လူၤကၣ်

၁၈ ဒီးယ့ၣ်ၡူး တဲဘၣ်အဝဲသ့ၣ်​ တၢ်ကတိၤဒိ ဘၣ်ဃးဒီး အဝဲသ့ၣ်ကဘၣ်​ ဃ့ထုကဖၣ်တၢ်ထီဘိ ဒီးတဘၣ်ဟ့ၣ်​ အၡူဘၣ်အဂ့ၢ်လီၤ.+ ၂ ဒီးအဝဲတဲဝဲလၢ “လၢဝ့ၢ်တဖျၢၣ်အပူၤန့ၣ်​ စံၣ်ညီၣ်ကွီၢ်လၢ အတပျံၤ ကစၢ်ယွၤ ဒီးတပာ်ကဲ ပှၤဂၤဘၣ်​ အိၣ်ဝဲတဂၤလီၤ. ၃ ဖဲဝ့ၢ်တဖျၢၣ်န့ၣ်အပူၤ မုၣ်ကမဲ အိၣ်ဝဲတဂၤစ့ၢ်ကီး ဒီးအဝဲလဲၤလၢ စံၣ်ညီၣ်ကွီၢ်တဂၤန့ၣ်​ အအိၣ်တလီၢ်လီၢ် ဒီးတဲဝဲလၢ ‘စံၣ်ညီၣ်န့ၢ်ယၤတၢ် တီတီလိၤလိၤလၢ ယၤဒီးယဒုၣ်ယဒါ အဘၢၣ်စၢၤတက့ၢ်.’ ၄ ဒီးအတသးအိၣ်​ မၤစၢၤအီၤဘၣ်န့ၣ်​ အိၣ်ဖးယံာ်ညါ. ဘၣ်ဆၣ်​ လၢခံ အဝဲဆိကမိၣ်ထီၣ်ဝဲလၢ ‘ယတပျံၤ ကစၢ်ယွၤဘၣ်​ ဒီးယတပာ်ကဲ ပှၤနီတဂၤဘၣ်​ သနာ်က့ ၅ မုၣ်ကမဲတဂၤအံၤ ဟဲမၤကီမၤခဲယၤ ထီဘိအဃိ ယကစံၣ်ညီၣ်န့ၢ်အီၤတၢ် တီတီလိၤလိၤ ဒ်သိးအသု တဟဲကဒါက့ၤ တလီၢ်လီၢ် ဒီးမၤလီၤဘှံးယသး တဂ့ၤအဂီၢ်လီၤ.’”+ ၆ ဒီးကစၢ်ယ့ၣ်ၡူး တဲဝဲလၢ “စံၣ်ညီၣ်ကွီၢ်တဂၤအံၤ မ့ၢ်ပှၤတတီတလိၤသနာ်က့ အဝဲတဲဝဲဒ်လဲၣ်န့ၣ်​ သုပာ်သူၣ်ပာ်သးဧါ. ၇ မ့မ့ၢ် ကစၢ်ယွၤန့ၣ်​ ကစံၣ်ညီၣ်တၢ် တီတီလိၤလိၤလၢ ပှၤလၢအဘၣ်တၢ်ဃုထၢအီၤ လၢအကိးထီၣ်အီၤလၢ မုၢ်နၤဒီး လၢမုၢ်ဆါတဖၣ်အဂီၢ် သပှၢ်ကတၢၢ် တမ့ၢ်ဧီၤ.+ ဒီးတကတီၢ်ဃီန့ၣ်​ အဝဲအိၣ်ဒီး တၢ်ဝံသးစူၤလၢ အဝဲသ့ၣ်အဖီခိၣ်လီၤ.+ ၈ ယကတဲဘၣ်သုလၢ အဝဲကစံၣ်ညီၣ်န့ၢ်တၢ်လၢ အဝဲသ့ၣ်အဂီၢ် တီတီလိၤလိၤလၢ အဆိအချ့လီၤ. ဘၣ်ဆၣ်​ ဖဲပှၤကညီဖိခွါ ဟဲတုၤအခါ မ့ၢ်အဝဲကထံၣ်ဘၣ်​ ပှၤလၢအအိၣ်ဒီး တၢ်နာ်ဒ်အံၤလၢ ဟီၣ်ခိၣ်ချၢ သပှၢ်ကတၢၢ်ဧါ.”

၉ တကးဒံးဘၣ်​ ယ့ၣ်ၡူးတဲဘၣ်​ ပှၤလၢ အပာ်လီၤအသးလၢ အမ့ၢ်ပှၤတီပှၤလိၤ ဒီးဆိကမိၣ်လၢ ပှၤဂၤတမ့ၢ် တၢ်နီတမံၤဘၣ်တဖၣ်​ လၢတၢ်ကတိၤဒိအံၤလီၤ. ၁၀ “ပှၤခံဂၤ လဲၤထီၣ်လၢ တၢ်လုၢ်ဟံၣ်ပူၤ ဒ်သိး ကဃ့ထုကဖၣ်တၢ်အဂီၢ်လီၤ. တဂၤန့ၣ်​ မ့ၢ်ဝဲပှၤဖၤရံၤၡဲ ဒီးအဝဲတဂၤန့ၣ်​ မ့ၢ်ဝဲ ပှၤထၢတၢ်ခိတၢ်သွဲဖိလီၤ. ၁၁ ပှၤဖၤရံၤၡဲတဂၤန့ၣ်​ ဂဲၤဆၢထၢၣ်​ ဒီးဃ့ထုကဖၣ်တၢ်လၢ အသးပူၤလၢ ‘အိ ကစၢ်ယွၤဧၢ, ယစံးဘျုးနၤ မ့ၢ်လၢ ယၤန့ၣ်ယတလီၤဂာ်ဒ်သိးဒီး ပှၤအဂၤတဖၣ်လၢ အဂုာ်န့ၢ်ဆူၣ်ပှၤဂၤအတၢ်, ပှၤလၢ အတတီတလိၤ, ပှၤလၢ အအဲၣ်ဘၢမါအဲၣ်ဘၢဝၤ ဒီးပှၤထၢတၢ်ခိတၢ်သွဲဖိ တဂၤအံၤဘၣ်​ အဃိလီၤ. ၁၂ ယဒုၣ်တၢ်အီၣ်​ တနွံခံဘျီ ဒီးတၢ်လၢ ယဒိးန့ၢ်ဘၣ်အီၤ ကိးမံၤဒဲးန့ၣ်​ ယဟ့ၣ်လီၤ တၢ်ဆံဆဲၣ်ပူတပူလီၤ.’+ ၁၃ မ့မ့ၢ် ပှၤထၢတၢ်ခိတၢ်သွဲဖိ တဂၤန့ၣ်​ ဆၢထၢၣ်ဝဲလၢအယံၤ, ကျ့ၣ်ထီၣ်အမဲာ်လၢမူခိၣ်​ တဘူၣ်ဘၣ်​ ဒီးဒဲလီၤအသးနါပှၢ် ဒီးတဲဝဲလၢ ‘အိ ကစၢ်ယွၤဧၢ, ယမ့ၢ် ပှၤတၢ်ဒဲးဘးဖိတဂၤလီၤ,+ သးကညီၤယၤတက့ၢ်.’ ၁၄ ယကတဲဘၣ်သုလၢ ပှၤတဂၤအံၤ ဖဲအက့ၤလၢ အဟံၣ်အခါ ကစၢ်ယွၤထံၣ်အီၤလၢ အတီလိၤ ဒိၣ်န့ၢ်ဒံး ပှၤဖၤရံၤၡဲတဂၤလီၤ.+ ပှၤကိးဂၤဒဲးလၢ အပာ်ထီၣ်ထီအသးန့ၣ်​ တၢ်ကဆီၣ်လီၤအီၤ, မ့မ့ၢ်ပှၤလၢ အဆီၣ်လီၤအသးန့ၣ်​ ကဘၣ်​ တၢ်ပာ်ထီၣ်ထီအီၤလီၤ.”+

၁၅ ဒီးပှၤဟဲစိာ် ပှၤဖိဆံးတဖၣ်လၢ ယ့ၣ်ၡူးအအိၣ်​ ဒ်သိး ယ့ၣ်ၡူးကထိးဘၣ်​ အဝဲသ့ၣ်အဂီၢ်လီၤ. ဘၣ်ဆၣ်​ ဖဲအပျဲၢ်အဘီၣ်တဖၣ်​ ထံၣ်ဝဲအခါ အဝဲသ့ၣ်​ သိၣ်ပှၤတဖၣ်န့ၣ်လီၤ.+ ၁၆ ဘၣ်ဆၣ်​ ယ့ၣ်ၡူးမၢပှၤဟဲစိာ် ဖိသၣ်ဆံးဆံးဖိတဖၣ်န့ၣ်​ လၢအအိၣ်ဒီး တဲဝဲလၢ “ပျဲဖိသၣ်တဖၣ်​ ဟဲလၢယအိၣ်​ ဒီးတြီအဝဲသ့ၣ်တဂ့ၤ. ကစၢ်ယွၤ အဘီအမုၢ်န့ၣ်​ မ့ၢ်ပှၤဒ်အံၤတဖၣ်​ အတၢ်လီၤ.+ ၁၇ ယကတဲဘၣ်သု တီတီလၢ ပှၤလၢ အတတူၢ်လိာ် ကစၢ်ယွၤ အဘီအမုၢ် ဒ်ဖိသၣ်တဂၤ အသိးဘၣ်န့ၣ်​ လ့ၤတက့ၤ အတလဲၤနုာ်လီၤဘၣ်လၢ ဘီမုၢ်အပူၤဘၣ်.”+

၁၈ ဒီးပှၤခိၣ်ပှၤနၢ်တဂၤ သံကွၢ်ယ့ၣ်ၡူးလၢ “သရၣ်လၢအဂ့ၤဧၢ, ဒ်သိး ယကဒိးန့ၢ်ဘၣ်​ တၢ်မူအထူအယိာ်အဂီၢ် ယကဘၣ်မၤဒ်လဲၣ်.”+ ၁၉ ယ့ၣ်ၡူး တဲဘၣ်အီၤလၢ “ဘၣ်မနုၤအဃိ နကိးယၤလၢ ပှၤအဂ့ၤလဲၣ်. ပှၤအဂ့ၤ တအိၣ်နီတဂၤဘၣ်​ အိၣ်ထဲ ကစၢ်ယွၤတဂၤလီၤ.+ ၂၀ နသ့ၣ်ညါလၢ တၢ်မၤလိာ်တဖၣ်​ တဲဝဲလၢ ‘တဘၣ်​ အဲၣ်ဘၢမါအဲၣ်ဘၢဝၤတဂ့ၤ,+ တဘၣ်​ မၤသံပှၤနီတဂၤတဂ့ၤ,+ တဘၣ်​ ဟုၣ်တၢ်တဂ့ၤ,+ တဘၣ်​ အုၣ်နသးကဘျံးကဘျၣ်တဂ့ၤ,+ ယူးယီၣ်ပာ်ကဲ နမိၢ်ဒီးနပၢ်တက့ၢ်.’”+ ၂၁ ဝံၤဒီး ပှၤခိၣ်ပှၤနၢ်တဂၤန့ၣ်​ တဲဝဲလၢ “တၢ်သ့ၣ်တဖၣ်အံၤ ခဲလၢာ်န့ၣ်​ ယမၤထွဲအီၤလၢ ယသးစၢ်အခါလံ.” ၂၂ ယ့ၣ်ၡူး နၢ်ဟူဝဲဒ်န့ၣ်​ ဝံၤအလီၢ်ခံ အတဲအီၤလၢ “တၢ်လၢနဘၣ်မၤန့ၣ်​ အိၣ်ဒံးတမံၤလီၤ. ဆါလီၤကွံာ်တၢ်လၢ အအိၣ်ဒီးနၤခဲလၢာ် ဒီးတၢ်လၢ နဒိးန့ၢ်ဘၣ်တဖၣ်န့ၣ်​ နီၤလီၤ ပှၤဖှီၣ်ဖိယာ်ဖိတဖၣ်တက့ၢ်. နမ့ၢ်မၤဒ်န့ၣ်န့ၣ်​ နကအိၣ်ဒီး တၢ်လုၢ်ဒိၣ်ပှ့ၤဒိၣ်လၢ မူခိၣ်လီၤ. မ့ၢ်ဝံၤန့ၣ်​ ဟဲပိာ်ယခံဟီ.”+ ၂၃ မ့ၢ်လၢ ပှၤတဂၤန့ၣ်​ အတၢ်ထူးတၢ်တီၤ အိၣ်ဝဲအါမးအဃိ ဖဲအနၢ်ဟူဝဲ ဒ်န့ၣ်အခါ အသးအုးဝဲဒိၣ်မးလီၤ.+

၂၄ ယ့ၣ်ၡူး ကွၢ်ဃီၤအီၤ ဒီးတဲဝဲလၢ “ပှၤလၢ အစ့အိၣ်သ့ၣ်တဖၣ်​ ကလဲၤနုာ်လီၤလၢ ယွၤအဘီမုၢ်အပူၤန့ၣ်​ ကီမးလီၤ.+ ၂၅ ကီၤလၤအူး လဲၤနုာ်လီၤလၢ ထးဆးတၢ် အမဲၢ်ခံန့ၣ်​ ညီဒိၣ်န့ၢ်ဒံး ပှၤထူးပှၤတီၤတဂၤ ကလဲၤနုာ်လီၤလၢ ကစၢ်ယွၤအဘီမုၢ် အပူၤလီၤ.”+ ၂၆ ပှၤလၢ အနၢ်ဟူဝဲတဖၣ်​ တဲဝဲလၢ “မတဂၤ န့ၢ်ဘၣ်တၢ်အုၣ်က့ၤခီၣ်က့ၤ ကသ့လဲၣ်.”+ ၂၇ ယ့ၣ်ၡူး တဲဝဲလၢ “တၢ်လၢပှၤဟီၣ်ခိၣ်ဖိ မၤဝဲတသ့ဘၣ်န့ၣ်​ ကစၢ်ယွၤ မၤဝဲသ့လီၤ.”+ ၂၈ ဒီးစီၤပ့းတရူး တဲဝဲလၢ “ပပာ်တ့ၢ်ကွံာ် တၢ်လၢအအိၣ်ဒီးပှၤ ဒီးပပိာ်နခံလံ.”+ ၂၉ ယ့ၣ်ၡူးတဲဘၣ်​ အဝဲသ့ၣ်လၢ “ယကတဲဘၣ်သုတီတီလၢ ပှၤလၢအပာ်တ့ၢ်ကွံာ် အဟံၣ်အဃီမ့ၢ်ဂ့ၤ, အမါမ့ၢ်ဂ့ၤ, အဒီပုၢ်ဝဲၢ်မ့ၢ်ဂ့ၤ, အမိၢ်အပၢ်မ့ၢ်ဂ့ၤ, အဖိမ့ၢ်ဂ့ၤ လၢကစၢ်ယွၤအဘီမုၢ်အဃိန့ၣ်+ ၃၀ ကန့ၢ်ဘၣ်က့ၤ အါန့ၢ်ဒံးအလီၢ် အစးအါမး လၢဆၢကတီၢ်ခဲအံၤ ဒီးလၢခါဆူညါန့ၣ်​ ကန့ၢ်ဘၣ်ဝဲ တၢ်မူအထူအယိာ်လီၤ.”+

၃၁ ဒီးယ့ၣ်ၡူးကိးဝဲ အတၢ်မၢဖိတဆံခံဂၤလၢ တၢ်ကပၤ ဒီးတဲအဝဲသ့ၣ်လၢ “ပကလဲၤထီၣ်လၢ ဝ့ၢ်ယရူၤၡလ့ၣ်​ ဒီးတၢ်ခဲလၢာ်လၢ ဝံတဖၣ်​ ကွဲးဝဲဘၣ်ဃးဒီး ပှၤကညီဖိခွါအဂ့ၢ်န့ၣ်​ ကလၢထီၣ်ပှဲၤထီၣ်ဝဲလီၤ.+ ၃၂ အဒိ အဝဲကဘၣ်​ တၢ်ဟ့ၣ်လီၤကွံာ်အီၤလၢ ပှၤကလုာ်တဖၣ်အစုပူၤ+ ဒီးပှၤကဒုၣ်ဒွဲၣ်အီၤ,+ ပှၤကမၤအၢမၤနးအီၤ ဒီးပှၤကထူးပှဲာ်ဒိးအီၤလီၤ.+ ၃၃ အဝဲသ့ၣ်​ ကဖျ့အီၤ ဝံၤဒီးကမၤသံအီၤ+ ဘၣ်ဆၣ်​ လၢသၢသီတသီန့ၣ်​ အဝဲကဂဲၤဆၢထၢၣ်က့ၤဝဲလီၤ.”+ ၃၄ ဘၣ်ဆၣ်​ မ့ၢ်လၢ တၢ်ကတိၤတဖၣ်အံၤ အခီပညီန့ၣ်​ ဘၣ်တၢ်ပာ်ခူသူၣ်အီၤအဃိ အဝဲသ့ၣ်​ တနၢ်ပၢၢ် တၢ်ဂ့ၢ်တဖၣ်အံၤ နီတခါဘၣ်. ဒီးအဝဲသ့ၣ်​ တနၢ်ပၢၢ် တၢ်လၢ အတဲဝဲတဖၣ်ဘၣ်.

၃၅ ဖဲယ့ၣ်ၡူး ဟဲဘူးထီၣ်ဒီး ယရံၤဃိအခါ ပှၤလၢ အမဲာ်ချံတထံၣ်တၢ်တဂၤ ဆ့ၣ်နီၤ ဃ့အီၣ်တၢ်လၢ ကျဲကပၤလီၤ.+ ၃၆ မ့ၢ်လၢအနၢ်ဟူဝဲ ပှၤဂီၢ်မုၢ်တဖၣ်​ ဟဲဝဲအဃိ အဝဲသံကွၢ်ဝဲလၢ ပှၤမၤတၢ်မနုၤလဲၣ်. ၃၇ အဝဲသ့ၣ်​ တဲအီၤလၢ “ပှၤနစၤရ့းဖိ ယ့ၣ်ၡူးဟဲလံ.” ၃၈ ဖဲန့ၣ်​ အဝဲကိးပသူထီၣ်ဝဲလၢ “စီၤဒၤဝံးအဖိခွါ ယ့ၣ်ၡူးဧၢ, သးကညီၤယၤမီၤ.” ၃၉ ဒီးပှၤလၢ အအိၣ်လၢ တၢ်မဲာ်ညါတဖၣ်​ ဒူအီၤဒီး မၢအအိၣ်ဘှ့ၣ်လီၤ. ဘၣ်ဆၣ်​ အဝဲကိးပသူထီၣ်ဝဲ ဆူၣ်န့ၢ်ဒံးအလီၢ်လၢ “စီၤဒၤဝံးအဖိခွါဧၢ, သးကညီၤယၤမီၤ.” ၄၀ အဃိ ယ့ၣ်ၡူးအိၣ်ပတုာ် ဒီးမၢပှၤဟဲကိး ပှၤတဂၤန့ၣ်​ လၢအအိၣ်လီၤ. ဖဲအဟဲဘူးထီၣ်ဝဲအခါ ယ့ၣ်ၡူး သံကွၢ်အီၤလၢ ၄၁ “နအဲၣ်ဒိးလၢ ယကမၤန့ၢ်နၤ တၢ်မနုၤလဲၣ်.” အဝဲတဲဝဲ “ကစၢ်ဧၢ, ယအဲၣ်ဒိး ထံၣ်ထီၣ်က့ၤတၢ်လီၤ.” ၄၂ အဃိ ယ့ၣ်ၡူးတဲအီၤလၢ “နတၢ်နာ် မၤဘျါက့ၤနၤလံ. ထံၣ်ထီၣ်က့ၤတၢ်တက့ၢ်.”+ ၄၃ တဘျီဃီန့ၣ်​ အဝဲထံၣ်ထီၣ်က့ၤတၢ် ဒီးပိာ်ထီၣ်​ ယ့ၣ်ၡူးအခံ+ ဒီးမၤလၤကပီၤ ကစၢ်ယွၤလီၤ. တကးဒံးဘၣ်​ ဖဲပှၤထံၣ်ဘၣ်​ တၢ်မၤအသးအံၤအခါ ပှၤခဲလၢာ် စံးထီၣ်ပတြၢၤ ကစၢ်ယွၤလီၤ.+