ကတိၤဒိ
၁၁ စီၤပီၢ်လၢ အတတီဘၣ်န့ၣ် ယဟိဝၤယွၤ သးဘၣ်အၢ ဝဲလီၤ.
မ့မ့ၢ် စီၤပီၢ်သၣ်လၢအတီန့ၣ် ဘၣ်ကစၢ်ယွၤ အသးလီၤ.+
၂ ဖဲပှၤတဂၤ ပာ်ထီၣ်ထီအသးအခါ အကဒိးန့ၢ်ဘၣ် တၢ်မဲာ်ဆှးလီၤ.+
မ့မ့ၢ် ပှၤလၢအဆီၣ်လီၤသးန့ၣ် အိၣ်ဒီး တၢ်ကူၣ်သ့လီၤ.+
၃ ပှၤလၢအသူၣ်ဘျၢသးဘျၢန့ၣ် အတၢ်သးတီ ကဟံးစုနဲၣ်ကျဲအီၤ,+
မ့မ့ၢ် ပှၤလၢအသးတတီဘၣ်န့ၣ် အတၢ်လီတၢ်ဝ့ၤ ကမၤဟးဂီၤအီၤလီၤ.+
၄ ဖဲကစၢ်ယွၤ အတၢ်သးထီၣ် အမုၢ်နံၤန့ၣ် တၢ်ထူးတၢ်တီၤ အဘျုး တအိၣ်ဘၣ်.+
မ့မ့ၢ် တၢ်တီတၢ်လိၤန့ၣ် မ့ၢ်တၢ်လၢ အကမၤပူၤဖျဲးထီၣ်ကွံာ်တၢ်လၢ တၢ်သံလီၤ.+
၅ ပှၤလၢတၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်န့ၣ် မၤတၢ်တီတီလိၤလိၤ အဃိ အကျဲလဲၤဝဲ ဘျၢဘျၢလီၤ.
မ့မ့ၢ် ပှၤအၢပှၤသီတဂၤန့ၣ် ကလီၤဃံၢ် ခီဖျိလၢ အနီၢ်ကစၢ် အတၢ်အၢတၢ်သီ အဃိလီၤ.+
၆ ပှၤလၢအသူၣ်ဘျၢသးဘျၢန့ၣ် အ တၢ်တီတၢ်လိၤ ကမၤပူၤဖျဲးအီၤ,+
မ့မ့ၢ် ပှၤလၢအသးတတီဘၣ်န့ၣ် ကဘၣ်ဘျးကဒါက့ၤလၢ အနီၢ်ကစၢ် အတၢ်သူၣ်လီသးကွံ အဃိလီၤ.+
၇ ဖဲပှၤအၢပှၤသီတဂၤ သံဝဲအခါ အတၢ်မုၢ်လၢ် ဟးဂီၤဝဲ
ဒီးအတၢ်သန့ၤအသးလၢ အနီၢ်ကစၢ် အဂံၢ်အဘါန့ၣ် ကကဲထီၣ် တၢ်ခီလီလီလီၤ.+
၈ ပှၤတီပှၤလိၤန့ၣ် ဘၣ်တၢ်မၤပူၤဖျဲးအီၤလၢ တၢ်ကိၢ်တၢ်ဂီၤ
ဒီးပှၤအၢပှၤသီ လီၤဘၣ်က့ၤလၢ ပှၤတီပှၤလိၤ အလီၢ်လီၤ.+
၉ ပှၤလၢအစူးကွံာ်ညိကွံာ်တၢ်နာ်န့ၣ်* အတၢ်ကတိၤ မၤဟးဂီၤ ပှၤလၢအဃၢၤလီၤ.
ပှၤတီပှၤလိၤန့ၣ် အိၣ်ဒီးတၢ်သ့ၣ်ညါအဃိ အဝဲသ့ၣ် ကပူၤဖျဲးလီၤ.+
၁၀ ပှၤတီပှၤလိၤ မၤဂ့ၤတၢ်အဃိ ပှၤဝ့ၢ်ဖိသးခုဝဲလီၤ.
ဖဲပှၤအၢပှၤသီသံအခါ ပှၤသးခုဖးဒိၣ်လီၤ.+
၁၁ ခီဖျိလၢ ပှၤသူၣ်ဘျၢသးဘျၢ န့ၢ်ဘၣ်တၢ်ဆိၣ်ဂ့ၤအဃိ ဝ့ၢ်လဲၤထီၣ်လဲၤထီဝဲလီၤ.+
မ့မ့ၢ် ပှၤအၢပှၤသီ အတၢ်ကတိၤန့ၣ် မၤလီၤပှီၢ်ကွံာ်ဝဲ ဝ့ၢ်လီၤ.+
၁၂ ပှၤလၢအသးတဆးဘၣ်န့ၣ် ပာ်ဆံး ပှၤလၢအဃၢၤလီၤ.
မ့မ့ၢ် ပှၤလၢအသ့ပဲာ်ထံနီၤဖးတၢ်န့ၣ် အိၣ်ဘှ့ၣ်ဝဲလီၤ.+
၁၃ ပှၤလၢအတဲဟးဂီၤ ပှၤဂၤန့ၣ် ဟးတဲဖျါထီၣ် တၢ်ဂ့ၢ်ခူသူၣ်လီၤ.+
မ့မ့ၢ် ပှၤလၢ ပှၤနာ်န့ၢ်အီၤသ့န့ၣ် တတဲဖျါထီၣ် တၢ်ဂ့ၢ်ခူသူၣ်ဘၣ်.
၁၄ ပှၤဟံးစုနဲၣ်ကျဲတၢ်သ့ဂ့ၤဂ့ၤ မ့ၢ်တအိၣ်ဘၣ်န့ၣ် ပှၤဂီၢ်မုၢ် ကလီၤဃံၢ်ဝဲလီၤ.
ပှၤဟ့ၣ်ကူၣ်တၢ် မ့ၢ်အိၣ်အါဂၤန့ၣ် တၢ်ကကဲထီၣ်လိၣ်ထီၣ် ဝဲလီၤ.+
၁၅ ပှၤလၢအအၢၣ်လီၤလၢ အကလိးန့ၢ် ပှၤလၢအတသ့ၣ်ညါဝဲဘၣ်တဂၤ အဒ့ၣ်ကမၢ်န့ၣ် အကဘၣ်ကီဘၣ်ခဲ သပှၢ်ကတၢၢ်လီၤ.+
မ့မ့ၢ် ပှၤလၢအဟးဆှဲး တၢ်အၢၣ်လီၤဒ်န့ၣ်တဖၣ်န့ၣ် ကအိၣ်ဘၣ် ပူၤပူၤဖျဲးဖျဲးလီၤ.
၁၆ ပိာ်မုၣ်လၢ အသညူးသပှၢ်န့ၣ် ပှၤကပာ်ကဲအီၤလီၤ.+
မ့မ့ၢ် ပိာ်ခွါလၢ အသူၣ်အၢသးသီန့ၣ် ဟးဂုာ်န့ၢ် တၢ်ထူးတၢ်တီၤလီၤ.
၁၇ တၢ်လၢ ပှၤလၢအသးဂ့ၤတဂၤ မၤဝဲတဖၣ်န့ၣ် ကဲဘျုးလၢ အနီၢ်ကစၢ်အဂီၢ်စ့ၢ်ကီးလီၤ.+
မ့မ့ၢ် ပှၤလၢအသးအၢန့ၣ် ဒုးအိၣ်ထီၣ်အနီၢ်ကစၢ် အတၢ်ကီ တၢ်ခဲလီၤ.*+
၁၈ ပှၤအၢပှၤသီ န့ၢ်ဘၣ်အဘူးအလဲလၢ အဘျုးတအိၣ်နီၢ်ကီၢ်ဘၣ်.+
ဘၣ်ဆၣ် ပှၤလၢအဖှံလီၤ တၢ်တီတၢ်လိၤန့ၣ် ကန့ၢ်ဘၣ် ခိၣ်ဖး နီၢ်ကီၢ်လီၤ.+
၁၉ ပှၤလၢ အပာ်လီၤသး ဂၢၢ်ဂၢၢ်ကျၢၤကျၢၤလၢ ကမၤတၢ်တီတီလိၤလိၤန့ၣ် ကမူဝဲ,+
မ့မ့ၢ် ပှၤလၢ အလူၤမၤတၢ်အၢန့ၣ် ကသံဝဲလီၤ.
၂၀ ပှၤလၢအသးက့ၣ်န့ၣ် ယဟိဝၤယွၤ သးဘၣ်အၢဝဲလီၤ.+
မ့မ့ၢ် ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်န့ၣ် မၤသးခု ကစၢ်ယွၤ အသးလီၤ.+
၂၁ နာ်သပှၢ်တၢၢ်လၢ ပှၤအၢပှၤသီ ကဘၣ်တၢ်စံၣ်ညီၣ်အီၤ+
ဒီးပှၤတီပှၤလိၤအဖိန့ၣ် ကပူၤဖျဲးတက့ၢ်.
၂၂ ပိာ်မုၣ်လၢအဒိၣ်တၢ်ဂ့ၤ ဘၣ်ဆၣ် အသးတဆးဘၣ်န့ၣ်
လီၤဂာ်ဒ်သိးဒီး နါဒ့ကွီၤထူ တကွီၤလၢ ထိးအနါဒ့လိၤလီၤ.
၂၃ တၢ်လၢ ပှၤတီပှၤလိၤ သးလီဝဲန့ၣ် ဒုးအိၣ်ထီၣ်ထဲ တၢ်ဂ့ၤလီၤ.+
မ့မ့ၢ် တၢ်လၢ ပှၤအၢပှၤသီ မုၢ်လၢ်ဝဲန့ၣ် ဒုးအိၣ်ထီၣ် တၢ်သးဒိၣ်လီၤ.
၂၄ ပှၤလၢအဟ့ၣ်တၢ်ညီန့ၣ် လၢခံ အတၢ်ကအိၣ်အါထီၣ်လီၤ.+
မ့မ့ၢ် ပှၤလၢ အကြၢးဟ့ၣ်တၢ် ဘၣ်ဆၣ် တဟ့ၣ်ဝဲဘၣ်န့ၣ် ကဖှီၣ်လီၤယာ်လီၤဝဲလီၤ.+
၂၅ ပှၤလၢအဟ့ၣ်တၢ်ညီန့ၣ် ကဘီၣ်ထီၣ်ညီထီၣ်ဝဲလီၤ.+
ဒီးပှၤလၢအမၤဆူၣ်ထီၣ် ပှၤဂၤအဂံၢ်အဘါန့ၣ်* အနီၢ်ကစၢ် အဂံၢ်အဘါ ကဆူၣ်ထီၣ်ဝဲ စ့ၢ်ကီးလီၤ.+
၂၆ ပှၤလၢအတထုးထီၣ်ဆါ အဘုဘၣ်န့ၣ် ပှၤကဆိၣ်အၢအီၤလီၤ.
မ့မ့ၢ် ပှၤလၢအထုးထီၣ်ဆါ အဘုန့ၣ် ပှၤကဆိၣ်ဂ့ၤအီၤလီၤ.
၂၇ ပှၤလၢအထဲးဂံၢ်ထဲးဘါလၢ ကမၤတၢ်ဂ့ၤန့ၣ် ကဒိးန့ၢ်ဘၣ် တၢ်သးကညီၤလီၤ.+
မ့မ့ၢ် ပှၤလၢအဃု မၤတၢ်အၢန့ၣ် တၢ်အၢကဘၣ်က့ၤအီၤ သပှၢ်ကတၢၢ်လီၤ.+
၂၈ ပှၤလၢ အသန့ၤအသးလၢ အတၢ်ထူးတၢ်တီၤန့ၣ် ကဘၣ်နးဘၣ်ဖှီၣ်လီၤ.+
မ့မ့ၢ် ပှၤတီပှၤလိၤန့ၣ် ကမဲထီၣ်ဝဲ ဒ်သ့ၣ်လၢ အပှဲၤဒီးအလၣ် အသိးလီၤ.+
၂၉ ပှၤလၢအဒုးအိၣ်ထီၣ် တၢ်ကီတၢ်ခဲလၢ အဟံၣ်ဖိဃီဖိအဂီၢ်န့ၣ် တန့ၢ်သါဘၣ် တၢ်နီတမံၤဘၣ်.*+
ဒီးပှၤလၢအသးတဆးဘၣ်န့ၣ် ကကဲထီၣ်ဝဲ ပှၤကူၣ်တၢ်သ့ အခ့အပှၤလီၤ.
၃၀ တၢ်လၢပှၤတီပှၤလိၤ မၤကဲထီၣ်ဝဲတဖၣ်န့ၣ် လီၤဂာ်ဒ်သိးဒီး သ့ၣ်တၢ်မူတထူၣ်လီၤ.+
ဒီးပှၤလၢ အမၤန့ၢ်ဘၣ် ပှၤသးသမူန့ၣ် မ့ၢ်ပှၤကူၣ်တၢ်သ့လီၤ.+
၃၁ ပှၤတီပှၤလိၤလၢ ဟီၣ်ခိၣ်ချၢ မ့ၢ်ဒိးန့ၢ်ဘၣ် တၢ်လၢအကြၢး ဒိးန့ၢ်ဘၣ်ဝဲန့ၣ်
ပှၤအၢပှၤသီ ဒီးပှၤတၢ်ဒဲးဘးဖိတဖၣ် ကဒိးန့ၢ်ဘၣ်ဝဲ အါန့ၢ်အန့ၣ်လီၤ.+