၁ ၡမူၤအ့လး
၂၅ လၢခံ စီၤၡမူၤအ့လး+ သံဝဲ ဒီးပှၤအံၣ်စရ့လးဖိ ခဲလၢာ် ပာ်ဖှိၣ်ထီၣ်အသး ဒီးဟီၣ်ဝဲလၢအဃိ ဒီးခူၣ်လီၤကွံာ်အီၤ ဘူးဒီးအဟံၣ် လၢဝ့ၢ်ရၤမါအပူၤလီၤ.+ ဒီးစီၤဒၤဝံး ဟးထီၣ် ဒီးလဲၤလီၤဝဲလၢ ပၤရၣ်အပှၢ်မုၢ်ကနၢလီၤ.
၂ ပှၤပိာ်ခွါလၢ အအိၣ်လၢ ဝ့ၢ်မၤဧိၣ်အပူၤ+ ဒီးအမၤတၢ် လၢဝ့ၢ်ကၢ်မ့ၤလးန့ၣ်+ အိၣ်ဝဲတဂၤလီၤ. ပှၤပိာ်ခွါတဂၤန့ၣ် မ့ၢ်ပှၤလၢ အကဲဒိၣ် ဒိၣ်မးလီၤ. အသိအိၣ်ဝဲ အဒု ၃,၀၀၀ ဒီးအမဲာ်တဲးလဲး အိၣ်ဝဲအဒု ၁,၀၀၀ ဒီးအတံာ်အသိတဖၣ်အဆူၣ် လၢဝ့ၢ်ကၢ်မ့ၤလးလီၤ. ၃ ဒီးပိာ်ခွါတဂၤန့ၣ် အမံၤမ့ၢ် စီၤနၤဘလး+ ဒီးအမါအမံၤမ့ၢ် နီၢ်အဘံၤကါယံးလးလီၤ.+ ဒီးနီၢ်အဘံၤကါယံးလး မ့ၢ်ပိာ်မုၣ်လၢ အသးဆး ဒီးအဒိၣ်တၢ်ဂ့ၤမးလီၤ. မ့မ့ၢ်အဝၤန့ၣ် မ့ၢ်ပှၤလၢ အဆူၣ်အကိၤတဂၤ ဒီးအလုၢ်လၢ်သကဲာ်ပဝး တဂ့ၤဘၣ်.+ ဒီးအဝဲဟဲလီၤစၢၤလီၤသွဲၣ်လၢ စီၤကၤလ့း+ အဒူၣ်ဖိထၢဖိလီၤ. ၄ ဖဲစီၤဒၤဝံး အိၣ်ဝဲလၢ ပှၢ်မုၢ်ကနၢအခါ အနၢ်ဟူဝဲလၢ စီၤနၤဘလး တံာ်အသိတဖၣ် အဆူၣ်လီၤ. ၅ အဃိ စီၤဒၤဝံးမၢလီၤ ပှၤပိာ်ခွါသးစၢ် အဂၤတဆံ ဒ်သိးအဝဲသ့ၣ် ကလဲၤလၢ စီၤနၤဘလးအအိၣ် ဒီးစီၤဒၤဝံး တဲအဝဲသ့ၣ်လၢ “လဲၤလၢဝ့ၢ်ကၢ်မ့ၤလး ဒီးဖဲသုလဲၤတုၤလၢ စီၤနၤဘလးအဟံၣ်အခါ တဲအီၤလၢ ယသံကွၢ် အတၢ်အိၣ်ဆူၣ်အိၣ်ချ့အဂ့ၢ်တက့ၢ်. ၆ ဒီးတဲအီၤလၢ ‘မ်နသးသမူထီတက့ၢ်. ဒီးမ်တၢ်ဃူတၢ်ဖိး အိၣ်ဒီးနၤ, ပှၤလၢအအိၣ်လၢ နဟံၣ်ပူၤ ဒီးတၢ်လၢအအိၣ်ဒီးနၤ ခဲလၢာ်တက့ၢ်. ၇ ခဲအံၤ ယနၢ်ဟူလၢ နတံာ်နသိတဖၣ် အဆူၣ်လီၤ. ဖဲနပှၤကွၢ်သိတဖၣ် အိၣ်ဒီးပှၤအခါ ပတမၤဘၣ်ဒိအဝဲသ့ၣ်ဘၣ်+ ဒီးဖဲအဝဲသ့ၣ် အိၣ်လၢ ဝ့ၢ်ကၢ်မ့ၤလး ဒီတကတီၢ်ညါန့ၣ် အဝဲသ့ၣ် တထံၣ်လၢ အတၢ်လီၤမၢ်နီတမံၤဘၣ်. ၈ သံကွၢ် နခ့နပှၤသးစၢ်တဖၣ် ဒီးအဝဲသ့ၣ် ကတဲနၤလီၤ. မ့ၢ်လၢ ယပှၤတဖၣ်ဟဲလၢ တၢ်ဆၢကတီၢ် လၢအလီၤသူၣ်ခုသးခု အကတီၢ်အဃိ မ်နဘၣ်သူၣ်ဘၣ်သး အဝဲသ့ၣ်တက့ၢ်. ဝံသးစူၤ တၢ်လၢနဟ့ၣ်လီၤသ့ မ့ၢ်အိၣ်တမံၤမံၤန့ၣ် ဟ့ၣ်လီၤ နခ့နပှၤ ပဝဲတဖၣ်အံၤ ဒီးနဖိခွါ စီၤဒၤဝံး တက့ၢ်.’”+
၉ အဃိ စီၤဒၤဝံး အပှၤတဖၣ် လဲၤတဲဘၣ် စီၤနၤဘလးလၢ တၢ်လၢစီၤဒၤဝံး တဲဝဲခဲလၢာ်လီၤ. ဖဲအဝဲသ့ၣ် တဲတၢ်ဝံၤအခါ ၁၀ စီၤနၤဘလး တဲဆၢ စီၤဒၤဝံး အခ့အပှၤတဖၣ်လၢ “စီၤယံးၡဲအဖိခွါ စီၤဒၤဝံးဧါ. မ့ၢ်အဆိကမိၣ်လီၤအသးလၢ အကဲမတဂၤလဲၣ်. ဆၢကတီၢ်ခဲအံၤ ကုၢ်တဖၣ်လၢ အဃ့ၢ်ပူၤဖျဲးအသးလၢ အကစၢ်အအိၣ်န့ၣ် အိၣ်ဝဲဒီဒူၣ်.+ ၁၁ ယကိၣ်, ယထံ ဒီးယဆၣ်ဖိကီၢ်ဖိလၢ ယဒိသံလီၤအီၤလၢ ယပှၤတံာ်တၢ်ဖိတဖၣ်အဂီၢ်န့ၣ် မ့ၢ်ယဘၣ် ဟ့ၣ်လီၤအီၤလၢ ပှၤတဒူၣ်အံၤဧါ. အဝဲသ့ၣ် ဟဲဖဲလဲၣ်န့ၣ် ယတဲမးတဘၣ်ဘၣ်.”
၁၂ ဒီးစီၤဒၤဝံး အပှၤတဖၣ် က့ၤကဒါက့ၤ ဒီးတဲဘၣ်အီၤလၢ တၢ်ကတိၤတဖၣ်န့ၣ် ခဲလၢာ်လီၤ. ၁၃ တဘျီဃီန့ၣ် စီၤဒၤဝံး တဲဘၣ် အပှၤတဖၣ်လၢ “စၢထီၣ်သုနး ကိးဂၤဒဲး.”+ အဃိ အဝဲသ့ၣ် စၢထီၣ်အနးတဖၣ် ဒီးစီၤဒၤဝံးစ့ၢ်ကီး စၢထီၣ်အနး ဒီးပှၤပိာ်ခွါ အဂၤ ၄၀၀ လဲၤပိာ် စီၤဒၤဝံးအခံလီၤ. မ့မ့ၢ် ပှၤပိာ်ခွါအဂၤ ၂၀၀ န့ၣ်အိၣ်ခိးကွၢ်ထွဲဝဲ တၢ်ဖိတၢ်လံၤလီၤ.
၁၄ ဖဲန့ၣ်အဆၢကတီၢ် စီၤနၤဘလး အခ့အပှၤတဂၤ တဲဘၣ် စီၤနၤဘလးအမါ နီၢ်အဘံၤကါယံးလးလၢ “စီၤဒၤဝံး ဆှၢလီၤပှၤစိာ်တၢ်ကစီၣ်ဖိ လၢအဟဲလၢ ပှၢ်မုၢ်ကနၢ ဒ်သိးကဆၢဂ့ၤဆၢဝါ ပကစၢ်လီၤ. ဘၣ်ဆၣ် ပကစၢ်ကိးဃါ ဒီးတဲဆါ အဝဲသ့ၣ်လီၤ.+ ၁၅ ပှၤပိာ်ခွါတဖၣ်န့ၣ် မၤဂ့ၤပှၤ အါမးလီၤ. အဝဲသ့ၣ် တမၤဘၣ်ဒိပှၤဘၣ် ဒီးဖဲပအိၣ်ဒီး အဝဲသ့ၣ် တပူၤဃီ လၢပျီပူၤအဆၢကတီၢ်န့ၣ် ပတၢ်တလီၤမၢ် နီတမံၤဘၣ်.+ ၁၆ ဒီးဖဲပအိၣ်ဒီး အဝဲသ့ၣ် ဒီးကွၢ်ထွဲသိတဖၣ် ဒီတကတီၢ်န့ၣ် လၢမုၢ်နၤမ့ၢ်ဂ့ၤ လၢမုၢ်ဆါမ့ၢ်ဂ့ၤ အဝဲသ့ၣ် ကဲဝဲဒ်သိးဒီး တၢ်ဒူၣ် လၢအဒီသဒၢပှၤလီၤ. ၁၇ တၢ်ကီတၢ်ခဲ ကဘၣ် ပကစၢ် ဒီးပဝဲခဲလၢာ်န့ၣ် လီၤတံၢ်လံ.+ ပကစၢ်န့ၣ် မ့ၢ်ပှၤလၢ အတကဲဘျုးနီတစဲးဘၣ်+ အဃိ ပှၤတဲတၢ်ဒီးအီၤတန့ၢ် နီတဂၤဘၣ်. အဃိ ခဲအံၤ နကမၤမနုၤလဲၣ်န့ၣ် ဆၢတဲာ်တၢ်တက့ၢ်.”
၁၈ အဃိ နီၢ်အဘံၤကါယံးလး+ လဲၤဝဲချ့ချ့ ဒီးဟံးန့ၢ် ကိၣ်အလိၣ် ၂၀၀, ကိဖးဒိၣ်ခံဖျၢၣ် လၢအပှဲၤဒီး စပံးထံ, သိယဲၢ်ဒုလၢ တၢ်ကတဲာ်ကတီၤပာ်စၢၤအီၤလၢ ကဖီအီၣ်အီၤအဂီၢ်, ဘုအဝဲာ်ယဲၢ်စ့အၤ,* ကိၣ်လၢအဘၣ်တၢ်တ့အီၤလၢ စပံးသၣ်ဃ့အလိၣ် ၁၀၀ ဒီးကိၣ်လၢ အဘၣ်တၢ်တ့အီၤလၢ ချၢၣ်ဒၢသၣ် အလိၣ် ၂၀၀ ဒီးအပာ်ထီၣ်ဝဲ တၢ်ခဲလၢာ်လၢ ကသ့ၣ်ယီၤတဖၣ် အဖီခိၣ်လီၤ.+ ၁၉ ဒီးနီၢ်အဘံၤကါယံးလး တဲဘၣ် အခ့အပှၤတဖၣ်လၢ “လဲၤဆိလၢ ယမဲာ်ညါ ဒီးယကလဲၤပိာ်သုခံလီၤ.” ဘၣ်ဆၣ် အဝဲတတဲဘၣ် အဝၤစီၤနၤဘလး တၢ်နီတမံၤဘၣ်.
၂၀ ဖဲနီၢ်အဘံၤကါယံးလး လဲၤဒိးကသ့ၣ်ယီၤအခါ ကစၢၢ်အိၣ်တဒၢအီၤအဃိ စီၤဒၤဝံးဒီး အခ့အပှၤတဖၣ် ဟဲဝဲလၢ အအိၣ်လိၤလိၤ ဘၣ်ဆၣ် တထံၣ်စိအီၤဘၣ်. လၢခံ နီၢ်အဘံၤကါယံးလး ထံၣ်လိာ်သးဒီး အဝဲသ့ၣ်လီၤ. ၂၁ စီၤဒၤဝံး တဲလီၤအသးလၢ “ယကဟုကယာ် ပှၤတဂၤအံၤအတၢ် ခဲလၢာ်လၢ ပှၢ်မုၢ်ကနၢအပူၤန့ၣ် အဘျုးတအိၣ်နီတမံၤဘၣ်. တၢ်လၢအအိၣ်ဒီးအီၤတဖၣ်န့ၣ် တလီၤမၢ်နီတမံၤဘၣ်.+ ယမၤဂ့ၤအီၤ သနာ်က့ အမၤဆၢက့ၤယၤ လၢတၢ်အၢဟီ.+ ၂၂ အဃိ တုၤလၢ ဂီၤခီန့ၣ် ယမ့ၢ်ပာ်မူဒံး ပှၤပိာ်ခွါလၢ အအိၣ်လၢ စီၤနၤဘလးအဟံၣ်ပူၤ ထဲတဂၤဒၣ်လဲာ် မ်ကစၢ်ယွၤ ဟ့ၣ်ကၣ် ယ* ဒုၣ်ယဒါတဖၣ် ဒီးသိၣ်ဃီၣ် အဝဲသ့ၣ် ဆူၣ်ဆူၣ်တက့ၢ်.”
၂၃ ဖဲနီၢ်အဘံၤကါယံးလး ထံၣ်စီၤဒၤဝံးအခါ အဝဲကရီစံၣ်လီၤလၢ ကသ့ၣ်ယီၤအလိၤ ဒီးထိၣ်လီၤပှီၤအသးလၢ ဟီၣ်ခိၣ်လိၤ လၢစီၤဒၤဝံးအမဲာ်ညါလီၤ. ၂၄ ဒီးအဝဲထိၣ်လီၤပှီၤအသးလၢ စီၤဒၤဝံး အခီၣ်လၣ်အဃၢၤ ဒီးတဲဝဲလၢ “ကစၢ်ဧၢ, ပာ်ထီၣ်တၢ်ကမၣ် လၢယလိၤဟီ. ဟ့ၣ်အခွဲးလၢ ယကတဲတၢ်ဒီးနၤ ဒီးဝံသးစူၤ ဒိကနၣ် ယတၢ်ကတိၤတက့ၢ်. ၂၅ ကစၢ်ဧၢ, ဝံသးစူၤ တဘၣ်ကနၣ်ဃုာ် ပှၤဟးဂီၤဖိ စီၤနၤဘလးန့ၣ်တဂ့ၤ.+ အီၤန့ၣ် အမၤထီၣ်အသး ဒ်အမံၤအခီပညီအသိးလီၤ. ဒ်အမံၤ စီၤနၤဘလး* အိၣ်ဝဲအသိး အတၢ်သ့ၣ်ညါတအိၣ်ဘၣ်. ဘၣ်ဆၣ် နခ့နပှၤပိာ်မုၣ် ယၤအံၤ, ယတထံၣ်လိာ်သးဒီး ပှၤသးစၢ် လၢနဆှၢလီၤတဖၣ်န့ၣ်ဘၣ်. ၂၆ ဒီးခဲအံၤ ကစၢ်ဧၢ, ယအၢၣ်လီၤလၢ ယဟိဝၤယွၤအမဲာ်ညါ ဒီးလၢနမဲာ်ညါလၢ ယဟိဝၤယွၤ မ့ၢ်ပှၤလၢ အတြီနၤ+ ဒ်သိးတၢ်သွံၣ်သုတလီၤတီ လၢနခိၣ်လိၤ+ ဒီးဒ်သိး နသုတဟ့ၣ်ကၣ်က့ၤတၢ်လၢ နနီၢ်ကစၢ်အစု တဂ့ၤအဂီၢ်လီၤ. နဒုၣ်နဒါတဖၣ် ဒီးပှၤလၢအအဲၣ်ဒိး မၤဘၣ်ဒိနၤန့ၣ် မ်အဝဲသ့ၣ် ကဲထီၣ်ဒ် စီၤနၤဘလး အသိးတက့ၢ်. ၂၇ ခဲအံၤ ယဟဲစိာ် တၢ်အီၣ်တဖၣ်အံၤ ဒ်တၢ်ဟ့ၣ်အသိး*+ လၢနပှၤတဖၣ် အဂီၢ်လီၤ.+ ၂၈ ကစၢ်ဧၢ, ဝံသးစူၤ ပျၢ်ယတၢ်ကမၣ်တက့ၢ်. မ့ၢ်လၢ နဒုးန့ၢ်တၢ်လၢ ယဟိဝၤယွၤ အတၢ်ဒုးတဖၣ်အပူၤ+ ဒီးလၢနတၢ်အိၣ်မူဒီတစိၤညါန့ၣ် နတမၤဘၣ်တၢ်အၢဘၣ်+ အဃိ ယဟိဝၤယွၤ ကဒုးကဲထီၣ် နစၢၤနသွဲၣ်တဖၣ် လၢစီၤပၤ ဖးယံာ်ညါလီၤ.+ ၂၉ ဖဲပှၤတဂၤဂၤ လူၤနၤ ဒီးဃုနသးသမူအခါန့ၣ် နကစၢ်ယဟိဝၤယွၤ ကဘိၣ်ဘံဃာ်ဝဲ နသးသမူဘၢဘၢ လၢထၢၣ်တၢ်မူအပူၤလီၤ. မ့မ့ၢ် နဒုၣ်နဒါတဖၣ် အသးသမူန့ၣ် အဝဲကကွံာ်ဝဲလၢအယံၤ ဒ်ပှၤကွံာ်လၢၢ်တဖၣ် လၢနီၣ်ဘျုးအသိးလီၤ. ၃၀ ဒီးဖဲယဟိဝၤယွၤ မၤန့ၢ်နၤ တၢ်လၢအဂ့ၤခဲလၢာ်လၢ အအၢၣ်လီၤပာ်စၢၤနၤ ဒီးအပာ်ထီၣ်နၤလၢ အံၣ်စရ့လး အခိၣ်အနၢ်အခါ+ ၃၁ နတလိၣ်တူၢ်ဘၣ်က့ၤ တၢ်သးအုး ဒီးနတလိၣ် ပီၢ်ယၢ်လီၤက့ၤနသး ခီဖျိလၢ နလူလီၤတၢ်သွံၣ်ခီလီလီ ဒီးလၢ နဟ့ၣ်ကၣ်က့ၤတၢ်လၢ နနီၢ်ကစၢ်အစု အဃိလၢၤဘၣ်.+ ဖဲယဟိဝၤယွၤ ဆိၣ်ဂ့ၤနၤအခါ သ့ၣ်နီၣ်ထီၣ်က့ၤ နခ့နပှၤပိာ်မုၣ် ယၤအံၤနီၤ.”
၃၂ ဒီးစီၤဒၤဝံး တဲဘၣ် နီၢ်အဘံၤကါယံးလးလၢ “အံၣ်စရ့လးအကစၢ် ယဟိဝၤယွၤ လၢအဆှၢလီၤနၤ တနံၤအံၤ ဒ်သိးကထံၣ်လိာ်သးဒီးယၤန့ၣ် မ်အဘၣ် တၢ်စံးထီၣ်ပတြၢၤအီၤတက့ၢ်. ၃၃ ဒီးခီဖျိလၢ နသးဆးအဃိ မ်နဘၣ်ဆိၣ်ဂ့ၤတက့ၢ်. တနံၤအံၤ ခီဖျိလၢ နတြီယၤ ဒ်သိး တၢ်သွံၣ်သုတလီၤတီလၢ ယခိၣ်လိၤတဂ့ၤ+ ဒီးဒ်သိး ယသုတမၤကၣ်က့ၤတၢ် လၢယနီၢ်ကစၢ်အစု တဂ့ၤအဂီၢ် အဃိ မ်နဘၣ်တၢ်ဆိၣ်ဂ့ၤတက့ၢ်. ၃၄ လၢအံၣ်စရ့လးအကစၢ် ယဟိဝၤယွၤလၢ အတြီယၤဒ်သိး ယသုတမၤဘၣ်ဒိနၤတဂ့ၤတဂၤန့ၣ်+ အမဲာ်ညါ ယအၢၣ်လီၤလၢ နမ့ၢ်တဟဲ ထံၣ်လိာ်သးဒီးယၤ ချ့ချ့ဘၣ်န့ၣ်+ တုၤလၢဂီၤခီ ပှၤပိာ်ခွါလၢ အအိၣ်လၢ စီၤနၤဘလးအဟံၣ်ပူၤ တမူနီတဂၤလၢၤဘၣ်.”+ ၃၅ ဒီးစီၤဒၤဝံး ဟံးန့ၢ်ဝဲ တၢ်လၢ နီၢ်အဘံၤကါယံးလး ဟဲစိာ်န့ၢ်အီၤ ဒီးစီၤဒၤဝံး တဲအီၤလၢ “က့ၤကဒါက့ၤ လၢနဟံၣ် မုာ်မုာ်ခုၣ်ခုၣ်တက့ၢ်. ယဒိကနၣ် နကလုၢ်လံ ဒီးယကမၤဒ် နဃ့ယၤအသိးလီၤ.”
၃၆ လၢခံ နီၢ်အဘံၤကါယံးလး က့ၤကဒါက့ၤလၢ စီၤနၤဘလး အအိၣ်လီၤ. စီၤနၤဘလး အီၣ်တၢ်အီတၢ် ဒ်စီၤပၤတဂၤအသိးလၢ အဟံၣ်ပူၤ ဒီးအသူၣ်ဖှံသးညီ ဒီးအီမူၤအသး ဒိၣ်မးလီၤ. တချုးလၢ မုၢ်ဝါထီၣ်ဒံးဘၣ်န့ၣ် နီၢ်အဘံၤကါယံးလး တတဲဘၣ်အီၤ တၢ်နီတမံၤဘၣ်. ၃၇ လၢဂီၤခီ ဖဲစီၤနၤဘလး တမူၤလၢၤဘၣ်အခါ အမါတဲဘၣ်အီၤ တၢ်ဂ့ၢ်တဖၣ်န့ၣ် ခဲလၢာ်လီၤ. ဖဲအဝဲနၢ်ဟူဝဲ ဒ်န့ၣ်အခါ အသးဘူးကလီၤတဲာ်ညါ ဒီးအဝဲဟူးဂဲၤတန့ၢ်လၢၤဘၣ် ဒီးမံနီၤဝဲ ဒ်လၢၢ်အသိးလီၤ. ၃၈ ဒီးအသီတဆံ ဝံၤအလီၢ်ခံ ယဟိဝၤယွၤ တီၢ်စီၤနၤဘလး ဒီးအဝဲသံဝဲလီၤ.
၃၉ ဖဲစီၤဒၤဝံး နၢ်ဟူဝဲလၢ စီၤနၤဘလးသံလံအခါ အဝဲတဲဝဲလၢ “စံးထီၣ်ပတြၢၤ ယဟိဝၤယွၤ တက့ၢ်. စီၤနၤဘလး ဒုၣ်ဒွဲၣ်စံးအၢယၤဘၣ်ဆၣ်+ ကစၢ်ယွၤအိၣ်ဃူယၤ+ ဒီးတြီယၤ ဒ်သိးယသုတမၤ တၢ်လၢအအၢတဂ့ၤ အဂီၢ်လီၤ.+ ဒီးယဟိဝၤယွၤ ဟ့ၣ်ကၣ်က့ၤ စီၤနၤဘလးလၢ အတၢ်အၢအဃိလီၤ.” ဒီးစီၤဒၤဝံး မၢပှၤလဲၤဃ့န့ၢ်အီၤ နီၢ်အဘံၤကါယံးလး ဒ်သိး အကကဲထီၣ်အမါ အဂီၢ်လီၤ. ၄၀ အဃိ စီၤဒၤဝံး အခ့အပှၤတဖၣ် လဲၤလၢ နီၢ်အဘံၤကါယံးလး အအိၣ် လၢဝ့ၢ်ကၢ်မ့ၤလး ဒီးတဲအီၤလၢ “စီၤဒၤဝံး မၢပဟဲကိးန့ၢ်နၤ ဒ်သိးနကကဲထီၣ် အမါအဂီၢ်လီၤ.” ၄၁ တဘျီဃီန့ၣ် နီၢ်အဘံၤကါယံးလး ဂဲၤဆၢထၢၣ် ဒီးထိၣ်လီၤပှီၤအသး လၢဟီၣ်ခိၣ်လိၤ ဒီးတဲဝဲလၢ “ယသးအိၣ်လၢ ယကကဲထီၣ် ကုၢ်မုၣ်တဂၤ လၢကသ့န့ၢ် ယကစၢ် အခ့အပှၤတဖၣ် အခီၣ်လီၤ.”+ ၄၂ ဒီးနီၢ်အဘံၤကါယံးလး+ ဂဲၤဆၢထၢၣ်ချ့ချ့ ဒီးဒိးထီၣ် အကသ့ၣ်ယီၤ ဒီးအခ့အပှၤပိာ်မုၣ် ယဲၢ်ဂၤ ဟးဝဲလၢအလီၢ်ခံလီၤ. အဝဲလဲၤပိာ်ဝဲ စီၤဒၤဝံး အပှၤစိာ်တၢ်ကစီၣ်ဖိတဖၣ် အခံ ဒီးအဝဲကဲထီၣ် စီၤဒၤဝံးအမါလီၤ.
၄၃ စီၤဒၤဝံး ဟံးန့ၢ်စ့ၢ်ကီး နီၢ်အဃံနိၣ်+ လၢဝ့ၢ်ယံးစရ့လး+ အဃိ ပိာ်မုၣ်ခံဂၤလၢာ်န့ၣ် ကဲထီၣ်အမါလီၤ.+
၄၄ မ့မ့ၢ် စီၤစီလူးအဖိမုၣ် နီၢ်မံကၤလး+ လၢအမ့ၢ် စီၤဒၤဝံးအမါန့ၣ် စီၤစီလူး ဟ့ၣ်ဝဲလၢ စီၤလ့ၡ့ၣ်အဖိခွါ စီၤဖးလတံၤ+ လၢအအိၣ်လၢ ကးလံၣ်န့ၣ်လီၤ.