၁ စီၤပၤ

၂ ဖဲစီၤဒၤဝံး ဘူးထီၣ်ကသံအခါ အဝဲမၤလိာ်အဖိခွါ စီၤၡလိၤမိၤလၢ ၂ “ယကသံဘူးထီၣ်လံ အဃိ ပာ်ဆူၣ်နသးဒီး+ အိၣ်ဒီးတၢ်သူၣ်ဒူသးဒူတက့ၢ်.+ ၃ နကဘၣ်မၤလၢပှဲၤနမူဒါ ဒ်နကစၢ် ယဟိဝၤယွၤ မၤလိာ်နၤအသိး ခီဖျိ နအိၣ်မူမၤထွဲ အတၢ်ဘၣ်သး,* အတၢ်ဘျၢတဖၣ်, အတၢ်မၤလိာ်တဖၣ်, အတၢ်သိၣ်တၢ်သီတဖၣ်​ ဒီးအတၢ်ဒုးသ့ၣ်နီၣ်ထီၣ်တဖၣ်​ ဒ်အဘၣ်​ တၢ်ကွဲးလီၤအီၤလၢ စီၤမိၤၡ့ အတၢ်သိၣ်တၢ်သီ အပူၤအသိးလီၤ.+ နမ့ၢ်မၤဒ်န့ၣ်န့ၣ်​ ဖဲနလဲၤတပူၤဂ့ၤ တပူၤဂ့ၤ ဒီးတၢ်လၢ နမၤတမံၤဂ့ၤ တမံၤဂ့ၤ ကကဲထီၣ်လိၣ်ထီၣ်လီၤ. ၄ တကးဒံးဘၣ်​ ယဟိဝၤယွၤ ကမၤလၢပှဲၤထီၣ်​ အတၢ်အၢၣ်လီၤလၢ အဘၣ်ဃးဒီးယၤလီၤ. အဝဲအၢၣ်လီၤယၤလၢ ‘နဖိနလံၤမ့ၢ်ပလီၢ်အသး ဒ်သိးအကအိၣ်မူလၢ ယမဲာ်ညါ လၢတၢ်သးတီအပူၤ လၢအသးဒီဖျၢၣ်ညါ ဒီးလၢအတၢ်အိၣ်မူ ကိးသနၢၣ်ဒဲးအပူၤန့ၣ်+ နစၢၤနသွဲၣ်​ ကဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ်​ ထီဘိလီၤ.’+

၅ “ဒီးနီၢ်စရူယၤ အဖိခွါ စီၤယိၤအာ် မၤယၤဒ်လဲၣ်န့ၣ်​ နသ့ၣ်ညါဂ့ၤဂ့ၤလီၤ. အဝဲမၤသံ အံၣ်စရ့လး အသုးခိၣ်ကျၢၢ်ခံဂၤ လၢအမ့ၢ် စီၤန့ၢ် အဖိခွါ စီၤအဘံန့ၢ်+ ဒီးစီၤယ့သ့ၢ် အဖိခွါ စီၤဧမါစၤလီၤ.+ စီၤယိၤအာ် မၤသံအဝဲသ့ၣ်​ ဖဲတၢ်ဒုးတအိၣ်ဘၣ်​ အဆၢကတီၢ်* ဒီးအဝဲမၤဘၣ်အၢ အယီၢ်တကိးလၢ အအိၣ်လၢအယီၢ်ဒ့ ဒီးအခီၣ်ဖံးလၢ အအိၣ်လၢအခီၣ်န့ၣ်လၢ တၢ်ဒုးအသွံၣ်လီၤ.+ ၆ နကဘၣ်မၤတၢ်ဒ် နတၢ်ကူၣ်သ့ အိၣ်ဝဲအသိး ဒီးနတဘၣ်ဟ့ၣ်အခွဲးလၢ ပှၤတဂၤန့ၣ်​ ကလဲၤလီၤလၢ တၢ်သွၣ်ခိၣ်အပူၤ* မုာ်မုာ်ခုၣ်ခုၣ်တဂ့ၤ.+

၇ “ဘၣ်ဆၣ်​ နကြၢးပာ်ဖျါထီၣ်​ တၢ်အဲၣ်လၢအတီလၢ ပှၤကံးလဧးဖိ စီၤဘၢ်စံးလဲ+ အဖိခွါတဖၣ်​ အဖီခိၣ်လီၤ. ဖဲယဃ့ၢ်ကွံာ်လၢ နဒီပုၢ်ဝဲၢ်ခွါ စီၤအးဘၡါလိၣ်+ အဃိအခါ အဝဲသ့ၣ်​ ဆီၣ်ထွဲ မၤစၢၤယၤလီၤ.+ အဃိ အဝဲသ့ၣ်​ ကြၢးပၣ်ဃုာ်လၢ ပှၤလၢအအီၣ်တၢ်လၢ နစီၢ်နီၤခိၣ်အကျါလီၤ.

၈ “တကးဒံးဘၣ်​ ပှၤအိၣ်ဖဲအံၤတဂၤလၢအမ့ၢ် ပှၤဘံၣ်ယၤမံၣ်ဖိ စီၤက့ၤရၤ အဖိခွါ စီၤၡံမံၤလၢ အဟဲလၢ သဝီဘၤဃူရံၣ်လီၤ. ဖဲယလဲၤလၢ ဝ့ၢ်မၤဃန့ၤ+ တနံၤန့ၣ်​ အဝဲကဲပှၤတဂၤလၢ အဟဲဆိၣ်အၢယၤ အၢအၢသီသီလီၤ.+ ဘၣ်ဆၣ်​ ဖဲအဝဲဟဲလီၤ ထံၣ်လိာ်သးဒီးယၤလၢ ထံကျိယၢ်ဒ့ၣ်အခါ ယအၢၣ်လီၤအီၤလၢ ယဟိဝၤယွၤ အမဲာ်ညါလၢ ယတမၤသံအီၤဘၣ်.+ ၉ ဘၣ်ဆၣ်​ နမ့ၢ်ပှၤလၢ အကူၣ်တၢ်သ့ ဒီးနကဘၣ်မၤအီၤ ဒ်လဲၣ်န့ၣ်​ နသ့ၣ်ညါလီၤ. အဃိ နတဘၣ်​ ပျဲပူၤကွံာ်အီၤလၢ တၢ်စံၣ်ညီၣ်တဂ့ၤ+ ဒီးနတဘၣ်ဟ့ၣ်အခွဲးလၢ အကသံမုာ်မုာ် ခီဖျိလၢ အသးပှၢ်ထီၣ်အဃိတဂ့ၤ.”*+

၁၀ ဝံၤဒီးစီၤဒၤဝံး သံဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ ဖဲစီၤဒၤဝံး အဝ့ၢ်န့ၣ်လီၤ.+ ၁၁ စီၤဒၤဝံး ပၢဘၣ်တၢ်လၢ ဝ့ၢ်ဃ့ဘြိၣ်အပူၤ+ ၇ နံၣ်​ ဒီးလၢ ဝ့ၢ်ယရူၤၡလ့ၣ်အပူၤ ၃၃ နံၣ်လီၤ. အဃိ ဒီးစီၤဒၤဝံး ပၢတၢ်လၢ အံၣ်စရ့လးအဖီခိၣ်​ ယံာ်ဝဲအနံၣ်​ ၄၀ လီၤ.+

၁၂ ဒီးစီၤၡလိၤမိၤ ဆ့ၣ်နီၤလၢ အပၢ်စီၤဒၤဝံး အလီၢ်ပစိာ် ဒီးလၢခံ အတၢ်ပၢတၢ်ပြး ဂၢၢ်ကျၢၤဒိၣ်ထီၣ်​ ဒိၣ်ထီၣ်ဝဲလီၤ.+

၁၃ လၢခံ နီၢ်ဃးကံၤ အဖိခွါ စီၤအဒိနံၤယၤ ဟဲဝဲလၢ စီၤၡလိၤမိၤ အမိၢ်နီၢ်ဘၤသၡ့ဘၤ အအိၣ်လီၤ. ဒီးနီၢ်ဘၤသၡ့ဘၤ သံကွၢ်အီၤလၢ “နဟဲန့ၣ်​ မ့ၢ်တၢ်ကီတၢ်ခဲ အိၣ်တမံၤမံၤဧါ.” စီၤအဒိနံၤယၤ တဲဆၢက့ၤဝဲလၢ “တၢ်ကီတၢ်ခဲ တအိၣ်နီတမံၤဘၣ်.” ၁၄ ဝံၤဒီးအဝဲတဲဝဲလၢ “ယကဘၣ်တဲနၤ တၢ်တမံၤ.” ဒီးနီၢ်ဘၤသၡ့ဘၤ တဲအီၤလၢ “တဲသၢၤ.” ၁၅ ဒီးစီၤအဒိနံၤယၤ တဲဝဲလၢ “နသ့ၣ်ညါလၢ စီၤပၤအလီၢ်အလၤန့ၣ်​ ကဘၣ်ကဲထီၣ်ယတၢ် ဒီးလၢညါန့ၣ်​ ပှၤအံၣ်စရ့လးဖိခဲလၢာ် မုၢ်လၢ်ဝဲလၢ ယကကဲထီၣ်စီၤပၤလီၤ.+ ဘၣ်ဆၣ်​ ခီဖျိလၢ ယဟိဝၤယွၤ အတၢ်ဘၣ်သးအဃိ ဘီမုၢ်န့ၣ်​ ကဲထီၣ်ဝဲ ယဒီပုၢ်ဝဲၢ်ခွါအတၢ် ဒီးယတကဲထီၣ်​ စီၤပၤလၢၤဘၣ်.+ ၁၆ ဘၣ်ဆၣ်​ ခဲအံၤ ယကဃ့နၤ တၢ်ထဲတမံၤလီၤ. တဘၣ်ဂ့ၢ်လိာ်ယၤတဂ့ၤ.” အဃိ နီၢ်ဘၤသၡ့ဘၤ တဲဝဲလၢ “တဲဟီ.” ၁၇ ဒီးစီၤအဒိနံၤယၤ တဲဝဲလၢ “ဝံသးစူၤ မၢစီၤပၤၡလိၤမိၤ ဟ့ၣ်ယၤ ပှၤၡူန့ၣ်ဖိ နီၢ်အဘံၡး+ ဒ်သိးကကဲထီၣ်​ ယမါတက့ၢ်. မ့မ့ၢ်နၤန့ၣ်​ တမ့ၢ်လၢ အကဂ့ၢ်လိာ်ဝဲဘၣ်.” ၁၈ ဒီးနီၢ်ဘၤသၡ့ဘၤ တဲဝဲလၢ “ဂ့ၤလံ, ယကလဲၤတဲန့ၢ်နၤ စီၤပၤဒၣ်ဝဲ.”

၁၉ ဒီးနီၢ်ဘၤသၡ့ဘၤ လဲၤလၢ စီၤပၤၡလိၤမိၤ အအိၣ်​ ဒ်သိးကတဲန့ၢ်တၢ်လၢ စီၤအဒိနံၤယၤအဂီၢ်လီၤ. ဒီးစီၤပၤဆၢထၢၣ်ဝဲ တဘျီဃီ ဒ်သိးကသဂၢၢ်အမိၢ် ဒီးထိၣ်လီၤပှီၤအသးလၢ အမဲာ်ညါလီၤ. ဝံၤဒီးအဝဲဆ့ၣ်နီၤလၢ အလီၢ်ပစိာ် ဒီးဒ်သိးအမိၢ် ကဆ့ၣ်နီၤလၢ အစုထွဲတခီအဂီၢ် အဝဲမၢပှၤပာ်လီၤ လီၢ်ပစိာ်လၢ အမိၢ်အဂီၢ်လီၤ. ၂၀ ဒီးအမိၢ်တဲဝဲလၢ “ယကဃ့နၤတၢ်တမံၤ. တဘၣ်ဂ့ၢ်လိာ်ယၤတဂ့ၤနီၤ.” ဒီးစီၤပၤတဲအီၤလၢ “ဃ့သၢၤမိ, ယတဂ့ၢ်လိာ်နၤဘၣ်.” ၂၁ ဒီးအမိၢ်တဲဝဲလၢ “ဟ့ၣ်လီၤ ပှၤၡူန့ၣ်ဖိ နီၢ်အဘံၡး ဒ်သိးကကဲထီၣ်​ နဒီပုၢ်ဝဲၢ်ခွါ စီၤအဒိနံၤယၤအမါမီၤ.” ၂၂ စီၤပၤၡလိၤမိၤ တဲဆၢက့ၤအမိၢ်လၢ “ဘၣ်မနုၤအဃိ နဃ့န့ၢ်ထဲ ပှၤၡူန့ၣ်ဖိ နီၢ်အဘံၡး လၢစီၤအဒိနံၤယၤ အဂီၢ်လဲၣ်. နတဃ့ဃုာ်န့ၢ်အီၤလၢစီၤပၤ အတၢ်ပၢတၢ်ပြးဘၣ်လဲၣ်.+ အဝဲမ့ၢ် ယကၠီ+ ဒီးပှၤလုၢ်တၢ်ဒိၣ်​ စီၤအ့ဘယၤသၢ် ဒီးနီၢ်စရူယၤ+ အဖိခွါ စီၤယိၤအာ်စ့ၢ်ကီး+ ဆီၣ်ထွဲအီၤလံ.”

၂၃ ဒီးစီၤၡလိၤမိၤ အၢၣ်လီၤဝဲလၢ ယဟိဝၤယွၤ အမဲာ်ညါလၢ “စီၤအဒိနံၤယၤ မ့ၢ်တဘၣ်​ တူၢ်ၡူကွံာ် အသးသမူလၢ အတၢ်ဃ့တခါအံၤ အဃိဘၣ်န့ၣ်​ မ်ကစၢ်ယွၤ သိၣ်ဃီၣ်ယၤ ဆူၣ်ဆူၣ်တက့ၢ်. ၂၄ ယဟိဝၤယွၤလၢ အဒုးအိၣ်ဂၢၢ်ဆိးကျၢၤယၤ+ လၢယပၢ် စီၤဒၤဝံး အလီၢ်ပစိာ် ဒီးဟ့ၣ်လီၤယၤ ဒီးယစၢၤယသွဲၣ်လၢ ဘီမုၢ်* ဒ်အအၢၣ်လီၤ ပာ်စၢၤဝဲအသိးတဂၤန့ၣ်+ ယအၢၣ်လီၤတၢ်လၢ အမဲာ်ညါလၢ တနံၤအံၤ စီၤအဒိနံၤယၤ ကသံလီၤ.”+ ၂၅ ဒီးတဘျီဃီန့ၣ်​ စီၤပၤၡလိၤမိၤ မၢလီၤဝဲ စီၤယဟိၤယဒါ အဖိခွါ စီၤဘနါယၤ+ လဲၤကျီသံကွံာ် စီၤအဒိနံၤယၤလီၤ. ဒီးစီၤအဒိနံၤယၤ သံဝဲလီၤ.

၂၆ မ့မ့ၢ် ပှၤလုၢ်တၢ်ဒိၣ်​ စီၤအ့ဘယၤသၢ်န့ၣ်+ စီၤပၤတဲအီၤလၢ “နကြၢးသံ, ဘၣ်ဆၣ်​ ခီဖျိလၢ နယိး တၢ်ပၢကစၢ် ယဟိဝၤယွၤ အတလါစီဆှံ လၢယပၢ် စီၤဒၤဝံး+ အမဲာ်ညါ ဒီးခီဖျိလၢ နလဲၤခီဖျိ တၢ်ကီတၢ်ခဲတဖၣ်​ ဃုာ်ဒီးယပၢ်အဃိ+ တနံၤအံၤ ယတမၤသံနၤဘၣ်. က့ၤကဒါက့ၤလၢ နတၢ်လီၢ်တၢ်ကျဲ လၢဝ့ၢ်ဧၤနသိး အပူၤန့ၣ်တက့ၢ်.”+ ၂၇ ဒီးစီၤၡလိၤမိၤ နီဟးထီၣ်ကွံာ် စီၤအ့ဘယၤသၢ် လၢယဟိဝၤယွၤ အပှၤလုၢ်တၢ်ဒိၣ်အလီၢ်လီၤ. လၢတၢ်န့ၣ်အဃိ ယဟိဝၤယွၤ အတၢ်ကတိၤလၢအထီဒါ စီၤဧ့လံၤ အဒူၣ်ဖိထၢဖိ*+ လၢအတဲတ့ၢ်လၢ ဝ့ၢ်ၡံလိၤန့ၣ်+ လၢထီၣ်ပှဲၤထီၣ်ဝဲလီၤ.

၂၈ စီၤယိၤအာ်န့ၣ်​ အဝဲဆီၣ်ထွဲဝဲ စီၤအဒိနံၤယၤ+ ဘၣ်ဆၣ်​ လၢညါန့ၣ်​ အဝဲတဆီၣ်ထွဲ စီၤအးဘၡါလိၣ်ဘၣ်.+ အဃိ ဖဲစီၤယိၤအာ် နၢ်ဟူဘၣ်​ တၢ်ဂ့ၢ်ဝဲန့ၣ်အခါ အဝဲလဲၤဃ့ၢ်လၢ ယဟိဝၤယွၤ အဒဲစီဆှံ+ ဒီးဖီၣ်ဃာ်ဝဲ တၢ်လုၢ်လီၢ် အနၢၤတဖၣ်လီၤ. ၂၉ ဒီးပှၤတဲဘၣ်​ စီၤပၤၡလိၤမိၤလၢ “စီၤယိၤအာ် လဲၤဃ့ၢ်လၢ ယဟိဝၤယွၤ အဒဲစီဆှံ ဒီးအိၣ်ဝဲလၢ တၢ်လုၢ်လီၢ် အကပၤလီၤ.” အဃိ စီၤၡလိၤမိၤ တဲဘၣ်​ စီၤယဟိၤယဒါ အဖိခွါ စီၤဘနါယၤလၢ “လဲၤကျီသံကွံာ်အီၤတက့ၢ်.” ၃၀ ဒီးစီၤဘနါယၤ လဲၤလၢ ယဟိဝၤယွၤ အဒဲစီဆှံ ဒီးတဲဘၣ်​ စီၤယိၤအာ်လၢ “စီၤပၤတဲဝဲ ‘ဟဲက့ၤထီၣ်.’” ဘၣ်ဆၣ်​ စီၤယိၤအာ်တဲဝဲ “ဟၢၤအၢ, ယကသံဖဲအံၤလီၤ.” ဒီးစီၤဘနါယၤ က့ၤတဲဘၣ်​ စီၤပၤလၢ တၢ်လၢစီၤယိၤအာ် တဲဆၢက့ၤ အီၤလီၤ.” ၃၁ ဒီးစီၤပၤတဲအီၤလၢ “မၤအီၤဒ်အတဲဝဲ အသိးသၢၤ. မၤသံအီၤ ဒီးခူၣ်လီၤကွံာ်အီၤ ဒ်သိးတၢ်သွံၣ်လၢ စီၤယိၤအာ် လူလီၤဝဲ ခီလီလီန့ၣ်​ သုတလီၤတီလၢ ယၤဒီးယပၢ် အဒူၣ်ဖိထၢဖိတဖၣ်အလိၤ တဂ့ၤအဂီၢ် န့ၣ်တက့ၢ်.+ ၃၂ ယပၢ် စီၤဒၤဝံး တသ့ၣ်ညါထွဲဝဲ သနာ်က့ အဝဲမၤသံ စီၤန့ၢ်အဖိခွါ စီၤအဘံန့ၢ်+ လၢအမ့ၢ် အံၣ်စရ့လး အသုးခိၣ်ကျၢၢ်+ ဒီးစီၤယ့သ့ၢ်အဖိခွါ စီၤဧမါစၤ+ လၢအမ့ၢ် ယူဒၤအဒူၣ်​ အသုးခိၣ်ကျၢၢ်န့ၣ်လီၤ.+ ဒီးမ့ၢ်လၢအမၤသံ ပိာ်ခွါခံဂၤ လၢအဂ့ၤန့ၢ်အီၤ ဒီးတီန့ၢ်ဒံးအီၤလၢ နးအဃိ ယဟိဝၤယွၤ ကဟ့ၣ်ကၣ်က့ၤအီၤလီၤ. ၃၃ အဝဲသ့ၣ်​ အသွံၣ်​ ကဟဲက့ၤလီၤတီလၢ စီၤယိၤအာ် ဒီးအစၢၤအသွဲၣ်တဖၣ်​ အခိၣ်လိၤ လီၤထူလီၤယိာ်လီၤ.+ ဘၣ်ဆၣ်​ မ့မ့ၢ် စီၤဒၤဝံး, အစၢၤအသွဲၣ်တဖၣ်, အဒူၣ်ဖိထၢဖိ* ဒီးအလီၢ်ပစိာ်န့ၣ်​ မ်ယဟိဝၤယွၤ အတၢ်ဃူတၢ်ဖိး အိၣ်ဒီးအီၤ လီၤထူလီၤယိာ်တက့ၢ်.” ၃၄ ဒီးစီၤယဟိၤယဒါ အဖိခွါ စီၤဘနါယၤ လဲၤကျီသံကွံာ် စီၤယိၤအာ် ဒီးခူၣ်လီၤကွံာ်အီၤ လၢအဟံၣ်ကပၤ လၢပှၢ်မုၢ်ကနၢန့ၣ်လီၤ. ၃၅ ဒီးစီၤပၤပာ်ထီၣ်​ စီၤယဟိၤယဒါ အဖိခွါ စီၤဘနါယၤ+ ဒ်သုးခိၣ်ကျၢၢ်လၢ စီၤယိၤအာ်အလီၢ် ဒီးပာ်ထီၣ်ဝဲ ပှၤလုၢ်တၢ်ဒိၣ်​ စီၤစၤဒိး+ လၢစီၤအ့ဘယၤသၢ် အလီၢ်လီၤ.

၃၆ ဒီးစီၤပၤ မၢပှၤလဲၤကိးန့ၢ် စီၤၡံမံၤ+ ဒီးတဲအီၤလၢ “သူၣ်ထီၣ်​ နနီၢ်ကစၢ်အဟံၣ်လၢ ဝ့ၢ်ယရူၤၡလ့ၣ်အပူၤ ဒီးအိၣ်ဖဲန့ၣ်တက့ၢ်. တဘၣ်ဟးထီၣ်လၢဝ့ၢ်ပူၤ ဒီးလဲၤလၢတၢ်လီၢ်အဂၤ နီတတီၤတဂ့ၤ. ၃၇ မုၢ်နံၤဖဲ နဟးထီၣ်လၢ ဝ့ၢ်အပူၤ ဒီးခီဃီၤ ကံဒြိၣ်အတၢ်တြီၤန့ၣ်+ နကသံ သပှၢ်ကတၢၢ်လီၤ. ဒီးနသွံၣ်ကလီၤတီလၢ နနီၢ်ကစၢ်အခိၣ်လိၤလီၤ.” ၃၈ စီၤၡံမံၤ တဲဆၢက့ၤ စီၤပၤလၢ “နတဲတၢ်န့ၣ်​ ကြၢးဝဲဘၣ်ဝဲလီၤ. ယကမၤဒ် ယကစၢ်စီၤပၤ တဲဝဲအသိးလီၤ.” အဃိ စီၤၡံမံၤ အိၣ်ဝဲလၢ ဝ့ၢ်ယရူၤၡလ့ၣ်အပူၤ ဖးယံာ်ညါလီၤ.

၃၉ ဘၣ်ဆၣ်​ သၢနံၣ်ဝံၤအလီၢ်ခံ စီၤၡံမံၤ အကုၢ်ခံဂၤ လဲၤဃ့ၢ်ဖျိးဝဲလၢ စီၤအၤကံၣ်+ အအိၣ်လီၤ. စီၤအၤကံၣ်န့ၣ်​ မ့ၢ်ဝ့ၢ်ကၤသး အစီၤပၤ ဒီးအပၢ်န့ၣ်​ မ့ၢ်ဝဲစီၤမၤကၤလီၤ. ပှၤတဲဘၣ်​ စီၤၡံမံၤလၢ “နကုၢ်တဖၣ်​ အိၣ်လၢ ဝ့ၢ်ကၤသးလီၤ.” ဖဲန့ၣ်အခါ ၄၀ စီၤၡံမံၤ ကတဲာ်ကတီၤထီၣ်​ အကသ့ၣ်ယီၤ တဘျီဃီ ဒီးလဲၤလၢ စီၤအၤကံၣ်အအိၣ်​ လၢဝ့ၢ်ကၤသးအပူၤ ဒ်သိးကလဲၤကိးန့ၢ်က့ၤ အကုၢ်တဖၣ်လီၤ. ဖဲစီၤၡံမံၤ ဒီးအကုၢ်တဖၣ်​ ဟဲက့ၤတုၤအခါ ၄၁ ပှၤတဲဘၣ်​ စီၤၡလိၤမိၤလၢ “စီၤၡံမံၤ ဟးထီၣ်လၢ ဝ့ၢ်ယရူၤၡလ့ၣ်အပူၤ ဒီးလဲၤလၢ ဝ့ၢ်ကၤသး ဒီးအဟဲက့ၤတုၤလံ.” ၄၂ စီၤပၤ မၢပှၤလဲၤကိး စီၤၡံမံၤ ဒီးတဲအီၤလၢ “ယမၢနအၢၣ်လီၤ လၢယဟိဝၤယွၤ အမဲာ်ညါ ဒီးယဟ့ၣ်ပလီၢ်နၤလၢ ‘မုၢ်နံၤဖဲ နဟးထီၣ်လၢ ဝ့ၢ်အပူၤ ဒီးလဲၤလၢ တၢ်လီၢ်အဂၤန့ၣ်​ နကသံသပှၢ်ကတၢၢ်လီၤ.’ ဒီးနတဲဆၢက့ၤယၤလၢ ‘နတဲတၢ်န့ၣ်​ ကြၢးဝဲဘၣ်ဝဲ အဃိယကဒိကနၣ်​ နကလုၢ်’ တမ့ၢ်ဧီၤ.+ ၄၃ ဘၣ်ဆၣ်​ တၢ်အၢၣ်လီၤလၢ နမၤလၢ ယဟိဝၤယွၤ အမဲာ်ညါ ဒီးတၢ်လၢ ယမၤလိာ်နၤန့ၣ်​ ဘၣ်မနုၤအဃိ နတမၤထွဲဘၣ်လဲၣ်.” ၄၄ ဒီးစီၤပၤတဲဘၣ်​ စီၤၡံမံၤလၢ “နမၤကမၣ်​ ယပၢ်စီၤဒၤဝံး ဒ်လဲၣ်န့ၣ်​ နသ့ၣ်ညါဂ့ၤဂ့ၤလီၤ.+ အဃိ ယဟိဝၤယွၤ ကဟ့ၣ်ကၣ်က့ၤနၤလၢ နနီၢ်ကစၢ် တၢ်ကမၣ်အဃိန့ၣ်လီၤ.+ ၄၅ မ့မ့ၢ် စီၤပၤၡလိၤမိၤန့ၣ်​ ကဘၣ်တၢ်ဆိၣ်ဂ့ၤ+ ဒီးစီၤဒၤဝံး အလီၢ်ပစိာ်န့ၣ်​ ကအိၣ်ဂၢၢ်အိၣ်ကျၢၤလၢ ယဟိဝၤယွၤ အမဲာ်ညါ လီၤထူလီၤယိာ်လီၤ.” ၄၆ ဒီးစီၤပၤမၢလီၤ စီၤယဟိၤယဒါ အဖိခွါ စီၤဘနါယၤ လဲၤမၤသံကွံာ် စီၤၡံမံၤလီၤ. ဒီးစီၤၡံမံၤ သံဝဲလီၤ.+

အဃိ ဘီမုၢ်အံၤ အိၣ်ဂၢၢ်အိၣ်ကျၢၤဝဲလၢ စီၤၡလိၤမိၤ အစုပူၤလီၤ.+