ဧ့ၤဘြံၤ
၁၂ ပအိၣ်ဒီး ပှၤအုၣ်အသးအါအါဂီၢ်ဂီၢ်* လၢအအိၣ်ဝးတရံးပှၤအဃိ ပဝဲစ့ၢ်ကီး မ်ပကွံာ်လီၤကွံာ် ကယဲၢ်တၢ်ထုးဃၢ ဒီးတၢ်ဒဲးဘးလၢ အမၤနိးမၤဘျးပှၤ ညီညီတခါအံၤတက့ၢ်.+ ဒီးမ်ပဃ့ၢ်တၢ်ဃ့ၢ်ပြၢလၢ အအိၣ်ပာ်လီၤအသးလၢ ပမဲာ်ညါန့ၣ်လၢ တၢ်တူၢ်န့ၢ်ခီၣ်ကဲ အပူၤတက့ၢ်.+ ၂ ယ့ၣ်ၡူးလၢအမ့ၢ်+ ပှၤလၢအဟံးစုနဲၣ်ကျဲ ပတၢ်နာ်* ဒီးပှၤလၢအမၤလၢထီၣ်ပှဲၤထီၣ် ပတၢ်နာ်တဂၤန့ၣ် မ်ပကွၢ်ဃီၤတၢ်ဆူ အအိၣ်ထံထံတက့ၢ်. မ့ၢ်လၢ တၢ်သးခု အိၣ်ပာ်လီၤအသးလၢ အမဲာ်ညါအဃိ အတပာ်တၢ်မဲာ်ဆှးလၢ တၢ်နီတမံၤဘၣ် ဒီးအတူၢ်တၢ်လၢ တၢ်မၤအၢမၤနး အသ့ၣ်တၢၣ်အလိၤ ကဲလီၤ.* ဒီးအဝဲဆ့ၣ်နီၤဝဲလၢ ကစၢ်ယွၤအလီၢ်ပစိာ် အစုထွဲတခီလံ.+ ၃ ဒ်သိး သုသုတလီၤဘှံးဒီး ဟ့ၣ်အၡူတဂ့ၤအဂီၢ်+ ဆိကမိၣ်ထံဘၣ်ဃးဒီး ပှၤတဂၤလၢ အအိၣ်ဒီးတၢ်တူၢ်န့ၢ်ခီၣ်ကဲ ဖဲပှၤတၢ်ဒဲးဘးဖိတဖၣ် တဲဆါအီၤလၢ+ တၢ်ကတိၤလၢ အမၤဘၣ်ဒိလီၤက့ၤ အဝဲသ့ၣ် အနီၢ်ကစၢ်န့ၣ်တက့ၢ်.
၄ ဖဲသုဒုးတၢ်ဒဲးဘးတခါအံၤ အတီၢ်ပူၤန့ၣ် သုတတြီဆၢတၢ်တုၤလၢ သုဘၣ်သံတစု နီတဘျီဒံးဘၣ်. ၅ ဒီးတၢ်ကတိၤတထံၣ်လၢ ကစၢ်ယွၤဟ့ၣ်သဆၣ်ထီၣ်သု ဒ်ဖိခွါတဖၣ်အသိးန့ၣ် သုသးပ့ၤနီၣ်ကွံာ်အီၤ သပှၢ်တၢၢ်လံ. အတဲဝဲလၢ “ယဖိခွါဧၢ, တဘၣ်ဆိကမိၣ်ဆံး ယဟိဝၤယွၤ* အတၢ်သိၣ်က့ၤသီက့ၤတဂ့ၤ. ဒီးဖဲအသိၣ်ဃီၣ်နၤအခါ တဘၣ်သးလၢာ်* တဂ့ၤ. ၆ ပှၤလၢ ယဟိဝၤယွၤအဲၣ်ဝဲန့ၣ် အဝဲသိၣ်က့ၤသီက့ၤဝဲလီၤ. တကးဒံးဘၣ် အဝဲဖျ့* ပှၤကိးဂၤဒဲးလၢ အတူၢ်လိာ်ဝဲ ဒ်အဖိခွါအသိးလီၤ.”+
၇ တၢ်လၢ သုတူၢ်ဘၣ်ခီၣ်ဘၣ်တဖၣ်န့ၣ် ပာ်အီၤဒ် တၢ်သိၣ်က့ၤသီက့ၤ အသိးတက့ၢ်. ကစၢ်ယွၤပာ်သု ဒ်ဖိခွါတဖၣ်အသိးလီၤ.+ ဖိခွါလၢအပၢ် တသိၣ်က့ၤသီက့ၤအီၤဘၣ်န့ၣ် မ့ၢ်အအိၣ်ဝဲ တဂၤဂၤဧါ.+ ၈ ဘၣ်ဆၣ် သုမ့ၢ်တဒိးန့ၢ်ဘၣ် တၢ်သိၣ်က့ၤသီက့ၤလၢ ပဝဲကိးဂၤဒဲး ကဘၣ်ဒိးန့ၢ်ဘၣ်ဝဲန့ၣ် သုကဲဖိသၣ်လၢ ပှၤဒၢဘၢထီၣ်အီၤ ဒီးသုတမ့ၢ် ဖိခွါတဖၣ်ဘၣ်. ၉ တကးဒံးဘၣ် ပပၢ်လၢဟီၣ်ခိၣ်ချၢန့ၣ် သိၣ်က့ၤသီက့ၤပှၤ ဒီးပယူးယီၣ်ပာ်ကဲ အဝဲသ့ၣ်လီၤ. မ့မ့ၢ် ပပၢ်တဂၤလၢ အဟံးစုနဲၣ်ကျဲ ပတၢ်အိၣ်မူ ခီဖျိအသးစီဆှံ အတၢ်စိတၢ်ကမီၤန့ၣ် ဒ်သိးပကမူအဂီၢ် ပကြၢးဆီၣ်လီၤပသး လၢအဖီလာ် အါန့ၢ်အန့ၣ် တမ့ၢ်ဘၣ်ဧါ.+ ၁၀ ဒီးပပၢ်လၢ ဟီၣ်ခိၣ်ချၢန့ၣ် သိၣ်က့ၤသီက့ၤပှၤ တစိၢ်တလီၢ်ဒ် အဝဲသ့ၣ်ထံၣ်ဝဲလၢ အဂ့ၤအသိးလီၤ. မ့မ့ၢ် ကစၢ်ယွၤန့ၣ် အဝဲသိၣ်က့ၤသီက့ၤပှၤ လၢပကန့ၢ်ဘျုးအဂီၢ် ဒ်သိးပကစီဆှံ+ ဒ်အီၤအသိးလီၤ. ၁၁ နီၢ်ကီၢ်န့ၣ် ဖဲပဘၣ် တၢ်သိၣ်က့ၤသီက့ၤပှၤအခါ အတဖျါဒ် တၢ်လၢအလီၤသးခုအသိး တဘျီဃီဘၣ်. အဘၣ်ပှၤဆါလီၤ. ဘၣ်ဆၣ် လၢခံန့ၣ် ပှၤလၢအဘၣ် တၢ်သိၣ်လိနဲၣ်လိအီၤ ခီဖျိလၢ တၢ်သိၣ်က့ၤသီက့ၤအဃိန့ၣ် ကဒိးန့ၢ်ဘၣ် တၢ်မုာ်တၢ်ခုၣ် ဒီးတၢ်အိၣ်မူလၢ အတီအလိၤလီၤ.
၁၂ အဃိ စုလၢအလီၤဘျး ဒီးခီၣ်လ့ၢ်ခိၣ်လၢ အဂံၢ်လီၤစၢ်တဖၣ်န့ၣ် မၤဆူၣ်ထီၣ်အီၤတက့ၢ်.+ ၁၃ ဒီးဒ်သိး ပှၤလၢအဘၣ်ဒိ သုတနးထီၣ်တဂ့ၤ ဒီးကဘျါက့ၤအဂီၢ် ဆဲးလဲၤတၢ်လိၤလိၤလၢ ကျဲလၢအဘၣ်တက့ၢ်.+ ၁၄ ဂုာ်ကျဲးစၢး အိၣ်ဃူအိၣ်ဖိးဒီး ပှၤခဲလၢာ်တက့ၢ်.+ ပှၤလၢအတဘၣ် တၢ်ပာ်စီဆှံအီၤဘၣ်န့ၣ်+ တထံၣ်ဘၣ်ကစၢ် နီတဂၤဘၣ် အဃိ ဂုာ်ကျဲးစၢး အိၣ်မူစီဆှံတက့ၢ်. ၁၅ ဒ်သိးပှၤသုတဘၣ်တူၢ်ၡူကွံာ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် နီတဂၤတဂ့ၤအဂီၢ် ပလီၢ်သုသးတက့ၢ်. သုမ့ၢ်တပလီၢ်သုသးဘၣ်န့ၣ် တၢ်အဂံၢ်လၢ အအိၣ်ဒီး တၢ်စုၣ်တၢ်ပျၢ်န့ၣ် ကဟဲအိၣ်ထီၣ်ဝဲ ဒ်သိးကဒုးကဲထီၣ်ဝဲ တၢ်ကီတၢ်ခဲ ဒီးပှၤအါဂၤ ကဘၣ်အၢဘၣ်သီဝဲ လၢအဃိလီၤ.+ ၁၆ ဒ်သိး ပှၤမၤကမၣ်မုၣ်ကမၣ်ခွါ* မ့တမ့ၢ် ပှၤလၢအတပာ်လုၢ်ပာ်ပှ့ၤ တၢ်လၢအစီဆှံတဖၣ်ဒ် စီၤဧ့ၡီၤအသိး သုတအိၣ်လၢ သုကျါ နီတဂၤတဂ့ၤအဂီၢ် ပလီၢ်သုသးတက့ၢ်. စီၤဧ့ၡီၤ မ့ၢ်ပှၤလၢ အခီလဲဝဲ ဖိဝဲၢ်ကိအတၢ်ခွဲးတၢ်ယာ်တဖၣ်လၢ တၢ်အီၣ်တဘျီအဂီၢ်လီၤ.+ ၁၇ သုသ့ၣ်ညါလၢ လၢခံဖဲအဝဲအဲၣ်ဒိး ဒိးန့ၢ်ဘၣ်တၢ်ဆိၣ်ဂ့ၤအခါ အဝဲဘၣ် တၢ်ဂ့ၢ်လိာ်ကွံာ်အီၤလီၤ. ဒီးဒ်သိးအပၢ် ကဆီတလဲ အတၢ်ဆၢတဲာ်အဂီၢ် အဝဲဂုာ်ကျဲးစၢး ဆူၣ်ဆူၣ် ပှဲၤဒီးမဲာ်ထံမဲာ်နိ+ သနာ်က့ တကဲထီၣ်ဘၣ်.
၁၈ သုတဟဲဃီၤဆူ ကစၢၢ်လၢ ပှၤထိးအီၤသ့+ လၢအအိၣ်ဒီးမ့ၣ်အူလၢ အကဲၤကပျီၤထီၣ်+ ဒီးတၢ်အၢၣ်သူ ဒီးတၢ်ခံး ဒီးကလံၤမုၢ်+ ၁၉ ဒီးကွဲၤအသီၣ်+ ဒီးတၢ်ကလုၢ်လၢ အသီၣ်လၢ+ မူခိၣ်န့ၣ်ဘၣ်. ဖဲပှၤဂီၢ်မုၢ်တဖၣ် နၢ်ဟူဘၣ်ဝဲအခါ အဝဲသ့ၣ်ဃ့ကညးတၢ် ဒ်သိးအသုတနၢ်ဟူအါထီၣ် တၢ်အကလုၢ်အံၤ လၢၤတဂ့ၤအဂီၢ်လီၤ.+ ၂၀ တၢ်မၤလိာ်လၢ အတဲဝဲလၢ “ဆၣ်ဖိကီၢ်ဖိဒၣ်လဲာ် မ့ၢ်ထိးဘၣ်ကစၢၢ်အံၤဒီး ကဘၣ် တၢ်ကွံာ်သံအီၤလၢလၢၢ်”+ န့ၣ်ပှၤဂီၢ်မုၢ် တူၢ်ဝဲတပှဲၤဘၣ်. ၂၁ တကးဒံးဘၣ် တၢ်လၢအဝဲသ့ၣ် ထံၣ်ဝဲန့ၣ် မ့ၢ်တၢ်လၢ အလီၤပျံၤလီၤဖုး တုၤဒၣ်လဲာ် စီၤမိၤၡ့တဲဝဲလၢ “ယပျံၤတၢ် ဒီးယကနိးကစုာ်လီၤ.”+ ၂၂ မ့မ့ၢ်သုန့ၣ် သုဟဲဃီၤလၢ ကစၢၢ်စံယိၣ်+ ဒီးလၢကစၢ်ယွၤ လၢအမူဝဲတဂၤအဝ့ၢ် လၢအမ့ၢ် ယရူၤၡလ့ၣ် လၢအဘၣ်ဃးဒီးမူခိၣ်အအိၣ်,+ လၢမူခိၣ်ကလူးလၢ အကလးတဖၣ် ၂၃ အတၢ်အိၣ်ဖှိၣ်အအိၣ်,+ လၢဖိဝဲၢ်ကိတဖၣ်လၢ အမံၤအိၣ်ကွဲးအသးလၢမူခိၣ် အတၢ်အိၣ်ဖှိၣ်အအိၣ်, လၢကစၢ်ယွၤလၢအမ့ၢ် ပှၤခဲလၢာ် အစံၣ်ညီၣ်ကွီၢ်အအိၣ်,+ လၢပှၤတီပှၤလိၤ လၢအအိၣ်မူဝဲဒ် တၢ်လၢ အလီၤပလိာ်လိာ်အသးဒီး သးစီဆှံ+ ဒီးလၢအဘၣ် တၢ်ဒုးကဲထီၣ်အီၤလၢ ပှၤလၢပှၤပှဲၤတဖၣ်အအိၣ်,+ ၂၄ လၢယ့ၣ်ၡူးလၢအမ့ၢ် ပှၤလၢအမၤစၢၤတၢ်လၢ ပှၤခံခီအဘၢၣ်စၢၤ+ လၢအဘၣ်ဃးဒီး တၢ်အၢၣ်လီၤအီလီၤအသီန့ၣ်အအိၣ်+ ဒီးလၢတၢ်သွံၣ်လၢ အဘၣ်တၢ်ဖှံလီၤအီၤ လၢအတဲတၢ်ဘၣ်ဃးဒီး တၢ်လၢအဂ့ၤန့ၢ်ဒံး စီၤဟ့းဘ့းလး အသွံၣ်န့ၣ်အအိၣ်လီၤ.+
၂၅ ပလီၢ်သုသး ဒ်သိးသုသုတဂ့ၢ်လိာ်လၢ သုကဒိကနၣ်ပှၤလၢ အတဲတၢ်တဂၤန့ၣ်တဂ့ၤ. လၢညါ ပှၤဂ့ၢ်လိာ်လၢ ကဒိကနၣ် ပှၤတဂၤလၢအတဲ ကစၢ်ယွၤအတၢ်ဟ့ၣ်ပလီၢ် လၢဟီၣ်ခိၣ်ချၢ ဒီးအဝဲသ့ၣ် တပူၤဖျဲးဒီးတၢ်စံၣ်ညီၣ်ဘၣ်. မ့မ့ၢ်ဒ်န့ၣ်န့ၣ် ပမ့ၢ်ဃၣ်ဒူၣ်ချၢပသးလၢ ပှၤလၢအတဲတၢ်လၢ မူခိၣ်တဂၤအအိၣ်န့ၣ် ပကဘၣ်တၢ်စံၣ်ညီၣ် ဒိၣ်န့ၢ်အန့ၣ် စၢၢ်တလၢၢ်လီၤ.+ ၂၆ ဖဲန့ၣ်အဆၢကတီၢ် အကလုၢ်န့ၣ် မၤဟူးဝဲဟီၣ်ခိၣ်လီၤ.+ ဘၣ်ဆၣ် ခဲအံၤန့ၣ် အအၢၣ်လီၤဝဲလၢ “ယကမၤဟူးထီၣ် ဟီၣ်ခိၣ်တဘျီဒံး တကးဒံးဘၣ် ယကမၤဟူး မူခိၣ်စ့ၢ်ကီးလီၤ.”+ ၂၇ တၢ်ကတိၤတဖျၢၣ် လၢအမ့ၢ် “တဘျီဒံး” န့ၣ်ပာ်ဖျါထီၣ်ဝဲလၢ ကစၢ်ယွၤ ကမၤလီၤမၢ်ကွံာ် တၢ်လၢအဟူးသ့တဖၣ် လၢအမ့ၢ် တၢ်လၢပှၤတ့ထီၣ်အီၤတဖၣ် ဒ်သိးတၢ်လၢ အဟူးတသ့ဘၣ်တဖၣ်န့ၣ် ကအိၣ်တ့ၢ်ဒံးအဂီၢ်လီၤ. ၂၈ မ့ၢ်လၢပဒိးန့ၢ်ဘၣ် ဘီမုၢ်လၢတၢ်မၤဟူးအီၤ တသ့ဘၣ်အဃိ မ်ပဆဲးဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်တက့ၢ်. ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ်အံၤအဃိ ပမၤတၢ်မၤစီဆှံလၢ အဘၣ် ကစၢ်ယွၤအသးလၢ တၢ်ပျံၤယွၤ ဒီးတၢ်ယူးယီၣ်ပာ်ကဲအပူၤ သ့ဝဲလီၤ. ၂၉ နီၢ်ကီၢ်န့ၣ် ပကစၢ်ယွၤမ့ၢ်ဝဲ မ့ၣ်အူလၢ အအီၣ်ကွံာ်တၢ်လီၤ.+