၁ ၡမူၤအ့လး
၁၉ လၢခံ စီၤစီလူးတဲတၢ်ဒီး အဖိခွါ စီၤယိနၤသၣ် ဒီးအခ့အပှၤ ခဲလၢာ် ဘၣ်ဃးဒီး အကမၤသံ စီၤဒၤဝံးအဂ့ၢ်န့ၣ်လီၤ.+ ၂ မ့ၢ်လၢ စီၤယိနၤသၣ်န့ၣ် အဲၣ်ဝဲစီၤဒၤဝံး+ ဒိၣ်မးအဃိ စီၤယိနၤသၣ် တဲဘၣ် စီၤဒၤဝံးလၢ “ယပါ စီၤစီလူး ဘၣ်သး မၤသံနၤလီၤ. ခဲမုၢ်ဆ့ၣ်ဂီၤခီန့ၣ် ဝံသးစူၤ အိၣ်ဒီး တၢ်ပလီၢ်သူၣ်ပလီၢ်သး ဒီးလဲၤလၢ တၢ်လီၢ်ဘံၣ်ဘံၣ်ဘၢဘၢတတီၤ ဒီးအိၣ်ခူသူၣ် ဖဲန့ၣ်တက့ၢ်. ၃ ယကလဲၤလၢ တၢ်ပျီပူၤ ဖဲနကအိၣ်အလီၢ်န့ၣ် ဒီးဆၢထၢၣ်လၢ ယပါအကပၤလီၤ. ယကတဲတၢ်ဒီးယပါ ဘၣ်ဃးဒီးနဂ့ၢ် ဒီးယမ့ၢ်သ့ၣ်ညါဘၣ် တၢ်တမံၤမံၤန့ၣ် ယကတဲဘၣ်နၤ သပှၢ်တၢၢ်လီၤ.”+
၄ ဒီးစီၤယိနၤသၣ် တဲအပၢ် ဘၣ်ဃးဒီးစီၤဒၤဝံးအဂ့ၢ်+ လၢအဂ့ၤလီၤ. စီၤယိၤနၤသၣ် တဲဝဲလၢ “ပါဧၢ, မ့ၢ်လၢနခ့နပှၤ စီၤဒၤဝံးန့ၣ် တမၤကမၣ်နၤဘၣ် ဒီးတၢ်လၢအမၤတ့ၢ်ဝဲန့ၣ် ကဲဘျုးလၢနဂီၢ်အဃိ မၤကမၣ်အီၤတဂ့ၤ. ၅ အဝဲတူၢ်သံအသးဘူၣ်ဝဲ ဒီးလဲၤမၤသံ ပှၤဖလ့ၡသးဖိတဂၤန့ၣ်လီၤ.+ အဃိ ယဟိဝၤယွၤ ဟ့ၣ်ဝဲပှၤအံၣ်စရ့လးဖိ ခဲလၢာ်လၢ တၢ်မၤနၢၤဖးဒိၣ်လီၤ. ဖဲနထံၣ်ဘၣ် တၢ်ကဲထီၣ်အသး ဒ်န့ၣ်အခါ နသးခုဒိၣ်မးလီၤ. စီၤဒၤဝံး တမၤကမၣ်တၢ် နီတမံၤဘၣ်. နကမၤတၢ်ဒဲးဘး ခီဖျိလၢ နလူလီၤ ပှၤလၢအတၢ်ကမၣ်တအိၣ်ဘၣ် တဂၤအံၤ အသွံၣ်န့ၣ် မ့ၢ်အကြၢးဧါ.”+ ၆ စီၤစီလူး ဒိကနၣ် စီၤယိနၤသၣ် အကလုၢ် ဒီးစီၤစီလူး အၢၣ်လီၤဝဲလၢ “ယအၢၣ်လီၤတၢ်လၢ ယဟိဝၤယွၤ လၢအမူဝဲတဂၤ အမဲာ်ညါလၢ ယတမၤသံအီၤဘၣ်.” ၇ ဝံၤဒီးစီၤယိနၤသၣ် ကိးန့ၢ် စီၤဒၤဝံး ဒီးတဲဘၣ်အီၤ တၢ်ဂ့ၢ်တဖၣ်န့ၣ် ခဲလၢာ်လီၤ. ဒီးစီၤယိနၤသၣ် ဟဲကိး စီၤဒၤဝံးလၢ စီၤစီလူးအအိၣ် ဒီးစီၤဒၤဝံး ဆဲးမၤန့ၢ်တၢ်လၢ စီၤစီလူး အဂီၢ် ဒ်လၢညါအသိးလီၤ.+
၈ လၢခံ တၢ်ဒုးအိၣ်ထီၣ်ကဒီး ဒီးစီၤဒၤဝံး လဲၤထီၣ်ဒုး ပှၤဖလ့ၡသးဖိ ဒီးမၤသံဝဲ အဝဲသ့ၣ် အါအါဂီၢ်ဂီၢ်လီၤ. ဒီးပှၤဖလ့ၡသးဖိ အဂၤတဖၣ် ဃ့ၢ်ထီၣ်ကွံာ်လၢ စီၤဒၤဝံး အမဲာ်ညါလီၤ.
၉ ဖဲစီၤဒၤဝံး ဒ့ဝဲတနၢ်+ ဒီးစီၤစီလူး ဆ့ၣ်နီၤအိၣ်လၢ အဟံၣ်ပူၤ ဒီးအိၣ်ဒီး ဘီတဘ့ၣ် လၢအစုပူၤအခါ ယဟိဝၤယွၤ ပျဲဝဲလၢ စီၤစီလူး အတၢ်ပာ်သူၣ်ပာ်သး ကအၢထီၣ်လီၤ.*+ ၁၀ စီၤစီလူး ဂုာ်ကျဲးစၢးဝဲ ဒ်သိးကကွံာ်ဆဲး စီၤဒၤဝံးဒီးဘီ လၢတၢ်ဒူၣ် အကပၤလီၤ. ဘၣ်ဆၣ် စီၤဒၤဝံး ပလဲၤအသးအဃိ ဘီန့ၣ် လဲၤဆဲးဘၣ်တၢ်ဒူၣ် အကပၤလီၤ. ဒီးစီၤဒၤဝံး ဃ့ၢ်ကွံာ်ဝဲ ဒီးတၢ်တနၤန့ၣ် အဝဲဃ့ၢ်ပူၤဖျဲးကွံာ် အသးလီၤ. ၁၁ ဒီးစီၤစီလူး ဆှၢလီၤ အပှၤတဖၣ်လၢ အကလဲၤခိးကွၢ် စီၤဒၤဝံးအဟံၣ် ဒီးမၤသံအီၤလၢ ဂီၤခီအဂီၢ်လီၤ.+ ဘၣ်ဆၣ် စီၤဒၤဝံးအမါ နီၢ်မံကၤလး တဲဘၣ်အီၤလၢ “တနၤညါအံၤ နမ့ၢ် တဃ့ၢ်ပူၤဖျဲး နသးဘၣ်န့ၣ် ခဲမုၢ်ဆ့ၣ်ဒု နကသံလီၤ.” ၁၂ ဒ်သိး စီၤဒၤဝံး ဃ့ၢ်ပူၤဖျဲးအသး ကသ့အဂီၢ် တဘျီဃီန့ၣ် နီၢ်မံကၤလး ဒုးစံၣ်လီၤ စီၤဒၤဝံးလၢ ပဲတြီဖိအပူၤလီၤ. ၁၃ နီၢ်မံကၤလး ဟံးန့ၢ်တရၤဖး အတၢ်ဂီၤတၢ်ဖှီၣ်တခါ* ဒီးပာ်လီၤဝဲလၢ လီၢ်မံခိၣ်လီၤ. ဒီးတၢ်ကံးညာ်လၢ ပှၤတ့ဝဲလၢ မဲာ်တဲးလဲးအဆူၣ်န့ၣ် အဝဲပာ်လီၤဝဲလၢ တၢ်လီၢ်လၢ စီၤဒၤဝံး ပာ်လီၤအခိၣ်အလီၢ် ဒီးအဝဲကးဘၢဝဲလၢ တၢ်ကူတၢ်ကၤ တဘ့ၣ်လီၤ.
၁၄ စီၤစီလူး ဆှၢလီၤအပှၤတဖၣ် ဒ်သိးကလဲၤကိးန့ၢ် စီၤဒၤဝံး ဘၣ်ဆၣ် နီၢ်မံကၤလး တဲဝဲလၢ “အအိၣ်တဆူၣ်ဘၣ်.” ၁၅ အဃိ စီၤစီလူး မၢလီၤကဒီးအပှၤလၢ ကလဲၤထံၣ်လိာ်သးဒီး စီၤဒၤဝံး ဒီးတဲဝဲအပှၤတဖၣ်န့ၣ်လၢ “ဖဲအမံနီၤဒံးလၢ အလီၢ်မံပူၤန့ၣ် ဟဲက့ၤစိာ်အီၤလၢယအိၣ် လၢအလီၢ်မံပူၤ ဒီးယက မၤသံအီၤလီၤ.”+ ၁၆ ဖဲပှၤဟဲနုာ်အခါ အဝဲသ့ၣ်ထံၣ်ဝဲလၢ တရၤဖး အတၢ်ဂီၤတၢ်ဖှီၣ်တခါ အိၣ်လၢ လီၢ်မံခိၣ် ဒီးတၢ်ကံးညာ်လၢ ပှၤတ့ဝဲလၢ မဲာ်တဲးလဲးအဆူၣ်န့ၣ် အိၣ်ဝဲလၢ တၢ်လီၢ်လၢ စီၤဒၤဝံး ပာ်လီၤအခိၣ် အလီၢ်လီၤ. ၁၇ စီၤစီလူး တဲဘၣ် နီၢ်မံကၤလးလၢ “ဘၣ်မနုၤအဃိ နတဲလံၣ်ယၤဒ်အံၤ ဒီးနပျဲလဲၤ ယဒုၣ်ယဒါ+ ဒ်သိးအကဃ့ၢ်ပူၤဖျဲးအသး အဂီၢ်လဲၣ်.” နီၢ်မံကၤလး တဲဆၢက့ၤ စီၤစီလူးလၢ “အဝဲတဲယၤလၢ ‘ပျဲလဲၤယၤ, နမ့ၢ်တပျဲလဲၤယၤဘၣ်န့ၣ် ယကမၤသံနၤလီၤ.’”
၁၈ စီၤဒၤဝံး ဃ့ၢ်ထီၣ်ကွံာ်ဒီး ဃ့ၢ်ပူၤဖျဲးအသးလီၤ. အဝဲလဲၤတုၤလၢ စီၤၡမူၤအ့လးအအိၣ် လၢဝ့ၢ်ရၤမါလီၤ.+ စီၤဒၤဝံး တဲဘၣ် စီၤၡမူၤအ့လး တၢ်လၢ စီၤစီလူးမၤအီၤ ခဲလၢာ်လီၤ. ဝံၤဒီးအဝဲဒီး စီၤၡမူၤအ့လး လဲၤလၢနၤဝိး ဒီးအိၣ်ဝဲဖဲန့ၣ်လီၤ.+ ၁၉ လၢခံ ပှၤတဲဘၣ် စီၤစီလူးလၢ “စီၤဒၤဝံးအိၣ်လၢ နၤဝိး လၢဝ့ၢ်ရၤမါအပူၤလီၤ.” ၂၀ တဘျီဃီန့ၣ် စီၤစီလူး ဆှၢလီၤအပှၤတဖၣ် ဒ်သိး အဝဲသ့ၣ်ကလဲၤဖီၣ် စီၤဒၤဝံးအဂီၢ်လီၤ. ဖဲအဝဲသ့ၣ် ထံၣ်ဝဲဝံလၢ အသးပှၢ်တဖၣ် တဲတၢ်ဒ်ဝံအသိး ဒီးစီၤၡမူၤအ့လး ဆၢထၢၣ် တီခိၣ်ရိၤမဲအဝဲသ့ၣ်အခါ ယွၤအသးစီဆှံ ဟဲလီၤလၢ စီၤစီလူးအပှၤတဖၣ်န့ၣ်အလိၤ ဒီးအဝဲသ့ၣ် မၤထီၣ်အသးဒ် ဝံတဖၣ်အသိး စ့ၢ်ကီးလီၤ.
၂၁ ဖဲပှၤတဲဘၣ် စီၤစီလူးအခါ တဘျီဃီန့ၣ် စီၤစီလူး ဆှၢလီၤအပှၤလၢအဂၤတဖၣ် ဒီးအဝဲသ့ၣ်စ့ၢ်ကီး မၤထီၣ်အသးဒ် ဝံတဖၣ်အသိးလီၤ. ဒီးစီၤစီလူး ဆှၢလီၤကဒီး အပှၤသၢဖုတဖု ဒီးအပှၤတဖၣ်န့ၣ် မၤထီၣ်အသးဒ် ဝံတဖၣ်အသိး စ့ၢ်ကီးလီၤ. ၂၂ လၢခံ စီၤစီလူး လဲၤလၢ ဝ့ၢ်ရၤမါလီၤ. ဖဲအလဲၤတုၤလၢ ထံကမါဖးဒိၣ် လၢအအိၣ်လၢ စ့ကူၤအခါ အဝဲသံကွၢ်ဝဲလၢ “စီၤၡမူၤအ့လး ဒီးစီၤဒၤဝံးအိၣ်ဖဲလဲၣ်.” ပှၤတဲဆၢက့ၤအီၤလၢ “အိၣ်လၢ နၤဝိး+ လၢဝ့ၢ်ရၤမါလီၤ.” ၂၃ ဒီးစီၤစီလူး လဲၤဝဲလၢ နၤဝိးလၢအအိၣ်လၢ ဝ့ၢ်ရၤမါန့ၣ်လီၤ. ဖဲအလဲၤလၢကျဲအခါ ယွၤအသးစီဆှံ ဟဲလီၤလၢအလိၤ စ့ၢ်ကီးလီၤ. အဃိ လၢကျဲန့ၣ် အဝဲမၤထီၣ်အသး ဒ်ဝံတဂၤအသိး တုၤလီၤလၢ အလဲၤတုၤလၢ နၤဝိး လၢအအိၣ်လၢ ဝ့ၢ်ရၤမါအပူၤ တစုလီၤ. ၂၄ ဒီးအဝဲ ဘ့ၣ်လီၤကွံာ် အတၢ်ကူတၢ်ကၤ ဒီးမၤထီၣ်အသး ဒ်ဝံတဂၤအသိး လၢစီၤၡမူၤအ့လးအမဲာ်ညါလီၤ. ဒီးအဝဲမံနီၤ အိၣ်ဘ့ၣ်ဆ့ ဖဲန့ၣ်ဒီတနံၤ ဒီတနၤလီၤ. အဃိ တၢ်ကတိၤဒိအိၣ်ဝဲလၢ “မ့ၢ်စီၤစီလူး ပၣ်ဃုာ်လၢ ဝံတဖၣ်အကျါ စ့ၢ်ကီးဧါ” န့ၣ်လီၤ.+