ယိၤဟၣ်

၁၀ “ယကတဲဘၣ်သု တီတီလၢ ပှၤလၢ တဟဲနုာ်လၢ သိကရၢပူၤ ခီဖျိလၢတြဲၤဘၣ်​ ဒီးထီၣ်လၢ တၢ်ဒူၣ်ကပၤ ဒ်သိး ကနုာ်လီၤဝဲအဂီၢ်န့ၣ်​ အဝဲမ့ၢ် တၢ်ဟုၣ်တၢ်ဘျၣ်​ ဒီးတမျိးတမျာ်လီၤ.+ ၂ ဘၣ်ဆၣ်​ ပှၤလၢ အဟဲနုာ်လီၤ ခီဖျိလၢတြဲၤန့ၣ်​ မ့ၢ်ဝဲပှၤကွၢ်သိလီၤ.+ ၃ ဒီးပှၤခိးတြဲၤဖိန့ၣ်​ ကအိးထီၣ်န့ၢ်အီၤတြဲၤ+ ဒီးသိတဖၣ်​ ဒိကနၣ်အကလုၢ်လီၤ.+ အဝဲကိးထီၣ်​ အသိတဖၣ်အမံၤ ဒီးဆှၢထီၣ်ဝဲ အသိလၢတၢ်ချၢလီၤ. ၄ ဖဲအဝဲဆှၢထီၣ်​ အသိခဲလၢာ်လၢ တၢ်ချၢဝံၤအခါ အလဲၤလၢ သိတဖၣ်အမဲာ်ညါလီၤ. ဒီးသိတဖၣ်န့ၣ်​ ပိာ်ထီၣ်အခံ, မ့ၢ်လၢအဝဲသ့ၣ်​ သ့ၣ်ညါ အကလုၢ်အဃိလီၤ. ၅ မ့မ့ၢ် ပှၤတဂၤလၢ သိတဖၣ်တသ့ၣ်ညါအီၤဘၣ်န့ၣ်​ မ့ၢ်လၢ သိတဖၣ်​ တသ့ၣ်ညါအကလုၢ်ဘၣ်​ အဃိ လ့ၤတက့ၤ အဝဲသ့ၣ်တပိာ် ပှၤတဂၤန့ၣ်အခံဘၣ်​ ဒီးကဃ့ၢ်ထီၣ်ကွံာ်လၢ အအိၣ်လီၤ.” ၆ ယ့ၣ်ၡူးတဲဘၣ်​ အဝဲသ့ၣ်လၢ တၢ်ကတိၤဒိတခါအံၤ ဘၣ်ဆၣ်​ အဝဲသ့ၣ်​ တနၢ်ပၢၢ်တၢ်လၢ ယ့ၣ်ၡူးတဲ အဝဲသ့ၣ်ဘၣ်.

၇ အဃိ ယ့ၣ်ၡူး တဲကဒီးဝဲလၢ “ယကတဲဘၣ်သုတီတီလၢ ယမ့ၢ်သိတဖၣ်​ အတြဲၤလီၤ.+ ၈ ပှၤကိးဂၤဒဲးလၢ အတဲလီၤအသး လၢအမ့ၢ်ယၤန့ၣ်​ မ့ၢ်ဝဲ တၢ်ဟုၣ်တၢ်ဘျၣ်​ ဒီးတမျိးတမျာ်လီၤ. ဒီးသိတဖၣ်​ တဒိကနၣ်​ အဝဲသ့ၣ်ဘၣ်. ၉ ယမ့ၢ်တြဲၤ ဒီးပှၤလၢ အဟဲနုာ်လီၤ ခီဖျိလၢယၤန့ၣ်​ ကန့ၢ်ဘၣ်​ တၢ်အုၣ်က့ၤခီၣ်က့ၤလီၤ. ဒီးအဝဲသ့ၣ်​ ကနုာ်လီၤဒီး ကဟးထီၣ်​ ဒီးကထံၣ်န့ၢ် တၢ်အီၣ်လီၤ.+ ၁၀ တၢ်ဟုၣ်တၢ်ဘျၣ်န့ၣ်​ မ့တမ့ၢ်လၢ ကဟုၣ်တၢ်, ကမၤသံတၢ် ဒီးကမၤဟးဂီၤတၢ် အဂီၢ်ဘၣ်န့ၣ်​ အတဟဲဝဲဘၣ်.+ မ့မ့ၢ်ယၤန့ၣ်​ ယဟဲဒ်သိး သိတဖၣ်​ ကန့ၢ်ဘၣ်တၢ်မူ ဒီးကအိၣ်မူဘၣ်​ ဖးယံာ်အဂီၢ်လီၤ. ၁၁ ယမ့ၢ်ပှၤကွၢ်သိလၢ အဂ့ၤတဂၤလီၤ.+ ပှၤကွၢ်သိ လၢအဂ့ၤတဂၤန့ၣ်​ ကဟ့ၣ်လီၤ အသးသမူလၢ သိတဖၣ်အဂီၢ်လီၤ.+ ၁၂ ပှၤလၢ အဒိးလဲအသးန့ၣ်​ အတမ့ၢ် ပှၤကွၢ်သိဘၣ်​ ဒီးသိတဖၣ်န့ၣ်​ တမ့ၢ် အတၢ်ဘၣ်အဃိ ဖဲအထံၣ်ထွံၣ်မံၤ ဟဲဝဲအခါ အပာ်တ့ၢ်ကွံာ်သိတဖၣ်​ ဒီးဃ့ၢ်ကွံာ်ဝဲလီၤ. ဒီးထွံၣ်မံၤ အ့ၣ်ဝဲသိတဖၣ်​ ဒီးမၤလီၤပြံလီၤပြါကွံာ် အဝဲသ့ၣ်လီၤ. ၁၃ မ့ၢ်လၢ အမ့ၢ်ဝဲပှၤလၢ အဒိးလဲအသး ဒီးအတသးအိၣ်​ သိတဖၣ်ဘၣ်အဃိ အဃ့ၢ်ကွံာ်ဝဲလီၤ. ၁၄ ယမ့ၢ်ပှၤကွၢ်သိလၢ အဂ့ၤတဂၤလီၤ. ယသ့ၣ်ညါယသိတဖၣ်​ ဒီးယသိတဖၣ်​ သ့ၣ်ညါယၤလီၤ.+ ၁၅ ဒီးဒ်ပၢ် သ့ၣ်ညါယၤအသိး ယသ့ၣ်ညါပၢ်+ ဒီးယဟ့ၣ်လီၤ ယသးသမူလၢ သိတဖၣ်အဂီၢ်လီၤ.+

၁၆ “ဒီးယအိၣ်ဒီး သိလၢအဂၤတဖၣ်​ ဒီးအဝဲသ့ၣ်​ တပၣ်ဃုာ်လၢ ကရၢတဖျၢၣ်အံၤအပူၤဘၣ်.+ ဒီးယကဘၣ်​ ဟံးစုနဲၣ်ကျဲ အဝဲသ့ၣ်စ့ၢ်ကီး ဒီးအဝဲသ့ၣ်​ ကဒိကနၣ်​ ယကလုၢ်လီၤ. အဝဲသ့ၣ်ကကဲထီၣ်​ သိတဖုဃီ, အိၣ်ဒီးပှၤကွၢ်သိ တဂၤဃီလီၤ.+ ၁၇ ယဟ့ၣ်လီၤ ယသးသမူ+ ဒ်သိး ယကဒိးန့ၢ်ဘၣ်က့ၤအီၤ အဂီၢ်လီၤ. အဃိ ပၢ်အဲၣ်ယၤလီၤ.+ ၁၈ ပှၤတဟံးထီၣ်ကွံာ် ယသးသမူလၢယအိၣ်​ နီတဂၤဘၣ်. ယက ဟ့ၣ်လီၤကွံာ်အီၤလၢ ယနီၢ်ကစၢ်လီၤ. ယအိၣ်ဒီး တၢ်ခွဲးတၢ်ယာ်လၢ ယက ဟ့ၣ်လီၤကွံာ် ယသးသမူ ဒီးယအိၣ်ဒီး တၢ်ခွဲးတၢ်ယာ်လၢ ယကဒိးန့ၢ်ဘၣ်က့ၤအီၤလီၤ.+ ယပၢ်မၤလိာ်ယၤလၢ ယကမၤဒ်န့ၣ်လီၤ.”

၁၉ ခီဖျိလၢ တၢ်ကတိၤတဖၣ်အံၤအဃိ တၢ်လီၤမုၢ်လီၤဖး အိၣ်ထီၣ်လၢ ပှၤယူဒၤဖိ တဖၣ်အကျါလီၤ.+ ၂၀ အဝဲသ့ၣ်အါဂၤ တဲဝဲလၢ “ဘၣ်မနုၤအဃိ သုဒိကနၣ်အီၤလဲၣ်. တၢ်ဝံတၢ်နါ အိၣ်လၢအလိၤ ဒီးအပျုၢ်လီၤ.” ၂၁ ပှၤအဂၤတနီၤ တဲဝဲလၢ “ပှၤလၢ တၢ်ဝံတၢ်နါ အိၣ်လၢအလိၤန့ၣ်​ တတဲတၢ် ဒ်အံၤဘၣ်. တၢ်ဝံတၢ်နါန့ၣ်​ အဒုးထံၣ်ထီၣ်​ ပှၤလၢ အမဲာ်တထံၣ်တၢ် ကသ့ဧါ.”

၂၂ ဖဲန့ၣ်အခါ ဘၣ်လၢ တၢ်ဂိၢ်ခါ ဒီးတၢ်ပာ်စီဆှံ တၢ်လုၢ်ဟံၣ်​ အဘူၣ်ဘၣ်ဝဲလၢ ဝ့ၢ်ယရူၤၡလ့ၣ်အပူၤလီၤ. ၂၃ ဒီးယ့ၣ်ၡူး ဟးဝဲလၢ တၢ်လုၢ်ဟံၣ်အပူၤ ဖဲစီၤၡလိၤမိၤ အကျဲလၢအိၣ်ဒီး အခိၣ်ဒုးလီၤ.+ ၂၄ ဒီးပှၤယူဒၤဖိတဖၣ်​ အိၣ်ဝးတရံးအီၤ ဒီးတဲအီၤလၢ “နကမၤဒ့ဒီပသး ယံာ်ဒံးထဲလဲၣ်. နမ့မ့ၢ်ခရံာ်န့ၣ်​ တဲပှၤၡဲၡဲသၢၤ.” ၂၅ ယ့ၣ်ၡူး တဲဆၢက့ၤ အဝဲသ့ၣ်လၢ “ယတဲသုဝံၤလံ, ဘၣ်ဆၣ်​ သုတနာ်ဘၣ်. တၢ်မၤလၢယမၤလၢ ယပၢ်အမံၤန့ၣ်​ ပာ်ဖျါထီၣ်ဝဲ တၢ်အုၣ်အသး ဘၣ်ဃးဒီးယၤလီၤ.+ ၂၆ ဘၣ်ဆၣ်​ မ့ၢ်လၢ သုတမ့ၢ် ယသိဘၣ်အဃိ သုတနာ်တၢ်ဘၣ်.+ ၂၇ ယသိတဖၣ်​ ဒိကနၣ်ယကလုၢ် ဒီးယသ့ၣ်ညါ အဝဲသ့ၣ်​ ဒီးအဝဲသ့ၣ်​ ပိာ်ယခံလီၤ.+ ၂၈ ယကဟ့ၣ်အဝဲသ့ၣ်​ တၢ်မူအထူအယိာ်+ ဒီးလ့ၤတက့ၤ အဝဲသ့ၣ်တတုၤလၢ တၢ်ဟးဂီၤဘၣ်. ဒီးပှၤတဟံးန့ၢ် အဝဲသ့ၣ်လၢ ယစုပူၤနီတဂၤဘၣ်.+ ၂၉ သိလၢ ယပၢ်ဟ့ၣ်လီၤယၤန့ၣ်​ အလုၢ်ဒိၣ်ပှ့ၤဒိၣ်​ ဒိၣ်န့ၢ်ဒံး တၢ်အဂၤခဲလၢာ်လီၤ. ဒီးပှၤဟံးန့ၢ် အဝဲသ့ၣ်လၢ ယပၢ်အစုပူၤ တသ့နီတဂၤဘၣ်.+ ၃၀ ယၤဒီးပၢ်န့ၣ်​ မ့ၢ်တၢ်တမံၤဃီလီၤ.”*+

၃၁ ပှၤယူဒၤဖိတဖၣ်​ ထၢထီၣ်ကဒီးလၢၢ်တဖၣ်လၢ ကကွံာ်အီၤ အဂီၢ်လီၤ. ၃၂ ယ့ၣ်ၡူး တဲအဝဲသ့ၣ်လၢ “ယပာ်ဖျါထီၣ်န့ၢ်သု တၢ်မၤလၢအဂ့ၤအါမးလၢ အဟဲလၢ ယပၢ်အအိၣ်လီၤ. သုအဲၣ်ဒိးကွံာ်ယၤဒီးလၢၢ် လၢတၢ်မၤဖဲလဲၣ်တခါ အဃိလဲၣ်.” ၃၃ ပှၤယူဒၤဖိတဖၣ်​ တဲဆၢအီၤလၢ “ပကကွံာ်နၤလၢလၢၢ်န့ၣ်​ တမ့ၢ်လၢ နမၤတၢ်မၤလၢအဂ့ၤ တမံၤမံၤအဃိဘၣ်, မ့ၢ်လၢနကတိၤထီဒါ ကစၢ်ယွၤအဃိလီၤ.+ နမ့ၢ်ဒၣ်​ ပှၤဟီၣ်ခိၣ်ဖိတဂၤ ဘၣ်ဆၣ်​ နတဲလီၤနသးလၢ နမ့ၢ်ယွၤတဂၤလီၤ.” ၃၄ ယ့ၣ်ၡူးတဲဆၢ အဝဲသ့ၣ်လၢ “လၢသု တၢ်သိၣ်တၢ်သီအပူၤန့ၣ်​ ကစၢ်ယွၤ တဲဝဲလၢ ‘သုမ့ၢ်ယွၤတဖၣ်’*+ တမ့ၢ်ဧီၤ. ၃၅ ဒီးတၢ်ဆီတလဲ တၢ်ကွဲးအသးတဖၣ်​ တသ့ဘၣ်အဃိ ပှၤလၢ ယွၤအကလုၢ်ကထါ သိၣ်ဃီၣ်အီၤတဖၣ်​ ဒၣ်လဲာ် ကစၢ်ယွၤ မ့ၢ်ကိးဝဲလၢ ‘ယွၤတဖၣ်’+ န့ၣ်​ ၃၆ ပှၤလၢပၢ် ပာ်စီဆှံအီၤဒီး ဆှၢလီၤအီၤလၢ ဟီၣ်ခိၣ်ချၢ ယၤအံၤ ယမ့ၢ်တဲလၢ ယမ့ၢ် ကစၢ်ယွၤ အဖိခွါန့ၣ်​ မ့ၢ်သုကြၢးတဲယၤလၢ ယကတိၤထီဒါကစၢ်ယွၤဧါ.+ ၃၇ ယမ့ၢ်တမၤ ယပၢ် အတၢ်မၤတဖၣ်ဘၣ်န့ၣ်​ တဘၣ်နာ်ယၤတဂ့ၤ. ၃၈ ဘၣ်ဆၣ်​ ယမၤတၢ်သ့ၣ်တဖၣ်အံၤလံ ဒီးသုမ့ၢ် တနာ်ယၤဘၣ်ဒၣ်လဲာ် နာ်တၢ်လၢယမၤတဖၣ်+ ဒ်သိး သုကသ့ၣ်ညါ ဒီးနၢ်ပၢၢ်လီၤတံၢ်လီၤဆဲးလၢ ပၢ်အိၣ်ဒီးယၤ ဒီးယအိၣ်ဒီးပၢ်တက့ၢ်.”+ ၃၉ အဃိ အဝဲသ့ၣ်​ ဂုာ်ကျဲးစၢး ဖီၣ်ကဒီးယ့ၣ်ၡူး ဘၣ်ဆၣ်​ အဝဲဟးထီၣ်ကွံာ်လၢ အဝဲသ့ၣ်အအိၣ်လီၤ.

၄၀ ယ့ၣ်ၡူး လဲၤခီဂာ်ဝဲ ထံကျိယၢ်ဒ့ၣ်တုၤလီၤလၢ တၢ်လီၢ်ဖဲ စီၤယိၤဟၣ်​ စးထီၣ်ဒိးဘျၢတၢ် သီသီအလီၢ်+ ဒီးအိၣ်ဝဲဖဲန့ၣ်လီၤ. ၄၁ ဒီးပှၤအါဂၤ ဟဲလၢအအိၣ်​ ဒီးတဲလိာ်သး တဂၤဒီးတဂၤလၢ “စီၤယိၤဟၣ်​ တမၤတၢ်ပနီၣ်လီၤလး နီတမံၤဘၣ်. ဘၣ်ဆၣ်​ တၢ်လၢ စီၤယိၤဟၣ်တဲဝဲ ဘၣ်ဃးဒီး ပှၤတဂၤအံၤအဂ့ၢ်န့ၣ်​ မ့ၢ်ဝဲတီဝဲ ခဲလၢာ်လီၤ.”+ ၄၂ ဖဲန့ၣ်​ ပှၤအါဂၤ စူၢ်က့ၤနာ်က့ၤအီၤလီၤ.