စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်, လၢ နံၤဟ့လိၢ်* အဂီၢ်. စီၤဒၤဝံးအထါ.
၅ အိ ယဟိဝၤယွၤဧၢ, ဒိကနၣ် တၢ်လၢယတဲ+
ဒီးပာ်သူၣ်ပာ်သး ယတၢ်သူၣ်လီၤဘှံးသးလီၤတီၤတက့ၢ်.
၂ အိ ယစီၤပၤ ဒီးယကစၢ်ယွၤဧၢ, ယဃ့ထုကဖၣ်လၢနအိၣ် အဃိ,
ဒိကနၣ်ဘၣ် ယတၢ်ကိးပသူထီၣ်လၢ တၢ်မၤစၢၤအဂီၢ်တက့ၢ်.
၃ အိ ယဟိဝၤယွၤဧၢ, လၢဂီၤခီန့ၣ် နကနၢ်ဟူယကလုၢ်+
ဒီးလၢဂီၤခီန့ၣ် ယကတဲဖျါထီၣ် ယတၢ်ဘၣ်ယိၣ်လၢနအိၣ်+ ဒီးယကခိးကွၢ်လၢ် နတၢ်စံးဆၢလီၤ.
၄ နတမ့ၢ် ကစၢ်ယွၤလၢ အဘၣ်သူၣ်ဘၣ်သး တၢ်အၢတၢ်သီဘၣ်.+
ပှၤအၢပှၤသီန့ၣ် တအိၣ်ဒီးနၤ နီတဂၤဘၣ်.+
၅ ပှၤလၢ အပာ်ကဖၢလၢအသးန့ၣ် တဆၢထၢၣ်ဘၣ်လၢ နမဲာ်ညါဘၣ်.
နသးဟ့ ကယဲၢ်ပှၤလၢ အမၤတၢ်အၢတၢ်သီလီၤ.+
၆ နကမၤဟးဂီၤ ပှၤလၢ အတဲလံၣ်တဲလီတၢ်တဖၣ်လီၤ.+
ယဟိဝၤယွၤ သးဘၣ်အၢဝဲ ပှၤလၢအမၤဆူၣ်မၤစိးတၢ် ဒီးပှၤလၢအတဲတၢ် တတီတလိၤဘၣ်လီၤ.+
၇ မ့မ့ၢ်ယၤန့ၣ် ခီဖျိလၢ နတၢ်အဲၣ်လၢအတီ အိၣ်အါဝဲအဃိ+ ယကလဲၤနုာ်လီၤလၢ နဟံၣ်ပူၤလီၤ.+
ယကဃၣ်ယမဲာ်လၢ နတၢ်လုၢ်ဟံၣ်စီဆှံအအိၣ် ဒီးဘူၣ်ထီၣ်ဘါထီၣ်နၤ လၢတၢ်ပျံၤဒီး တၢ်ယူးယီၣ်ပာ်ကဲ အပူၤလီၤ.+
၈ အိ ယဟိဝၤယွၤဧၢ, ယဒုၣ်ယဒါ အိၣ်အါမးအဃိ ဆှၢယၤလၢ နကျဲမ့ၢ် ကျဲတီ အပူၤတက့ၢ်.
မၤစၢၤယၤ ဒ်သိး ယကလဲၤဘၣ်လၢ နကျဲအပူၤ ဘျ့ဘျ့ဆှီဆှီတက့ၢ်.+
၉ တၢ်လၢ အဝဲသ့ၣ် တဲဝဲတဖၣ်န့ၣ် ပှၤနာ်န့ၢ် တသ့နီတမံၤဘၣ်.
လၢအဝဲသ့ၣ် အသးပူၤန့ၣ် အိၣ်ထဲ တၢ်အၢတၢ်သီ,
အဝဲသ့ၣ် အကိာ်ယူၢ်ဘိန့ၣ် လီၤဂာ်ဒ်သိးဒီး တၢ်သွၣ်ခိၣ်လၢ အအိၣ် အိးထီၣ်အသး
ဒီးအဝဲသ့ၣ်အပျ့ၤတဖၣ် ပတြၢၤတၢ်လၢ တၢ်သးတဘျၢဘၣ်အပူၤလီၤ.+
၁၀ ဘၣ်ဆၣ် ကစၢ်ယွၤ ကပာ်တၢ်ကမၣ်လၢ အဝဲသ့ၣ်အလိၤလီၤ.
အဝဲသ့ၣ် ကလီၤဃံၢ်က့ၤလၢ အနီၢ်ကစၢ်ဒၣ်ဝဲ အတၢ်ကူၣ်အၢအပူၤလီၤ.+
ခီဖျိလၢ အဝဲသ့ၣ် ထီဒါက့ၤနၤ
ဒီးအတၢ်ကမၣ် အိၣ်အါမးအဃိ နီဟးထီၣ်ကွံာ် အဝဲသ့ၣ်တက့ၢ်.
၁၁ မ့မ့ၢ် ကယဲၢ်ပှၤလၢ အဃုတၢ်ဒီသဒၢလၢ နအိၣ်န့ၣ် ကသးခုဝဲ,+
အဝဲသ့ၣ် ကကိးပသူထီၣ်လၢ တၢ်သးခုအပူၤထီဘိလီၤ.
နကတြီပှၤလၢ အအဲၣ်ဒိး မၤဘၣ်ဒိအဝဲသ့ၣ်,
ဒီးပှၤလၢအအဲၣ်နမံၤန့ၣ် ကသူၣ်ဖှံ သးညီလၢ နပူၤလီၤ.
၁၂ အိ ယဟိဝၤယွၤဧၢ, နကဆိၣ်ဂ့ၤပှၤလၢ အတီအလိၤလီၤ.
နဘၣ်သူၣ်ဘၣ်သး အဝဲသ့ၣ်န့ၣ် လီၤဂာ်ဒ် ကတီၤဖးဒိၣ်တဘ့ၣ်လၢ အကဟုကယာ် အဝဲသ့ၣ်လီၤ.+