ဧ့စြၤ

၇ တၢ်မၤအသးဒ်န့ၣ်​ ဝံၤအလီၢ်ခံ ဖဲဖၢၡၢၣ်​ အစီၤပၤ အၢ်တၤၡါၡတၤ+ ပၢတၢ်အစိၤန့ၣ်​ စီၤဧ့စြၤ*+ ဟဲက့ၤဝဲလီၤ. စီၤဧ့စြၤမ့ၢ် စီၤစရါယၤ အဖိခွါ, စီၤစရါယၤ+ မ့ၢ်စီၤဧစၤရယၤ အဖိခွါ, စီၤဧစၤရယၤမ့ၢ် စီၤဃံးလကံယၤ အဖိခွါ,+ ၂ စီၤဃံးလကံယၤမ့ၢ် စီၤၡၤလူၣ်​ အဖိခွါ, စီၤၡၤလူၣ်မ့ၢ် စီၤစၤဒိး အဖိခွါ, စီၤစၤဒိးမ့ၢ် စီၤအဃံးတူာ် အဖိခွါ, ၃ စီၤအဃံးတူာ်မ့ၢ် စီၤအမၤရယၤ အဖိခွါ, စီၤအမၤရယၤမ့ၢ် စီၤဧစၤရယၤ အဖိခွါ,+ စီၤဧစၤရယၤမ့ၢ် စီၤမရၤယိး အဖိခွါ, ၄ စီၤမရၤယိးမ့ၢ် စီၤစရၤဃယၤ အဖိခွါ, စီၤစရၤဃယၤမ့ၢ် စီၤဧူၤစံ အဖိခွါ, စီၤဧူၤစံမ့ၢ် စီၤဘူးကံၤ အဖိခွါ, ၅ စီၤဘူးကံၤမ့ၢ် စီၤအဘံၤၡူ အဖိခွါ, စီၤအဘံၤၡူမ့ၢ် စီၤဖံၤနဃၣ်​ အဖိခွါ,+ စီၤဖံၤနဃၣ်မ့ၢ် စီၤအလၤဧစၢ် အဖိခွါ,+ စီၤအလၤဧစၢ်မ့ၢ် ပှၤလုၢ်တၢ်ဒိၣ်အခိၣ်​ စီၤအၤဟရိၣ်​ အဖိခွါလီၤ.+ ၆ စီၤဧ့စြၤ လၢအအိၣ်လၢ ဘၤဘူၤလိၣ်​ တဂၤအံၤ ဟဲက့ၤဝဲလီၤ. အမ့ၢ်ဝဲ ပှၤကွဲးကူ ယွၤအကလုၢ်ကထါ* ဒီးအမ့ၢ် ပှၤတဂၤလၢ အသ့* စီၤမိၤၡ့ အတၢ်သိၣ်တၢ်သီလၢ+ အံၣ်စရ့လးအကစၢ် ယဟိဝၤယွၤ ဟ့ၣ်လီၤဝဲလီၤ. ဒီးမ့ၢ်လၢ ယဟိဝၤယွၤ အိၣ်ဒီး စီၤဧ့စြၤအဃိ စီၤပၤဟ့ၣ်လီၤအီၤ တၢ်လၢအဃ့ဝဲ ခဲလၢာ်လီၤ.

၇ ဖဲစီၤပၤ အၢ်တၤၡါၡတၤ ပၢတၢ် နွံနံၣ်တနံၣ်န့ၣ်​ ပှၤအံၣ်စရ့လးဖိတနီၤ, ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်,+ ပှၤသးဝံၣ်တၢ်တဖၣ်,+ ပှၤခိးတြဲၤဖိတဖၣ်+ ဒီးတၢ်လုၢ်ဟံၣ်​ အခ့အပှၤတဖၣ်*+ ဟဲက့ၤဝဲလၢ ဝ့ၢ်ယရူၤၡလ့ၣ်လီၤ. ၈ ဖဲစီၤပၤပၢတၢ် နွံနံၣ်တနံၣ်, လါယဲၢ်လါတလါန့ၣ်​ စီၤဧ့စြၤ ဟဲက့ၤတုၤဝဲလၢ ဝ့ၢ်ယရူၤၡလ့ၣ်လီၤ. ၉ ဒီးမ့ၢ်လၢ ကစၢ်ယွၤ လၢအသးဂ့ၤတဂၤ အိၣ်ဒီးအီၤအဃိ+ အဝဲဟးထီၣ်လၢ ဘၤဘူၤလိၣ်​ ဖဲလါအဆိကတၢၢ်တလါ, လါထီၣ်တသီ ဒီးဟဲက့ၤတုၤလၢ ဝ့ၢ်ယရူၤၡလ့ၣ်​ ဖဲလါယဲၢ်လါတလါ, လါထီၣ်တသီလီၤ. ၁၀ စီၤဧ့စြၤန့ၣ်​ မ့ၢ်ပှၤလၢ အကတဲာ်ကတီၤ ပာ်စၢၤအသး* ဒ်သိး အကဃုသ့ၣ်ညါဝဲ ယဟိဝၤယွၤ အတၢ်သိၣ်တၢ်သီ ဒီးကမၤထွဲဝဲအဂီၢ်+ ဒီးဒ်သိး အကသိၣ်လိ ပှၤအံၣ်စရ့လးဖိတဖၣ်လၢ တၢ်ဘျၢတဖၣ်​ ဒီးတၢ်စံၣ်ညီၣ်ဆၢတဲာ်တဖၣ်လၢ အအိၣ်လၢ ယွၤအတၢ်သိၣ်တၢ်သီ အပူၤလီၤ.+

၁၁ စီၤဧ့စြၤန့ၣ်​ မ့ၢ်ဝဲပှၤလုၢ်တၢ်ဒိၣ်​ လၢအကွဲးကူ ယွၤအကလုၢ်ကထါလီၤ.* ဒီးဘၣ်ဃးဒီး တၢ်ဃုသ့ၣ်ညါ ယဟိဝၤယွၤ အတၢ်မၤလိာ်တဖၣ်​ ဒီးအတၢ်ဘျၢတဖၣ်လၢ ပှၤအံၣ်စရ့လးဖိအဂီၢ်န့ၣ်​ အဝဲမ့ၢ် ပှၤသ့ပှၤဘၣ်​ မူာ်နီၢ်တဂၤလီၤ.* ဒီးလံာ်ပရၢတဘ့ၣ်လၢ စီၤပၤ အၢ်တၤၡါၡတၤ ဟ့ၣ်လီၤဝဲ စီၤဧ့စြၤန့ၣ်​ ဘၣ်တၢ်ပာ်ဖျါထီၣ်အီၤ ဒ်လၢလာ်အံၤ အသိးလီၤ.

၁၂ “ယၤ, စီၤပၤအၢ်တၤၡါၡတၤ+ လၢအမ့ၢ် စီၤပၤတဖၣ်​ အစီၤပၤန့ၣ်​ ကွဲးလံာ်ဆူ ပှၤလုၢ်တၢ်ဒိၣ်​ စီၤဧ့စြၤ လၢအကွဲးကူ မူခိၣ်အကစၢ် အတၢ်သိၣ်တၢ်သီ အအိၣ်လီၤ. စီၤဧ့စြၤဧၢ, မ်တၢ်မုာ်တၢ်ခုၣ်​ အိၣ်ဒီးနၤတက့ၢ်. ၁၃ ယဟ့ၣ်လီၤ တၢ်ကလုၢ်လၢ ပှၤအံၣ်စရ့လးဖိ လၢအအိၣ်လၢ ယဘီယမုၢ်ပူၤ ခဲလၢာ် ဒီးအဝဲသ့ၣ်​ အပှၤလုၢ်တၢ်ဒိၣ်​ ဒီးပှၤလ့ၤဝံဖိတဖၣ်​ လၢအသးအိၣ်က့ၤပိာ်နခံလၢ ဝ့ၢ်ယရူၤၡလ့ၣ်န့ၣ်​ က့ၤဝဲသ့လီၤ.+ ၁၄ စီၤပၤ မၢလီၤနၤ ဒီးအပှၤဟ့ၣ်ကူၣ်တၢ်နွံဂၤ ဒ်သိး သုကက့ၤဃုသ့ၣ်ညါတၢ်လၢ ယူဒၤ ဒီးဝ့ၢ်ယရူၤၡလ့ၣ်အပူၤန့ၣ်​ မ့ၢ်ပှၤမၤထွဲဝဲ နကစၢ်ယွၤ အတၢ်သိၣ်တၢ်သီ လၢအအိၣ်ဒီးနၤဧါ ပှၤတမၤထွဲဝဲဘၣ်ဧါန့ၣ်လီၤ. ၁၅ ဒီးနကဘၣ်က့ၤစိာ် ထူဒီးစ့ညၣ်လၢ စီၤပၤဒီး အပှၤဟ့ၣ်ကူၣ်တၢ်တဖၣ်​ ဟ့ၣ်လီၤဝဲလီၤ. အဝဲသ့ၣ်​ ဟ့ၣ်လီၤဝဲ တၢ်သ့ၣ်တဖၣ်အံၤ လၢအံၣ်စရ့လး အကစၢ်ယွၤ လၢအအိၣ်ဆိးဝဲလၢ ယရူၤၡလ့ၣ်အပူၤ တဂၤအဂီၢ် လၢတၢ်သးအိၣ်အပူၤလီၤ. ၁၆ ဒီးနဘၣ်က့ၤစိာ် ထူဒီးစ့ညၣ်လၢ နဒိးန့ၢ်ဘၣ်အီၤ လၢဘၤဘူၤလိၣ်​ အကီၢ်ရ့ၣ်လီၤ. ဒီးပှၤဂီၢ်မုၢ်တဖၣ်​ ဒီးပှၤလုၢ်တၢ်ဒိၣ်တဖၣ်​ အတၢ်ဟ့ၣ်လၢ အဝဲသ့ၣ်​ ဟ့ၣ်လီၤဝဲလၢ တၢ်သးအိၣ်အပူၤ လၢအဝဲသ့ၣ်​ အကစၢ်ယွၤအဟံၣ်​ လၢယရူၤၡလ့ၣ်အဂီၢ်န့ၣ်​ နကဘၣ်က့ၤစိာ်အီၤလီၤ.+ ၁၇ နကဘၣ်ဟံးန့ၢ်စ့အံၤ ဒီးနကဘၣ်​ ပှ့ၤကျီၢ်ဖါတဖၣ်,+ သိဖါတဖၣ်+ ဒီးသိဖိတဖၣ်+ ဃုာ်ဒီး တၢ်လုၢ်ဘု+ ဒီးစပံးထံလၢ တၢ်လုၢ်တၢ်ပာ်အဂီၢ်+ လၢအဆိအချ့လီၤ. ဒီးနကဘၣ်​ လုၢ်ထီၣ်အီၤလၢ တၢ်လုၢ်လီၢ်လၢ အအိၣ်လၢ သုကစၢ်ယွၤအဟံၣ်လၢ ဝ့ၢ်ယရူၤၡလ့ၣ်​ အပူၤလီၤ.

၁၈ “ဒ်တၢ်လၢနၤဒီး ပှၤလုၢ်တၢ်ဒိၣ်အဂၤတဖၣ်​ ဆိကမိၣ်လၢ အဂ့ၤအသိးန့ၣ်​ ထူဒီးစ့ညၣ်လၢ အအိၣ်တ့ၢ်တဖၣ်န့ၣ်​ သုသူအီၤဒ် တၢ်ဘၣ်သုကစၢ်ယွၤအသးအသိး သ့ဝဲလီၤ. ၁၉ ဒီးတၢ်ပီးတၢ်လီခဲလၢာ် လၢပှၤဟ့ၣ်လီၤ လၢနစုပူၤ လၢပှၤကသူအီၤလၢ နကစၢ်ယွၤ အဟံၣ်အဂီၢ်န့ၣ်​ နကဘၣ်က့ၤစိာ်အီၤလၢ ကစၢ်ယွၤအမဲာ်ညါလၢ ဝ့ၢ်ယရူၤၡလ့ၣ်လီၤ.+ ၂၀ ဒီးတၢ်လိၣ်တၢ်လဲး အဂၤလၢ နကစၢ်ယွၤ အဟံၣ်အဂီၢ် လၢနကဘၣ်​ ဟ့ၣ်လီၤအီၤတဖၣ်န့ၣ်​ နထုးထီၣ်ဟ့ၣ်လီၤအီၤလၢ စီၤပၤ အတၢ်လုၢ်ဒိၣ်ပှ့ၤဒိၣ်အကျါ သ့လီၤ.+

၂၁ “ယၤ, စီၤပၤအၢ်တၤၡါၡတၤ ဟ့ၣ်လီၤတၢ်ကလုၢ်လၢ ပှၤပၢၤစ့လၢ အအိၣ်လၢ ဟီၣ်ကဝီၤလၢ ထံကျိ* ဝၢ်ဘးခီ ကိးဂၤဒဲးအအိၣ်လီၤ. တၢ်လၢ ပှၤလုၢ်တၢ်ဒိၣ်​ စီၤဧ့စြၤ+ လၢအကွဲးကူ မူခိၣ်အကစၢ် အတၢ်သိၣ်တၢ်သီတဂၤ ဃ့သုတဖၣ်န့ၣ်​ သုကဘၣ်ဟ့ၣ်လီၤအီၤ တဘျီဃီလီၤ. ၂၂ သုကဘၣ်​ ဟ့ၣ်လီၤအီၤတုၤလၢ စ့ညၣ်​ အတၤလၣ်* ၁၀၀, ဘုကၠူၣ်​ အကိၢ်* ၁၀၀, စပံးထံ အဘၤသၤ* ၁၀၀,+ သိ အဘၤသၤ ၁၀၀+ ဒီးအံသၣ်+ ဖဲအဝဲသ့ၣ်​ လိၣ်ဘၣ်ဝဲလီၤ. ၂၃ တၢ်လၢမူခိၣ်အကစၢ် မၤလိာ်ဝဲ ကိးမံၤဒဲး လၢဘၣ်ဃးဒီး အဟံၣ်န့ၣ်​ မ်ပှၤမၤဝံၤအီၤ လၢတၢ်သူၣ်ဆူၣ်သးဆူၣ်​ အပူၤတက့ၢ်. ပှၤကဘၣ်မၤဒ်န့ၣ်​ ဒ်သိးမူခိၣ်အကစၢ်+ သုတသးဒိၣ်ထီၣ်​ စီၤပၤအဘီအမုၢ် ဒီးအဖိခွါတဖၣ်​ တဂ့ၤအဂီၢ်လီၤ.+ ၂၄ ယဒုးသ့ၣ်ညါသုလၢ လၢပှၤလုၢ်တၢ်ဒိၣ်, ပှၤလ့ၤဝံဖိတဖၣ်, ပှၤဒ့တၢ်အူတၢ်တဖၣ်,+ ပှၤခိးတြဲၤဖိတဖၣ်, တၢ်လုၢ်ဟံၣ်​ အခ့အပှၤတဖၣ်*+ ဒီးပှၤလၢအမၤတၢ်လၢ ကစၢ်ယွၤအဟံၣ်​ အအိၣ်န့ၣ်​ သုတဘၣ်ဃ့ တၢ်ခိတၢ်သွဲ+ နီတမံၤဘၣ်.

၂၅ “စီၤဧ့စြၤဧၢ, မ့မ့ၢ်နၤန့ၣ်​ သူနတၢ်ကူၣ်သ့လၢ နကစၢ်ယွၤ ဟ့ၣ်လီၤနၤ ဒီးပာ်ထီၣ်​ ကမျၢၢ်အပဒိၣ်တဖၣ်​ ဒီးစံၣ်ညီၣ်ကွီၢ်တဖၣ်​ ဒ်သိး အဝဲသ့ၣ်​ ကစံၣ်ညီၣ်န့ၢ်တၢ်လၢ ပှၤကိးဂၤဒဲးလၢ အအိၣ်လၢ ထံကျိဝၢ်ဘးခီ လၢအသ့ၣ်ညါ နကစၢ်ယွၤ အတၢ်သိၣ်တၢ်သီတဖၣ်​ အဂီၢ်န့ၣ်တက့ၢ်. မ့မ့ၢ် ပှၤလၢ အတသ့ၣ်ညါ တၢ်သိၣ်တၢ်သီတဖၣ်အံၤ ဒံးဘၣ်န့ၣ်​ နကဘၣ်​ သိၣ်လိအဝဲသ့ၣ်လီၤ.+ ၂၆ ပှၤလၢ အတမၤထွဲ နကစၢ်ယွၤ အတၢ်သိၣ်တၢ်သီ ဒီးစီၤပၤ အတၢ်သိၣ်တၢ်သီဘၣ်န့ၣ်​ ကဘၣ်တၢ်စံၣ်ညီၣ်အီၤ တဘျီဃီလီၤ. အဝဲသ့ၣ်​ ကဘၣ်တၢ်မၤသံအီၤ မ့တမ့ၢ် နီဟးထီၣ်ကွံာ်အီၤလၢ ထံကီၢ်အပူၤ မ့တမ့ၢ် ကဘၣ်တၢ်အီၣ်လိးအီၤ မ့တမ့ၢ် ကဘၣ်တၢ်ထၢနုာ်အီၤ လၢဃိာ်ပူၤလီၤ.”

၂၇ ပမိၢ်ပၢ်ဖံဖု လၢပျၢၤတဖၣ်​ အကစၢ် ယဟိဝၤယွၤန့ၣ်​ မ်အဘၣ်​ တၢ်စံးထီၣ်ပတြၢၤအီၤတက့ၢ်. အဝဲ ထိၣ်ဟူးထိၣ်ဂဲၤထီၣ်​ စီၤပၤ ဒ်သိး ကမၤဃံမၤလၤထီၣ်က့ၤ ယဟိဝၤယွၤ အဟံၣ်လၢ ဝ့ၢ်ယရူၤၡလ့ၣ်လီၤ.+ ၂၈ ခီဖျိလၢ အတၢ်အဲၣ်လၢအတီလၢ ယဖီခိၣ်အဃိ+ အဝဲမၤဝဲဒ်သိး စီၤပၤ ဒီးစီၤပၤအပှၤဟ့ၣ်ကူၣ်တၢ်တဖၣ်+ ဒီးစီၤပၤ အပဒိၣ်ပပှၢ်လၢ အစိအကမီၤဒိၣ်တဖၣ်​ ကဘၣ်သူၣ်ဘၣ်သးယၤလီၤ. ဒီးမ့ၢ်လၢ ယဟိဝၤယွၤ အိၣ်ဒီးယၤအဃိ ယပာ်ဒူထီၣ်ယသး ဒီးယပာ်ဖှိၣ်ထီၣ်​ အံၣ်စရ့လး အပှၤခိၣ်ပှၤနၢ်တနီၤ ဒ်သိးအဝဲသ့ၣ်​ ကက့ၤဒီးယၤ အဂီၢ်လီၤ.