၂ ကရံၣ်သူး
၅ ပသ့ၣ်ညါလၢ ပဟံၣ်* လၢဟီၣ်ခိၣ်ချၢ လၢအမ့ၢ်ဒဲအံၤ မ့ၢ်လီၤပှီၢ်ကွံာ်သနာ်က့+ ပကအိၣ်ဒီး တၢ်သူၣ်ထီၣ်လၢ အဟဲလၢ ကစၢ်ယွၤအအိၣ် လၢအမ့ၢ် ဟံၣ်လၢ အတဘၣ်တၢ်တ့အီၤလၢ ပှၤစုဘၣ်.+ ဟံၣ်အဝဲန့ၣ် အိၣ်ဝဲဆိးဝဲ လီၤထူလီၤယိာ်လၢ မူခိၣ်လီၤ. ၂ ပကအုကစွါလၢ ဟံၣ်လၢဟီၣ်ခိၣ်ချၢအံၤအပူၤ အနီၢ်ကီၢ်လီၤ. ဒီးပဆၢမုၢ်လၢ် သပှၢ်တၢၢ်လၢ ပကကူထီၣ်သိးထီၣ် ပဟံၣ်လၢမူခိၣ်လီၤ.+ ၃ ဒီးဖဲပကူထီၣ်သိးထီၣ်အီၤအခါ ပတအိၣ်ဘ့ၣ်ဆ့လၢၤဘၣ်. ၄ ပဝဲလၢအအိၣ်လၢ ဒဲအံၤအပူၤန့ၣ် ပဘၣ်ကိၢ်ဘၣ်ဂီၤတၢ်ဒိၣ်မး ဒီးပကအုကစွါလီၤ. ပတအဲၣ်ဒိးဘ့ၣ်လီၤကွံာ် ဒဲအံၤဘၣ်. ဘၣ်ဆၣ် ပအဲၣ်ဒိးကူထီၣ်သိးထီၣ်လၢ ဟံၣ်လၢမူခိၣ်တခါ+ ဒ်သိး တၢ်မူအထူအယိာ်န့ၣ် ကယူၢ်လီၤကွံာ် တၢ်လၢအသံသ့အံၤလီၤ.+ ၅ ကစၢ်ယွၤမ့ၢ်ပှၤလၢ အကတဲာ်ကတီၤန့ၢ်ပှၤ တၢ်မူဒ်အံၤလီၤ.+ အဝဲဟ့ၣ်လီၤပှၤ သးစီဆှံဒ် တၢ်အုၣ်ကီၤတခါလၢ အဘၣ်ဃးဒီးတၢ်လၢ ပကဒိးန့ၢ်ဘၣ်အီၤလၢ ခါဆူညါလီၤ.+
၆ အဃိ ပအိၣ်ဒီးတၢ်သးဒူထီဘိ ဒီးပသ့ၣ်ညါလၢ ဖဲပအိၣ်လၢ ပနီၢ်ခိအဆၢကတီၢ် ပအိၣ်ယံၤဒီးကစၢ်လီၤ.+ ၇ ပသ့ၣ်ညါတၢ်ဂ့ၢ်တခါအံၤ မ့ၢ်လၢ ပလဲၤတၢ်လၢ တၢ်နာ်အပူၤ ဒီးပတလဲၤတၢ် ဒ်တၢ်လၢ ပထံၣ်အီၤတဖၣ် အသိးဘၣ်. ၈ ဘၣ်ဆၣ် ပအိၣ်ဒီးတၢ်သးဒူ ဒီးလၢပကအိၣ်လၢ နီၢ်ခိအလီၢ် ပအဲၣ်ဒိးအိၣ်ဒီး ကစၢ်ဒ်သိးသိးလၢ အတၢ်အိၣ်တၢ်ဆိး အလီၢ်လီၤ.+ ၉ အဃိ ပမ့ၢ်အိၣ်ဒီးအီၤလၢ အတၢ်အိၣ်တၢ်ဆိးအလီၢ်မ့ၢ်ဂ့ၤ, ပမ့ၢ်အိၣ်ယံၤဒီးအီၤမ့ၢ်ဂ့ၤ ပဂုာ်ကျဲးစၢး မၤသးခုအသး, ၁၀ မ့ၢ်လၢ ပဝဲကိးဂၤဒဲး ပကဘၣ် အိၣ်ဖျါထီၣ်လၢ ခရံာ်အတၢ်စံၣ်ညီၣ် အလီၢ်ပစိာ်* အမဲာ်ညါအဃိလီၤ. ဒီးဖဲပှၤတဂၤစုာ်စုာ် အိၣ်လၢနီၢ်ခိအခါ တၢ်လၢ အဝဲမၤဝဲလၢ အဂ့ၤမ့ၢ်ဂ့ၤ, အအၢမ့ၢ်ဂ့ၤ အကဘၣ်တၢ်ဟ့ၣ်ဆၢက့ၤအီၤ ဒ်အမၤဝဲအသိးလီၤ.+
၁၁ ပသ့ၣ်ညါလၢ ပကဘၣ်အိၣ်ဒီး တၢ်ပျံၤကစၢ်အဃိ ပဂုာ်ကျဲးစၢးထုးန့ၢ် ပှၤဂၤအသးလီၤ. မ့မ့ၢ် ကစၢ်ယွၤန့ၣ် သ့ၣ်ညါပှၤဂ့ၤဂ့ၤလီၤ. ဘၣ်ဆၣ် ပမ့ၢ်ပှၤဒ်လဲၣ်န့ၣ် ယမုၢ်လၢ်လၢ သုသးလၢအသ့ၣ်ညါဒၣ်တၢ် ကဒုးသ့ၣ်ညါသု ဂ့ၤဂ့ၤစ့ၢ်ကီးလီၤ. ၁၂ တမ့ၢ်လၢ ပပာ်ဖျါထီၣ်ကဒီးပသး လၢသုအိၣ်ဘၣ်. မ့ၢ်ဒၣ်ပဟ့ၣ်သု တၢ်ဂ့ၢ်လၢ သုကပာ်ကဖၢလၢ သုသးလၢပဃိလီၤ. ခီဖျိပမၤဒ်န့ၣ်အဃိ ပှၤလၢ အပာ်ကဖၢလၢအသးလၢ တၢ်အိၣ်ဖျါလၢခိ+ ဒီးတမ့ၢ်လၢတၢ်အိၣ်လၢ ပှၤသးပူၤဘၣ်တဖၣ်န့ၣ် သုစံးဆၢက့ၤ အဝဲသ့ၣ်ကသ့လီၤ. ၁၃ ပမ့ၢ်ပျုၢ်န့ၣ်+ ပပျုၢ်လၢ ကစၢ်ယွၤအဂီၢ် ဒီးပသးမ့ၢ်ဆးန့ၣ် ပသးဆးလၢ သုဂီၢ်လီၤ. ၁၄ တၢ်အဲၣ်လၢ ခရံာ်ပာ်ဖျါထီၣ်ဝဲန့ၣ် မ့ၢ်တၢ်လၢ အထိၣ်ဟူးထိၣ်ဂဲၤထီၣ်ပှၤလီၤ. အဃိ ပနၢ်ပၢၢ်ထီၣ်လၢ ပှၤတဂၤသံဝဲလၢ ပှၤခဲလၢာ်အဂီၢ်+ မ့ၢ်လၢ ပှၤခဲလၢာ်သံတ့ၢ်ဝဲလံ* အဃိလီၤ. ၁၅ ဒီးအဝဲသံလၢ ပှၤခဲလၢာ်အဂီၢ် ဒ်သိး ပှၤလၢအမူဝဲတဖၣ်န့ၣ် အသုတမူလၢ အနီၢ်ကစၢ်အဂီၢ် လၢၤတဂ့ၤ+ ဒီးကမူဝဲလၢ ပှၤလၢအသံလၢ အဝဲသ့ၣ်အဂီၢ် လၢအဘၣ် တၢ်ဒုးဂဲၤဆၢထၢၣ်က့ၤအီၤ တဂၤန့ၣ်အဂီၢ်လီၤ.
၁၆ အဃိ စးထီၣ်ခဲအံၤ ဒီးဆူညါန့ၣ် ပတထံၣ်ပှၤဂၤ ဒ်ပှၤဟီၣ်ခိၣ်ဖိအတၢ်ထံၣ် အိၣ်ဝဲအသိး နီတဂၤလၢၤဘၣ်.+ တဘျီခါ ပမ့ၢ်ထံၣ်ခရံာ် ဒ်ပှၤဟီၣ်ခိၣ်ဖိ အတၢ်ထံၣ်အိၣ်ဝဲအသိး သနာ်က့ခဲအံၤ လ့ၤတက့ၤ ပတထံၣ်အီၤ ဒ်န့ၣ်လၢၤဘၣ်.+ ၁၇ အဃိ ပှၤတဂၤဂၤ မ့ၢ်အိၣ်လၢ ခရံာ်အပူၤန့ၣ် အဝဲမ့ၢ် တၢ်ဘၣ်တ့အသီလီၤ.+ တၢ်အလီၢ်လံၤတဖၣ်န့ၣ် ပူၤကွံာ်လံအဃိ တၢ်လၢအသီတဖၣ် ဟဲအိၣ်ထီၣ်ဝဲလီၤ. ၁၈ ဘၣ်ဆၣ် တၢ်ခဲလၢာ်ဟဲလၢ ကစၢ်ယွၤအအိၣ်လီၤ. ကစၢ်ယွၤ မၤဘၣ်လိာ်ဖိးဒ့က့ၤပှၤ ဒီးအနီၢ်ကစၢ် ခီဖျိလၢခရံာ်+ ဒီးဟ့ၣ်လီၤပှၤလၢ တၢ်စံၣ်တဲၤတဲလီၤတၢ်မၤ ဘၣ်ဃးဒီး တၢ်မၤဘၣ်လိာ်ဖိးဒ့က့ၤတၢ်လီၤ.+ ၁၉ ပတၢ်မၤအံၤ မ့ၢ်ဝဲလၢ ပစံၣ်တဲၤတဲလီၤလၢ ကစၢ်ယွၤ မၤဘၣ်လိာ်ဖိးဒ့က့ၤ ပှၤဟီၣ်ခိၣ်ဖိဒီးအနီၢ်ကစၢ် ခီဖျိလၢခရံာ်လီၤ.+ ဒီးဘၣ်ဃးဒီးအဝဲသ့ၣ် အတၢ်ကမၣ်န့ၣ် ကစၢ်ယွၤတဟံးန့ၢ် အရ့လၢၤဘၣ်.+ တၢ်ကစီၣ်လၢ အဘၣ်ဃးဒီး တၢ်မၤဘၣ်လိာ်ဖိးဒ့က့ၤတၢ်အံၤန့ၣ် ကစၢ်ယွၤ အးလီၤလၢပစုပူၤလီၤ.+
၂၀ ပမ့ၢ်ပှၤခၢၣ်စးတၢ်လၢ+ ခရံာ်အလီၢ်+ လီၤဂာ်ဒ် ကစၢ်ယွၤဃ့ကညးတၢ် ခီဖျိလၢပှၤလီၤ. ဒ်ခရံာ်အပှၤခၢၣ်စးတၢ်အသိး ပဃ့ကညးလၢ “မၤဘၣ်လိာ်ဖိးဒ့က့ၤသုသးဒီး ကစၢ်ယွၤတက့ၢ်.” ၂၁ ပှၤတဂၤလၢ အတမၤတၢ်ဒဲးဘး နီတဘျီဘၣ်န့ၣ်+ ကစၢ်ယွၤဟ့ၣ်လီၤအီၤ ဒ်တၢ်လုၢ်ထီၣ်လၢ ပတၢ်ဒဲးဘးအဂီၢ်လီၤ. ခီဖျိလၢ အီၤအဃိ ပကဲထီၣ်ပှၤတီပှၤလိၤလၢ ကစၢ်ယွၤ အမဲာ်ညါသ့ဝဲလီၤ.+