ယၡါယၤ
၄၁ “ကီးတဖၣ်ဧၢ, အိၣ်ဘှ့ၣ်ဒီး ဒိကနၣ်ယၤတက့ၢ်.
သုဝဲ ပှၤကလုာ်တဖၣ်ဧၢ, မၤဆူၣ်ထီၣ်က့ၤ သုဂံၢ်သုဘါသၢၤ.
ဟဲလၢယအိၣ် ဒီးတဲတၢ်သၢၤ.+
ပကသဂၢၢ်လိာ်သး ဒီးယက စံၣ်ညီၣ်သုလီၤ.
၂ ပှၤလၢ အထိၣ်ဟူးထိၣ်ဂဲၤထီၣ် ပှၤတဂၤလၢ မုၢ်ထီၣ်တခီန့ၣ် မ့ၢ်မတဂၤလဲၣ်.+
လၢတၢ်တီတၢ်လိၤအပူၤန့ၣ် အဝဲကိးန့ၢ်အီၤလၢ အခီၣ်ထံး
ဒ်သိး အကဟ့ၣ်လီၤ ပှၤကလုာ်တဖၣ် လၢအစုပူၤ
ဒီးဟ့ၣ်အီၤ တၢ်မၤနၢၤ လၢစီၤပၤတဖၣ် အဖီခိၣ် အဂီၢ်လီၤ.+
အဝဲ ကမၤလီၤပြံလီၤပြါ ပှၤတဖၣ်န့ၣ် ဒ်ဟီၣ်ခိၣ်ကမူၣ်အသိး လၢပှၤတဂၤအံၤ အနးတဘ့ၣ်အဃိ
ဒီးလၢပှၤတဂၤအံၤ အချံၣ်အဃိန့ၣ် ပှၤတဖၣ်န့ၣ် ကဒံကွံာ် ဒ်လီၢ်ဘိ လၢကလံၤအူဘၣ်အီၤ အသိးလီၤ.
၃ အဝဲလူၤ အဝဲသ့ၣ် ဒီးလဲၤခီဂာ်ဘၣ်တၢ် ဂ့ၤဂ့ၤဘၣ်ဘၣ်
လၢကျဲတဖၣ်လၢ အတလဲၤဘၣ်ဝဲ နီတဘျီဒံးဘၣ်လီၤ.
၄ အဝဲအံၤ မ့ၢ်မတဂၤ အတၢ်မၤလဲၣ်. ဒီးမတဂၤ မၤဝဲဒ်န့ၣ်လဲၣ်.
လၢအခီၣ်ထံးန့ၣ် မတဂၤ ကိးထီၣ် ပှၤတစိၤဘၣ်တစိၤလဲၣ်.
ယၤ, ယဟိဝၤယွၤလီၤ. ယမ့ၢ် ပှၤအဆိကတၢၢ်တဂၤ+
ဒီးဖဲပှၤလၢ အလီၢ်ခံကတၢၢ်တဖၣ် ဟဲအိၣ်ထီၣ်အခါ ယကမ့ၢ် ပှၤဒ်အလီၢ်လီၢ်လီၤ.”+
၅ ပှၤအိၣ်လၢကီးတဖၣ် ထံၣ်ဘၣ်ဝဲတၢ်လၢအမၤအသး ဒီးပျံၤတၢ်လီၤ.
ပှၤအိၣ်လၢ ဟီၣ်ခိၣ်အနၢၣ်ကတၢၢ်တဖၣ် ကနိးကစုာ်ဝဲလီၤ.
အဝဲသ့ၣ် ဟဲပာ်ဖှိၣ်ထီၣ်အသးလီၤ.
၆ ပှၤမၤစၢၤလိာ်သး တဂၤဒီးတဂၤ
ဒီးတဲလိာ်သး တဂၤဒီးတဂၤလၢ “ပာ်ဆူၣ်သးသၢၤ.”
၇ အဃိ ပှၤစုသ့ဖိ ဟ့ၣ်ဂံၢ်ဟ့ၣ်ဘါဝဲ ပှၤပိာ်ထးဖိတဂၤ,+
ပှၤလၢအတီၢ်ဘျ့ထီၣ် ထးလၢတူၤန့ၣ် ဟ့ၣ်ဂံၢ်ဟ့ၣ်ဘါဝဲ
ပှၤလၢအဒိလီၤတၢ်လၢ ထးအခူ အဖီခိၣ်တဂၤ
ဒီးဘၣ်ဃးဒီးပှာ်* န့ၣ်အဝဲတဲဝဲလၢ “ဂ့ၤလီၤမၢၤ.”
လၢခံကတၢၢ်န့ၣ် ပှၤတီၢ်တံၢ် တၢ်ဂီၤတၢ်ဖှီၣ်တခါအံၤလၢ ထးပနဲာ်တဖၣ်ကျၢၤကျၢၤ ဒ်သိး အသုတလီၤကူၢ်တဂ့ၤ အဂီၢ်လီၤ.
၈ “ပှၤအံၣ်စရ့လးဖိသ့ၣ်ဧၢ, မ့မ့ၢ်သုဝဲန့ၣ် သုမ့ၢ်ယခ့ယပှၤလီၤ.+
သုဝဲ စီၤယၤကိာ် အစၢၤအသွဲၣ် တဖၣ်ဧၢ, သုမ့ၢ်ပှၤလၢ ယဃုထၢတ့ၢ်အီၤ+
၉ ယကိးထီၣ်သုလၢ ဟီၣ်ခိၣ်အနၢၣ် အကတၢၢ်တဖၣ်,+
ယကိးထီၣ်သုလၢ တၢ်လီၢ်လၢ အယံၤကတၢၢ်တဖၣ်
ဒီးယတဲသုလၢ ‘သုမ့ၢ် ယခ့ ယပှၤလီၤ.+
ယဃုထၢသု ဒီးယတပာ်တ့ၢ် သုဘၣ်.+
၁၀ ယအိၣ်ဒီးသုအဃိ တဘၣ်ပျံၤတၢ်တဂ့ၤ.+
ယမ့ၢ်သုကစၢ်ယွၤအဃိ တဘၣ်သူၣ်ကိၢ်သးဂီၤတၢ်တဂ့ၤ.+
ယကမၤဆူၣ်ထီၣ် သုဂံၢ်သုဘါ ဒီးယကမၤစၢၤသု သပှၢ်တၢၢ်လီၤ.+
ယကဖီၣ်ဃာ်သုဒီး ယစုထွဲလၢ အတီအလိၤ ကျၢၤကျၢၤလီၤ.’
၁၁ ပှၤလၢ အသးပှံၢ်ထီၣ်သုန့ၣ် ကထံၣ်ဘၣ် တၢ်မဲာ်ဆှး ဒီးအသူးသ့ၣ်လၤကပီၤ ကဟးဂီၤကွံာ် ကိးဂၤဒဲးလီၤ.+
ပှၤလၢအဒုးတၢ်ဒီးသုန့ၣ် ကဘၣ်တၢ်မၤဟးဂီၤကွံာ် အဝဲသ့ၣ် ဒီးအဝဲသ့ၣ် ကသံလီၤ.+
၁၂ ပှၤလၢအအ့ၣ်လိာ်သးဒီးသုန့ၣ် သုကဃုအီၤ ဘၣ်ဆၣ် သုတထံၣ်အီၤလၢၤဘၣ်.
ပှၤလၢအဒုးတၢ်ဒီးသုန့ၣ် ကကဲထီၣ် တၢ်လၢအလုၢ်အပှ့ၤတအိၣ်ဘၣ် လၢအတမ့ၢ် တၢ်နီတမံၤ ဘၣ်လီၤ.+
၁၃ ယၤ, သုကစၢ် ယဟိဝၤယွၤအံၤ ကဖီၣ်ဃာ် သုစုထွဲလီၤ.
ဒီးယမ့ၢ်ပှၤတဂၤလၢ အတဲသုလၢ ‘တဘၣ်ပျံၤတၢ်တဂ့ၤ. ယကမၤစၢၤသုလီၤ.’+
၁၄ စီၤယၤကိာ် အစၢၤအသွဲၣ်တဖၣ် လၢအလီၤဂာ်ဒီး ထိးကလဲာ်ဧၢ,* ပျံၤတၢ်တဂ့ၤ.+
အံၣ်စရ့လး အပှၤဂီၢ်မုၢ်သ့ၣ်ဧၢ, ယကမၤစၢၤသုလီၤ.” အံၣ်စရ့လး အကစၢ်ယွၤ လၢအစီဆှံ လၢအမ့ၢ် ယဟိဝၤယွၤ လၢအပှ့ၤက့ၤသုန့ၣ် တဲဝဲဒ်န့ၣ်လီၤ.+
၁၅ “ယဒုးကဲထီၣ်သု ဒ်သိးဒီး နီၣ်ယီၢ်ဘု+
လၢအမ့ၢ် တၢ်ပီးတၢ်လီ အသီတခါလၢ အကနၣ်အ့ၣ်ခံကပၤလၢာ် လၢပှၤကမၤဘုအဂီၢ်လီၤ.
သုကယီၢ်တံၢ်လီၤ ကစၢၢ်တဖၣ် ဒီးမၤသဘှံးအီၤ
ဒီးမၤကဲထီၣ် တၢ်လူၢ်တဖၣ် လၢဖ့လီၤ.
၁၆ သုကကွံာ်ထီၣ် အဝဲသ့ၣ်လၢ ကလံၤကျါ,
ကလံၤကအူဒံကွံာ် အဝဲသ့ၣ်
ဒီးကလံၤမုၢ်ဖးဒိၣ် ကမၤလီၤပြံ လီၤပြါ အဝဲသ့ၣ်လီၤ.
သုကသူၣ်ဖှံသးညီလၢ ယၤ, ယဟိဝၤယွၤအပူၤ+
ဒီးသုကပာ်ကဖၢလၢသုသးလၢ ယၤ, အံၣ်စရ့လး အကစၢ်ယွၤလၢ အစီဆှံတဂၤ အပူၤလီၤ.”+
၁၇ “ပှၤလၢအလိၣ်ဘၣ် တၢ်မၤစၢၤ ဒီးပှၤဖှီၣ်ဖိယာ်ဖိတဖၣ် ဟးဃုအီထံ ဘၣ်ဆၣ် ထံတအိၣ်ဘၣ်.
အဝဲသ့ၣ် လီၤဘဲအီထံအဃိ အပျ့ၤဃ့ထီဝဲလီၤ.+
ယၤ, ယဟိဝၤယွၤအံၤ ကမၤစၢၤ အဝဲသ့ၣ်လီၤ.+
ယၤ, အံၣ်စရ့လး အကစၢ်ယွၤအံၤ တပာ်တ့ၢ်ကွံာ် အဝဲသ့ၣ်ဘၣ်.+
၁၈ လၢတၢ်လူၢ်တဖၣ်လၢ အဃ့ထီအလိၤန့ၣ် ယကဒုးယွၤလီၤ ထံကျိတဖၣ်+
ဒီးလၢတၢ်တြီၤတဖၣ် အပူၤန့ၣ် ယကဒုးယွၤလီၤ ထံထီၣ်ပၢၢ် တဖၣ်လီၤ.+
ပှၢ်မုၢ်ကနၢန့ၣ် ယကဒုးကဲထီၣ်က့ၤလၢနိၣ်*
ဒီးတၢ်လီၢ်လၢ ထံတအိၣ်ဘၣ်န့ၣ် ယကဒုးကဲထီၣ်က့ၤလၢ ထံထီၣ်ပၢၢ်တဖၣ်လီၤ.+
၁၉ လၢမဲးမုၢ်ခိၣ်န့ၣ် ယကသူၣ်လီၤ သ့ၣ်ဆှိအ့ရ့း,
သ့ၣ်ဖှ့ၡံးတၤ, သ့ၣ်သမ့ၤဟဒး ဒီးသ့ၣ်ဆှိလီၤ.+
လၢမဲးမုၢ်ပျီန့ၣ် ယကသူၣ်လီၤ သ့ၣ်ကၠူနံးဖၢၤ
ဃုာ်ဒီး သ့ၣ်သ့ထိးအီၣ် ဒီးသ့ၣ်ဆှိတအၤၡူၢ်လီၤ.+
၂၀ အဃိ ပှၤခဲလၢာ် ကထံၣ်ဘၣ်, ကသ့ၣ်ညါဘၣ်,
ကပာ်သူၣ်ပာ်သး ဒီးနၢ်ပၢၢ်ဝဲလၢ
ယၤ, ယဟိဝၤယွၤအံၤ မၤတ့ၢ် တၢ်သ့ၣ်တဖၣ်န့ၣ်
ဒီးယၤ, အံၣ်စရ့လး အကစၢ်ယွၤလၢ အစီဆှံတဂၤန့ၣ် ဒုးကဲထီၣ် တၢ်အိၣ်သးတဖၣ်အံၤလီၤ.”+
၂၁ ယဟိဝၤယွၤ တဲဝဲလၢ “တီၣ်ဖျါထီၣ် သုတၢ်ဂ့ၢ်သၢၤ.”
စီၤယၤကိာ် အစီၤပၤ တဲဝဲလၢ “ပာ်ဖျါထီၣ် သုတၢ်ဂ့ၢ်လိာ် ဘှီလိာ်သၢၤ.”
၂၂ “ပာ်ဖျါထီၣ် တၢ်အုၣ်သး ဒီးတဲပှၤ တၢ်လၢ အကမၤအသးလၢ ခါဆူညါသၢၤ.
တဲဘၣ်ပှၤ တၢ်လၢ အမၤအသး လၢအပူၤကွံာ်တဖၣ်အဂ့ၢ်
ဒ်သိး ပကဆိကမိၣ်ထံ တၢ်ဂ့ၢ်တဖၣ်န့ၣ် ဒီးသ့ၣ်ညါတၢ်လၢ အကဟဲကဲထီၣ်အသး အဂီၢ်သၢၤ.
မ့တမ့ၢ်ဘၣ်န့ၣ် တဲဘၣ်ပှၤတၢ်လၢ အကဟဲကဲထီၣ်အသး လၢခံသၢၤ.+
၂၃ ဒ်သိး ပကသ့ၣ်ညါလၢ သုမ့ၢ် ယွၤတဖၣ်အဂီၢ်
တဲဘၣ်ပှၤ တၢ်လၢ အကမၤအသးလၢ ခါဆူညါသၢၤ.+
တၢ်အဂ့ၤမ့ၢ်ဂ့ၤ အအၢမ့ၢ်ဂ့ၤ မၤအီၤတမံၤမံၤ
ဒ်သိး ပကထံၣ်ဘၣ်အီၤ ဒီးပကကမၢကမၣ် အဂီၢ်တက့ၢ်.+
၂၄ သုမ့ၢ်တၢ်လၢ အလုၢ်အပှ့ၤ တအိၣ်ဘၣ်
ဒီးတၢ်လၢသုမၤ ကဲထီၣ်လိၣ်ထီၣ်အီၤန့ၣ် တမ့ၢ်တၢ်နီတမံၤဘၣ်.+
ပှၤတဂၤဂ့ၤ တဂၤဂ့ၤ လၢအဘူၣ်ထီၣ်ဘါထီၣ်သုန့ၣ် လီၤသး ဘၣ်အၢလီၤ.+
၂၅ ယကထိၣ်ဟူးထိၣ်ဂဲၤထီၣ် ပှၤတဂၤလၢ ကလံၤစိးတခီ ဒီးအဝဲ ကဟဲလီၤ.+
အဝဲမ့ၢ် ပှၤတဂၤလၢ အအိၣ်ဟဲလၢ မုၢ်ထီၣ်တခီ+ ဒီးအဝဲကကိးထီၣ် ယမံၤလီၤ.
အဝဲကယီၢ်လီၤ ပှၤပၢတၢ်တဖၣ် ဒ်ကပံာ်အသိး,+
ဒ်ပှၤတ့သပၢၤဖိ ယီၢ်ဝဲဟီၣ်ခိၣ်ကပံာ် အသိးလီၤ.
၂၆ ဒ်သိး သုကသ့ၣ်ညါဘၣ် တၢ်ဂ့ၢ်တခါအံၤအဂီၢ် လၢသုကျါန့ၣ် မတဂၤ တဲဆိပာ်စၢၤဝဲ လၢအခီၣ်ထံးလဲၣ်.
ဒ်သိး သုတဲလၢ ‘ပှၤတဂၤအံၤ တဲတၢ်ဘၣ်’+ ကသ့အဂီၢ် မ့ၢ်ပှၤတဲပာ်စၢၤ တၢ်ဂ့ၢ်တခါအံၤ လၢညါလံၤလံၤန့ၣ် အိၣ်တဂၤဂၤဧါ.
နီၢ်ကီၢ်န့ၣ် ပှၤတဘိးဘၣ်သ့ၣ်ညါ တၢ်ဂ့ၢ်အံၤ နီတဂၤဘၣ်.
ပှၤတတဲဖျါထီၣ်ဝဲ နီတဂၤဘၣ်.
ပှၤတနၢ်ဟူဘၣ် တၢ်ဂ့ၢ်လၢ သုအိၣ်နီတမံၤဘၣ်.”+
၂၇ ယမ့ၢ် ပှၤအဆိကတၢၢ်တဂၤလၢ အတဲစံယိၣ်လၢ “ကွၢ်တၢ်လၢ အကမၤအသးတက့ၢ်.”+
ဒီးယကဆှၢလီၤ ပှၤစိာ် တၢ်သးခုကစီၣ်တဂၤလၢ ဝ့ၢ်ယရူၤၡလ့ၣ် အပူၤလီၤ.+
၂၈ မ့မ့ၢ် တၢ်ဂီၤတၢ်ဖှီၣ်တဖၣ်အံၤန့ၣ် ဟ့ၣ်ကူၣ်တၢ် တသ့ဘၣ်.
ယဆဲးကွၢ်တၢ် ဒီးအတဲဆိပာ်စၢၤတၢ် တသ့ဘၣ်.
ယမၢအဝဲသ့ၣ် တဲဆၢတၢ် သနာ်က့ အဝဲသ့ၣ် တတဲဆၢတၢ် နီတဂၤဘၣ်.
၂၉ တၢ်ဂီၤတၢ်ဖှီၣ်တဖၣ်န့ၣ် အခီပညီ တအိၣ်ဘၣ်.
ဒီးပှၤတဖၣ်န့ၣ် အတၢ်မၤန့ၣ် အဘျုးတအိၣ် နီတမံၤဘၣ်.
အဝဲသ့ၣ် အတၢ်ဂီၤတၢ်ဖှီၣ်တဖၣ်အံၤ မ့ၢ်ဝဲ တၢ်ကလီကလီ ဒီးအဘျုးတအိၣ်ဘၣ်.+