မၤတၢ်
၁၆ ဒီးစီၤပီလူး လဲၤတုၤလၢ ဝ့ၢ်ဒ့ၢ်ဘ့ၤဒီးလဲၤဝဲလၢ ဝ့ၢ်လူစတြၤလီၤ.+ ဒီးယ့ၣ်ၡူးအပျဲၢ်အဘီၣ်လၢ အမ့ၢ် စီၤတံၤမသ့းတဂၤန့ၣ်+ အိၣ်ဖဲန့ၣ်လီၤ. အမိၢ်မ့ၢ် ပှၤယူဒၤဖိ လၢအစူၢ်က့ၤနာ်က့ၤတၢ် ဘၣ်ဆၣ် အပၢ်န့ၣ် မ့ၢ်ဝဲပှၤကြံးဖိတဂၤလီၤ. ၂ ဒီးဒီပုၢ်ဝဲၢ်တဖၣ်လၢ ဝ့ၢ်လူစတြၤ ဒီးဝ့ၢ်အံၤကနံၤန့ၣ် ပတြၢၤအီၤ ဒိၣ်မးလီၤ. ၃ စီၤပီလူး အဲၣ်ဒိးဝဲလၢ စီၤတံၤမသ့း ကလဲၤသကိးတၢ်ဒီးအီၤအဃိ အဝဲကိးန့ၢ်အီၤလီၤ. ဘၣ်ဆၣ် ပှၤယူဒၤဖိလၢ တၢ်လီၢ်ဖဲန့ၣ်တဖၣ်+ သ့ၣ်ညါဝဲလၢ စီၤတံၤမသ့း အပၢ်မ့ၢ်ပှၤကြံးဖိအဃိ စီၤပီလူး ကူးတရံးအီၤလီၤ. ၄ ဖဲအဝဲသ့ၣ် ဆဲးလဲၤလၢ ဝ့ၢ်တဖျၢၣ်ဘၣ် တဖျၢၣ်အခါ အဝဲသ့ၣ် ဟ့ၣ်လီၤဝဲ ဒီပုၢ်ဝဲၢ်တဖၣ် တၢ်သိၣ်တၢ်သီတဖၣ်လၢ အဟဲလၢ တၢ်မၢဖိဒီး တၢ်အိၣ်ဖှိၣ်သးပှၢ်လၢ ဝ့ၢ်ယရူၤၡလ့ၣ် အအိၣ် ဒ်သိးဒီပုၢ်ဝဲၢ်တဖၣ် ကမၤထွဲဝဲအဂီၢ်လီၤ.+ ၅ အဃိ တၢ်အိၣ်ဖှိၣ်ဖိတဖၣ် အတၢ်နာ် ဆဲးဂၢၢ်ကျၢၤထီၣ်ဝဲ ဒီးတနံၤဘၣ်တနံၤန့ၣ် အဝဲသ့ၣ်အနီၣ်ဂံၢ် ဟဲအါထီၣ်ဝဲ ရုၢ်ရုၢ်လီၤ.
၆ ဒီးသးစီဆှံ တပျဲအဝဲသ့ၣ် လဲၤစံၣ်တဲၤတဲလီၤ ယွၤအကလုၢ်ကထါလၢ အၤစံကီၢ်ရ့ၣ်အပူၤဘၣ်. အဃိ အဝဲသ့ၣ် လဲၤဝဲလၢ ကီၢ်ဖြူၤကံ ဒီးကီၢ်ကလၤတံလီၤ.+ ၇ တကးဒံးဘၣ် ဖဲအဝဲသ့ၣ် လဲၤလီၤတုၤလၢ မူၤစံအခါ အဝဲသ့ၣ် ဂုာ်ကျဲးစၢးဝဲ ဒ်သိးကလဲၤလၢ ဘံၤသူၤနံအပူၤလီၤ.+ ဘၣ်ဆၣ် ယ့ၣ်ၡူးအသး* တဟ့ၣ် အဝဲသ့ၣ်အခွဲးဘၣ်. ၈ အဃိ အဝဲသ့ၣ်လဲၤခီဂာ် မူၤစံ ဒီးလဲၤလီၤဝဲလၢ ဝ့ၢ်တြိၤအါလီၤ. ၉ ဖဲမုၢ်နၤခီန့ၣ် စီၤပီလူးထံၣ်ဝဲ တၢ်ထံၣ်လၢညါခီလၢ ပှၤမၤက့းဒနံခွါတဂၤ ဆၢထၢၣ် ဃ့ကညးအီၤလၢ “ဟဲလၢ ကီၢ်မၤက့းဒနံအပူၤ ဒီးမၤစၢၤပှၤမီၤ.” ၁၀ မ့ၢ်လၢ ပနၢ်ပၢၢ်ထီၣ်လၢ ကစၢ်ယွၤကိးဃီၤပှၤ ဒ်သိးပကလဲၤ စံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ် အဃိ ဖဲစီၤပီလူးထံၣ် တၢ်ထံၣ်လၢညါခီ ဝံၤတဘျီဃီန့ၣ် ပလဲၤလၢ ကီၢ်မၤက့းဒနံလီၤ.
၁၁ အဃိန့ၣ် ပဒိးထီၣ် ကဘီလၢ ဝ့ၢ်တြိၤအါ ဒီးလဲၤလၢ ကီးစၤမသြါက့ၤ တဘျီဃီ ဘၣ်ဆၣ် လၢခံတနံၤန့ၣ် ပလဲၤလၢ ဝ့ၢ်နါပလံၣ်, ၁၂ ဒီးပလဲၤကဒီးလၢ ဝ့ၢ်ဖံလံးပံၤ+ လၢအမ့ၢ် ရိမ့ၤအဝ့ၢ်လၢ အရ့ဒိၣ်ကတၢၢ်တဝ့ၢ်လၢ မၤက့းဒနံ အဟီၣ်ကဝီၤအပူၤလီၤ. ဒီးပအိၣ်ဖဲ ဝ့ၢ်တဖျၢၣ်န့ၣ် စှၤကိာ်သီလီၤ. ၁၃ ဖဲမုၢ်အိၣ်ဘှံးနံၤန့ၣ် ပလဲၤလၢ ဝ့ၢ်ချၢလၢထံကျိကပၤ ဖဲတၢ်လီၢ်လၢ ပဆိကမိၣ်လၢ အအိၣ်ဒီး တၢ်ဘါထုကဖၣ်တၢ် အလီၢ်လီၤ. ဒီးပဆ့ၣ်နီၤတဲတၢ်ဒီး ပိာ်မုၣ်လၢ အဟဲအိၣ်ဖှိၣ် ဖဲန့ၣ်တဖၣ်လီၤ. ၁၄ ဒီးပိာ်မုၣ်တဂၤလၢ အမံၤမ့ၢ် နီၢ်လူၤဒံန့ၣ် ဒိကနၣ်တၢ်လီၤ. အဝဲမ့ၢ်ပှၤလၢ အဟဲလၢ ဝ့ၢ်သူၤအတံရၤ+ လၢအဆါ တၢ်ကူတၢ်ကၤလၢ အလွဲၢ်လုး ဒီးအဝဲမ့ၢ်စ့ၢ်ကီး ပှၤလၢ အဘူၣ်ထီၣ်ဘါထီၣ်ယွၤလီၤ. ဒီးယဟိဝၤယွၤ* အိးထီၣ်အသး လၢလၢပှဲၤပှဲၤ ဒ်သိး အကဒိကနၣ်တၢ်လၢ စီၤပီလူးတဲဝဲတဖၣ် ထံထံဆးဆး အဂီၢ်လီၤ. ၁၅ ဖဲအဝဲဒီး ပှၤလၢအအိၣ် ဟံၣ်တဖျၢၣ်ဃီဒီးအီၤတဖၣ် ဒိးဘျၢထံဝံၤအလီၢ်ခံ+ အဝဲဃ့ကညးပှၤလၢ “သုမ့ၢ်ထံၣ်ယၤ ဒ်ပှၤလၢ အတီဒီးယဟိဝၤယွၤန့ၣ် ဟဲအိၣ်လၢယဟံၣ်မီၤ.” ဒီးအဝဲ ကိးန့ၢ်ဆူၣ်ပှၤလီၤ.
၁၆ ဖဲပလဲၤတၢ်လၢ တၢ်ဘါထုကဖၣ်တၢ် အလီၢ်အခါ လၢကျဲန့ၣ် ကုၢ်ပိာ်မုၣ်တဂၤ ဟဲသဂၢၢ်ပှၤလီၤ. ပိာ်မုၣ်တဂၤန့ၣ် အိၣ်ဒီး တၢ်ဝံတၢ်နါလၢ အဒုးဖးအီၤတၢ်လၢ အကမၤအသးလၢ ခါဆူညါအဂ့ၢ်လီၤ.+ ဒီးမ့ၢ်လၢ အဝဲဖးတၢ်အဃိ အမၤန့ၢ်တၢ်ထူးတၢ်တီၤလၢ အကစၢ်တဖၣ်အဂီၢ် ဒီဒူၣ်လီၤ. ၁၇ ပိာ်မုၣ်တဂၤအံၤ ဆဲးပိာ်ပခံ ဒီးကိးပသူထီၣ်ဝဲလၢ “ပှၤတဖၣ်အံၤ မ့ၢ်ဝဲကစၢ်ယွၤလၢ အထီကတၢၢ်တဂၤ အကုၢ်တဖၣ်+ ဒီးစံၣ်တဲၤတဲလီၤသုလၢ တၢ်အုၣ်က့ၤခီၣ်က့ၤ အကျဲလီၤ.” ၁၈ အဝဲဆဲးမၤဝဲဒ်အံၤ အါနံၤအါသီလီၤ. ဒီးစီၤပီလူး ကနၣ်ဝဲတကဲလၢၤဘၣ်အဃိ အဝဲဃၣ်ဃီၤအသးဒီး တဲတၢ်ဝံတၢ်နါလၢ “ယမၤလိာ်နၤလၢ ယ့ၣ်ၡူးခရံာ်အမံၤ, ဟးထီၣ်ကွံာ်လၢ ပိာ်မုၣ်အံၤအပူၤတက့ၢ်.” ဒီးတၢ်ဝံတၢ်နါတဒုန့ၣ် ဟးထီၣ်ကွံာ်ဝဲ တဘျီဃီလီၤ.+
၁၉ ဖဲပိာ်မုၣ် အကစၢ်တဖၣ် ထံၣ်ဘၣ်ဝဲလၢ အဝဲသ့ၣ်တန့ၢ်ဘၣ် တၢ်ထူးတၢ်တီၤလၢ ပိာ်မုၣ်တဂၤအံၤ အဃိလၢၤဘၣ်အခါ+ အဝဲသ့ၣ်ဖီၣ် စီၤပီလူးဒီး စီၤစံလၤ ဒီးလဲၤတွံၢ် အဝဲသ့ၣ်လၢ ပှၤခိၣ်ပှၤနၢ် အအိၣ်လၢ တၢ်ဆါတၢ်ပှ့ၤအလီၢ်လီၤ.+ ၂၀ ဒီးလဲၤကိး အဝဲသ့ၣ်လၢ ကမျၢၢ်အပဒိၣ် ဖးဒိၣ်တဖၣ်အအိၣ် ဒီးတဲဝဲလၢ “ပှၤတဖၣ်အံၤ မ့ၢ်ပှၤယူဒၤဖိ ဒီးအဝဲသ့ၣ်ဒုးအိၣ်ထီၣ် တၢ်ကီတၢ်ခဲလၢ ပဝ့ၢ်ပူၤ သပှၢ်တၢၢ်လီၤ.+ ၂၁ ဒီးအဝဲသ့ၣ် စံၣ်တဲၤတဲလီၤ တၢ်အလုၢ်အလၢ်တဖၣ်လၢ ပဝဲ ပှၤရိမ့ၤဖိတဖၣ် တကြၢးတူၢ်လိာ် ဒီးမၤထွဲအီၤဘၣ်လီၤ.” ၂၂ ဒီးပှၤကမျၢၢ်တဖၣ် ထီဒါအဝဲသ့ၣ် ဒီးကမျၢၢ်အပဒိၣ် ဖးဒိၣ်တဖၣ် ဖှီညာ်အဝဲသ့ၣ် အဆ့ကၤ ဒီးဟ့ၣ်လီၤတၢ်ကလုၢ်လၢ ပှၤကတီၢ် အဝဲသ့ၣ်ဒီးနီၣ်တီၢ်လီၤ.+ ၂၃ အဃိ ပှၤတီၢ်အဝဲသ့ၣ်အါထံၣ် ဝံၤအလီၢ်ခံ ပှၤဖၢနုာ်အဝဲသ့ၣ်လၢ ဃိာ်ပူၤ ဒီးမၤလိာ်ပှၤခိးဃိာ်ဖိတဂၤ ဒ်သိးကပၢၤဃာ် အဝဲသ့ၣ် ဂ့ၤဂ့ၤလီၤ.+ ၂၄ မ့ၢ်လၢ တၢ်ကလုၢ်လီၤဒ်န့ၣ်အဃိ ပှၤခိးဃိာ်ဖိတဂၤန့ၣ် ဖၢနုာ်အဝဲသ့ၣ်လၢ ဃိာ်အဒၢးလၢ အအိၣ်လၢ ဃိာ်အခၢၣ်သး ဒီးကျီၤတံၢ်ဃာ် အဝဲသ့ၣ်အခီၣ်လၢ သ့ၣ်ကျီၤလီၤ.
၂၅ ဖဲဖးဖီမုၢ်န့ၣ် စီၤပီလူး ဒီးစီၤစံလၤ ဃ့ထုကဖၣ်တၢ် ဒီးသးဝံၣ် စံးထီၣ်ပတြၢၤကစၢ်ယွၤ+ ဒီးပှၤဃိာ်ဖိတဖၣ် ဒိကနၣ်အဝဲသ့ၣ်လီၤ. ၂၆ သတူၢ်ကလာ်န့ၣ် ဟီၣ်ခိၣ်ဟူးဝဲ ဆူၣ်ဆူၣ်အဃိ ဃိာ်န့ၣ်ဟူးဝဲလီၤ. တကးဒံးဘၣ် တြဲၤခဲလၢာ် အိးထီၣ်အသးတဘျီဃီ ဒီးပျံၤထးတဖၣ်လၢ ပှၤခဲလၢာ်အလိၤန့ၣ် လီၤဃဲၣ်ကွံာ်ဝဲလီၤ.+ ၂၇ ဖဲပှၤခိးဃိာ်ဖိတဂၤ ပၢၢ်ထီၣ်အခါ အထံၣ်ဝဲလၢဃိာ်အတြဲၤ အိးထီၣ်အသးအဃိ အဆိကမိၣ်ဝဲလၢ ပှၤဃိာ်ဖိတဖၣ် ဃ့ၢ်ပူၤဖျဲးကွံာ်အသးလံ. အဃိ အဝဲထုးထီၣ်အနး ဒ်သိး အကမၤသံလီၤအသးအဂီၢ်လီၤ.+ ၂၈ ဘၣ်ဆၣ် စီၤပီလူး ကိးပသူထီၣ်လၢ အကလုၢ်ဖးဒိၣ်လၢ “တဘၣ် မၤဆါလီၤနသးတဂ့ၤ, ပအိၣ်ဖဲအံၤ ကိးဂၤဒဲးလီၤ.” ၂၉ အဃိ ပှၤခိးဃိာ်ဖိတဂၤန့ၣ် မၢပှၤဟဲစိာ် မ့ၣ်အူဒၢတဖၣ် ဒီးလၢတၢ်ကနိးကစုာ်အပူၤ အဝဲလဲၤဃ့ၢ်ဝဲလၢ စီၤပီလူးဒီး စီၤစံလၤအအိၣ် ဒီးထိၣ်လီၤပှီၤအသးလၢ အဝဲသ့ၣ် အခီၣ်ထံးလီၤ. ၃၀ ဒီးအဝဲကိးထီၣ် အဝဲသ့ၣ်လၢတၢ်ချၢ ဒီးတဲဝဲလၢ “ဒ်သိး ယကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ယကဘၣ်မၤဒ်လဲၣ်.” ၃၁ အဝဲသ့ၣ် တဲဝဲလၢ “ဒ်သိး နၤဒီးပှၤလၢအအိၣ်လၢ ဟံၣ်တဖျၢၣ်ဃီဒီးနၤ ကိးဂၤဒဲး ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် စူၢ်က့ၤနာ်က့ၤ ကစၢ်ယ့ၣ်ၡူးတက့ၢ်.”+ ၃၂ ဒီးအဝဲသ့ၣ် စံၣ်တဲၤတဲလီၤ ပှၤတဂၤန့ၣ်ဒီး ပှၤလၢအအိၣ်လၢ ဟံၣ်တဖျၢၣ်ဃီဒီးအီၤ ကိးဂၤဒဲးလၢ ယဟိဝၤယွၤ အကလုၢ်ကထါလီၤ. ၃၃ ဖဲတၢ်တနၤန့ၣ် အဝဲလဲၤကိး အဝဲသ့ၣ်လၢ တၢ်လီၢ်တတီၤ ဒ်သိးကသ့န့ၢ် အဝဲသ့ၣ် အတၢ်ပူၤလီၢ် အဂီၢ်လီၤ. ဒီးအဝဲဒီး ပှၤလၢအအိၣ်ဟံၣ်တဖျၢၣ်ဃီဒီးအီၤ ကိးဂၤဒဲးန့ၣ် ဒိးဘျၢထံတဘျီဃီလီၤ.+ ၃၄ အဝဲဟဲက့ၤကိး အဝဲသ့ၣ်လၢ အဟံၣ်ဒီး ဒုးအီၣ်ဒုးအီ အဝဲသ့ၣ်လီၤ. ဒီးအဝဲဒီး ပှၤလၢအိၣ်လၢအဟံၣ်ပူၤ ခဲလၢာ်သးခုဝဲဒိၣ်မး, မ့ၢ်လၢအစူၢ်က့ၤနာ်က့ၤ ကစၢ်ယွၤအဃိလီၤ.
၃၅ ဖဲမုၢ်ဝါထီၣ်န့ၣ် ကမျၢၢ်အပဒိၣ် ဖးဒိၣ်တဖၣ် ဆှၢလီၤ ပှၤခိးတၢ်ဖိတဖၣ် ဒ်သိး အကဟ့ၣ်လီၤ တၢ်ကလုၢ်လၢ ပှၤကပျၢ်ကွံာ် အဝဲသ့ၣ်အဂီၢ်လီၤ. ၃၆ ပှၤဃိာ်ဖိတဂၤ တဲဘၣ် စီၤပီလူးလၢ တၢ်ကတိၤတဖၣ်န့ၣ် ဒီးတဲဝဲလၢ “ကမျၢၢ်အပဒိၣ် ဖးဒိၣ်တဖၣ် ဟ့ၣ်လီၤတၢ်ကလုၢ်လၢ ပှၤကပျၢ်ကွံာ် သုခံဂၤလီၤ. အဃိ ဟးထီၣ်ကွံာ်ခဲအံၤ ဒီးက့ၤမုာ်မုာ်တက့ၢ်.” ၃၇ ဘၣ်ဆၣ် စီၤပီလူးတဲဘၣ် အဝဲသ့ၣ်လၢ “ပတၢ်ကမၣ် တအိၣ်နီတမံၤဘၣ် ဒီးပဝဲ ပမ့ၢ်ပှၤရိမ့ၤဖိတဖၣ်+ သနာ်က့ အဝဲသ့ၣ်တီၢ်ပှၤလၢ ကမျၢၢ်အမဲာ်ညါ ဒီးဖၢနုာ်ပှၤလၢ ဃိာ်ပူၤလီၤ. ဒီးခဲအံၤန့ၣ် အဝဲသ့ၣ် ကနီဟးထီၣ် ခူသူၣ်ပှၤဟီဧါ. လ့ၤတက့ၤ တသ့ဘၣ်. အဝဲသ့ၣ် ကဘၣ်ဟဲ ဒီးဆှၢထီၣ်ပှၤလၢ အနီၢ်ကစၢ်လီၤ.” ၃၈ ဒီးပှၤခိးတၢ်ဖိတဖၣ် က့ၤတဲဘၣ် ကမျၢၢ်အပဒိၣ် ဖးဒိၣ်တဖၣ်လၢ တၢ်ကတိၤတဖၣ်အံၤလီၤ. ဖဲအဝဲသ့ၣ် နၢ်ဟူဝဲလၢ စီၤပီလူးဒီး စီၤစံလၤ မ့ၢ်ဝဲ ပှၤရိမ့ၤဖိအခါ အဝဲသ့ၣ်ပျံၤတၢ်လီၤ.+ ၃၉ အဃိ အဝဲသ့ၣ် ဟဲဃ့ဝံသးစူၤ စီၤပီလူးဒီး စီၤစံလၤလီၤ. ဝံၤဒီး ဆှၢထီၣ် အဝဲသ့ၣ် လၢတၢ်ချၢ ဒီးဃ့ကညး အဝဲသ့ၣ်ဒ်သိး ကဟးထီၣ်လၢဝ့ၢ်ပူၤလီၤ. ၄၀ ဘၣ်ဆၣ် အဝဲသ့ၣ်ဟးထီၣ်လၢ ဃိာ်ပူၤဝံၤဒီး အဝဲသ့ၣ်လဲၤဝဲလၢ နီၢ်လူၤဒံအဟံၣ်လီၤ. ဒီးဖဲအဝဲသ့ၣ်ထံၣ် ဒီပုၢ်ဝဲၢ်တဖၣ်အခါ အဝဲသ့ၣ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်+ ဝံၤဒီးက့ၤဝဲလီၤ.