မးသဲ

၂၅ “မူခိၣ်အဘီအမုၢ်န့ၣ်​ လီၤဂာ်ဒီး မုၣ်ကနီၤအဂၤတဆံလၢ စိာ်ဝဲအမ့ၣ်အူဒၢ+ ဒီးလဲၤသဂၢၢ်ဝဲ တလးမူးပိာ်ခွါလီၤ.+ ၂ ဒီးလၢအဝဲသ့ၣ်အကျါယဲၢ်ဂၤန့ၣ်​ မ့ၢ်ပှၤလၢအသးတဆးဘၣ်, မ့မ့ၢ် အဝဲယဲၢ်ဂၤန့ၣ်​ မ့ၢ်ပှၤလၢ အကူၣ်တၢ်သ့လီၤ.+ ၃ ဒီးပှၤလၢအသးတဆးဘၣ်တဖၣ်န့ၣ်​ စိာ်ဝဲအမ့ၣ်အူဒၢ ဘၣ်ဆၣ်​ တစိာ်ဃုာ်ဝဲဒီးသိဘၣ်. ၄ မ့မ့ၢ်ပှၤလၢ အကူၣ်တၢ်သ့တဖၣ်န့ၣ်​ လဲၤစိာ်ဝဲ အမ့ၣ်အူဒၢ ဃုာ်ဒီးသိလၢ ပလီအပူၤလီၤ. ၅ တလးမူးပိာ်ခွါ မၤယံာ်မၤနီၢ်အသးအဃိ အဝဲသ့ၣ်ခဲလၢာ် အဲၣ်ဒိးမံဝဲ ဒီးမံဘၣ်အသးလီၤ. ၆ ဖဲဖးဖီမုၢ် အဆၢကတီၢ်န့ၣ်​ တၢ်ကလုၢ်သီၣ်ထီၣ်ဝဲလၢ ‘တလးမူးပိာ်ခွါဟဲလံ, လဲၤသဂၢၢ်အီၤဟီ.’ ၇ ဒီးပှၤမုၣ်ကနီၤခဲလၢာ်န့ၣ်​ ဂဲၤဆၢထၢၣ်ဒီး ကတဲာ်ကတီၤထီၣ်ဝဲ အမ့ၣ်အူဒၢလီၤ.+ ၈ ပှၤလၢအသးတဆးဘၣ်တဖၣ်န့ၣ်​ တဲဘၣ်​ ပှၤကူၣ်တၢ်သ့တဖၣ်လၢ ‘မ့ၢ်လၢ ပမ့ၣ်အူဒၢ ဘူးကလီၤပံာ်လံအဃိ ဟ့ၣ်ပှၤသုသိတနီၤမီၤ.’ ၉ ပှၤကူၣ်တၢ်သ့တဖၣ်န့ၣ်​ တဲဆၢက့ၤ အဝဲသ့ၣ်လၢ ‘ဘၣ်သ့ၣ်သ့ၣ်​ တယၢလၢ* ပဝဲဒီးသုအဂီၢ်ဘၣ်. အဃိ လဲၤပှ့ၤသိလၢ ပှၤဆါသိအအိၣ်မီၤ.’ ၁၀ ဖဲအဝဲသ့ၣ်​ လဲၤပှ့ၤတၢ်အဆၢကတီၢ်န့ၣ်​ တလးမူးပိာ်ခွါ ဟဲတုၤဝဲလီၤ. ဒီးပှၤမုၣ်ကနီၤလၢ အအိၣ်ကတဲာ်ကတီၤပာ်စၢၤ အသးတဖၣ်န့ၣ်​ လဲၤနုာ်လီၤပိာ်အခံဆူ တၢ်ဖျီအမူးအပူၤ+ ဝံၤဒီးတြဲၤဘၣ်တၢ် ကးပံးဃာ်အီၤလီၤ. ၁၁ လၢခံ ပှၤမုၣ်ကနီၤအဝဲယဲၢ်ဂၤန့ၣ်​ ဟဲက့ၤဒီးတဲဝဲလၢ ‘ကစၢ်ဧၢ, ကစၢ်ဧၢ, အိးထီၣ်န့ၢ်ပှၤတြဲၤမီၤ.’+ ၁၂ ဒီးအတဲဆၢက့ၤ အဝဲသ့ၣ်လၢ ‘ယကတဲဘၣ်သု တီတီလၢ ယတသ့ၣ်ညါသုဘၣ်.’

၁၃ “မ့ၢ်လၢ မုၢ်နံၤအဝဲန့ၣ်​ ဒီးနၣ်ရံၣ်အဝဲန့ၣ်​ သုတသ့ၣ်ညါဘၣ်အဃိ+ အိၣ်ပလီၢ်သုသး ထီဘိတက့ၢ်.+

၁၄ “မူခိၣ်အဘီအမုၢ်န့ၣ်​ လီၤဂာ်ဒီး ပှၤတဂၤလၢ အကလဲၤလၢ ထံဂၤကီၢ်ဂၤ ဒီးကိးန့ၢ်ဝဲ အကုၢ်တဖၣ်​ ဒီးအးလီၤဝဲ အတၢ်စုလီၢ်ခီၣ်ခိၣ်လၢ အဝဲသ့ၣ်အအိၣ်လီၤ.+ ၁၅ အဝဲဟ့ၣ်လီၤဝဲ တဂၤလၢ စ့ယဲၢ်တၤလၣ်,* တဂၤလၢ စ့ခံတၤလၣ်​ ဒီးတဂၤလၢ စ့တတၤလၣ်​ ဒ်အဝဲသ့ၣ်​ အတၢ်သ့တၢ်ဘၣ်​ အိၣ်ဝဲအသိး ဝံၤဒီး အဝဲလဲၤဝဲလၢ ထံဂၤကီၢ်ဂၤလီၤ. ၁၆ တဘျီဃီန့ၣ်​ ပှၤလၢအဒိးန့ၢ်ဘၣ်​ စ့ယဲၢ်တၤလၣ်တဂၤန့ၣ်​ လဲၤပှ့ၤတၢ်ဆါတၢ် ဒီးအဝဲမၤန့ၢ်အါထီၣ်​ စ့ယဲၢ်တၤလၣ်လီၤ. ၁၇ ဒ်န့ၣ်အသိး ပှၤလၢအဒိးန့ၢ်ဘၣ်​ စ့ခံတၤလၣ်တဂၤန့ၣ်​ မၤန့ၢ်အါထီၣ်စ့ၢ်ကီးဝဲ စ့ခံတၤလၣ်လီၤ. ၁၈ ဘၣ်ဆၣ်​ ကုၢ်လၢအဒိးန့ၢ်ဘၣ်ထဲ စ့တတၤလၣ်တဂၤန့ၣ်​ လဲၤခူၣ်လီၤဝဲတၢ်ပူၤ ဒီးပာ်ခူသူၣ်ဝဲ အကစၢ်အစ့ဖဲန့ၣ်လီၤ.

၁၉ “တၢ်ဆၢကတီၢ် လဲၤပူၤကွံာ်ဝဲဖးယံာ်ဒီး ကုၢ်အကစၢ်န့ၣ်​ ဟဲက့ၤတုၤ ဒ်သိး ကဒိးန့ၢ်ဘၣ်ကဒါက့ၤစ့လၢ အဝဲသ့ၣ်အအိၣ်လီၤ.+ ၂၀ အဃိ ပှၤလၢအဒိးန့ၢ်ဘၣ်​ စ့ယဲၢ်တၤလၣ်တဂၤန့ၣ်​ ဟဲစိာ်အါထီၣ်​ စ့ယဲၢ်တၤလၣ်​ ဒီးတဲဝဲလၢ ‘ကစၢ်ဧၢ, နဟ့ၣ်လီၤယၤ စ့ယဲၢ်တၤလၣ်လီၤ. ကွၢ်မီၤ, ယမၤန့ၢ်အါထီၣ်အီၤ ယဲၢ်တၤလၣ်လီၤ.’+ ၂၁ ဒီးကုၢ်အကစၢ်န့ၣ်​ တဲဘၣ်အီၤလၢ ‘ကုၢ်လၢအဂ့ၤ ဒီးအတီတဂၤဧၢ, နမၤတၢ်ဂ့ၤဒိၣ်မးလီၤ. လၢတၢ်စှၤမံၤအဖီခိၣ်န့ၣ်​ နတီနဲအဃိ ယကပာ်ထီၣ်နၤ လၢတၢ်အါမံၤအဖီခိၣ်လီၤ.+ သးခုဃုာ်ဒီး နကစၢ်တက့ၢ်.’+ ၂၂ ဝံၤဒီး ပှၤလၢအဒိးန့ၢ်ဘၣ်​ စ့ခံတၤလၣ်တဂၤန့ၣ်​ ဟဲတဲဝဲလၢ ‘ကစၢ်ဧၢ, နဟ့ၣ်လီၤယၤ စ့ခံတၤလၣ်လီၤ. ကွၢ်မီၤ, ယမၤန့ၢ်အါထီၣ်အီၤ ခံတၤလၣ်လီၤ.’+ ၂၃ ကုၢ်အကစၢ်န့ၣ်​ တဲဘၣ်အီၤလၢ ‘ကုၢ်လၢအဂ့ၤ ဒီးအတီတဂၤဧၢ, နမၤတၢ်ဂ့ၤဒိၣ်မးလီၤ. လၢတၢ်စှၤမံၤအဖီခိၣ်န့ၣ်​ နတီနဲအဃိ ယကပာ်ထီၣ်နၤ လၢတၢ်အါမံၤအဖီခိၣ်လီၤ. သးခုဃုာ်ဒီး နကစၢ်တက့ၢ်.’

၂၄ “လၢခံကတၢၢ် ကုၢ်လၢအဒိးန့ၢ်ဘၣ်​ စ့တတၤလၣ်တဂၤန့ၣ်​ ဟဲတဲဝဲလၢ ‘ကစၢ်ဧၢ, ယသ့ၣ်ညါလၢ နမ့ၢ်ပှၤလၢအကီတဂၤလီၤ. တၢ်လၢနတဖှံလီၤဘၣ်န့ၣ်​ နကူးအီၤလီၤ. ဒီးတၢ်လၢ နတမၤအီၤဘၣ်န့ၣ်​ နထၢဖှိၣ်အီၤလီၤ.+ ၂၅ အဃိ ယပျံၤတၢ်ဒီး ယလဲၤပာ်ခူသူၣ်​ နစ့တတၤလၣ်​ လၢတၢ်ပူၤလီၤ. အအံၤ, ဟံးန့ၢ်က့ၤ နတၢ်တက့ၢ်.’ ၂၆ ကုၢ်အကစၢ်န့ၣ်​ တဲဆၢအီၤလၢ ‘ကုၢ်လၢအအၢ ဒီးအကၢၣ်တဂၤဧၢ, နသ့ၣ်ညါတမ့ၢ်ဧီၤ. တၢ်လၢယတဖှံလီၤဘၣ်န့ၣ်​ ယကူးအီၤလီၤ. ဒီးတၢ်လၢ ယတမၤအီၤဘၣ်န့ၣ်​ ယထၢဖှိၣ်အီၤလီၤ. ၂၇ အဃိ နကြၢးပၢနုာ်တ့ၢ် ယစ့လၢ စ့တၢးအပူၤ ဒီးတုၤယဟဲက့ၤတုၤအခါ ယကဒိးန့ၢ်ဘၣ်က့ၤအီၤ ဒီးစ့အအ့ၣ်လီၤ.

၂၈ “ဝံၤဒီးအဝဲတဲ အခ့အပှၤတဖၣ်လၢ ‘ဟံးန့ၢ်က့ၤ စ့တတၤလၣ်လၢအအိၣ်​ ဒီးဟ့ၣ်လီၤက့ၤ ပှၤလၢအစ့အိၣ်​ အတၤလၣ်တဆံ တဂၤတက့ၢ်.+ ၂၉ ပှၤလၢ အတၢ်အိၣ်လံန့ၣ်​ တၢ်ကဟ့ၣ်လီၤအါထီၣ်အီၤ ဒီးအတၢ်ကအိၣ်​ အါအါဂီၢ်ဂီၢ်လီၤ. ဘၣ်ဆၣ်​ ပှၤလၢ အတၢ်တအိၣ်ဘၣ်န့ၣ်​ တၢ်လၢအအိၣ်ဒီးအီၤဒၣ်လဲာ် တၢ်ကဟံးထီၣ်ကွံာ်အီၤလီၤ.+ ၃၀ ဒီးနီဟးထီၣ်ကွံာ် ကုၢ်လၢအတကျီးဘၣ်​ တဂၤအံၤဆူ တၢ်ချၢလၢ တၢ်ခံးကျါတက့ၢ်. ဖဲန့ၣ်န့ၣ်​ အကဟီၣ်ကယၢၤ ဒီးကအ့ၣ်တဃံးအမဲလီၤ.’

၃၁ “ဖဲပှၤကညီဖိခွါအံၤ+ ဟဲတုၤဝဲဒီးအလၤကပီၤ အိၣ်ဒီးမူခိၣ်ကလူး ခဲလၢာ်အခါ+ အဝဲကဆ့ၣ်နီၤလၢ အလီၢ်ပစိာ်လၢ အလီၤဘီလီၤမုၢ်အလိၤလီၤ. ၃၂ ဒီးတၢ်ကဒုးအိၣ်ဖှိၣ်​ ပှၤကလုာ်ခဲလၢာ် လၢအမဲာ်ညါ ဒီးအကနီၤဖးဝဲ ပှၤခံဒူၣ်​ ဒ်ပှၤကွၢ်သိနီၤဖး သိဒီးမဲာ်တဲးလဲး အသိးလီၤ. ၃၃ ဒီးအကပာ်သိလၢ+ အစုထွဲတခီ, မ့မ့ၢ် မဲာ်တဲးလဲးန့ၣ်​ အကပာ်ဝဲလၢ အစုစ့ၣ်တခီလီၤ.+

၃၄ “ဒီးစီၤပၤကတဲဘၣ်​ ပှၤအိၣ်လၢ အစုထွဲတခီလၢ ‘ပှၤလၢ ယပၢ်ဆိၣ်ဂ့ၤအီၤသ့ၣ်ဧၢ, ဟဲန့ၢ်သါဘၣ်​ ဘီမုၢ်လၢ အဘၣ်တၢ်ကတဲာ်ကတီၤပာ်န့ၢ်သု စးထီၣ်ဖဲ တချုးပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢ ဒံးဘၣ်လံၤလံၤ* န့ၣ်တက့ၢ်. ၃၅ ဖဲယအဲၣ်ဒိးအီၣ်တၢ် အဆၢကတီၢ်န့ၣ်​ သုဒုးအီၣ်ယၤတၢ် ဒီးဖဲယအဲၣ်ဒိး အီထံအခါ သုဒုးအီယၤလီၤ. ဖဲယကဲ ပှၤတမှံၤအခါ သုတူၢ်လိာ်ယၤဂ့ၤဂ့ၤလီၤ.+ ၃၆ ဖဲယအိၣ်ဘ့ၣ်ဆ့အခါ* သုဒုးကူဒုးကၤယၤလီၤ.+ ဖဲယအိၣ်တဆူၣ်ဘၣ်အခါ သုအံးထွဲကွၢ်ထွဲယၤ ဒီးဖဲယအိၣ်လၢ ဃိာ်ပူၤအခါ သုဟဲဟးလၢ ယအိၣ်လီၤ.’+ ၃၇ ဒီးပှၤတီပှၤလိၤတဖၣ်န့ၣ်​ ကတဲဆၢက့ၤအီၤလၢ ‘ကစၢ်ဧၢ, ဖဲနအဲၣ်ဒိးအီၣ်တၢ်အခါ ပထံၣ်ဘၣ်နၤ ဒီးပဒုးအီၣ်နၤတၢ် မ့တမ့ၢ် ဖဲနအဲၣ်ဒိး အီထံအခါ ဒီးပဒုးအီနၤန့ၣ်​ မ့ၢ်အခါဖဲလဲၣ်.+ ၃၈ ဖဲနကဲပှၤတမှံၤအခါ ပတူၢ်လိာ်နၤဂ့ၤဂ့ၤ မ့တမ့ၢ် ဖဲနအိၣ်ဘ့ၣ်ဆ့အခါ ပဒုးကူဒုးကၤနၤန့ၣ်​ မ့ၢ်အခါဖဲလဲၣ်. ၃၉ ဖဲနအိၣ်တဆူၣ်ဘၣ်အခါ မ့တမ့ၢ် ဖဲနအိၣ်လၢ ဃိာ်ပူၤအခါ ပလဲၤဟးလၢနအိၣ်န့ၣ်​ မ့ၢ်အခါဖဲလဲၣ်.’ ၄၀ ဒီးစီၤပၤ ကတဲဆၢက့ၤ အဝဲသ့ၣ်လၢ ‘ယကတဲဘၣ်သု တီတီလၢ တၢ်လၢသုမၤန့ၢ် ပှၤအဆံးကတၢၢ်လၢ ယဒီပုၢ်ဝဲၢ်အကျါန့ၣ်​ မ့ၢ်ဒၣ်သုမၤန့ၢ်ယၤလီၤ.’+

၄၁ “ဝံၤဒီး စီၤပၤကတဲဘၣ်​ ပှၤအိၣ်လၢ အစုစ့ၣ်တခီလၢ ‘ပှၤလၢအဘၣ်​ တၢ်ဆိၣ်အၢသ့ၣ်ဧၢ, ဟးထီၣ်ကွံာ်လၢယအိၣ်+ ဒီးလဲၤနုာ်လီၤလၢ မ့ၣ်အူအထူအယိာ်အပူၤလၢ+ အဘၣ်တၢ်ကတဲာ်ကတီၤပာ်န့ၢ် မုၣ်ကီၤလံၢ် ဒီးအမူခိၣ်ကလူးတဖၣ်​ အဂီၢ်န့ၣ်တက့ၢ်.+ ၄၂ ဖဲယအဲၣ်ဒိးအီၣ်တၢ်အခါ သုတဒုးအီၣ်ယၤ တၢ်နီတမံၤဘၣ်​ ဒီးဖဲယအဲၣ်ဒိး အီထံအခါ သုတဒုးအီယၤ တၢ်နီတမံၤဘၣ်. ၄၃ ဖဲယကဲပှၤတမှံၤအခါ သုတတူၢ်လိာ်မုာ်ယၤဘၣ်​ ဒီးဖဲယအိၣ်ဘ့ၣ်ဆ့အခါ သုတဒုးကူဒုးကၤယၤဘၣ်. ဖဲယအိၣ်တဆူၣ်ဘၣ်​ ဒီးယအိၣ်လၢ ဃိာ်ပူၤအခါ သုတကွၢ်ထွဲယၤဘၣ်.’ ၄၄ ဒီးအဝဲသ့ၣ်​ ကတဲဆၢက့ၤအီၤလၢ ‘ကစၢ်ဧၢ, နအဲၣ်ဒိးအီၣ်တၢ်မ့ၢ်ဂ့ၤ, နအဲၣ်ဒိးအီထံမ့ၢ်ဂ့ၤ, နအိၣ်ဘ့ၣ်ဆ့မ့ၢ်ဂ့ၤ, နအိၣ်တဆူၣ်ဘၣ်မ့ၢ်ဂ့ၤ, နအိၣ်လၢဃိာ်ပူၤမ့ၢ်ဂ့ၤ ဒီးပတမၤစၢၤနၤဘၣ်န့ၣ်​ မ့ၢ်အခါဖဲလဲၣ်.’ ၄၅ ဝံၤဒီးစီၤပၤန့ၣ်​ ကတဲဆၢက့ၤ အဝဲသ့ၣ်လၢ ‘ယကတဲဘၣ်သု တီတီလၢ တၢ်လၢသုတမၤန့ၢ် ပှၤအဆံးကတၢၢ်လၢ ယဒီပုၢ်ဝဲၢ်အကျါဘၣ်န့ၣ်​ မ့ၢ်ဒၣ်​ သုတမၤန့ၢ်ယၤဘၣ်.’+ ၄၆ အဝဲသ့ၣ်တဖၣ်န့ၣ်​ ကဘၣ်​ တၢ်မၤဟးဂီၤကွံာ်အီၤ လီၤထူလီၤယိာ်လီၤ.+ မ့မ့ၢ် ပှၤတီပှၤလိၤတဖၣ်န့ၣ်​ ကန့ၢ်ဘၣ်​ တၢ်မူအထူအယိာ်လီၤ.”+