ဖံလံးပံၤ
၃ လၢခံကတၢၢ်န့ၣ် ယဒီပုၢ်ဝဲၢ်သ့ၣ်ဧၢ, ဆဲးအိၣ်ဒီးတၢ်သးခု လၢသုမ့ၢ်ခရံာ်အပျဲၢ်အဘီၣ်တဖၣ်အဃိ တက့ၢ်.+ ဒ်သိးယကဒီသဒၢသုအဂီၢ် ယကွဲးန့ၢ်ကဒီးသုလၢ တၢ်ဂ့ၢ်လၢ ယကွဲးပာ်စၢၤန့ၣ် တကဲထီၣ် တၢ်ကီတၢ်ခဲလၢ ယဂီၢ်ဘၣ်.
၂ ပလီၢ်သုသးလၢ ပှၤလၢ အမၤအသး ဒ်ထွံၣ်တဖၣ်* အသိးတက့ၢ်. ပလီၢ်သုသးလၢ ပှၤလၢ အမၤဘၣ်ဒိပှၤဂၤတက့ၢ်. ပလီၢ်သုသးလၢ ပှၤလၢအဆီၣ်ထွဲ တၢ်ကူးတရံးတက့ၢ်.*+ ၃ ပမ့ၢ်ပှၤလၢ အဒိးတၢ်ကူးတရံးနီၢ်ကီၢ်+ ဒီးပမၤတၢ်မၤစီဆှံ ခီဖျိလၢ ကစၢ်ယွၤ အသးစီဆှံအဃိလီၤ. ပပာ်ကဖၢလၢပသးလၢ ယ့ၣ်ၡူးခရံာ်အဃိ+ ဒီးပတသန့ၤပသးလၢ တၢ်လၢအဘၣ်ထွဲဒီး နီၢ်ခိတခီဘၣ်. ၄ ဘၣ်ဆၣ် ပှၤတဂၤဂ့ၤတဂၤဂ့ၤ မ့ၢ်အဲၣ်ဒိး ပာ်ကဖၢလၢအသးလၢ တၢ်လၢအဘၣ်ထွဲဒီး နီၢ်ခိတခီန့ၣ် အလီၢ်အိၣ်လၢ ယကပာ်ကဖၢလၢ ယသးအါန့ၢ်ဒံးအီၤလီၤ. ၅ လၢဃိးနံၤတနံၤန့ၣ် ယဒိးတၢ်ကူးတရံး+ ဒီးယမ့ၢ်ပှၤအံၣ်စရ့လးဖိလၢ အလီၤစၢၤလၢ စီၤဘံၣ်ယၤမံၣ် အဒူၣ်လီၤ. ယမ့ၢ်ပှၤဧ့ၤဘြံၤဖိ ဒီးယမိၢ်ယပၢ်မ့ၢ်စ့ၢ်ကီး ပှၤဧ့ၤဘြံၤဖိလီၤ.+ ဒ်ပှၤဖၤရံၤၡဲတဂၤအသိး+ ယလူၤပိာ်ထွဲ တၢ်သိၣ်တၢ်သီ လီၤတံၢ်လီၤဆဲးလီၤ. ၆ ယသးဆူၣ်အဃိ ယမၤအၢမၤနးဘၣ် တၢ်အိၣ်ဖှိၣ်လီၤ.+ ယမၤထွဲတၢ်လၢ တၢ်သိၣ်တၢ်သီ တဲဝဲလၢအဘၣ်တဖၣ် အဃိ တၢ်ပာ်တၢ်ကမၣ်လၢယလိၤ အလီၢ်တအိၣ်ဘၣ်. ၇ ဘၣ်ဆၣ် တၢ်လၢအကဲဘျုးလၢ ယဂီၢ်တဖၣ်အံၤန့ၣ် ယပာ်အီၤဒ် တၢ်ကလီကလီအသိး လၢခရံာ်အဃိလီၤ.+ ၈ တကးဒံးဘၣ် ဖဲယထိၣ်သတြီၤ တၢ်ခဲလၢာ်ဒီး တၢ်သ့ၣ်ညါလၢ အလုၢ်ဒိၣ်ပှ့ၤဒိၣ်ကတၢၢ် ဘၣ်ဃးဒီး ယကစၢ်ယ့ၣ်ၡူးခရံာ်အဂ့ၢ် အခါ ယပာ်တၢ်ခဲလၢာ် ဒ်တၢ်ကလီကလီ အသိး အနီၢ်ကီၢ်လီၤ. လၢခရံာ်အဃိ ယပာ်တ့ၢ်ကွံာ် တၢ်ခဲလၢာ် ဒီးယပာ်တၢ်သ့ၣ်တဖၣ်အံၤ ဒ်တၢ်ကမှံၤအသိး ဒ်သိး ယကန့ၢ်ဘၣ်ခရံာ် ၉ ဒီးကဲထီၣ်အတၢ် အဂီၢ်လီၤ. အခီပညီတမ့ၢ်လၢ ယတၢ်တီတၢ်လိၤန့ၣ် ဟဲခီဖျိတၢ်မၤထွဲ စီၤမိၤၡ့ အတၢ်သိၣ်တၢ်သီဘၣ်. ယတၢ်တီတၢ်လိၤ ဟဲခီဖျိတၢ်နာ်+ ခရံာ်အဃိလီၤ.+ တၢ်တီတၢ်လိၤအံၤ ဟဲလၢကစၢ်ယွၤအအိၣ် ဒီးဒိးသန့ၤထီၣ်အသးလၢ တၢ်နာ်အဖီခိၣ်လီၤ.+ ၁၀ ယတၢ်တိာ်ပာ်န့ၣ် မ့ၢ်ဒ်သိး ယကသ့ၣ်ညါခရံာ် ဒီးအတၢ်ဂဲၤဆၢထၢၣ်သမူထီၣ်က့ၤ အစိကမီၤ အဂီၢ်လီၤ.+ ဒီးယအဲၣ်ဒိးတူၢ်ဘၣ် အတၢ်နးတၢ်ဖှီၣ်တဖၣ်+ ဒီးယအဲၣ်ဒိး သံဒ်အဝဲသံအသိးလီၤ.+ ၁၁ ဒီးယမုၢ်လၢ်လၢ ယကဂဲၤဆၢထၢၣ်သမူထီၣ်က့ၤလၢ တၢ်ဂဲၤဆၢထၢၣ် အဆိကတၢၢ်တတီၤလီၤ.+
၁၂ ယတဒိးန့ၢ်ဘၣ် ခိၣ်ဖးအံၤဒံးဘၣ်. ဒီးယတတုၤလၢ တၢ်လၢတၢ်ပှဲၤဒံးဘၣ်. ဘၣ်ဆၣ် တၢ်တမံၤလၢ ယ့ၣ်ၡူးခရံာ်ဃုထၢထီၣ်ယၤ+ လၢယကဒိးန့ၢ်ဘၣ်အီၤအဂီၢ်န့ၣ် ယဂုာ်ကျဲးစၢးလၢ အဂ့ၤကတၢၢ်+ ဒ်သိး ယကဒိးန့ၢ်ဘၣ်အီၤလီၤ. ၁၃ ဒီပုၢ်ဝဲၢ်သ့ၣ်ဧၢ, ယတဆိကမိၣ်လၢ ယမၤန့ၢ်ခိၣ်ဖးဒံးဘၣ်. ဘၣ်ဆၣ် တၢ်လၢယမၤတမံၤန့ၣ် မ့ၢ်ဝဲ ယသးပ့ၤနီၣ်ကွံာ် တၢ်လၢအပူၤကွံာ်+ ဒီးယဂုာ်ကျဲးစၢး ဒ်သိးယကတုၤဃီၤလၢ တၢ်အိၣ်လၢ ယမဲာ်ညါအဂီၢ်လီၤ.+ ၁၄ ယဂုာ်ကျဲးစၢး အဂ့ၤကတၢၢ်လၢ ယကတုၤလၢဖီတၢၣ် ဒ်သိးယကဒိးန့ၢ်ဘၣ် ခိၣ်ဖးလၢ+ ကစၢ်ယွၤအအိၣ်လီၤ. ခိၣ်ဖးအံၤမ့ၢ်ဝဲ တၢ်အိၣ်မူလၢမူခိၣ်+ လၢကစၢ်ယွၤဟ့ၣ်လီၤဝဲ ခီဖျိ ယ့ၣ်ၡူးခရံာ်လီၤ. ၁၅ အဃိ ပဝဲလၢ အဒိၣ်တုာ်ခိၣ်ပှဲၤတဖၣ်+ မ်ပအိၣ်ဒီး တၢ်ပာ်သူၣ်ပာ်သး ဒ်တၢ်ပာ်ဖျါအီၤလၢထးအသိးတက့ၢ်. ဒီးသုမ့ၢ် တဆိကမိၣ်တၢ် ဒ်အံၤဘၣ်န့ၣ် ကစၢ်ယွၤ ကမၤစၢၤသုလၢ သုကဆိကမိၣ်တၢ် ဒ်န့ၣ်လီၤ. ၁၆ ဒ်လဲၣ်ဂ့ၤဒ်လဲၣ်ဂ့ၤ ပလဲၤထီၣ်လဲၤထီပာ်စၢၤထဲလဲၣ် သနာ်က့ မ်ပဆဲးလဲၤထီၣ်လဲၤထီ ဒ်န့ၣ်ဆူညါတက့ၢ်.
၁၇ ဒီပုၢ်ဝဲၢ်သ့ၣ်ဧၢ, သုဝဲခဲလၢာ် ကြၢးကွၢ်လိမၤဒိးယၤလီၤ.+ ဒီးကွၢ်လိမၤဒိးပှၤလၢ အအိၣ်မူပိာ်ထွဲဝဲ တၢ်ဒိတၢ်တဲာ်လၢ ပပာ်လီၤန့ၢ်သုတဖၣ် န့ၣ်တက့ၢ်. ၁၈ ပှၤလၢ အတပာ်ကဲခရံာ် အတၢ်သံလၢ တၢ်မၤအၢမၤနး အသ့ၣ်တၢၣ်လိၤ* ဘၣ်န့ၣ် အိၣ်ဝဲအါဂၤလီၤ. လၢညါ ယယၢၤထီၣ်အဝဲသ့ၣ် အဂ့ၢ်တလီၢ်လီၢ် ဘၣ်ဆၣ် ခဲအံၤန့ၣ် ယယၢၤထီၣ် အဝဲသ့ၣ်အဂ့ၢ်လၢ တၢ်မဲာ်ထံမဲာ်နိအပူၤလီၤ. ၁၉ လၢခံကတၢၢ်န့ၣ် အဝဲသ့ၣ်ကတုၤလၢ တၢ်ဟးဂီၤ ဒီးအဝဲသ့ၣ်အယွၤန့ၣ် မ့ၢ်ဝဲအတၢ်သူၣ်လီသးကွံလီၤ.* တၢ်သ့ၣ်တဖၣ်လၢ အဝဲသ့ၣ်ကြၢးမဲာ်ဆှး လၢအဃိန့ၣ် အဝဲသ့ၣ် ပာ်ကဖၢလၢအသး လၢအဃိလီၤ. ဒီးအဝဲသ့ၣ် ဆိကမိၣ်ထဲတၢ်လၢ အဘၣ်ထွဲဒီးဟီၣ်ခိၣ်လီၤ.+ ၂၀ ဘၣ်ဆၣ် ပဝဲသ့ၣ်တဖၣ် ပမ့ၢ်မူခိၣ်အထံဖိကီၢ်ဖိ+ ဒီးလၢတၢ်သးဆူၣ်အပူၤ ပခိးကွၢ်လၢ် တၢ်အုၣ်က့ၤခီၣ်က့ၤကစၢ် လၢအဟဲလၢမူခိၣ်+ လၢအမ့ၢ် ကစၢ်ယ့ၣ်ၡူးခရံာ်လီၤ.+ ၂၁ အဝဲကဆီတလဲ ပနီၢ်ခိလၢအဂံၢ်စၢ်ဘါစၢ်အံၤ ဒ်သိးကလီၤဂာ်ဒီး အနီၢ်ကစၢ်အမိၢ်ပှၢ်လၢ အအိၣ်ဒီးအလၤကပီၤ+ ခီဖျိအစိဒိၣ်ကမီၤထီ အဃိလီၤ. ဒီးလၢအတၢ်စိတၢ်ကမီၤအံၤအဃိ အဝဲပာ်လီၤတၢ်ခဲလၢာ်လၢ အနီၢ်ကစၢ် အဖီလာ်သ့ဝဲလီၤ.+