စံၣ်ညီၣ်ကွီၢ်
၁၄ ဒီးစီၤၡံၡိၣ် လဲၤလီၤလၢ ဝ့ၢ်တံးမနး ဒီးလၢဝ့ၢ်တံးမနးန့ၣ် အထံၣ်ဘၣ်ဝဲ ပှၤဖလ့ၡသး မုၣ်ဖိတဂၤလီၤ. ၂ အဃိ အဝဲဟဲက့ၤ တဲဘၣ်အမိၢ်အပၢ်လၢ “ယထံၣ်ဘၣ် ပှၤဖလ့ၡသး မုၣ်ဖိတဂၤလၢ ဝ့ၢ်တံးမနး အပူၤလံ. ယအဲၣ်ဒိးလၢ သုကလဲၤဃ့န့ၢ်ယၤ ဒ်သိးအကကဲထီၣ် ယမါအဂီၢ်လီၤ.” ၃ ဘၣ်ဆၣ် အမိၢ်အပၢ် သံကွၢ်အီၤလၢ “လၢပဘူးပတံၢ် ဒီးပပှၤကလုာ်အကျါန့ၣ် နဃုပှၤပိာ်မုၣ် တဘၣ်ဧီၤ.+ ဘၣ်မနုၤအဃိ နဘၣ်လဲၤ ဃုနမါလၢ ပှၤဖလ့ၡသးဖိ လၢအတဒိးဘၣ် တၢ်ကူးတရံးတဖၣ် အကျါလဲၣ်.” ဘၣ်ဆၣ် စီၤၡံၡိၣ် တဲအပၢ်လၢ “ပိာ်မုၣ်တဂၤန့ၣ် မ့ၢ်ပှၤလၢ အကြၢးဒီးယၤအဃိ လဲၤဃ့န့ၢ်ယၤမီၤ.” ၄ ဒီးအမိၢ်ဒီးအပၢ်န့ၣ် တသ့ၣ်ညါဝဲလၢ ယဟိဝၤယွၤ ဟံးစုနဲၣ်ကျဲဝဲ အတၢ်ဆၢတဲာ်အံၤဘၣ်. ဖဲန့ၣ်အခါ မ့ၢ်လၢ ပှၤဖလ့ၡသးဖိ ပၢဝဲ ပှၤအံၣ်စရ့လးဖိ အဃိ အဝဲ* ဃုန့ၢ် တၢ်ခွဲးတၢ်ယာ်လၢ အကဒုးဝဲ ပှၤဖလ့ၡသးဖိလီၤ.+
၅ အဃိ စီၤၡံၡိၣ် ဒီးအမိၢ်အပၢ် လဲၤလၢ ဝ့ၢ်တံးမနးလီၤ. ဖဲအလဲၤတုၤလၢ ဝ့ၢ်တံးမနး အစပံးကျီးတဖၣ်အခါ ခ့ယုၢ်တဒု ဟဲကညီၤအီၤလီၤ. ၆ ဒီးယဟိဝၤယွၤ အသးစီဆှံ ဟ့ၣ်စိဟ့ၣ်ကမီၤအီၤ+ ဒီးဒ်ပှၤတဂၤ ဖှီကွံာ်ဝဲ မဲာ်တဲးလဲးဖိ ခံက့ လၢအစုအသိး အဝဲဖှီကွံာ်ဝဲ ခ့ယုၢ်ဒ်န့ၣ်လီၤ. ဘၣ်ဆၣ် တၢ်လၢအမၤဝဲန့ၣ် အတတဲဘၣ် အမိၢ်အပၢ်ဘၣ်. ၇ ဝံၤဒီးစီၤၡံၡိၣ် လဲၤတဲတၢ်ဒီး ပိာ်မုၣ်တဂၤန့ၣ်လီၤ. ဒီးအဝဲတူၢ်ဘၣ်ဒံးဝဲလၢ ပိာ်မုၣ်တဂၤန့ၣ် မ့ၢ်ပှၤလၢ အကြၢးဒီးအီၤလီၤ.+
၈ လၢခံန့ၣ် စီၤၡံၡိၣ် လဲၤကဒါက့ၤဝဲ ဒ်သိး အကက့ၤကိးအီၤအဂီၢ်+ ဒီးဖဲအလဲၤလၢ ကျဲအခါ အဝဲဃၣ်ဃီၤအသးလၢ တၢ်ကပၤ ဒီးကွၢ်ဝဲ ခ့ယုၢ်လၢ အမၤသံဝဲတဒုန့ၣ် အစိၣ်လီၤ. ဒီးလၢခ့ယုၢ်အစိၣ် အကိပူၤန့ၣ် အိၣ်ဝဲဒီး ကနဲစီ ဒီးကနဲတဖုလီၤ. ၉ ဒီးအဝဲဟံးန့ၢ်ဝဲ ကနဲစီ ဒီးလဲၤတၢ်တခီခီ အီၣ်ဝဲ တခီခီလီၤ. ဖဲအဝဲ ထံၣ်လိာ်က့ၤသးဒီး အမိၢ်အပၢ်အခါ အဒုးအီၣ် အဝဲသ့ၣ်တနီၤလီၤ. ဘၣ်ဆၣ် အဝဲတတဲဘၣ် အမိၢ်အပၢ်လၢ အဟံးန့ၢ်ဝဲ ကနဲစီလၢ ခ့ယုၢ်သံစိၣ် အကိပူၤန့ၣ်ဘၣ်.
၁၀ ဒီးစီၤၡံၡိၣ် ဒီးအပၢ် ဆဲးလဲၤတၢ်လၢ ပိာ်မုၣ်တဂၤန့ၣ် အအိၣ်လီၤ. ဒီးစီၤၡံၡိၣ် မၤဝဲတၢ်အီၣ်အမူး, မ့ၢ်လၢ လုၢ်လၢ်အိၣ်လၢ ပှၤပိာ်ခွါသးစၢ် လၢအအိၣ် ဖဲန့ၣ်တဖၣ် မၤဝဲဒ်န့ၣ်အဃိလီၤ. ၁၁ ဒီးဖဲပှၤထံၣ်အီၤအခါ အဝဲသ့ၣ် ဟဲကိးဝဲ ပိာ်ခွါသးစၢ် အဂၤ ၃၀ ဒ်သိးအဝဲသ့ၣ် ကအိၣ်ဒီးအီၤလီၤ. ၁၂ ဒီးစီၤၡံၡိၣ် တဲအဝဲသ့ၣ်လၢ “ယကတဲသု တၢ်ပှိၤပှံပှိၤပှီၢ်တခါနီၤ. ဖဲတၢ်အီၣ်အမူး နွံသီအတီၢ်ပူၤန့ၣ် သုဖးအခီပညီမ့ၢ်ဘၣ် ဒီးသုစံးဆၢယၤ မ့ၢ်ဘၣ်န့ၣ် ယကဟ့ၣ်သု တၢ်ကူတၢ်သိးလၢ အညၣ်ဂ့ၤ အဘ့ၣ် ၃၀ ဒီးဆ့ကူဆ့ကၤအဂၤ အဘ့ၣ် ၃၀ လီၤ. ၁၃ ဘၣ်ဆၣ် သုစံးဆၢယၤ မ့ၢ်တဘၣ်ဘၣ်န့ၣ် သုကဘၣ်ဟ့ၣ်ယၤ တၢ်ကူတၢ်သိးလၢ အညၣ်ဂ့ၤ အဘ့ၣ် ၃၀ ဒီးဆ့ကူဆ့ကၤအဂၤ အဘ့ၣ် ၃၀ လီၤ.” ဒီးအဝဲသ့ၣ် တဲဝဲလၢ “တဲပှၤ နတၢ်ပှိၤပှံပှိၤပှီၢ်သၢၤ, ပအဲၣ်ဒိးနၢ်ဟူလံ.” ၁၄ အဃိ စီၤၡံၡိၣ် တဲဝဲလၢ
“လၢတၢ်လၢ အအီၣ်တၢ်အပူၤန့ၣ် တၢ်အီၣ်ဟဲထီၣ်ဝဲ
ဒီးလၢတၢ်လၢ အဂံၢ်ဘါဆူၣ်တမံၤ အပူၤန့ၣ် တၢ်လၢအဆၢ ဟဲထီၣ်ဝဲလီၤ.”+
ဒီးတၢ်ပှိၤပှံပှိၤပှီၢ် တခါအံၤ အဝဲသ့ၣ်ဖးဝဲ အခီပညီတဘၣ်ဘၣ် အိၣ်ဝဲ သၢသီလံအဃိ ၁၅ လၢလွံၢ်သီတသီန့ၣ် အဝဲသ့ၣ် တဲဘၣ် စီၤၡံၡိၣ် အမါလၢ “ကွဲန့ၢ်လွဲန့ၢ်နဝၤ+ ဒ်သိးအကတဲနၤ တၢ်ပှိၤပှံပှိၤပှီၢ် အခီပညီ ဝံၤဒီးတဲဘၣ်ပှၤတက့ၢ်. နမ့ၢ်တမၤဒ်န့ၣ်ဘၣ်န့ၣ် ပကဒွဲၣ်အူထီၣ်ကွံာ် နၤဒီး နပၢ် အဟံၣ်ဖိဃိဖိလီၤ. မ့ၢ်သုကိးပှၤဖဲအံၤ ဒ်သိး သုကဟံးန့ၢ် ပတၢ်ဖိတၢ်လံၤတဖၣ် အဂီၢ်ဧါ.” ၁၆ ဒီးစီၤၡံၡိၣ်အမါ ဟီၣ်ဝဲလၢအလိၤ ဒီးတဲအီၤလၢ “နၤန့ၣ် နသးဟ့ယၤ. နတအဲၣ်ယၤဘၣ်.+ နတဲဘၣ် ယပှၤကလုာ်လၢ တၢ်ပှိၤပှံပှိၤပှီၢ် ဘၣ်ဆၣ် နတတဲယၤ အခီပညီဘၣ်.” ဒီးစီၤၡံၡိၣ် တဲအီၤလၢ “ယမိၢ်ယပၢ်မး ယတတဲဘၣ်, ဘၣ်မနုၤအဃိ ယကဘၣ် တဲနၤလဲၣ်.” ၁၇ ဘၣ်ဆၣ် အဝဲဆဲးဟီၣ်ဝဲလၢ စီၤၡံၡိၣ်အလိၤ လၢတၢ်အီၣ်အမူး နွံသီအံၤအတီၢ်ပူၤလီၤ. ဒီးခီဖျိလၢ အမၢဆူၣ် စီၤၡံၡိၣ်အဃိ ဖဲနွံသီတသီန့ၣ် စီၤၡံၡိၣ် တဲဖျါထီၣ် န့ၢ်အီၤလီၤ. ဒီးအဝဲ တဲဘၣ်အပှၤကလုာ် လၢတၢ်ပှိၤပှံပှိၤပှီၢ် အခီပညီလီၤ.+ ၁၈ အဃိ လၢနွံသီတသီ တချုးဖဲ မုၢ်လီၤနုာ်ဒံးဘၣ်န့ၣ် ပှၤဝ့ၢ်ဖိတဖၣ် တဲအီၤလၢ
“တၢ်လၢအဆၢ ဒိၣ်န့ၢ်ဒံးကနဲစီ
ဒီးတၢ်လၢအဂံၢ်ဆူၣ်ဒိၣ်န့ၢ်ဒံး ခ့ယုၢ်န့ၣ်ကအိၣ်ဝဲဧါ.”+
ဒီးစီၤၡံၡိၣ် တဲဆၢက့ၤ အဝဲသ့ၣ်လၢ
“သုမ့ၢ်တထဲၣ်တၢ်ဒီး ယကျီၢ်မိၢ်ဖိဘၣ်န့ၣ်+
သုဖးယတၢ်ပှိၤပှံပှိၤပှီၢ် အခီပညီတဘၣ်ဘၣ်.”
၁၉ ဒီးယဟိဝၤယွၤ အသးစီဆှံ ဟ့ၣ်စိဟ့ၣ်ကမီၤအီၤ+ ဒီးအဝဲလဲၤလီၤလၢ ဝ့ၢ်အၤၡကလိၣ်+ ဒီးမၤသံဝဲ ပှၤပိာ်ခွါ အဂၤ ၃၀ လီၤ. ဒီးအဟံးန့ၢ်ဝဲ အဝဲသ့ၣ် အဆ့ကူဆ့ကၤ ဒီးဟ့ၣ်လီၤဝဲ ပှၤပိာ်ခွါလၢ အဖးဝဲ အတၢ်ပှိၤပှံပှိၤပှီၢ် အခီပညီဘၣ်တဖၣ်လီၤ.+ ဒီးစီၤၡံၡိၣ် က့ၤကဒါက့ၤလၢ အပၢ်အဟံၣ် လၢတၢ်သူၣ်ဒိၣ်သးဖျိး အပူၤလီၤ.
၂၀ လၢခံ ပှၤပိာ်ခွါသးစၢ်လၢ အအိၣ်ဒီး စီၤၡံၡိၣ် အကျါတဂၤန့ၣ် ပှၤဒုးဖျီအီၤဒီး+ စီၤၡံၡိၣ် အမါလီၤ.+