၁ ကရံၣ်သူး

၈ မ့ၢ်လီၤ, ပဝဲခဲလၢာ်ပအိၣ်ဒီး တၢ်သ့ၣ်ညါလၢ+ အဘၣ်ဃးဒီး တၢ်အီၣ်တၢ်အီလၢ အဘၣ်တၢ်ဟ့ၣ်လုၢ်ထီၣ်အီၤလၢ တၢ်ဂီၤတၢ်ဖှီၣ်တဖၣ် အအိၣ်လီၤ.+ ဘၣ်ဆၣ် တၢ်သ့ၣ်ညါန့ၣ် ဒုးအိၣ်ထီၣ် တၢ်ပာ်ထီၣ်ထီသးလီၤ. မ့မ့ၢ် တၢ်အဲၣ်တၢ်ကွံန့ၣ် ဒုးအိၣ်ထီၣ် တၢ်လဲၤထီၣ်လဲၤထီလီၤ.+ ၂ ပှၤလၢအဆိကမိၣ်ဝဲလၢ အသ့ၣ်ညါ တၢ်တမံၤမံၤလံန့ၣ် နီၢ်ကီၢ် အဝဲတသ့ၣ်ညါ တၢ်ဂ့ၢ်အံၤ ထဲသိးဒီး အကြၢးသ့ၣ်ညါဝဲဘၣ်. ၃ ဘၣ်ဆၣ် ပှၤလၢအအဲၣ်ကစၢ်ယွၤန့ၣ် ကစၢ်ယွၤသ့ၣ်ညါအီၤလီၤ.

၄ ခဲအံၤယကတဲ ဘၣ်ဃးဒီး တၢ်အီၣ်တၢ်အီလၢ အဘၣ်တၢ်ဟ့ၣ်လုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ်န့ၣ်အဂ့ၢ်လီၤ. ပသ့ၣ်ညါလၢ တၢ်ဂီၤတၢ်ဖှီၣ်တဖၣ်အံၤ တမ့ၢ်တၢ်နီတမံၤဘၣ်.+ ဒီးပသ့ၣ်ညါလၢ ကစၢ်ယွၤန့ၣ် အိၣ်ထဲတဂၤဒီး ကစၢ်ယွၤလၢအဂုၤအဂၤ တအိၣ်ဘၣ်.+ ၅ ဒ်ပှၤတဲလၢ ယွၤအိၣ်ဝဲအါဂၤ ဒီးကစၢ်အိၣ်ဝဲအါဂၤအသိးန့ၣ် လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ+ တၢ်လၢပှၤကိးအီၤလၢ ယွၤတဖၣ်အိၣ်ဝဲလီၤ. ၆ မ့မ့ၢ်လၢပဂီၢ်န့ၣ် ကစၢ်ယွၤအိၣ်ဝဲ ထဲတဂၤလီၤ.+ အဝဲမ့ၢ်ပၢ်+ ဒီးတၢ်ခဲလၢာ် ဟဲကဲထီၣ်လၢအီၤ ဒီးပမူလၢအဂီၢ်လီၤ.+ ဒီးကစၢ်အိၣ်ထဲတဂၤလီၤ. အဝဲမ့ၢ်ယ့ၣ်ၡူးခရံာ် လၢတၢ်ခဲလၢာ်ဟဲကဲထီၣ် ခီဖျိလၢအီၤ+ ဒီးပမူခီဖျိလၢ အဝဲအဃိလီၤ.

၇ ဘၣ်ဆၣ် ပှၤတအိၣ်ဒီးတၢ်သ့ၣ်ညါအံၤ ကိးဂၤဒဲးဘၣ်.+ ခီဖျိလၢ ပှၤတနီၤနီၤန့ၣ် လၢညါအဝဲသ့ၣ် မၤဘၣ်ထွဲလိာ်အသးဒီး တၢ်ဂီၤတၢ်ဖှီၣ်အဃိ ဖဲအဝဲသ့ၣ်အီၣ်တၢ်အခါ အဝဲသ့ၣ်ထံၣ်ဝဲ ဒ်တၢ်လၢ ပှၤလုၢ်ထီၣ်အီၤလၢ တၢ်ဂီၤတၢ်ဖှီၣ် အအိၣ်အသိးလီၤ.+ ခီဖျိလၢ အဝဲသ့ၣ်အသးလၢ အသ့ၣ်ညါဒၣ်တၢ်န့ၣ် အဂံၢ်စၢ်ဘါစၢ်အဃိ အပာ်တၢ်ကမၣ်လၢ အနီၢ်ကစၢ်အလိၤလီၤ.+ ၈ တၢ်အီၣ်တၢ်အီန့ၣ် တမၤဘူးထီၣ်ပှၤဒီး ကစၢ်ယွၤဘၣ်.+ ပမ့ၢ်တအီၣ်ဘၣ်န့ၣ် ပတၡူနီတမံၤဘၣ်. ဒီးပမ့ၢ်အီၣ်န့ၣ် ပတဒိးန့ၢ်အါထီၣ်အဘျုး နီတမံၤဘၣ်.+ ၉ ပလီၢ်သုသးတက့ၢ်. သုမ့ၢ်အိၣ်ဒီးတၢ်သဘျ့လၢ သုကဃုထၢတၢ်ဒၣ်လဲာ် မ်အသုတကဲထီၣ် တၢ်လီၤဃံၢ်အလီၢ်လၢ ပှၤလၢအဂံၢ်စၢ်ဘါစၢ်တဖၣ် အဂီၢ်တဂ့ၤ.+ ၁၀ နမ့မ့ၢ်ပှၤလၢအအိၣ်ဒီး တၢ်သ့ၣ်ညါတဂၤ ဒီးပှၤလၢအဂံၢ်စၢ်ဘါစၢ်တဂၤဂၤ မ့ၢ်ထံၣ် နအီၣ်တၢ်လၢ တၢ်လုၢ်ဟံၣ်လၢ ပှၤဘါထီၣ် တၢ်ဂီၤတၢ်ဖှီၣ်အပူၤန့ၣ် အသးလၢအသ့ၣ်ညါဒၣ်တၢ် ကဒူထီၣ်တုၤဒၣ်လဲာ် အကအီၣ်တၢ်အီၣ်လၢ ပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ် တမ့ၢ်ဘၣ်ဧါ. ၁၁ မ့ၢ်လၢ နတၢ်သ့ၣ်ညါအဃိ နဒီပုၢ်ဝဲၢ်လၢ အဂံၢ်စၢ်ဘါစၢ်တဂၤ လၢခရံာ်တူၢ်သံအသး လၢအဂီၢ်အံၤန့ၣ် ကဘၣ်ဒိဝဲလီၤ.+ ၁၂ သုမ့ၢ်မၤကမၣ် သုဒီပုၢ်ဝဲၢ်တဖၣ် လၢကျဲဒ်အံၤ ဒီးမၤဘၣ်ဒိ အဝဲသ့ၣ်အသးလၢ အသ့ၣ်ညါဒၣ်တၢ် လၢအဂံၢ်စၢ်ဘါစၢ်န့ၣ်+ မ့ၢ်ဒၣ်သုမၤကမၣ် ခရံာ်လီၤ. ၁၃ အဃိ ဒ်သိးယသုတမၤလီၤဃံၢ် ယဒီပုၢ်ဝဲၢ်တဂ့ၤအဂီၢ် တၢ်အီၣ်မ့ၢ်ကဲထီၣ် တၢ်လီၤဃံၢ်အလီၢ်လၢ ယဒီပုၢ်ဝဲၢ်အဂီၢ်န့ၣ် ယတအီၣ် တၢ်ဖံးတၢ်ညၣ် နီတစဲးလၢၤဘၣ်.+