မးသဲ

၉ ယ့ၣ်ၡူးဒိးထီၣ်ကဘီဒီး ခီဂာ်ဝဲပီၣ်လဲၣ်​ ဒီးက့ၤဝဲလၢ အနီၢ်ကစၢ် အဝ့ၢ်လီၤ.+ ၂ ဒီးပှၤဟဲစိာ် ပှၤလၢ အစုလီၤဘျ့ခီၣ်လီၤဘျ့လၢ အအိၣ်လၢ လီၢ်မံခိၣ်တဂၤ ဆူယ့ၣ်ၡူးအအိၣ်လီၤ. ယ့ၣ်ၡူးထံၣ်ဘၣ်ဝဲလၢ အဝဲသ့ၣ်အိၣ်ဒီး တၢ်နာ်အဃိ အဝဲတဲဘၣ်ပှၤလၢ အစုလီၤဘျ့ခီၣ်လီၤဘျ့တဂၤန့ၣ်လၢ “ဖိဧၢ, ဘၣ်ယိၣ်တၢ်တဂ့ၤ. နတၢ်ဒဲးဘးပျၢ်လံ.”+ ၃ မ့မ့ၢ် ပှၤကွဲးလံာ်ဖိတနီၤနီၤန့ၣ်​ ဆိကမိၣ်ထီၣ်ဝဲလၢ “ပှၤတဂၤအံၤ ကတိၤထီဒါ ကစၢ်ယွၤလံ.” ၄ ယ့ၣ်ၡူးသ့ၣ်ညါ အဝဲသ့ၣ်​ အတၢ်ဆိကမိၣ်အဃိ အတဲဝဲလၢ “ဘၣ်မနုၤအဃိ သုဆိကမိၣ်တၢ် အၢအၢသီသီလၢ သုသးပူၤလဲၣ်.+ ၅ အဒိ နမ့ၢ်တဲလၢ ‘နတၢ်ဒဲးဘးပျၢ်လံ’ မ့တမ့ၢ် ‘ဂဲၤဆၢထၢၣ်​ ဟးတက့ၢ်’ န့ၣ်​ ကညီဒိၣ်​ ဖဲလဲၣ်တခါလဲၣ်.+ ၆ ဘၣ်ဆၣ်​ ဒ်သိးသုကသ့ၣ်ညါလၢ ပှၤကညီဖိခွါအံၤ အိၣ်ဒီးတၢ်စိတၢ်ကမီၤလၢ ကပျၢ်တၢ်ဒဲးဘးလၢ ဟီၣ်ခိၣ်ချၢအဂီၢ်—” ဝံၤဒီး အဝဲတဲဘၣ်ပှၤလၢ အစုလီၤဘျ့ခီၣ်လီၤဘျ့တဂၤန့ၣ်လၢ “ဂဲၤဆၢထၢၣ်, စိာ်ထီၣ်နလီၢ်မံ ဒီးက့ၤလၢနဟံၣ်နီၤ.”+ ၇ ဒီးအဝဲဂဲၤဆၢထၢၣ်​ ဒီးက့ၤလၢ အဟံၣ်လီၤ. ၈ ဖဲပှၤဂီၢ်မုၢ်တဖၣ်​ ထံၣ်ဝဲ တၢ်မၤအသးအံၤအခါ အဝဲသ့ၣ်ပျံၤတၢ် ဒီးမၤလၤကပီၤ ကစၢ်ယွၤလၢ အဟ့ၣ်လီၤ တၢ်စိတၢ်ကမီၤဒ်အံၤလၢ ပှၤဟီၣ်ခိၣ်ဖိ အအိၣ်အဃိလီၤ.

၉ ဖဲယ့ၣ်ၡူး ဟးထီၣ်ကွံာ်ဖဲန့ၣ်အခါ အဝဲထံၣ်စိဝဲ စီၤမးသဲဆ့ၣ်နီၤလၢ တၢ်ခိတၢ်သွဲအရူလီၤ. ဒီးယ့ၣ်ၡူး တဲအီၤလၢ “ဟဲပိာ်ယခံတက့ၢ်.” ဒီးအဝဲဂဲၤဆၢထၢၣ်​ ပိာ်ထီၣ်အခံလီၤ.+ ၁၀ လၢခံ ဖဲယ့ၣ်ၡူးအီၣ်တၢ်* လၢစီၤမးသဲ အဟံၣ်ပူၤအခါ ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိအါဂၤ ဟဲအီၣ်တၢ်ဒီး ယ့ၣ်ၡူး ဒီးအပျဲၢ်အဘီၣ်တဖၣ်လီၤ.+ ၁၁ ဖဲပှၤဖၤရံၤၡဲတဖၣ်​ ထံၣ်ဝဲဒ်န့ၣ်အခါ အဝဲသ့ၣ်တဲ ယ့ၣ်ၡူးအပျဲၢ်အဘီၣ်တဖၣ်လၢ “ဘၣ်မနုၤအဃိ သုသရၣ်​ အီၣ်တၢ်ဒီး ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိတဖၣ်လဲၣ်.”+ ၁၂ ဖဲယ့ၣ်ၡူး နၢ်ဟူဝဲဒ်န့ၣ်အခါ အတဲဆၢက့ၤ အဝဲသ့ၣ်လၢ “ပှၤလၢ အအိၣ်ဆူၣ်အိၣ်ချ့န့ၣ်​ တလိၣ်ဘၣ်​ ကသံၣ်သရၣ်ဘၣ်. ဘၣ်ဆၣ်​ ပှၤလၢအဆိးက့တဖၣ်​ လိၣ်ဘၣ်ဝဲလီၤ.+ ၁၃ တၢ်ကတိၤလၢ အမ့ၢ် ‘လၢပှၤကလုၢ်ထီၣ်​ တၢ်လုၢ်တၢ်ပာ်အလီၢ် ယအဲၣ်ဒိးလၢ ပှၤကသးကညီၤတၢ်’+ န့ၣ်လဲၤဃုသ့ၣ်ညါ အခီပညီတက့ၢ်. ယဟဲကိးက့ၤ ပှၤတၢ်ဒဲးဘးဖိ, တမ့ၢ်ပှၤတီပှၤလိၤဘၣ်.”

၁၄ ဒီးစီၤယိၤဟၣ်​ အပျဲၢ်အဘီၣ်တဖၣ်​ ဟဲလၢယ့ၣ်ၡူးအအိၣ်​ ဒီးသံကွၢ်အီၤလၢ “ပဝဲဒီးပှၤဖၤရံၤၡဲတဖၣ်​ ဒုၣ်တၢ်အီၣ်တလီၢ်လီၢ် ဘၣ်ဆၣ်​ ဘၣ်မနုၤအဃိ နပျဲၢ်နဘီၣ်တဖၣ်​ တမၤဝဲ ဒ်န့ၣ်ဘၣ်လဲၣ်.”+ ၁၅ ယ့ၣ်ၡူး တဲအဝဲသ့ၣ်လၢ “ဖဲတလးမူးပိာ်ခွါအိၣ်ဒံးဒီး+ အသကိးတဖၣ်အခါ လၢအဝဲသ့ၣ်​ ကသးအုးအဂီၢ် တၢ်ဂ့ၢ်တအိၣ်နီတမံၤဘၣ်. ဘၣ်ဆၣ်​ တၢ်ဆၢကတီၢ်လၢ တၢ်ကဟံးထီၣ်ကွံာ် တလးမူးပိာ်ခွါလၢ အဝဲသ့ၣ်အအိၣ်န့ၣ်​ ကဟဲဝဲလီၤ.+ ဖဲန့ၣ်အခါ အဝဲသ့ၣ်​ ကဒုၣ်တၢ်အီၣ်လီၤ. ၁၆ တၢ်ကံးညာ် အသီတက့န့ၣ်​ ပှၤတဆးကျးထီၣ်အီၤလၢ ဆ့ကၤအလီၢ်လံၤတဘ့ၣ်​ အလိၤနီတဂၤဘၣ်. ပှၤမ့ၢ်မၤဝဲ ဒ်န့ၣ်န့ၣ်​ တၢ်ကံးညာ်အသီ ကထုးအီၤ ဒီးဆ့ကၤအလီၢ်လံၤ ကညာ်ဒိၣ်ထီၣ်ဝဲလီၤ.+ ၁၇ ဒီးထၢၣ်တၢ်ဖံး အလီၢ်လံၤတဖျၢၣ်န့ၣ်​ ပှၤတထၢနုာ် စပံးထံအသီလၢအပူၤဘၣ်. အဝဲသ့ၣ်​ မ့ၢ်မၤဒ်န့ၣ်န့ၣ်​ ထၢၣ်တၢ်ဖံးတဖျၢၣ်အံၤ ကပိၢ်ဖး ဒီးစပံးထံ ကလီၤဆံၣ်​ ဒီးထၢၣ်န့ၣ်​ ကဟးဂီၤဝဲစ့ၢ်ကီးလီၤ. ပှၤထၢနုာ် စပံးထံအသီလၢ ထၢၣ်တၢ်ဖံး အသီအပူၤအဃိ စပံးထံမ့ၢ်ဂ့ၤ ထၢၣ်မ့ၢ်ဂ့ၤ တဟးဂီၤဘၣ်.”

၁၈ ဖဲယ့ၣ်ၡူးတဲတၢ်ဒီး အဝဲသ့ၣ်အခါ ပှၤခိၣ်ပှၤနၢ်တဂၤ ဟဲယူးယီၣ်အီၤ* ဒီးတဲအီၤလၢ “ခဲအံၤဒု ယဖိမုၣ်​ သံလံဧါသၢၤ. ဘၣ်ဆၣ်​ ဟဲပာ်ထီၣ်နစုလၢအလိၤ ဒ်သိး အကသမူထီၣ်က့ၤမီၤ.”+

၁၉ ယ့ၣ်ၡူး ဒီးအပျဲၢ်အဘီၣ်တဖၣ်​ ဂဲၤဆၢထၢၣ်ဒီး လဲၤပိာ်အခံလီၤ. ၂၀ ဖဲန့ၣ်အခါ ပိာ်မုၣ်လၢအတူၢ်ဘၣ်​ သွံၣ်လီၤတၢ်ဆါယံာ်ဝဲ ၁၂ နံၣ်တဂၤ+ ဟဲလၢယ့ၣ်ၡူးအလီၢ်ခံ ဒီးထိးဝဲ ယ့ၣ်ၡူးအဆ့ကၤအနွံ,+ ၂၁ မ့ၢ်လၢ အတဲလီၤအသးလၢ “ယမ့ၢ်ထိးဘၣ်ထဲ အဆ့ကၤန့ၣ်​ ယကဘျါက့ၤလီၤ.” ၂၂ ယ့ၣ်ၡူးဃၣ်ဃီၤအသးဒီး ထံၣ်အီၤအဃိ တဲအီၤလၢ “ဖိမုၣ်ဧၢ, ပျံၤတၢ်တဂ့ၤ. နတၢ်နာ်မၤဘျါက့ၤနၤလံ.”+ ဒီးဖဲနၣ်ရံၣ်အဝဲန့ၣ်​ ပိာ်မုၣ်အံၤ အတၢ်ဆါဘျါက့ၤဝဲလီၤ.+

၂၃ လၢခံ ဖဲယ့ၣ်ၡူးလဲၤတုၤလၢ ပှၤခိၣ်ပှၤနၢ်တဂၤန့ၣ်​ အဟံၣ်အခါ အဝဲထံၣ်​ ပှၤအူပံ ဒီးပှၤဂီၢ်မုၢ်တဖၣ်​ ဟီၣ်သီၣ်ဖးဒိၣ်လီၤ.+ ၂၄ ယ့ၣ်ၡူးတဲဝဲလၢ “ဟးထီၣ်ကွံာ်ဖဲအံၤတက့ၢ်. ပိာ်မုၣ်ဖိအံၤ တသံဘၣ်, မ့ၢ်ဒၣ်အမံလီၤ.”+ ဒီးအဝဲသ့ၣ်​ နံၤဆဲးအဲးအီၤလီၤ. ၂၅ ဖဲပှၤဂီၢ်မုၢ်တဖၣ်​ ဟးထီၣ်ကွံာ်လၢ တၢ်ချၢအခါ အဝဲလဲၤနုာ်လီၤ ဒီးဖီၣ်ထီၣ်ဝဲ ပိာ်မုၣ်ဖိအံၤအစု+ ဒီးအဂဲၤဆၢထၢၣ်​ သမူထီၣ်က့ၤဝဲလီၤ.+ ၂၆ တၢ်ဂ့ၢ်တခါအံၤ ဟူထီၣ်သါလီၤလၢ ဟီၣ်ကဝီၤအံၤဝးဝးလီၤ.

၂၇ ဖဲယ့ၣ်ၡူး ဟးထီၣ်ကွံာ်အခါ ပှၤမဲာ်တထံၣ်တၢ်ခံဂၤ+ ပိာ်ထီၣ်အခံ ဒီးကိးပသူထီၣ်ဝဲလၢ “စီၤဒၤဝံးအဖိခွါဧၢ,* သးကညီၤပှၤမီၤ.” ၂၈ ဖဲအဝဲလဲၤနုာ်လၢ ဟံၣ်ပူၤဝံၤအလီၢ်ခံ ပှၤမဲာ်တထံၣ်တၢ်ခံဂၤအံၤ လဲၤလၢအအိၣ်​ ဒီးယ့ၣ်ၡူး သံကွၢ်အဝဲသ့ၣ်လၢ “ယမၤဘျါက့ၤသုသ့န့ၣ်​ မ့ၢ်သုနာ်ဧါ.”+ အဝဲသ့ၣ်​ တဲဆၢအီၤလၢ “ကစၢ်ဧၢ, ပနာ်လီၤ.” ၂၉ အဃိ ယ့ၣ်ၡူးထိးဘၣ်​ အဝဲသ့ၣ်အမဲာ်ချံ+ ဒီးတဲဝဲလၢ “မ်တၢ်ကဲထီၣ်အသးဒီးသု ဒ်သုနာ်တၢ် အသိးတက့ၢ်.” ၃၀ ဒီးအဝဲသ့ၣ်​ ထံၣ်ထီၣ်က့ၤတၢ်လီၤ. ယ့ၣ်ၡူးဟ့ၣ်ပလီၢ် အဝဲသ့ၣ်​ ဆူၣ်ဆူၣ်လၢ “ဒ်သိး ပှၤသုတသ့ၣ်ညါတၢ်ဂ့ၢ်အံၤ နီတဂၤတဂ့ၤအဂီၢ် ပလီၢ်သုသးနီၤ.”+ ၃၁ ဘၣ်ဆၣ်​ ဖဲအဝဲသ့ၣ်​ ဟးထီၣ်လၢ တၢ်ချၢအခါ အဝဲသ့ၣ်​ မၤဟူထီၣ်သါလီၤဝဲ ယ့ၣ်ၡူးအဂ့ၢ်လၢ ဟီၣ်ကဝီၤအံၤအပူၤဝးဝးလီၤ.

၃၂ ဖဲအဝဲသ့ၣ်​ ဟးထီၣ်အခါ ပှၤဟဲကိးန့ၢ် ပှၤလၢတၢ်ဝံတၢ်နါ အိၣ်လၢအလိၤ လၢအတဲတၢ် တသ့ဘၣ်တဂၤလၢ ယ့ၣ်ၡူးအအိၣ်လီၤ.+ ၃၃ ဖဲတၢ်ဝံတၢ်နါ ဟးထီၣ်လၢ ပှၤလၢအတဲတၢ် တသ့ဘၣ်တဂၤအံၤ အလိၤဝံၤအခါ အတဲတၢ်သ့ထီၣ်က့ၤဝဲလီၤ.+ အဃိ ပှၤဂီၢ်မုၢ်တဖၣ်န့ၣ်​ ကမၢကမၣ်​ ဒီးတဲဝဲလၢ “လၢအံၣ်စရ့လး အကီၢ်ပူၤန့ၣ်​ ပတထံၣ်ဘၣ်​ တၢ်ကဲထီၣ်အသး ဒ်အံၤနီတဘျီဘၣ်.”+ ၃၄ ဘၣ်ဆၣ်​ ပှၤဖၤရံၤၡဲတဖၣ်​ တဲဝဲလၢ “အဝဲနီဟးထီၣ်​ တၢ်ဝံတၢ်နါတဖၣ်​ ခီဖျိလၢ တၢ်ဝံတၢ်နါတဖၣ်အခိၣ်​ အစိအကမီၤအဃိလီၤ.”+

၃၅ ယ့ၣ်ၡူးလဲၤဝဲလၢ ဝ့ၢ်တဖၣ်ဒီးသဝီတဖၣ်​ ဒီးသိၣ်လိတၢ်လၢ အဝဲသ့ၣ်အဘူၣ်ဘျီၣ်ပူၤ ဒီးစံၣ်တဲၤတဲလီၤ ဘီမုၢ်တၢ်သးခုကစီၣ်လီၤ. တကးဒံးဘၣ်​ အဝဲမၤဘျါ တၢ်ဆူးတၢ်ဆါ အကလုာ်ကလုာ်လီၤ.+ ၃၆ ပှၤဂီၢ်မုၢ်တဖၣ်န့ၣ်​ ဘၣ်ဒိဘၣ်ထံး ဒီးပှၤတကနၣ်ဃုာ်အဝဲသ့ၣ်ဘၣ်အဃိ အဝဲသ့ၣ်လီၤဂာ်ဒ်သိလၢ ပှၤကွၢ်ထွဲအီၤတအိၣ်ဘၣ်​ အသိးလီၤ.+ အဃိ ဖဲယ့ၣ်ၡူးထံၣ်အဝဲသ့ၣ်အခါ အသးကညီၤဘၣ်​ အဝဲသ့ၣ်လီၤ.+ ၃၇ ဒီးယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “နီၢ်ကီၢ်န့ၣ်​ တၢ်လၢပှၤကဘၣ်ကူးအီၤန့ၣ်​ အိၣ်ဝဲအါမး ဘၣ်ဆၣ်​ ပှၤမၤတၢ်ဖိန့ၣ်​ အိၣ်ထဲစှၤဂၤလီၤ.+ ၃၈ အဃိ ဃ့ကညး စံာ်ကစၢ်လၢ အကဆှၢလီၤ ပှၤမၤတၢ်ဖိတဖၣ်​ ဒ်သိး ကဟဲကူးတၢ်အဂီၢ်တက့ၢ်.”+