၂ ၡမူၤအ့လး
၁၀ လၢခံ ပှၤဧၣ်မိၣ်ဖိ+ အစီၤပၤသံဝဲ ဒီးအဖိခွါ စီၤဃၤနူၣ် ထီၣ်စီၤပၤလၢ အလီၢ်လီၤ.+ ၂ ဒီးစီၤဒၤဝံး တဲဝဲလၢ “ယကပာ်ဖျါထီၣ် တၢ်အဲၣ်လၢ အတီလၢ စီၤနၤဃၣ် အဖိခွါ စီၤဃၤနူၣ် အဖီခိၣ် ဒ်အပၢ်ပာ်ဖျါထီၣ်တ့ၢ် တၢ်အဲၣ်လၢအတီလၢ ယဖီခိၣ်အသိးလီၤ.” အဃိ စီၤဒၤဝံး မၢအခ့အပှၤတဖၣ် လဲၤမၤမုာ်ထီၣ်က့ၤ စီၤဃၤနူၣ်အသး ခီဖျိလၢ အပၢ်သံအဃိလီၤ. ဘၣ်ဆၣ် ဖဲစီၤဒၤဝံး အခ့အပှၤတဖၣ် လဲၤနုာ်လီၤလၢ ပှၤဧၣ်မိၣ်ဖိ အကီၢ်ပူၤအခါ ၃ ပှၤဧၣ်မိၣ်ဖိ အခိၣ်အနၢ်တဖၣ် တဲဘၣ် အကစၢ် စီၤဃၤနူၣ်လၢ “မ့ၢ်နဆိကမိၣ်လၢ စီၤဒၤဝံး ဆှၢလီၤ အခ့အပှၤတဖၣ်အံၤ ခီဖျိလၢ အအဲၣ်ဒိး မၤလၤကပီၤ နပၢ်အနီၢ်ကီၢ်ဧါ. နီၢ်ကီၢ်န့ၣ် စီၤဒၤဝံး ဆှၢလီၤ အခ့အပှၤတဖၣ် လၢနအိၣ် ခီဖျိလၢ အဝဲအဲၣ်ဒိး ဃုသ့ၣ်ညါ ဝ့ၢ်အဂ့ၢ် ဒ်တၢ်မဲာ်ချံအသိး ဒီးမၤနၢၤဝ့ၢ်အဃိ, တမ့ၢ်ဧီၤ.” ၄ အဃိ စီၤဃၤနူၣ် ဖီၣ်န့ၢ် စီၤဒၤဝံး အခ့အပှၤတဖၣ် ဒီးလူၤကွံာ်ဝဲ အနိးဆူၣ်ခၣ်ဆူၣ် တကပၤ+ ဒီးကူးတဲာ်ဝဲ အဝဲသ့ၣ် အဆ့ကၤ စးထီၣ်လၢအခံကိၢ် ဒီးပျဲက့ၤအဝဲသ့ၣ်လီၤ. ၅ ဖဲပှၤတဲဘၣ် စီၤဒၤဝံး တၢ်ဂ့ၢ်အံၤအခါ တဘျီဃီန့ၣ် စီၤဒၤဝံး ဆှၢလီၤဝဲ ပိာ်ခွါတဖၣ် ဒ်သိးကလဲၤထံၣ်လိာ်သးဒီး အခ့အပှၤတဖၣ်, မ့ၢ်လၢ အခ့အပှၤတဖၣ်အံၤ ဘၣ်တၢ်မၤမဲာ်ဆှးအီၤ ဒိၣ်မးအဃိလီၤ. စီၤပၤတဲဘၣ် အခ့အပှၤတဖၣ်လၢ “အိၣ်လၢ ဝ့ၢ်ယရံၤဃိအပူၤ+ တုၤလၢ သုနိးဆူၣ်ခၣ်ဆူၣ် ထီၣ်ကဒါက့ၤမး ဟဲက့ၤတက့ၢ်.”
၆ လၢခံ ပှၤဧၣ်မိၣ်ဖိ သ့ၣ်ညါဝဲလၢ စီၤဒၤဝံး သးဟ့ အဝဲသ့ၣ်အဃိ အဝဲသ့ၣ် ဆှၢလီၤပှၤလၢ ကလဲၤငါန့ၢ် သုးဖိအဂၤ ၂၀,၀၀၀ လၢအမ့ၢ် ပှၤစူၤရံဖိလၢ ဘ့ၤသရဃိာ်+ ဒီးပှၤစူၤရံဖိလၢ စိဘၤ အဘီမုၢ်+ ဒီးမၤကၤ အစီၤပၤ+ ဒီးအပှၤအဂၤ ၁,၀၀၀ ဒီးအံၡတိာ် အဘီမုၢ် အသုးအဂၤ ၁၂,၀၀၀ လီၤ.+ ၇ ဖဲစီၤဒၤဝံး နၢ်ဟူဝဲ တၢ်ဂ့ၢ်အံၤအခါ အဝဲဆှၢလီၤ စီၤယိၤအာ် ဒီးအသုးမုၢ်ဒီတဖု ဃုာ်ဒီး ပှၤသုးဖိလၢ အဂံၢ်ဆူၣ်ဘါဆူၣ် ကတၢၢ်တဖၣ်လီၤ.+ ၈ ဒီးပှၤဧၣ်မိၣ်ဖိတဖၣ် လဲၤထီၣ် ဆီလီၤအသးလၢ ဝ့ၢ်အတြဲၤအခီၣ်ထံးလီၤ. ဒီးဖဲန့ၣ်အခါ ပှၤစူၤရံဖိတဖၣ်လၢ အဟဲလၢ စိဘၤ အဘီမုၢ် ဒီးဝ့ၢ်ရဃိာ် ဃုာ်ဒီးသုးဖိလၢ အဟဲလၢ အံၡတိာ် အဘီမုၢ် ဒီးမၤကၤအဘီမုၢ်န့ၣ် အိၣ်ဝဲလၢ တၢ်ပျီပူၤလီၤ.
၉ ဖဲစီၤယိၤအာ် ထံၣ်ဝဲ အဒုၣ်အဒါ အသုးမုၢ်တဖၣ် ဟဲထီၣ်သဖှိ ဒုးအီၤလၢ အမဲာ်ညါမ့ၢ်ဂ့ၤ အလီၢ်ခံမ့ၢ်ဂ့ၤအခါ အဝဲဃုထၢထီၣ် အသုးဖိလၢ အဂ့ၤကတၢၢ်လၢ အံၣ်စရ့လးအပူၤ ဒီးမၢအဝဲသ့ၣ် လဲၤထီၣ်ဆီလီၤသး ဒ်သိးကဒုးဝဲ ပှၤစူၤရံဖိလီၤ.+ ၁၀ ဒီးအဝဲ ပာ်လီၤဝဲ အသုးလၢအဂၤတဖၣ်လၢ အဒီပုၢ်ဝဲၢ် စီၤအဘံၡဲၤ+ အစုပူၤ ဒ်သိးအဝဲသ့ၣ် ကလဲၤထီၣ်ဆီလီၤအသး ဒီးဒုးဝဲပှၤဧၣ်မိၣ်ဖိ အဂီၢ်လီၤ.+ ၁၁ ဒီးအဝဲတဲဝဲလၢ “ပှၤစူၤရံဖိတဖၣ် အဂံၢ်အဘါ မ့ၢ်ဆူၣ်တလၢ လၢယဂီၢ်န့ၣ် နကဘၣ် ဟဲမၤစၢၤယၤ ဒီးပှၤဧၣ်မိၣ်ဖိတဖၣ် အဂံၢ်အဘါ မ့ၢ်ဆူၣ်တလၢ လၢနဂီၢ်န့ၣ် ယကလဲၤမၤစၢၤနၤလီၤ. ၁၂ ပကဘၣ် ပာ်ဆူၣ်ပသး ဒီးအိၣ်ဒီး တၢ်သူၣ်ဒူသးဒူ+ လၢပပှၤဂီၢ်မုၢ် ဒီးပကစၢ်ယွၤ အဝ့ၢ်တဖၣ်အဂီၢ် ဒီးယဟိဝၤယွၤ ကမၤတၢ်လၢ အထံၣ်ဝဲလၢ အဂ့ၤန့ၣ်လီၤ.”+
၁၃ ဒီးစီၤယိၤအာ် ဒီးအသုးတဖၣ် လဲၤထီၣ်ဝဲ ဒ်သိးကဒုးဝဲ ပှၤစူၤရံဖိ ဒီးပှၤစူၤရံဖိတဖၣ် ဃ့ၢ်ကွံာ်ဝဲလီၤ.+ ၁၄ ဖဲပှၤဧၣ်မိၣ်ဖိတဖၣ် ထံၣ်ဝဲလၢ ပှၤစူၤရံဖိတဖၣ် ဃ့ၢ်ကွံာ်ဝဲအခါ အဝဲသ့ၣ် ဃ့ၢ်ကွံာ်ဝဲလၢ စီၤအဘံၡဲၤ အမဲာ်ညါ ဒီးက့ၤနုာ်လီၤကဒါက့ၤလၢ ဝ့ၢ်ပူၤလီၤ. စီၤယိၤအာ် ဒုးတၢ်ဒီး ပှၤဧၣ်မိၣ်ဖိ ဝံၤအလီၢ်ခံ အဝဲဟဲက့ၤကဒါက့ၤလၢ ဝ့ၢ်ယရူၤၡလ့ၣ်လီၤ.
၁၅ ဖဲပှၤစူၤရံဖိတဖၣ် ထံၣ်ဝဲလၢ ပှၤအံၣ်စရ့လးဖိ မၤနၢၤအဝဲသ့ၣ်အခါ အဝဲသ့ၣ် ပာ်ဖှိၣ်ထီၣ်ကဒီးအသးလီၤ.+ ၁၆ အဃိ စီၤဟးဒးဧ့စ့ၢ်+ မၢပှၤကိးန့ၢ် ပှၤစူၤရံဖိတဖၣ် လၢအအိၣ်လၢ ထံကျိ* အဟီၣ်ကဝီၤလီၤ.+ အဃိ အဝဲသ့ၣ်ဟဲလၢ ဃ့လၣ် အတၢ်လီၢ် ဒီးစီၤဟးဒးဧ့စ့ၢ် အသုးမုၢ်အခိၣ် စီၤၡိဘး တီခိၣ်ရိၤမဲ အဝဲသ့ၣ်လီၤ.
၁၇ ဖဲပှၤတဲဘၣ် စီၤဒၤဝံး တၢ်ဂ့ၢ်အံၤအခါ တဘျီဃီန့ၣ် စီၤဒၤဝံး ကိးဖှိၣ်အံၣ်စရ့လး အသုးခဲလၢာ် ဒီးအဝဲသ့ၣ် လဲၤခီဂာ်ဝဲ ထံကျိ ယၢ်ဒ့ၣ် ဒီးလဲၤတုၤဝဲလၢ ဃ့လၣ် အတၢ်လီၢ်လီၤ. ဒီးပှၤစူၤရံဖိတဖၣ် လဲၤထီၣ်ဆီလီၤအသး ဒီးဒုးဝဲစီၤဒၤဝံးလီၤ.+ ၁၈ ဘၣ်ဆၣ် ပှၤစူၤရံဖိတဖၣ် ဃ့ၢ်ကွံာ်ဝဲလၢ အံၣ်စရ့လး အမဲာ်ညါ ဒီးစီၤဒၤဝံး မၤသံဝဲ ပှၤစူၤရံဖိ အပှၤနီလ့ၣ်ကဟၣ်ဒုးသုးအဂၤ ၇၀၀ ဒီးအသုးဒိးကသ့ၣ် အဂၤ ၄၀,၀၀၀ လီၤ. ဒီးအဝဲ မၤသံကွံာ် အဝဲသ့ၣ် အသုးမုၢ်အခိၣ် စီၤၡိဘးဖဲန့ၣ်လီၤ.+ ၁၉ ဖဲစီၤပၤခဲလၢာ် လၢအမ့ၢ် စီၤဟးဒးဧ့စ့ၢ် အခ့အပှၤတဖၣ် ထံၣ်ဝဲလၢ အံၣ်စရ့လး မၤနၢၤကွံာ် အဝဲသ့ၣ်အခါ အဝဲသ့ၣ် မၤတၢ်ဃူတၢ်ဖိးဒီး အံၣ်စရ့လး ဒီးအဝဲသ့ၣ် ဒိးပၢအသးလၢ အံၣ်စရ့လး အဖီလာ်လီၤ.+ ဒီးပှၤစူၤရံဖိတဖၣ် မၤစၢၤ ပှၤဧၣ်မိၣ်ဖိ တဘူၣ်လၢၤဘၣ်.