လူၤကၣ်

၅ ဘၣ်တနံၤ ဖဲယ့ၣ်ၡူးဆၢထၢၣ်လၢ ကံးန့ၤရ့သးအနိၣ်*+ ကပၤအခါ ပှၤဂီၢ်မုၢ်တဖၣ်​ ဆီၣ်သနံးလိာ်အသး ဒ်သိး ကလဲၤဘူးထီၣ်ဒီးယ့ၣ်ၡူး ဒီးဒိကနၣ်​ ကစၢ်ယွၤ အကလုၢ်ကထါ အဂီၢ်လီၤ. ၂ ဒီးယ့ၣ်ၡူးထံၣ်ဝဲ ချံခံဘ့ၣ်​ အိၣ်လၢနိၣ်ကပၤ ဒီးမ့မ့ၢ် ပှၤမၤညၣ်ဖိတဖၣ်န့ၣ်​ တအိၣ်လၢချံအပူၤလၢၤဘၣ်​ ဒီးအဝဲသ့ၣ်သ့အစၤလီၤ.*+ ၃ အဝဲလဲၤထီၣ်လၢ စီၤၡံမိၣ်အချံပူၤ ဒီးမၢအသုးယံၤထီၣ်အချံဒီး ကၢၢ်ကပၤတစဲးလီၤ. ဒီးယ့ၣ်ၡူး အိၣ်လၢချံပူၤဒီး ဆ့ၣ်နီၤသိၣ်လိဝဲ ပှၤဂီၢ်မုၢ်တဖၣ်လီၤ. ၄ ဖဲယ့ၣ်ၡူး သိၣ်လိတၢ်ဝံၤ အလီၢ်ခံ အတဲ စီၤၡံမိၣ်လၢ “သုးဃီၤချံဆူထံယိာ် ဒီးကွံာ်လီၤသုစၤ ဒ်သိးသုကဖီၣ်ညၣ်အဂီၢ် တက့ၢ်.” ၅ စီၤၡံမိၣ်​ တဲဆၢက့ၤအီၤလၢ “သရၣ်ဧၢ, ပဂုာ်ကျဲးစၢးဒီတနၤလံ ဘၣ်ဆၣ်​ ပတမၤန့ၢ် တၢ်နီတမံၤဘၣ်.+ သနာ်က့ ဒ်နတဲအသိး ယကကွံာ်လီၤစၤလီၤ.” ၆ အဝဲသ့ၣ်​ ကွံာ်လီၤစၤ ဒီးမၤန့ၢ်ဝဲညၣ်အါမး တုၤဒၣ်လဲာ် အစၤညာ်ဝဲလီၤ.+ ၇ အဃိ အဝဲသ့ၣ်​ ဝၢ်ဃီၤအစုလၢ အသကိးတဖၣ်လၢ အအိၣ်လၢ ချံအဂၤတဘ့ၣ်အအိၣ်​ ဒ်သိးကဟဲမၤစၢၤ အဝဲသ့ၣ်​ အဂီၢ်လီၤ. ဒီးအဝဲသ့ၣ်​ ထၢနုာ်ဝဲညၣ်လၢ ချံခံဘ့ၣ်န့ၣ်အပူၤ တုၤလၢအပှဲၤ ဒီးဘူးကလီၤဘျၢဝဲလီၤ. ၈ ဖဲစီၤၡံမိၣ်ပ့းတရူး ထံၣ်ဘၣ်ဝဲ ဒ်န့ၣ်အခါ အဝဲချံးလီၤအခီၣ်လၢ ယ့ၣ်ၡူးအမဲာ်ညါ ဒီးတဲဝဲလၢ “ကစၢ်ဧၢ, ယမ့ၢ် ပှၤတၢ်ဒဲးဘးဖိအဃိ ဟးထီၣ်ကွံာ်လၢ ယအိၣ်တက့ၢ်.” ၉ မ့ၢ်လၢ စီၤၡံမိၣ်​ ဒီးပှၤလၢ အအိၣ်ဒီးအီၤတဖၣ်​ မၤန့ၢ်ဝဲ ညၣ်အါမးအဃိ အဝဲသ့ၣ်​ ကမၢကမၣ်ဝဲဒိၣ်မးလီၤ. ၁၀ စီၤၡံမိၣ်​ အပှၤမၤသကိးတၢ် လၢအမ့ၢ် စီၤယၤကိာ် ဒီးစီၤယိၤဟၣ်စ့ၢ်ကီး ကမၢကမၣ်ဝဲလီၤ. အဝဲသ့ၣ်မ့ၢ်ဝဲ စီၤစ့းဘ့းဒဲ အဖိခွါတဖၣ်လီၤ.+ ဘၣ်ဆၣ်​ ယ့ၣ်ၡူးတဲ စီၤၡံမိၣ်လၢ “ပျံၤတၢ်လၢၤတဂ့ၤ. စးထီၣ်ခဲအံၤ နကဃုပှၤကညီ ဒ်နဖီၣ်န့ၢ်ညၣ်အသိးလီၤ.”+ ၁၁ အဃိ အဝဲသ့ၣ်​ ဟဲက့ၤဝၢ်အချံလၢ ထံကၢၢ်နံၤ ဒီးပာ်တ့ၢ်ကွံာ်တၢ်ခဲလၢာ် ဒီးပိာ်ထီၣ်​ ယ့ၣ်ၡူးအခံလီၤ.+

၁၂ ဘၣ်တဘျီ ဖဲယ့ၣ်ၡူးအိၣ်လၢ ဝ့ၢ်တဝ့ၢ်အပူၤအခါ ပှၤတဂၤလၢ တၢ်ဆါအၢအီၣ်အီၤ နးမးန့ၣ်​ အိၣ်ဝဲဖဲန့ၣ်လီၤ. ဖဲအဝဲထံၣ်​ ယ့ၣ်ၡူးအခါ အဝဲထိၣ်လီၤပှီၤအသး ဒီးဃ့ကညးအီၤလၢ “ကစၢ်ဧၢ, ယသ့ၣ်ညါလၢ နသးမ့ၢ်အိၣ်​ မၤကဆှီထီၣ်က့ၤယၤန့ၣ်​ နမၤသ့လီၤ.”+ ၁၃ အဃိ ယ့ၣ်ၡူး ယူာ်ဃီၤအစု, ထိးအီၤ ဒီးတဲဝဲလၢ “ယသးအိၣ်ဝဲသၢၤ. မ်နကဆှီထီၣ်က့ၤတက့ၢ်.” ဒီးအတၢ်ဆါအၢန့ၣ်​ လီၤမၢ်ကွံာ်ဝဲ တဘျီဃီလီၤ.+ ၁၄ ယ့ၣ်ၡူး မၤလိာ်အီၤလၢ အတဘၣ်တဲဘၣ်​ ပှၤနီတဂၤဘၣ်. ဒီးယ့ၣ်ၡူး တဲဝဲလၢ “လဲၤပာ်ဖျါထီၣ်​ နသးလၢ ပှၤလုၢ်တၢ်ဒိၣ်အအိၣ်​ ဒီးလုၢ်ထီၣ်တၢ်လုၢ်ဒ် စီၤမိၤၡ့ မၤလိာ်ဝဲအသိးနီၤ.+ နမ့ၢ်မၤ ဒ်န့ၣ်န့ၣ်​ ကကဲထီၣ်​ တၢ်အုၣ်အသးလၢ အဝဲသ့ၣ်အဂီၢ်လၢ နကဆှီထီၣ်က့ၤလံ.”+ ၁၅ ဘၣ်ဆၣ်​ ယ့ၣ်ၡူးအဂ့ၢ် ဟူထီၣ်သါလီၤဝဲဝးဝး ဒီးပှၤဂီၢ်မုၢ်ဖးဒိၣ်တဖၣ်​ ဟဲအိၣ်ဖှိၣ်ဝဲ ဒ်သိးကဒိကနၣ်တၢ် ဒီးဒ်သိးအတၢ်ဆါ ကဘျါက့ၤအဂီၢ်လီၤ.+ ၁၆ ဒီးအဝဲလဲၤဝဲလၢ တၢ်လီၢ်လၢ ပှၤတအိၣ်နီတဂၤဘၣ်​ အလီၢ် ခဲအံၤခဲအံၤ ဒ်သိး ကဃ့ထုကဖၣ်တၢ် အဂီၢ်လီၤ.

၁၇ ဘၣ်တနံၤ ဖဲယ့ၣ်ၡူး သိၣ်လိတၢ်အခါ ပှၤဖၤရံၤၡဲ ဒီးသရၣ်တဖၣ်လၢ အသိၣ်လိ စီၤမိၤၡ့ အတၢ်သိၣ်တၢ်သီန့ၣ်​ ဆ့ၣ်နီၤဝဲဖဲန့ၣ်လီၤ. အဝဲသ့ၣ်​ အိၣ်ဟဲလၢ သဝီကိးဖျၢၣ်ဒဲးလၢ အအိၣ်လၢ ကၤလံၤလါ ဒီးယူဒၤအဟီၣ်ကဝီၤအပူၤ ဒီးလၢ ဝ့ၢ်ယရူၤၡလ့ၣ်အပူၤလီၤ. ဒီးယဟိဝၤယွၤ* အစိကမီၤ အိၣ်ဒီးယ့ၣ်ၡူး ဒ်သိး ကမၤဘျါက့ၤတၢ် အဂီၢ်လီၤ.+ ၁၈ ဖဲန့ၣ်အခါ ပှၤဟဲစိာ်ဝဲ ပှၤလၢ အစုလီၤဘျ့ခီၣ်လီၤဘျ့တဂၤလၢ လီၢ်မံပူၤ ဒီးအဝဲသ့ၣ်​ ဂုာ်ကျဲးစၢးနုာ်လီၤ ဒ်သိး ကပာ်လီၤအီၤလၢ ယ့ၣ်ၡူးအမဲာ်ညါလီၤ.+ ၁၉ ဘၣ်ဆၣ်​ မ့ၢ်လၢ ပှၤဂီၢ်မုၢ်တဖၣ်အဃိ အဝဲသ့ၣ်​ ဃုကျဲလၢ ကလဲၤစိာ်နုာ်အီၤအဂီၢ် တဘၣ်ဘၣ်. အဃိ အဝဲသ့ၣ်​ ထီၣ်လၢဟံၣ်ခိၣ်​ ဒီးမၤဖျိဟံၣ်ခိၣ်​ ဒီးစဲၤလီၤအီၤလၢ လီၢ်မံအလိၤ လၢပှၤကျါ လၢယ့ၣ်ၡူးအမဲာ်ညါလီၤ. ၂၀ ဖဲယ့ၣ်ၡူး ထံၣ်ဘၣ်ဝဲလၢ အဝဲသ့ၣ်​ အိၣ်ဒီးတၢ်နာ်အခါ အတဲဝဲလၢ “ခွါဧၢ, နတၢ်ဒဲးဘး ပျၢ်လံ.”+ ၂၁ ဖဲန့ၣ်ပှၤကွဲးလံာ်ဖိ ဒီးပှၤဖၤရံၤၡဲတဖၣ်​ ဆိကမိၣ်ထီၣ်ဝဲလၢ “ပှၤလၢ အကတိၤထီဒါ ကစၢ်ယွၤဘူၣ်တဂၤအံၤ မ့ၢ်မတဂၤလဲၣ်. ပှၤပျၢ်တၢ်ဒဲးဘး တသ့နီတဂၤဘၣ်, သ့ဒၣ်ထဲ ကစၢ်ယွၤတဂၤလီၤ တမ့ၢ်ဧီၤ.”+ ၂၂ ဘၣ်ဆၣ်​ ယ့ၣ်ၡူးသ့ၣ်ညါ အဝဲသ့ၣ်​ အတၢ်ဆိကမိၣ်အဃိ တဲဆၢအဝဲသ့ၣ်လၢ “ဘၣ်မနုၤအဃိ သုဆိကမိၣ်တၢ်ဒ်န့ၣ်​ လၢသုသးပူၤလဲၣ်. ၂၃ နမ့ၢ်တဲလၢ ‘နတၢ်ဒဲးဘး ပျၢ်လံ’ မ့တမ့ၢ် ‘ဂဲၤဆၢထၢၣ်​ ဟးတက့ၢ်’ န့ၣ်​ ကညီဒိၣ်​ ဖဲလဲၣ်တခါလဲၣ်. ၂၄ ဘၣ်ဆၣ်​ ဒ်သိး သုကသ့ၣ်ညါလၢ ပှၤကညီဖိခွါအံၤ အိၣ်ဒီးတၢ်စိတၢ်ကမီၤလၢ ကပျၢ်တၢ်ဒဲးဘး လၢဟီၣ်ခိၣ်ချၢအဂီၢ်—” ဒီးအဝဲတဲဘၣ်​ ပှၤလၢ အစုလီၤဘျ့ခီၣ်လီၤဘျ့တဂၤန့ၣ်လၢ “ယကတဲနၤ, ဂဲၤဆၢထၢၣ်, စိာ်ထီၣ်နလီၢ်မံ ဒီးက့ၤလၢ နဟံၣ်နီၤ.”+ ၂၅ ဒီးပှၤလၢ အစုလီၤဘျ့ခီၣ်လီၤဘျ့တဂၤန့ၣ်​ ဂဲၤဆၢထၢၣ်လၢ အဝဲသ့ၣ်အမဲာ်ညါ, စိာ်ထီၣ်အလီၢ်မံ, က့ၤဝဲလၢအဟံၣ်​ ဒီးမၤလၤကပီၤ ကစၢ်ယွၤလီၤ. ၂၆ ဒီးပှၤခဲလၢာ် ကမၢကမၣ်ဝဲ ဒီးမၤလၤကပီၤ ကစၢ်ယွၤလီၤ. အဝဲသ့ၣ်​ ပျံၤတၢ်ဖုးတၢ် ဒီးတဲဝဲလၢ “တနံၤအံၤ ပထံၣ်ဘၣ်တၢ်လၢ အလီၤလိၢ်လီၤလးတဖၣ်လီၤ.”

၂၇ ဝံၤဒီးယ့ၣ်ၡူးဟးထီၣ်​ ဒီးထံၣ်ဝဲစီၤလ့ၤဝံ လၢအမ့ၢ် ပှၤထၢတၢ်ခိတၢ်သွဲဖိတဂၤ ဆ့ၣ်နီၤလၢ တၢ်ခိတၢ်သွဲအရူလီၤ. ဒီးယ့ၣ်ၡူး တဲအီၤလၢ “ဟဲပိာ်ယခံတက့ၢ်.”+ ၂၈ အဃိ အဝဲပာ်တ့ၢ်ကွံာ် တၢ်ခဲလၢာ် ဒီးဂဲၤဆၢထၢၣ်ပိာ်ထီၣ်အခံလီၤ. ၂၉ ဒီးစီၤလ့ၤဝံ မၤဝဲတၢ်အီၣ်အမူးဖးဒိၣ်​ လၢအဟံၣ်ပူၤ လၢယ့ၣ်ၡူးအဂီၢ်လီၤ. ဖဲန့ၣ်န့ၣ်​ ပှၤထၢတၢ်ခိတၢ်သွဲဖိ အါဂၤ ဒီးပှၤအဂၤတဖၣ်​ ဟဲအီၣ်တၢ်ဒီး အဝဲသ့ၣ်လီၤ.+ ၃၀ ဖဲန့ၣ်အခါ ပှၤဖၤရံၤၡဲ ဒီးအပှၤကွဲးလံာ်ဖိတဖၣ်​ ကဒူးကဒ့ၣ်ဝဲ ယ့ၣ်ၡူးအပျဲၢ်အဘီၣ်တဖၣ်​ ဒီးတဲဝဲလၢ “ဘၣ်မနုၤအဃိ သုအီၣ်တၢ်အီတၢ်ဒီး ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိတဖၣ်လဲၣ်.”+ ၃၁ ယ့ၣ်ၡူးတဲဆၢက့ၤ အဝဲသ့ၣ်လၢ “ပှၤလၢ အအိၣ်ဆူၣ်အိၣ်ချ့န့ၣ်​ တလိၣ်ဘၣ်​ ကသံၣ်သရၣ်ဘၣ်. ဘၣ်ဆၣ်​ ပှၤလၢ အဆိးက့တဖၣ်​ လိၣ်ဘၣ်ဝဲလီၤ.+ ၃၂ ယဟဲကိးက့ၤ ပှၤတၢ်ဒဲးဘးဖိ ဒ်သိး ကပီၢ်ယၢ်လီၤက့ၤအသး အဂီၢ်,+ တမ့ၢ် ယဟဲကိးက့ၤ ပှၤတီပှၤလိၤဘၣ်.”

၃၃ အဝဲသ့ၣ်​ တဲအီၤလၢ “စီၤယိၤဟၣ်​ အပျဲၢ်အဘီၣ်တဖၣ်​ ဒုၣ်တၢ်အီၣ်​ တလီၢ်လီၢ်ဒီး ဃ့ထုကဖၣ်တၢ် ဆူၣ်ဆူၣ်​ ဒီးပှၤဖၤရံၤၡဲ အပျဲၢ်အဘီၣ်တဖၣ်စ့ၢ်ကီး မၤဝဲဒ်န့ၣ်လီၤ. ဘၣ်ဆၣ်​ နပျဲၢ်နဘီၣ်တဖၣ်န့ၣ်​ အီၣ်တၢ်အီတၢ်လီၤ.”+ ၃၄ ယ့ၣ်ၡူး တဲအဝဲသ့ၣ်လၢ “ဖဲတလးမူးပိာ်ခွါ အိၣ်ဒံးဒီး အသကိးတဖၣ်အခါ နမၢ အသကိးတဖၣ်​ ဒုၣ်တၢ်အီၣ်ကန့ၢ်ဧါ. ၃၅ ဘၣ်ဆၣ်​ တၢ်ဆၢကတီၢ်လၢ တၢ်ကဟံးထီၣ်ကွံာ် တလးမူးပိာ်ခွါလၢ အဝဲသ့ၣ်အအိၣ်န့ၣ်​ ကဟဲဝဲလီၤ.+ ဖဲန့ၣ်အခါ အဝဲသ့ၣ်​ ကဒုၣ်တၢ်အီၣ်လီၤ.”+

၃၆ ယ့ၣ်ၡူးဟ့ၣ်​ အဝဲသ့ၣ်​ တၢ်အဒိတခါလၢ “ပှၤတတံာ်န့ၢ် ဆ့ကၤအသီတက့ ဒီးဆးကျးထီၣ်အီၤလၢ ဆ့ကၤအလီၢ်လံၤ အလိၤနီတဂၤဘၣ်. အမ့ၢ်မၤဝဲဒ်န့ၣ်န့ၣ်​ တၢ်ကံးညာ်အသီ ကထုးညာ်အီၤ ဒီးတၢ်ကံးညာ်အသီအံၤ ကဖျါလီၤဆီဒီး ဆ့ကၤအလီၢ်လံၤလီၤ.+ ၃၇ ဒီးပှၤတထၢနုာ် စပံးထံအသီလၢ ထၢၣ်တၢ်ဖံး အလီၢ်လံၤအပူၤ နီတဂၤဘၣ်. ပှၤမ့ၢ်မၤဒ်န့ၣ်န့ၣ်​ စပံးထံအသီအံၤ ကမၤပိၢ်ဖးဝဲ ထၢၣ်တၢ်ဖံး ဒီးစပံးထံကလီၤဆံၣ်​ ဒီးထၢၣ်န့ၣ်​ ကဟးဂီၤဝဲလီၤ. ၃၈ စပံးထံအသီန့ၣ်​ ပှၤကဘၣ်​ ထၢနုာ်အီၤလၢ ထၢၣ်တၢ်ဖံးအသီအပူၤလီၤ. ၃၉ ပှၤလၢ အအီစပံးထံအလီၢ်လံၤန့ၣ်​ တဲဝဲလၢ ‘တၢ်အလီၢ်လံၤန့ၣ်​ ဝံၣ်ဝဲလီၤ.’ ဒီးအဝဲ တအဲၣ်ဒိးအီ စပံးထံအသီလၢၤဘၣ်.”