လူၤကၣ်

၁၆ ဒီးယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “ပှၤထူးပှၤတီၤအိၣ်ဝဲတဂၤ ဒီးပှၤတဲဝဲလၢ ပှၤလၢအကွၢ်ထွဲအဟံၣ်တဂၤ မၤလၢာ်ဂီၤ အတၢ်ဖိတၢ်လံၤလီၤ. ၂ အဃိ အဝဲကိးဃီၤအီၤဒီးတဲဝဲလၢ ‘ယနၢ်ဟူဘၣ်နကစီၣ်လၢ အတဂ့ၤဘၣ်. အဃိ နကွၢ်ထွဲယဟံၣ်တသ့လၢၤဘၣ်. ဟ့ၣ်လီၤက့ၤယၤ တၢ်မၤနီၣ်မၤဃါအစရီတက့ၢ်.’ ၃ ဒီးပှၤကွၢ်ထွဲဟံၣ်တဂၤ တဲလီၤအနီၢ်ကစၢ်သးလၢ ‘ယကစၢ်န့ၣ်​ ကနီဟးထီၣ်ကွံာ်ယၤလၢ ပှၤကွၢ်ထွဲတၢ်ဖိ အလီၢ်လီၤ. ယခူၣ်တၢ်ဖျးတၢ် တကဲလၢၤဘၣ်​ ဒီးယကဃ့အီၣ်တၢ်အဂီၢ် ယမဲာ်ဆှးအဃိ ယကဘၣ်မၤဒ်လဲၣ်. ၄ အီ, အဝဲ နီဟးထီၣ်ယၤလၢ ပှၤကွၢ်ထွဲတၢ်ဖိအလီၢ် မ့ၢ်ဝံၤန့ၣ်​ ဒ်သိးပှၤဂၤကတူၢ်လိာ်ယၤလၢ အဝဲသ့ၣ်အဟံၣ်အဂီၢ် ယကဘၣ်မၤဒ်လဲၣ်န့ၣ်​ ယသ့ၣ်ညါလံ.’ ၅ အဃိ အဝဲကိးန့ၢ်ဝဲ ပှၤလၢအကမၢ်အိၣ်ဒီးအကစၢ် ဒီးတဲဘၣ်​ ပှၤအဆိကတၢၢ်တဂၤလၢ ‘နကမၢ်အိၣ်ဒီးယကစၢ် ထဲလဲၣ်.’ ၆ ပှၤတဂၤန့ၣ်​ တဲဆၢအီၤလၢ ‘သ့ၣ်စၤယံးသိ အဒၢဖးဒိၣ်* တကယၤလီၤ.’ ဒီးအဝဲတဲက့ၤအီၤလၢ ‘ဟံးန့ၢ်က့ၤနလံာ်အုၣ်အသး ဒီးဆ့ၣ်နီၤကွဲးလီၤ ၅၀ ချ့ချ့တက့ၢ်.’ ၇ လၢခံ အဝဲတဲဘၣ်​ ပှၤအဂၤတဂၤလၢ ‘နၤမီၤ, နကမၢ်အိၣ်ထဲလဲၣ်.’ ပှၤတဂၤန့ၣ်​ တဲဝဲလၢ ‘ဘုကၠူၣ်​ အထၢၣ်* တကယၤလီၤ.’ ဒီးအဝဲ တဲက့ၤအီၤလၢ ‘ဟံးန့ၢ်က့ၤ နလံာ်အုၣ်အသး ဒီးကွဲးလီၤ ၈၀ တက့ၢ်.’ ၈ ပှၤကွၢ်ထွဲတၢ်ဖိတဂၤအံၤ အတတီတလိၤဘၣ်​ သနာ်က့ အမၤတၢ်လၢ တၢ်ကူၣ်သ့ အပူၤအဃိ အကစၢ် ပတြၢၤအီၤလီၤ. ပှၤလၢဆၢကတီၢ် ခဲအံၤန့ၣ်​ အဝဲသ့ၣ်အိၣ်ဒီး တၢ်ကူၣ်သ့ဒ်အံၤတကလုာ် အါန့ၢ်ဒံး ကစၢ်ယွၤအခ့အပှၤတဖၣ်လီၤ.*+

၉ “တကးဒံးဘၣ်​ ယကတဲဘၣ်သုလၢ ဒ်သိးသုကမၤန့ၢ်တံၤသကိးတဖၣ်အဂီၢ် သူတၢ်ထူးတၢ်တီၤလၢ အအိၣ်ဒီးသုလၢ သုတၢ်အိၣ်မူပူၤအံၤတက့ၢ်.*+ ဖဲတၢ်ထူးတၢ်တီၤတဖၣ်အံၤ လၢာ်ကွံာ်အခါ အဝဲသ့ၣ်ကတူၢ်လိာ်သုလၢ တၢ်အိၣ်တၢ်ဆိးအလီၢ်လၢ အအိၣ်ဝဲ လီၤထူလီၤယိာ်လီၤ.+ ၁၀ ပှၤလၢအတီလၢ တၢ်ဂ့ၢ်အဆံးကတၢၢ် အဖီခိၣ်န့ၣ်​ ကတီစ့ၢ်ကီးလၢ တၢ်အါမံၤအဖီခိၣ်လီၤ. ဒီးပှၤလၢအတတီလၢ တၢ်ဂ့ၢ်အဆံးကတၢၢ် အဖီခိၣ်ဘၣ်န့ၣ်​ တတီဘၣ်လၢ တၢ်အါမံၤ အဖီခိၣ်စ့ၢ်ကီးဘၣ်. ၁၁ အဃိ သုမ့ၢ်တပာ်ဖျါထီၣ်လၢ သုတီလၢ တၢ်ထူးတၢ်တီၤလၢ အအိၣ်ဒီးသုလၢ သုတၢ်အိၣ်မူပူၤအံၤ အဖီခိၣ်ဘၣ်န့ၣ်​ မတဂၤကအးလီၤ တၢ်ထူးတၢ်တီၤ အနီၢ်ကီၢ်တဖၣ်လၢ သုအိၣ်လဲၣ်. ၁၂ ဒီးသုမ့ၢ်တပာ်ဖျါထီၣ်လၢ သုတီဒီး ပှၤဂၤအတၢ်ဘၣ်န့ၣ်​ မတဂၤကဟ့ၣ်လီၤသု တၢ်တမံၤမံၤလၢ သုနီၢ်ကစၢ်အဂီၢ်လဲၣ်.+ ၁၃ ကုၢ်န့ၣ်မၤကစၢ်ခံဂၤ အတၢ်မၤတသ့ နီတဂၤဘၣ်, မ့ၢ်လၢ အကသးဟ့ဝဲ ကစၢ်တဂၤ ဒီးကအဲၣ်ဝဲ ကစၢ်အဝဲတဂၤ အဃိလီၤ. မ့တမ့ၢ် ကဆီၣ်ထွဲဝဲတဂၤ ဒီးကဆိကမိၣ်ဆံး အဝဲတဂၤလီၤ. သုကဲကစၢ်ယွၤအကုၢ် ဒီးတၢ်ထူးတၢ်တီၤ အကုၢ်တကတီၢ်ဃီတသ့ဘၣ်.”+

၁၄ ပှၤဖၤရံၤၡဲ လၢအမ့ၢ် ပှၤလၢအအဲၣ်ကျိၣ်အဲၣ်စ့တဖၣ်န့ၣ်​ နၢ်ဟူဘၣ်ဝဲ တၢ်ဂ့ၢ်တဖၣ်အံၤခဲလၢာ် ဒီးအဝဲသ့ၣ်​ ဒုၣ်ဒွဲၣ်စံးအၢ ယ့ၣ်ၡူးလီၤ.+ ၁၅ အဃိ ယ့ၣ်ၡူး တဲအဝဲသ့ၣ်လၢ “သုဝဲသ့ၣ်အံၤ သုပာ်တီပာ်လိၤသုသးလၢ ပှၤဂၤအမဲာ်ညါ+ ဘၣ်ဆၣ်​ ကစၢ်ယွၤ သ့ၣ်ညါသုသးလီၤ.+ တၢ်လၢပှၤဟီၣ်ခိၣ်ဖိ ပာ်ဒိၣ်ဝဲန့ၣ်​ ကစၢ်ယွၤ သးဘၣ်အၢဝဲလီၤ.+

၁၆ “စီၤမိၤၡ့ အတၢ်သိၣ်တၢ်သီ ဒီးဝံတဖၣ်​ အိၣ်ဝဲတုၤလီၤလၢ စီၤယိၤဟၣ်ဟဲတုၤဝဲလီၤ. စးထီၣ်ဖဲန့ၣ်ဝံၤအလီၢ်ခံ တၢ်သးခုကစီၣ်လၢ အဘၣ်ဃးဒီး ကစၢ်ယွၤအဘီအမုၢ်န့ၣ်​ ဘၣ်တၢ်စံၣ်တဲၤတဲလီၤအီၤ ဒီးပှၤအကလုာ်ကလုာ် ဂုာ်ကျဲးစၢးဝဲ ဆူၣ်ဆူၣ်ဒ်သိး ကလဲၤနုာ်ဘၣ်ဝဲ အဂီၢ်လီၤ.+ ၁၇ မူခိၣ်ဒီး ဟီၣ်ခိၣ်မ့ၢ် ဒံကွံာ်ဘၣ်ဖုးသနာ်က့ လံာ်မဲာ်ဖျၢၣ်ဆံးဆံးဖိလၢ စီၤမိၤၡ့ အတၢ်သိၣ်တၢ်သီအပူၤ ကဟဲလၢထီၣ်ပှဲၤထီၣ်​ ကိးဖျၢၣ်ဒဲးလီၤ.+

၁၈ “ပှၤကိးဂၤဒဲးလၢ အမၤကတၢၢ်ကွံာ် အတၢ်ဆီဟံၣ်ဆီဃီဒီးအမါ* ဒီးဆီဟံၣ်ဆီဃီဒီး ပှၤအဂၤတဂၤန့ၣ်​ မ့ၢ်အအဲၣ်ဘၢတၢ်လီၤ. ဒီးပှၤလၢ အဆီဟံၣ်ဆီဃီဒီး ပိာ်မုၣ်လၢအဝၤ မၤကတၢၢ်ကွံာ် အတၢ်ဆီဟံၣ်ဆီဃီဒီးအီၤ တဂၤန့ၣ်​ မ့ၢ်အအဲၣ်ဘၢတၢ်လီၤ.+

၁၉ “ပှၤထူးပှၤတီၤအိၣ်ဝဲတဂၤ လၢအသိးဝဲ ဆ့ကူဆ့ကၤလၢ အလွဲၢ်လုး ဒီးအပှ့ၤဒိၣ်လီၤ. တနံၤဘၣ်တနံၤန့ၣ်​ အဝဲပှဲၤဒီးတၢ်သူၣ်ဖှံသးညီ ခီဖျိလၢ အအိၣ်မူဘၣ်​ ဘီၣ်ဘီၣ်ညီညီ အဃိလီၤ. ၂၀ ဒီးပှၤဃ့အီၣ်တၢ်ဖိတဂၤ လၢအမံၤမ့ၢ် စီၤလါစရူးန့ၣ်​ တၢ်ပူၤလီၢ် အိၣ်လၢအလိၤ ဒီတဂၤ ဒီးဘၣ်တၢ်လဲၤပာ်လီၤအီၤလၢ ပှၤထူးပှၤတီၤတဂၤန့ၣ်​ အတြဲၤခီၣ်ထံး ၂၁ ဒီးအဝဲအဲၣ်ဒိးအီၣ်ဝဲ တၢ်လၢအလီၤဆှုလၢ ပှၤထူးပှၤတီၤတဂၤန့ၣ်​ အစီၢ်နီၤခိၣ်လီၤ. ဒီးထွံၣ်တဖၣ်​ ဟဲဒီးလ့ၣ်ဝဲ အတၢ်ပူၤလီၢ်တဖၣ်လီၤ. ၂၂ လၢခံ ပှၤဃ့အီၣ်တၢ်ဖိတဂၤန့ၣ်သံဝဲ ဒီးမူခိၣ်ကလူးတဖၣ်​ လဲၤစိာ်အီၤလၢ စီၤအၤဘြၤဟၣ်​ အကပၤလီၤ.*

“ဒီးပှၤထူးပှၤတီၤတဂၤန့ၣ်​ သံဝဲစ့ၢ်ကီး ဒီးဘၣ်တၢ်ခူၣ်လီၤအီၤလီၤ. ၂၃ ဒီးလၢတၢ်သွၣ်ခိၣ်* အပူၤန့ၣ်​ အဝဲဘၣ်တၢ်မၤနးမၤဖှီၣ်အီၤ ဒီးအဝဲကျ့ၣ်ထီၣ်အမဲာ် ဒီးထံၣ်စိဝဲ စီၤအၤဘြၤဟၣ်​ လၢအယံၤ ဒီးစီၤလါစရူး အိၣ်လၢအကပၤလီၤ. ၂၄ အဃိ အဝဲကိးထီၣ်ဝဲလၢ ‘ပၢ်စီၤအၤဘြၤဟၣ်ဧၢ, သးကညီၤယၤတက့ၢ်. ယတူၢ်ဘၣ်တၢ် လၢမ့ၣ်အူလၣ်အကျါနးမး အဃိ မၢစီၤလါစရူး စုၣ်လီၤအစုနၢအခိၣ်ထိး လၢထံကျါ ဒီးဟဲဒုးလီၤစီၤထံလၢ ယပျ့ၤလိၤမီၤ.’ ၂၅ ဘၣ်ဆၣ်​ စီၤအၤဘြၤဟၣ်​ တဲဝဲလၢ ‘ဖိဧၢ, သ့ၣ်နီၣ်ထီၣ်လၢ ဖဲနအိၣ်မူအခါန့ၣ်​ နဒိးန့ၢ်ဘၣ်​ တၢ်လၢအဂ့ၤ လၢလၢပှဲၤပှဲၤလီၤ. မ့မ့ၢ် စီၤလါစရူးန့ၣ်​ အဒိးန့ၢ်ဘၣ်ဝဲတၢ်လၢ အတဂ့ၤဘၣ်တဖၣ်လီၤ. ဘၣ်ဆၣ်​ ခဲအံၤ အဝဲဘၣ်တၢ်မၤမုာ်ထီၣ်အီၤဖဲအံၤ ဒီးမ့မ့ၢ်နၤန့ၣ်​ နတူၢ်ဘၣ်တၢ်နးမးလီၤ. ၂၆ တကးဒံးဘၣ်​ လၢပဝဲဒီးသုအဘၢၣ်စၢၤန့ၣ်​ တၢ်ပူၤဖးယိာ် အိၣ်ဝဲလီၤ. အဃိ ပှၤဖဲအံၤလၢ အအဲၣ်ဒိးလဲၤလၢသုအိၣ်န့ၣ်​ လဲၤဝဲတသ့ဘၣ်. ဒီးပှၤလၢသုအိၣ်န့ၣ်​ ဟဲခီဂာ်တၢ်လၢပအိၣ်​ တသ့စ့ၢ်ကီးဘၣ်.’ ၂၇ ဝံၤဒီး ပှၤထူးပှၤတီၤတဂၤန့ၣ်​ တဲဝဲလၢ ‘ပါဧၢ, မ့မ့ၢ်ဒ်န့ၣ်န့ၣ်​ ယဃ့ကညးနၤလၢ နကဆှၢလီၤအီၤလၢ ယပၢ်အဟံၣ်လီၤ. ၂၈ ယဒီပုၢ်ဝဲၢ်ခွါအိၣ်ယဲၢ်ဂၤ အဃိမၢအဝဲအုၣ်အသး လီၤတံၢ်လီၤဆဲး ဒ်သိးအဝဲသ့ၣ်​ သုတဟဲတုၤဘၣ်လၢ တၢ်မၤအၢမၤနး အလီၢ်အံၤ တဂ့ၤအဂီၢ်တက့ၢ်.’ ၂၉ ဘၣ်ဆၣ်​ စီၤအၤဘြၤဟၣ်တဲဝဲလၢ ‘အဝဲသ့ၣ်အိၣ်ဒီး စီၤမိၤၡ့ ဒီးဝံအတၢ်ကွဲးအသးတဖၣ်လီၤ. အဃိ မ်အဝဲသ့ၣ်ဒိကနၣ်​ တၢ်သ့ၣ်တဖၣ်န့ၣ်တက့ၢ်.’+ ၃၀ ဒီးပှၤထူးပှၤတီၤတဂၤန့ၣ်​ တဲဝဲ ‘တမ့ၢ်ဘၣ်, ပၢ်စီၤအၤဘြၤဟၣ်ဧၢ, ပှၤလၢအသံတ့ၢ်တဂၤဂၤ မ့ၢ်လဲၤလၢ အဝဲသ့ၣ်အအိၣ်န့ၣ်​ အဝဲသ့ၣ်​ ကပီၢ်ယၢ်လီၤအသးလီၤ.’ ၃၁ ဘၣ်ဆၣ်​ စီၤအၤဘြၤဟၣ်​ တဲအီၤလၢ ‘အဝဲသ့ၣ်​ မ့ၢ်တဒိကနၣ်​ စီၤမိၤၡ့+ ဒီးဝံတဖၣ်ဘၣ်န့ၣ်​ တမ့ၢ်လၢ အဝဲသ့ၣ်​ ကဒိကနၣ်​ ပှၤလၢအဂဲၤဆၢထၢၣ်သမူထီၣ်က့ၤလၢ တၢ်သံတဂၤန့ၣ်ဘၣ်.’”