စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ. ဒ် “ဖီဒ့ၣ်ညါတဖၣ်” အသီၣ်အိၣ်ဝဲအသိး.
၆၉ အိ ကစၢ်ယွၤဧၢ, ထံဒိၣ်ထီၣ်တုၤလၢ ယဘူးကလီၤအုးလံ အဃိ မၤပူၤဖျဲးယၤတက့ၢ်.+
၂ ယလီၤဘျၢလၢ ကပံာ်ယိာ်အကျါ ဖဲဟီၣ်ခိၣ်ကိၤတအိၣ်ဘၣ်အလီၢ်လီၤ.+
ယလဲၤတုၤလၢ ထံယိာ်ပူၤ
ဒီးထံကျိဖိလၢ အယွၤလီၤဆူၣ်ဆူၣ်န့ၣ် ဆီၣ်ဖျိးယၤလံ.+
၃ တၢ်ဘှံးယသးလၢ ယကိးထီၣ်တၢ်အဃိ+
ဒီးယကလုၢ်ဘံးလၢာ်လံ.
ဖဲယအိၣ်ခိး ယကစၢ်ယွၤအခါ ယမဲာ်ချံ ကဒုလီၤလၢာ်လံ.+
ယဒုၣ်ယဒါလၢ အလံၣ်တၢ်လီတၢ်တဖၣ်
လၢအအဲၣ်ဒိး မၤဟးဂီၤယၤန့ၣ် ခဲအံၤအိၣ်ဝဲဒီဒူၣ်.
တၢ်လၢ ယတဟုၣ်အီၤဘၣ်န့ၣ် အဝဲသ့ၣ် မၢဆူၣ်ယၤလၢ ယကဟ့ၣ်လီၤကွံာ်အီၤလီၤ.
၅ အိ ကစၢ်ယွၤဧၢ, တၢ်လၢယမၤနါစိၤတဖၣ်န့ၣ် နသ့ၣ်ညါလီၤ.
ဒီးယတၢ်ကမၣ်အိၣ်ဒ်လဲၣ်န့ၣ် နသ့ၣ်ညါလီၤ.
၆ အိ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤဧၢ,
ပှၤလၢ အမုၢ်လၢ်တၢ်လၢနၤန့ၣ် မ်အဝဲသ့ၣ် သုတထံၣ်ဘၣ် တၢ်မဲာ်ဆှး လၢယဃိတဂ့ၤ.
အိ အံၣ်စရ့လး အကစၢ်ယွၤဧၢ,
ပှၤလၢ အဃုနၤန့ၣ် မ်အဝဲသ့ၣ် သုတဘၣ် တၢ်မၤမဲာ်ဆှးအီၤ လၢယဃိတဂ့ၤ.
၈ ယကဲထီၣ် ပှၤလၢယဒီပုၢ်ဝဲၢ်တဖၣ် တသ့ၣ်ညါဝဲဘၣ်
ဒီးပှၤထံဂၤကီၢ်ဂၤဖိတဂၤလၢ ယဒီပုၢ်ဝဲၢ်ခွါတဖၣ် အဂီၢ်လီၤ.+
၉ တၢ်သးဆူၣ်လၢ နဟံၣ်အဂီၢ်န့ၣ် အိၣ်ပှဲၤလၢယပူၤလီၤ.+
တၢ်ဒုၣ်ဒွဲၣ်တဖၣ်လၢ ပှၤဒုၣ်ဒွဲၣ်နၤန့ၣ် လီၤဘၣ်လၢယလိၤလီၤ.+
၁၀ ဖဲယပာ်ဖျါထီၣ် တၢ်ဆီၣ်လီၤသး ဒီးဒုၣ်တၢ်အီၣ်အခါ
ပှၤဒုၣ်ဒွဲၣ်စံးအၢယၤလီၤ.
၁၁ ဖဲယကၤထီၣ် ထၢၣ်တၢ်ကံးညာ်* အခါ
အဝဲသ့ၣ် တဲဆဲးအဲးယၤလီၤ.
၁၂ ပှၤလၢ အဆ့ၣ်နီၤလၢ ဝ့ၢ်အတြဲၤန့ၣ် တဲသကိးယဂ့ၢ်
ဒီးပှၤမူၤသံးဖိတဖၣ် ထုးထီၣ်တၢ်သးဝံၣ်တဖၣ် ဘၣ်ဃးဒီးယၤလီၤ.
၁၃ ဘၣ်ဆၣ် ယဟိဝၤယွၤဧၢ, ယကဃ့ထုကဖၣ် လၢနအိၣ်
ဖဲနတူၢ်လိာ် ယတၢ်ထုကဖၣ်ကဲဝဲ အဆၢကတီၢ်လီၤ.+
အိ ကစၢ်ယွၤဧၢ, နတၢ်အဲၣ်လၢအတီ အိၣ်ဝဲအါဒိၣ်မးအဃိ
စံးဆၢယၤ ဒီးပာ်ဖျါထီၣ်လၢ နမ့ၢ်ယတၢ်အုၣ်က့ၤခီၣ်က့ၤကစၢ်လၢ ယနာ်န့ၢ်အီၤသ့ န့ၣ်တက့ၢ်.+
၁၄ ဒ်သိး ယသုတလီၤဘျၢလၢ
ကပံာ်ကျါတဂ့ၤအဂီၢ် မၤပူၤဖျဲးယၤတက့ၢ်.
မၤပူၤဖျဲးယၤလၢ ပှၤလၢအသးဟ့ယၤ အစုပူၤ
ဒီးလၢထံယိာ်ပူၤတက့ၢ်.+
၁၅ တဘၣ်ပျဲ ယလီၤထွံလၢ ထံဒိၣ်ထီၣ်လၢ အဆူတၢ်ဆူၣ်ဆူၣ် အကျါတဂ့ၤ.+
တဘၣ်ပျဲ ယလီၤအုးလၢ ထံယိာ်ပူၤ
ဒီးတဘၣ်ပျဲ တၢ်ပူၤအခိၣ်ထိး ကးဘၢအသးလၢ ယဖီခိၣ်တဂ့ၤ.+
၁၆ အိ ယဟိဝၤယွၤဧၢ, နတၢ်အဲၣ်လၢအတီန့ၣ် ဂ့ၤဝဲအဃိ စံးဆၢယၤတက့ၢ်.+
ခီဖျိလၢ နတၢ်သးကညီၤ ဒိၣ်ဝဲအါဝဲအဃိ ဃၣ်နသးလၢယအိၣ်တက့ၢ်.+
၁၇ တဘၣ်ဃၣ်ကွံာ် နမဲာ်လၢ နခ့နပှၤယၤအံၤ အအိၣ်တဂ့ၤ.+
ယဘၣ်ကိၢ်ဘၣ်ဂီၤအဃိ စံးဆၢယၤမ့ၢ်ချ့မီၤ.+
၁၈ ဟဲဘူးဒီးယၤ ဒီးမၤပူၤဖျဲးယၤတက့ၢ်.
အုၣ်က့ၤခီၣ်က့ၤယၤ* လၢယဒုၣ်ယဒါတဖၣ် အစုပူၤတက့ၢ်.
၁၉ ပှၤတဲဆါယၤဒ်လဲၣ်, ယတူၢ်ဘၣ် တၢ်မဲာ်ဆှးဒ်လဲၣ် ဒီးယလၤကပီၤ ဟးဂီၤဒ်လဲၣ်န့ၣ် နသ့ၣ်ညါလီၤ.+
နထံၣ်ယဒုၣ်ယဒါခဲလၢာ်လီၤ.
၂၀ လၢတၢ်ဒုၣ်ဒွဲၣ်အဃိ ယသးသ့ၣ်ဖး ဒီးအပူၤလီၢ် ဘျါက့ၤတသ့ဘၣ်.*
ယမုၢ်လၢ်လၢ ပှၤကသးကညီၤယၤ ဘၣ်ဆၣ် ပှၤတသးကညီၤယၤ နီတဂၤဘၣ်.+
ဒီးယမုၢ်လၢ်လၢ ပှၤကမၤမုာ်ထီၣ်က့ၤယၤ ဘၣ်ဆၣ် ပှၤတမၤမုာ်ထီၣ်က့ၤယၤ နီတဂၤဘၣ်.+
၂၁ လၢတၢ်အီၣ်အဂီၢ်န့ၣ် အဝဲသ့ၣ်ဟ့ၣ်ယၤ တၢ်စုၣ်တၢ်ပျၢ်*+
ဒီးဖဲယဘၣ်သးအီထံအခါ အဝဲသ့ၣ် ဒုးအီယၤလၢ စပံးထံလၢအဆံၣ်လီၤ.+
၂၂ မ်အဝဲသ့ၣ် အစီၢ်နီၤခိၣ် ကဲထီၣ်ထုလၢ အဝဲသ့ၣ်အဂီၢ်
ဒီးမ်အဝဲသ့ၣ် အတၢ်ဘီၣ်ထီၣ်ညီထီၣ် ကဲထီၣ်ပျံၤသကွီၤတက့ၢ်.+
၂၃ မ်အဝဲသ့ၣ်အမဲာ်ခံးလီၤ ဒ်သိး အသုတထံၣ်တၢ်တဂ့ၤအဂီၢ်
ဒီးဒုးကနိး အဝဲသ့ၣ်အခီၣ် ထီဘိတက့ၢ်.
၂၄ လူလီၤ နတၢ်သူၣ်ဒိၣ်သးဖျိး လၢအဝဲသ့ၣ် အဖီခိၣ်
ဒီးမ်နတၢ်သးထီၣ် လီၤဘၣ်လၢ အဝဲသ့ၣ်အလိၤတက့ၢ်.+
၂၅ မ်အဝဲသ့ၣ် အဒဲကဝီၤ အိၣ်သယုၢ်တက့ၢ်.
မ်ပှၤသုတအိၣ်တဆိးလၢ အဝဲသ့ၣ် အဒဲတဖၣ်အပူၤ နီတဂၤတဂ့ၤ.+
၂၆ အဝဲသ့ၣ် လူၤမၤအၢမၤသီ ပှၤလၢနတီၢ်အီၤလီၤ.
အဝဲသ့ၣ် တဲဝံၤတဲက့ၤဝဲ ပှၤလၢနမၤဘၣ်ဒိအီၤတဖၣ် အတၢ်နးတၢ်ဖှီၣ်အဂ့ၢ်လီၤ.
၂၇ လၢအဝဲသ့ၣ် အတၢ်ကမၣ်တဖၣ် အဖီခိၣ်န့ၣ် ပာ်ဖှိၣ်အါထီၣ် တၢ်ကမၣ်တက့ၢ်.
မ်နသု တပာ်ပနီၣ် အဝဲသ့ၣ်လၢ ပှၤတီပှၤလိၤတဂ့ၤ.
၂၈ မ်အဝဲသ့ၣ် အမံၤဘၣ်တၢ်ထူးသံကွံာ်အီၤလၢ လံာ်မူအပူၤ+
ဒီးမ်အဝဲသ့ၣ်အမံၤ သုတဘၣ်တၢ်ကွဲးလီၤအီၤလၢ ပှၤတီပှၤလိၤတဖၣ် အမံၤအကျါတဂ့ၤ.+
၂၉ မ့မ့ၢ်ယၤန့ၣ် ယဘၣ်ကိၢ်ဘၣ်ဂီၤ ဒီးယဘၣ်တူၢ်တၢ်ဆါမး.+
အိ ကစၢ်ယွၤဧၢ, မ်နတၢ်အုၣ်က့ၤခီၣ်က့ၤ အစိကမီၤ ဒီသဒၢယၤတက့ၢ်.
၃၀ ယကသးဝံၣ် စံးထီၣ်ပတြၢၤ ကစၢ်ယွၤအမံၤ,
ယကမၤလၤကပီၤအီၤ ဒီးယကစံးဘျုးစံးဖှိၣ်အီၤလီၤ.
၃၁ ဒီးအကဘၣ် ယဟိဝၤယွၤအသး ဒိၣ်န့ၢ်ဒံး ကျီၢ်ဖါတဒု
လၢအအိၣ်ဒီး အနၢၤတဖၣ်ဒီးအခီၣ်မ့ၣ်တဖၣ်ဒံးလီၤ.+
၃၂ ပှၤလၢအဆီၣ်လီၤအသးန့ၣ် ကထံၣ်ဘၣ် ကစၢ်ယွၤ အတၢ်ဂ့ၤတၢ်ဝါ ဒီးကသူၣ်ဖှံသးညီဝဲလီၤ.
သုဝဲလၢအဃု ကစၢ်ယွၤသ့ၣ်ဧၢ, မ်သုသးအဂံၢ်အဘါ ဆူၣ်ထီၣ်က့ၤတက့ၢ်.
၃၃ ယဟိဝၤယွၤ ဒိကနၣ်ဝဲ ပှၤဖှီၣ်ဖိယာ်ဖိ အတၢ်ကိးပသူထီၣ်+
ဒီးအဝဲတပာ်တ့ၢ်ကွံာ် အပှၤဂီၢ်မုၢ်လၢ အဘၣ်တၢ်က့ၤဖီၣ်အီၤတဖၣ်န့ၣ်ဘၣ်.+
၃၄ မ်မူခိၣ် ဒီးဟီၣ်ခိၣ်စံးထီၣ်ပတြၢၤအီၤ+
ဒီးမ်ပီၣ်လဲၣ်ဒီး တၢ်အိၣ်လၢ အပူၤခဲလၢာ် စံးထီၣ်ပတြၢၤအီၤတက့ၢ်.
၃၅ ကစၢ်ယွၤ ကအုၣ်က့ၤခီၣ်က့ၤ စံယိၣ်+
ဒီးအဝဲကသူၣ်ထီၣ်က့ၤ ယူဒၤအဝ့ၢ်တဖၣ်လီၤ.
အပှၤဂီၢ်မုၢ် ကန့ၢ်ဘၣ်ကီၢ်န့ၣ် ဒီးကအိၣ်ဝဲဖဲန့ၣ်လီၤ.