လူၤကၣ်

၁၀ တၢ်သ့ၣ်တဖၣ်န့ၣ်​ ဝံၤအလီၢ်ခံ ကစၢ်ယ့ၣ်ၡူး ဃုထၢထီၣ်ဝဲ ပှၤအဂၤ ၇၀ ဒီးဆှၢလီၤဆိ အဝဲသ့ၣ်​ ခံဂၤခံဂၤ+ ဒ်သိးကလဲၤဝဲလၢ ဝ့ၢ်ကိးဖျၢၣ်ဒဲး ဒီးတၢ်လီၢ်ခဲလၢာ်လၢ ယ့ၣ်ၡူးအနီၢ်ကစၢ် ကလဲၤဝဲလီၤ. ၂ ယ့ၣ်ၡူးတဲ အဝဲသ့ၣ်လၢ “နီၢ်ကီၢ်န့ၣ်​ တၢ်လၢပှၤကဘၣ်ကူးအီၤန့ၣ်​ အိၣ်ဝဲအါမး ဘၣ်ဆၣ်​ ပှၤမၤတၢ်ဖိန့ၣ်​ အိၣ်ထဲစှၤဂၤလီၤ. အဃိ ဃ့ကညး စံာ်ကစၢ်လၢ အကဆှၢလီၤဝဲ ပှၤမၤတၢ်ဖိတဖၣ်​ ဒ်သိး ကဟဲကူးတၢ်အဂီၢ်တက့ၢ်.+ ၃ ယကဆှၢလီၤသု ဒ်သိဖိလၢ ထွံၣ်မံၤအကျါအဃိ လဲၤတၢ် ဒီးအိၣ်ဒီး တၢ်ပလီၢ်သးတက့ၢ်.+ ၄ စ့ထၢၣ်မ့ၢ်ဂ့ၤ, တၢ်အီၣ်တၢ်အီထၢၣ်မ့ၢ်ဂ့ၤ, ခီၣ်ဖံးမ့ၢ်ဂ့ၤ တဘၣ်လဲၤစိာ်တဂ့ၤ.+ တဘၣ်ဆၢဂ့ၤဆၢဝါပှၤလၢ ကျဲနီတဂၤတဂ့ၤ. ၅ ဖဲသုလဲၤနုာ်လီၤလၢ ဟံၣ်ပူၤအခါ အဆိကတၢၢ်န့ၣ်​ တဲလၢ ‘မ်တၢ်ဃူတၢ်ဖိးအိၣ်ဒီး ဟံၣ်တဖျၢၣ်အံၤ တက့ၢ်.’+ ၆ ပှၤလၢ အအဲၣ်တၢ်ဃူတၢ်ဖိး မ့ၢ်အိၣ်ဖဲန့ၣ်န့ၣ်​ သုတၢ်ဃူတၢ်ဖိး ကအိၣ်ဒီးအီၤလီၤ. ဘၣ်ဆၣ်​ မ့ၢ်တအိၣ်ဖဲန့ၣ်ဘၣ်န့ၣ်​ သုတၢ်ဃူတၢ်ဖိး ကဟဲက့ၤကဒါလၢ သုအိၣ်လီၤ. ၇ ပှၤလၢ အအဲၣ်တၢ်ဃူတၢ်ဖိး မ့ၢ်အိၣ်ဖဲန့ၣ်န့ၣ်​ အိၣ်ဖဲဟံၣ်တဖျၢၣ်န့ၣ်+ ဒီးအီၣ်တၢ်အီတၢ်လၢ အဝဲသ့ၣ်​ ကတဲာ်ကတီၤန့ၢ်သုတက့ၢ်.+ ပှၤမၤတၢ်ဖိန့ၣ်​ ကြၢးန့ၢ်ဘၣ်​ အဘူးအလဲလီၤ.+ တဘၣ်လဲၤ သုးသုသးလၢ ဟံၣ်တဖျၢၣ်ဝံၤ တဖျၢၣ်တဂ့ၤ.

၈ “တကးဒံးဘၣ်​ ဖဲသုလဲၤနုာ်လီၤလၢ ဝ့ၢ်တဖျၢၣ်ဂ့ၤ တဖျၢၣ်ဂ့ၤအခါ အဝဲသ့ၣ်​ မ့ၢ်တူၢ်လိာ်သုန့ၣ်​ အီၣ်တၢ်လၢ အပာ်လီၤန့ၢ်သုတက့ၢ်. ၉ ဒီးမၤဘျါကွံာ် ပှၤဆိးက့လၢ အအိၣ်ဖဲန့ၣ်တဖၣ်​ ဒီးတဲအဝဲသ့ၣ်လၢ ‘ကစၢ်ယွၤ အဘီအမုၢ် ဟဲဘူးထီၣ်လံ.’+ ၁၀ ဘၣ်ဆၣ်​ ဖဲသုလဲၤနုာ်လီၤလၢ ဝ့ၢ်တဖျၢၣ်ဂ့ၤ တဖျၢၣ်ဂ့ၤအခါ အဝဲသ့ၣ်​ မ့ၢ်တတူၢ်လိာ်သုဘၣ်န့ၣ်​ လဲၤထီၣ်လၢ ကျဲမုၢ်လၢ အအိၣ်ဖဲန့ၣ်တဖၣ်အပူၤ ဒီးတဲလၢ ၁၁ ‘ဟီၣ်ခိၣ်ကမူၣ်လၢ သုဝ့ၢ်ပူၤလၢ အဘုးတာ်ဒီး ပခီၣ်ဒၣ်လဲာ် ပထွါကွံာ်အီၤလံ.+ ဘၣ်ဆၣ်​ သုကဘၣ်သ့ၣ်ညါလၢ ကစၢ်ယွၤ အဘီအမုၢ်န့ၣ်​ ဟဲဘူးထီၣ်လံ.’ ၁၂ ယကတဲဘၣ်သုလၢ ဝ့ၢ်တဖျၢၣ်အံၤ ကဘၣ်​ တၢ်စံၣ်ညီၣ်အီၤ နးန့ၢ်ဒံး ဝ့ၢ်စဒိၣ်လီၤ.+

၁၃ “ပှၤဃၤရၤစံၣ်ဖိသ့ၣ်ဧၢ, ကလီၤသးအုးလၢ သုဂီၢ်ထဲလဲၣ်. ပှၤဘ့ၤသစဲဒၤဖိသ့ၣ်ဧၢ, ကလီၤသးအုးလၢ သုဂီၢ်ထဲလဲၣ်. တၢ်လီၤလးတဖၣ်လၢ ဘၣ်တၢ်မၤအီၤလၢ သုဝ့ၢ်ပူၤ မ့ၢ်ဘၣ်​ တၢ်မၤတ့ၢ်အီၤလၢ ဝ့ၢ်စိၢ်ဒီးစံဒိၣ်အပူၤန့ၣ်​ အဝဲသ့ၣ်​ ကသိးထီၣ်ဝဲ ထၢၣ်တၢ်ကံးညာ် ဒီးကဆ့ၣ်နီၤဝဲလၢ ဖၣ်ဆါအကျါ+ ဒီးကပီၢ်ယၢ်လီၤက့ၤအသး ဖးယံာ်လံ. ၁၄ အဃိ သုကဘၣ်​ တၢ်စံၣ်ညီၣ်သု နးန့ၢ်ဒံး ဝ့ၢ်စိၢ်ဒီးစံဒိၣ်လီၤ. ၁၅ ပှၤကပ့းရနီၣ်ဖိသ့ၣ်ဧၢ, မ့ၢ်သုကဘၣ်​ တၢ်ပာ်ထီၣ်ထီသုလၢ မူခိၣ်ဧါ. လၢတၢ်န့ၣ်အလီၢ် သုကလဲၤလီၤလၢ တၢ်သွၣ်ခိၣ်* အပူၤလီၤ.

၁၆ “ပှၤလၢ အဒိကနၣ်သုန့ၣ်​ မ့ၢ်အဒိကနၣ်ယၤလီၤ.+ ပှၤလၢ အတကနၣ်ဃုာ် သုဘၣ်န့ၣ်​ မ့ၢ်အတကနၣ်ဃုာ်ယၤ စ့ၢ်ကီးဘၣ်. တကးဒံးဘၣ်​ ပှၤလၢ အတကနၣ်ဃုာ် ယၤဘၣ်န့ၣ်​ မ့ၢ်အတကနၣ်ဃုာ် ပှၤလၢအဆှၢလီၤယၤ တဂၤန့ၣ်​ စ့ၢ်ကီးဘၣ်.”+

၁၇ ဒီးပှၤအဂၤ ၇၀ န့ၣ်ဟဲက့ၤဝဲ ပှဲၤဒီးတၢ်သးခု ဒီးတဲဝဲလၢ “ကစၢ်ဧၢ, မ့ၢ်လၢ ပသူနမံၤအဃိ တၢ်ဝံတၢ်နါတဖၣ်​ ဒၣ်လဲာ် ဘၣ်အိၣ်လၢ ပဖီလာ်လီၤ.”+ ၁၈ ယ့ၣ်ၡူးတဲဘၣ်​ အဝဲသ့ၣ်လၢ “ယထံၣ်ဆိပာ်စၢၤ မုၣ်ကီၤလံၢ်* လီၤတဲာ်လၢ+ မူခိၣ်​ ချ့ဝဲထဲသိးဒီး လီဝၢ်ဒံးအသိးလံ. ၁၉ ဒီးယဟ့ၣ်လီၤသု တၢ်စိတၢ်ကမီၤ ဒ်သိး သုကယီၢ်ဂုၢ်ဒီး ပတ့ၤချဲး ဒီးဒ်သိး သုကမၤနၢၤဒုၣ်ဒါ အစိအကမီၤ ခဲလၢာ်အဂီၢ်လီၤ.+ တၢ်လၢ ကမၤဘၣ်ဒိသု တအိၣ်နီတမံၤဘၣ်. ၂၀ ဘၣ်ဆၣ်​ တဘၣ်သးခုလၢ တၢ်ဝံတၢ်နါတဖၣ်​ ဘၣ်အိၣ်လၢ သုဖီလာ်အဃိတဂ့ၤ. သးခုခီဖျိလၢ သုမံၤ ဘၣ်တၢ်ကွဲးလီၤအီၤလၢ မူခိၣ်အဃိတက့ၢ်.”+ ၂၁ ဖဲန့ၣ်အခါ ခီဖျိလၢ သးစီဆှံအဃိ ယ့ၣ်ၡူးသးခုဖးဒိၣ်ညါ ဒီးတဲဝဲလၢ “မူခိၣ်​ ဒီးဟီၣ်ခိၣ်အကစၢ် ပၢ်ဧၢ, မ့ၢ်လၢ နပာ်ဖျါထီၣ်န့ၢ် ဖိသၣ်တဖၣ်​ လၢတၢ်ဂ့ၢ်တဖၣ်အံၤ ဘၣ်ဆၣ်​ နပာ်ခူသူၣ်အီၤဘၢဘၢ လၢပှၤကူၣ်တၢ်သ့ ဒီးပှၤလၢ အဖၠဲးတဖၣ်+ အမဲာ်ညါ အဃိ ယစံးထီၣ်ပတြၢၤနၤလၢ ပှၤမဲာ်ညါလီၤ. မ့ၢ်လီၤ ပၢ်ဧၢ, အဝဲအံၤမ့ၢ်ဝဲ တၢ်လၢ အဘၣ်နသးလီၤ.+ ၂၂ ယပၢ်ဟ့ၣ်လီၤယၤလၢ တၢ်ခဲလၢာ်လံ. ပှၤလၢအသ့ၣ်ညါ ဖိခွါ နီၢ်ကီၢ်န့ၣ်​ အိၣ်ထဲဒၣ်​ ပၢ်တဂၤလီၤ. ဒီးပှၤလၢအသ့ၣ်ညါ ပၢ်နီၢ်ကီၢ်န့ၣ်​ အိၣ်ထဲဒၣ်ဖိခွါ+ ဒီးပှၤလၢဖိခွါ အဲၣ်ဒိး ပာ်ဖျါထီၣ်န့ၢ်အီၤတဖၣ်လီၤ.”+

၂၃ ဒီးယ့ၣ်ၡူး ဃၣ်ဃီၤအသးလၢ အပျဲၢ်အဘီၣ်တဖၣ်အအိၣ်​ ဒီးတဲအဝဲသ့ၣ်လၢ တၢ်ခူသူၣ်အပူၤလၢ “ပှၤလၢ အထံၣ်တၢ်လၢ သုထံၣ်တဖၣ်န့ၣ်​ ကသးခုဝဲလီၤ.+ ၂၄ ယကတဲဘၣ်သုလၢ ဝံဒီးစီၤပၤအါဂၤ ဆၢထံၣ်ဝဲ တၢ်လၢသုထံၣ်ဘၣ်တဖၣ်​ ဘၣ်ဆၣ်​ တထံၣ်ဘၣ်ဝဲဘၣ်.+ ဒီးအဝဲသ့ၣ်​ ဆၢနၢ်ဟူဝဲတၢ်လၢ သုနၢ်ဟူဘၣ်တဖၣ်​ ဘၣ်ဆၣ်​ တနၢ်ဟူဘၣ်ဝဲဘၣ်.”

၂၅ ဒီးပှၤတဂၤလၢအသ့ စီၤမိၤၡ့ အတၢ်သိၣ်တၢ်သီန့ၣ်​ ဂဲၤဆၢထၢၣ်ဒ်သိး ကမၤကွၢ်ယ့ၣ်ၡူး ဒီးတဲဝဲလၢ “သရၣ်ဧၢ, ဒ်သိး ယကဒိးန့ၢ်ဘၣ်​ တၢ်မူအထူအယိာ်အဂီၢ် ယကဘၣ်​ မၤမနုၤလဲၣ်.”+ ၂၆ ယ့ၣ်ၡူး တဲဘၣ်အီၤလၢ “တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီအပူၤ အိၣ်ဒ်လဲၣ်. နဖးအီၤန့ၣ်​ နနၢ်ပၢၢ်ဒ်လဲၣ်.” ၂၇ အဝဲတဲဆၢဝဲလၢ “‘နကဘၣ်အဲၣ်​ နကစၢ် ယဟိဝၤယွၤ* လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ, လၢနဂံၢ်နဘါခဲလၢာ်, လၢနတၢ်ကူၣ်တၢ်ဆးခဲလၢာ်’+ ဒီး ‘နကဘၣ်အဲၣ်​ ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.’”+ ၂၈ ယ့ၣ်ၡူးတဲအီၤလၢ “နတဲတၢ်န့ၣ်​ ဘၣ်လီၤ. ဆဲးမၤဒ်န့ၣ်​ ဒီးနကန့ၢ်ဘၣ်​ တၢ်မူလီၤ.”+

၂၉ ဘၣ်ဆၣ်​ အဝဲအဲၣ်ဒိး ပာ်တီပာ်လိၤအသးအဃိ+ အဝဲတဲဘၣ်​ ယ့ၣ်ၡူးလၢ “ပှၤလၢယဃၢၤ အနီၢ်ကီၢ်န့ၣ်​ မ့ၢ်မတဂၤလဲၣ်.” ၃၀ ယ့ၣ်ၡူးတဲဆၢဝဲလၢ “ဖဲပှၤတဂၤအိၣ်ဟဲလီၤလၢ ယရူၤၡလ့ၣ်​ ဒီးလဲၤဝဲလၢ ဝ့ၢ်ယရံၤဃိအခါ ပှၤတမျာ်အီၤလီၤ. ပှၤဘ့ၣ်လီၤကွံာ် အကူအသိး, ပှၤဟံးန့ၢ်ကွံာ် အတၢ်ဖိတၢ်လံၤ ဒီးပှၤတီၢ်အီၤတုၤလၢ အဘူးကသံ ဒီးပာ်တ့ၢ်ကွံာ်အီၤ ဖဲန့ၣ်လီၤ. ၃၁ ဒီးဘၣ်အတီၤလၢ ပှၤလုၢ်တၢ်ဒိၣ်တဂၤ လဲၤလီၤဝဲလၢ ကျဲတဘိန့ၣ်​ ဒီးဖဲအထံၣ်စိဝဲ ပှၤတဂၤန့ၣ်အခါ အလဲၤဝဲလၢ ကျဲအဝဲတကပၤ ဒီးလဲၤတလၢကွံာ်အီၤလီၤ. ၃၂ ဒ်န့ၣ်အသိး ဖဲပှၤလ့ၤဝံဖိတဂၤ ဟဲတုၤလၢ တၢ်လီၢ်အဝဲန့ၣ်အခါ အထံၣ်ဝဲ ပှၤတဂၤန့ၣ်​ ဘၣ်ဆၣ်​ အလဲၤဝဲလၢ ကျဲအဝဲတကပၤ ဒီးလဲၤတလၢကွံာ်အီၤ စ့ၢ်ကီးလီၤ. ၃၃ ဘၣ်ဆၣ်​ ဖဲပှၤၡၤမရံဖိတဂၤ+ လဲၤဝဲလၢ ကျဲတဘိန့ၣ်​ ဒီးတုၤလၢ ပှၤတဂၤန့ၣ်အအိၣ်​ အခါ ပှၤၡၤမရံဖိတဂၤအံၤ သးကညီၤဘၣ်အီၤလီၤ. ၃၄ အဃိ အဝဲလဲၤလၢအအိၣ်, လူလီၤသိ ဒီးစပံးထံလၢ အတၢ်ပူၤလီၢ်အလိၤ ဒီးဘိၣ်ဘံထီၣ်ဝဲလီၤ. ဝံၤဒီးအဝဲပာ်ထီၣ်အီၤလၢ အနီၢ်ကစၢ် အဆၣ်ဖိကီၢ်ဖိအလိၤ ဒီးလဲၤဆှၢအီၤလၢ ပှၤတမှံၤအဟံၣ်​ ဒီးကွၢ်ထွဲအီၤလီၤ. ၃၅ လၢခံတနံၤ အဝဲထုးထီၣ်​ စ့ဒန့ၤရံၤ* ခံဘ့ၣ်​ ဒီးဟ့ၣ်လီၤဝဲ ပှၤတမှံၤအဟံၣ်ကစၢ် ဒီးတဲဝဲလၢ ‘ကွၢ်ထွဲအီၤ ဒီးတၢ်လၢာ်ဘူၣ်လၢာ်စ့ၤ မ့ၢ်လၢာ်အါန့ၢ်ဒံး ထဲအံၤန့ၣ်​ ဖဲယဟဲက့ၤအခါ ယကလိးက့ၤနၤနီၤ.’ ၃၆ အဃိ လၢပှၤသၢဂၤအံၤအကျါ မ့ၢ်နဆိကမိၣ်လၢ မတဂၤအဲၣ်​ ပှၤလၢအဃၢၤ+ လၢအဘၣ်တၢ်တမျာ်အီၤ တဂၤအံၤလဲၣ်.” ၃၇ အဝဲတဲဝဲလၢ “ပှၤလၢ အပာ်ဖျါထီၣ်​ တၢ်သးကညီၤလၢ ပှၤလၢအဘၣ်​ တၢ်တမျာ်အီၤတဂၤ အဖီခိၣ်လီၤ.”+ ယ့ၣ်ၡူးတဲအီၤလၢ “က့ၤမၤ ဒ်န့ၣ်တက့ၢ်.”+

၃၈ ဒီးအဝဲသ့ၣ်​ လဲၤဆူညါ ဒီးနုာ်လီၤဝဲလၢ သဝီတဖျၢၣ်အပူၤလီၤ. ဖဲန့ၣ်​ နီၢ်မၢ်သၤ+ တူၢ်လိာ်မုာ် အဝဲသ့ၣ်​ လၢအဟံၣ်ပူၤလီၤ. ၃၉ နီၢ်မၢ်သၤ အိၣ်ဒီး အဒီပုၢ်ဝဲၢ်မုၣ်​ နီၢ်မၤရံလီၤ. ဒီးနီၢ်မၤရံန့ၣ်​ ဆ့ၣ်နီၤဝဲလၢ ကစၢ်အခီၣ်ထံး ဒီးဒိကနၣ်တၢ်လၢ အတဲဝဲလီၤ. ၄၀ မ့မ့ၢ်နီၢ်မၢ်သၤန့ၣ်​ မ့ၢ်လၢ အဘၣ်ကတဲာ်ကတီၤ တၢ်အါမံၤအဃိ အသူၣ်ကိၢ်သးဂီၤတၢ်လီၤ. အဃိ အဝဲဟဲတဲယ့ၣ်ၡူးလၢ “ကစၢ်ဧၢ, ယဒီပုၢ်ဝဲၢ်မုၣ်​ တမၤစၢၤယၤ တၢ်ဘၣ်န့ၣ်​ နတပာ်လၢ တၢ်နီတမံၤဧီၤ. မၢအဝဲဟဲမၤစၢၤယၤမီၤ.” ၄၁ ကစၢ်တဲဆၢက့ၤအီၤလၢ “နီၢ်မၢ်သၤဧၢ, နီၢ်မၢ်သၤဧၢ, နဘၣ်ယိၣ်တၢ် ဒီးနသးဘၣ်တံာ်တာ်လၢ တၢ်အါမံၤအဃိလီၤ. ၄၂ ပတလိၣ်ဘၣ်​ အါအါဘၣ်, နမ့ၢ်မၤထဲ စှၤခါ မ့တမ့ၢ် ထဲတခါနာ်က့ လၢပှဲၤလံ. မ့မ့ၢ်နီၢ်မၤရံန့ၣ်​ ဃုထၢဝဲ တၢ်အဂ့ၤကတၢၢ်တမံၤ+ ဒီးပှၤတဟံးထီၣ်ကွံာ်ဝဲလၢ အအိၣ်​ နီတဂၤဘၣ်.”