ဖံလံးပံၤ

၁ ယၤ, စီၤပီလူး ဒီးစီၤတံၤမသ့း လၢအမ့ၢ် ယ့ၣ်ၡူးခရံာ် အကုၢ်တဖၣ်န့ၣ် ဆှၢလီၤလံာ်အံၤဆူ ပှၤစီဆှံခဲလၢာ် လၢအမ့ၢ် ယ့ၣ်ၡူးခရံာ်အပျဲၢ်အဘီၣ် လၢအအိၣ်လၢ ဝ့ၢ်ဖံလံးပံၤအပူၤ+ လၢအပၣ်ဃုာ်ဒီး ပှၤကွၢ်ထွဲတၢ်တဖၣ် ဒီးတၢ်အိၣ်ဖှိၣ် အပှၤမၤစၢၤတၢ်တဖၣ်အအိၣ်လီၤ.+

၂ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်တက့ၢ်.

၃ ဖဲယသ့ၣ်နီၣ်ထီၣ် သုအခါန့ၣ် ယစံးဘျုး ကစၢ်ယွၤကိးဘျီဒဲးလီၤ. ၄ ဒီးဖဲယဃ့ကညး ကစၢ်ယွၤလၢ သုဝဲကိးဂၤဒဲး အဂီၢ်အခါ ယဃ့ကညးတၢ်လၢ တၢ်သးခုအပူၤကိးဘျီဒဲးလီၤ.+ ၅ ယမၤဒ်န့ၣ်ခီဖျိလၢ သုဆီၣ်ထွဲမၤစၢၤ တၢ်သးခုကစီၣ် စးထီၣ်လၢ သုနၢ်ဟူဘၣ်အီၤ အဆိကတၢၢ်တနံၤ တုၤခဲအံၤအဃိလီၤ. ၆ ကစၢ်ယွၤတဂၤလၢ အစးထီၣ်မၤတၢ်လၢ အဂ့ၤတမံၤအံၤလၢ သုကျါန့ၣ် ယနာ်လၢ အကဆဲးမၤဝဲတုၤလၢ အဝံၤတစု+ ဖဲယ့ၣ်ၡူးခရံာ် အမုၢ်နံၤလီၤ.+ ၇ ယဆိကမိၣ်တၢ် ဘၣ်ဃးဒီး သုကိးဂၤဒဲးဒ်အံၤန့ၣ် မ့ၢ်တၢ်လၢ အကြၢးဝဲဘၣ်ဝဲ, မ့ၢ်လၢ သုအိၣ်လၢယသးပူၤ ဒီးသုဒိးန့ၢ်ဘၣ် ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ် ဒ်သိးဒီးယၤ အဃိလီၤ. ဒီးခဲအံၤ ဖဲပှၤစၢဃာ်ယၤအခါ+ သုဆီၣ်ထွဲယၤလီၤ. ဒီးသုဆီၣ်ထွဲယၤ ဒ်သိးကဒုးအိၣ်ထီၣ် ဒီးမၤဂၢၢ်မၤကျၢၤ ပတၢ်ခွဲးတၢ်ယာ်လၢ ပဒိၣ်အမဲာ်ညါ ဒ်သိးပစံၣ်တဲၤတဲလီၤ တၢ်သးခုကစီၣ် ကန့ၢ်အဂီၢ်လီၤ.+

၈ ယဆၢထံၣ်သုဒိၣ်မး ဒီးယအဲၣ်ဒိး ကဟုကယာ်သု ဒ်ယ့ၣ်ၡူးခရံာ် ကဟုကယာ်သုအသိးန့ၣ် ကစၢ်ယွၤ သ့ၣ်ညါဝဲလီၤ. ၉ ဒီးယဆဲးဃ့ထုကဖၣ်လၢ သုတၢ်အဲၣ်တၢ်ကွံ ကဒံးယံာ်ဒံးဒိၣ်ထီၣ်+ ဃုာ်ဒီးတၢ်သ့ၣ်ညါ လီၤတံၢ်လီၤဆဲး+ ဒီးတၢ်ပဲာ်ထံနီၤဖးတၢ် သ့ဂ့ၤဂ့ၤလီၤ.+ ၁၀ ဒီးယဃ့ထုကဖၣ်လၢ သုကသ့ၣ်ညါနီၤဖး တၢ်လၢအရ့ဒိၣ်ကတၢၢ်တဖၣ်+ ဒ်သိးသုသးကဘျၢ ဒီးဒ်သိးသုသုတကဲထီၣ် တၢ်လီၤဃံၢ်အလီၢ် လၢပှၤဂၤအဂီၢ်တဂ့ၤ+ တုၤလီၤလၢခရံာ်အမုၢ်နံၤလီၤ. ၁၁ ယဃ့ထုကဖၣ်စ့ၢ်ကီးလၢ ခီဖျိယ့ၣ်ၡူးခရံာ် အတၢ်မၤစၢၤအဃိ သုကမၤအါထီၣ် တၢ်မၤလၢအတီအလိၤ*+ လၢကကဲထီၣ် တၢ်လၤကပီၤ ဒီးတၢ်စံးထီၣ်ပတြၢၤလၢ ကစၢ်ယွၤအဂီၢ်လီၤ.

၁၂ ဒီပုၢ်ဝဲၢ်သ့ၣ်ဧၢ, ယအဲၣ်ဒိးလၢ သုကသ့ၣ်ညါလၢ နီၢ်ကီၢ်န့ၣ် ယတၢ်အိၣ်သးအံၤ ကဲထီၣ် တၢ်မၤစၢၤဒ်သိး တၢ်သးခုကစီၣ် ကရၤလီၤအသး အါထီၣ်အဂီၢ်လီၤ. ၁၃ တၢ်စၢဃာ်ယၤလၢ+ ခရံာ်အဃိန့ၣ် ဟူထီၣ်တုၤလၢ သုးဖိကိးဂၤဒဲးလၢ အခိးရိမ့ၤအစီၤပၤ* ဒီးပှၤအဂၤခဲလၢာ် အအိၣ်လီၤ.+ ၁၄ ဒီးဒီပုၢ်ဝဲၢ်အါတက့ၢ် လၢအမၤ ကစၢ်အတၢ်မၤန့ၣ် အသးဆူၣ်ထီၣ်ခီဖျိလၢ တၢ်စၢဃာ်ယၤအဃိလီၤ. ဒီးအဝဲသ့ၣ် စံၣ်တဲၤတဲလီၤ ကစၢ်ယွၤ အကလုၢ်ကထါလၢ တၢ်သးဒူအပူၤ အါန့ၢ်ဒံးလၢညါ ဒီးတပျံၤတၢ် နီတစဲးဘၣ်.

၁၅ မ့ၢ်လီၤ, ပှၤတနီၤနီၤန့ၣ် စံၣ်တဲၤတဲလီၤဝဲခရံာ်အဂ့ၢ် မ့ၢ်လၢအဝဲသ့ၣ် အသးက့ၣ်တၢ် ဒီးအဲၣ်ဒိးပြၢလိာ်သးအဃိလီၤ. ဘၣ်ဆၣ် ပှၤအဂၤတနီၤန့ၣ် မၤဝဲလၢ တၢ်သူၣ်ဘျၢသးဘျၢ အပူၤလီၤ. ၁၆ အဝဲသ့ၣ်န့ၣ် စံၣ်တဲၤတဲလီၤခရံာ်အဂ့ၢ် မ့ၢ်လၢတၢ်အဲၣ်တၢ်ကွံ ထိၣ်ဟူးထိၣ်ဂဲၤထီၣ် အဝဲသ့ၣ်အဃိလီၤ. ဒီးအဝဲသ့ၣ်မၤဝဲဒ်အံၤ မ့ၢ်လၢ အဝဲသ့ၣ်သ့ၣ်ညါဝဲလၢ ကစၢ်ယွၤဃုထၢထီၣ်ယၤလၢ ယကဒီသဒၢ တၢ်သးခုကစီၣ် အဃိလီၤ.+ ၁၇ မ့မ့ၢ်လၢ အဝဲတဒူၣ်န့ၣ် စံၣ်တဲၤတဲလီၤတၢ် ခီဖျိလၢ အသူၣ်က့ၣ်သးက့ၣ်တၢ် အဃိလီၤ. အဝဲသ့ၣ် အသးတဘျၢဘၣ် ဒီးဖဲတၢ်စၢဃာ်ယၤအခါ အဝဲသ့ၣ်အဲၣ်ဒိး မၤအါထီၣ် ယတၢ်ကီတၢ်ခဲတဖၣ်လီၤ. ၁၈ ဘၣ်ဆၣ် တၢ်ကဲထီၣ်အသးဒ်လဲၣ်. လၢတၢ်ပာ်မၤသးအပူၤမ့ၢ်ဂ့ၤ, လၢတၢ်သူၣ်ဘျၢသးဘျၢ အပူၤမ့ၢ်ဂ့ၤ ပှၤစံၣ်တဲၤတဲလီၤ ခရံာ်အဂ့ၢ်လၢ ကျဲကိးဘိဒဲးလီၤ. ယသးခုလၢ တၢ်ဂ့ၢ်အံၤအဃိလီၤ. ဒီးယကဆဲးသးခုဒံး, ၁၉ မ့ၢ်လၢ ယသ့ၣ်ညါလၢ လၢတၢ်ဂ့ၢ်အံၤအဃိ ယကဒိးန့ၢ်ဘၣ် တၢ်အုၣ်က့ၤခီၣ်က့ၤခီဖျိလၢ သုတၢ်ဃ့ကညး+ ဒီးသးစီဆှံလၢ ယ့ၣ်ၡူးခရံာ် ဟ့ၣ်လီၤဝဲန့ၣ် အတၢ်ဆီၣ်ထွဲမၤစၢၤအဃိလီၤ.+ ၂၀ ယနာ်ဒီးယမုၢ်လၢ်လၢ ယတဒိးန့ၢ်ဘၣ် တၢ်မဲာ်ဆှးနီတမံၤဘၣ်. ဒီးယနာ်လၢ ယဆဲးတဲတၢ် ဒူဒူကသ့ ဒီးဒ်လၢညါအသိး ခဲအံၤစ့ၢ်ကီး ယမူမ့ၢ်ဂ့ၤ, ယသံမ့ၢ်ဂ့ၤ ခရံာ်ကဘၣ်တၢ်ဆဲး မၤလၤကပီၤအီၤ ခီဖျိလၢယၤ* လီၤ.+

၂၁ ယၤန့ၣ် ယမ့ၢ်မူန့ၣ် ယမူလၢခရံာ်အဂီၢ်+ ဒီးယမ့ၢ်သံန့ၣ် ဂ့ၤဒိၣ်လၢယဂီၢ်လီၤ.+ ၂၂ ဒီးယမ့ၢ်ဆဲးအိၣ်မူလၢ ယနီၢ်ခိအံၤန့ၣ် အခီပညီယကဆဲးမၤ ယတၢ်မၤလၢ အသၣ်ထီၣ်ဝဲဂ့ၤဂ့ၤ ဘၣ်ဆၣ် ယအဲၣ်ဒိးဃုထၢ ဖဲလဲၣ်တခါလဲၣ်န့ၣ် ယတပာ်ဖျါထီၣ်ဘၣ်. ၂၃ တၢ်ဆီၣ်သနံးယၤလၢ တၢ်ခံခါအံၤအဘၢၣ်စၢၤလီၤ. ယအဲၣ်ဒိး ထူၣ်ဖျဲးထီၣ်ကွံာ်လၢ ယနီၢ်ခိအံၤ ဒီးလဲၤအိၣ်ဒီးခရံာ်လီၤ.+ မ့မ့ၢ်ဒ်န့ၣ်န့ၣ် ကဂ့ၤဒိၣ်ဝဲ သပှၢ်တၢၢ်လီၤ.+ ၂၄ ဘၣ်ဆၣ် ယဆဲးအိၣ်မူလၢ နီၢ်ခိအံၤန့ၣ် မ့ၢ်လၢသုဘျုးအဂီၢ်လီၤ. ၂၅ မ့ၢ်လၢ ယနာ်ဒ်န့ၣ်အဃိ ယသ့ၣ်ညါလၢ ယကဆဲးအိၣ်မူလၢ နီၢ်ခိအံၤ ဒီးယကဆဲးအိၣ်ဒီးသုဝဲခဲလၢာ် ဒ်သိး သုကဒိၣ်ထီၣ်ထီထီၣ် ဒီးသုကသးခုလၢ တၢ်နာ်အပူၤလီၤ. ၂၆ ဒီးဖဲယလဲၤကဒီးလၢ သုအိၣ်အခါ သုတၢ်သးခု ကအါထီၣ် မ့ၢ်လၢ သုမ့ၢ်ယ့ၣ်ၡူးခရံာ် အပျဲၢ်အဘီၣ် အဃိလီၤ.

၂၇ အိၣ်မူ* ဂ့ၤဂ့ၤဘၣ်ဘၣ် ဒ်တၢ်သးခုကစီၣ်လၢ အဘၣ်ဃးဒီးခရံာ် အိၣ်ဝဲအသိးတက့ၢ်.+ သုမ့ၢ်မၤဒ်န့ၣ်န့ၣ် ယမ့ၢ်လဲၤထံၣ်လိာ်သးဒီး သုမ့ၢ်ဂ့ၤ, ယမ့ၢ်တအိၣ်ဒီးသုဘၣ်မ့ၢ်ဂ့ၤ ယကနၢ်ဟူဘၣ်သုဂ့ၢ် ဒီးယကသ့ၣ်ညါဘၣ်လၢ သုဆၢထၢၣ်ဂၢၢ်ကျၢၤလၢ သးတဖျၢၣ်ဃီ, တၢ်ပညိၣ်တမံၤဃီအပူၤ+ ဒီးသုမၤသကိးတၢ် ဃူဃူဖိးဖိး ဒ်သိးသုကဆဲးအိၣ်ဒီး တၢ်နာ်ဘၣ်ဃးဒီး တၢ်သးခုကစီၣ်အဂီၢ်လီၤ. ၂၈ တဘၣ်ပျံၤ သုဒုၣ်သုဒါ နီတဘျီတဂ့ၤ. သုတပျံၤတၢ်ဘၣ်န့ၣ် မ့ၢ်တၢ်အုၣ်သးလၢ အဝဲသ့ၣ် ကတုၤလၢတၢ်ဟးဂီၤ+ ဒီးတၢ်အုၣ်သးလၢ သုကတုၤလၢ တၢ်အုၣ်က့ၤခီၣ်က့ၤလီၤ.+ ဒီးတၢ်အုၣ်သးအံၤ ဟဲဝဲလၢ ကစၢ်ယွၤအအိၣ်လီၤ. ၂၉ တၢ်ဟ့ၣ်လီၤသု တၢ်ခွဲးတၢ်ယာ်လၢ သုကစူၢ်က့ၤနာ်က့ၤခရံာ် တကးဒံးဘၣ် လၢသုကတူၢ်စ့ၢ်ကီး တၢ်နးတၢ်ဖှီၣ်လၢ အဂီၢ်လီၤ.+ ၃၀ တၢ်ကီတၢ်ခဲလၢ သုထံၣ်လၢ ယကွၢ်ဆၢၣ်မဲာ်ဘၣ်အီၤန့ၣ် သုကွၢ်ဆၢၣ်မဲာ်ဘၣ်အီၤ စ့ၢ်ကီးလီၤ.+ ဒီးခဲအံၤ သုနၢ်ဟူဘၣ်လၢ ယကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ်အံၤဒံးလီၤ.