ယၡါယၤ
၃၃ ပှၤမၤဟးဂီၤတၢ်ဖိ လၢအတဘၣ် တၢ်မၤဟးဂီၤအီၤဒံးဘၣ်+
ဒီးပှၤလံၣ်အီၣ်လီအီၣ်တၢ်ဖိ လၢအတဘၣ် တၢ်လံၣ်အီၣ်လီအီၣ်အီၤဒံးဘၣ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ.
ဖဲသု* မၤဟးဂီၤတၢ်ဝံၤအခါ သုကဘၣ် တၢ်မၤဟးဂီၤသုလီၤ.+
ဖဲသုလံၣ်အီၣ်လီအီၣ်တၢ် ဝံၤအခါ သုကဘၣ် တၢ်လံၣ်အီၣ် လီအီၣ်သုလီၤ.
၂ အိ ယဟိဝၤယွၤဧၢ, ပာ်ဖျါထီၣ် တၢ်သးကညီၤလၢ ပဖီခိၣ်တက့ၢ်.+
ပမုၢ်လၢ်တၢ်လၢ နအိၣ်လီၤ.
၃ ဖဲပှၤဂီၢ်မုၢ်တဖၣ် နၢ်ဟူဝဲ နကလုၢ် သီၣ်ဖးဒိၣ်အခါ အဝဲသ့ၣ် ဃ့ၢ်ကွံာ်ဝဲလီၤ.
ဖဲနဆၢထၢၣ်အခါ ပှၤကလုာ်တဖၣ် လီၤပြံလီၤပြါလီၤ.+
၄ ပှၤကပာ်ဖှိၣ်ထီၣ်ဝဲ တၢ်ဖိတၢ်လံၤလၢ သုဂုာ်န့ၢ်တဖၣ်န့ၣ် ဒ်ဒွဲၣ် ပာ်ဖှိၣ်ထီၣ်သးအသိး
ဒီးပှၤကလဲၤသဖှိ ဟံးန့ၢ်အီၤဒ် ဒွဲၣ် သဖှိတၢ် အသိးလီၤ.
၅ မ့ၢ်လၢ ယဟိဝၤယွၤ အိၣ်လၢ တၢ်ထီၣ်ထီအလီၢ်အဃိ
အကဘၣ် တၢ်ပာ်ဒိၣ်ပာ်ထီအီၤလီၤ.
ကစၢ်ယွၤ ကမၤပှဲၤ စံယိၣ်လၢ တၢ်စံၣ်ညီၣ်တီ ဒီးတၢ်တီတၢ်လိၤလီၤ.
၆ အဝဲမ့ၢ်ပှၤလၢ အဟ့ၣ်လီၤ တၢ်ဘံၣ်တၢ်ဘၢ,
တၢ်အုၣ်က့ၤခီၣ်က့ၤဖးဒိၣ်,+ တၢ်ကူၣ်သ့, တၢ်သ့ၣ်ညါ ဒီးတၢ်ပျံၤ ယဟိဝၤယွၤ+
လၢအမ့ၢ် တၢ်လုၢ်ဒိၣ်ပှ့ၤဒိၣ် ဖးဒိၣ်လီၤ.*
၇ ကွၢ်မီၤ, အဝဲသ့ၣ်* အပှၤဒူပှၤဃိၤတဖၣ် ကဟီၣ်ကိးပသူထီၣ်လၢ ကျဲပူၤလီၤ.
အဝဲသ့ၣ် အပှၤတဖၣ်လၢ အဃ့ တၢ်ဃူတၢ်ဖိးန့ၣ် ကဟီၣ်နးမးလီၤ.
၈ ကျဲမုၢ်ဖးဒိၣ်တဖၣ် ဘၣ်တၢ်ပာ်တ့ၢ်ကွံာ်အီၤလံ.
ပှၤတလဲၤတၢ်က့ၤတၢ်လၢ ကျဲမုၢ် ဖးဒိၣ်တဖၣ် အပူၤနီတဂၤဘၣ်.
၉ ကီၢ်ကဟီၣ်ဝဲယၢၤဝဲ* ဒီးကလီၤညွံးလီၤဘဲဝဲလီၤ.
လဘၤနိၣ်ကစၢၢ်ကလိ ကမဲာ်ဆှးဝဲ+ ဒီးကအုၣ်ထီၣ်ဝဲလီၤ.
ၡၤရိၣ်အတၢ်ပျီ ကကဲထီၣ် ဒ်သိးဒီး မဲးမုၢ်ပျီ,
ဘၤၡၣ် ဒီးကစၢၢ်ကၢ်မ့ၤလး ကတရုၤလီၤ အလၣ်တဖၣ်လီၤ.+
၁၁ သုတၢ်ကူၣ်ဒီး တၢ်လၢသုမၤန့ၣ် အဘျုးတအိၣ်ဘၣ် ဒီးအလီၤဂာ် ဒ်သိးဒီး နီၣ်ဃ့ ဒီးလီၢ်ဘိလီၤ.
သုနီၢ်ကစၢ် တၢ်ပာ်သူၣ်ပာ်သး လၢအတဂ့ၤဘၣ်န့ၣ် ကအီၣ်ကွံာ်သု ဒ်မ့ၣ်အူအသိးလီၤ.+
၁၂ ပှၤကကဲထီၣ် ဒ်သိးဒီး လၢၢ်ဝါလၢ ပှၤဒွဲၣ်အူထီၣ်အီၤန့ၣ် အဖၣ်ဆါကမူၣ်လီၤ.
ဒ်တၤဆှုၣ်တၤမဲတဖၣ် လၢပှၤကျီကွံာ်အီၤ အသိးန့ၣ် အဝဲသ့ၣ် ကဘၣ် တၢ်ဒွဲၣ်အူထီၣ်အီၤလၢ မ့ၣ်အူလီၤ.+
၁၃ သုဝဲလၢ အအိၣ်လၢ အယံၤသ့ၣ်ဧၢ, ဒိကနၣ်တၢ်ဂ့ၢ် ဘၣ်ဃးဒီး တၢ်လၢ ယကမၤတက့ၢ်.
ဒီးသုဝဲလၢ အအိၣ်လၢ အဘူးသ့ၣ်ဧၢ, အၢၣ်လီၤတူၢ်လိာ်လၢ ယအိၣ်ဒီး တၢ်စိတၢ်ကမီၤတက့ၢ်.
၁၄ ပှၤတၢ်ဒဲးဘးဖိ လၢအအိၣ်လၢ စံယိၣ်အပူၤန့ၣ် ပျံၤတၢ်ဖုးတၢ်+
ဒီးပှၤလၢအပာ်တ့ၢ်ကွံာ် ကစၢ်ယွၤန့ၣ်* ကနိးကစုာ်ဝဲလီၤ.
အဝဲသ့ၣ် တဲဝဲလၢ ‘တၢ်လီၢ်ဖဲ မ့ၣ်အူအီၣ်တၢ် အိၣ်ဝဲအလီၢ်န့ၣ် ပှၤလၢပကျါ မူဝဲကသ့တဂၤဂၤဧါ.+
ဒီးတၢ်လီၢ်ဖဲ မ့ၣ်အူကဲၤထီၣ်ဆူၣ်ဆူၣ် အိၣ်ဝဲအလီၢ်န့ၣ် ပှၤလၢပကျါ မူဝဲကသ့တဂၤဂၤဧါ.’
၁၅ ပှၤတဂၤလၢ အလဲၤတၢ်လၢ တၢ်တီတၢ်လိၤ အပူၤထီဘိ,+
တဲတၢ်တီတီလိၤလိၤ,+
တတူၢ်လိာ် တၢ်အီၣ်ကျိၣ်အီၣ်စ့ လၢအမ့ၢ် တၢ်လၢအတတီတလိၤဘၣ်,
အဂ့ၢ်လိာ်ဝဲ တၢ်ထီးကျိၣ်ထီးစ့,+
တကနၣ်ဃုာ် တၢ်ကူၣ်လၢ အဘၣ်ဃးဒီး တၢ်လူလီၤပှၤသွံၣ်ဘၣ်
ဒီးအဘံၣ်အမဲာ် ဒ်သိး အသုတထံၣ် တၢ်လၢအအၢတဂ့ၤ အဂီၢ်န့ၣ်
၁၆ ကအိၣ်ဘၣ်လၢ ကစၢၢ်ဖးထီ အလိၤလီၤ.
အတၢ်ပူၤဖျဲးအလီၢ်န့ၣ် ကအိၣ်ဝဲလၢ လၢၢ်ကဆူးလ့ကဆူး လၢအကျၢၤ,
အတၢ်အီၣ်န့ၣ်* ကဘၣ်တၢ်ကတဲာ်ကတီၤန့ၢ်အီၤ
ဒီးအထံကအိၣ်ဝဲ ထီဘိလီၤ.”+
၁၇ ယပှၤဂီၢ်မုၢ်သ့ၣ်ဧၢ, သုကထံၣ် စီၤပၤဖးဒိၣ် တဂၤလီၤ.
သုကထံၣ် ကီၢ်တဘ့ၣ် လၢအအိၣ်ဖးယံၤလီၤ.
၁၈ သုကဆိကမိၣ်ထံက့ၤ တၢ်ပျံၤတၢ်ဖုး လၢသုသးပူၤ
ဒီးသုကသံကွၢ်လၢ “နဲၣ်ရွဲၣ် အိၣ်ဖဲလဲၣ်.
ပှၤလၢအစီၤဝဲ တၢ်ခိတၢ်သွဲ အတယၢၢ်န့ၣ် အိၣ်ဖဲလဲၣ်.+
ဒီးပှၤလၢ အဂံၢ်ဝဲ တၢးတဖၣ်န့ၣ် အိၣ်ဖဲလဲၣ်.”
၁၉ ပှၤဂီၢ်မုၢ်လၢ အလီၤရၢၢ်လီၤစၢၢ်,
ပှၤဂီၢ်မုၢ်လၢ အကျိာ်ကီတလၢ လၢသုကနၢ်ပၢၢ်အီၤအဂီၢ်
ဒီးပှၤအပျ့ၤလၢ အတဲတၢ်ဘုးတာ် လၢသုနၢ်ပၢၢ်အီၤ တသ့ဘၣ်န့ၣ် သုတထံၣ်ဘၣ်အီၤလၢၤဘၣ်.+
၂၀ ကွၢ်ဃီၤဝ့ၢ်စံယိၣ် လၢအမ့ၢ် ဝ့ၢ်လၢပမၤ ပဘူၣ်ဧိၤပွဲဧိၤတဖၣ် လၢအပူၤ န့ၣ်တက့ၢ်.+
သုကထံၣ်ဘၣ် ဝ့ၢ်ယရူၤၡလ့ၣ် ဒ်တၢ်အိၣ်တၢ်ဆိးအလီၢ်လၢ အမုာ်အခုၣ်အသိး
ဒီးအကလီၤဂာ် ဒ်သိးဒီး ဒဲတဖျၢၣ်လၢ တၢ်တသုးအလီၢ် နီတဘျီဘၣ်.+
ဒဲအထးခိၣ်စူတဖၣ်န့ၣ် တဘၣ်တၢ်ထုးထီၣ်ကွံာ်အီၤ နီတဘျီဘၣ်
ဒီးအပျံၤတဖၣ်န့ၣ် တဘၣ်တၢ်မၤတဲာ်ကွံာ်အီၤ နီတဘိဘၣ်.
၂၁ ဖဲန့ၣ်န့ၣ် ယဟိဝၤယွၤ လၢအမ့ၢ် ကစၢ်လၢ အလၤကပီၤဒိၣ်တဂၤန့ၣ်
ကကဲထီၣ် တၢ်ဒီသဒၢ လၢပဂီၢ် ဒ်ထံကျိ ဒီးထံကျိၤဖးလဲၢ် တဖၣ်အသိးလီၤ.
ကဘီဒုးသုးတဖၣ် တလဲၤထီၣ်က့ၤလီၤ ဖဲန့ၣ်ဘၣ်
ဒီးကဘီလၢ အလီၤဘီလီၤမုၢ်တဖၣ် တလဲၤခီဂာ်တၢ် စ့ၢ်ကီးဘၣ်.
၂၂ ယဟိဝၤယွၤမ့ၢ် ပစံၣ်ညီၣ်ကွီၢ်,+
ယဟိဝၤယွၤမ့ၢ် ပှၤလၢ အဟ့ၣ်လီၤပှၤ တၢ်သိၣ်တၢ်သီ,+
ယဟိဝၤယွၤမ့ၢ် ပစီၤပၤ+
ဒီးအဝဲမ့ၢ် ပှၤတဂၤလၢ ကမၤပူၤဖျဲးပှၤလီၤ.+
၂၃ ဒုၣ်ဒါအကဘီ အပျံၤတဖၣ် ကလီၤဃဲၣ် ဒီးလီၤကစဲၤဝဲ,
ယၢ်လၣ် တသလၣ်ထီၣ်အသးဘၣ် ဒီးတၢ်ပၢၤဃာ် ယၢ်ထူၣ် တန့ၢ်လၢၤဘၣ်.
ဖဲန့ၣ်အဆၢကတီၢ် တၢ်လၢပှၤဟဲဂုာ်န့ၢ်ဆူၣ်အီၤ အါအါဂီၢ်ဂီၢ်န့ၣ် ကဘၣ်တၢ်နီၤလီၤအီၤ
ဒီးပှၤလၢ အခီၣ်ဟးဂီၤတဖၣ်ဒၣ်လဲာ် ကန့ၢ်ဘၣ်တၢ် ဒီဒူၣ်လီၤ.+
၂၄ ပှၤလၢအအိၣ်လၢ ကီၢ်ပူၤန့ၣ် ကစၢ်ယွၤ ကပျၢ်ကွံာ် အဝဲသ့ၣ် အတၢ်ကမၣ်လီၤ.+
ဒီးပှၤလၢ အအိၣ်လၢကီၢ်ပူၤန့ၣ် တတဲလၢ “ယဆိးက့” နီတဂၤဘၣ်.+