ကဘၣ်တူၢ်တၢ် ဒီးလၢသၢသီတသီန့ၣ် အကဂဲၤဆၢထၢၣ်က့ၤလၢ တၢ်သံ+ ၄၇ ဒီးတၢ်ကစီၣ် ဘၣ်ဃးဒီး တၢ်ပီၢ်ယၢ်လီၤက့ၤသးလၢ တၢ်ပျၢ်တၢ်ဒဲးဘးအဂီၢ်န့ၣ်+ ကဘၣ် တၢ်စံၣ်တဲၤတဲလီၤအီၤ စးထီၣ်လၢ ယရူၤၡလ့ၣ်+ ပၢၢ်တုၤလၢ ပှၤကိးကလုာ်ဒဲးအအိၣ်+ လၢအမံၤ အပူၤလီၤ. ၄၈ ဒီးသုကကဲထီၣ် ပှၤလၢအအုၣ်အသး ဘၣ်ဃးဒီး တၢ်ဂ့ၢ်တဖၣ်န့ၣ်လီၤ.+ ၄၉ တၢ်လၢယပၢ် အၢၣ်လီၤယၤန့ၣ် ယကဆှၢလီၤလၢ သုလိၤလီၤ. ဘၣ်ဆၣ် အိၣ်လၢဝ့ၢ်အံၤအပူၤ တုၤလၢ သုဒိးန့ၢ်ဘၣ် တၢ်စိတၢ်ကမီၤ လၢထးတက့ၢ်.”+
၅၀ ဒီးယ့ၣ်ၡူးလဲၤဆှၢ အဝဲသ့ၣ်တုၤလၢ ဘ့ၤသနံ ဒီးယူာ်ထီၣ်အစု ဒီးဆိၣ်ဂ့ၤ အဝဲသ့ၣ်လီၤ. ၅၁ ဖဲအဆိၣ်ဂ့ၤ အဝဲသ့ၣ်အခါ အဟးထီၣ်လၢ အဝဲသ့ၣ်အအိၣ် ဒီးဘၣ်တၢ်ဟံးထီၣ်အီၤလၢ မူခိၣ်လီၤ.+ ၅၂ အဝဲသ့ၣ် ထိၣ်လီၤပှီၤအသးလၢ ယ့ၣ်ၡူးအမဲာ်ညါ ဝံၤဒီးက့ၤဝဲလၢ ယရူၤၡလ့ၣ် လၢတၢ်သးခု ဖးဒိၣ်အပူၤလီၤ.+ ၅၃ ဒီးအဝဲသ့ၣ် အိၣ်လၢ တၢ်လုၢ်ဟံၣ်ပူၤထီဘိ ဒ်သိး ကစံးထီၣ်ပတြၢၤ ကစၢ်ယွၤအဂီၢ်လီၤ.+