ယိၤဟၣ်
၁၆ “ဒ်သိး သုတလီၤဃံၢ်တဂ့ၤအဂီၢ် ယတဲသုလၢ တၢ်ဂ့ၢ်တဖၣ်အံၤလီၤ. ၂ ပှၤကနီဟးထီၣ်သုလၢ ဘူၣ်ဘျီၣ်ပူၤလီၤ.+ နီၢ်ကီၢ်န့ၣ် ဆၢကတီၢ် ကဟဲဝဲဖဲ ပှၤကိးဂၤဒဲးလၢ အမၤသံသုန့ၣ်+ ကဆိကမိၣ်ဝဲလၢ အမၤတၢ်မၤ စီဆှံတခါလၢ ကစၢ်ယွၤ အဂီၢ်လီၤ. ၃ ဘၣ်ဆၣ် အဝဲသ့ၣ် ကမၤဝဲဒ်န့ၣ်န့ၣ်, မ့ၢ်လၢ အဝဲသ့ၣ် တသ့ၣ်ညါ ယၤဒီးယပၢ်ဘၣ် အဃိလီၤ.+ ၄ ဒ်လဲၣ်ဂ့ၤ ဒ်လဲၣ်ဂ့ၤ ယတဲဘၣ်သုလၢ တၢ်ဂ့ၢ်တဖၣ်အံၤ ဒ်သိးဖဲ တၢ်ဆၢကတီၢ်ဘၣ်လၢ တၢ်ကဟဲကဲထီၣ် ဒ်န့ၣ်အခါ သုကသ့ၣ်နီၣ်ထီၣ်က့ၤလၢ ယတဲတ့ၢ်သု တၢ်ဂ့ၢ်တဖၣ်အံၤလီၤ.+
“လၢအခီၣ်ထံးန့ၣ် မ့ၢ်လၢယအိၣ်ဒီး သုအဃိ ယတတဲဘၣ်သုလၢ တၢ်ဂ့ၢ်တဖၣ်အံၤ ဒံးဘၣ်. ၅ ဘၣ်ဆၣ် ခဲအံၤ ယကက့ၤလၢ ပှၤလၢ အဆှၢလီၤယၤတဂၤ အအိၣ်လီၤ.+ သနာ်က့ သုတသံကွၢ်ယၤလၢ ‘နကလဲၤဖဲလဲၣ်’ နီတဂၤဘၣ်. ၆ ဒီးမ့ၢ်လၢ ယတဲဘၣ်သု တၢ်ဂ့ၢ်တဖၣ်အံၤအဃိ သုပှဲၤဒီး တၢ်သူၣ်အုးသးအုးလီၤ.+ ၇ ဒ်လဲၣ်ဂ့ၤ ဒ်လဲၣ်ဂ့ၤ ယကတဲသု တီတီလၢ ယကလဲၤတၢ်န့ၣ် ကကဲဘျုးလၢ သုဂီၢ်လီၤ. ယမ့ၢ် တလဲၤတၢ်ဘၣ်န့ၣ် ပှၤမၤစၢၤတၢ်+ တဟဲလီၤလၢ သုအိၣ်ဘၣ်. ဘၣ်ဆၣ် ယမ့ၢ်လဲၤတၢ်န့ၣ် ယကဆှၢလီၤ ပှၤမၤစၢၤတၢ်လၢ သုအိၣ်လီၤ. ၈ ဒီးဖဲအဟဲတုၤဝဲအခါ အကပာ်ဖျါထီၣ်န့ၢ် ဟီၣ်ခိၣ်လၢ တၢ်အုၣ်အသး လီၤတံၢ်လီၤဆဲး ဘၣ်ဃးဒီး တၢ်ဒဲးဘး ဒီးတၢ်တီတၢ်လိၤ ဒီးတၢ်စံၣ်ညီၣ်လီၤ. ၉ အဆိကတၢၢ်န့ၣ် ဘၣ်ဃးဒီး တၢ်ဒဲးဘး,+ မ့ၢ်လၢ အဝဲသ့ၣ် တစူၢ်က့ၤနာ်က့ၤယၤ ဘၣ်အဃိလီၤ.+ ၁၀ ဝံၤဒီး ဘၣ်ဃးဒီး တၢ်တီတၢ်လိၤ, မ့ၢ်လၢ ယကလဲၤလၢ ပၢ်အအိၣ် ဒီးသုတထံၣ်ယၤလၢၤဘၣ် အဃိလီၤ. ၁၁ ဝံၤဒီး ဘၣ်ဃးဒီး တၢ်စံၣ်ညီၣ်, မ့ၢ်လၢ ဟီၣ်ခိၣ်အခိၣ် ဘၣ်တၢ်စံၣ်ညီၣ်အီၤ ဝံၤလံအဃိလီၤ.+
၁၂ “ယကဘၣ်တဲသု တၢ်အိၣ်ဒံးဝဲအါမး ဘၣ်ဆၣ် ခဲအံၤ သုတူၢ်တကဲဒံးဘၣ်. ၁၃ သနာ်က့ သးစီဆှံလၢ အပာ်ဖျါထီၣ် တၢ်မ့ၢ်တၢ်တီန့ၣ်+ ဖဲအဟဲဝဲအခါ အကဟံးစုနဲၣ်ကျဲသု ဒ်သိး သုကနၢ်ပၢၢ် တၢ်မ့ၢ်တၢ်တီ ခဲလၢာ်အဂီၢ်, မ့ၢ်လၢ အတတဲတၢ်ဒ် အနီၢ်ကစၢ် အတၢ်ဆိကမိၣ် အသိးဘၣ်. ဘၣ်ဆၣ် တၢ်လၢ အနၢ်ဟူဘၣ်ဝဲန့ၣ် အကတဲဝဲဒီး အကဒုးသ့ၣ်ညါသု တၢ်လၢ ကဟဲတဖၣ်လီၤ.+ ၁၄ သးစီဆှံ ကမၤလၤကပီၤယၤ+ မ့ၢ်လၢ အကန့ၢ်ဘၣ် တၢ်လၢယအိၣ် ဒီးကဒုးသ့ၣ်ညါသုလီၤ.+ ၁၅ တၢ်လၢအအိၣ်ဒီး ယပၢ်ခဲလၢာ်န့ၣ် မ့ၢ်ယတၢ်လီၤ.+ အဃိ ယတဲလၢ သးစီဆှံ ကဒိးန့ၢ်ဘၣ် တၢ်လၢယအိၣ် ဒီးကဒုးသ့ၣ်ညါသုလီၤ. ၁၆ တယံာ်လၢၤဘၣ်န့ၣ် သုတထံၣ်ဘၣ် ယၤလၢၤဘၣ်+ ဘၣ်ဆၣ် တယံာ်လၢၤဘၣ် သုကထံၣ်ဘၣ်ယၤလီၤ.”
၁၇ အဃိ အပျဲၢ်အဘီၣ်တနီၤ တဲလိာ်အသး တဂၤဒီးတဂၤလၢ “အဝဲတဲပှၤလၢ ‘တယံာ်လၢၤဘၣ်န့ၣ် သုတထံၣ်ဘၣ် ယၤလၢၤဘၣ် ဘၣ်ဆၣ် တယံာ်လၢၤဘၣ် သုကထံၣ်ဘၣ်ယၤ’ ဒီးအတဲဝဲလၢ ‘မ့ၢ်လၢ ယကက့ၤလၢ ပၢ်အအိၣ်အဃိ’ န့ၣ်အခီပညီဒ်လဲၣ်.” ၁၈ အဃိ အဝဲသ့ၣ် တဲဝဲလၢ “အဝဲတဲဝဲလၢ ‘တယံာ်လၢၤဘၣ်’ န့ၣ်အခီပညီဒ်လဲၣ်. အဝဲတဲ တၢ်ဂ့ၢ်မနုၤလဲၣ်န့ၣ် ပတသ့ၣ်ညါဘၣ်.” ၁၉ ယ့ၣ်ၡူး သ့ၣ်ညါဝဲလၢ အဝဲသ့ၣ် အဲၣ်ဒိးသံကွၢ်အီၤ အဃိ အဝဲတဲ အဝဲသ့ၣ်လၢ “သုသံကွၢ်လိာ်သုသး တဂၤဒီးတဂၤ ဒ်အံၤန့ၣ် မ့ၢ်လၢယတဲလၢ ‘တယံာ်လၢၤဘၣ်န့ၣ် သုတထံၣ်ဘၣ် ယၤလၢၤဘၣ် ဘၣ်ဆၣ် တယံာ်လၢၤဘၣ် သုကထံၣ်ဘၣ်ယၤ’ အဃိန့ၣ်ဧါ. ၂၀ ယကတဲဘၣ်သု တီတီလၢ သုကဟီၣ် ဒီးသုကသးအုးလီၤ. ဘၣ်ဆၣ် မ့မ့ၢ်ဟီၣ်ခိၣ်န့ၣ် ကသးခုဝဲလီၤ. သုကသးအုး ဘၣ်ဆၣ် သုတၢ်သးအုးန့ၣ် ကကဲထီၣ်က့ၤလၢ တၢ်သးခုလီၤ.+ ၂၁ ဖဲပိာ်မုၣ်တဂၤ ကအိၣ်ဖျဲၣ်ထီၣ် အဖိအခါန့ၣ် အသးအုးဝဲ, မ့ၢ်လၢ တၢ်ဆၢကတီၢ်လၢ အကတူၢ်ဘၣ်တၢ်ဆါ ဟဲတုၤဝဲအဃိလီၤ. ဘၣ်ဆၣ် ဖဲအအိၣ်ဖျဲၣ်ထီၣ် အဖိဝံၤအလီၢ်ခံ မ့ၢ်လၢ အသးခုဝဲလၢ ဖိသၣ်တဂၤ အိၣ်ဖျဲၣ်ထီၣ်ဝဲလၢ ဟီၣ်ခိၣ်ချၢ အဃိ အဝဲတသ့ၣ်နီၣ်ဘၣ် အတၢ်နးတၢ်ဖှီၣ်လၢ အတူၢ်ဘၣ်တဖၣ် လၢၤဘၣ်. ၂၂ အဃိ ခဲအံၤ သုဝဲစ့ၢ်ကီး သုသးအုးလီၤ. ဘၣ်ဆၣ် ယကထံၣ်ကဒီးသု ဒီးသုကပှဲၤဒီး တၢ်သးခုလီၤ.+ ဒီးပှၤထုးကွံာ် သုတၢ်သးခုအံၤ တသ့နီတဂၤဘၣ်. ၂၃ ဖဲနံၤအဝဲန့ၣ် သုတသံကွၢ်ယၤ တၢ်သံကွၢ် နီတမံၤလၢၤဘၣ်. ယကတဲဘၣ်သု တီတီလၢ သုမ့ၢ်ဃ့တၢ်လၢ ပၢ်အအိၣ် လၢယမံၤအပူၤ တမံၤဂ့ၤ တမံၤဂ့ၤန့ၣ်+ အကဟ့ၣ်လီၤသုလီၤ.+ ၂၄ တုၤခဲအံၤ သုတဃ့တၢ်လၢ ယမံၤအပူၤ နီတမံၤဒံးဘၣ်. ဒ်သိး သုကပှဲၤဒီးတၢ်သးခု အဂီၢ် ဃ့တၢ် ဒီးသုကဒိးန့ၢ်ဘၣ်လီၤ.
၂၅ “ယတဲဘၣ်သု တၢ်ဂ့ၢ်တဖၣ်အံၤလၢ တၢ်ကတိၤဒိတဖၣ်လီၤ. တၢ်ဆၢကတီၢ် ကဟဲဝဲဖဲ ယတတဲဘၣ်သုလၢ တၢ်ကတိၤဒိတဖၣ်လၢၤဘၣ် ဒီးယကတဲဘၣ်သု ပၢ်အဂ့ၢ်ပျီပျီလီၤ. ၂၆ ဖဲနံၤအဝဲန့ၣ် သုကဃ့တၢ်လၢ ပၢ်အအိၣ်လၢ ယမံၤအပူၤလီၤ. ဘၣ်ဆၣ် ယတဲဒ်အံၤန့ၣ် အခီပညီ တမ့ၢ်လၢ ယကဃ့န့ၢ် တၢ်လၢသုဂီၢ် ကိးဘျီဒဲးဘၣ်. ၂၇ ပၢ်အနီၢ်ကစၢ်ဒၣ်ဝဲ အဲၣ်သု, မ့ၢ်လၢ သုအဲၣ်ယၤ+ ဒီးသုနာ်လၢ ယဟဲဒ် ကစၢ်ယွၤ အပှၤခၢၣ်စးတဂၤ အဃိလီၤ.+ ၂၈ ယဟဲလီၤလၢ ဟီၣ်ခိၣ်ချၢ ဒ်ပၢ်အပှၤခၢၣ်စး အသိးလီၤ. ခဲအံၤ ယကဟးထီၣ်လၢ ဟီၣ်ခိၣ်ချၢ ဒီးက့ၤထီၣ်လၢ ပၢ်အအိၣ်လီၤ.”+
၂၉ အပျဲၢ်အဘီၣ်တဖၣ် တဲဝဲလၢ “ကစၢ်ဧၢ, မ့ၢ်လၢ နတသူ တၢ်ကတိၤဒိတဖၣ်လၢၤဘၣ်အဃိ ခဲအံၤ ပနၢ်ပၢၢ်တၢ်လၢ နတဲတဖၣ်လီၤ. ၃၀ နသ့ၣ်ညါ တၢ်ခဲလၢာ်အဃိ တလိၣ် ပှၤတဲနၤတၢ်နီတမံၤဘၣ်န့ၣ် ခဲအံၤ ပသ့ၣ်ညါလံ. လၢတၢ်ဂ့ၢ်အံၤအဃိ ပနာ်လၢ နဟဲလီၤလၢ ကစၢ်ယွၤ အအိၣ်လီၤ.” ၃၁ ယ့ၣ်ၡူးတဲဆၢ အဝဲသ့ၣ်လၢ “ခဲအံၤသုနာ်လံဧါ. ၃၂ တၢ်ဆၢကတီၢ်လၢ သုဝဲကိးဂၤဒဲး ကက့ၤဃ့ၢ်လၢ သုနီၢ်ကစၢ်အဟံၣ် ဒီးကပာ်တ့ၢ်ကွံာ်ယၤ ထဲတဂၤန့ၣ် ဘူးထီၣ်လံ.+ ဘၣ်ဆၣ် မ့ၢ်လၢ ယပၢ်အိၣ်ဒီးယၤ အဃိ ယတအိၣ်ထဲ တဂၤဘၣ်.+ ၃၃ ယတဲဘၣ်သု တၢ်ဂ့ၢ်တဖၣ်အံၤ ဒ်သိး သုကအိၣ်ဒီး တၢ်သူၣ်မံသးမုာ်လၢ ယဃိလီၤ.+ လၢဟီၣ်ခိၣ်ချၢအံၤ သုကထံၣ်ဘၣ် တၢ်နးတၢ်ဖှီၣ် ဘၣ်ဆၣ် ယမၤနၢၤဟီၣ်ခိၣ်လံ အဃိအိၣ်ဒီး တၢ်သးဒူတက့ၢ်.”+