စံးထီၣ်ပတြၢၤ
စီၤဒၤဝံးအထါ.
၃ စိာ်ထီၣ်နဘီ ဒီးနကွါ ဒ်သိးနကဒုးပှၤလၢ အလူၤယၤတက့ၢ်.+
တဲယၤလၢ နကမ့ၢ် ယတၢ်အုၣ်က့ၤခီၣ်က့ၤတက့ၢ်.+
၄ ပှၤလၢအလူၤမၤသံယၤန့ၣ် မ်အထံၣ်ဘၣ်တၢ်မဲာ်ဆှး ဒီးအသူးသ့ၣ်လၤကပီၤ ဟးဂီၤတက့ၢ်.+
ပှၤလၢ အကူၣ်ထီၣ်တၢ် ဒ်သိးကမၤ ဟးဂီၤယၤန့ၣ် မ်အဂုၤက့ၤလၢ အလီၢ်ခံ လၢတၢ်မဲာ်ဆှး အပူၤတက့ၢ်.
၅ မ်အဝဲသ့ၣ် ကဲထီၣ်ဒ်ဖ့လၢ ကလံၤကျါ
ဒီးမ်ယဟိဝၤယွၤ အမူခိၣ်ကလူး နီဟးထီၣ်ကွံာ် အဝဲသ့ၣ်တက့ၢ်.+
၆ ဖဲယဟိဝၤယွၤ အမူခိၣ်ကလူး လူၤအဝဲသ့ၣ်အခါ
မ်အဝဲသ့ၣ် အကျဲန့ၣ်ခံးဝဲ ဒီးဘျ့ဝဲ တက့ၢ်.
၇ ယတမၤအဝဲသ့ၣ် နီတမံၤဘၣ် သနာ်က့ အဝဲသ့ၣ် ဒိးလီၤခူသူၣ်ထု* ဒ်သိးကဒိးယၤအဂီၢ်
ဒီးအဝဲသ့ၣ် ခူၣ်လီၤ တၢ်ပူၤလၢ ယဂီၢ်လီၤ.
၈ မ်တၢ်ဟးဂီၤ ဟဲဘၣ်အဝဲသ့ၣ် သတူၢ်ကလာ်
မ်ထုလၢ အဝဲသ့ၣ် ဒိးလီၤခူသူၣ်ပာ်စၢၤဝဲန့ၣ် ဘၣ်က့ၤအဝဲသ့ၣ်
ဒီးမ်အဝဲသ့ၣ် ဘၣ်ဘျးဒီးထု ဒီးဟးဂီၤကွံာ်တက့ၢ်.+
၉ မ့မ့ၢ်ယၤန့ၣ် ယကသးခုလၢ ယဟိဝၤယွၤအပူၤ
ဒီးယကသူၣ်ဖှံသးညီလၢ အတၢ်အုၣ်က့ၤခီၣ်က့ၤ အဃိလီၤ.
၁၀ ယကတဲလၢ ယသးဒီဖျၢၣ်ညါလၢ
“ယဟိဝၤယွၤဧၢ, ပှၤလၢအလီၤဂာ်ဒီးနၤ တအိၣ်နီတဂၤဘၣ်.
နမၤပူၤဖျဲး ပှၤဂံၢ်စၢ်ဘါစၢ် လၢပှၤလၢ အဂံၢ်ဆူၣ်ဘါဆူၣ်န့ၢ်အီၤတဖၣ် အစုပူၤ+
ဒီးနမၤပူၤဖျဲး ပှၤဂံၢ်စၢ်ဘါစၢ် ဒီးပှၤဖှီၣ်ဖိယာ်ဖိလၢ ပှၤလၢ အတမျာ်အီၤတဖၣ် အစုပူၤလီၤ.”+
၁၁ ပှၤအုၣ်အသးတဖၣ်လၢ အအဲၣ်ဒိးမၤဘၣ်ဒိယၤန့ၣ် ဟဲထီၣ်လၢ တၢ်မဲာ်ညါ+
ဒီးသံကွၢ်ယၤ တၢ်ဂ့ၢ်လၢ ယတသ့ၣ်ညါ နီတစဲးဘၣ်.
၁၂ အဝဲသ့ၣ် ဟ့ၣ်ဆၢက့ၤယၤ တၢ်အၢလၢ တၢ်ဂ့ၤအဂီၢ်+
အဃိ ယသးဘၣ်ဒိလီၤ.
၁၃ မ့မ့ၢ် ယဲဒၣ်အံၤ, ဖဲအဝဲသ့ၣ် ဆိးက့အခါ ယကူထီၣ်ကၤထီၣ် ထၢၣ်တၢ်ကံးညာ်*
ဒီးယဆီၣ်လီၤယသး ခီဖျိလၢ ယဒုၣ်တၢ်အီၣ်လီၤ.
ဒီးဖဲယတၢ်ထုကဖၣ် တဘၣ်တၢ်စံးဆၢအီၤဘၣ်အခါန့ၣ်
၁၄ ယဟးမိၣ်တၢ် ဒ်ပှၤတဂၤလၢ အသကိး မ့တမ့ၢ် အဒီပုၢ်ဝဲၢ် သံသဒၣ်အီၤအသိး
ဒီးယဆုးလီၤယခိၣ် ဒ်ပှၤတဂၤလၢ အဟီၣ်ဝဲယၢၤဝဲ ခီဖျိလၢ အမိၢ်သံအဃိလီၤ.
၁၅ ဘၣ်ဆၣ် ဖဲယဘၣ်ကီဘၣ်ခဲအခါ အဝဲသ့ၣ် သူၣ်ဖှံသးညီ ဒီးပာ်ဖှိၣ်ထီၣ်အသးလီၤ.
အဝဲသ့ၣ် ပာ်ဖှိၣ်ထီၣ်အသးဒီး အိၣ်ခိးခူသူၣ်တၢ် ဒ်သိးကဒုးယၤ အဂီၢ်လီၤ.
အဝဲသ့ၣ်ဖှီကွံာ်ယၤတက့တခီ ဒီးဆဲးမၤဆါယၤလၢ အတၢ်ကတိၤတဖၣ်လီၤ.
၁၆ ပှၤလၢအတယူးယီၣ်ယွၤန့ၣ် နံၤဆဲးအဲးယၤ အၢအၢသီသီ
ဒီးအဝဲသ့ၣ် သးပှံၢ်ထီၣ်ယၤအဃိ အ့ၣ်တဃံးအမဲလီၤ.+
၁၇ အိ ယဟိဝၤယွၤဧၢ, နကကွၢ်လီၤတၢ်ဒ်အံၤ ယံာ်ဒံးထဲလဲၣ်.+
မၤပူၤဖျဲးယၤလၢ အဝဲသ့ၣ် အတၢ်ထီဒုၣ်ထီဒါ+
ဒီးမၤပူၤဖျဲးယသးသမူလၢ အလုၢ်ဒိၣ်ပှ့ၤဒိၣ်အံၤလၢ ခ့ယုၢ်ဖိတဖၣ် အစုပူၤတက့ၢ်.+
၁၈ ဒီးယကစံးဘျုးနၤလၢ တၢ်အိၣ်ဖှိၣ် ဖးဒိၣ်အပူၤ+
ဒီးယကစံးထီၣ်ပတြၢၤနၤလၢ ပှၤဂီၢ်မုၢ်အကျါလီၤ.
၁၉ ပှၤလၢအကဲယဒုၣ်ယဒါလၢ တမ့ၢ်တၢ်ဂ့ၢ်နီတမံၤဘၣ်အဃိန့ၣ် တဘၣ်ပျဲအဝဲသ့ၣ် သးခုလၢ ယဘၣ်ကီဘၣ်ခဲ အဃိတဂ့ၤ.
ယဒုၣ်ယဒါတဖၣ်လၢ အသးဟ့ယၤ ခီလီလီန့ၣ် တဘၣ်ပျဲအဝဲသ့ၣ် ဒုၣ်ဒွဲၣ်စံးအၢယၤ+ ဒီးကွၢ်တကျ့ယၤတဂ့ၤ.+
၂၀ အဝဲသ့ၣ် တတဲတၢ်လၢ ကဒုးအိၣ်ထီၣ် တၢ်ဃူတၢ်ဖိးဘၣ်.
ဒီးအဝဲသ့ၣ် ကူၣ်အၢဝဲ ပှၤလၢအအဲၣ်တၢ်ဃူတၢ်ဖိးလၢ အအိၣ်လၢ ကီၢ်ပူၤလီၤ.+
၂၁ အဝဲသ့ၣ် အိးထီၣ်အကိာ်ပူၤဖးလဲၢ် ဒ်သိးကပာ်ဒ့ၣ်ပာ်ကမၣ်ယၤ
ဒီးတဲဝဲလၢ “ဘၣ်ပိးလဲၣ်,* ပအဲၣ်ဒိးထံၣ်ဒ်န့ၣ်လီၤ.”
၂၂ အိ ယဟိဝၤယွၤဧၢ, နထံၣ်လီၤ တၢ်ကဲထီၣ်အသးအံၤလံ. တဘၣ်အိၣ်ဘှ့ၣ်တဂ့ၤ.+
အိ ယဟိဝၤယွၤဧၢ, တဘၣ်အိၣ်ယံၤဒီးယၤတဂ့ၤ.+
၂၃ ပၢၢ်ထီၣ် ဒီးဂဲၤဆၢထၢၣ် ဒီသဒၢယၤတက့ၢ်.
အိ ယကစၢ် ယဟိဝၤယွၤဧၢ, အိၣ်ဃူဒီး ဒီသဒၢယၤလၢ ယတၢ်ဂ့ၢ်လိာ်ဘှီလိာ်အံၤတက့ၢ်.
၂၄ အိ ယကစၢ် ယဟိဝၤယွၤဧၢ, စံၣ်ညီၣ်န့ၢ်တၢ်လၢယဂီၢ် ဒ်နတၢ်တီတၢ်လိၤ အိၣ်ဝဲအသိးတက့ၢ်.+
တဘၣ်ပျဲလၢ အဝဲသ့ၣ် သးခုလၢ ယဘၣ်ကီဘၣ်ခဲ အဃိတဂ့ၤ.
၂၅ မ်အဝဲသ့ၣ် သုတတဲလီၤ အနီၢ်ကစၢ်အသးလၢ “ဘၣ်ပိးလဲၣ် တၢ်ကဲထီၣ်အသးဒ် ပအဲၣ်ဒိးအသိးလံ.”
ဒီးမ်အဝဲသ့ၣ် သုတတဲလၢ “ပယူၢ်လီၤကွံာ်အီၤလံ” န့ၣ်နီတဘျီတဂ့ၤ.+
၂၆ ပှၤလၢအသးခုလၢ ယဘၣ်နးဘၣ်ဖှီၣ်အဃိန့ၣ်
မ်အထံၣ်ဘၣ် တၢ်မဲာ်ဆှးတက့ၢ်.
ဒီးပှၤလၢအပာ်ထီၣ်ထီအသးလၢ ယဖီခိၣ်န့ၣ် မ်အဝဲသ့ၣ် ဒိးန့ၢ်ဘၣ် တၢ်မဲာ်ဆှးတက့ၢ်.
၂၇ မ့မ့ၢ် ပှၤလၢအဘၣ်သူၣ်ဘၣ်သး ယတၢ်တီတၢ်လိၤတဖၣ်န့ၣ် မ်အဝဲသ့ၣ် ကိးပသူထီၣ်လၢ တၢ်သူၣ်ဖှံသးညီအပူၤတက့ၢ်.
ထီဘိန့ၣ် မ်အဝဲသ့ၣ်တဲလၢ
“ယဟိဝၤယွၤလၢ အဘၣ်သူၣ်ဘၣ်သးဝဲလၢ အခ့အပှၤ ကအိၣ်ဒီးတၢ်ဃူတၢ်ဖိးန့ၣ် မ်အဘၣ် တၢ်မၤလၤကပီၤအီၤတက့ၢ်.”+