၁ ကွဲးနီၣ်တၢ်
၂၈ ဒီးစီၤဒၤဝံး ဒုးအိၣ်ဖှိၣ် အံၣ်စရ့လး အပဒိၣ်တဖၣ် ခဲလၢာ် လၢဝ့ၢ်ယရူၤၡလ့ၣ် အပူၤလီၤ. ပှၤတဖၣ်န့ၣ် ပၣ်ဃုာ်ဒီး ပှၤအဒူၣ်အပဒိၣ်တဖၣ်,+ သုးက့ခိၣ်တဖၣ်လၢ အမၤစၢၤစီၤပၤ, ပှၤတကထိ အခိၣ်တဖၣ်, ပှၤတကယၤ အခိၣ်တဖၣ်,+ ပှၤအခိၣ်လၢ အကွၢ်ထွဲ စီၤပၤဒီး+ အဖိခွါတဖၣ်+ အတၢ်စုလီၢ်ခီၣ်ခိၣ် ဒီးဆၣ်ဖိကီၢ်ဖိတဖၣ်, ပဒိၣ်ဖးဒိၣ်တဖၣ်, ပှၤလၢအဂံၢ်ဆူၣ်ဒီး အိၣ်ဒီးတၢ်သ့တၢ်ဘၣ် ကိးဂၤဒဲးလီၤ.+ ၂ စီၤပၤဒၤဝံး ဆၢထၢၣ် ဒီးတဲဝဲလၢ
“ယဒီပုၢ်ဝဲၢ်ဒီး ယပှၤဂီၢ်မုၢ်သ့ၣ်ဧၢ, ဒိကနၣ်ယၤတက့ၢ်. ယသးဆူၣ်လၢ ယကတ့ထီၣ် ဟံၣ်တဖျၢၣ်လၢ ယဟိဝၤယွၤ အတၢ်အၢၣ်လီၤအီလီၤ အတလါ ကအိၣ်ဝဲလၢအပူၤ ထီဘိအဂီၢ် ဒီးလၢအကကဲထီၣ် ပကစၢ်ယွၤ အခီၣ်ယီၢ်လီၤ အလီၢ်လီၤ.+ ဒီးယကတဲာ်ကတီၤပာ်စၢၤတၢ်လၢ ကတ့ထီၣ်တၢ် အဂီၢ်လီၤ.+ ၃ ဘၣ်ဆၣ် ယွၤလၢအမ့ၢ်အတီတဂၤ တဲယၤလၢ ‘နဒုးတ့ၢ် တၢ်ဒုးအါမး ဒီးနလူလီၤတ့ၢ် တၢ်သွံၣ်အဃိ+ နတဘၣ်တ့ထီၣ် ဟံၣ်တဖျၢၣ်လၢ ယမံၤအဂီၢ်ဘၣ်.’+ ၄ သနာ်က့ အံၣ်စရ့လး အကစၢ်ယဟိဝၤယွၤ ဃုထၢထီၣ် ယူဒၤဒ် ပှၤအခိၣ်အသိး+ ဒီးလၢယူဒၤအဒူၣ်ကျါန့ၣ် အဝဲဃုထၢ ယပၢ်အဒူၣ်ဖိထၢဖိ+ ဒီးလၢယပၢ်အဖိခွါတဖၣ် အကျါန့ၣ် အဝဲဃုထၢထီၣ်ယၤ ဒ်သိး ယကကဲထီၣ် စီၤပၤလၢ အံၣ်စရ့လး အဖီခိၣ် လီၤထူလီၤယိာ်လီၤ.+ ယမ့ၢ် ပှၤတဂၤလၢ အဝဲဘၣ်သူၣ်ဘၣ်သးဝဲ အဃိ အဒုးကဲထီၣ်ယၤလၢစီၤပၤ လၢပှၤအံၣ်စရ့လးဖိ ခဲလၢာ် အဖီခိၣ်လီၤ.+ ၅ ယဟိဝၤယွၤ ဟ့ၣ်လီၤယၤ ဖိခွါအါမးလီၤ.+ ဘၣ်ဆၣ် လၢယဖိခွါတဖၣ်အကျါ အဝဲဃုထၢထီၣ် ယဖိခွါ စီၤၡလိၤမိၤလၢ+ ကဆ့ၣ်နီၤလၢ ယဟိဝၤယွၤ အတၢ်ပၢအလီၢ်ပစိာ် လၢအံၣ်စရ့လး အဖီခိၣ်လီၤ.+
၆ “ကစၢ်ယွၤတဲယၤဒ်အံၤ ‘နဖိခွါ စီၤၡလိၤမိၤန့ၣ် ကမ့ၢ်ပှၤတဂၤလၢ ကသူၣ်ထီၣ်ယဟံၣ် ဒီးယတၢ်ပျီတဖၣ် မ့ၢ်လၢ ယဃုထၢထီၣ်အီၤ ဒ်ယဖိခွါအသိး ဒီးယကကဲထီၣ်အပၢ်လီၤ.+ ၇ အဝဲမ့ၢ် ပာ်လီၤအသး ဂၢၢ်ဂၢၢ်ကျၢၤကျၢၤလၢ အကမၤထွဲ ယတၢ်မၤလိာ်တဖၣ် ဒီးယတၢ်သိၣ်တၢ်သီတဖၣ်+ ဒ်အမၤဝဲခဲအံၤအသိးန့ၣ် ယကဒုးအိၣ်ဂၢၢ်ဆိးကျၢၤ အဘီမုၢ် လီၤထူလီၤယိာ်လီၤ.’+ ၈ အဃိ ခဲအံၤန့ၣ် လၢသုဝဲ ပှၤအံၣ်စရ့လးဖိ လၢအမ့ၢ် ယဟိဝၤယွၤ အတၢ်အိၣ်ဖှိၣ် အမဲာ်ညါ ဒီးလၢပကစၢ်ယွၤ အမဲာ်ညါ ယကတဲသုလၢ ဒ်သိးသုကဆဲးအိၣ်လၢ ကီၢ်လၢအဂ့ၤတဘ့ၣ်အံၤ+ ဒီးဟ့ၣ်သါအီၤလၢ သုဖိသုလံၤတဖၣ် ဒ်တၢ်န့ၢ်သါလၢ အဂၢၢ်အကျၢၤအသိး အဂီၢ်န့ၣ် သုကဘၣ် ဃုသ့ၣ်ညါ သုကစၢ် ယဟိဝၤယွၤ အတၢ်မၤလိာ်ခဲလၢာ် ဒီးမၤထွဲအီၤ လီၤတံၢ်လီၤဆဲးလီၤ.
၉ “ဒီးယဖိခွါ စီၤၡလိၤမိၤဧၢ, ယဟိဝၤယွၤ ဃုကွၢ် ပှၤကိးဂၤဒဲး အသူၣ်အသး+ ဒီးအဝဲသ့ၣ်ညါနၢ်ပၢၢ် ပတၢ်ပာ်သူၣ်ပာ်သး ဒီးပတၢ်ဆိကမိၣ် ကိးမံၤဒဲး+ အဃိ နကဘၣ် သ့ၣ်ညါနၢ်ပၢၢ်ထီၣ် နပၢ်အကစၢ်ယွၤ တဂၤအံၤ ဒီးမၤအတၢ်မၤလၢ နသးဒီဖျၢၣ်+ ဒီးလၢတၢ်သူၣ်ဖှံသးညီ အပူၤလီၤ. နမ့ၢ်ဃုအီၤန့ၣ် အဝဲကပျဲဝဲလၢ နကထံၣ်န့ၢ်အီၤ+ ဘၣ်ဆၣ် နမ့ၢ်ပာ်တ့ၢ်အီၤန့ၣ် အဝဲကပာ်တ့ၢ်နၤ လီၤထူလီၤယိာ်လီၤ.+ ၁၀ ခဲအံၤ ယဟိဝၤယွၤ ဃုထၢထီၣ်နၤလၢ နကသူၣ်ထီၣ် ဟံၣ်တဖျၢၣ် ဒ်တၢ်ဘူၣ်ထီၣ်ဘါထီၣ်အလီၢ် အသိးလီၤ. အဃိ အိၣ်ဒီးတၢ်သူၣ်ဒူသးဒူ ဒီးမၤတၢ်တက့ၢ်.”
၁၁ ဝံၤဒီး စီၤဒၤဝံးဟ့ၣ်လီၤ အဖိခွါ စီၤၡလိၤမိၤလၢ တၢ်ဂီၤအဒိလၢ+ အဘၣ်ဃးဒီး တၢ်လုၢ်ဟံၣ်အဘျီၣ်ဒိၣ်+ ဒီးအဒၢးတဖၣ်လၢ အပၣ်ဃုာ်ဒီး တၢ်ပာ်ဖှိၣ်တၢ်အဒၢးတဖၣ်, ဒၢးတဖၣ်လၢ ဟံၣ်ခိၣ်, ဒၢးတဖၣ်လၢ တၢ်လီၢ်ခံ ဒီးဒၢးတဖျၢၣ်လၢ အအိၣ်ဒီး တၢ်မၤဃူမၤဖိးတၢ် အခိၣ်ကျးလီၤ.*+ ၁၂ စီၤဒၤဝံး ဟ့ၣ်လီၤအီၤ တၢ်ဂီၤအဒိလၢ အပာ်ဖျါထီၣ် တၢ်ခဲလၢာ်လၢ သးစီဆှံ ဒုးနဲၣ်တ့ၢ်အီၤလီၤ. တၢ်ဂီၤအဒိအံၤ ပာ်ဖျါထီၣ်ဝဲ ယဟိဝၤယွၤအဟံၣ် အတၢ်ပျီတဖၣ်လၢ အဘၣ်တၢ်ကရၢၢ်ဃာ်အီၤ,+ ပှၤအီၣ်တၢ်အဒၢးတဖၣ်လၢ အအိၣ်ဝးတရံးအီၤ, တၢ်လုၢ်ဒိၣ်ပှ့ၤဒိၣ်အလီၢ်တဖၣ်လၢ ယွၤလၢအမ့ၢ်အတီတဂၤအဟံၣ်ပူၤ ဒီးတၢ်လုၢ်ဒိၣ်ပှ့ၤဒိၣ်အလီၢ်တဖၣ် လၢအအိၣ်ဒီး တၢ်လၢအဘၣ် တၢ်ပာ်စီဆှံတ့ၢ်အီၤတဖၣ်လီၤ.+ ၁၃ တကးဒံးဘၣ် အဝဲဟ့ၣ်လီၤ စီၤၡလိၤမိၤ တၢ်ဟံးစုနဲၣ်ကျဲ လၢအဘၣ်ဃးဒီး ပှၤလုၢ်တၢ်ဒိၣ်အကရူၢ်တဖၣ်+ ဒီးပှၤလ့ၤဝံဖိ အကရူၢ်တဖၣ် ဒီးတၢ်မၤလၢ အဘၣ်ထွဲဒီး ယဟိဝၤယွၤအဟံၣ်အဂီၢ် ဒီးတၢ်ပီးတၢ်လီတဖၣ်လၢ ပှၤသူအီၤလၢ တၢ်ဘူၣ်ထီၣ်ဘါထီၣ် လၢယဟိဝၤယွၤ အဟံၣ်အဂီၢ်လီၤ. ၁၄ အဝဲပာ်ပနီၣ် ထူအတယၢၢ်လၢ တၢ်ပီးတၢ်လီခဲလၢာ်လၢ ကဘၣ်တၢ်သူအီၤလၢ တၢ်မၤအကလုာ်ကလုာ်အဂီၢ်, စ့ညၣ် အတယၢၢ်လၢ တၢ်ပီးတၢ်လီခဲလၢာ်လၢ ကဘၣ်တၢ်သူအီၤလၢ တၢ်မၤအကလုာ်ကလုာ်အဂီၢ်, ၁၅ ထူအတယၢၢ်လၢ မ့ၣ်အူဒၢထူ+ ဒီးမ့ၣ်အူဒၢအခွး အကလုာ်ကလုာ်အဂီၢ်, စ့ညၣ်အတယၢၢ်လၢ မ့ၣ်အူဒၢစ့ ဒီးမ့ၣ်အူဒၢအခွး အကလုာ်ကလုာ်အဂီၢ်, ၁၆ ထူအတယၢၢ်လၢ စီၢ်နီၤခိၣ်ထူ တဘ့ၣ်စုာ်စုာ်လၢ ပှၤပာ်လီၤ ကိၣ်လၢ တၢ်လုၢ်ထီၣ်တၢ်အဂီၢ်,+ စ့ညၣ်အတယၢၢ်လၢ စီၢ်နီၤခိၣ်စ့ တဖၣ်အဂီၢ်, ၁၇ ထူစီအတယၢၢ်လၢ နီၣ်ဆဲးတဖၣ်, လီခီဖျၢၣ်တဖၣ် ဒီးထံအီဒၢတဖၣ်အဂီၢ်, ထူအတယၢၢ်လၢ လီခီဖျၢၣ်လၢအဆံးတဖၣ်+ တဖျၢၣ်စုာ်စုာ်အဂီၢ် ဒီးစ့ညၣ်အတယၢၢ်လၢ လီခီဖျၢၣ်လၢအဆံးတဖၣ် တဖျၢၣ်စုာ်စုာ်အဂီၢ်လီၤ. ၁၈ ဒီးလၢပှၤကတ့ထီၣ် တၢ်လုၢ်လီၢ်လၢ တၢ်ဒွဲၣ်ထီၣ် တၢ်နၢမူအဂီၢ်+ ဒီးခ့ရူာ်ထူတဖၣ် လၢအမ့ၢ် တၢ်ပာ်ဖျါထီၣ် လ့ၣ်ကဟၣ်အဒိအဂီၢ်+ ပှၤကဘၣ်သူထူ* အတယၢၢ်ထဲလဲၣ်န့ၣ် စီၤဒၤဝံး ပာ်ဖျါထီၣ်ဝဲလီၤ. ခ့ရူာ်တဖၣ်အံၤ+ အဒံးဆ့တဖၣ် ယူာ်ထီၣ်အသး ဒီးအကဒုလီၤဘၣ်လၢ ယဟိဝၤယွၤ အတၢ်အၢၣ်လီၤအီလီၤ အတလါ အလိၤလီၤ. ၁၉ စီၤဒၤဝံးတဲဝဲလၢ “ယဟိဝၤယွၤ အစိကမီၤ* အိၣ်ဒီးယၤ ဒီးအဝဲဟ့ၣ်ယၤ တၢ်သ့ၣ်ညါနၢ်ပၢၢ် ဒ်သိးယကကွဲးလီၤ+ တၢ်ဂီၤအဒိခဲလၢာ်လီၤ.”+
၂၀ စီၤဒၤဝံး တဲဘၣ် အဖိခွါ စီၤၡလိၤမိၤလၢ “ပာ်ဆူၣ်နသး, အိၣ်ဒီးတၢ်သူၣ်ဒူသးဒူ ဒီးမၤတၢ်တက့ၢ်. တဘၣ်ပျံၤတၢ်တဂ့ၤ ယကစၢ်ယဟိဝၤယွၤ အိၣ်ဒီးနၤလီၤ.+ အဝဲတပာ်တ့ၢ်နၤဘၣ် ဒီးအတလဲၤသဒၣ်နၤဘၣ်.+ အကအိၣ်ဒီးနၤတုၤလၢ တၢ်မၤလၢ ယဟိဝၤယွၤအဟံၣ်အဂီၢ် ဝံၤဝဲခဲလၢာ်န့ၣ်လီၤ. ၂၁ ပှၤလုၢ်တၢ်ဒိၣ် အကရူၢ်တဖၣ်+ ဒီးပှၤလ့ၤဝံဖိ အကရူၢ်တဖၣ်လၢ+ အကမၤတၢ်လၢ ယွၤလၢအမ့ၢ်အတီတဂၤ အဟံၣ်အဂီၢ်န့ၣ် အိၣ်ဒီးနၤဖဲအံၤလီၤ. ဒီးပှၤလၢအသးအိၣ်မၤတၢ် ဒီးပှၤလၢ အမၤတၢ်သ့ဂ့ၤဂ့ၤ အကလုာ်ကလုာ်+ ဃုာ်ဒီးပဒိၣ်တဖၣ်+ ဒီးပှၤဂီၢ်မုၢ်ခဲလၢာ်လၢ အကမၤပိာ်ထွဲ နတၢ်ဟံးစုနဲၣ်ကျဲခဲလၢာ်န့ၣ် အိၣ်ဒီးနၤလီၤ.”