မၤတၢ်
၂၃ စီၤပီလူးကွၢ် ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် ထံထံ ဒီးတဲဝဲလၢ “ဒီပုၢ်ဝဲၢ်ခွါသ့ၣ်ဧၢ, လၢကစၢ်ယွၤ အမဲာ်ညါန့ၣ် တုၤလၢ မုၢ်မဆါတနံၤအံၤန့ၣ် ယသးလၢ အသ့ၣ်ညါဒၣ်တၢ် တပာ်တၢ်ကမၣ်လၢ ယလိၤနီတစဲးဘၣ်.”+ ၂ အဃိ ပှၤလုၢ်တၢ်ခိၣ် အဒိၣ်ကတၢၢ် စီၤအနၤနံ ဟ့ၣ်လီၤတၢ်ကလုၢ် ဒ်သိး ပှၤလၢအဆၢထၢၣ်ဘူးဒီး စီၤပီလူးန့ၣ် ကဒဲစီၤပီလူး အထးခိၣ်လီၤ. ၃ ဒီးစီၤပီလူး တဲအီၤလၢ “ပှၤပာ်မၤအသးဧၢ,* ကစၢ်ယွၤ ကတီၢ်နၤလီၤ. နဆ့ၣ်နီၤ စံၣ်ညီၣ်ယၤဒ် စီၤမိၤၡ့ အတၢ်သိၣ်တၢ်သီအသိး ဒီးတကတီၢ်ဃီန့ၣ် နကမၤကမၣ် စီၤမိၤၡ့ အတၢ်သိၣ်တၢ်သီ ခီဖျိ နမၢ ပှၤတီၢ်ယၤန့ၣ်ဧါ.” ၄ ဒီးပှၤလၢအဆၢထၢၣ်လၢ အဃၢၤတဖၣ် တဲဝဲလၢ “မ့ၢ်န ကတဲဆါ ယွၤအပှၤလုၢ်တၢ်ခိၣ် အဒိၣ်ကတၢၢ်တဂၤ ဒ်အံၤဧါ.” ၅ စီၤပီလူး တဲဝဲလၢ “ဒီပုၢ်ဝဲၢ်ခွါသ့ၣ်ဧၢ, အဝဲမ့ၢ် ပှၤလုၢ်တၢ်ခိၣ် အဒိၣ်ကတၢၢ်န့ၣ် ယတသ့ၣ်ညါဘၣ်. တၢ်ကွဲးအသး အိၣ်ဝဲလၢ ‘နတဘၣ် ဒုၣ်ဒွဲၣ်စံးအၢ နပှၤဂီၢ်မုၢ် အခိၣ်အနၢ်တဂ့ၤ.’”+
၆ ဒီးစီၤပီလူး သ့ၣ်ညါဝဲလၢ ပှၤတနီၤန့ၣ် မ့ၢ်ဝဲ ပှၤစးဒူၤကဲတဖၣ် ဒီးအဂၤတနီၤမ့ၢ်ဝဲ ပှၤဖၤရံၤၡဲတဖၣ်လီၤ. အဃိ လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤန့ၣ် အဝဲကိးပသူထီၣ်ဝဲလၢ “ဒီပုၢ်ဝဲၢ်ခွါသ့ၣ်ဧၢ, ယမ့ၢ်ပှၤဖၤရံၤၡဲ+ ဒီးပှၤဖၤရံၤၡဲတဖၣ် အဖိခွါတဂၤလီၤ. ယဘၣ်တၢ်စံၣ်ညီၣ်ဒ်အံၤ မ့ၢ်လၢ ယနာ်လၢ ပှၤသံကဂဲၤဆၢထၢၣ် သမူထီၣ်က့ၤအဃိလီၤ.” ၇ ခီဖျိလၢ အတဲဝဲဒ်န့ၣ်အဃိ တၢ်အ့ၣ်လိာ်ဆိးက့ အိၣ်ထီၣ်ဝဲလၢ ပှၤဖၤရံၤၡဲ ဒီးပှၤစးဒူၤကဲတဖၣ် အဘၢၣ်စၢၤလီၤ. ဒီးအဝဲသ့ၣ် အသးတလီၤပလိာ် လိာ်အသးဘၣ်. ၈ ပှၤစးဒူၤကဲတဖၣ် တဲဝဲလၢ တၢ်ဂဲၤဆၢထၢၣ် သမူထီၣ်က့ၤမ့ၢ်ဂ့ၤ, မူခိၣ်ကလူးမ့ၢ်ဂ့ၤ, နီၢ်သးတၢ်ဘၣ်တ့တဖၣ်မ့ၢ်ဂ့ၤ တအိၣ်ဘၣ် ဒီးမ့မ့ၢ် ပှၤဖၤရံၤၡဲန့ၣ် နာ်လၢတၢ်သ့ၣ်တဖၣ်န့ၣ် အိၣ်ဝဲခဲလၢာ်လီၤ.+ ၉ အဃိ အဝဲသ့ၣ် ကိးဃါလိာ်သးလၢ အကလုၢ်ဖးဒိၣ် ဒီးပှၤဖၤရံၤၡဲ အပှၤကွဲးလံာ်ဖိတနီၤ ဂဲၤဆၢထၢၣ် တဲအါတၢ်ဆူၣ်ဆူၣ်လၢ “ပှၤတဂၤအံၤ အတၢ်ကမၣ် တအိၣ်နီတစဲးဘၣ်, ကမ့ၢ်မူခိၣ်ကလူး မ့တမ့ၢ် ပှၤနီၢ်သးဖိတဂၤဂၤ တဲတၢ်ဒီးအီၤဧါသၢၤ.”+ ၁၀ ဖဲတၢ်အ့ၣ်လိာ်ဆိးက့လိာ် နးထီၣ်ဝဲအခါ ပှၤသုးဖိ တကထိအခိၣ် ဘၣ်ယိၣ်ဝဲလၢ အဝဲသ့ၣ် ကထုးဆ့ဆိ စီၤပီလူးဆူၣ်ဆူၣ် ဒီးအကသံဘၣ်ဖုးလီၤ. အဃိ အဝဲဟ့ၣ်လီၤ တၢ်ကလုၢ်လၢ ပှၤသုးဖိတဖၣ် ကလဲၤလီၤ ထုးထီၣ်စီၤပီလူးလၢ ပှၤသ့ၣ်တဖၣ်န့ၣ်အကျါ ဒီးဟဲက့ၤကိးအီၤလၢ ပှၤသုးဖိ အိၣ်တၢ်အလီၢ်လီၤ.
၁၁ ဘၣ်ဆၣ် လၢခံတနၤန့ၣ် ကစၢ်ဆၢထၢၣ်လၢ စီၤပီလူးအကပၤ ဒီးတဲဝဲလၢ “ပာ်ဆူၣ်ထီၣ် နသးတက့ၢ်.+ ဒ်နအုၣ်နသး ဘၣ်ဃးဒီး ယဂ့ၢ်လီၤတံၢ်လီၤဆဲးလၢ ဝ့ၢ်ယရူၤၡလ့ၣ်အပူၤအသိး နကဘၣ်အုၣ်နသး လၢဝ့ၢ်ရိမ့ၤအပူၤ ဒ်န့ၣ်စ့ၢ်ကီးလီၤ.”+
၁၂ ဖဲမုၢ်ဝါထီၣ်အခါ ပှၤယူဒၤဖိတဖၣ် ကူၣ်ထီၣ် တၢ်တမံၤလီၤ. အဝဲသ့ၣ် ဆိၣ်လီၤအသး* လၢတချုးလၢ အဝဲသ့ၣ်မၤသံ စီၤပီလူးဒံးဘၣ်န့ၣ် အဝဲသ့ၣ် တအီၣ်တၢ်အီတၢ်ဘၣ်. ၁၃ ပိာ်ခွါလၢ အကူၣ်ထီၣ် သကိးတၢ် ဒီးဆိၣ်လီၤအသးဒ်အံၤန့ၣ် အိၣ်ဝဲအဂၤ ၄၀ ဘျဲၣ်လီၤ. ၁၄ ပှၤတဖၣ်န့ၣ်လဲၤလၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤသူၣ်က့သးပှၢ်တဖၣ် အအိၣ် ဒီးတဲဝဲလၢ “ပဆိၣ်လီၤပသးလၢ တချုးလၢ ပမၤသံဘၣ် စီၤပီလူးဒံးဘၣ်န့ၣ် ပတအီၣ်တၢ်အီတၢ် နီတမံၤဘၣ်. ၁၅ အဃိ သုဒီးပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် ကြၢးဒုးသ့ၣ်ညါ ပှၤသုးဖိ တကထိအခိၣ်တဂၤလၢ အဝဲကြၢးဟဲကိးလီၤ စီၤပီလူး လၢသုအိၣ်ခီဖျိ သုအဲၣ်ဒိး သံကွၢ်သံဒိး အါထီၣ်အီၤ အဃိလီၤ. ဘၣ်ဆၣ် တချုးလၢ အဝဲဟဲ ဘူးထီၣ်ဒံးဘၣ်အခါ ပကအိၣ်ကတဲာ်ကတီၤပာ်စၢၤပသး လၢပကမၤသံအီၤလီၤ.”
၁၆ ဘၣ်ဆၣ် စီၤပီလူး အဖိဒိၣ်ခွါ နၢ်ဟူအဝဲသ့ၣ် အတၢ်ကူၣ်အၢလၢ အကူၣ်ထီၣ်ဝဲန့ၣ်အဃိ အဝဲလဲၤနုာ်လီၤလၢ သုးဖိတဖၣ် အိၣ်တၢ်အလီၢ် ဒီးတဲဘၣ် စီၤပီလူး တၢ်ဂ့ၢ်တခါအံၤလီၤ. ၁၇ စီၤပီလူး ကိးဃီၤဝဲ သုးခိၣ်တဂၤ ဒီးတဲဝဲလၢ “လဲၤကိး ဖိသၣ်ပိာ်ခွါအံၤလၢ ပှၤသုးဖိ တကထိအခိၣ် အအိၣ်တက့ၢ်. အဝဲကဘၣ်တဲအီၤ တၢ်ဂ့ၢ်အိၣ်တမံၤလီၤ.” ၁၈ အဃိ အဝဲလဲၤကိးဝဲ ဒီးလဲၤဆှၢအီၤလၢ ပှၤသုးဖိတကထိအခိၣ် တဂၤအအိၣ် ဒီးတဲဝဲလၢ “ပှၤဃိာ်ဖိ စီၤပီလူး ကိးယၤဒီး မၢယဟဲဆှၢ ဖိသၣ်ပိာ်ခွါတဂၤအံၤ လၢနအိၣ်, မ့ၢ်လၢ အဝဲကဘၣ်တဲနၤ တၢ်ဂ့ၢ်အိၣ်တမံၤ အဃိလီၤ.” ၁၉ ပှၤသုးဖိ တကထိအခိၣ်န့ၣ် ဟံးန့ၢ်အစုဒီး လဲၤကိးအီၤလၢ တၢ်တဒၢအလီၢ် ဒီးသံကွၢ်အီၤလၢ “နကတဲယၤ တၢ်ဂ့ၢ်မနုၤလဲၣ်.” ၂၀ အဝဲတဲဝဲလၢ “ပှၤယူဒၤဖိတဖၣ် ကဃ့နၤဒ်သိး ခဲမုၢ်ဆ့ၣ်န့ၣ် နကလဲၤကိးလီၤ စီၤပီလူး လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤ ဒီးအဝဲသ့ၣ် ကပာ်မၤအသးလၢ အအဲၣ်ဒိးသ့ၣ်ညါအါထီၣ် တၢ်ဂ့ၢ်ဘၣ်ဃးဒီး စီၤပီလူးလီၤ.+ ၂၁ ဘၣ်ဆၣ် တဘၣ်နာ် အဝဲသ့ၣ်တဂ့ၤ. ပှၤအဂၤ ၄၀ ဘျဲၣ်န့ၣ် အိၣ်ခိးခူသူၣ်အီၤလီၤ. ဒီးအဝဲသ့ၣ် ဆိၣ်လီၤအသးလၢ တချုးလၢ အမၤသံဘၣ် စီၤပီလူးဒံးဘၣ်န့ၣ် အဝဲသ့ၣ် တအီၣ်တၢ်အီတၢ်ဘၣ်.+ ဒီးခဲအံၤ အဝဲသ့ၣ် အိၣ်ကတဲာ်ကတီၤအသးလံ ဒီးအိၣ်ခိးဝဲလၢ နကဟ့ၣ်လီၤ တၢ်ကလုၢ်လီၤ.” ၂၂ ဒီးသုးဖိ တကထိအခိၣ်န့ၣ် မၤလိာ် ဖိသၣ်ပိာ်ခွါအံၤလၢ “နဒုးသ့ၣ်ညါယၤ တၢ်ဂ့ၢ်တခါအံၤန့ၣ် တဘၣ်တဲဘၣ် ပှၤနီတဂၤတဂ့ၤ” ဝံၤဒီး အပျဲက့ၤအီၤလီၤ.
၂၃ ဒီးအဝဲကိးန့ၢ် သုးခိၣ်ခံဂၤ ဒီးတဲဝဲလၢ “မၢပှၤသုးဖိအဂၤ ၂၀၀ ဃုာ်ဒီး ပှၤဒိးကသ့ၣ်သုး အဂၤ ၇၀ ဒီးသုးဖိစိာ်ဘီ အဂၤ ၂၀၀ အိၣ်ကတဲာ်ကတီၤအသး ဒ်သိး ကလဲၤလၢ ဝ့ၢ်ကဲၤစါရံၤ ဖဲဟါလီၤခီ ၉ နၣ်ရံၣ်* တက့ၢ်. ၂၄ ဒီးကတဲာ်ကတီၤန့ၢ် ကသ့ၣ်လၢ စီၤပီလူး ကဒိးဝဲအဂီၢ် ဒီးလဲၤကိးအီၤလၢ ပဒိၣ်ဖးဒိၣ် စီၤဖ့လံးအအိၣ် ပူၤပူၤဖျဲးဖျဲးတက့ၢ်.” ၂၅ ဝံၤဒီး အဝဲကွဲးလီၤဝဲ လံာ်ပရၢဒ်အံၤလီၤ.
၂၆ “ဆူ တၢ်ဒိၣ် ပဒိၣ်ဖးဒိၣ် စီၤဖ့လံးအအိၣ်, ယၤ, စီၤကျီၤဒံလူၤစံ ဆၢဂ့ၤဆၢဝါနၤလီၤ. ၂၇ ပှၤတဂၤအံၤန့ၣ် ပှၤယူဒၤဖိတဖၣ် ဖီၣ်န့ၢ်အီၤဒီး ဘူးကမၤသံအီၤလီၤ. ဘၣ်ဆၣ် ယသ့ၣ်ညါထီၣ်လၢ အဝဲမ့ၢ် ပှၤရိမ့ၤဖိ တဂၤအဃိ+ ယၤဒီးယပှၤသုးဖိတဖၣ်န့ၣ် ပလဲၤတဘျီဃီဒီး မၤပူၤဖျဲးအီၤလီၤ.+ ၂၈ ဒီးယအဲၣ်ဒိး သ့ၣ်ညါလၢ ဘၣ်မနုၤအဃိ ပှၤပာ်ဒ့ၣ်ပာ်ကမၣ်အီၤလဲၣ်. အဃိ ယလဲၤကိးအီၤလၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်လီၤ.+ ၂၉ ဒီးယထံၣ်လၢ ပှၤပာ်ဒ့ၣ်ပာ်ကမၣ်အီၤ ဘၣ်ဃးဒီး တၢ်သံကွၢ်တဖၣ်လၢ အဘၣ်ထွဲလိာ်သးဒီး အဝဲသ့ၣ် အတၢ်သိၣ်တၢ်သီလီၤ.+ ဘၣ်ဆၣ် ဘၣ်ဃးဒီး တၢ်ကမၣ်လၢ အကြၢးသံမ့ၢ်ဂ့ၤ ကြၢးဖၢနုာ်အီၤလၢ ဃိာ်ပူၤမ့ၢ်ဂ့ၤ ယတထံၣ် နီတမံၤဘၣ်. ၃၀ ဒီးပှၤဒုးသ့ၣ်ညါယၤ ဘၣ်ဃးဒီး အဝဲသ့ၣ် အတၢ်ကူၣ်အၢလၢ အကမၤသံအီၤအဃိ+ ယဆှၢလီၤအီၤလၢ နအိၣ်တဘျီဃီလီၤ. ဒီးယမၤလိာ် ပှၤလၢ အပာ်ဒ့ၣ်ပာ်ကမၣ်အီၤတဖၣ် လၢကတဲဖျါထီၣ် တၢ်ဂ့ၢ်လၢ နမဲာ်ညါလီၤ.”
၃၁ ဒီးပှၤသုးဖိတဖၣ်အံၤ လဲၤကိး စီၤပီလူး+ ဒ်တၢ်မၤလိာ် အဝဲသ့ၣ်အသိး ဒီးလဲၤဆှၢအီၤလၢ ဝ့ၢ်အၣ်တံၤပၤတြံ လၢမုၢ်နၤခီလီၤ. ၃၂ လၢခံတနံၤန့ၣ် ပှၤဒိးကသ့ၣ်သုးတဖၣ် ဆဲးလဲၤတၢ်ဒီးအီၤလီၤ. မ့မ့ၢ် သုးဖိလၢအဂၤတဖၣ်န့ၣ် က့ၤကဒါက့ၤလၢ သုးဖိအိၣ်တၢ်အလီၢ်လီၤ. ၃၃ ပှၤဒိးကသ့ၣ်သုးတဖၣ် လဲၤနုာ်လီၤလၢ ဝ့ၢ်ကဲၤစါရံၤ ဒီးလဲၤဆှၢဝဲ လံာ်ပရၢလၢ ပဒိၣ်ဖးဒိၣ်အအိၣ် ဒီးဆှၢထီၣ် စီၤပီလူး လၢအအိၣ်လီၤ. ၃၄ အဝဲဖးလံာ်ပရၢ ဒီးသံကွၢ် စီၤပီလူးလၢ အဟဲလၢ ကီၢ်ရ့ၣ် ဖဲလဲၣ်တဘ့ၣ်လဲၣ်. ဒီးစီၤပီလူး တဲအီၤလၢ အဟဲလၢ ကံၤလံၤကံ အကီၢ်ရ့ၣ်လီၤ.+ ၃၅ ဒီးအဝဲတဲဝဲလၢ “ဖဲပှၤလၢ အပာ်ဒ့ၣ်ပာ်ကမၣ်နၤ ဟဲတုၤအခါ+ ယကဒိကနၣ် နတဲဖျါထီၣ် နတၢ်ဂ့ၢ် လီၤတံၢ်လီၤဆဲးလီၤ.” ဒီးအဝဲဟ့ၣ်လီၤ အကလုၢ်လၢ ပှၤကပၢၤဃာ် စီၤပီလူး လၢစီၤဟ့ၤရိာ်အနီ* ပူၤလီၤ.