၂ ကွဲးနီၣ်တၢ်
၆ ဖဲန့ၣ် စီၤၡလိၤမိၤ တဲဝဲလၢ “ယဟိဝၤယွၤဧၢ, နတဲလၢ နကအိၣ်လၢ တၢ်အၢၣ်ခံးသူ အကျါလီၤ.+ ၂ ဒီးခဲအံၤ ယတ့ထီၣ်န့ၢ်နၤ ဟံၣ်လီၤဘီလီၤမုၢ် တဖျၢၣ်အံၤ လၢအမ့ၢ်တၢ်လီၢ် လီၤတံၢ်လီၤဆဲး လၢနကအိၣ်လၢ အပူၤ လီၤထူလီၤယိာ်လီၤ.”+
၃ ဝံၤဒီးဖဲအံၣ်စရ့လး အတၢ်အိၣ်ဖှိၣ်ဒီတဖု ဆၢထၢၣ်အခါ စီၤပၤ ဃၣ်ဃီၤအသးလၢ အဝဲသ့ၣ်အအိၣ် ဒီးဆိၣ်ဂ့ၤအဝဲသ့ၣ်လီၤ.+ ၄ ဒီးအဝဲတဲဝဲလၢ “မ်အံၣ်စရ့လး အကစၢ် ယဟိဝၤယွၤ ဘၣ်တၢ်စံးထီၣ်ပတြၢၤအီၤတက့ၢ်. တၢ်လၢ အဝဲအၢၣ်လီၤ ယပၢ်စီၤဒၤဝံးလၢ အထးခိၣ်န့ၣ် အဝဲမၤလၢထီၣ်ပှဲၤထီၣ်ဝဲလၢ အစုလီၤ. အဝဲတဲဝဲလၢ ၅ ‘စးထီၣ် မုၢ်တနံၤလၢ ယဒုးဟးထီၣ် ယပှၤဂီၢ်မုၢ် လၢကီၢ်အဲၤကူပတူးအပူၤန့ၣ် လၢအံၣ်စရ့လး အဒူၣ်တဖၣ် အဟီၣ်ကဝီၤအပူၤ ယတဃုထၢထီၣ်ဝ့ၢ်လၢ ပှၤကတ့ထီၣ်ဟံၣ်လၢ ယမံၤကအိၣ်ဝဲ ဖဲန့ၣ်အဂီၢ်ဒံးဘၣ်.+ ဒီးယတဃုထၢထီၣ် ပှၤပိာ်ခွါလၢ ကကဲပှၤအခိၣ် လၢယပှၤဂီၢ်မုၢ် အံၣ်စရ့လး အဖီခိၣ်ဒံးဘၣ်. ၆ ဘၣ်ဆၣ် ယဃုထၢထီၣ် ဝ့ၢ်ယရူၤၡလ့ၣ်+ ဒ်သိးယမံၤကအိၣ်ဝဲ ဖဲန့ၣ်အဂီၢ်လီၤ. ဒီးယဃုထၢထီၣ် စီၤဒၤဝံး ဒ်သိး အကအိၣ်လၢ ယပှၤဂီၢ်မုၢ် အံၣ်စရ့လး အဖီခိၣ်လီၤ.’+ ၇ ဒီးယပၢ်စီၤဒၤဝံး အသးဆူၣ်လၢ ကတ့ထီၣ် ဟံၣ်တဖျၢၣ်လၢ အံၣ်စရ့လး အကစၢ် ယဟိဝၤယွၤ အမံၤအဂီၢ်လီၤ.+ ၈ ဒီးယဟိဝၤယွၤ တဲဘၣ်ယပၢ် စီၤဒၤဝံးလၢ ‘နသးဆူၣ်လၢ နကတ့ထီၣ် ဟံၣ်တဖျၢၣ်လၢ ယမံၤအဂီၢ် ဒီးနတၢ်သးဆူၣ်န့ၣ် ဂ့ၤဒိၣ်မး. ၉ ဘၣ်ဆၣ် နတမ့ၢ်ပှၤလၢ အကတ့ထီၣ် ယဟံၣ်ဘၣ်. နဖိခွါလၢ အကအိၣ်ဖျဲၣ်ထီၣ်န့ၣ် ကမ့ၢ်ပှၤလၢ အကတ့ထီၣ် ဟံၣ်တဖျၢၣ်လၢ ယမံၤအဂီၢ်လီၤ.’+ ၁၀ ယဟိဝၤယွၤ မၤလၢပှဲၤထီၣ် အတၢ်အၢၣ်လီၤအဃိ ခဲအံၤ ယထီၣ် ယပၢ်စီၤဒၤဝံး အလီၢ် ဒီးယဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ်+ ဒ်ယဟိဝၤယွၤ အၢၣ်လီၤဝဲအသိးလီၤ.+ ဒီးယတ့ထီၣ် ဟံၣ်တဖျၢၣ်လၢ အံၣ်စရ့လး အကစၢ် ယဟိဝၤယွၤ အမံၤအဂီၢ်လီၤ. ၁၁ ဒီးဖဲန့ၣ် ယပာ်လီၤ တလါစီဆှံ လၢအအိၣ်ဒီး တၢ်အၢၣ်လီၤအီလီၤ+ လၢယဟိဝၤယွၤ မၤတ့ၢ်ဝဲဒီး အံၣ်စရ့လး အပှၤဂီၢ်မုၢ်န့ၣ်လီၤ.”
၁၂ ဒီးစီၤၡလိၤမိၤ ဆၢထၢၣ်လၢ ယဟိဝၤယွၤ အတၢ်လုၢ်လီၢ် အမဲာ်ညါဒီး အံၣ်စရ့လး အတၢ်အိၣ်ဖှိၣ်ဒီတဖု အမဲာ်ညါ ဒီးအဝဲယူာ်ထီၣ် အစုလီၤ.+ ၁၃ (စီၤၡလိၤမိၤ တ့ထီၣ်ဝဲ ပျဲၢ်စီၢ်တိၢ်ဘီတခါ ဒီးပာ်ဝဲလၢ တၢ်ပျီ* အခၢၣ်သးလီၤ.+ ပျဲၢ်စီၢ်တခါအံၤ အထီအိၣ်ဝဲ ယဲၢ်ပျၢ်,* အဒီၣ်ဃီၤအိၣ်ဝဲ ယဲၢ်ပျၢ် ဒီးအကစီၤထီၣ်ထီ အိၣ်ဝဲ သၢပျၢ်လီၤ. အဃိစီၤၡလိၤမိၤ ဆၢထၢၣ်လၢ ပျဲၢ်စီၢ်အဖီခိၣ်လီၤ.) ဒီးစီၤၡလိၤမိၤ ချံးလီၤခီၣ်လၢ အံၣ်စရ့လး အတၢ်အိၣ်ဖှိၣ်ဒီတဖု အမဲာ်ညါ ဒီးအဝဲယူာ်ထီၣ် အစုလၢမူခိၣ်+ ၁၄ ဒီးအဝဲတဲဝဲလၢ “အိ အံၣ်စရ့လး အကစၢ် ယဟိဝၤယွၤဧၢ, လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကစၢ်ယွၤ ဒ်သိးဒီးနၤ တအိၣ်ဘၣ်. နမ့ၢ်ယွၤလၢ အတီဒီး အတၢ်အၢၣ်လီၤအီလီၤ ဒီးနပာ်ဖျါထီၣ် တၢ်အဲၣ်လၢအတီ လၢနခ့နပှၤတဖၣ် လၢအမၤထွဲ နတၢ်ဘၣ်သး လၢအသးဒီဖျၢၣ် အဖီခိၣ်လီၤ.+ ၁၅ နတီဒီး တၢ်အၢၣ်လီၤလၢ နမၤအီၤဒီး ယပၢ်စီၤဒၤဝံးလီၤ.+ နအၢၣ်လီၤတၢ်လၢ နထးခိၣ် ဒီးတနံၤအံၤ နမၤလၢထီၣ်ပှဲၤထီၣ်အီၤလၢ နစုလီၤ.+ ၁၆ အိ အံၣ်စရ့လး အကစၢ် ယဟိဝၤယွၤဧၢ, နတဲစ့ၢ်ကီး ယပၢ်စီၤဒၤဝံးလၢ ‘နဖိနလံၤ မ့ၢ်ပလီၢ်အသး ဒ်သိးအကအိၣ်မူမၤထွဲ ယတၢ်သိၣ်တၢ်သီ+ လၢတၢ်သးတီအပူၤ ဒ်နအိၣ်မူလၢ ယမဲာ်ညါအသိးန့ၣ်+ နစၢၤနသွဲၣ်တဂၤ ကဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ်ထီဘိလီၤ.’ အဃိ ဝံသးစူၤ တီဒီး နတၢ်အၢၣ်လီၤအံၤတက့ၢ်. ၁၇ အိ အံၣ်စရ့လး အကစၢ် ယဟိဝၤယွၤဧၢ, တၢ်အၢၣ်လီၤလၢ နမၤအီၤဒီး ယပၢ်စီၤဒၤဝံးန့ၣ် ဝံသးစူၤ မၤလၢပှဲၤအီၤတက့ၢ်.
၁၈ “မ့ၢ်ကစၢ်ယွၤ ကအိၣ်ဒီး ပှၤဟီၣ်ခိၣ်ဖိ လၢဟီၣ်ခိၣ်ချၢ အနီၢ်ကီၢ်ဧါ.+ မူခိၣ်လၢ အလဲၢ်အထီအံၤဒၣ်လဲာ် နအိၣ်တတြီၢ်ဘၣ်+ အဃိ ဟံၣ်လၢ ယတ့ထီၣ်တဖျၢၣ်အံၤ နအိၣ်ကတြီၢ်ဒ်လဲၣ်.+ ၁၉ အိ ယကစၢ် ယဟိဝၤယွၤဧၢ, ခဲအံၤ ဒိကနၣ် ယတၢ်ထုကဖၣ် ဒီးနခ့နပှၤယၤအံၤ အတၢ်ဃ့ကညး လၢတၢ်သးကညီၤ အဂီၢ်တက့ၢ်. ယဃ့နၤ တၢ်မၤစၢၤဒီး ဃ့ထုကဖၣ်လၢ နမဲာ်ညါအံၤန့ၣ် ဒိကနၣ်တက့ၢ်. ၂၀ ဘၣ်ဃးဒီး တၢ်လုၢ်ဟံၣ်အံၤ နတဲပာ်စၢၤလၢ နမံၤကအိၣ်ဖဲန့ၣ်လီၤ.+ အဃိ မ်နမဲာ်ကွၢ်လီၤ တၢ်လုၢ်ဟံၣ်တဖျၢၣ်အံၤ လၢမုၢ်ဆါ ဒီးလၢမုၢ်နၤ ဒ်သိးနကဒိကနၣ် နခ့နပှၤယၤအံၤ အတၢ်ထုကဖၣ် ဖဲယဃၣ်ဃီၤယသးဆူ တၢ်လုၢ်ဟံၣ်အံၤအအိၣ် ဒီးယဃ့ထုကဖၣ် အခါန့ၣ်တက့ၢ်. ၂၁ ဖဲနပှၤဂီၢ်မုၢ် အံၣ်စရ့လး ဃၣ်ဃီၤအသးလၢ တၢ်လုၢ်ဟံၣ်အံၤ ဒီးဃ့ကညးနၤလၢ တၢ်မၤစၢၤအဂီၢ်အခါ ဒီးဖဲနခ့နပှၤယၤအံၤ ဃ့ထုကဖၣ်အခါ+ ဒိကနၣ်ဘၣ် ပတၢ်ထုကဖၣ် လၢနတၢ်အိၣ်တၢ်ဆိးအလီၢ် လၢမူခိၣ်တက့ၢ်.+ ဝံသးစူၤ ဒိကနၣ်ပှၤ ဒီးပျၢ်ပတၢ်ကမၣ်တက့ၢ်.+
၂၂ “ပှၤတဂၤမ့ၢ် မၤကမၣ် အသကိးတဂၤ ဒီးအမ့ၢ်ဘၣ်မၤတၢ်အၢၣ်လီၤ* လၢအပၣ်ဃုာ်ဒီး တၢ်ဆိၣ်အၢန့ၣ် ဖဲအဟဲ လၢနတၢ်လုၢ်လီၢ် အမဲာ်ညါ လၢအအိၣ်ဝဲလၢ ဟံၣ်တဖျၢၣ်အံၤ အပူၤအခါ+ ၂၃ လၢမူခိၣ်န့ၣ် မ်နဒိကနၣ် ဒီးစံၣ်ညီၣ်န့ၢ်တၢ်လၢ နခ့နပှၤတဖၣ်အံၤအဂီၢ်တက့ၢ်. ဒီးပှၤလၢအအၢအသီတဂၤန့ၣ် မ်နမၤကၣ်က့ၤအီၤ ဒီးသိၣ်ဃီၣ်အီၤ ဒ်အတၢ်မၤ အိၣ်ဝဲအသိးတက့ၢ်.+ ဒီးမ့မ့ၢ် ပှၤလၢအတီအလိၤတဂၤန့ၣ် မ်နစံၣ်ညီၣ်ဆၢတဲာ်လၢ အတၢ်ကမၣ်တအိၣ်ဘၣ် ဒီးဟ့ၣ်ဆၢက့ၤအီၤ ဒ်အတၢ်တီတၢ်လိၤ အိၣ်ဝဲအသိးတက့ၢ်.+
၂၄ “ဒီးနပှၤဂီၢ်မုၢ် အံၣ်စရ့လး မ့ၢ်မၤကမၣ်နၤ ခဲအံၤခဲအံၤ ဒီးအဒုၣ်အဒါတဖၣ် မ့ၢ်မၤနၢၤကွံာ် အဝဲသ့ၣ်န့ၣ်+ ဖဲအဝဲသ့ၣ် ဟဲက့ၤလၢ နအိၣ် ဒီးမၤလၤကပီၤနမံၤ+ ဒီးဃ့ထုကဖၣ်+ ဒီးဃ့ကညးတၢ်လၢ နမဲာ်ညါ လၢဟံၣ်တဖျၢၣ်အံၤအပူၤ ဒ်သိးနကသးကညီၤ အဝဲသ့ၣ်အဂီၢ်အခါ+ ၂၅ လၢမူခိၣ်န့ၣ် မ်နဒိကနၣ်+ ဒီးပျၢ်နပှၤဂီၢ်မုၢ် အံၣ်စရ့လး အတၢ်ကမၣ် ဒီးဟဲက့ၤကိး အဝဲသ့ၣ်လၢ ကီၢ်လၢ နဟ့ၣ်ပာ်စၢၤ အဝဲသ့ၣ် ဒီးအဝဲသ့ၣ် အမိၢ်ပၢ်ဖံဖု လၢပျၢၤတဖၣ်န့ၣ်တက့ၢ်.+
၂၆ “ဒီးအဝဲသ့ၣ်မ့ၢ် မၤကမၣ်နၤ ခဲအံၤခဲအံၤ+ ဒီးမူခိၣ်မ့ၢ်ကးတံာ်ဃာ်အသး ဒီးမူခိၣ်မ့ၢ် တစူၤလၢၤဘၣ်+ ဘၣ်ဆၣ် နမ့ၢ်ဆီၣ်လီၤအဝဲသ့ၣ် ဒီးအဝဲသ့ၣ်မ့ၢ် ပီၢ်ယၢ်လီၤက့ၤအသး လၢအတၢ်ဒဲးဘး ဒီးအဝဲသ့ၣ်မ့ၢ် ဃၣ်ဃီၤအသးလၢ ဟံၣ်တဖျၢၣ်အံၤအအိၣ် ဒီးဃ့ဘါထုကဖၣ်တၢ်ဒီး မၤလၤကပီၤနမံၤန့ၣ်+ ၂၇ လၢမူခိၣ်န့ၣ် မ်နဒိကနၣ် နပှၤဂီၢ်မုၢ် အံၣ်စရ့လး အတၢ်ထုကဖၣ် ဒီးပျၢ်ကွံာ် နခ့နပှၤတဖၣ် အတၢ်ကမၣ် တက့ၢ်. ဒီးသိၣ်လိ အဝဲသ့ၣ် ကျဲလၢအဂ့ၤလၢ အဝဲသ့ၣ်ကြၢးပိာ်ဝဲ+ ဒီးဒုးစူၤလီၤမူခိၣ်လၢ+ ကီၢ်လၢနဟ့ၣ်ပာ်စၢၤ နပှၤဂီၢ်မုၢ် ဒ်တၢ်န့ၢ်သါအသိးန့ၣ် အပူၤတက့ၢ်.
၂၈ “ဒီးတၢ်သၣ်ဝံၤလီၤဒိမ့ၢ်ဂ့ၤ,+ တၢ်ဆါသံသတြိာ်မ့ၢ်ဂ့ၤ,+ တၢ်မုၢ်တၢ်ဘိ မ့ၢ်ဟးဂီၤမ့ၢ်ဂ့ၤ,+ ဘုအဃၢ်မ့ၢ်လီၤမ့ၢ်ဂ့ၤ, ဒွဲၣ်အဖုတဖၣ်မ့ၢ်ဂ့ၤ,+ တၢ်ဆါမ့ၢ်အိၣ်ထီၣ် တမံၤဂ့ၤတမံၤဂ့ၤ လၢကီၢ်ပူၤ+ မ့တမ့ၢ် ဒုၣ်ဒါတဖၣ် မ့ၢ်ကဝီၤဃာ် အဝဲသ့ၣ် အဝ့ၢ်တဖျၢၣ်ဖျၢၣ်လၢ ကီၢ်ပူၤန့ၣ်+ ၂၉ ဖဲပှၤတဂၤဂၤမ့ၢ်ဂ့ၤ, နပှၤဂီၢ်မုၢ် အံၣ်စရ့လး ဒီတဖုမ့ၢ်ဂ့ၤ ဃၣ်ဃီၤအသးလၢ ဟံၣ်တဖျၢၣ်အံၤ+ အအိၣ်အခါ ကယဲၢ်တၢ်ဃ့ထုကဖၣ်+ ဒီးတၢ်ဃ့ကညးလၢ တၢ်သးအကညီၤအဂီၢ်န့ၣ်+ (မ့ၢ်လၢ ပှၤတဂၤစုာ်စုာ် သ့ၣ်ညါအနီၢ်ကစၢ် အတၢ်နးတၢ်ဖှီၣ် ဒီးတၢ်လၢ အမၤဘၣ်ဒိအသး)+ ၃၀ မ်နဒိကနၣ် ဖဲနတၢ်အိၣ်တၢ်ဆိးအလီၢ်လၢ+ မူခိၣ် ဒီးမ်နပျၢ်အဝဲသ့ၣ် အတၢ်ကမၣ်တက့ၢ်.+ ဒီးမ့ၢ်လၢ နသ့ၣ်ညါ တၢ်အိၣ်လၢ ပှၤတဂၤစုာ်စုာ် အသးပူၤ (ပှၤလၢအသ့ၣ်ညါ တၢ်အိၣ်လၢ ပှၤသးပူၤ နီၢ်ကီၢ်ကီၢ်န့ၣ် အိၣ်ထဲနၤတဂၤ)+ အဃိ မ်နဟ့ၣ်ဆၢက့ၤ ပှၤတဂၤစုာ်စုာ် ဒ်အတၢ်မၤအိၣ်ဝဲအသိး ၃၁ ဒ်သိးအဝဲသ့ၣ် ကပျံၤနၤ ခီဖျိအိၣ်မူမၤထွဲ နတၢ်ဘၣ်သး ဖဲမုၢ်နံၤ ခဲလၢာ်လၢ အဝဲသ့ၣ်အိၣ်လၢ ကီၢ်လၢနဟ့ၣ်ပာ်စၢၤ ပမိၢ်ပၢ်ဖံဖု လၢပျၢၤတဖၣ် အပူၤန့ၣ်တက့ၢ်.
၃၂ “ဘၣ်ဃးဒီး ပှၤထံဂၤကီၢ်ဂၤဖိတဂၤလၢ အတဘၣ်ထွဲဒီး နပှၤဂီၢ်မုၢ် အံၣ်စရ့လးဘၣ်န့ၣ် အဝဲ မ့ၢ်ဟဲလၢ တၢ်လီၢ်ဖးယံၤ ခီဖျိလၢနမံၤလၢအဒိၣ်အမုၢ်+ ဒီးနစုလၢ အဂံၢ်ဆူၣ်ဘါဆူၣ် ဒီးနယူာ်ဃီၤနစုလၢ နကမၤတၢ်အဃိ ဒီးဖဲအဝဲဟဲ ဒီးဃၣ်ဃီၤအသး လၢတၢ်လုၢ်ဟံၣ်အံၤအအိၣ် ဒီးဃ့ထုကဖၣ်တၢ်အခါ+ ၃၃ မ်နဒိကနၣ်ဘၣ် အတၢ်ထုကဖၣ် လၢနတၢ်အိၣ်တၢ်ဆိးအလီၢ် လၢမူခိၣ် ဒီးမၤဒ် ပှၤထံဂၤကီၢ်ဂၤဖိတဂၤန့ၣ် ဃ့နၤအသိး ခဲလၢာ် ဒ်သိးပှၤခဲလၢာ်လၢ ဟီၣ်ခိၣ်ချၢ ကသ့ၣ်ညါနမံၤ+ ဒီးပျံၤနၤ ဒ်နပှၤဂီၢ်မုၢ် အံၣ်စရ့လးအသိး ဒီးကသ့ၣ်ညါလၢ ဟံၣ်လၢယတ့ထီၣ်တဖျၢၣ်အံၤ ဘၣ်တၢ်ကိးအီၤလၢ နမံၤန့ၣ်တက့ၢ်.
၃၄ “နပှၤဂီၢ်မုၢ်တဖၣ် မ့ၢ်လဲၤဒုးတၢ်ဒီး အဒုၣ်အဒါတဖၣ် ဒ်နမၢ အဝဲသ့ၣ်အသိး+ ဒီးအဝဲသ့ၣ် မ့ၢ်ဃၣ်ဃီၤအသးလၢ ဝ့ၢ်လၢ နဃုထၢထီၣ်အီၤတဖျၢၣ်အံၤ ဒီးလၢဟံၣ်တဖျၢၣ်လၢ ယတ့ထီၣ်လၢ နမံၤအဂီၢ်+ ဒီးဃ့ထုကဖၣ်လၢ+ နအိၣ်န့ၣ် ၃၅ အဝဲသ့ၣ် အတၢ်ထုကဖၣ် ဒီးအတၢ်ဃ့ကညးလၢ တၢ်သးကညီၤအဂီၢ်န့ၣ် မ်နဒိကနၣ် လၢမူခိၣ် ဒီးစံၣ်ညီၣ်န့ၢ်တၢ်လၢ အဝဲသ့ၣ် အဂီၢ်တက့ၢ်.+
၃၆ “အဝဲသ့ၣ် မ့ၢ်မၤကမၣ်ဘၣ်နၤ (ပှၤလၢအတမၤ ကမၣ်ဘၣ်တၢ်န့ၣ် တအိၣ်နီတဂၤဘၣ်),+ ဒီးနမ့ၢ်သးပှံၢ်ထီၣ် အဝဲသ့ၣ်ဒီး နမ့ၢ်ဟ့ၣ်လီၤအဝဲသ့ၣ်လၢ အဒုၣ်အဒါအစုပူၤ ဒီးအဒုၣ်အဒါတဖၣ် မ့ၢ်က့ၤဖီၣ်အီၤဆူ ကီၢ်လၢအယံၤမ့ၢ်ဂ့ၤ လၢအဘူးမ့ၢ်ဂ့ၤ+ ၃၇ ဖဲအဝဲသ့ၣ်အိၣ်လၢ ကီၢ်လၢ အဘၣ်တၢ်က့ၤဖီၣ်အီၤ အပူၤအခါ အဝဲသ့ၣ် မ့ၢ်သ့ၣ်ညါလီၤက့ၤအသး ဒီးဟဲက့ၤကဒါက့ၤ လၢနအိၣ် ဒီးဃ့ကညးနၤလၢ တၢ်သးကညီၤအဂီၢ် ဖဲအဝဲသ့ၣ် အိၣ်လၢ အဒုၣ်အဒါတဖၣ်အကီၢ်ပူၤ ဒီးတဲလၢ ‘ပမၤဘၣ်တၢ်ဒဲးဘး ဒီးပမၤကမၣ်တၢ်လံ ဒီးပမၤဘၣ်တၢ် အၢအၢသီသီလံ’+ ၃၈ ဒီးဖဲအဝဲသ့ၣ် အိၣ်ဝဲလၢ အဒုၣ်အဒါတဖၣ်အကီၢ်ပူၤ အခါ အဝဲသ့ၣ် မ့ၢ်ဟဲက့ၤကဒါက့ၤလၢ နအိၣ်လၢ အသးဒီဖျၢၣ်ညါ+ ဒီးလၢအဂံၢ်အဘါခဲလၢာ်+ ဒီးအဝဲသ့ၣ် မ့ၢ်ဃၣ်ဃီၤအသးဆူ ထံကီၢ်လၢ နဟ့ၣ်လီၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အအိၣ် ဒီးလၢဝ့ၢ်လၢ နဃုထၢထီၣ်အီၤ တဖျၢၣ်အအိၣ်+ ဒီးလၢဟံၣ်လၢ ယတ့ထီၣ်လၢ နမံၤအဂီၢ် အအိၣ် ဒီးမ့ၢ်ဃ့ထုကဖၣ်လၢ နအိၣ်န့ၣ် ၃၉ မ်နဒိကနၣ် အဝဲသ့ၣ် အတၢ်ထုကဖၣ် ဒီးအတၢ်ဃ့ကညးလၢ တၢ်သးကညီၤအဂီၢ် လၢနတၢ်အိၣ်တၢ်ဆိးအလီၢ် လၢမူခိၣ် ဒီးစံၣ်ညီၣ်န့ၢ်တၢ်လၢ အဝဲသ့ၣ်အဂီၢ်+ ဒီးမ်နပျၢ်ကွံာ် နပှၤဂီၢ်မုၢ်လၢ အမၤကမၣ်နၤ အတၢ်ကမၣ်တက့ၢ်.
၄၀ “အိ ယကစၢ်ယွၤဧၢ, ဝံသးစူၤ မ်နကွၢ်လီၤ ဒီးဒိကနၣ် တၢ်ထုကဖၣ်လၢ ပှၤဃ့ထီၣ်အီၤ လၢနအိၣ်ဖဲ* တၢ်လီၢ်တတီၤအံၤတက့ၢ်.+ ၄၁ အိ ယဟိဝၤယွၤဧၢ, လဲၤထီၣ်ဃုာ်ဒီး နတၢ်စိတၢ်ကမီၤ အတလါစီဆှံလၢ နတၢ်အိၣ်ဘှံးအလီၢ်+ ခဲအံၤတက့ၢ်. အိ ယဟိဝၤယွၤဧၢ, မ်နပှၤလုၢ်တၢ်ဒိၣ်တဖၣ် ပာ်ဖျါထီၣ်လၢ တၢ်အုၣ်က့ၤခီၣ်က့ၤ ဟဲလၢ နအိၣ်တက့ၢ်.* ဒီးပှၤလၢအသးတီဒီးနၤန့ၣ် မ်အဝဲသ့ၣ်သးခုလၢ နတၢ်ဂ့ၤတၢ်ဝါအဃိတက့ၢ်.+ ၄၂ အိ ယဟိဝၤယွၤဧၢ, ပာ်တ့ၢ်ကွံာ် နပှၤဒိးဖှူသးတဂၤတဂ့ၤ.+ မ်နသ့ၣ်နီၣ်ထီၣ်က့ၤ နတၢ်အဲၣ်လၢအတီလၢ နပာ်ဖျါထီၣ်လၢ စီၤဒၤဝံးအဖီခိၣ်တက့ၢ်.”+