၂ ၡမူၤအ့လး
၂၀ ဒီးပှၤလၢ အဟးဒုးအိၣ်ထီၣ် တၢ်ကီတၢ်ခဲ လၢအမံၤမ့ၢ် စီၤၡဘၤန့ၣ်+ အိၣ်ဝဲတဂၤလီၤ. အဝဲမ့ၢ် ပှၤဘံၣ်ယၤမံၣ်ဖိ စီၤဘံးကြံၤ အဖိခွါလီၤ. ဒီးအဝဲအူထီၣ်ကွဲၤ+ ဒီးတဲဝဲလၢ “ပတဘၣ်ဃးဒီး စီၤဒၤဝံး နီတစဲးဘၣ်. ဒီးတမ့ၢ်လၢ ပကန့ၢ်သါဘၣ်တၢ် ဃုာ်ဒီးစီၤယံးၡဲ အဖိခွါတဂၤအံၤ နီတမံၤဘၣ်.+ ပှၤအံၣ်စရ့လးဖိသ့ၣ်ဧၢ, လဲၤသုဝဲကိးဂၤဒဲးလၢ သုယွၤတဖၣ်အအိၣ်တက့ၢ်.”+ ၂ ဖဲန့ၣ်ဒီး ပှၤအံၣ်စရ့လးဖိခဲလၢာ် ပိာ်ထီၣ် စီၤဘံးကြံၤ အဖိခွါ+ စီၤၡဘၤအခံ ဒီးတပိာ်ဝဲ စီၤဒၤဝံးအခံလၢၤဘၣ်. မ့မ့ၢ် ပှၤပိာ်ခွါလၢ ယူဒၤအဒူၣ်ကျါန့ၣ် ဆဲးပိာ်ဝဲ အဝဲသ့ၣ်အစီၤပၤအခံ စးထီၣ်လၢ ထံကျိယၢ်ဒ့ၣ်တုၤလၢ ဝ့ၢ်ယရူၤၡလ့ၣ်လီၤ.+
၃ ဖဲစီၤဒၤဝံး က့ၤတုၤလၢ အဟံၣ်လၢ ဝ့ၢ်ယရူၤၡလ့ၣ်+ အပူၤအခါ အသံၣ်မါ* အဂၤတဆံလၢ အပာ်တ့ၢ်ဝဲလၢညါ ဒ်သိးကကွၢ်ထွဲဟံၣ်အဂီၢ်န့ၣ်+ အဝဲကိးဃီၤဝဲ ဒီးပာ်က့ၤ အဝဲသ့ၣ်လၢ ဟံၣ်တဖျၢၣ်လၢ အဘၣ်တၢ်ပၢၤဃာ်အီၤန့ၣ်လီၤ. အဝဲဟ့ၣ်လီၤ အဝဲသ့ၣ်တၢ်အီၣ် ဘၣ်ဆၣ် တမံဃုာ်ဒီးအဝဲသ့ၣ်ဘၣ်.+ အဃိ အဝဲသ့ၣ် အဝၤမူဒံးဝဲ ဘၣ်ဆၣ် အဝဲသ့ၣ် ဘၣ်အိၣ်ဝဲဒ် မုၣ်ကမဲတဖၣ်အသိး ဒီးပှၤပၢၤဃာ် အဝဲသ့ၣ် တုၤလၢအဝဲသ့ၣ် သံတစုလီၤ.
၄ စီၤပၤတဲဘၣ် စီၤဧမါစၤလၢ+ “ယကဟ့ၣ်နၤ တၢ်ဆၢကတီၢ် သၢသီလၢ နကကိးဖှိၣ်န့ၢ်ယၤ ပှၤပိာ်ခွါခဲလၢာ်လၢ ယူဒၤအဒူၣ်ကျါ ဆူယအိၣ် ဒီးနၤစ့ၢ်ကီး နကဘၣ်အိၣ်ဖဲအံၤလီၤ.” ၅ အဃိ စီၤဧမါစၤ လဲၤဝဲဒ်သိးကကိးဖှိၣ် ပှၤပိာ်ခွါလၢ ယူဒၤအဒူၣ်ကျါလီၤ. ဘၣ်ဆၣ် အဝဲတဟဲက့ၤတုၤဖဲ တၢ်ဆၢကတီၢ်လၢ အဘၣ်တၢ်ပာ်ပနီၣ်န့ၢ်အီၤအခါဘၣ်. ၆ ဒီးစီၤဒၤဝံးတဲဘၣ် စီၤအဘံၡဲၤလၢ+ “ဘၣ်သ့ၣ်သ့ၣ် စီၤဘံးကြံၤ အဖိခွါ စီၤၡဘၤ+ ကမၤအၢပှၤ နးန့ၢ်ဒံး စီၤအးဘၡါလိၣ်+ မၤပှၤဒံးလီၤ. ဒ်သိး စီၤၡဘၤ သုတဃ့ၢ်ပူၤဖျဲးအသး ဒီးလဲၤအိၣ်လၢ ဝ့ၢ်တဖၣ်လၢ အအိၣ်ဒီး အဒူၣ်လၢ အကျၢၤတဂ့ၤအဂီၢ် ကိးထီၣ် ယခ့ယပှၤတဖၣ်* ဒီးလဲၤလူၤအီၤတက့ၢ်.” ၇ ဒီးစီၤယိၤအာ်+ အပှၤတဖၣ်, ပှၤကရံသးဖိ, ပှၤပလ့သးဖိ+ ဒီးပိာ်ခွါလၢ အဂံၢ်ဆူၣ်ဘါဆူၣ်ကိးဂၤဒဲး လဲၤပိာ်ဝဲ အခံလီၤ.* အဝဲသ့ၣ် ဟးထီၣ်လၢ ယရူၤၡလ့ၣ် ဒ်သိးကလဲၤလူၤဝဲ စီၤဘံးကြံၤ အဖိခွါ စီၤၡဘၤလီၤ. ၈ ဖဲအဝဲသ့ၣ် လဲၤဘူးထီၣ်ဒီး လၢၢ်ဖးဒိၣ်လၢ ဝ့ၢ်ကံးဘိၣ်အခါ+ စီၤဧမါစၤ+ ဟဲထံၣ်လိာ်သးဒီး အဝဲသ့ၣ်လီၤ. ဒီးစီၤယိၤအာ် သိးဝဲဒီး သုးဖိအကူအကၤ ဒီးအဝဲစၢဃာ်နးလၢ အအိၣ်လၢအတြိးပူၤ လၢအယီၢ်ဒ့လိၤလီၤ. ဖဲအသုးဘူးထီၣ်အသးအခါ အနးလီၤတဲာ်ဝဲလီၤ.
၉ စီၤယိၤအာ် တဲဘၣ်စီၤဧမါစၤလၢ “ဒီပုၢ်ဝဲၢ်ဧၢ, နတဘၣ်နီတမံၤဘၣ် မ့ၢ်ဧါ.” ဒီးစီၤယိၤအာ် ဖီၣ်ဝဲစီၤဧမါစၤ အခၣ်ဆူၣ်လၢအစုထွဲ ဒ်သိးကနၢမူ စီၤဧမါစၤအဂီၢ်လီၤ. ၁၀ ဒီးနးတဘ့ၣ်န့ၣ် အိၣ်ဝဲလၢ စီၤယိၤအာ်အစုပူၤ ဘၣ်ဆၣ် စီၤဧမါစၤ တပလီၢ်ဘၣ်အသးဘၣ်. ဒီးစီၤယိၤအာ် ဆဲးအီၤလၢ အဟၢဖၢ+ ဒီးအပှံာ်လီၤလာ်လၢ ဟီၣ်ခိၣ်လိၤလီၤ. ဒ်သိးကမၤသံအီၤအဂီၢ် အဝဲဘၣ်ဆဲးအီၤ ထဲတဘျီ ဒီးတလိၣ် ဆဲးကဒီးအီၤလၢၤဘၣ်. ဝံၤဒီး စီၤယိၤအာ် ဒီးအဒီပုၢ်ဝဲၢ်ခွါ စီၤအဘံၡဲၤ လဲၤလူၤ စီၤဘံးကြံၤ အဖိခွါ စီၤၡဘၤန့ၣ်လီၤ.
၁၁ စီၤယိၤအာ် အပှၤတဂၤ ဆၢထၢၣ်လၢ စီၤဧမါစၤ အကပၤ ဒီးတဲဝဲလၢ “ပှၤတဂၤဂ့ၤ တဂၤဂ့ၤလၢ အအိၣ်ဃူ စီၤယိၤအာ် ဒီးစီၤဒၤဝံးန့ၣ် ပိာ်ထီၣ် စီၤယိၤအာ်အခံသၢၤ.” ၁၂ ဒီးစီၤဧမါစၤ လံာ်လူာ်အသးလၢ အသွံၣ်ကျါ လၢကျဲခၢၣ်သးလီၤ. ဒီးပိာ်ခွါတဂၤန့ၣ် ထံၣ်ဘၣ်ဝဲလၢ ပှၤလၢအလဲၤတုၤလၢ စီၤဧမါစၤအအိၣ်ခဲလၢာ် အိၣ်ပတုာ်ဝဲဖဲန့ၣ်လီၤ. အဃိ အဝဲသုးကွံာ် စီၤဧမါစၤ ဆူပျီပူၤ ဝံၤဒီး အဝဲလုးဘၢအီၤလၢ တၢ်ကူတၢ်ကၤတဘ့ၣ်လီၤ. ၁၃ ဖဲအဝဲသုးကွံာ် စီၤဧမါစၤ ဝံၤအခါ ပှၤပိာ်ခွါ ခဲလၢာ် ပိာ်ထီၣ်စီၤယိၤအာ်အခံ ဒ်သိးကလူၤဝဲ စီၤဘံးကြံၤ အဖိခွါ စီၤၡဘၤလီၤ.+
၁၄ စီၤၡဘၤလဲၤဝဲလၢ အံၣ်စရ့လးအဒူၣ်ခဲလၢာ်အအိၣ် ပၢၢ်တုၤလၢ ဝ့ၢ်အၤဘ့ၤလးလၢ ဘ့ၤသမၤကၤ အပူၤလီၤ.+ ပှၤဘံးကြံၤဖိတဖၣ် ပာ်ဖှိၣ်ထီၣ်အသး ဒီးပိာ်ထီၣ်စ့ၢ်ကီးဝဲ စီၤၡဘၤအခံလီၤ.
၁၅ စီၤယိၤအာ် ဒီးအပှၤတဖၣ် လဲၤကဝီၤဃာ် စီၤၡဘၤလၢ ဝ့ၢ်အၤဘ့ၤလးလၢ ဘ့ၤသမၤကၤ အပူၤ ဒီးပာ်ပူၣ်ထီၣ် ဟီၣ်ခိၣ် ဒ်သိးကဒုးဝ့ၢ်အဂီၢ်လီၤ. ဒီးပှၤခဲလၢာ် လၢအအိၣ်ဒီး စီၤယိၤအာ်န့ၣ် ခူၣ်လီၤတၢ်လၢ ဝ့ၢ်ဒူၣ်အဖီလာ် ဒ်သိးအကမၤ လီၤပှီၢ်ဝဲအဂီၢ်လီၤ. ၁၆ ဒီးပိာ်မုၣ်လၢ အကူၣ်တၢ်သ့တဂၤ အိၣ်လၢ ဝ့ၢ်ပူၤဒီး အကိးပသူထီၣ်ဝဲလၢ “ကနၣ်လၢအံၤ, ပိာ်ခွါသ့ၣ်ဧၢ, ကနၣ်လၢအံၤ. ဝံသးစူၤ မၢစီၤယိၤအာ် ဟဲဖဲအံၤ ဒ်သိးယကတဲတၢ် ဒီးအီၤအဂီၢ်မီၤ.” ၁၇ ဒီးစီၤယိၤအာ် လဲၤဘူးထီၣ်လၢ အအိၣ် ဒီးပိာ်မုၣ်တဂၤန့ၣ် သံကွၢ်အီၤလၢ “နကဲစီၤယိၤအာ်ဧါ.” စီၤယိၤအာ် တဲဆၢက့ၤဝဲလၢ “မ့ၢ်, ယကဲစီၤယိၤအာ်လီၤ.” ဒီးပိာ်မုၣ်တဂၤန့ၣ် တဲအီၤလၢ “ဝံသးစူၤ ကနၣ်တၢ်လၢ ယကတဲနၤတက့ၢ်.” ဒီးအဝဲတဲဝဲ “မ့ၢ်, ယဒိကနၣ်လံ.” ၁၈ ပိာ်မုၣ်န့ၣ် တဲဝဲလၢ “လၢညါန့ၣ် ပှၤတဲထီဘိလၢ ‘ပှၤမ့ၢ်အဲၣ်ဒိးလၢ အတၢ်ကီတၢ်ခဲ ကဘၣ်ဂီၢ်က့ၤန့ၣ် မ်အဝဲသ့ၣ် ဃ့တၢ်ဟ့ၣ်ကူၣ်လၢ ဝ့ၢ်အၤဘ့ၤလး အပူၤတက့ၢ်.’ ၁၉ ယမ့ၢ်ပှၤလၢ အခၢၣ်စး ပှၤလၢအအဲၣ်တၢ်ဃူတၢ်ဖိး ဒီးပှၤလၢ အသးတီတဖၣ်လၢ ကီၢ်အံၣ်စရ့လး အပူၤလီၤ. နအဲၣ်ဒိး မၤဟးဂီၤဝ့ၢ်တဖျၢၣ် လၢအလီၤဂာ်ဒ် မိၢ်တဂၤလၢ ကီၢ်အံၣ်စရ့လးအပူၤလီၤ. နကမၤဟးဂီၤ ယဟိဝၤယွၤ အတၢ်န့ၢ်သါန့ၣ် မ့ၢ်အကြၢးဧါ.”+ ၂၀ စီၤယိၤအာ် တဲဆၢက့ၤဝဲလၢ “လ့ၤတက့ၤ ယတမၤဟးဂီၤဝ့ၢ်ဘၣ်. ၂၁ တမ့ၢ်ဒ်န့ၣ် နီတစဲးဘၣ်. လၢတၢ်န့ၣ်အလီၢ် စီၤဘံးကြံၤ အဖိခွါ စီၤၡဘၤ+ လၢအဟဲလၢ အ့ဖရဲၣ် အကစၢၢ်ကလိကျါန့ၣ်+ ထီဒါက့ၤ စီၤပၤဒၤဝံးလီၤ. နမ့ၢ်ဟ့ၣ်လီၤကွံာ် ပှၤတဂၤန့ၣ်န့ၣ် ယကဟးထီၣ်ကွံာ်လၢ ဝ့ၢ်လီၤ. ဒီးပိာ်မုၣ်န့ၣ် တဲစီၤယိၤအာ်လၢ “ကွၢ်သၢၤ, ပှၤကကွံာ်စိဃီၤ အခိၣ်သၣ်ဃံလၢ ဝ့ၢ်ခိၣ်ဒူ အဖီခိၣ် ဆူနအိၣ်လီၤ.”
၂၂ တဘျီဃီန့ၣ် ပိာ်မုၣ်လၢ အကူၣ်တၢ်သ့တဂၤန့ၣ် လဲၤလၢပှၤခဲလၢာ်အအိၣ် ဒီးအဝဲသ့ၣ် ဒီၣ်တဲာ်ကွံာ် စီၤဘံးကြံၤ အဖိခွါ စီၤၡဘၤ အခိၣ်သၣ်ဃံ ဒီးကွံာ်စိဝဲလၢ စီၤယိၤအာ် အအိၣ်လီၤ. ဒီးစီၤယိၤအာ် အူထီၣ်ကွဲၤ ဒီးဟးထီၣ်ကွံာ်ဝဲလၢဝ့ၢ် ဒီးအဝဲသ့ၣ်က့ၤကဒါက့ၤဝဲလၢ အနီၢ်ကစၢ် အဟံၣ်လီၤ.+ ဒီးစီၤယိၤအာ် က့ၤဝဲလၢ ဝ့ၢ်ယရူၤၡလ့ၣ် လၢစီၤပၤအအိၣ်လီၤ.
၂၃ ဒီးစီၤယိၤအာ် ကဲဝဲ အံၣ်စရ့လး အသုးမုၢ်ခဲလၢာ်အခိၣ်လီၤ.+ မ့မ့ၢ်စီၤယဟိၤယဒါ+ အဖိခွါ စီၤဘနါယၤန့ၣ်+ ကဲဝဲပှၤကရံသးဖိ ဒီးပှၤပလ့သးဖိတဖၣ် အခိၣ်လီၤ.+ ၂၄ ဒီးစီၤအဒိၤရၣ်န့ၣ်+ အိၣ်ဝဲလၢ ပှၤလၢအဘၣ်တၢ်မၢဆူၣ်အီၤလၢ ကမၤတၢ်မၤတဖၣ် အဖီခိၣ်, မ့မ့ၢ် စီၤအဃံလူး အဖိခွါ စီၤယဟိၤၡၤဖးန့ၣ်+ မ့ၢ်ပှၤကွဲးနီၣ်တၢ်ဖိလီၤ. ၂၅ စီၤၡဝၤမ့ၢ်ဝဲ နဲၣ်ရွဲၣ် ဒီးစီၤစၤဒိး+ ဒီးစီၤအ့ဘယၤသၢ်+ မ့ၢ်ဝဲ ပှၤလုၢ်တၢ်ဒိၣ်တဖၣ်လီၤ. ၂၆ ဒီးပှၤယၤအံၢ်ဖိ စီၤဧံရၤ ကဲထီၣ်စ့ၢ်ကီးဝဲ စီၤဒၤဝံး အပဒိၣ်ဖးဒိၣ်* တဂၤလီၤ.