မၤတၢ်

၁၈ ဒီးစီၤပီလူးဟးထီၣ်လၢ ဝ့ၢ်အၤသ့ၣ်​ ဒီးလဲၤတုၤဝဲလၢ ဝ့ၢ်ကရံၣ်သူးလီၤ. ၂ အဝဲထံၣ်ဝဲ စီၤအကူလၤလၢ+ အမ့ၢ်ပှၤယူဒၤဖိလၢ အအိၣ်ဖျဲၣ်ထီၣ်လၢ ပီၣ်တူး အဟီၣ်ကဝီၤ အပူၤလီၤ. အဝဲဒီးအမါ နီၢ်ပြံစကံးလၤန့ၣ်​ ဟဲတုၤသီသီဒံးလီၤ. အဝဲသ့ၣ်​ ဘၣ်ဟးထီၣ်ကွံာ်လၢ ကီၢ်အံၤတလံ မ့ၢ်လၢစီၤပၤကျီၤဒံ ဟ့ၣ်လီၤတၢ်ကလုၢ်လၢ ပှၤယူဒၤဖိကိးဂၤဒဲး ကဘၣ်ဟးထီၣ်ကွံာ်လၢ ဝ့ၢ်ရိမ့ၤပူၤအဃိလီၤ. စီၤပီလူးလဲၤလၢ အဝဲသ့ၣ်အအိၣ်, ၃ ဒီးမ့ၢ်လၢအဝဲသ့ၣ်​ မၤတၢ်မၤတခါဃီဒီးအီၤ လၢအမ့ၢ် တၢ်ဆးဒဲအဃိ အဝဲအိၣ်တမှံၤလၢ အဝဲသ့ၣ်​ အဟံၣ်ပူၤ ဒီးမၤသကိးတၢ်ဒီး အဝဲသ့ၣ်လီၤ.+ ၄ အဝဲဟ့ၣ်​ တၢ်စံၣ်တဲၤတဲလီၤတၢ်လၢ ဘူၣ်ဘျီၣ်အပူၤ+ လၢမုၢ်အိၣ်ဘှံးနံၤ ကိးဘျီဒဲး+ ဒီးထုးန့ၢ်ပှၤယူဒၤဖိ ဒီးပှၤကြံးဖိတဖၣ်​ အသးလီၤ.

၅ စီၤစံလၤ+ ဒီးစီၤတံၤမသ့း+ ဟးထီၣ်လၢ ကီၢ်မၤက့းဒနံ ဒီးဖဲအဝဲသ့ၣ်​ လဲၤတုၤလၢ ဝ့ၢ်ကရံၣ်သူးအခါ စီၤပီလူး ဟ့ၣ်တၢ်ဆၢကတီၢ် ခဲလၢာ်ခဲဆ့ လၢအက စံၣ်တဲၤတဲလီၤ ကစၢ်ယွၤအကလုၢ်ကထါ အဂီၢ်လီၤ. ဒီးလၢပှၤယူဒၤဖိတဖၣ်အကျါန့ၣ်​ အဝဲအုၣ်အသးလၢ ယ့ၣ်ၡူး မ့ၢ်ခရံာ်လီၤ.+ ၆ ဘၣ်ဆၣ်​ အဝဲသ့ၣ်​ ဆဲးထီဒါအီၤ ဒီးဒုၣ်ဒွဲၣ်​ စံးအၢအီၤအဃိ စီၤပီလူးတရုၤလီၤကွံာ် ဟီၣ်ခိၣ်ကမူၣ်လၢ အကူအကၤအလိၤ+ ဒီးတဲအဝဲသ့ၣ်လၢ “သုသွံၣ်​ ကလီၤတီလၢ သုနီၢ်ကစၢ် အခိၣ်လိၤလီၤ.+ မ့မ့ၢ်ယၤဒု ယကဆှီလံ.+ စးထီၣ်ခဲအံၤ ယကလဲၤလၢ ပှၤကလုာ်အဂၤတဖၣ်​ အအိၣ်လီၤ.”+ ၇ အဃိ အဝဲဟးထီၣ်ဝဲဖဲန့ၣ်* ဒီးလဲၤနုာ်လီၤဝဲလၢ စီၤတံတူၤယူစတူး အဟံၣ်လီၤ. အဝဲမ့ၢ်ပှၤလၢ အဘူၣ်ထီၣ်ဘါထီၣ်​ ကစၢ်ယွၤ ဒီးအဟံၣ်န့ၣ်​ အိၣ်ဘူးဒီး ဘူၣ်ဘျီၣ်လီၤ. ၈ ဒီးစီၤကြံစပူး+ လၢအမ့ၢ် ဘူၣ်ဘျီၣ်အခိၣ်​ ဒီးပှၤလၢအအိၣ်​ ဟံၣ်တဖျၢၣ်ဃီဒီးအီၤ ကိးဂၤဒဲးန့ၣ်​ ကဲထီၣ်ပှၤလၢ အစူၢ်က့ၤနာ်က့ၤ ကစၢ်လီၤ. ဒီးပှၤကရံၣ်သူးဖိ အါဂၤလၢ အနၢ်ဟူဘၣ်​ တၢ်သးခုကစီၣ်န့ၣ်​ စူၢ်က့ၤနာ်က့ၤတၢ် ဒီးဒိးဘျၢထံလီၤ. ၉ တကးဒံးဘၣ်​ ဘၣ်တနၤ လၢတၢ်ထံၣ်လၢညါခီအပူၤန့ၣ်​ ကစၢ်တဲ စီၤပီလူးလၢ “ပျံၤတၢ်တဂ့ၤ, ဆဲးစံၣ်တဲၤတဲလီၤတၢ် ဒီးအိၣ်ဘှ့ၣ်တဂ့ၤ. ၁၀ ယအိၣ်ဒီးနၤအဃိ+ ပှၤလၢ အကမၤအၢမၤသီ ဒီးမၤဘၣ်ဒိနၤန့ၣ်​ တအိၣ်နီတဂၤဘၣ်. လၢဝ့ၢ်အံၤအပူၤန့ၣ်​ ယပှၤအိၣ်ဝဲ ဒီဒူၣ်လီၤ.” ၁၁ အဃိ အဝဲအိၣ်ဝဲဖဲန့ၣ်​ တနံၣ်ဒီးဃုလါ ဒီးသိၣ်လိ ယွၤအကလုၢ်ကထါလၢ အဝဲသ့ၣ်​ အကျါလီၤ.

၁၂ ဖဲစီၤကးလံၤအိၣ်​ ကဲပဒိၣ်ဖးဒိၣ်​ လၢအဃါယၤ ကီၢ်ရ့ၣ်အပူၤအခါ ပှၤယူဒၤဖိတဖၣ်​ ပာ်ဖှိၣ်ထီၣ်အသး ဒ်သိးကထီဒါ စီၤပီလူးအဂီၢ် ဒီးလဲၤကိးအီၤလၢ ပှၤစံၣ်ညီၣ်တၢ် အလီၢ်ဆ့ၣ်နီၤ အမဲာ်ညါလီၤ. ၁၃ ဒီးအဝဲသ့ၣ်​ တဲဝဲလၢ “ပှၤတဂၤအံၤ ကွဲန့ၢ်လွဲန့ၢ် ပှၤဂီၢ်မုၢ်ဒ်သိး ကဘူၣ်ထီၣ်ဘါထီၣ်ယွၤလၢ ကျဲလၢ အထီဒါလိာ်သးဒီး တၢ်သိၣ်တၢ်သီလီၤ.” ၁၄ ဘၣ်ဆၣ်​ ဖဲစီၤပီလူး ဘူးကတဲတၢ်အခါ စီၤကးလံၤအိၣ်​ တဲဝဲ ပှၤယူဒၤဖိတဖၣ်လၢ “ပှၤယူဒၤဖိသ့ၣ်ဧၢ, ပှၤတဂၤအံၤ မ့ၢ်မၤတၢ်ကမၣ်​ မ့တမ့ၢ် ထီဒါတၢ်သိၣ်တၢ်သီန့ၣ်​ ယကြၢး ဒိကနၣ်သုလၢ တၢ်ဝံသးစူၤအပူၤလီၤ. ၁၅ ဘၣ်ဆၣ်​ မ့မ့ၢ် တၢ်တဲအါလိာ်သး ဘၣ်ဃးဒီး တၢ်ကတိၤတဖၣ်မ့ၢ်ဂ့ၤ, ပှၤမံၤပှၤသၣ်မ့ၢ်ဂ့ၤ, သုနီၢ်ကစၢ် အတၢ်သိၣ်တၢ်သီမ့ၢ်ဂ့ၤ,+ သုကဘၣ်ကျဲၤလၢ သုနီၢ်ကစၢ်လီၤ. ယတအဲၣ်ဒိး စံၣ်ညီၣ်န့ၢ်သု တၢ်ဂ့ၢ်တဖၣ်န့ၣ်ဘၣ်.” ၁၆ ဒီးအဝဲ နီဟးထီၣ်ကွံာ် အဝဲသ့ၣ်လၢ ပှၤစံၣ်ညီၣ်တၢ် အလီၢ်ဆ့ၣ်နီၤ အမဲာ်ညါလီၤ. ၁၇ အဃိ အဝဲသ့ၣ်ခဲလၢာ် ဖီၣ်ဝဲစီၤစိၤစသ့ၣ်+ လၢအမ့ၢ် ဘူၣ်ဘျီၣ်ခိၣ်အပှၤခၢၣ်စး ဒီးတီၢ်အီၤလၢ ပှၤစံၣ်ညီၣ်တၢ် အလီၢ်ဆ့ၣ်နီၤ အမဲာ်ညါလီၤ. မ့မ့ၢ် စီၤကးလံၤအိၣ်န့ၣ်​ တမၤဘၣ်ထွဲအသးဒီး တၢ်ဂ့ၢ်သ့ၣ်တဖၣ်အံၤ နီတစဲးဘၣ်.

၁၈ ဘၣ်ဆၣ်​ စီၤပီလူး ဆဲးအိၣ်ဖဲန့ၣ်​ တဘျုးသီ ဝံၤအလီၢ်ခံ အဝဲတဲ ဒီပုၢ်ဝဲၢ်တဖၣ်လၢ အကဘၣ်လဲၤတၢ်လီၤ. ဒီးအဝဲ ဒိးထီၣ်ကဘီဃုာ်ဒီး နီၢ်ပြံစကံးလၤ ဒီးစီၤအကူလၤ ဒီးလဲၤဝဲလၢ ကီၢ်စူၤရံလီၤ. ဒီးဒ်စီၤပီလူး မၤတ့ၢ် တၢ်အၢၣ်လီၤအသိး အဝဲတံာ်ဖုၣ်လီၤ အခိၣ်ဆူၣ်လၢ ဝ့ၢ်က့ၣ်ဃရ့းအပူၤလီၤ.+ ၁၉ ဖဲအဝဲသ့ၣ်​ လဲၤတုၤလၢ ဝ့ၢ်အ့းဖ့းစူးအခါ စီၤပီလူးပာ်တ့ၢ် အဝဲသ့ၣ်ဖဲန့ၣ်လီၤ. အဝဲလဲၤနုာ်လီၤလၢ ဘူၣ်ဘျီၣ်ပူၤ ဒီးမၤစၢၤ ပှၤယူဒၤဖိတဖၣ်​ ဒ်သိး ကနၢ်ပၢၢ်ထီၣ်တၢ်အဂီၢ်လီၤ.+ ၂၀ ဒီးအဝဲသ့ၣ်မၢ စီၤပီလူး ဆဲးအိၣ်ဒီးအဝဲသ့ၣ်​ ဘၣ်ဆၣ်​ စီၤပီလူး တတူၢ်လိာ်ဝဲဘၣ်. ၂၁ အဝဲတဲ အဝဲသ့ၣ်လၢ အကဘၣ်လဲၤတၢ် ဒီးတဲအဝဲသ့ၣ်လၢ “မ့ၢ်ဘၣ်​ ယဟိဝၤယွၤ* အသးန့ၣ်​ ယကဟဲက့ၤလၢသုအိၣ်​ လၢခံတဘျီလီၤ.” အဝဲဒိးထီၣ်ကဘီဒီး ဟးထီၣ်ဝဲလၢ ဝ့ၢ်အ့းဖ့းစူး ၂၂ ဒီးလဲၤလီၤလၢ ဝ့ၢ်ကဲၤစါရံၤလီၤ. ဒီးအဝဲလဲၤထီၣ်* ဒီးဆၢဂ့ၤဆၢဝါ တၢ်အိၣ်ဖှိၣ်ဝံၤဒီး လဲၤလီၤဝဲလၢ ဝ့ၢ်အၣ်တံၤအီာ်လီၤ.+

၂၃ အဝဲအိၣ်ဝဲဖဲန့ၣ်​ တတီၤဖိ ဝံၤဒီးလဲၤဝဲလၢ တၢ်လီၢ်တတီၤ ဘၣ်တတီၤ လၢကီၢ်ကလၤတံ ဒီးကီၢ်ဖြူၤကံအပူၤ+ ဒီးဟ့ၣ်ဂံၢ်ဟ့ၣ်ဘါဝဲ ယ့ၣ်ၡူးအပျဲၢ်အဘီၣ်​ ခဲလၢာ်လီၤ.+

၂၄ ဒီးပှၤယူဒၤဖိတဂၤ လၢအမံၤမ့ၢ် စီၤအပီးလိၤ+ လၢအအိၣ်ဖျဲၣ်ထီၣ်ဖဲ ဝ့ၢ်အလ့းစၣ်ဒြူးန့ၣ်​ လဲၤတုၤလၢ ဝ့ၢ်အ့းဖ့းစူးလီၤ. အဝဲမ့ၢ် ပှၤလၢအကလုၢ်သ့ ဒီးနၢၤတၢ်ကွဲးအသးတဖၣ်လီၤ. ၂၅ ပှၤတဂၤအံၤ ဘၣ်တၢ်သိၣ်လိတ့ၢ်အီၤလၢ ယဟိဝၤယွၤ အကျဲ, ဒီးလၢသးစီဆှံအဃိ အသးဆူၣ်ဒိၣ်မး ဒီးအဝဲတဲဝဲဒီး သိၣ်လိဝဲ ယ့ၣ်ၡူးအဂ့ၢ် ဘၣ်လီၤတံၢ်လီၤဆဲးလီၤ. ဘၣ်ဆၣ်​ အဝဲသ့ၣ်ညါဝဲထဲ စီၤယိၤဟၣ်​ အတၢ်ဒိးဘျၢအဂ့ၢ်လီၤ. ၂၆ အဝဲစံၣ်တဲၤတဲလီၤတၢ် ဒူဒူလၢ ဘူၣ်ဘျီၣ်အပူၤ ဒီးဖဲနီၢ်ပြံစကံးလၤ ဒီးစီၤအကူလၤ+ နၢ်ဟူအီၤအခါ အဝဲသ့ၣ်​ က့ၤကိးအီၤ ဒီးတဲနၢ်ပၢၢ်အါထီၣ်အီၤ ကစၢ်ယွၤအကျဲ လီၤတံၢ်လီၤဆဲးလီၤ. ၂၇ ဒီးမ့ၢ်လၢ စီၤအပီးလိၤအဲၣ်ဒိးလဲၤလၢ အဃါယၤ ကီၢ်ရ့ၣ်အဃိ ဒီပုၢ်ဝဲၢ်ခွါတဖၣ်​ ကွဲးလံာ်လၢ ယ့ၣ်ၡူးအပျဲၢ်အဘီၣ်​ လၢအအိၣ်ဖဲန့ၣ်တဖၣ်အအိၣ်​ ဒ်သိး ကဟ့ၣ်သဆၣ်ထီၣ်​ အဝဲသ့ၣ်လၢ ကတူၢ်လိာ်အီၤ ဂ့ၤဂ့ၤအဂီၢ်လီၤ. အဃိ ဖဲအဝဲ လဲၤတုၤဖဲန့ၣ်အခါ အဝဲကဲထီၣ်​ တၢ်မၤစၢၤလၢ ပှၤလၢအစူၢ်က့ၤ နာ်က့ၤတၢ်ခီဖျိ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်တဖၣ်​ အဂီၢ်ဒိၣ်မး, ၂၈ မ့ၢ်လၢ အဝဲပာ်ဖျါထီၣ်လၢ ကမျၢၢ်အမဲာ်ညါလၢ တၢ်သးဆူၣ်အပူၤ လီၤတံၢ်လီၤဆဲးလၢ ပှၤယူဒၤဖိတဖၣ်​ အတၢ်ထံၣ်န့ၣ်​ ကမၣ်ဝဲလီၤ. ဒီးအဝဲဒုးနဲၣ်​ အဝဲသ့ၣ်​ တၢ်ကွဲးအသးတဖၣ်လၢ အပာ်ဖျါထီၣ်ဝဲလၢ ယ့ၣ်ၡူးမ့ၢ်ခရံာ်လီၤ.+