ရိမ့ၤ
၇ ဒီပုၢ်ဝဲၢ်သ့ၣ်ဧၢ, (ယတဲတၢ်ဒီး သုဝဲလၢအသ့ၣ်ညါ စီၤမိၤၡ့ အတၢ်သိၣ်တၢ်သီ) ဖဲပှၤတဂၤ မူဒံးဝဲအဆၢကတီၢ် စီၤမိၤၡ့ အတၢ်သိၣ်တၢ်သီ ကဲကစၢ်လၢ အဖီခိၣ်န့ၣ် မ့ၢ်သုတသ့ၣ်ညါဘၣ်ဧါ. ၂ အဒိ, ပိာ်မုၣ်လၢ အဖျီအသးဝံၤတဂၤန့ၣ် ဖဲအဝၤအိၣ်မူဒံးအခါ တၢ်သိၣ်တၢ်သီ စၢဃာ်အီၤဒီးအဝၤလီၤ. ဘၣ်ဆၣ် အဝၤမ့ၢ်သံန့ၣ် အဝဲထူၣ်ဖျဲးထီၣ်ဝဲလၢ အဝၤအတၢ်သိၣ်တၢ်သီ အဖီလာ်လီၤ.+ ၃ အဃိ ဖဲအဝၤအိၣ်မူဒံးဝဲအခါ အဝဲမ့ၢ်အိၣ်ဃုာ်ဒီး ပိာ်ခွါအဂၤတဂၤန့ၣ် အဝဲမ့ၢ် ပှၤအဲၣ်ဘၢတၢ်လီၤ.+ ဘၣ်ဆၣ် အဝၤမ့ၢ်သံန့ၣ် အဝဲထူၣ်ဖျဲးထီၣ်လၢ အဝၤအတၢ်သိၣ်တၢ်သီ အဖီလာ်အဃိ အဝဲမ့ၢ်ဖျီအသးဒီး ပိာ်ခွါအဂၤတဂၤန့ၣ် အဝဲတမ့ၢ် ပှၤအဲၣ်ဘၢတၢ်ဘၣ်.+
၄ အဃိ ယဒီပုၢ်ဝဲၢ်သ့ၣ်ဧၢ, သုဝဲစ့ၢ်ကီး သုသံသဒၣ်ကွံာ်* စီၤမိၤၡ့ အတၢ်သိၣ်တၢ်သီ ခီဖျိလၢ ခရံာ်အနီၢ်ခိ ဒ်သိးသုကကဲထီၣ် ခရံာ်အတၢ်လီၤ.+ အဝဲဒၣ်မ့ၢ် ပှၤတဂၤလၢ အဘၣ်တၢ်ဒုးဂဲၤဆၢထၢၣ်က့ၤအီၤလၢ တၢ်သံလီၤ.+ အဃိ ခဲအံၤပကြၢး သၣ်ထီၣ်တၤသၣ်အဂ့ၤလၢ ကစၢ်ယွၤအဂီၢ်လီၤ.+ ၅ လၢညါ ဖဲပအိၣ်မူဒ်တၢ်ဖံးတၢ်ညၣ် အတၢ်သူၣ်လီသးကွံ အသိးအခါ စီၤမိၤၡ့ အတၢ်သိၣ်တၢ်သီ ဒုးသ့ၣ်ညါပှၤလၢ တၢ်မိၣ်န့ၢ်သးလီလၢ အကမၣ်တဖၣ်န့ၣ် မၤတၢ်လၢ ပနီၢ်ခိအပူၤလီၤ. တၢ်သ့ၣ်တဖၣ်န့ၣ် ဆှၢပှၤလၢ တၢ်သံလီၤ.*+ ၆ မ့မ့ၢ် ခဲအံၤပထူၣ်ဖျဲးထီၣ်လၢ စီၤမိၤၡ့ အတၢ်သိၣ်တၢ်သီ+ မ့ၢ်လၢပသံသဒၣ်ကွံာ် တၢ်လၢအစၢဃာ်တ့ၢ်ပှၤလီၤ. အဃိ ခဲအံၤ ပကဲထီၣ်ကုၢ်လၢ ကျဲလၢအသီတဘိ ခီဖျိလၢ သးစီဆှံ+ ဒီးတမ့ၢ်ခီဖျိ တၢ်သိၣ်တၢ်သီလၢ အအိၣ်ကွဲးအသး ဒ်လၢညါအသိး အဃိဘၣ်.+
၇ မ့မ့ၢ်ဒ်န့ၣ်န့ၣ် ပကတဲဒ်လဲၣ်. စီၤမိၤၡ့ အတၢ်သိၣ်တၢ်သီန့ၣ် မ့ၢ်တၢ်ဒဲးဘးဧါ. လ့ၤတက့ၤ တမ့ၢ်ဘၣ်. စီၤမိၤၡ့ အတၢ်သိၣ်တၢ်သီ မ့ၢ်တအိၣ်ဘၣ်န့ၣ် ယတသ့ၣ်ညါထီၣ် တၢ်ဒဲးဘးဘၣ်.+ အဒိ, စီၤမိၤၡ့ အတၢ်သိၣ်တၢ်သီ မ့ၢ်တတဲဝဲလၢ “နတဘၣ်သးကွံပှၤတၢ်တဂ့ၤ”+ န့ၣ်ယတသ့ၣ်ညါ တၢ်သူၣ်လီသးကွံဘၣ်. ၈ ဘၣ်ဆၣ် ခီဖျိတၢ်မၤလိာ်အံၤအဃိ တၢ်ဒဲးဘးဃုန့ၢ် တၢ်ခွဲးတၢ်ယာ်ဒ်သိး ကဒုးအိၣ်ထီၣ်တၢ်သူၣ်လီသးကွံ ကိးကလုာ်ဒဲး လၢယပူၤလီၤ. တၢ်သိၣ်တၢ်သီ မ့ၢ်တအိၣ်ဘၣ်န့ၣ် တၢ်ဒဲးဘးတအိၣ်ဒီး တၢ်စိတၢ်ကမီၤဘၣ်.*+ ၉ နီၢ်ကီၢ်န့ၣ် ဖဲတၢ်သိၣ်တၢ်သီ တအိၣ်ဒံးဘၣ်အခါ ယမူလီၤ. ဘၣ်ဆၣ် ဖဲတၢ်မၤလိာ် ဟဲတုၤအခါ တၢ်ဒဲးဘး ဟဲမူထီၣ်ဝဲ ဒီးယသံလီၤ.+ ၁၀ ဒီးတၢ်မၤလိာ်လၢ အကြၢးဆှၢယၤလၢ တၢ်မူန့ၣ်+ ဆှၢယၤလၢ တၢ်သံလီၤ. ၁၁ ခီဖျိတၢ်မၤလိာ်အဃိ တၢ်ဒဲးဘး ဃုန့ၢ် တၢ်ခွဲးတၢ်ယာ် ဒ်သိး ကကွဲန့ၢ်လွဲန့ၢ်ယၤ ဒီးမၤသံယၤလီၤ. ၁၂ ဘၣ်ဆၣ်သနာ်က့ စီၤမိၤၡ့ အတၢ်သိၣ်တၢ်သီန့ၣ် စီဆှံဝဲလီၤ. ဒီးတၢ်မၤလိာ်န့ၣ် စီဆှံဝဲ, တီဝဲလိၤဝဲ ဒီးဂ့ၤဝဲလီၤ.+
၁၃ အဃိ တၢ်လၢအဂ့ၤတမံၤန့ၣ် မၤသံယၤဧါ. လ့ၤတက့ၤ တမ့ၢ်ဘၣ်. တၢ်လၢအမၤသံယၤန့ၣ် မ့ၢ်တၢ်ဒဲးဘးလီၤ. တၢ်လၢအဂ့ၤတမံၤန့ၣ် ပာ်ဖျါထီၣ်ဝဲလၢ တၢ်ဒဲးဘးန့ၣ် မ့ၢ်တၢ်လၢအမၤသံယၤလီၤ.+ အဃိ တၢ်မၤလိာ် ပာ်ဖျါထီၣ်ဝဲလၢ တၢ်ဒဲးဘးန့ၣ် အၢဝဲထဲလဲၣ်န့ၣ်လီၤ.+ ၁၄ ပသ့ၣ်ညါလၢ စီၤမိၤၡ့ အတၢ်သိၣ်တၢ်သီန့ၣ် ဟဲလၢကစၢ်ယွၤ* အအိၣ်လီၤ. ဘၣ်ဆၣ် ယမ့ၢ် သွံၣ်ထံဖံးညၣ်လၢ အဘၣ်တၢ်ဆါလီၤကွံာ်အီၤလၢ တၢ်ဒဲးဘး အအိၣ်လီၤ.+ ၁၅ တၢ်လၢယမၤန့ၣ် ယနၢ်တပၢၢ်ဘၣ်. တၢ်လၢယအဲၣ်ဒိးမၤန့ၣ် ယတမၤအီၤထီဘိဘၣ်. မ့မ့ၢ် တၢ်လၢယသးဟ့န့ၣ် ယမၤအီၤလီၤ. ၁၆ ယတူၢ်လိာ်လၢ စီၤမိၤၡ့ အတၢ်သိၣ်တၢ်သီန့ၣ် ဂ့ၤဝဲလီၤ. ဘၣ်ဆၣ် ယမၤဒံးတၢ်လၢ ယတအဲၣ်ဒိးမၤဘၣ်တဖၣ်လီၤ. ၁၇ အဃိ နီၢ်ကီၢ်န့ၣ် ပှၤလၢအမၤတၢ်သ့ၣ်တဖၣ်အံၤ တမ့ၢ်ယၤဘၣ်. ဘၣ်ဆၣ် အမ့ၢ်ဝဲ တၢ်ဒဲးဘးလၢ အအိၣ်ဝဲလၢ ယပူၤလီၤ.+ ၁၈ ယဲဒၣ်အံၤ ယသ့ၣ်ညါလၢ ယတလၢတပှဲၤဘၣ် ဒီးတၢ်ဂ့ၤတၢ်ဝါတအိၣ်လၢ ယပူၤ* နီတမံၤဘၣ်. ယဆၢမၤတၢ်ဂ့ၤ ဘၣ်ဆၣ် ယမၤထွဲအီၤတန့ၢ်ဘၣ်.+ ၁၉ တၢ်လၢအဂ့ၤလၢ ယအဲၣ်ဒိးမၤန့ၣ် ယတမၤအီၤဘၣ်. မ့မ့ၢ်တၢ်လၢ အအၢလၢ ယတအဲၣ်ဒိးမၤဘၣ်န့ၣ် ယမၤဘၣ်အီၤ တလီၢ်လီၢ်လီၤ. ၂၀ မ့မ့ၢ်ဒ်န့ၣ်န့ၣ် ယမ့ၢ်မၤတၢ်လၢ ယတအဲၣ်ဒိးမၤဘၣ်န့ၣ် ယတမ့ၢ်ပှၤလၢ အမၤဝဲဘၣ်. ဘၣ်ဆၣ် တၢ်ဒဲးဘးလၢယပူၤန့ၣ် မၤဝဲလီၤ.
၂၁ အဃိ တၢ်သိၣ်တၢ်သီလၢ အဒိၣ်စိလၢ ယဖီခိၣ်အိၣ်ဝဲဒ်အံၤလီၤ. ဖဲယအဲၣ်ဒိးမၤ တၢ်လၢအဘၣ်အခါ တၢ်အၢအိၣ်ဒီးယၤလီၤ.+ ၂၂ လၢယသးကံၢ်ပူၤန့ၣ် ယဘၣ်သူၣ်ဘၣ်သး ကစၢ်ယွၤ အတၢ်သိၣ်တၢ်သီ နီၢ်ကီၢ်လီၤ.+ ၂၃ ဘၣ်ဆၣ် ယထံၣ်တၢ်သိၣ်တၢ်သီ အဂၤတခါလၢ အအိၣ်လၢ ယနီၢ်ခိအပူၤ လၢအထီဒါလိာ်သးဒီး တၢ်သိၣ်တၢ်သီလၢ အဒိၣ်စိလၢ ယတၢ်ဆိကမိၣ်တဖၣ် အဖီခိၣ်လီၤ.+ ဒီးအဒုးကဲကုၢ်ယၤလၢ တၢ်ဒဲးဘးအတၢ်သိၣ်တၢ်သီလၢ+ အအိၣ်လၢ ယနီၢ်ခိအပူၤလီၤ. ၂၄ ပှၤလၢအနးသံ ယၤအံၤဧၢ, မ့ၢ်မတဂၤကမၤ ထူၣ်ဖျဲးထီၣ်ကွံာ်ယၤလၢ နီၢ်ခိလၢ အကဆှၢယၤလၢ တၢ်သံအံၤလဲၣ်. ၂၅ ယစံးဘျုးဘၣ် ကစၢ်ယွၤ ခီဖျိလၢ ပကစၢ် ယ့ၣ်ၡူးခရံာ်လီၤ. အဃိ ယကဲကစၢ်ယွၤ အတၢ်သိၣ်တၢ်သီ အကုၢ်လၢ ယတၢ်ဆိကမိၣ်တဖၣ် ဘၣ်ဆၣ် မ့မ့ၢ်လၢယနီၢ်ခိန့ၣ် ယကဲ တၢ်ဒဲးဘးအကုၢ်လီၤ.+