လူၤကၣ်

၁၃ ဖဲန့ၣ်အဆၢကတီၢ် ပှၤလၢ အအိၣ်ဖဲန့ၣ်တနီၤ ဟဲတဲဘၣ်​ ယ့ၣ်ၡူးလၢ စီၤပံၤလးမၤသံ ပှၤကၤလံၤလါဖိလၢ အဟဲလုၢ်ထီၣ်တၢ်တဖၣ်​ အဂ့ၢ်လီၤ. ၂ ယ့ၣ်ၡူးတဲဆၢက့ၤ အဝဲသ့ၣ်လၢ “မ့ၢ်သုဆိကမိၣ်လၢ ပှၤကၤလံၤလါဖိတဖၣ်အံၤ တူၢ်ဘၣ်တၢ်ဒ်န့ၣ်န့ၣ်​ မ့ၢ်လၢ အတၢ်ဒဲးဘးအၢန့ၢ်ဒံး ပှၤကၤလံၤလါဖိလၢ အဂၤတဖၣ်​ ခဲလၢာ်အဃိဧါ. ၃ တမ့ၢ်ဘၣ်, ယကတဲဘၣ်သုလၢ သုမ့ၢ် တပီၢ်ယၢ်လီၤက့ၤ သုသးဘၣ်န့ၣ်​ တၢ်ကမၤဟးဂီၤသု ကိးဂၤဒဲး ဒ်န့ၣ်အသိး စ့ၢ်ကီးလီၤ.+ ၄ ဒီးပှၤ ၁၈ ဂၤလၢအသံဝဲ ဖဲတၢးထီၡံလိၣ်​ လီၤပှီၢ်အခါန့ၣ်​ မ့ၢ်သုဆိကမိၣ်လၢ အဝဲသ့ၣ်​ အတၢ်ကမၣ်​ အိၣ်အါန့ၢ်ဒံး ပှၤပိာ်ခွါအဂၤခဲလၢာ်လၢ အအိၣ်လၢ ယရူၤၡလ့ၣ်အပူၤဧါ. ၅ တမ့ၢ်ဘၣ်, ဘၣ်ဆၣ်​ ယကတဲဘၣ်သုလၢ သုမ့ၢ်တပီၢ်ယၢ်လီၤက့ၤ သုသးဘၣ်န့ၣ်​ တၢ်ကမၤဟးဂီၤသုကိးဂၤဒဲး ဒ်အဝဲသ့ၣ်​ အသိးလီၤ.”

၆ ဝံၤဒီး ယ့ၣ်ၡူးဆဲးတဲဝဲ တၢ်ကတိၤဒိလၢ “ပှၤတဂၤအိၣ်ဒီး ချၢၣ်ဒၢတထူၣ်လၢ အစပံးကျီးအပူၤ ဒီးအဝဲ လဲၤဃုဝဲအသၣ်​ ဘၣ်ဆၣ်​ တထံၣ်ဝဲနီတဖျၢၣ်ဘၣ်.+ ၇ အဃိ အဝဲတဲဘၣ်​ ပှၤမၤတၢ်ဖိလၢ စပံးကျီးပူၤတဂၤလၢ ‘ယဟဲဃု ချၢၣ်ဒၢတထူၣ်အံၤ အသၣ်န့ၣ်​ အိၣ်သၢနံၣ်လံ ဘၣ်ဆၣ်​ ယတထံၣ်​ အသၣ်နီတဖျၢၣ်ဘၣ်. အအိၣ်ပှဲၤဂီၤ ဟီၣ်ခိၣ်အဃိ ကူာ်ကွံာ်အီၤဟီ.’ ၈ ဒီးပှၤမၤတၢ်ဖိလၢ စပံးကျီးပူၤတဂၤန့ၣ်​ တဲအီၤလၢ ‘ကစၢ်ဧၢ, ယကခူၣ်​ ဝးတရံးအကပၤဝးဝး ဒီးလူလီၤတၢ်အ့ၣ်ဖဲန့ၣ်လီၤ. အဃိ အိၣ်ခိးကွၢ်ကဒီး တုၤလၢ လၢခံတနံၣ်နီၤ. ၉ လၢခံ အမ့ၢ်သၣ်ထီၣ်န့ၣ်​ ဂ့ၤဝဲလီၤ. ဘၣ်ဆၣ်​ မ့ၢ်တသၣ်ထီၣ်ဘၣ်န့ၣ်​ ကူာ်လီၤကွံာ်အီၤဟီ.’”+

၁၀ လၢမုၢ်အိၣ်ဘှံးနံၤန့ၣ်​ ယ့ၣ်ၡူး သိၣ်လိတၢ်လၢ ဘူၣ်ဘျီၣ်တဖျၢၣ်​ အပူၤလီၤ. ၁၁ ဒီးပိာ်မုၣ်လၢ တၢ်ဝံတၢ်နါဒိးအီၤ ဒီးဆိးက့န့ၢ်ဝဲ ၁၈ နံၣ်န့ၣ်​ အိၣ်ဝဲဖဲန့ၣ်တဂၤလီၤ. ဒီးအပျိၢ်သကူး တုၤဒၣ်လဲာ် အမၤဘျၢထီၣ်ဝဲတန့ၢ် နီတစဲးဘၣ်. ၁၂ ဖဲယ့ၣ်ၡူး ထံၣ်အီၤအခါ ယ့ၣ်ၡူးတဲအီၤလၢ “ပိာ်မုၣ်ဧၢ, နတၢ်ဆါန့ၣ်​ ဘျါကွံာ်လံ.”+ ၁၃ ယ့ၣ်ၡူးပာ်ထီၣ်အစု လၢအလိၤ ဒီးတဘျီဃီန့ၣ်​ ပိာ်မုၣ်အံၤ အပျိၢ်ဘျၢထီၣ်ဝဲ ဒီးအဝဲမၤလၤကပီၤ ကစၢ်ယွၤလီၤ. ၁၄ ဘၣ်ဆၣ်​ ယ့ၣ်ၡူးမၤဘျါတၢ်လၢ မုၢ်အိၣ်ဘှံးနံၤအဃိ ဘူၣ်ဘျီၣ်အခိၣ်တဂၤန့ၣ်​ သးဒိၣ်ထီၣ်တၢ် ဒီးတဲပှၤဂီၢ်မုၢ်လၢ “မုၢ်နံၤလၢ ပှၤကမၤတၢ်န့ၣ်​ အိၣ်ဝဲဃုနံၤညါ+ အဃိ ဟဲမၤဘျါသုသးလၢ မုၢ်နံၤတဖၣ်န့ၣ်သၢၤ. တဘၣ်ဟဲမၤလၢ မုၢ်အိၣ်ဘှံးနံၤတဂ့ၤ.”+ ၁၅ ဘၣ်ဆၣ်​ ကစၢ် တဲဆၢအီၤလၢ “ပှၤပာ်မၤအသးသ့ၣ်ဧၢ,+ သုဝဲစ့ၢ်ကီး လၢမုၢ်အိၣ်ဘှံးနံၤန့ၣ်​ သုပျၢ်လီၤကွံာ် သုကျီၢ်မ့ၢ်ဂ့ၤ, ကသ့ၣ်ယီၤမ့ၢ်ဂ့ၤ လၢအကရၢပူၤ ဒီးလဲၤမူၤဒုးအီအီၤထံ တမ့ၢ်ဧီၤ.+ ၁၆ အဃိ ပိာ်မုၣ်လၢအမ့ၢ် စီၤအၤဘြၤဟၣ်​ အစၢၤအသွဲၣ်လၢ မုၣ်ကီၤလံၢ်* မၤဆူးမၤဆါအီၤန့ၢ်ဝဲ ၁၈ နံၣ်တဂၤအံၤ တကြၢးလၢ ယမၤဘျါကွံာ်အီၤလၢ မုၢ်အိၣ်ဘှံးနံၤဧီၤ.” ၁၇ ဖဲအဝဲတဲဝဲ ဒ်န့ၣ်အခါ ပှၤလၢ အထီဒါအီၤခဲလၢာ် မဲာ်ဆှးဝဲလီၤ. မ့မ့ၢ် ပှၤဂီၢ်မုၢ်ခဲလၢာ်န့ၣ်​ သးခုဝဲခီဖျိလၢ တၢ်လီၤလိၢ်လီၤလးလၢ အမၤဝဲ ခဲလၢာ်အဃိလီၤ.+

၁၈ အဃိ ယ့ၣ်ၡူး ဆဲးတဲဝဲလၢ “ကစၢ်ယွၤ အဘီအမုၢ်န့ၣ်​ လီၤဂာ်ဒီး တၢ်မနုၤလဲၣ်​ ဒီးယကဘၣ်ထိၣ်သတြီၤအီၤဒီး တၢ်မနုၤလဲၣ်. ၁၉ အလီၤဂာ်ဒီး သဘၣ်အချံ* လၢပှၤတဂၤဟံးန့ၢ်ဝဲ ဒီးသူၣ်လီၤဝဲလၢ အကရၢၢ်ပူၤ ဒီးတုၤအမဲထီၣ်န့ၣ်​ ကဲထီၣ်ဝဲ သ့ၣ်တထူၣ်​ ဒီးထိၣ်လၢတၢ်ဖးဖီတဖၣ်​ ဟဲအိၣ်ဝဲဆိးဝဲလၢ အဒ့တဖၣ်အလိၤလီၤ.”+

၂၀ အဝဲတဲကဒီးဝဲလၢ “ကစၢ်ယွၤ အဘီအမုၢ်န့ၣ်​ ယကဘၣ်ထိၣ်သတြီၤအီၤဒီး တၢ်မနုၤလဲၣ်. ၂၁ အလီၤဂာ်ဒီး ကိၣ်မံၣ်လၢ ပိာ်မုၣ်တဂၤ ဃါဃုာ်ဝဲဒီး ကိၣ်ကမူၣ်​ သၢတလိး* တုၤလၢ အပွးထီၣ်​ ခဲလၢာ်လီၤ.”+

၂၂ ဖဲယ့ၣ်ၡူးဆဲးလဲၤဝဲလၢ ဝ့ၢ်ယရူၤၡလ့ၣ်အခါ လၢကျဲန့ၣ်​ အဝဲလဲၤလၢ ဝ့ၢ်တဝ့ၢ်ဘၣ်တဝ့ၢ်, သဝီ တဖျၢၣ်ဘၣ်တဖျၢၣ်​ ဒီးသိၣ်လိတၢ်လီၤ. ၂၃ ဒီးပှၤတဂၤ သံကွၢ်အီၤလၢ “ကစၢ်ဧၢ, ပှၤလၢကတုၤလၢ တၢ်အုၣ်က့ၤခီၣ်က့ၤန့ၣ်​ အိၣ်စှၤကိာ်ဂၤလီၤဧါ.” ယ့ၣ်ၡူးတဲဘၣ်​ အဝဲသ့ၣ်လၢ ၂၄ “ဂုာ်ကျဲးစၢးဆူၣ်ဆူၣ်​ ဒ်သိး သုကနုာ်လီၤဘၣ်လၢ တြဲၤလၢအအံၣ်တက့ၢ်.+ ယကတဲဘၣ်သု, လၢခံန့ၣ်​ ပှၤအါဂၤ ကအဲၣ်ဒိးနုာ်လီၤဝဲ ဘၣ်ဆၣ်​ လဲၤနုာ်လီၤဝဲ တန့ၢ်ဘၣ်. ၂၅ ဖဲဟံၣ်ကစၢ် ကးတံာ်တြဲၤ ဝံၤအလီၢ်ခံ သုကဆၢထၢၣ်လၢ တၢ်ချၢ ဒီးဒိတကျိာ်တြဲၤ ဒီးတဲလၢ ‘ကစၢ်ဧၢ, အိးထီၣ်န့ၢ်ပှၤ တြဲၤမီၤ.’+ ဘၣ်ဆၣ်​ အဝဲ ကတဲဆၢက့ၤသုလၢ ‘ယတသ့ၣ်ညါသုဘၣ်.’ ၂၆ ဖဲန့ၣ်​ သုကတဲလၢ ‘ပအီၣ်တၢ်အီတၢ် လၢနမဲာ်ညါ ဒီးနသိၣ်လိတၢ်လၢ ပကျဲမုၢ်တဖၣ်အပူၤလီၤ.’+ ၂၇ ဘၣ်ဆၣ်​ အဝဲကတဲသုလၢ ‘ယတသ့ၣ်ညါသုဘၣ်. သုဝဲခဲလၢာ်လၢ အမၤတၢ်အၢတၢ်သီသ့ၣ်ဧၢ, ဟးယံၤဒီးယၤတက့ၢ်.’ ၂၈ ဒီးသုကဘၣ်​ တၢ်ကွံာ်လီၤသုလၢ တၢ်ချၢ+ ဒီးဖဲသုထံၣ်ဘၣ်​ စီၤအၤဘြၤဟၣ်, စီၤအံၤစဲး, စီၤယၤကိာ် ဒီးဝံခဲလၢာ်လၢ ကစၢ်ယွၤ အဘီမုၢ်အပူၤအခါ သုကဟီၣ်ကယၢၤဒီး သုကအ့ၣ်တဃံးသုမဲ ဖဲန့ၣ်လီၤ. ၂၉ ဒီးပှၤကဟဲလၢ မုၢ်ထီၣ်ဒီးမုၢ်နုာ်, လၢကလံၤစိး ဒီးကလံၤထံး ဒီးကဆ့ၣ်နီၤအီၣ်တၢ်ဖဲ စီၢ်နီၤခိၣ်လၢ ကစၢ်ယွၤ အဘီမုၢ်အပူၤလီၤ. ၃၀ ဒီးပှၤလၢ အအိၣ်လၢ တၢ်လီၢ်ခံန့ၣ်​ ကအိၣ်က့ၤလၢတၢ်မဲာ်ညါ ဒီးပှၤလၢ အအိၣ်လၢ တၢ်မဲာ်ညါန့ၣ်​ ကအိၣ်က့ၤလၢ တၢ်လီၢ်ခံလီၤ.”+

၃၁ ဖဲန့ၣ်အခါ* ပှၤဖၤရံၤၡဲတနီၤ ဟဲတဲဘၣ်အီၤလၢ “စီၤဟ့ၤရိာ် အဲၣ်ဒိးမၤသံနၤအဃိ ဟးထီၣ်ကွံာ်လၢ တၢ်လီၢ်ဖဲအံၤဟီ.” ၃၂ ယ့ၣ်ၡူးတဲဘၣ်​ အဝဲသ့ၣ်လၢ “လဲၤတဲဘၣ်​ ထွံၣ်ဟီၣ်ခိၣ်အဝဲန့ၣ်လၢ ‘တနံၤအံၤ ဒီးခဲမုၢ်ဆ့ၣ်န့ၣ်​ ယကနီဟးထီၣ်ကွံာ် တၢ်ဝံတၢ်နါ ဒီးမၤဘျါကွံာ် ပှၤဆါတဖၣ်​ ဒီးလၢသၢနံၤတနံၤန့ၣ်​ ယတၢ်မၤကဝံၤလီၤ.’ ၃၃ ဒ်လဲၣ်ဂ့ၤဒ်လဲၣ်ဂ့ၤ တနံၤအံၤ ဒီးခဲမုၢ်ဆ့ၣ်​ ဒီးခဲတဆ့ၣ်န့ၣ်​ ယကဘၣ်​ လဲၤဆူညါမၤဆူညါလီၤ. ဒီးမ့တမ့ၢ်ဘၣ်လၢ ဝ့ၢ်ယရူၤၡလ့ၣ်အပူၤဘၣ်န့ၣ်​ ပှၤကမၤသံ ဝံတဂၤလၢ တၢ်လီၢ်အဂၤန့ၣ်​ လ့ၤတက့ၤတသ့ဘၣ်.+ ၃၄ ပှၤအိၣ်လၢ ဝ့ၢ်ယရူၤၡလ့ၣ်အပူၤသ့ၣ်ဧၢ, ပှၤအိၣ်လၢ ဝ့ၢ်ယရူၤၡလ့ၣ်အပူၤသ့ၣ်ဧၢ, သုမၤသံဝံတဖၣ်​ ဒီးသုကွံာ်သံပှၤလၢ ကစၢ်ယွၤဆှၢလီၤအီၤ ဆူသုအိၣ်န့ၣ်​ လၢလၢၢ်လီၤ.+ ဒ်ဆီမိၢ်ပှၢ် ဟုဃာ်အဖိလၢ အဒံးဆ့အဖီလာ် အသိးန့ၣ်​ ယအဲၣ်ဒိးဒုးအိၣ်ဖှိၣ်​ သုဖိသုလံၤတဖၣ်​ အဘျီအါမးလီၤ. ဘၣ်ဆၣ်​ သုတတူၢ်လိာ်ဘၣ်.+ ၃၅ အဃိ ကစၢ်ယွၤ ကပာ်တ့ၢ်ကွံာ် သုဟံၣ်*+ ဒီးအကအိၣ်က့ၤလၢ သုစုပူၤလီၤ. ယကတဲဘၣ်သုလၢ တချုးလၢ သုတဲလၢ ‘ပှၤလၢအဟဲလၢ ယဟိဝၤယွၤ* အမံၤတဂၤန့ၣ်+ မ်အဘၣ်ဆိၣ်ဂ့ၤတက့ၢ်’ ဒံးဘၣ်န့ၣ်​ လ့ၤတက့ၤ သုတထံၣ်ယၤလၢၤဘၣ်.”