အ့းဖ့းစူး
၃ အဃိ ယၤ, စီၤပီလူး ယမ့ၢ်ပှၤဃိာ်ဖိ+ လၢယ့ၣ်ၡူးခရံာ်အဃိ ဒီးလၢသုဝဲ ပှၤကလုာ်တဖၣ် အဃိလီၤ. ၂ နီၢ်ကီၢ်န့ၣ် သုနၢ်ဟူဘၣ်လၢ ယဒိးန့ၢ်ဘၣ်မူဒါလၢ+ ကမၤစၢၤသု ဒ်သိး သုကဒိးန့ၢ်ဘၣ်အဘျုးလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဂီၢ်လီၤ. ၃ မ့ၢ်လီၤ, ကစၢ်ယွၤ ဒုးသ့ၣ်ညါယၤလၢ တၢ်ခူသူၣ်စီဆှံ ခီဖျိတၢ်လီၣ်ဖျါတခါ ဒီးယကွဲးန့ၢ်သု တၢ်ဂ့ၢ်အံၤ ဝံၤတစဲးဖိလံ. ၄ အဃိ ဖဲသုဖးလံာ်အံၤအခါ သုကထံၣ်ဘၣ်လၢ ယသ့ၣ်ညါနၢ်ပၢၢ် တၢ်ခူသူၣ်စီဆှံ+ ဘၣ်ဃးဒီး ခရံာ်လီၤ. ၅ စိၤလၢ အပူၤကွံာ်တဖၣ်န့ၣ် တၢ်တဒုးသ့ၣ်ညါ ပှၤဟီၣ်ခိၣ်ဖိတဖၣ်လၢ တၢ်ခူသူၣ်အဝဲအံၤ လီၤတံၢ်လီၤဆဲးဘၣ်. ဘၣ်ဆၣ်ခဲအံၤ တၢ်လီၣ်ဖျါထီၣ်အီၤ ခီဖျိလၢ သးစီဆှံ ဆူတၢ်မၢဖိစီဆှံတဖၣ် ဒီးဝံတဖၣ်အအိၣ် လီၤတံၢ်လီၤဆဲးလီၤ.+ ၆ တၢ်ခူသူၣ် မ့ၢ်ဝဲဒ်အံၤလီၤ. ပှၤကလုာ်တဖၣ်လၢ အမ့ၢ် ယ့ၣ်ၡူးခရံာ် အပျဲၢ်အဘီၣ်တဖၣ်န့ၣ် ကကဲထီၣ် ပှၤန့ၢ်သါဘၣ်တၢ် ဃုာ်ဒီးပှၤ, ကပၣ်ဃုာ်လၢ နီၢ်ခိတဂၤဃီအပူၤ+ ဒီးကဒိးန့ၢ်ဘၣ် တၢ်စံးပာ်ဃုာ်ဒီးပှၤ ခီဖျိလၢ တၢ်သးခုကစီၣ် အဃိလီၤ. ၇ ယကဲထီၣ် တၢ်ခူသူၣ်အံၤ အခ့အပှၤ ခီဖျိလၢ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ် လၢအမ့ၢ် တၢ်ဟ့ၣ်ကလီအဃိလီၤ. ဒီးကစၢ်ယွၤ ဟ့ၣ်ယၤ တၢ်ဟ့ၣ်အံၤ ခီဖျိ အတၢ်စိတၢ်ကမီၤလီၤ.+
၈ ယၤ, ပှၤလၢအဆံးန့ၢ်ဒံး ပှၤစီဆှံလၢ အဆံးကတၢၢ်တဂၤအံၤ+ ကစၢ်ယွၤ ပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်အံၤ လၢယဖီခိၣ်လီၤ.+ အမၤဝဲဒ်န့ၣ် ဒ်သိး ယကစံၣ်တဲၤတဲလီၤ ပှၤကလုာ်တဖၣ်လၢ တၢ်သးခုကစီၣ် ဘၣ်ဃးဒီး တၢ်ဆိၣ်ဂ့ၤတဖၣ်လၢ အဟဲလၢခရံာ်အအိၣ် လၢပှၤဂံၢ်ထီၣ်ဒွးထီၣ်အီၤ တလၢာ်ဘၣ်. ၉ ဒီးကစၢ်ယွၤ ပၢဆှၢရဲၣ်ကျဲၤ တၢ်ခူသူၣ်စီဆှံအံၤ+ ဒ်လဲၣ်န့ၣ် ယကဘၣ်ဒုးထံၣ် ပှၤခဲလၢာ်လီၤ. နီၢ်ကီၢ်န့ၣ် ကစၢ်ယွၤလၢ အတ့လီၤတၢ်ခဲလၢာ်တဂၤ ပာ်ခူသူၣ် တၢ်ခူသူၣ်စီဆှံအံၤ ယံာ်တ့ၢ်လံ. ၁၀ တၢ်မၤအသးဒ်န့ၣ်န့ၣ် မ့ၢ်ဒ်သိး ကစၢ်ယွၤကပာ်ဖျါထီၣ် အတၢ်ကူၣ်သ့ အကလုာ်ကလုာ်လၢ ဆၢကတီၢ်ခဲအံၤ လၢတၢ်ပၢတၢ်ပြး ဒီးတၢ်စိတၢ်ကမီၤလၢ အအိၣ်လၢမူခိၣ်တဖၣ်+ အမဲာ်ညါ ခီဖျိလၢ တၢ်အိၣ်ဖှိၣ်လီၤ.+ ၁၁ အဝဲအံၤ မ့ၢ်ဒ်ကစၢ်ယွၤ အတၢ်တိာ်ပာ်အထူအယိာ် လၢအဘၣ်ထွဲဒီး ပကစၢ်ယ့ၣ်ၡူးခရံာ် အသိးလီၤ.+ ၁၂ ဒီးခီဖျိလၢ ခရံာ်အဃိ ပတဲတၢ်ဒူဒူဘူၣ်ဝဲ+ ဒီးခီဖျိလၢ ခရံာ်အဃိ ပဃ့ထုကဖၣ်တၢ်လၢ ကစၢ်ယွၤအအိၣ်လၢ တၢ်သဘျ့အပူၤ ဘူၣ်ဝဲလီၤ. ၁၃ ယထံၣ်ဘၣ် တၢ်နးတၢ်ဖှီၣ်တဖၣ်လၢ သုဃိ သနာ်က့ ယဃ့ကညးသုလၢ တဘၣ်သးဟးဂီၤတဂ့ၤ. နီၢ်ကီၢ်န့ၣ် တၢ်နးတၢ်ဖှီၣ်တဖၣ်အံၤ မ့ၢ်ဝဲတၢ်လၤကပီၤလၢ သုဂီၢ်လီၤ.+
၁၄ လၢတၢ်န့ၣ်အဃိ ယချံးလီၤယခီၣ်လၢ ပၢ်အမဲာ်ညါလီၤ. ၁၅ ဒူၣ်ဖိထၢဖိခဲလၢာ် လၢမူခိၣ် ဒီးလၢဟီၣ်ခိၣ်ချၢန့ၣ် အဝဲသ့ၣ်ဒိးန့ၢ်ဘၣ်အမံၤ ခီဖျိလၢအီၤလီၤ. ၁၆ ယဃ့ထုကဖၣ်တၢ်လၢ ကစၢ်ယွၤလၢအပှဲၤဒီး တၢ်လၤကပီၤ ဒိၣ်ဒိၣ်မုၢ်မုၢ် တဂၤအအိၣ် ဒ်သိးအကသူ အတၢ်စိတၢ်ကမီၤလၢ ကမၤဆူၣ်ထီၣ်သုသူၣ်သုသး+ ခီဖျိလၢ အသးစီဆှံလီၤ. ၁၇ တကးဒံးဘၣ် ယဃ့စ့ၢ်ကီးလၢ ခရံာ်ကအိၣ်ကဆိး လၢသုသးပူၤဃုာ်ဒီး တၢ်အဲၣ်တၢ်ကွံ ခီဖျိလၢ သုတၢ်စူၢ်တၢ်နာ်အဃိလီၤ.+ မ်သုဂံၢ်စဲၤလီၤအသး ကျၢၤကျၢၤ+ ဒီးမ်သုအိၣ်သူၣ်လီၤသးလၢ တၢ်စူၢ်တၢ်နာ်အဖီခိၣ်တက့ၢ်.+ ၁၈ သုမ့ၢ်မၤဒ်န့ၣ်န့ၣ် ဒ်ပှၤစီဆှံ အဂၤတဖၣ်အသိး သုဝဲစ့ၢ်ကီး ကနၢ်ပၢၢ်ထီၣ် လီၤတံၢ်လီၤဆဲးလၢ တၢ်မ့ၢ်တၢ်တီန့ၣ် အလဲၢ်ထဲလဲၣ်, အထီထဲလဲၣ်, အကစီၤထီထဲလဲၣ် ဒီးအယိာ်ထဲလဲၣ်န့ၣ်လီၤ. ၁၉ ဒီးသုကသ့ၣ်ညါ ခရံာ်အတၢ်အဲၣ်+ လၢအဒိၣ်န့ၢ်ထီန့ၢ်ဒံး တၢ်သ့ၣ်ညါ အဃိ သုကလၢထီၣ်ပှဲၤထီၣ်ဒီး ကစၢ်ယွၤအတၢ်ဂ့ၤတၢ်ဝါလၢ အဝဲဟ့ၣ်လီၤဝဲတဖၣ်လီၤ.
၂၀ ကစၢ်ယွၤလၢ အစိကမီၤမၤတၢ်လၢ ပပူၤတဂၤန့ၣ်+ အဝဲမၤတၢ်သ့ဒိၣ်န့ၢ်အါန့ၢ်ဒံး တၢ်လၢပဃ့ ဒီးတၢ်လၢ ပဆိကမိၣ်ထီၣ်ခဲလၢာ် စၢၢ်တလၢၢ်လီၤ.+ ၂၁ မ်ကစၢ်ယွၤ ဘၣ်တၢ်မၤလၤကပီၤအီၤ ခီဖျိလၢ တၢ်အိၣ်ဖှိၣ် ဒီးခီဖျိ ယ့ၣ်ၡူးခရံာ်အဃိ လီၤထူလီၤယိာ်တက့ၢ်. အၤမ့ၣ်.