ဧ့စြၤ
၁၀ ဖဲစီၤဧ့စြၤ ထိၣ်လီၤပှီၤအသးလၢ တၢ်လုၢ်ဟံၣ် အမဲာ်ညါ, ဃ့ထုကဖၣ်တၢ်+ ပှဲၤဒီးမဲာ်ထံမဲာ်နိ ဒီးအၢၣ်လီၤဝဲ အပှၤဂီၢ်မုၢ် အတၢ်ကမၣ်အခါ အံၣ်စရ့လး ပိာ်မုၣ်ပိာ်ခွါ ဒီးဖိသၣ်တဖၣ် အါဂၤ ဟဲပာ်ဖှိၣ်ထီၣ်အသး ဝးတရံးအီၤ ဒီးပှၤဟီၣ်ဝဲယၢၤဝဲ နးမးလီၤ. ၂ စီၤယဃံအ့လး+ အဖိခွါ စီၤၡကါနယၤ လၢအဟဲလီၤစၢၤလၢ စီၤဧ့ၤလၣ်န့ၣ်+ တဲစီၤဧ့စြၤလၢ “ပသးတတီဒီး ကစၢ်ယွၤလၢၤဘၣ် ခီဖျိလၢ ပဆီဟံၣ်ဆီဃီဒီး ပှၤပိာ်မုၣ်လၢ အမ့ၢ် ပှၤကလုာ်အဂၤတဖၣ် အဃိလီၤ.+ ဘၣ်ဆၣ် လၢပှၤအံၣ်စရ့လးဖိ အဂီၢ်န့ၣ် တၢ်မုၢ်လၢ် အိၣ်ဒံးဝဲလီၤ. ၃ ခဲအံၤန့ၣ် ပကမၤ တၢ်အၢၣ်လီၤအီလီၤဒီး ပကစၢ်ယွၤလၢ+ ပကနီဟးထီၣ်ကွံာ် ပမါတဖၣ်အံၤ ခဲလၢာ် ဒီးအဝဲသ့ၣ် အဖိတဖၣ် ဒ်ယဟိဝၤယွၤ အတၢ်ဟံးစုနဲၣ်ကျဲ အိၣ်ဝဲအသိး ဒီးဒ်ပှၤလၢ အပာ်ဒိၣ်ပာ်ကဲ* ပကစၢ်ယွၤ အတၢ်မၤလိာ်တဖၣ် အတၢ်ဟံးစုနဲၣ်ကျဲ အိၣ်ဝဲအသိးလီၤ.+ ပကမၤထွဲ ဒ်စီၤမိၤၡ့ အတၢ်သိၣ်တၢ်သီ တဲဝဲအသိးလီၤ. ၄ တၢ်ဂ့ၢ်တခါအံၤန့ၣ် မ့ၢ်ဝဲ နမူဒါ ဒီးပအိၣ်ဒီးနၤလီၤ. အဃိ ဂဲၤဆၢထၢၣ်, ပာ်ဆူၣ်နသး ဒီးမၤတၢ်လၢ နကဘၣ်မၤအီၤသၢၤ.”
၅ ဒီးစီၤဧ့စြၤ ဂဲၤဆၢထၢၣ် ဒီးမၢ ပှၤလၢအတီခိၣ်ရိၤမဲ ပှၤလုၢ်တၢ်ဒိၣ်တဖၣ်, ပှၤလ့ၤဝံဖိ ဒီးပှၤအံၣ်စရ့လးဖိခဲလၢာ် လၢကမၤဝဲ တၢ်အၢၣ်လီၤ ဒ်စီၤၡကါနယၤ တဲဝဲအသိးလီၤ.+ ဒီးအဝဲသ့ၣ် မၤဝဲ တၢ်အၢၣ်လီၤလီၤ. ၆ ဒီးစီၤဧ့စြၤ ဟးထီၣ်လၢ ယွၤလၢအမ့ၢ်အတီတဂၤ အဟံၣ်မဲာ်ညါ ဒီးလဲၤဝဲလၢ စီၤအ့လယၤၡံၣ် အဖိခွါ စီၤယိဃၤနာ် အဒၢး* ဘၣ်ဆၣ် အဝဲတအီၣ်တၢ်အီတၢ်ဘၣ်, မ့ၢ်လၢ အသးအုး ခီဖျိလၢ ပှၤလၢအဟဲက့ၤတဖၣ် တအိၣ်ဒီး တၢ်သးတီဘၣ် အဃိလီၤ.+
၇ ဒီးလၢယူဒၤ ဒီးယရူၤၡလ့ၣ် အဟီၣ်ကဝီၤဝးဝးန့ၣ် အဝဲသ့ၣ် ဘိးဘၣ်သ့ၣ်ညါဝဲလၢ ပှၤလၢအဟဲက့ၤကိးဂၤဒဲး ကဘၣ်ပာ်ဖှိၣ်ထီၣ်အသးလၢ ယရူၤၡလ့ၣ်လီၤ. ၈ ဒ်ပဒိၣ်ဖးဒိၣ်တဖၣ် ဒီးပှၤသူၣ်က့သးပှၢ် ဆၢတဲာ်ဝဲအသိး လၢသၢသီအတီၢ်ပူၤ ပှၤတဂၤဂ့ၤ တဂၤဂ့ၤ မ့ၢ်တဟဲဘၣ်န့ၣ် အတၢ်ဖိတၢ်လံၤခဲလၢာ် ကဘၣ် တၢ်ဟံးန့ၢ်ကွံာ်အီၤလီၤ. တကးဒံးဘၣ် ပှၤကနီဟးထီၣ်ကွံာ်အီၤလၢ ပှၤလၢအဟဲက့ၤတဖၣ် အတၢ်အိၣ်ဖှိၣ်အပူၤလီၤ.+ ၉ အဃိ လၢသၢသီအတီၢ်ပူၤန့ၣ် ပှၤပိာ်ခွါခဲလၢာ် လၢယူဒၤအဒူၣ် ဒီးဘံၣ်ယၤမံၣ်အဒူၣ်ကျါ ဟဲပာ်ဖှိၣ်ထီၣ်အသးလီၤ. ဖဲလါခွံလါတလါ, လါထီၣ် အသီ ၂၀ အနံၤန့ၣ် အဝဲသ့ၣ်ခဲလၢာ် ဆ့ၣ်နီၤဝဲလၢ ယွၤလၢအမ့ၢ်အတီတဂၤ အဟံၣ် အတၢ်ပျီပူၤလီၤ. ဒီးအဝဲသ့ၣ် ကနိးကစုာ်ဝဲ မ့ၢ်လၢ တၢ်ဂ့ၢ်တခါအံၤ ဒီးမူခိၣ်စူၤဝဲ ဒိၣ်ဒိၣ်အဃိလီၤ.
၁၀ ဒီးပှၤလုၢ်တၢ်ဒိၣ် စီၤဧ့စြၤ ဂဲၤဆၢထၢၣ် ဒီးတဲအဝဲသ့ၣ်လၢ “သုသးတတီလၢၤဘၣ် ခီဖျိလၢ သုဆီဟံၣ်ဆီဃီဒီး ပှၤပိာ်မုၣ်လၢအမ့ၢ် ပှၤကလုာ်အဂၤတဖၣ်လီၤ.+ အဃိ သုမၤအါထီၣ် ပှၤအံၣ်စရ့လးဖိတဖၣ် အတၢ်ဒဲးဘးလီၤ. ၁၁ အဃိ အၢၣ်လီၤသုတၢ်ကမၣ်လၢ သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤအအိၣ် ဒီးမၤအတၢ်ဘၣ်သးတက့ၢ်. ဒီးမၤလီၤဖးသုသးဒီး ပှၤကလုာ်တဖၣ် ဒီးသုမါလၢအမ့ၢ် ပှၤကလုာ်အဂၤတဖၣ် တက့ၢ်.”+ ၁၂ ဖဲန့ၣ်န့ၣ် ပှၤလၢအဟဲအိၣ်ဖှိၣ်ခဲလၢာ် တဲဆၢဝဲလၢ အကလုၢ်ဒိၣ်ဒိၣ်လၢ “ပမူဒါအိၣ်လၢ ပကဘၣ်မၤဒ် နတဲအသိး လီၤတံၢ်လီၤဆဲးလီၤ. ၁၃ ဘၣ်ဆၣ် ပှၤအိၣ်ဖဲအံၤဒီဒူၣ် ဒီးမ့ၢ်ဝဲ တၢ်စူၤခါအဃိ ပအိၣ်ဆၢထၢၣ်လၢ တၢ်ချၢဒ်အံၤ တကဲဘၣ်. ဒီးပတၢ်ဒဲးဘးန့ၣ် ဒိၣ်ဝဲဒိၣ်မးအဃိ တမ့ၢ်လၢ ပှၤမၤဝံၤက့ၤ တၢ်ဂ့ၢ်တခါအံၤ လၢတသီခံသီအတီၢ်ပူၤ ကသ့ဘၣ်. ၁၄ ဝံသးစူၤ မၢပပဒိၣ်တဖၣ် အိၣ်တ့ၢ်ဖဲအံၤလၢ တၢ်အိၣ်ဖှိၣ် ဒီဖုအခၢၣ်စး+ ဒီးမၢပှၤပိာ်ခွါ ကိးဂၤဒဲးလၢ ပဝ့ၢ်တဖၣ်အပူၤ လၢအဆီဟံၣ်ဆီဃီဒီး ပှၤပိာ်မုၣ်လၢ အမ့ၢ်ကလုာ်ဂၤတဖၣ် ဟဲဖဲတၢ်ဆၢကတီၢ် လၢပှၤပာ်ပနီၣ်အီၤ န့ၣ်တက့ၢ်. မၢအဝဲသ့ၣ် ဟဲဒီး အဝ့ၢ်အပှၤသူၣ်က့သးပှၢ်တဖၣ် ဒီးအဝ့ၢ်အပှၤစံၣ်ညီၣ်ကွီၢ်တဖၣ် တက့ၢ်. မ့ၢ်လၢ ကစၢ်ယွၤ သးဒိၣ်ထီၣ်ပှၤ ဘၣ်ဃးဒီး တၢ်ဂ့ၢ်အံၤအဃိ ပကမၤဒ်န့ၣ် တုၤလၢ အတၢ်သးဒိၣ် ခုၣ်လီၤကွံာ်ဝဲလီၤ.”
၁၅ ဘၣ်ဆၣ် စီၤဧစၤအ့လး အဖိခွါ စီၤယိနၤသၣ် ဒီးစီၤတံးကဝၤ အဖိခွါ စီၤယဃၤစယၤန့ၣ် တတူၢ်လိာ်ဝဲ တၢ်ဂ့ၢ်အံၤဘၣ်. ဒီးပှၤလ့ၤဝံဖိ စီၤမၡူလၣ် ဒီးစီၤၡၤဘသဲၤစ့ၢ်ကီး+ ဆီၣ်ထွဲ အဝဲသ့ၣ်လီၤ. ၁၆ ဘၣ်ဆၣ် ပှၤလၢအဟဲက့ၤတဖၣ်န့ၣ် မၤထွဲဝဲဒ် ပှၤအၢၣ်လီၤတူၢ်လိာ် ပာ်စၢၤဝဲ အသိးလီၤ. ဒီးဖဲတဆံလါတလါ, လါထီၣ်တသီန့ၣ် ပှၤလုၢ်တၢ်ဒိၣ် စီၤဧ့စြၤ ဒီးဒူၣ်ဖိထၢဖိ အခိၣ်အနၢ်တဖၣ် ဒ်အဝဲသ့ၣ်အမံၤ ဘၣ်တၢ်ကွဲးနီၣ်ဃာ်အီၤ အသိးန့ၣ် အိၣ်ဖှိၣ်လီၤလီၤဆီဆီ ဒ်သိး ကကွၢ်ကျဲၤက့ၤ တၢ်ဂ့ၢ်တခါအံၤ အဂီၢ်လီၤ. ၁၇ တုၤလီၤလၢ လါအဆိကတၢၢ်တလါ, လါထီၣ်တသီန့ၣ် အဝဲသ့ၣ် မၤဘၣ်ဂီၢ်က့ၤ တၢ်ဂ့ၢ်လၢ ဘၣ်ဃးဒီး ပှၤပိာ်ခွါကိးဂၤဒဲးလၢ အဆီဟံၣ်ဆီဃီဒီး ပှၤပိာ်မုၣ်လၢ အမ့ၢ် ပှၤကလုာ်အဂၤတဖၣ် ဝံၤဝဲလီၤ. ၁၈ ဒီးပှၤသ့ၣ်ညါဘၣ်လၢ ပှၤလုၢ်တၢ်ဒိၣ် အဖိခွါတနီၤန့ၣ်* ဆီဟံၣ်ဆီဃီဒီး ပှၤပိာ်မုၣ်လၢအမ့ၢ် ပှၤကလုာ်အဂၤတဖၣ်လီၤ.+ အဝဲသ့ၣ်န့ၣ် မ့ၢ်ဝဲ စီၤယိၤစါဒး အဖိခွါစီၤယ့ၤၡူ အဖိခွါတဖၣ်+ ဒီးအဒီပုၢ်ဝဲၢ်ခွါတဖၣ်လီၤ. အဝဲသ့ၣ် အမံၤမ့ၢ်ဝဲ စီၤမၤစ့ယၤ, စီၤအလံၤဧ့စ့ၢ်, စီၤယၤရံၤ ဒီးစီၤကဒါလယၤလီၤ. ၁၉ ဘၣ်ဆၣ် အဝဲသ့ၣ် အၢၣ်လီၤဝဲလၢ အကနီဟးထီၣ်ကွံာ် အမါတဖၣ်အံၤလီၤ. ဒီးမ့ၢ်လၢ အဝဲသ့ၣ် မၤတ့ၢ်တၢ်ဒဲးဘးအဃိ အဝဲသ့ၣ် တဂၤစုာ်စုာ် လုၢ်ထီၣ် သိဖါတဒု လၢအဝဲသ့ၣ် အတၢ်ဒဲးဘး အဂီၢ်လီၤ.+
၂၀ လၢ စီၤအံးမ့ၢ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤဃနၤနံ ဒီးစီၤစဘၤဒယၤလီၤ. ၂၁ လၢ စီၤဃၤရံၣ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤမၤစ့ယၤ, စီၤအ့ၤလံယၤ, စီၤၡမါယၤ, စီၤယဃံအ့လး ဒီးစီၤဧူးစံယါလီၤ. ၂၂ လၢ စီၤပးၡဃူၢ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤအ့လယိနၤ, စီၤမၤစ့ယၤ, စီၤယံးၡမၤဧ့လး, စီၤနၤသန့လး, စီၤယိစဘး ဒီးစီၤအ့လဧစၤလီၤ. ၂၃ လၢ ပှၤလ့ၤဝံဖိတဖၣ် အကျါန့ၣ် ပၣ်ဃုာ်ဒီး စီၤယိစဘး, စီၤၡံမံၤ, စီၤက့လယၤ (မ့ၢ်ဝဲ စီၤက့လံၤတၤ), စီၤပသၤဃယၤ, စီၤယူဒၤ ဒီးစီၤအလံၤဧ့စ့ၢ်လီၤ. ၂၄ လၢ ပှၤသးဝံၣ်တၢ်ဖိတဖၣ် အကျါန့ၣ် ပၣ်ဃုာ်ဒီး စီၤအ့လယၤၡံၣ် ဒီးလၢ ပှၤခိးတြဲၤဖိတဖၣ် အကျါန့ၣ် ပၣ်ဃုာ်ဒီး စီၤၡၤလူၣ်, စီၤတ့လ့ၣ် ဒီးစီၤအူရံၤလီၤ.
၂၅ ဒီးလၢ ပှၤအံၣ်စရ့လးဖိ အကျါန့ၣ် ပၣ်ဃုာ်ဒီး စီၤပးရိာ် အဖိခွါတဖၣ်+ လၢအမ့ၢ် စီၤရၤမယာ်, စီၤယစံယၤ, စီၤမၤလကံယၤ, စီၤမံယမံၣ်, စီၤအလၤဧစၢ်, စီၤမၤလကံယၤ ဒီးစီၤဘနါယၤလီၤ. ၂၆ လၢစီၤဧ့ၤလၣ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤမးတၤနယၤ, စီၤစကၤရယၤ, စီၤယဃံအ့လး,+ စီၤဧၤဘ့းဒံ, စီၤယရၤမိး ဒီးစီၤအ့ၤလံယၤလီၤ. ၂၇ လၢစီၤစးတူၤ အဖိခွါတဖၣ်+ အကျါန့ၣ် ပၣ်ဃုာ်ဒီး စီၤအ့လယိနၤ, စီၤအ့လယၤၡံၣ်, စီၤမးတၤနယၤ, စီၤယရၤမိး, စီၤစၤဘး ဒီးစီၤဧစံစၤလီၤ. ၂၈ လၢစီၤဘ့ဘဲၤ အဖိခွါတဖၣ်+ အကျါန့ၣ် ပၣ်ဃုာ်ဒီး စီၤယိဃၤနာ်, စီၤဃနၤနယၤ, စီၤစးဘဲ ဒီးစီၤဧၤသလဲလီၤ. ၂၉ လၢစီၤဘၤနံ အဖိခွါတဖၣ် အကျါန့ၣ် ပၣ်ဃုာ်ဒီး စီၤမၡူလၣ်, စီၤမးလူး, စီၤဧဒါယၤ, စီၤယၤၡူာ်, စီၤၡအၤလး ဒီးစီၤယရၤမိးလီၤ. ၃၀ လၢစီၤပးဃးမိၤအး အဖိခွါတဖၣ်+ အကျါန့ၣ် ပၣ်ဃုာ်ဒီး စီၤဧၤဒနၤ, စီၤကလၤလး, စီၤဘနါယၤ, စီၤမၤစ့ယၤ, စီၤမးတၤနယၤ, စီၤဘစၤလအ့လး, စီၤဘံနူၤ ဒီးစီၤမနၤၡ့ၤလီၤ. ၃၁ လၢစီၤဃၤရံၣ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤအလံၤဧ့စ့ၢ်, စီၤယၡံယၤ, စီၤမၤလကံယၤ,+ စီၤၡမါယၤ, စီၤစူၤမ့ာ်အိၣ်, ၃၂ စီၤဘံၣ်ယၤမံၣ်, စီၤမးလူး ဒီးစီၤၡမၤရယၤလီၤ. ၃၃ လၢစီၤဃၤၡူၣ် အဖိခွါတဖၣ်+ အကျါန့ၣ် ပၣ်ဃုာ်ဒီး စီၤမးတနဲ, စီၤမးတးသါ, စီၤစၤဘး, စီၤအလံၤဖလ့း, စီၤယရ့မဲၤ, စီၤမနၤၡ့ၤ ဒီးစီၤၡံမံၤလီၤ. ၃၄ လၢစီၤဘၤနံ အဖိခွါတဖၣ် အကျါန့ၣ် ပၣ်ဃုာ်ဒီး စီၤမၤဒဲ, စီၤဧၤမရၣ်, စီၤအူၤအ့လး, ၃၅ စီၤဘနါယၤ, စီၤဘ့ဒယၤ, စီၤကးလူၤ, ၃၆ စီၤဝၤနယၤ, စီၤမရ့မိး, စီၤအ့လယၤၡံၣ်, ၃၇ စီၤမးတၤနယၤ, စီၤမးတနဲ ဒီးစီၤယၤစၤလီၤ. ၃၈ လၢစီၤဘံနူၤ အဖိခွါတဖၣ် အကျါန့ၣ် ပၣ်ဃုာ်ဒီး စီၤၡံမံၤ, ၃၉ စီၤၡလ့မယၤ, စီၤနၤသၣ်, စီၤဧဒါယၤ, ၄၀ စီၤမၤကနၤဒဘဲ, စီၤၡာ်ရဲ, စီၤၡၤရဲ, ၄၁ စီၤဧစၤရ့လး, စီၤၡလ့မယၤ, စီၤၡမၤရယၤ, ၄၂ စီၤၡၤလူၣ်, စီၤအမၤရယၤ ဒီးစီၤယိၤသးလီၤ. ၄၃ လၢစီၤနဘိ အဖိခွါတဖၣ် အကျါန့ၣ် ပၣ်ဃုာ်ဒီး စီၤယံၤအ့လး, စီၤမးတံးသယၤ, စီၤစၤဘး, စီၤစဘံနၤ, စီၤယးဒဲ, စီၤယိၤအ့လး ဒီးစီၤဘနါယၤလီၤ. ၄၄ ပှၤသ့ၣ်တဖၣ်န့ၣ်ခဲလၢာ်န့ၣ် ဆီဟံၣ်ဆီဃီဒီး ပှၤပိာ်မုၣ်လၢ အမ့ၢ် ပှၤကလုာ်အဂၤတဖၣ်+ ဘၣ်ဆၣ် အဝဲသ့ၣ် နီဟးထီၣ်ကွံာ် အဖိအမါတဖၣ်အံၤ ခဲလၢာ်လီၤ.+