၁ ၡမူၤအ့လး
၄ ဒီးစီၤၡမူၤအ့လး အတၢ်ကတိၤ ရၤလီၤအသး လၢပှၤအံၣ်စရ့လးဖိ ခဲလၢာ်အအိၣ်လီၤ.
ဒီးပှၤအံၣ်စရ့လးဖိ လဲၤထီၣ်သဂၢၢ် ပှၤဖလ့ၡသးဖိ လၢတၢ်ဒုးပျီပူၤလီၤ. ပှၤအံၣ်စရ့လးဖိ ဆီလီၤအသး ဘူးဒီး အ့ဘ့ၣ်န့စၢ် ဒီးပှၤဖလ့ၡသးဖိ ဆီလီၤအသးလၢ ဝ့ၢ်အဖ့းလီၤ. ၂ ဒီးပှၤဖလ့ၡသးဖိ ဆီလီၤအသး ဒ်သိးအကဒုး ပှၤအံၣ်စရ့လးဖိ အဂီၢ်လီၤ. ဒီးမ့ၢ်လၢ ပှၤဖလ့ၡသးဖိ ကျီသံ ပှၤအံၣ်စရ့လးဖိ အဂၤ ၄,၀၀၀ လၢတၢ်ဒုးပျီပူၤ အဃိ တၢ်ဒုးတဘျီအံၤ တလဲၤအသး ဂ့ၤဂ့ၤဘၣ်. ဒီးပှၤအံၣ်စရ့လးဖိ ၡူဝဲလီၤ. ၃ ဖဲအံၣ်စရ့လးသုးဖိ က့ၤကဒါက့ၤလၢ ဒဲကဝီၤအခါ အံၣ်စရ့လး အပှၤသူၣ်က့သးပှၢ်တဖၣ် တဲဝဲလၢ “တနံၤအံၤ ဘၣ်မနုၤအဃိ ယဟိဝၤယွၤ ပျဲဝဲလၢ ပှၤဖလ့ၡသးဖိ ကမၤနၢၤပှၤလဲၣ်.+ မ်ပလဲၤစိာ် ယဟိဝၤယွၤ အတၢ်အၢၣ်လီၤအီလီၤအတလါ လၢအအိၣ်လၢ ဝ့ၢ်ၡံလိၤန့ၣ်တက့ၢ်.+ ပမ့ၢ်လဲၤစိာ်တလါန့ၣ် အကမၤပူၤဖျဲးပှၤလၢ ပဒုၣ်ပဒါအစုပူၤလီၤ.” ၄ ဒီးအဝဲသ့ၣ် ဆှၢလီၤ ပှၤပိာ်ခွါတနီၤလၢ ဝ့ၢ်ၡံလိၤ ဒီးအဝဲသ့ၣ် ဟဲက့ၤစိာ် တၢ်သုးမုၢ်ဂီၢ်မုၢ် အကစၢ်ယဟိဝၤယွၤ လၢအဆ့ၣ်နီၤလၢ အလီၢ်ပစိာ်လၢ ခ့ရူာ်တဖၣ် အဖီခိၣ်န့ၣ်*+ အတၢ်အၢၣ်လီၤအီလီၤ အတလါလီၤ. ဒီးစီၤဧ့လံၤ အဖိခွါခံဂၤ လၢအမ့ၢ် စီၤဃၤဖနံ ဒီးစီၤဖံၤနဃၣ်န့ၣ်+ အိၣ်ဝဲဖဲန့ၣ် လၢတလါ အကပိာ်ကပၤလီၤ.
၅ ဖဲပှၤလဲၤစိာ်နုာ် ယဟိဝၤယွၤ အတၢ်အၢၣ်လီၤအီလီၤအတလါလၢ ဒဲကဝီၤအခါ ပှၤအံၣ်စရ့လးဖိခဲလၢာ် ကိးပသူထီၣ်ဖးဒိၣ်အဃိ ဟီၣ်ခိၣ် သထြုးသထြီဝဲလီၤ. ၆ ဖဲပှၤဖလ့ၡသးဖိ နၢ်ဟူဘၣ်ဝဲ ပှၤကိးပသူထီၣ်ဖးဒိၣ်အခါ အဝဲသ့ၣ် တဲဝဲလၢ “ဘၣ်မနုၤအဃိ ပှၤဘၣ်ကိးပသူထီၣ်ဖးဒိၣ်လၢ ပှၤဧ့ၤဘြံၤဖိ အဒဲကဝီၤပူၤလဲၣ်.” လၢခံ အဝဲသ့ၣ် သ့ၣ်ညါဘၣ်ဝဲလၢ ပှၤဟဲစိာ်နုာ် ယဟိဝၤယွၤ အတလါစီဆှံ လၢဒဲကဝီၤအပူၤလီၤ. ၇ ပှၤဖလ့ၡသးဖိ တဲဝဲလၢ “ကစၢ်ယွၤ ဟဲနုာ်လီၤလၢ ဒဲကဝီၤအပူၤလံ”+ အဃိ အဝဲသ့ၣ် ပျံၤတၢ်လီၤ. ဒီးအဝဲသ့ၣ် တဲဝဲလၢ “လၢညါန့ၣ် တၢ်တကဲထီၣ်အသး ဒ်အံၤနီတဘျီဘၣ် အဃိ တၢ်ကီတၢ်ခဲ ဘၣ်ပှၤလံ. ၈ တၢ်ကီတၢ်ခဲ ဘၣ်ပှၤလံ. မတဂၤ ကမၤပူၤဖျဲးပှၤလၢ ကစၢ်ယွၤလၢ အလီၤကဟုကညီၢ်တဂၤအံၤ အစုပူၤလဲၣ်. ကစၢ်ယွၤတဂၤအံၤ မၤသံ ပှၤအဲၤကူပတူးဖိ အါအါဂီၢ်ဂီၢ်လၢ ကျဲအကလုာ်ကလုာ် လၢပှၢ်မုၢ်ကနၢအပူၤလီၤ.+ ၉ ဘၣ်ဆၣ် ပှၤဖလ့ၡသးဖိသ့ၣ်ဧၢ, အိၣ်ဒီးတၢ်သူၣ်ဒူသးဒူ ဒ်ပိာ်ခွါအသိး တက့ၢ်. ဒ်သိး သုသုတဘၣ် မၤတၢ်လၢ ပှၤဧ့ၤဘြံၤဖိအဂီၢ် ဒ်အဝဲသ့ၣ် မၤတ့ၢ်တၢ်လၢ သုဂီၢ်အသိးတဂ့ၤ အဂီၢ်န့ၣ်+ ပာ်သုသးဒ် ပိာ်ခွါအသိး ဒီးဒုးအဝဲသ့ၣ် တက့ၢ်.” ၁၀ အဃိ ပှၤဖလ့ၡသးဖိ ဒုးတၢ်ဒီး မၤနၢၤဝဲ ပှၤအံၣ်စရ့လးဖိလီၤ.+ ဒီးအံၣ်စရ့လးသုးဖိ တဂၤဘၣ်တဂၤ က့ၤဃ့ၢ်ကဒါက့ၤလၢ အဟံၣ်လီၤ. ပှၤအံၣ်စရ့လးဖိ ဘၣ်သံဝဲ အါအါဂီၢ်ဂီၢ် ဒီးအဝဲသ့ၣ် သံဝဲအဂၤ ၃၀,၀၀၀ ညါလီၤ. ၁၁ တကးဒံးဘၣ် ပှၤက့ၤစိာ်ဝဲ ကစၢ်ယွၤ အတလါစီဆှံ ဒီးစီၤဧ့လံၤ အဖိခွါခံဂၤ လၢအမ့ၢ် စီၤဃၤဖနံ ဒီးစီၤဖံၤနဃၣ်န့ၣ် သံဝဲလီၤ.+
၁၂ ဖဲနံၤအဝဲန့ၣ် ပှၤပိာ်ခွါလၢ ဘံၣ်ယၤမံၣ်အဒူၣ်အကျါတဂၤ ဃ့ၢ်ကွံာ်လၢ တၢ်ဒုးပျီပူၤ ဒီးလဲၤတုၤလၢ ဝ့ၢ်ၡံလိၤလီၤ. အဆ့ကၤညာ်ကွံာ် ဒီးဟီၣ်ခိၣ်ကမူၣ် အိၣ်လၢအခိၣ်လိၤလီၤ.+ ၁၃ ဒီးစီၤဧ့လံၤ ဘၣ်ယိၣ်တၢ်လၢ ယွၤလၢအမ့ၢ်အတီတဂၤ အတလါစီဆှံ+ အဂီၢ်ဒိၣ်မးအဃိ အဝဲဆ့ၣ်နီၤ အိၣ်ခိးတၢ်လၢ အလီၢ်ဆ့ၣ်နီၤ လၢကျဲကပၤ ဒီးကွၢ်စိတၢ်လီၤ. ဖဲပှၤပိာ်ခွါတဂၤန့ၣ် လဲၤတုၤဝဲအခါ အဝဲလဲၤနုာ်လၢ ဝ့ၢ်ပူၤ ဒီးတဲဘၣ်ဝဲ တၢ်ကစီၣ် ဒီးပှၤဝ့ၢ်ဖိခဲလၢာ် ကိးပသူထီၣ်ဝဲလီၤ. ၁၄ ဖဲစီၤဧ့လံၤ နၢ်ဟူဝဲ ပှၤကိးပသူထီၣ်အခါ အဝဲ သံကွၢ်ဝဲလၢ “ဘၣ်မနုၤအဃိ ပှၤကိးပသူထီၣ် ဒ်အံၤလဲၣ်.” ဒီးပှၤပိာ်ခွါတဂၤန့ၣ် ကရီလဲၤနုာ်လီၤတဲဘၣ် စီၤဧ့လံၤ တၢ်ကစီၣ်လီၤ. ၁၅ (ခဲအံၤ စီၤဧ့လံၤ အသးနံၣ်အိၣ်ဝဲ ၉၈ နံၣ်လံ ဒီးအမဲာ်ချံ တထံၣ်တၢ်လၢၤဘၣ်.)+ ၁၆ ဒီးပိာ်ခွါတဂၤန့ၣ် တဲဘၣ် စီၤဧ့လံၤလၢ “ယမ့ၢ် ပှၤတဂၤလၢ အဃ့ၢ်ထီၣ်ကွံာ်လၢ တၢ်ဒုးပျီအပူၤလီၤ. ယဟဲဃ့ၢ်ထီၣ်ကွံာ် လၢတၢ်ဒုးပျီန့ၣ် တနံၤညါအံၤလီၤ.” ဝံၤဒီးစီၤဧ့လံၤ သံကွၢ်ဝဲလၢ “ဖိခွါဧၢ, တၢ်ကဲထီၣ်သးဒ်လဲၣ်.” ၁၇ ပှၤလၢအဟဲစိာ် တၢ်ကစီၣ်တဂၤန့ၣ် တဲဝဲလၢ “ပှၤဖလ့ၡသးဖိ မၤနၢၤ ဒီးမၤသံဝဲ ပှၤအံၣ်စရ့လးဖိ အါအါဂီၢ်ဂီၢ်အဃိ+ ပှၤအံၣ်စရ့လးဖိ ဃ့ၢ်ထီၣ်ကွံာ်လၢ ပှၤဖလ့ၡသးဖိ အမဲာ်ညါလီၤ. ဒီးနဖိခွါ စီၤဃၤဖနံ ဒီးစီၤဖံၤနဃၣ် ခံဂၤန့ၣ် သံစ့ၢ်ကီးလံ.+ ဒီးပှၤက့ၤစိာ်ဝဲ ယွၤလၢအမ့ၢ်အတီတဂၤ အတလါစီဆှံလံ.”+
၁၈ ဖဲပှၤတဂၤန့ၣ် ယၢၤထီၣ် ယွၤလၢအမ့ၢ်အတီတဂၤ အတၢ်အၢၣ်လီၤအီလီၤအတလါ အခါ စီၤဧ့လံၤ လၢအဆ့ၣ်နီၤလၢ အလီၢ်ဆ့ၣ်နီၤန့ၣ် လီၤတဲာ်လၢ အလီၢ်ခံတကပၤ လၢတြဲၤအဃၢၤ တဘျီဃီလီၤ. ဒီးခီဖျိလၢ အသးပှၢ် ဒီးအဘီၣ်ဝဲအဃိ အကိာ်ဘိကၢ် ဒီးသံဝဲလီၤ. အဝဲစံၣ်ညီၣ် န့ၢ်တၢ်လၢ အံၣ်စရ့လးအဂီၢ် အနံၣ် ၄၀ လီၤ. ၁၉ ဒီးစီၤဧ့လံၤ အဒဲၣ်မုၣ် လၢအမ့ၢ် စီၤဖံၤနဃၣ် အမါန့ၣ် ဒၢဝဲဘူးထီၣ်လၢ အကအိၣ်ဖျဲၣ်ထီၣ် အဖိလီၤ. ဖဲအဝဲနၢ်ဟူလၢ ပှၤက့ၤစိာ် ယွၤလၢအမ့ၢ်အတီတဂၤ အတၢ်အၢၣ်လီၤအီလီၤ အတလါ ဒီးအမံၤပှၢ် ဒီးအဝၤသံဝဲအဂ့ၢ်အခါ အဝဲသကူးလီၤအသး ခီဖျိလၢ အဟုးဆါထီၣ်သတူၢ်ကလာ်အဃိ ဒီးအိၣ်ဖျဲၣ်ထီၣ်အဖိလီၤ. ၂၀ ဒီးဖဲအဝဲဘူးထီၣ် ကသံအခါ ပိာ်မုၣ်လၢ အဆၢထၢၣ်လၢ အကပၤတဂၤ တဲအီၤလၢ “နအိၣ်ဖျဲၣ်ထီၣ် ဖိခွါတဂၤအဃိ ဘၣ်ယိၣ်တၢ်တဂ့ၤ.” ဘၣ်ဆၣ် အဝဲတကနၣ်ဃုာ်ဝဲဘၣ် ဒီးတစံးဆၢအီၤ တၢ်နီတမံၤဘၣ်. ၂၁ ဒီးအဝဲကိးန့ၢ် အဖိအမံၤလၢ စီၤအံကဘိး*+ ဒီးတဲဝဲလၢ “တၢ်လၤကပီၤ ဟးထီၣ်ကွံာ်လၢ အံၣ်စရ့လးအအိၣ်လံ.”+ အတၢ်ကတိၤ တဖျၢၣ်အံၤန့ၣ် ဘၣ်ထွဲလိာ်သးဒီး ပှၤက့ၤစိာ်ကွံာ် ယွၤလၢအမ့ၢ်အတီတဂၤ အတလါစီဆှံ ဒီးတၢ်မၤအသးဒီး အမံၤပှၢ် ဒီးအဝၤအဂ့ၢ်လီၤ.+ ၂၂ အဝဲတဲဝဲလၢ “မ့ၢ်လၢ ပှၤက့ၤစိာ်ကွံာ် ယွၤလၢအမ့ၢ်အတီတဂၤ အတလါစီဆှံအဃိ တၢ်လၤကပီၤ ဟးထီၣ်ကွံာ်လၢ အံၣ်စရ့လးအအိၣ်လံ.”+