ယဃ့းစက့လး
၂၈ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တဲဘၣ်ဝ့ၢ်စိၢ် အခိၣ်အနၢ်တဂၤလၢ ‘တၢ်ပၢကစၢ် ယဟိဝၤယွၤ တဲဝဲလၢ
“မ့ၢ်လၢ နပာ်ထီၣ်ထီနသးအဃိ+ နတဲလၢ နမ့ၢ်ယွၤတဂၤ
ဒီးနတဲလၢ နဆ့ၣ်နီၤလၢ ယွၤအလီၢ်ပစိာ် လၢပီၣ်လဲၣ် အခၢၣ်သးလီၤ.+
နဆိကမိၣ်လီၤနသးလၢ နမ့ၢ်ယွၤတဂၤ
ဘၣ်ဆၣ် နမ့ၢ်ဒၣ် ပှၤကညီတဂၤလီၤ. နတမ့ၢ်ယွၤဘၣ်.
၃ နဆိမိၣ်လီၤနသးလၢ နကူၣ်တၢ်သ့ဒိၣ်န့ၢ်ဒံး စီၤဒၤနံးယ့လး+
ဒီးတၢ်တအိၣ်ခူသူၣ်လၢ နမဲာ်ညါ နီတမံၤဘၣ်လီၤ.
၄ နမၤကဲဒိၣ်ထီၣ်နသး ခီဖျိလၢ နတၢ်ကူၣ်သ့ ဒီးနတၢ်သူၣ်ဆးသးဆးအဃိလီၤ.
ဒီးနဆဲးပာ်ဖှိၣ် ထူဒီးစ့ လၢနတၢ်လုၢ်ဒိၣ်ပှ့ၤဒိၣ် အလီၢ်လီၤ.+
၅ နမၤတၢ်ဆါတၢ်ပှ့ၤ အတၢ်မၤသ့မး အဃိနထူးထီၣ်တီၤထီၣ် ဒိၣ်မးလီၤ.+
ဒီးခီဖျိလၢ နထူးနတီၤအဃိ နပာ်ထီၣ်ထီနသးလီၤ.”’
၆ “‘တၢ်ပၢကစၢ် ယဟိဝၤယွၤ တဲဝဲလၢ
“နဆိမိၣ်လီၤနသးလၢ နကဲ ယွၤတဂၤအဃိ
၇ ယကဆှၢလီၤ ပှၤထံဂၤကီၢ်ဂၤဖိတဖၣ် လၢအမ့ၢ် ပှၤတကလုာ်လၢ အသူၣ်အၢသးသီ ဒိၣ်ကတၢၢ် ဒ်သိး ကဟဲထီဒါနၤ အဂီၢ်လီၤ.+
အဝဲသ့ၣ် ကထုးထီၣ်အနးတဖၣ် ဒီးတၢ်ဃံတၢ်လၤ လၢအအိၣ်ဒီးနၤ ခီဖျိလၢ နတၢ်ကူၣ်သ့အဃိန့ၣ် အဝဲသ့ၣ် ကမၤဟးဂီၤကွံာ်ဝဲ ခဲလၢာ်လီၤ.
ဒီးကမၤဟးဂီၤ နတၢ်လၤကပီၤ လၢအကဟုကညီၢ်တဖၣ်လီၤ.+
၈ အဝဲသ့ၣ် ကတွံၢ်လီၤနၤဆူ တၢ်သွၣ်ခိၣ်အပူၤ
ဒီးနကဘၣ်သံ ဆှုၣ်မဲာ်ကဲၤမဲာ် လၢ ပီၣ်လဲၣ် အခၢၣ်သးလီၤ.+
၉ မ့ၢ်နကတဲပှၤလၢ အကမၤသံနၤတဂၤန့ၣ်လၢ နမ့ၢ်ယွၤတဂၤဧါ.
လၢပှၤလၢ အကမၤဟးဂီၤနၤ အတၢ်ထံၣ်န့ၣ် နမ့ၢ်ဒၣ် ပှၤကညီတဂၤလီၤ, နတမ့ၢ် ယွၤတဂၤဘၣ်.”’
၁၀ တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢ ယတဲဝံၤလံအဃိ နကဘၣ်သံလၢ ပှၤထံဂၤကီၢ်ဂၤဖိ အစုပူၤ
ဒ်ပှၤလၢ အတဒိး တၢ်ကူးတရံးတဂၤ သံဝဲအသိးလီၤ.’”
၁၁ ကစၢ်ယဟိဝၤယွၤ တဲယၤလၢ ၁၂ “ပှၤကညီဖိခွါဧၢ, သးဝံၣ်ထါဟီၣ်တယုၢ်လၢ ဝ့ၢ်စိၢ်အစီၤပၤအဂီၢ် ဒီးတဲအီၤလၢ ‘တၢ်ပၢကစၢ် ယဟိဝၤယွၤ တဲဝဲလၢ
၁၃ ဒီးနအိၣ်လၢ ဧ့ၤဒ့ၣ် လၢအမ့ၢ် ကစၢ်ယွၤ အတၤသၣ်လီၢ် အပူၤလီၤ.
နဘၣ်တၢ်မၤဃံမၤလၤထီၣ်နၤဒီး လၢၢ်လၢ အလုၢ်ဒိၣ်ပှ့ၤဒိၣ်ကိးမံၤဒဲး လၢအမ့ၢ်
တၢ်မျၢ်ဆီသွံၣ်, တၢ်မျၢ်ဘီအူးသပးယၢ်, တၢ်မျၢ်နကၤသွဲး,
တၢ်မျၢ်ဘီလါ, တၢ်မျၢ်မဟူယၤ, တၢ်မျၢ်ဂီၤလုး, တၢ်မျၢ်နံၤလါအဲး, တၢ်မျၢ်လါလုး+ ဒီးတၢ်မျၢ်လါဟ့လီၤ.
ဒီးလၢၢ်တဖၣ်န့ၣ် ဘၣ်တၢ်ကျီၤဃာ်အီၤဒီး ထူလီၤ.
ယကတဲာ်ကတီၤပာ်စၢၤ တၢ်သ့ၣ်တဖၣ်န့ၣ် ဖဲယတ့လီၤနၤ အမုၢ်နံၤလီၤ.
၁၄ ယဃုထၢထီၣ်နၤ ဒီးယဒိးဖှူနၤ ဒ်ခ့ရူာ်လၢ အဒီသဒၢတၢ်အသိးလီၤ.
နအိၣ်လၢ ကစၢ်ယွၤ အကစၢၢ်စီဆှံအလိၤ+ ဒီးနဟးလၢ လၢၢ်မ့ၣ်အူတဖၣ် အကျါလီၤ.
၁၅ စးထီၣ်လၢ တၢ်တ့လီၤနၤ အမုၢ်နံၤ ဒီးတချုးလၢ နစးထီၣ်မၤ တၢ်တတီတလိၤဒံးဘၣ်န့ၣ်
လၢနတၢ်မၤခဲလၢာ်အပူၤ နမ့ၢ်ပှၤလၢ အတၢ်ကမၣ် တအိၣ်ဘၣ်လီၤ.+
အဃိ ယကဟီထီၣ်ကွံာ်နၤ လၢကစၢ်ယွၤ အကစၢၢ် ဒ်နမ့ၢ် ပှၤလၢအဘၣ်အၢအသိး ဒီးယကမၤ ဟးဂီၤကွံာ်နၤလီၤ.+
အိ ခ့ရူာ်လၢ အဒီသဒၢတၢ်ဧၢ, ယကနီဟးထီၣ်ကွံာ်နၤ လၢလၢၢ်မ့ၣ်အူတဖၣ် အိၣ်ဝဲအလီၢ်လီၤ.
၁၇ ခီဖျိလၢ နတၢ်ဃံတၢ်လၤအဃိ နပာ်ထီၣ်ထီနသးလီၤ.+
ဒီးနမၤဟးဂီၤလီၤ နတၢ်ကူၣ်သ့ ခီဖျိ နတၢ်လၤကပီၤ လၢအကဟုကညီၢ်တဖၣ်အဃိလီၤ.+
အဃိ ယကကွံာ်လီၤနၤလၢ ဟီၣ်ခိၣ်လိၤ+
ဒီးယကဒုးကဲထီၣ်နၤလၢ စီၤပၤတဖၣ် အတၢ်ကွၢ်ကီ အလီၢ်လီၤ.
၁၈ ခီဖျိလၢ နအိၣ်ဒီး တၢ်ကမၣ်ဖးဒိၣ် ဒီးနမၤတၢ်ဆါတၢ်ပှ့ၤအတၢ်မၤ လၢအတတီတလိၤဘၣ်အဃိ နမၤဘၣ်အၢ နတၢ်ဘူၣ်ထီၣ်ဘါထီၣ် တၢ်အလီၢ်တဖၣ်လီၤ.
ယကဒွဲၣ်ထီၣ်မ့ၣ်အူ လၢနပူၤ ဒီးမ့ၣ်အူ ကအီၣ်ကွံာ်နၤလီၤ.+
ဒီးလၢပှၤလၢ အကွၢ်နၤခဲလၢာ် အမဲာ်ညါန့ၣ် ယကဒုးကဲထီၣ်က့ၤနၤလၢဖၣ်ဆါကမူၣ် လၢဟီၣ်ခိၣ်လိၤလီၤ.
၁၉ ပှၤလၢအသ့ၣ်ညါနၤန့ၣ် ကကွၢ်စိဃီၤနၤ ဒီးကကမၢကမၣ် ဒိၣ်မးလီၤ.+
တၢ်လီၤပျံၤလီၤဖုး ကဟဲဘၣ်နၤ သတူၢ်ကလာ် ဒီးနကျဲကကတၢၢ် ဖဲန့ၣ်
ဒီးနကတုၤလၢ တၢ်ဟးဂီၤ လီၤထူလီၤယိာ်လီၤ.”’”+
၂၀ ကစၢ်ယဟိဝၤယွၤ တဲယၤလၢ ၂၁ “ပှၤကညီဖိခွါဧၢ, ဃၣ်နမဲာ်လၢ ဝ့ၢ်စံဒိၣ်+ အအိၣ် ဒီးတဲဝံအတၢ်စံးပာ်လၢ အထီဒါအီၤတက့ၢ်. ၂၂ နကဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ
“ဝ့ၢ်စံဒိၣ်ဧၢ, ယကဲထီၣ် နဒုၣ်နဒါလံ, ယကဒိးန့ၢ်ဘၣ် တၢ်လၤကပီၤ ခီဖျိလၢ တၢ်လၢအကဟဲကဲထီၣ်အသးဒီးနၤအဃိလီၤ.
ဖဲယစံၣ်ညီၣ်နၤ ဒီးယဘၣ်တၢ်ပာ်စီဆှံယၤ လၢနဃိအခါ ပှၤကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.
၂၃ ယကဆှၢလီၤ တၢ်ဆါသံသတြိာ် လၢနအိၣ် ဒီးတၢ်သွံၣ် ကယွၤလီၤလၢ နကျဲတဖၣ်အပူၤလီၤ.
ဖဲနးတဖၣ် ဟဲထီဒါနၤ ကိးကပၤဒဲးအခါ ပှၤကလီၤဃံၢ်သံလၢ နပူၤလီၤ.
ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.+
၂၄ “‘“ဖဲန့ၣ်အခါ ပှၤလၢအလီၤဂာ်ဒ်သိးဒီး တၤဆှုၣ်တၤမဲလၢ အဘၣ်ဆဲးတၢ် ဒီးတၤဆှုၣ်တၤမဲလၢ အမၤဆါတၢ် လၢအဆိကမိၣ်ဆံး ပှၤအံၣ်စရ့လးဖိတဖၣ်န့ၣ် တအိၣ်ဝးတရံး ပှၤအံၣ်စရ့လးဖိတဖၣ်လၢၤဘၣ်.+ ဒီးပှၤကသ့ၣ်ညါဘၣ်လၢ ယမ့ၢ် တၢ်ပၢကစၢ် ယဟိဝၤယွၤလီၤ.”’
၂၅ “‘တၢ်ပၢကစၢ် ယဟိဝၤယွၤ တဲဝဲလၢ “ဖဲယပာ်ဖှိၣ်ထီၣ်က့ၤ ပှၤအံၣ်စရ့လးဖိတဖၣ်လၢ အလီၤပြံလီၤပြါ လၢကီၢ်အဂၤတဖၣ်အခါ+ ယကဘၣ် တၢ်ပာ်စီဆှံယၤလၢ ပှၤကလုာ်တဖၣ် အမဲာ်ညါလီၤ.+ ဒီးပှၤအံၣ်စရ့လးဖိတဖၣ် ကအိၣ်ဘၣ်ဝဲလၢ အနီၢ်ကစၢ်အကီၢ်+ လၢအမ့ၢ်ကီၢ်လၢ ယဟ့ၣ်လီၤ ယခ့ယပှၤ စီၤယၤကိာ်လီၤ.+ ၂၆ အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢဖဲန့ၣ်+ ဒီးကသူၣ်ထီၣ်ဟံၣ်တဖၣ် ဒီးကသူၣ်လီၤ စပံးကျီးတဖၣ်လီၤ.+ ဒီးဖဲယစံၣ်ညီၣ် ပှၤလၢအအိၣ်ဝးတရံးအဝဲသ့ၣ် လၢအဆိကမိၣ်ဆံးအဝဲသ့ၣ် အခါ အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢလီၤ.+ ဒီးအဝဲသ့ၣ် ကသ့ၣ်ညါဘၣ်လၢ ယမ့ၢ် အဝဲသ့ၣ် အကစၢ် ယဟိဝၤယွၤလီၤ.”’”